Friday, January 31, 2003

31 Jan 2003

年廿九。做左成日野, 又係執野, 好累。
然後到紀律部隊俱樂部吃飯, 又貴又唔夠飽又唔係好好食。

之後又到吉之島買野
好野, 多左一件衫
全個新年唯一一件新衫。唉...無辦法, 屋企窮, 唔敢買得太多。食已經食左好多去, 仲買咁多其他無謂野, 咪喇。
夜晚拜神, 我第一次唔再求神d 乜野。從前, 我會不斷的求天上地下眾仙眾神很多的事。真心愛的人會愛我, 成績會進步, 能識到酒逢知己千杯少的人, 能少一些無聊人在我身邊周旋, 能多一點錢, 能給我新電腦, 能給我PS2...能給我............

今天呢, 我甚麼都不求了。一來求甚麼都求不到, 二來, 其實我得到的已經很多, 我只多謝神(邊個神都好, 是但喇)給我這麼多好東西。至少給了我一對父母, 給了我一個家庭, 給了我一些錢(although very 手緊), 給了我一些朋友 (although 有好多我唔想見到的)... 總之總之,都算係咁喇,算係唔錯架喇。Christian 裡面有一句咩咩懷住感恩的心呀嘛。我諗我都有喎。哈哈

新年喇,大家新年開心,萬事如意。

Wednesday, January 29, 2003

29 Jan 2003


七點半起身, 訓得個三個鐘, 終於趕得切去李達三交功課。一身鬆晒。
之後去Med Can 開會, 講唔到d 乜野呀其實。之後番我個宿再講, 比較有用。年假前最後一日係宿裡面, 幾大都煮晒d 野食佢。芝士腸真係勁好食, 上海麵真係好滑, 從使只係一煲頹麵, 但係其實好好食, 又多料。其實我都真係幾鐘意住宿, 尤其無野做個陣, 真係幾"梳乎"。

然後就係China Geog, 好悶。跟住就係開會, 超頹, 激頹。然後又係AYP 堂, 仲頹。跟住行年宵, 俾我見番成個飯團咁多人一齊, 幾開心, 仲見到個Nightmare Before Christmas 阿Jack 的攬枕, 即買, 幾鐘意。

真係累到癲了, 回家即睡。

Tuesday, January 28, 2003

28 Jan 2003

原來今日要交ELT...點解我會完全唔知有咁的事。
我問個teacher 點算, 佢話, 你可以係聽朝八點半我番到入我office 之前交到俾我的話, 就無問題。
聽朝八點半? 我今晚仲要食宵喎...我完全未做過喎。唯有今晚食完之後做囉。

之後, 係夜晚, 就同Claudia and Vincent 三個人係恆生煮飯...唉。估唔到Vincent 會咁整裝出場。然後佢估唔到呢度乜野都無。然後我估唔到佢乜野都要。然後我估唔到自己為左借 oil and salt and soy sauce 要由恆生跑到落Shaw。然後估唔到Vincent 堅持一定要蛋。然後估唔到十點先有得食。然後估唔到食宵會遲大到。然後估唔到其實莊員唔係一定要到既....天呀, 人生就係充滿住好多 "估唔到"。成晚都係充滿著 "估唔到" ~~~~

食宵途中, 其實只係由火炭火車站行到德記, 竟然充滿了對我來說不少的意義。跟Gladys 談了一會, 談到了原來大家以前都是一個很 "摺" 的人。從前都不懂得也不會太願意跟別人去交談, 不會懂得去關心別人, 不會主動的跟別人說話 (現在我對不熟的人也是一樣), 也不會想對話出來應酬自己不想應酬的人...等等。原來, 天底之下像我一樣的人也不少。

跟Gladys 談這一段話的意義所在, 其實是讓我覺得有很多人, 也許, 其實都是跟我一樣的身不由己。儘管不能說, 開放了的自己是不開心的自己, 是得不嘗失的我。但至少可以說, 已漸漸的失去了從前擁有過的一點真。是從前有過純真的自己。愛跟誰說話就跟誰說話, 愛跟誰一起就跟誰一起。喜, 是暢快淋漓的喜。怒, 是斬釘截鐵的怒。悲, 是山雨欲來的悲。一切, 都是自己的。雖然沒有人會明白, 但就是因為是自己的, 自己才懂得理解, 自己才懂得擁抱這一些personalized 的心情, 想法。

現在呢? 人也變得世俗了, 整個人變得俗氣了很多很多。愛名牌, 愛漂亮的東西, 愛錢, 不愛骯髒的東西, 愛談論別人的事, 愛吃新鮮的東西, 愛執著, 愛堅持......很多很多我從前是"沒所謂" 的事都變得 "有所謂" 。其實有時想想, 也會懷念從我不是這個模樣的日子。但過去已經是過去, 我能怎樣?

跟Gladys 談了一會後, 就想了這麼多的事。然後自己走著走著。快到德記之時, 後面的 Cindy and Vincent 各叫了我一聲。Cindy 說 : 不要一個人自己走那麼悶吧。

我呆了。這一句好熟。
很像從前聽過的一句說話, 很像....到底是別人跟我說還是我自己跟自己說的話呢?

在那裡聽過?

在從前的我。

每當一堆人走在一起的時候, 我總會在一段時間之後落後, 或者變得自己一個在走著, 走著。是很自然的事。沒有人會感覺到, 因為大家都在忙著跟自己的身邊人在談著。於是, 我便一個人 either 走著旁邊或者走在後面, 一個人低著頭慢慢地跟著。我也不知為甚麼。

情形有少少像我的友誼人生。每一次, 都是那麼快的就擦出了火花, 就變了好朋友。然後, 不用多久, 熱情減退了, 或是話題減少了, 或是工作忙了, 或是興趣不同了, 或是...都不知道。都是這麼樣, 談話的對象也就不同了。
那就是一個人走著的時候了。那可是沒有人會可憐你的唷。你要自己堅持走著, 你自己要抵受著孤寂的淒楚, 你也要自己走進一個個沒有"你"的人群之中。沒有"你"的人群.....多麼的可怕。

我才突然想起, Cindy 剛對著我說話。我問: "那我可以怎樣?" 然後指著阿強跟蝦仔說:" 不如我'攝'進他們兩個中間, 問他們在說甚麼, 那豈不得意得很?"
他們笑了。我笑說:"就是嘛。算吧。" 然後自己走著。

兩步之後, 我回頭再說: "我可以不是自己一個人走嗎?" 然後走了。我好像聽到她說不知如何應這一句。可是我說的也算是真心話了。你不知怎應對這句? 我也不知。

食宵時的風吹得特別狠, 特別冷。我只捲在一角, 抱緊身子。

然後, 回到恆生樓, 做ELT 的Reflective Writing 做到 4 am。然後, 倒下了。

28 Jan 2003

唉跟據 "熱情" 的朋友好心的幫助~特此發一篇感謝廣告~多謝Wilson 是我交ELT~特此致謝~


唉...

Monday, January 27, 2003

27 Jan 2003

今天頗不高興。原因並不是因為自己不高興, 而是因為看見了別人不高興。雖然她並不是我的甚麼人, 但我見到她因為被咨詢得不愉快, 而緊張得落淚的時候, 我知道她是真心為了CC 想做點事的。

難能可貴。

其實我還是不太喜歡 UC, 不知道是為何, 這個feeling 一開始了就好像停不了的。但是我為甚麼還要這麼關心其他人是怎樣咨詢的呢? 我為甚麼還想為UCGRM 做點事來呢? 並不是因為我喜歡 UC, 反而是因為, 我比較喜歡跟大家一起的感覺。也許就是, 我比較喜歡GRM 的人吧。

知道我在說甚麼嗎? 我也很想知道。我明明有著很多的feeling inside my heart. 但我就是不知道為何我不懂得如何好好的用嘴巴說出來, 就是連用文字也不懂得了。

我只是想說, 今天的CC GRM 咨詢其實真的很厲害。有沒有必要問這麼多的問題呢? 有沒有必要問這麼留難的問題呢? Neo 像甚麼動物有甚麼關係呢? 你們攪糟了從前的地資盃跟別人有何干呢? 為甚麼人總是這麼樣的呢? 難道就是year 2 就可以肆無忌憚地欺壓我們嗎? 我們可也是成人呀, 別把我們是小孩或是小丑的戲弄。

看見CC, 竟是大部份的人都不支持殺 soc, 那一刻已頗為感動。再聽得他們的原來是因為不想崇基學院地資系的倒下而令CC 薪火未能相傳, 更覺起敬。反觀Shaw and UC 他們....唉, 跟本就沒有想過把問題解決, 而只是一味的想著如何殺soc. 很灰。我依然相信, CCGRM 仍是有希望的一個soc....只要他們別太頹的話。又不是像我們一樣的窮, 就應該多做一點活動出來, 就仍該多一點活力出來讓別人看看。

不過感動過後, 又到了私事環節。唉~~~死人Vincent~~又話唔會跟佢個莊去食宵, 我先以為佢會同我食, 點知到最後又係突然間放我飛機...咁詩雅都走唔甩架喇, Carmen 有得揀都唔會揀同我食, 咁即係點? 即係又係我自己一個番宿食囉....心酸的大鍋麵~

Sunday, January 26, 2003

26 Jan 2003

尋日, 番到屋企又做阿四, 係咁係度打臘。門又打, 梳化又打, 椅又打, 好彩唔使打地板, 唔係的話人都癲。之後自己屋企團年, 燒肉, 叉燒, 白切雞...統統都肥到嘔, 阿爸都叫我食少d。係得一味清灼菜心最清淡, 於是人人都cher 住食晒。

今日, 又係飲茶, 又係杏瓜村補習。之後又係團年, 不過係成個陳家。
祖母的身體越來越不得了, 看見她走的每一步都是多麼的辛苦...很不忍。

急景殘年, 人也殘了?
尤其有地資盃攪的一個星期, 似乎時間走得更快 ( 雖然未做甚麼 )

又一個星期了, 快到新年了。

Thursday, January 23, 2003

23 Jan 2003

今日輪到大地咨詢。

估唔到要formal 咁多。最大問題係太多時間都係放左係無謂野,我覺得。

Jerry 問我個度...我真係唔知點解佢會樣問,可能佢真係會出於好心,都係怕我會攪唔好個地資盃,所以先會咁樣問我架者。但我個一下就呆左囉,佢咁問,我答乜野好?我都唔知點解佢會咁樣問我,一早聽聞過咨政會有好多人問好多無謂或者好攻擊性的野。但係都估唔到個個都唔問就係問我一個先係問d咁的野。我都來不及反應,就答左我都認為好無謂的說話。但係可以點樣...佢地底想係我口中得到d咩資料,我唔知。我只係將實情一五一十咁講佢知,i hope he understands.
唉...好灰,估唔到我講完會俾到大家咁多麻煩,嚇到佢地唔知點算好。真係好對唔住,但係真係唔知乜野事。

唉。之後個tour guide 我都無乜心機lu。番到宿,我仲索性話俾排長聽我唔會做架喇,叫佢銷毀左我的個人資料就可以架喇。唉,趁自己仲後生,何必逼自己做自己唔想做的事呢?算喇都係,我都係鐘意做聽個個,唔係講個個。

好灰。

Wednesday, January 22, 2003

22 Jan 2003

猴年第一日, 恭祝大家人又靚, 豬又肥, 樓又貴, 仔又型, 女又索, 錢又多, 氣又順, 眼又精, 耳又靈, 總之, 心想事成。大家咁話, 恭喜恭喜。

原來我今年犯太歲。咁會點架? 我懂事以來第一次關心自己犯太歲會有乜野後果, 以前我只會覺得係一種 ok 無聊的迷信。係尋晚, 我地去左上環的濟公廟拜神, 年年皆如此, 今年亦一樣。我就順便攝埋太歲, 一條龍服務自己。

尋晚打打下 ICQ 突然間走左去睇 Pearl 的 Practical Magic。悶場甚多, 但係又幾好睇 (矛盾), 於是一睇就睇到四點半。第二朝實大獲....點起身。

果然係。年初一就已經訓極都唔醒, 要阿爸叫左好多次先醒。「好的開始係成功的一半」, 莫非我今年全年都係....傻啦~我唔會既~~希望今個猴年我會醒訓d 啦。唔好 Fire Alarm 響左成十分鐘都未醒咁樣衰啦。

每一年的行程都係咁樣, 就係番阿麻屋企拜年。今年我真係無乜新衫著, 唯有最外面個一件 Kharki 色的裇衫係可以見得下人的。又係我最愛的 Sample 店之作, 又平又靚又大件, 開心.com~

祖母大人好明顯係幾開心, 話晒都係新年嘛, 大家一家人和和氣氣咁聚埋一齊, 幾好。後尾等左好耐, 以為有機會可以見到小肥豬, 點知都係等唔切, 我地就會飛車入梨木樹拜年。梨木樹一家, 老實講, 真係年年拜, 我就年年都唔知佢係乜水, 有乜野咁巴閉要成個關家都 bing bing bom bom 咁鏟上去拜年。斗室之間, 滿載一堂兒孫。情景甚浪漫, 現實甚囉膽。個個仔仔女女都大晒, 個個都大份, 仲要天氣冷人人著衫都著到叉燒包咁脹, 逼係一間「斗室」之間, 企又唔係坐又唔係...唉。以前佢未搬屋仲大獲, 逼到...千祈唔好郁, 一郁就總有意外發生。我個時同老豆一樣 - 寧願企出大門外等佢地吹完水就走。
總結 : 悶悶悶悶悶悶悶悶 / 10 x 悶

第二站錦田。
今年, 我去探肥媽的心意突然間大左。好想見到佢。可能因為人大左, 見得世面多左, 終於深深感受得到, 呢個世界上真係會付出真心去愛你的人實在係一隻手數得晒 (又因為可能我人緣差者...其他人可能多到寫滿一本黃頁....)尤其係當我見到佢地的時候, 我忽然間想起多年前我還在荃灣的日子。望著肥媽辛勤地為我地煎蘿蔔糕的樣子, 其實我有少少感動。但係呢個 sense of 感動係邊度黎, 就不得而知。功夫茶好飲, 蘿蔔糕好食, 一切都不錯, 就是要走了。趕時間。
總結 : 半個悶 / 10 x 悶

第三站沙田瀝源。
好耐未來過八舅公的屋企 lu 。嘩今日呢度真係好多人, 比起往年幾年黎多人好多。姓關的姓岑的都到齊晒, 想唔多人都幾難。
終於見到八舅公, 好耐無見過佢。我始終都係覺得, 佢地實在係好似樣...我指八舅公同佢家姐, 即係我已經過左身的婆婆。
好似樣。
神情都似, 動作都似, 語氣都似。

忽然間, 我好掛住婆婆。好掛住好掛住。我諗起婆婆以往係最錫我的, 樣樣野我想要佢都會買俾我, 買到阿爸阿媽都話寵壞晒我。佢以前又好鐘意同我傾計, 可能係因為仔大女大唔多聽佢講野的關係。以前佢係度的時候我真係唔識得珍惜, 衣家佢走左幾年, 我真係開始掛住佢。見到八舅公咁辛苦係度煎糕個樣, 我忽然間諗起以前阿婆幾辛苦都整野俾我食個一種感動。

她是我唯一的婆婆
也是已經離我們而去的婆婆

我明白, 人生總有走完的一天。但這一天太殘酷。

太殘酷。

太無情, 我接受不了。

算吧, 新年流流咪講呢d 野。



第三站沙田乙明村。
乘勝追擊, 一到沙田就去埋八姨婆間辦館度拜年。由於趕時間的關係, 所以根本唔留得耐, 無乜機會悶。以前細個會好期待呢一日, 但係今日唔同 lu , 人又大左, 零用比以前多左, 想食乜野零食都可以自己買, 唔使係佢間辦館度搶。更何況, 熱氣呀。
總結 : 悶悶 / 10 x 悶

第四站合和怡苑。
Dinner Time~! 一見合和就知係陳家喇。不過今晚真係....
總結 : 9 x 悶 / 10 x 悶~~!!!!!!

Tuesday, January 21, 2003

21 Jan 2003

多謝我個低能mouse
我禁多一下, 只係錯手禁多左一下, 佢就幫我Back 左
我打左咁多野, 佢又係clear 晒。

你老味...鋪鋪到係咁, 打左咁鬼多野又無晒。

總之一句講晒, 今日超忙。去左Wendy 度食好味麵。Travis 聯同恆生一眾三唔識七的癲佬想con 我, 平靜無話的兩分鐘內驚驗萬分。對恆生 and Travis 要好度大減。

Monday, January 20, 2003

20 Jan 2003

今日Shaw GRM 咨詢。好得人驚, 估唔到會係咁樣。一早都聽過係咨詢裡面係會好多人係度插, 又問好多好多留難的問題俾大家, 但係點都估唔到會攪咁耐。阿培....實在係有點兒過份, 問的事真係有時太不切實際。

殺 Soc...其實我唔多支持。學詩雅話齋, 好似係度用盡方法去殺一條生命咁, 可必呢? 平心而論, 有咁多個soc 的確係有資源分配不妥的情況出現。但係實際情況係點呢?
到底大家講的資源分配不均係乜野資源, 係點樣不均, 定係點樣地重疊。
太多人上莊, 咁咪修cons 囉。
一定要十幾廿個人先成莊的話, 咪修到佢要五六個人就得囉, 實有情講架喎, 我地根本就唔係人多, 咁係一個細 soc 裡面仲強逼我地好似其他大 soc 如 Econ, BBA 等等咁樣咁多人做乜野? 無意思架喎。
太多人想呃宿分黎上莊...你點知佢上大地都係為左呃宿分? 我覺得容家豪佢當初會做聯合個 P 都有成係為左有宿分者。諗住上到大地會做野, 上細 soc 就唔係咁使做野添。咁樣的人大有人在架喎。上到大地先黎唔做野仲死喇, 係咪?
無左三個soc, 真係有心想做野的人做唔到, 想呃宿分的人係度頹做, 你有幾多或幾少個soc 都係一模一樣。
活動太多重疊...睇你點攪架者。就睇今年, 最重疊不過的都係逸之盃同地資盃。不過原來逸之盃都係想鋤下D , 食下野咁樣。同地資盃好唔同喎。如果大家係開會得多既, 有心傾好佢既, 點會有咁多野重疊? 有重疊, 咁係咪即係其實可以係聯 soc?
我地其實一早就已經係唔同書院。我地係會under 唔同的書院一齊架喇, 咁樣我地只係攪番一個under 我地書院的系會者。你話唔得, 就好似以前中學咁, 既然有咁多個社, 咁煩, 不如全部都取消晒佢, 大家都唔係屬於邊一個社, 只係屬於呢一間中學。咪幾好~~無晒競爭係度喇, 大家都係under 同一間中學之嘛

你話得唔得? 你話make 唔 make sense?

打完晒上面咁多野, 我就更得唔 make sense.

Sunday, January 19, 2003

19 Jan 2003

今朝好遲先起身。之後又係飲茶, 唔知點解非常之肚餓, 完全無晒儀態咁樣食, 食晒人地d 野....真係樣衰。

之後仲樣衰, 竟然係咁短的時間之內去左剪頭髮...我以後都唔會俾自己係趕的時間之內去剪頭髮...可能真係我老豆催得去太急, 攪到佢根本就係係度頹剪...到最後, 當然係好難睇咁樣幫我剪左個七頭....我好想死呀...天呀...超級薯嘜呀.....呢期仲要阿旺套電視劇咁heat....唉, 死得, 實俾人話呢樣話個樣。

Louis 話過我唔好再活在人地的說話之中。但係其他的人就係自己最好的一面鏡, 咁, 信唔信好呢? 到係佢地會係真心平光鏡定係惡意哈哈鏡? 無人可以exactly 話我知....

之後就去左杏花村補習....簡直係厭惡性工作, 但係為左我新買的電腦所付出的咁多咁多錢....我唯有忍忍忍。唉, 人工又低, 又無聊, 又唔係聽教聽話...天呀...係咪真係會將降大任於我架? 唔係的話要我咁樣做乜野呀...

之後, 就買左個室內無線電話俾自己。其實自己之前係想買個Garfield 電話的, 但係睇真d, 其實都唔係好好睇, 甚至有少少核突添....咁樣雖然係Garfield 都無可能逼自己去買架。唯有放棄係啦, 買過第二部黑色的, 個feel solemn 好多。

陪爸媽吃過晚飯之後, 就怱怱的趕回CU 。明天早堂, Global 的 Tutorial, 今晚回到恆生過夜吧。

又一周了。可以住宿, 可以上課, 可以跟中大一起長大的日子又少了一周。

Saturday, January 18, 2003

18 Jan 2003

....我又係打左好多字....又係一Q delete 晒....仲要係好有感而發架陰公....點解鋪鋪都係咁樣會唔小心一Q 清晒我心愛的著作架....唉吔好想爆粗呀....

Tuesday, January 14, 2003

14 Jan 2003

星期二, 做過乜野, 唔記得添
呀係, 唔記得起身上Handball, 超大獲。即刻拿一張醫生紙, 有驚無險。
之後就同埋妹豬同埋高佬一齊三個人去行馬屎洲, 所以走左ELT。馬屎洲一 trip .....

14 Jan 2003

點解會突然間禁錯掣...未打完就send 左出去...

馬屎洲一 trip......我的原意係想做一次 pre-trip 先....咁樣可以考起試上黎都唔會真係咁差。但係其實前一晚我諗我終於諗通, 所以我都係決定唔會做。但係都係照去, 當係考下自己識得幾多, 同埋當係帶下兩位未去過的兄弟姐妹見識見識一下馬屎洲係點樣。

個trip 的 feel 比起去 training 好得多。At the very least, 無咁緊張, 同埋無咁被逼。而且多兩個都係自己的熟人, 比起同一大咋自己唔識的人去好得多。所以我的心情都比較開朗, 除左驚自己搵唔到d 植物同埋講錯野之外。

之後我就好似真係去trip 咁樣一次俾佢地聽, Vincent 就自己聽自己的歌, Zia 就係度發夢同埋照相。根本完全無人係度理我.....唉.......心淡。

之後收到噩耗。阿媽竟然二話不說就炒左個工人, 完全係事先無同我講過, 仲要我番去立刻幫個細佬煮飯...嘩大佬呀, surprising D 添呀笨。突然間無左工人使, 即係我地又要番到去以前暑假的年代, 我要做勁多野, 細佬就因為唔識做 定係因為阿媽唔想佢做咁多野) 所以唔使做....天, 我諗起都驚。

總之...今日真係一獲泡, 好在我到最後都唔使煮, 但係已經夠晒煩。我怕左。

就係我臨入宿之際先整獲咁既野...都唔知好嬲定好笑

Monday, January 13, 2003

13 Jan 2003

一追要追番兩日的日記。

今日都是如常的一學。在火車途上, 忽然接到一個電話From UC.
"喂, 你到底要唔要宿架?"
"下? 乜野要要宿 你講乜野"
"衣家UC 有宿位呀, 我打過去你屋企個度問你架喇, 不過你唔係屋企ja, 所以我同你屋企人講低左, 佢地無講低你聽咩?"
"無"
"咁就咁啦, 我講多次喇。咁衣家UC 係恆生樓就有多左個宿位, 咁請問你住唔住呢?"

我呆左。

"喂, 住唔住呀"
"住住住住住.....梗住啦"

我等到一整個sem, 就是為了等今天。就是為了等我終於有一天可以有宿住。可算是終於給我等到了。可喜可賀吧。那一刻, 我還以為自己未睡醒, 還在發夢。

在走向弄Add/Drop 事而, 到UC 辦手續之事, 直至走到HSH 拿key 之前, 都很開心。不知不覺之間, 嘴裡已是不知不覺之間在輕輕的哼著歌, 步伐也變得很輕很輕, 一走一跳似的。雖然也許room-mate....與我想像的完全不同, 但不會是太大的問題吧。

終於都有一間(半間) 屬於自己的房間了, 好開心。

還有多一個excuse 給我自己買new computer...雖然會真的很肉痛。

一切的事都要做得ASAP, 所以我第一時間打電話問朋友可不可以幫一幫我砌一部電腦。然後自己就到深水去拿盡那裡的comptuer pamphlets.

好睏。明天還要上PE早堂, 希望不會起不了床。還是想想明天走馬屎洲的路線吧, 還有很多的植物 Facts 要記下來....太多事了.....還有明天帶甚麼入宿.....不是刻下就要搬進去, 也至少搬一些東西進去吧...還有明天我要做甚麼....很累了

Sunday, January 12, 2003

12 Jan 2003

本來打了很多字
但不知怎的一Q 清晒....我都唔知部電腦係度做乜野, 妖....唔再打多次喇!!!
淨係記得買左對鞋同埋睇左好鐘意的 Lord of The Rings: The Two Towers

Saturday, January 11, 2003

11 Jan 2003

可能是太累了吧, 連寫日記都懶得了/ 忘記了。今天是要到馬屎洲做Training...again. 原本想自己起身然後就去。可惜...又一次起不了床, 所以又是遲到了, 真的難看。人人都到了。

馬屎洲...其實真的有很多很多的Facts 要記住。一邊走一邊狂抄下要記下的植物名, 特性, 別名, 普遍的用法, 來源, 故事....唉。當排長叫到我去解釋山頂燒過的一片地時, 我真的不懂得要說甚麼呀。其實我會記得阿瑾說過甚麼, 但完全照抄般的說出來.....惹笑嗎? 我覺得會。總之...就是整天都很辛苦。行又辛苦, 記下東西又辛苦, 聽又聽不及, 走也追不上, 沒一刻能好好的欣賞四周的好風景。

然後排長說, 很快就會有考試的了。我甚麼都記不入腦, 怎樣考試呀? 開玩笑。我真的未能當上一職啊...可是, 你叫吧, 你盡管叫吧, 你叫救命叫破喉嚨都不會有人救你的了。人人都要考試, 只得你一個嗎? 只是得你一個不懂得裡面的所有事物。唉....怎麼人人都記得他們說過甚麼的呢? 我真的記不了那麼多的植物名, 地名, 風俗, 故事, 一定要說的話等等。當我是神童嗎?
快要考試了...

其實我真的不太想當這一個tour guide 一職, 我向來都不太喜歡做一些要對人多, 而且要對別人交代得多的工作, 所以我想我也不是這麼適合做一個tour guide. 但是嘛...我一直到在堅持著的原因就是為了未來。因為我聽見組爸就是因為做過這一種導遊, 所以一見工的時候就已經贏了幾條街。別人就立刻因為他的經驗和見識而請了他。聽起來多麼的好.......聽起來......

唉。違己交病, 真的很辛苦, 其他人, 包括看我的日記的人, 可能不會覺得是甚麼。你們可能會覺得這是出來工作必然的事, 或者這個並不是甚麼的大事等等。但我則覺得真的不太行, 很辛苦。

但我又會想, 明天我還是要出來社會, 是不是到時我又會逼著做一些我不喜歡的工作呢? 到時候的情況會不會就像現在的呢? 要是像的話, 又會不會忍不住然後又不想做呢? 現在做了一會我不喜歡的工作, 又會不會明天會比較適應呢? 我真的不知道。越想越不知道如何是好。一致認為, 不想做是因為自己真的不想做, 想做是因為純粹為了自己的未來。就是如此而已。

好苦惱.....好苦惱.....好辛苦

Friday, January 10, 2003

10 Jan 2003

到底呢個website 點用架....我都衣家都未figure out 到點樣可以reply 得到其他好心人士留低俾我的message...攪到好似人地對講完野之後我完全唔應佢咁。

好累好痛。現在剛回家, 胃痛, 人又倦。可能是因為胃痛或腸痛令我變得很無精神了。一想到明天還要到馬屎洲做Training, 就很累。現在還要教小弟溫書考試, 更累....

說起今天的事, Globalization and Development 沒有驚嚇, 也沒有驚喜。不是有趣, 也不是無趣, 不太悶。很平淡。之後影大地相, 只得我一個男孩子, 太古怪了。UCGRM 開會, 開到幾乎睡著了。Handball 堂, 幾好玩, 但要那麼快掌握一樣我完全不懂的東西, 足見吃力。中國社會...簡直折磨。有外星妖獸已經很夠驚, 更驚的是我已再無精力聽劉創楚說話下去...

跟Emily 吃過美味的眾志煲仔飯之後, 竟然大鬧胃痛。實不知何解。痛到回家...直至現在。因為之前一直都睡得甚不足, 今天的精神明顯地大打折扣。今天到此為止, 要儲精神為明天和要專心管小弟。

Thursday, January 09, 2003

9 Jan 2003

早上起來, 真的不想再起床。實在太早了, 那麼早回去就是為了那一堂很頹很頹的珠展? 唔制。於是我就多睡一會兒了。直接回大學上Research Method. 一樣的老師, 一樣的班房, 不同的級數, 更恐怖。看來又是漫長的計數的日子了...簡直恐怖, 2102 的日子真的令人想想也心寒。

下一步, 就是sit 氣象學概論的課。非常簡單, 我們GRM Year 1 教也行。午飯又是組聚, 真的誇張~可是卻把Vincent 更快的嚇走。料到他會走的, 料不到那麼快。跟Gladys 說的一樣, 不多說話的就是不多說話, 哪來這麼快就會變了不同的一個人的。其實有他在真的不錯, 我跟Gladys 也是這麼說。至少多一個男孩子在這一堆女孩子之中"沖淡"一下。日子久了, 開始覺得有一些問題, 有一些古怪, 有一些說不出的不妥。卻又未能很具體的說到出來。只能夠說想有多一兩個能比較談得來的, 又能跟我的組妹相處的男孩子join 進來。但談可容易。

世事永遠都是談可容易。每一個人也懂得說, 只是"說"....董建華也會, 誰不會?

在短短的一段百萬大道之上, 跟Claudia 談到了不少自己的事, 也談到了不少自己的感覺會想法。不錯的感覺, 很久沒有談心了。哈哈, 邊笑邊說, 一段百萬大道, 似是短, 又似長, 總是留戀那一種感覺....那一種談得高興, 卻不是為一些很庸俗, 很工作的事而談; 也不是為別人的是非, 或者其他鎖碎事而談得高興的那一種開心。我開始明白原來開心和高興或多或少有一些不同。

走了ELT, 心情反而更開朗。但人都累了...回到家裡, 還要教那一隻小魔怪溫書....到最後, 他又溫不到甚麼而失敗了。開始越來越擔心他怎麼能在明天考試.....字不會寫, 問題不會答.....唉, 點解佢唔可以生下性架...天呀

越想越不開心, 不高興。不寫了。

Wednesday, January 08, 2003

8 Jan 2003

昨夜的火鍋真的太厲害了吧, 可能因此令我睡到十時許。午飯過後, 到太古城補一堂extra 的習。那是因為他明天就要考geog 了, 所以希望我幫他補一補。多麼的令人開心, 忽然間多了賺多一次錢的機會。至少可以資助我今晚的組聚Dinner~~

然後回到中大上普通話。快到ELB 之時見到有支竹竿走過來, 定睛一看才知原來是Vincent。交談兩三句, 就爽快的跟我上去sit 堂。奇怪。我一打開課室門, 十之八九都猜到了。唉, "賤精王"......真係無俾少佢~~

之後就是我很喜歡的組聚了~
今次Rose 竟然可以到了, 本來她要去傾debate 的。到最後也推卻了。太好了, 又齊人了。吃過一餐一點也不飽的pizza hut 之後, 又是大家發癲的時候。多麼的恐怖。連組聚都想做一本記錄的簿出來, 先記錄低上一個 sem 大約組聚了五十次, 然後就由這一次pizza hut 開始為第五十一次組聚......以後每一次都會記下來。超勁, 又超得人驚....
下一次最快可能為星期日晚, Lord of the Rings: The Two Towers 的電影組聚~~~然後就是環球嘉年華了~

之後我就做了一個大膽的決定 - 在沙田看電影。其實看一齣電影真的沒有甚麼特別, 只是...1 我明天要上早堂 2 這是九點半的電影 3 我還在沙田 4 我不會屈蛇 5 回家要一小時的路程 6 明天不單要上八時半的堂, 還要捱到最後一堂(第十堂)
....會死人的唷....

電影是無間道。不錯, 我現在才看。一直到沒有人陪我看嘛。看過以後, 又不覺得無間道這電影真的一如外間的人所說的天上有地下無那樣......但平心而論, 這當然是一齣很好很好的電影, 近來罕見的了。只是想說, 並非如外間所說的好得那麼誇張....

生活不太逼人, 但不知怎地生活開始有不少的壓力在屯積著了。我也攪不清, where do they come from.

Tuesday, January 07, 2003

又係 7 Jan 2003 ?

今日竟然起到身上早堂的Handball...雖然遲左到, 唉。盧sir 已經想殺左我...上下學期都係咁樣怒遲...
九點就上完, 都唔知做乜好。Hea 左一陣, 竟然走左去sit 一堂 Chemistry in the Kitchen. 估唔到又幾得意喎, 比我想像中的好得多了。睇黎下次都係再sit 好d....呀, 定係, sit 下水哥的水文學個兩堂好呢? 連sit 堂都會撞時間, 你話我係咪好勁呢?

之後的一大截, 不說了, 盡飛, 我現在很睏了。

夜晚好不容易才等到自然足印的interview。盡炒。問題超難答, 我仲要上次無去到馬屎洲的training 跟住又無解釋到, 我諗唔使問阿貴都知道我今次係無乜機架喇。算喇, 好在我都唔係勁恨做個種人, 我都係係度諗緊自己想唔想做好。好似以前的女仔咁樣係度" mit" 花....做...唔做...做...唔做....做..........總之自己都唔知自己想點。

然後跟Candy 和 Gladys 一起離開CU。一路上有講有笑, 開心得很, 大家也談得頗投契。原來他們有很多有關外星獸的事她們都不知道, 無怪乎我跟她們說的時候她們竟可以這樣大的反應。真惹笑。縱使短短的一段路 (其實也不短的了, 從Fulton 走到火車站) , 但短短的一次談話已經令我開心不少。之前忘記的不開心都一掃而空, 好讓我有一個開心的心情去跟503 的朋友聚一聚, 吃我最愛吃的火鍋。

火鍋....真的太好吃了, 縱使我已經在這個冬天有點兒吃得太多次了, 我還是想吃。總有點兒懷疑自己是不是想逼自己逼到總有一天不想再吃任何的火鍋。食物真的很多, 多得怎吃也吃不完, 多得離譜。不單我最愛的肥牛, 還有魚皮餃, 墨魚丸, 牛丸, 芝士腸....所有我最愛的食物基本上都是多到可以無限量供應。但我真不明白, 其實我們今次的聚並不算是多人, 為何食物之多會是如此的"壯觀" 呢? 管他的, 填飽肚子才算。等到九點還沒有飯吃, 我快死了。

最開心的其實不算是火鍋, 是玩貓。Jenny Wong 家中養了兩隻頗大的貓, 一隻黑色的很不喜歡外人, 要不就是害羞的躲在被窩中, 要不就是很兇的仇視任何一個抱它的人, 還張牙舞爪, 除了對Jenny 的家人之外。貓, 狗, 我都超級非常喜歡。見到Wilson 抱著那麼大的一隻貓出來的時候, 我真的忘了肚餓, 只懂得搶著擠上前去摸摸, 去抱抱那一隻任人摸的肥貓。抱到了, 它乖乖的躺在我的腿上, 一動也不動。我卻感愛到它微微卻充滿著生命力的體溫。我只能在這一刻感愛到它的可愛。這一刻, 我不想動, 我只想時間停留在我會貓玩得最互相信任互相了解對方脾性的時候。就是如此。

夜已*非常*深。現在已經是三時許了, 我實在係眼訓到癲。各位晚安了。



另註: 多謝 Wilson 留言中的好意, 我明白了。但我也很多謝你。

7 Jan 2003

今天好冷。雖然天氣冷, 但其實我的心更冷。

今日一般的上學, 一會再說。我只想說一說我現在的景況。七時十五分我要去見interview, 四時多了的時候我便上完了所有的課堂, 但以後便沒有東西要做了。所以甚是無聊。也不想溫書, 反正剛開學每一課都只是略略提到一些introduction 而已, 實在沒有東西可溫。剛才也試過想sit 堂, 可是卻全都沒有了。

怎算? 寒風凜冽。總不可以站在街上等個多小時吧? 我沒有宿舍的, 縱使我是多麼的想有一個。但我可以怎樣呢? 我真的很累了。七點半便起床, 然後就是一整日的奔波勞碌, 要乘很多車, 又要上課。冷了, 也沒有多一件衣物讓我保暖。我帶多了衣物的了, 可是每一件都是要穿在裡面, 要有地方給我更衣才行。中大的風很大, 每一下都是震肌削骨, 冽不可擋。整天價的流連在街上, 也不能停下來, 也沒有地方給我停下來...一停下來, 就是冷了。我自己一個人, 能往哪兒去? 不錯, 我能去很多地方, 畢竟我也是一個不弱的男孩子。可是, 這麼久的時間, 這麼冷的天氣, 這麼疲憊的身驅...我只求一個地方可以讓我安心歇一歇。

我只是求任何一位有宿位的朋友行行好心, 讓我進去坐一會兒, 避一避嚴冬裡劍也似的風。

卻沒有人願意。我乞求, 真的乞求。心想, 這一次糟了, 我該如何, 沒有宿, 可到那裡?...真的乞求, 也獲得真的回絕。一口回絕。我不便再問, 也不必再問。心, 硬了, 寒了。

我只有悄悄的走了。於是, 有宿的朋友們各自回到他們暖暖的宿舍, 可以隨時走到自己的床上, 蓋上暖暖的棉被, 把自己的身子捲起來, 溫暖而陶醉的好好休息。於是, 他們可以吃著自己的儲下來的零食, 可以跟自己的同房談天, 可以閒來玩玩電腦, 也可以躺在床上跟朋友聊聊天...
於是, 我就繼續在街上走著走著。我可能會在百萬大道上的長椅, 可能像一個乞丐討食一般的坐在那兒, 冷得用盡自己最後的一份力抱緊著自己, 把最後一點的寒風拒在自己冷僵了的手指縫之間; 或者我會在圖書館中, 坐在沒有人到的一個角落裡面, 用手抱緊自己的雙膝, 然後沉沉的睡著; 或者我會在文物館之中, 一直等著等著...等到文物館都要收館了, 保安人員跟我說我要離開了的時候, 我再一次走到無情風在吹得趾高氣揚的百萬大道上; 或者, 我會在別人的宿住下面, 用著可憐的眼光, 望一望他們遙遠的燈光, 望一望他們無風的房間, 然後繼續走...然後走...還是在走......也許, 就能挨過兩三個小時了....

也許。

我不求甚麼, 只求給我進來坐一坐。我不會在你的宿房中亂走, 留下污穢的鞋印。我不會在你的房中翻箱倒篋, 不會把你的東西都一把揪出來, 然後又叫又跳。我不會不停地說話, 好讓你的耳朵生不如死。我也不會用盡你的電腦, 打盡你的電話, 吃盡你的食物 -- 我甚至可能甚麼也不會碰你的。我只會坐在門口, 免得自己的鞋子踩得你的地板難看不堪。我只會坐這兒。那怕只是坐在那兒三數個小時, 我只想大家可憐我。

但, 但就連那一點點的可憐也沒有。就連那一點點人性也得不到, 就連那一點點的可憐也不會施捨給我。

因為我沒有宿舎。 就只因為我沒有宿舎....?

我不知道。

從前我以為, 我對很多人都會有時失了信心, 不敢信他們, 不敢倚靠他們。看見別的朋友有須要的時候, 能說一句 " 應該沒問題, 我找 xxx, 他總會幫我, 就算不幫我, 也至少會替我找一個方法, 不成問題的吧" 然後真的有朋友幫他。問題得以解決。信心得以reinforce。信任, 是從心底之中無意識, 不刻意的發出來的。

好admire。 我很想有。

但只是簡單的一件事, 只是想住宿數小時, 只是想留下來避一避風, 談談天, 說說笑........

只是.....只是.....

人。動物。你怎樣分?

Monday, January 06, 2003

咁就開學。

好在第一堂就係係第九堂, 即係下午四時半。不知是好事還是壞事, 只上一課, 而且又是很頹的珠展。唉, 其實甚不想回來。

之後趕到北角報AYP, 一句 "梗係啦港大呢d 垃圾學校" 揭開戰。唉, 高低難分的兩間大學。

保壘街的小食果然很好吃。魚蛋, 菜肉飽, 燒賣...食到唔使食飯~~令人再三回味~!

聽日就要好早好早起身, 上早堂的Handball....唉....然後就係天地堂, 又要等到之後的ecotourism 的 interview...其實我真係好唔想interview, 但係為左自己的將來, 唯有要interview...好唔想做...

然後, 聽日又有503 的聚會...希望趕得切

攪組聚真係好難, 個個都各執一詞。唉。只係想大家好似一家人咁坐埋食一飯, 有幾難呀。呀, 偏偏就係好難。吹咩。



無聊的一日, 亦都係預計之中無聊的一個week 。

Sunday, January 05, 2003

環球嘉年華

睡到十一二時才起來。一起來就第一時間打電話問清楚我有沒有認承了別人去補習, 免得明明認承了別人也忘了。放別人飛機不是好事, 尤其在於補習。問了沒有之後, 也就推卻了她的反邀請。薪金太低了, 我今天又不是真的很有精神和心機。始終都想給自己一些時間去休息一下field camp 所花費的力量和精神嘛。

所以飲茶之後, 就只做一單太古城。教教下英文竟然變了地理補習班。而且他還說要在考地理之前再補一次, 嘩哈哈, 開心。

之後又回來補番呢幾份日記。然後往好好未的千登世吃飯, 再前往啟德機場的環球嘉年華。

World Carnival, 正呀!!!! 我一定要同組妹成組一齊去多一次呀!! 最開心係我竟然飛圈圈, 竟然第二個就飛到個我最最最喜愛的加菲貓呀!!!!

Garfield 呀!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

我開心到狂跳狂叫呀, 已經顧不得四周都是人望著, 尤其是那些完全那不到甚麼的其他人。Wilson and Eric said, "無可能我釣唔到架, 一個低能仔都釣到, 我都釣唔到? 點可能連個低能仔都做到我做唔到..."

咁即係你連低能仔都不如囉, 咁簡單~~YEAH~~

我同Wilson 仲玩左Batman。佢玩個時(佢話)佢自己好驚。我就見唔到佢個樣, 但係我就無乜驚過, 淨係覺得好好玩, 好想玩耐d, 個feel 好正, 好難得, 好舒服...

之後Wilson 話, 無玩到G-Force 係一個好明智的決定。

係咩? 我反而仲係好想玩。Evolution, Revolution, Top Buzz, G-Force, Musik Express, King's Loop, Merry-Go-Round, Ferris Wheel.....all that I wanted!!!

加菲貓~!

Saturday, January 04, 2003

大棠 Field Camp 第四日

三天之中最不願意起床的一天。不知為甚麼, 可能只是因為太累了吧, 累積下來的疲憊已 outrun 我可以承受的limit. 好不容易地起床和收拾細軟之後, 就啟程吃早餐。還以為最後一日應該會有所改善來挽留我們, 免得我們下一次不會再到此, 怎料...食物質素"再下一城", 我都怕左佢...食少少就算。

連續四個小時的presentation, 聽著各個大組小組的同學, 於各自的project topic 之內努力又趕快而成的觀察, 考察, 訪問, 調查, 問轉, 繪圖, 攝製, 測量, 記錄, 比較, 分析, 推論, 建議等等。忽然之間, 大家都變了極速地理家。一日之內可以把一個study scheme 由無, 變到連presentation 都出到。差點兒沒出了一整份paper 出來~! 中大果然勁野。中大的地理果然係勁野。所以各位GRM 人, 其實我們是很"近"的!

可是, 連續四小時的坐在椅上聽別人present...又可能真的太悶太長了, 有不少同學都不禁倒下來了。奇怪的是, 我竟然一點睡意也沒有, 非常厲害, 也非常奇怪。還聽完了所有他們說的話....雖然不時會發了白日夢。

然後就是最後的午餐了, 有些人似乎已走了。阿欣就更厲害了, 原來她是中大的女子籃球隊的。今天她就要打大專賽了, 在BU。中大勁野!!! 不過...GRM 果然係臥虎藏龍, 都好勁, 都幾驚。午餐...不用說了...但是其實已經比較好吃的了, 至少我覺得。

然後到了元朗市中心下車, 見到GRM 的人尤如大鄉里出城一般, 全都湧入恆香餅家之中買老婆餅...情況非常 "洶湧" !! 逼爆了一整間老餅家唷!!!

之後又吃了我愛的B 仔 西米露...不過這次我不吃B 仔系列了, 大得太恐怖了, 只吃一個雪糕西米露就已經好吃得很了。真的很好吃, 下次我回去一定會再吃。好味...好味....

之後就回家了。在長長的一程巴士之中, 睡得不知時日過了, 也就回到家了。當時大約已是五時許。

Friday, January 03, 2003

大棠 Field Camp 第三日

Field Camp 第三日, 病好了, 也是時候開工了, 希望可以用最少的時間刻劃出元朗市中心一部份的土地利用模式喇...今次我地做的範圍係教育路以南, 大棠路以西, 西裕路以東, 馬棠路(?)以北。其實係好少架者, 但係都怕做得耐呀嘛。

不過我地到最後都係頹行, 頹做。反而竟然係我行得最快, 估唔到。然後係千色廣場入面搵到一間pie and tart, 成個人都癲左咁食。太好吃了, 太久沒有再吃過了。然後, 就是買老婆餅, 買Minimelts 粒粒雪糕 (好好食), 遇見同學們在麥記吃東西, 遇見外星人(大家知邊個...成日jam 紙個個)於是急逃...

回到大棠, 吃過午飯( 無錯, 依然難食, 三日) 之後去演講廳繼續工作, 要繼續做data processing and interpreting. 等左好耐, 都無人黎, 都唔知做乜野。水哥個組得一組人係度, 個個都係訓到懵左。Lucy 個組, 除左tutor 之外, 鬼影都無隻。得番我地四個係度爭扎下去。

做野做左好耐之後, 就食飯了。我們也一起認為, 最好可以在吃晚飯之前, 可以連brief pre-presentation 都做埋就更好。結果成功了, 開心。多了很多的時間可以打羽毛球, 可以跟他們一起出外吃宵夜。

夜遊元朗, 大家選了海皇粥店。還不錯, 真的太好吃了, 比任何的大棠食物都好。之後大家一起在行元朗, 其實不太頹。漸行漸行, 就跟Queeny 一起墮後了。走著走著, 其實感覺真的很好。我跟Queeny 說, 喜歡的感覺就是這樣, 大家一起的走著, 縱是大家都說話不多, 縱是大家都不知道大家正想走到何處, 但也不介意, 但也沒所謂。至少我不會感覺得不好, 至少我不用因為大家之間無話而感到古怪, 至少我不會因為害怕對方說一些我不感興趣的話題而感到不安.......至少這一刻的感覺還好, 至少。所以我不介意一個男孩子鑽在七個女孩子之中, 所以不太介意如Vincent 所說的一個男孩子走到一大堆女孩子之中做朋友, 無尊嚴~!
大家都在走著走著, 夜已深, 天太黑, 街上的行人都漸少了。剩下的都是趕著回家的白領, 或是剛剛準備開始工作的小販。四周沒有多餘的雜聲, 也沒有擾攘的人煙, 更沒有煩人的肩摩"谷"擊......感覺....都難以寫得出來, 只想合上眼, 感受著夜裡的清風。話也說不多了, 卻是真心的。Queeny 也算是一個真的人。至少我相信她沒有必要騙我或敷衍我吧。

最後的一晚了, 又開始有一點點的不捨得。最後一晚了, 竟然終於有熱水洗澡了。因為最後一晚了, 而且我又是最後一個人洗澡, 於是"怒沖"。
因為我想試試新修理好的浴室, 所以便由得Vincent 在外面擦牙, 我就在裡面洗澡。但竟也是時間大家談談。回房準備睡覺時, 也多談一會, 把聲線壓得低低的, 也就談到了不少他自己的事。當然秘密, 哈哈哈。

睡了, 明早一早就要起來聽大家連續present 多個小時了。

Thursday, January 02, 2003

大棠 Field Camp 第二日

昨晚一次過啪左兩粒Panadol 之後, 再大覺訓, 好多了。但係, 其實個張bunk bed 都幾唔好訓, 因為頂頭頂腳。
起身之後就食早餐, 唔記得左係乜野, 好似係有燒賣有炒麵咁樣, 是但喇, 都係難食架喇...連我都唔係咁鐘意食的野, 我諗好極都有個譜。
之後就坐車出去元朗市中心, 又係行行行然後都係行。我最記得我地一齊拿住一張aerial photograph 係度搵我地係邊度, 然後我就做左我個組人的人肉GPS。
去到元朗公園之後, 就上左一個塔上面。風景好靚, 風亦都好勁, 吹得好涼, 但係周圍都係俾人寫晒d 野係度, 好核突...如果此刻並不是有那麼多的人在塔頂就好了...那一種感覺會是多麼的好...和風日麗和清風送爽...一切都是放下自己所有身份, 名字, 錢財, 工作, 憂慮的好時光....

發完夢, 就要等飯盒...等到人都懵。之後個飯盒仲要幾難食下。唉。

之後就係成個field camp 我最唔鐘意的地方...之一, 就係做問 "轉" 調查!!!!!! 我最憎就係企街, 仲要咁樣卑躬屈膝咁問人野, 仲要係咁食Lemon, 我真係唔係好頂得順。仲要咁埋Claudia 都係一個好shy 的女仔, 於是兩個都好shy 的人就一齊係度做問轉調查....唉, 唔死都有假喇係嘛?! 我又咁埋係一個好怕事的男仔...真係無鬼用, 我都唔想, 於是就揀人揀得好犀利. 手抱BB 的唔要, 多野拿住的人唔要, 老到喊的阿伯唔要, 金毛飛唔要, 豬扒唔要 (點知最多就係扒到可比如花的豬扒...仲要係度扮晒靚咁....真係如花到喊) , 趕時間的唔要, 講緊電話的唔要, 冬天都見到有紋身的唔要....咁一個元朗區可以有幾多個呢一類 - 以外 - 的人呢??? 答案就係所剩無幾了。
Claudia 都笑我怕羞...我都無野好講。無辦法, 我吸引唔到d 阿婆, even 我已經叫晒佢地做 "小姐" 咁離譜。反觀Claudia, 阿豬阿狗都肯應佢, 睇黎我都係唔係咁適合做呢種野......唯有可以咁講, 呢個field camp 令到我真係更加認識得自己更多了。

之後就終於回到campsite 了。我問詩雅 " 愛心樂園正嘛?"
詩雅先面青一青, 再用一個恐怖片的口吻說: " 正到爆喇......"

好!! 緊張刺激的抽籤時問終於都到了....我之前回campsite 的一程車裡面已經默念了十萬次 "千祈唔好抽到做問轉....千祈唔好做問轉....千祈唔可以抽到....一定唔好....死都唔好....放我入愛心樂園都唔好呀上帝...."

天有眼, 我地個組真係抽唔中, 唔使做問轉。我地做Aerial Photograph and Land use in Yuen Long 乜乜....總之個一下我都未黎得切反應, 全組十九人已經振臂歡呼.....男的感動得互擁, 女的感動到流涕 (鼻涕)。但我唔明佢地咁開心做乜, 佢地又唔係個個都好似我咁唔想做問轉。

之後晚飯, 不必提了, 一樣難食。

之後就係好玩的戲玉了! 就係大家一齊開會做野, 分工合作。我最記得係我睇aerial photo...真係睇到我死, 又睇到我鬥雞眼, 用埋stereoscope 睇埋, 都係睇唔掂, 反而仲被佢個d 咁 3D 的效果攪到我唔知點咁...我同阿 Ming 都認為, 其實就咁用肉眼睇, 會仲快仲靈

仲有Rose....嘩呢個人真係....五星級攪笑。我只係話Gordon 係度溝緊女, 而且我地要問佢少少野。我問阿Rose 不如你問一問佢呢個到底係停車場定係廢車場定係廢置空地, 佢第一句就話

"唔要!"

"唔要俾Gordon 溝?! 我叫你去問少少野咋喎~~"

之後笑爆全場...總之好笑, 呢度講大家睇完一定唔識笑, 因為根本唔好笑, 但係係要係當時先至會覺得好好笑架。

之後仲有我用Stereoscope 黎變身做ET, 又有Gary Potter 毫無防範地中了招變了ET~

總之成晚開會都超開心, 但係我地做野又勁efficient 喎, 吹咩, 我地係好勁的粗口堂, 有七個好勁的組妹仲有一個仲勁的組哥 (<--實俾人鬧死...)

又係等沖涼, 又係等頭乾先訓得, 仲試過自己試下人肉接收電視電波...就係咁樣fix 住左自己個posture 先可以睇完成個跳躍大搜查線

又一日, Field Camp 第二日完, 聽日就係要一擊即中的, 唯一一日的工作日 for the Final Presentation on the Project B.

Wednesday, January 01, 2003

大棠 Field Camp 第一日

好~正經的講完之後, 又到我Tommy 仔發癲的時間了~~
今年的一月一日除左係屋企一支公無野做訓到日上九竿之外, 仲有一個好有意義的活動~~!!!....唔係跑步游水...農曆年咩~
今日就係一年一度,全香港中文大學地理與資源管理系崇基學院王福元樓二樓一年級新生最重要的活動...之一!!!! 就係我地的Field Camp 喇,yeah!
其實之前上briefing 已經聽過呢個field camp 都唔會有得玩,所以大家都係打定輸數預左自己唔會有幾多時候可以好似以前O camp 咁盡情咁玩一鋪...尤其係睇埋個schedule 之後,有唔少人仲擔心直頭唔使訓添呀...勁多野要做,隨時要通頂finish all that!

之前一晚係除夕夜,我竟然病左! 但係我都係堅持要去一個小小的RED gathering. Sarah, 馬, Annie, 正楠, 我一共五個人去除肥馬屋企打邊爐...我最like 的gathering style~! 我終於第一次打過PS2 添呀! 真係好正呀! 開心到傻左呀! 我打個隻忍者game is called Shinobi!

番到屋企已經幾夜...所以諗住聽朝先執行李,點知...出事喇。

我以為自己會起得切身,係,無錯,我的確係起得切身,但係我估唔到我自己會係拍低左個鬧鐘之後又再倒頭大睡! 到我起身個陣已經只係剩番半個鐘都唔夠俾我去執行李,仲要係一執就半個鐘有多...終於又係趕到死狗咁,然後又遲到,唉。

搭車好悶,成程車我都係坐係Asa 隔離,大家唔熟,組妹們大家坐得咁前,我坐到車尾,完全傾唔到,被困!

我個組第一個站就係到大棠的荔枝出莊”睇水”。我地一路沿著荔枝山莊的路一路上去,然後上山路,又聽水哥係咁講,又睇呂生係咁”度水”,我又係咁抄係咁錄音,大家又係咁行,仲要係大家都係空著肚,勁辛苦,胃酸勁到爆,pH 度可能已經達0~ ......簡直係折磨......

雖然我超鐘意狗,但係 "愛心樂園" 都係令我面都青埋...佢的水尤其令我吃驚...學Travis 話齋 "臭到跌渣!"

之後終於番黎保良局大棠渡假村,開始我地的BBQ. D 野食勁少,唔知做乜野,雖然我地超級激肚餓,但係都無乜心機燒,反而係因為大家可以聚一聚再加多個Vincent 係度幾好笑,幾開心!!! 我仲做左阿四...加炭大使~

然後竟然俾我發現到有一個羽毛球場! 好野! 同Vincent 勁抽幾場,個人都開心左好多!病都好快左好多呀! 開心!

之後竟然係好多人一齊出左去食B 仔涼粉,超壯觀呀! 幾十人霸晒佢地成個閣仔,好勁呀!B 仔西米露又真係幾唔鐘,只係....只係得我同Vincent 兩個人分吃,又真係會食到我地兩個傻...食到癲,講Anna Choi 話齋~

之後食食下竟然發病...仲要黎得好快好勁.頭痛到痴線.即刻要番入營先掂.....

十幾個男仔等一個bathroom for bathing....some of them even wait since 11pm till 2 am! How ridiculous this campsite is....

就係咁, GRM 1121 Field Camp 的 Day 1 is over.

好~正經的講完之後, 又到我Tommy 仔發癲的時間了~~
今年的一月一日除左係屋企一支公無野做訓到日上九竿之外, 仲有一個好有意義的活動~~!!!....唔係跑步游水...農曆年咩~
今日就係一年一度,全香港中文大學地理與資源管理系崇基學院王福元樓二樓一年級新生最重要的活動...之一!!!! 就係我地的Field Camp 喇,yeah!
其實之前上briefing 已經聽過呢個field camp 都唔會有得玩,所以大家都係打定輸數預左自己唔會有幾多時候可以好似以前O camp 咁盡情咁玩一鋪...尤其係睇埋個schedule 之後,有唔少人仲擔心直頭唔使訓添呀...勁多野要做,隨時要通頂finish all that!

之前一晚係除夕夜,我竟然病左! 但係我都係堅持要去一個小小的RED gathering. Sarah, 馬, Annie, 正楠, 我一共五個人去除肥馬屋企打邊爐...我最like 的gathering style~! 我終於第一次打過PS2 添呀! 真係好正呀! 開心到傻左呀! 我打個隻忍者game is called Shinobi!

番到屋企已經幾夜...所以諗住聽朝先執行李,點知...出事喇。

我以為自己會起得切身,係,無錯,我的確係起得切身,但係我估唔到我自己會係拍低左個鬧鐘之後又再倒頭大睡! 到我起身個陣已經只係剩番半個鐘都唔夠俾我去執行李,仲要係一執就半個鐘有多...終於又係趕到死狗咁,然後又遲到,唉。

搭車好悶,成程車我都係坐係Asa 隔離,大家唔熟,組妹們大家坐得咁前,我坐到車尾,完全傾唔到,被困!

我個組第一個站就係到大棠的荔枝出莊”睇水”。我地一路沿著荔枝山莊的路一路上去,然後上山路,又聽水哥係咁講,又睇呂生係咁”度水”,我又係咁抄係咁錄音,大家又係咁行,仲要係大家都係空著肚,勁辛苦,胃酸勁到爆,pH 度可能已經達0~ ......簡直係折磨......

雖然我超鐘意狗,但係 "愛心樂園" 都係令我面都青埋...佢的水尤其令我吃驚...學Travis 話齋 "臭到跌渣!"

之後終於番黎保良局大棠渡假村,開始我地的BBQ. D 野食勁少,唔知做乜野,雖然我地超級激肚餓,但係都無乜心機燒,反而係因為大家可以聚一聚再加多個Vincent 係度幾好笑,幾開心!!! 我仲做左阿四...加炭大使~

然後竟然俾我發現到有一個羽毛球場! 好野! 同Vincent 勁抽幾場,個人都開心左好多!病都好快左好多呀! 開心!

之後竟然係好多人一齊出左去食B 仔涼粉,超壯觀呀! 幾十人霸晒佢地成個閣仔,好勁呀!B 仔西米露又真係幾唔鐘,只係....只係得我同Vincent 兩個人分吃,又真係會食到我地兩個傻...食到癲,講Anna Choi 話齋~

之後食食下竟然發病...仲要黎得好快好勁.頭痛到痴線.即刻要番入營先掂.....

十幾個男仔等一個bathroom for bathing....some of them even wait since 11pm till 2 am! How ridiculous this campsite is....

就係咁, GRM 1121 Field Camp 的 Day 1 is over.

往年, 都見過唔少人會寫日記. 好奇之下, 自己都有少少想寫. 但係以前已經試過寫日記, 仲要係手寫個隻, 好快就無晒心機同恆心去繼續寫下去...唔知點解做乜野都係三分鐘熱度,...算.

今次我想寫番, 其實一來係因為想上網個陣有多一樣野可以做, 二來係想發表下自己的睇法...好似好大件事咁. 其實都係想講下自己的事, 平時一大咋人, 都好少有機會會自己講番自己的事. 如果係同人d 唔熟的人一齊談天的話, 所談及到己身的事就會更少了(至少我唔係金牌口水佬, 就算算係佢自己都唔會咁touch on 自己的事)

或者你會說, 你想說話的話何不直接說出來, 要寫在日記上, 還要是網上的, 那麼"斯斯縮縮"幹什麼. 我不會爭辯, 因為我向來都是口齒不靈光那一類. 總的來說, 是因為我有太多事不想說出來...當面的說出來...而當然也有不少事是完全不想說出來的. 但若全部都不說出來, 又好像鬱在心裡似的...比較不開心. 所以都是會在這裡selectively 地 speak up.

希望...這一次寫日記不會又是三分鐘熱度