30 Apr 2006

又係十四日的大限
我又要來寫日記
showhappy 真係.... so troublesome

14 Apr 2006

Wilson 話睇完我的食評 (其實都唔算「評」﹐只能話係「記」﹐但你又唔會講「食記」咁鬼攪笑) 佢自己都打左一篇俾我睇番。我睇完再順便 scroll 落去睇佢無叫我睇的其他日記。發現到原來我地真係兩個好唔同的人

我比佢更無上進心﹐但我亦因此比佢更知足常樂 (或者「以為自己係」知足)
我比佢更小氣﹐因為我聽見佢上司咁樣鬧佢﹐換著係我﹐一定唔理後果咁死撐落去﹐我唔會明明自己係對的都俾人半屈半羞辱咁話錯﹐當然﹐根據辦公室十誡﹐咁樣等於「以後都無好日子過」。

大家都要長進﹐大家都要知足﹐大家都要成熟。

9 Apr 2006

尋晚食左南山谷。Knutsford 個間。個經歷唔係幾開心﹐所以唔係太想 recommend 大家去。

話說南山谷係食 Korean cuisine 的。咁我地一去到坐低見到佢個裝修都幾好﹐似模似樣咁。然後一坐底就送兩碟仔的泡菜來。咁我地當然就係先食為快喇。咁其實韓國餐廳﹐無論係邊度呀﹐都應該係可以任食泡菜架嘛﹐就算係唔可以大碟大碟咁來﹐你一少碟咁來都得呀。你咁細碟泡菜仔都仲居然可以話「再叫要收十蚊一份架喎」﹐我少你呀？衣家叫你俾泡菜我咋唔係叫你俾主菜我呀大姑。裝修得間舖面咁好睇﹐仲擺自己係 Knutsford 樓下﹐都竟然做得自己咁小家﹐今時今日咁樣唔得架喇﹐咪話我唔教精你喇~~

其實你咁做﹐唔單止令到d 客佢得你好小家﹐好度縮﹐仲會令d 客覺得你時時都算死草﹐呢間野d 用料都唔慌好咁樣。

咁咪即係得不償失囉﹐死蠢。

好喇﹐我忍你一獲。到上茶來﹐原來係韓國人喜愛的麥茶。我就唔太喜愛﹐於是我就想叫佢俾杯水我飲算啦﹐都係唔飲茶。

「唔好意思呀我地呢度無水﹐Bonaqua 細枝裝要十蚊一支」

仲有無得乞人憎d添？

後來我地叫左六樣野左右﹐位位二百。勁唔想俾。野食唔差﹐但味精重。但係點都救唔番個 image….實在係唔 Gur。

南山谷
尖沙咀諾士佛台底﹐金巴利道﹐Quiksilver 對面﹐麻布茶房 and Da Dolce 隔離。
地址就俾左你﹐試唔試就 at your own discretion…