17 Nov 2006 沙嗲王

前幾日屋企的鐘點唔得閒來﹐於是我地一家人就唯有出街食。咁阿爸阿媽又話係食屋企附近的快餐廳。我話頂唔順﹐食來食去都係呢幾間真係人癲。反正大家都唔係屋企我就當然趁機會慫恿佢地出來銅鑼灣食野喇。好彩老豆到最後都話好。

本來都諗唔到食乜野﹐就諗住食沙嗲王算數。諗諗下都係唔好﹐因為我同細佬都仲未病好﹐不如就食金滿庭好似清清地比較好 (咪玩啦﹐金滿庭又會係「清清地」咁喇)。但係因為晚市的時候要等四個位實在係幾難﹐於是就叫左百無聊賴的二少去左拿位先。

點知好靠唔靠就靠著個完全靠唔住的二少。全家人都等住佢開飯的時候佢竟然掛住去世貿打機唔去拿飛﹐到佢去到的時候已經係七點有多﹐咁當然係等都唔使等喇因為佢拿住廿幾號飛但係先叫到五號。老豆就最唔等得的﹐無謂要阿大老爺企係度等位咁有失身份喇。於是唯有九秒九的速度由時代飛奔去銅鑼灣廣場。

好彩新的沙嗲王地方大到無倫﹐等都唔使等直行入去就已經有位。

食左好多野。其中最豪的場面係一人一大碗龍蝦湯﹐但其實都 $ 12 一碗咁大把。佢地話如果可以有埋蒜蓉多士同個湯一齊飲就會更加正喎。識食得你呀…

果頭先叫完白咖哩豬扒飯﹐仲同佢地解釋係呢度的招牌菜做左好多年﹐上菜個陣佢地又問呢碟係乜野來架﹐食兩啖又話幾好食喎咩名呀…..攪乜鬼呀你地….

好難得我阿爸阿媽話「芝士焗雜菌」好食。你知喇﹐佢地通常都唔鐘意食d 咁「漏」的野架嘛。

另外﹐我阿媽話來到沙嗲王無理由唔食沙嗲的。我呆左一呆﹐心諗呢間野好似叫做沙嗲王但係從來都無見到有人食沙嗲架喎…..於是我地四個人十六隻眼一齊睇均成個 menu, 終於係右下角一個比「加一服務費」更細隻字的位置見到有串燒食。叫左三雞三豬。個所謂沙嗲醬不提也罷﹐唔怪得佢叫做沙嗲王但從來無宣傳佢的沙嗲。不過！個串燒幾好食﹐唔點醬仲好食。

服務唔錯﹐一按鐘就有人來。俾 80 分！

埋單 270 四個人﹐老豆似乎幾滿意。最緊要過到太上皇呢關﹐咁本王下次先可以有 bargaining power架嘛。

名：之嘛就係「沙嗲王」囉
地：銅鑼灣廣場一期 (電車路出面果一期) 九樓全層
電：2893-6667
必食：咪又係「白咖哩豬扒飯」﹐係﹐我知係好耐架喇﹐但咁耐以來都咁賣得﹐實有原因的。

16 Nov 2006 天星碼頭

越來越唔明白呢個香港到底攪乜鬼。

上星期六﹐我去左天星碼頭影相。個感覺….其實真係好令人唔捨得﹐同埋好無奈。點解我地的政府總係係度做埋晒d 唔應該做的野﹐應該做的事佢地又總係唔做的呢？

真係好唔開心。點可能話拆左個鐘樓跟住保留番個鐘的芯就叫做保留左﹐就叫做做左野？

我老豆係天星碼頭遇到個鬼佬﹐個鬼佬話 「咁同搵人來拆左我間屋打爛晒所有野﹐跟住俾番一塊碎片我留為紀念﹐有咩分別？！」

又係喎。

唉….

我都有係天星碼頭的地上面畫過許願的星星﹐都有寫過話唔好拆的字條﹐但人微言輕﹐可以怎樣？

原來﹐被強權欺壓的無奈﹐是真的可以被扭曲成為忿怒。

13 Nov 2006 CPK

CPK 呢條 PK 提議另外九位 PK 朋友一齊食 CPK

是日 Juliet 姐姐牛一慶祝。本來聽見有九個人﹐都唔知食乜野好。九個人﹐最好有間房仔呀﹐咁如果要有房仔的去食一生任食都好呀﹐九個人應該可以有一個房仔。但係要等到九點半後先可以開始食喎﹐而且九個人都係食一模一樣的任食好似悶左少少咁。為免大家話太貴同埋唔多野食﹐於是再諗。

跟住諗下不如食和民啦﹐反正 Juliet 都鐘意食和民。但係和民真係點睇都唔似係安置到十個人。

跟住諗下不如食金羅寶啦﹐但係佢地會唔會覺得成二百蚊好似好貴咁呢？

都係唔好﹐都係我最愛金滿庭好。但係….金滿庭好似得一張大Table﹐咁萬一等極都等唔到咁點算….book VIP 房又會有 minimum charge…..十個人會比較貴的 minimum charge.

跟住諗下不如食金不換呀﹐上次食個個位都幾好呀….係囉﹐都係同佢地一齊食之嘛…又食？咁即係 ban 得啦。

不如食泉章居咪得囉﹐酒樓﹐夠晒熱鬧….但咁咪好似蘇永祺果邊的「例牌」行程咁囉….又來？唔制。

食樓上的沙嗲王夠晒大地方又好食….但生日食沙嗲王好似唔係咁好….

食 Café 囉….Juliet 鐘意食 Café…..但邊間 Café 可以坐得舒服食得好仲坐到十個人一齊舒舒服服呢？聽聞 Baby Blue 好似幾好但係未試過….

如果人少的話都可以試下 Agnes B. Grill 的…但係我地十個人又咁「草根」﹐去到只會失禮於人前。

欣葉台灣料理轉左手之後綠色變紅色﹐但我係出面睇過﹐裝左電視之後勁似茶餐廳….My god!

阿拉麵館…Annie 番來個次同佢地食過

隔離魚一丁﹐唔值呢個價。

阪前壽司好食又抵﹐但要等十個位﹐我諗等到聽朝「早茶時段」就有位喇…

多番選擇底下﹐我見 openrice 上面大家都話印尼餐廳 1968 好食﹐於是就特登去試菜。格調無得頂﹐簡直係高級西餐廳一樣。於為一天都光晒的時候﹐忽然間醒起 Juliet 可能唔鐘意食東南亞的野﹐於是打個電話去買佢「食印尼菜好唔好呀」﹐點知佢真係話唔想食。大檸樂！立即埋單閃人﹐去下一間！

咁點算好呢？只係得番一日的時間﹐於是我就再上 Openrice 搏命咁搵。……..

@東京的喊面太多﹐ Italian Tomato 食唔飽﹐南翔小籠包唔好食﹐小肥羊打邊爐陣味太勁唔係個個頂得順﹐潮樓上次先去過﹐Fat Angelo’s 食物水準大降﹐清亭食過﹐燕萍都差唔多﹐泰簡單價錢唔簡單﹐紅螞蟻太 cheap﹐Pumpernickel 坐唔到咁多人﹐Towngas Avenue 可能會貴左少少﹐梁山泊直頭太貴…

價錢﹐環境﹐人數﹐食物﹐七除八扣﹐成個銅鑼灣都俾我剔得七七八八。剩低落來的﹐不外乎幾個﹐仲要係聽落都係食差唔多的野：Outback Steakhouse, California Pizza Kitchen, 同埋係 CPK 樓下應急的 Tony Roma’s.

咁選擇 Outback 同 CPK 之間﹐我諗都係先選 CPK。話晒我肯定佢夠大有位﹐唔使好似 Outback 咁逼。反正我都食過幾次﹐覺得幾好食﹐就一於選呢一間啦。

攪左一大輪﹐終於都可以安安心心咁去同咁多朋友一齊 gathering, yeah!

不過到左星期一晚﹐竟然係一坐低就俾 Janette 話「俾左三個禮拜時間你諗﹐呢d 人都淨係諗到來食 CPK 咋！早之係咁過去尖咀個邊我有 VIP Card 呀嘛！我以為你諗左三個禮拜會諗得出食d 乜野咁巴閉﹐原來都只係 CPK」

無言。苦笑。叫杯凍檸茶靜靜心算數。

===================================================


What I liked most: Fettucine with Garlic Cream (with Shrimp & Chicken, our choice); Spaghetti Carbonara; White Pizza; Five-Cheese Pizza; Classic Caesar Salad.

California Pizza Kitchen (Causeway Bay): Times Square Food Fair 13/F

另有尖沙咀店﹐海港城 LCX 內﹐但長期勁爆。

另有旺角店﹐女人街尾﹐登打士街﹐家樂商場﹐Green Box 樓上﹐1083 未有佢的商業電話登記。九點半後有特價﹐指定 dishes either $38 or $48, 但係係 supper portion (份量較少), 唔係 normal portion. 但一樣咁好食。

後記：好多 openrice 的人都話銅記分店好唔得﹐比起尖咀差好遠。尖咀係點我唔知﹐但銅記呢間好好食喎﹐同旺角一樣咁有水準﹐唔覺有咩唔妥。連之前 Juliet 係度食過話唔好食﹐今次都話「好食好多」。

6 Nov 2006

全城期待！第七代家用遊戲機的市場第一大期待霸主之後： PlayStation 3 將會係五日之後 11 Nov 於日本首推出市場。香港將於 17 Nov ！ 萬眾期待！

…..而我….個人來講比較期待佢出左老翻先買 (笑) (汗)……

另一邊廂！任天堂當年超任的強勢被 PS 一出場就打敗﹐經過 N64 和 Gamecube 的失敗之後﹐「捲土重來」之作 Wii 亦將會係 19 Nov 於北美洲首先推出 (竟然唔係日本先？！)。

而另一邊廂！銅鑼灣皇后餅店竟然執笠！阿溥今朝無飽可食﹐唯有走去 Pret a Manger 挨十幾蚊一個細到不得了的三文治…..咁樣儲錢法儲十年都買唔到呢兩部野！

========================

最近睇翻 Openrice ﹐又燃燒起我對周圍試美食的原始獸慾….有無人願意同我一齊冒「生命和心情危險」周圍試食？

24 Oct 2006

憶童年 – 鬼房

讀小學的時候﹐沒有甚麼電子玩意﹐沒有甚麼特別的玩具。於是放小息的時候的玩意﹐往往就是一些大家想像出來的遊戲。當時並沒有怨自己沒有甚麼貴的玩具﹐因為年紀太小﹐而且向來都是父母說一就一﹐說二就二。小息時間沒有 PSP 沒有 NDS 沒有 Sailor Moon 筆盒就是沒有。

現在回想起來﹐反而會感謝當時的情況並沒有得到太多的物質﹐不致於年紀輕輕就被物質的既定型態限制了思想無限性的伸展。

隨手拿來的一件文具﹐隨處逛到的一個地方﹐都可以變成一個遊戲的地方﹐大家所需要的﹐只有兩種東西。

一個充滿想像力的腦子 和 一顆純真(天真?)的心

怎樣才能表達小時候的遊戲的想像力和純真呢？要好好表達﹐應該只有「鬼房」這一個遊戲才能表達得到。

小時候一大伙朋友們都是喜愛看卡通片的﹐而且無分男女﹐女孩子都會看機械人﹐男孩子都會看 Sailor Moon﹐無論隨手拿來任何一套卡通片的情節來談都「絕對無難度」﹐於是要「引用
」情節和角色起來亦手到拿來之事。於是我們幾個朋友之間便經常開始 Role Playing.

「鬼房」其實說穿了連「房」都不是﹐只是一個室外的角落﹐放垃圾的角落﹐very much like 公屋屋村骯髒的垃圾角一樣﹐在角落的位置放了一個大型的垃圾箱﹐用來收集整個學校垃圾。由於位處角落﹐所以一般來說都是很少人流﹐而且﹐不知是因為保守固執的校風或是為保障學生起見﹐該角落其實是不準學生走近的。那一個只有大約 3m x 3m 大小的露天角落就成為了學生禁地﹐大家只可以站在 somewhere immediately connecting the 3m x3m area 之外﹐在有「瓦遮頭」的外圍遠觀垃圾角。

學校校規很嚴﹐塑造成有學生都是「萬般服從型」的。小學的年代根本沒有甚麼反叛可言。於是校長說「不可接近」的地方就真的不太敢接近。但人性的好奇心﹐就是越禁的事情﹐越要知道﹐越要參與。於是我們就對垃圾角總是有一種神秘的好奇心和情意結。

將「卡通片教育」和「垃圾角情意結」和「無中生有想像力」結合為一﹐垃圾角就無辜地成為「惡魔勢力的源頭」。垃圾房成為所有妖魔外邪來到地球 / 地面的臨界點﹐似乎整個宇宙的惡勢力都會從垃圾角對上廣闊的天空飛過來﹐或者是垃圾角旁邊一條禁止學生使用的小 shortcut (又禁止) 突擊﹐甚至是從黑色的地面上浮現出來。於是我們幾個「正義與光明的代表」就跟黑暗的勢力展開一場又一場﹐一個小息又一個小息的「大規模衝突」。

三五知己站在「鬼房」側﹐拿起「手搶」或「武器」﹐就對著天空叫嚷著有甚麼怪物出現了﹐於是大家就像很齊心的射向同一個目標 – 甚麼都沒有的空氣。然後一隻死掉了﹐又到下一隻。幾個小孩子七咀八舌的不停地報導哪裡有鬼又出現了﹐於是大家就一起「射死他」。有時候還有 description 的 – 好大個口的﹐好多隻手的﹐好多個頭的﹐好多隻一齊來的﹐(似乎「多」真係等於「勁」的) ﹐成身黑色的﹐隱形的﹐飛得好快的﹐識噴火的 – 大家避開！嘩！(五六個小朋友一齊尖叫然後鳥獸散)﹐識放雷射的﹐佢捉住左阿邊個呀﹐大家一齊救佢呀 (阿邊個呆一呆﹐諗緊「我邊有俾佢捉住喎」﹐但投入最重要﹐於是立即入戲﹐詹瑞文上身般慘叫 「呀佢要拖我走啦救命呀」)﹐如此這般﹐又叫又跑又自己想像又 follow 其他人的想像…..就這樣渡過一小息。

有時候﹐「鬼房」又會變成我們的「基地」﹐無鬼可打的時候就圍埋一堆吹吹水﹐要「出動」的時候就立即「色彩繽紛」。好感激當時我的朋友仔都是跟我一齊癲的人﹐並沒有對我脆弱的心靈作出「痴線架你」的摧毀。

早上上課之前如是﹐第一個小息如是﹐第二個小息如是﹐天天新鮮﹐樂此不疲。 (待續) (1/07 註：咪又係「無續」)

今日無啦啦做左呢個 test....以下係我的性格分析...

Big Five Word Test Results

Extroversion (48%) medium which suggests you are moderately talkative, outgoing, sociable and interacting. Accommodation (38%) moderately low which suggests you are, at times, overly selfish, uncooperative, and difficult at the expense of the well being of others. Orderliness (32%) moderately low which suggests you are, at times, overly flexible, random, improvised, and fun seeking at the expense of structure, reliability, work ethic, and long term accomplishment. Emotional Stability (36%) moderately low which suggests you are worrying, insecure, emotional, and anxious. Inquisitiveness (66%) moderately high which suggests you are intellectual, curious, imaginative but possibly not very practical.

Take Free Big Five Word Personality Test
personality tests by similarminds.com

即係咁....

我一路都覺得自己係性格有d 問題....

....但係我估唔到原來係咁有問題！......
唉...唔怪得我一路都覺得自己唔知幾時撞親個腦攪成咁

9 Oct 2006

其實呢幾日個心情真係非常差

尤其係一個人放工之後就更加係唔知想點

So much mood swings

feel so tired

我好想...搵番細個的時候果種滿足感...同埋快樂

衣家的快樂﹐...我覺得好多都係假的﹐虛浮的。 好 external 的....都唔係發自真心的...

漸漸地﹐我不禁 question 自己到底係度做乜野...then, 我應該做乜野好......

星期六有線播「千與千尋」﹐我無聊所以睇左。好感動﹐好多對白都唔係俾細路聽的﹐係俾成年人聽的﹐因為刺得好中.....

係我覺得人生最 empty 的一段時間裡面﹐我聽到白龍對迷失於鬼域的千尋講：

「千祈唔好唔記得自己的真名呀。忘記了自己的名字﹐就不懂回家的路了」

Literally speaking, 我係坐係屋企個廳中間度睇緊﹐but, 我覺得呢句好窩心......

「係呢個地方﹐沒工作的人都會被變成豬﹐所以無論幾辛苦都一定要工作下去」 - oh my god (有氣沒力地說)

「所有跟湯婆婆簽約的人﹐都會被奪去名字。她就是靠奪去別人名字而掌控一切。」

14 Sep 2006

前幾日去番景霖食﹐唔得囉。唔知佢做乜野突然間差左﹐米綫同雞翼都係一味靠咸﹐無味﹐仲要之後不停咁飲水。激死我。

早兩日無機會食到雲南米綫﹐走左去食「普洱」。嘩﹐d 野食出奇地好好食喎！尤其係我個雜綿米線耶！ Good Good 呀！

=================

Mark mark 終於都認得我 lu, 佢呢幾次出來一見到我都勁開心咁﹐發晒癲咁跳過來我度。真係好感到欣慰。

梗係啦﹐話晒我同佢都斷斷續續咁玩左成年有多﹐咁都仲唔認得我就真係要打 pat pat

不過佢都仲係好鬼曳.....

31 Aug 2006

尋日公司差唔多所有人都番晒來。乞人憎肥佬老闆 (暫叫佢做肥烏) 做到一單大生意﹐請晒全公司所有人 (其實咪又係得十二個人) 去陶源食飯。我本來都唔係好想去﹐我寧願一個人食。同埋﹐食左一年自己一個食 lunch 的日子之後其實都慣左﹐仲反而鐘意自己一個人食 lunch 多過同其他人一齊食。我其他朋友聽見之後就話：唔係嘛自己一個食飯咪好悶囉。

Well, 我份人人緣都唔算好﹐中學的時候都成日自己一個食 lunch 架喇。上到大學就更加係喇﹐有得一齊食 tea 已經好開心。所以都算係慣左一個人食。

講番果餐 lunch﹐真係好食到爆！(當然喇﹐咁鬼貴﹐陶源酒家喎) 其實佢最好食的反而唔係乜野特色菜﹐而係普通的中式點心。佢個燒賣仲要係鵝肝燒賣！痴線….

佢個花膠螺頭湯真係好飲到….我諗果一煲湯起碼八百蚊。D 湯渣多到呢…堆係隻碟上面幾吋咁高的一坐小山。有時候跟下佢地食飯真係正架。要陪笑都唔太緊要﹐最重要係好好食得來又唔使自己出錢。

仲有一次係我自己的老闆帶我落去樓下食 Inn Side Out, which is his canteen because he goes to have lunch there everyday. 又係好食到震。只不過係七八十蚊一個 set lunch﹐你可能會話嘩八十蚊喎﹐咁當然係喇大佬﹐一分錢一分貨呀嘛。Inn Side Out 的夜晚仲正呀﹐佢就係著名的「花生亂葬崗」的酒吧 – East End Brewery 喇。佢係 Quarry Bay 的小小酒吧區都有一間架。

==================

呀﹐講番肥烏。肥烏係我地公司的三個 senior 的其中一個。佢巴閉的地方係咁多丹麥鬼佬的高層之中﹐佢係唯一一個 non-“Danish White Male”, 仲要係香港人。因為佢做生意做得大同多。呢個係佢唯一一個優點﹐而佢作為一個「人」的缺點﹐就算十日十夜都數唔晒。不在此詳述….住。

佢最近做到一單大生意﹐聽其他人講係大到 “break record” 咁大。淨係分到的commission 都有六十萬﹐仲要已經係 share 左之後的份量…….嘩唔係呀嘛？！跟住當然係追問乜野船咁大隻喇﹐原來係 VLCC﹐仲要係做 BBC﹐咁我話 BBC 個 rate 唔係唔高的咩？「阿更等」三媽話：係十二年呀。

十二年？！嘩…..邊個咁大膽一租就租十二年？仲要係VLCC？

疑團堆積到今日就去找找資料…..話晒我都係少數開到 Operations System 的人喎﹐當然要濫用一下我的權力先得喇。咁當然﹐其實咁大單生意我唔使入OPS 都睇到廣發天下的 notice. 再問番三媽﹐又學多樣野。

原船主係 F, F 就將隻船賣左俾 N﹐N 就將隻船租番俾 F。我聽完之後呆左﹐攪咁多野做乜？點解 F 好地地自己唔用﹐要先賣又租番咁煩？原來呢一種practice 係 shipbroking 界係幾常見的一個現象﹐三媽仲話就算係香港地產都幾常見架。佢用比喻就話好似住宅咁﹐業主 F 唔想自己交差餉﹐交稅等等﹐就賣俾 N﹐但 F 自己又真係要地方住喎﹐於是就向 N 租番來住。咁佢點整間屋都無所謂﹐因為水電呀差餉呀等等都已經唔使佢揹上身。統統都交過俾新任業主 N。 就係咁喇。

OK, 原來呢個情況係 common 的。我都唔知添。

但係我想知咁仲有乜野 activities 會用呢個 practice 呢？而通常地產方面﹐佢地咁做又有乜野著數呢？要乜野情況先適合做呢樣野呢？幾多錢的樓以下係唔適合做的呢？香港人唔係個個都想有層樓[手查]手的咩？

Senor Preguntas!

28 Aug 2006

又補番 13 Aug 2006 的「景霖米線」

26 Aug 2006

我說蓋世你說英雄

以為佢 Just another Taiwanese. 點知唔係喎﹐又唱又跳又天才表演﹐乜 Q 樂器都識得玩﹐全部都高級‧型。好令人 admire 呀 (點解我打左咁耐中文都係唔識得打「善務」呢兩個字, 真係中文退步的「馬鹿」)。

不過好可惜﹐開得兩場。好彩….我買到飛！呵呵。

16 Aug 2006

今次再補番 8 月 11 日的 東寶小館 同埋 明記糖水

:-)

14 Aug 2006

最新 re-update 27-Jul 同埋 2-Aug 的兩次美食之旅
金滿庭 & 一生任食
來緊將會有：
始得東寶宴遊記 + 小明小明小明記
景霖正宗四川米線
雲貴過橋米線 (荃灣獨立候選人)

13 Aug 2006 景霖正宗四川米線

景霖正宗四川米線

都唔記得幾時發生的事。

晚飯時間。又係兩條「為食」的茂里﹐流連於酒池肉林的「食之半天堂」佐敦。剛剛先食完廟街甜品屋的 up- dup 糖水﹐唔太餓但都算餓。

正當我地考慮緊澳洲牛奶公司的炒蛋多士好食但係要食飽都好貴﹐而粗菜館的豬油撈飯好味但咁食法好肥﹐順德人同埋上海人的兩間舖頭又好似太貴﹐而吉野家的特盛牛肉飯其實飯多過牛多多聲﹐廟街打冷其實我覺得係呃遊客錢﹐咁就淨番聽聞話幾好食但未試過的景霖頹頹地都叫做米線可以選擇咋喎。

就去囉。

算係食過咁多間米線最闊落的﹐唔算最光猛﹐但勝在夠鬆動。

一入到去﹐嘩塞﹐發生咩事？點解會有咁香的燒野食味？米線店…最大的可能只得一個 – 烤雞翼！咪住！仲有好香的香草味﹐好濃烈呀。咁濃咁香的香草味﹐真係未試過。就連嘉威推薦的深水步「譚仔」燒出來的「土匪雞翼」﹐都未有香成咁！肥仔正一聞到﹐一雙豬耳情不自禁地擺動﹐口水從咀邊流出(噢唔好意思﹐講到佢好似 retarded 咁樣添)﹐立即叫左一碟。

等左一陣﹐兩碗米線先到。好彩我無叫辣﹐佢平時都食得辣﹐今次景霖呢碗「小辣」就真係辣到佢「小小」聲﹐唔怪得叫小辣。由於珠玉在前 (享和街) ﹐所以唔覺得呢度的米線超級特別。但絕不代表佢差﹐佢的[食送]同埋麵都好好食架！豆漿還可以﹐但又係輸俾享和街。

好喇﹐雞翼花左差唔多七﹐八分鐘先烤好﹐一上到來﹐土黃色的雞皮上面灑滿大量深綠色的香草﹐雞翼邊正在慢慢地滲出因為烤烘而溶化出來的油。看得見油是黃黃綠綠的﹐立時想到油亦可能跟這些香草有關。正在想這些油會不會其實不是花生油或粟米油﹐可能是「香草油」的時候﹐阿正忽然間提到「可能是跟香草一起醃了很久﹐所以連雞翼的肉都是骨骨肉肉都是香草油的味道﹐於是﹐一烤熱起來就…….」

也等不到他的補充﹐我就已經施展小擒拿手﹐五指成錐緊掐在手﹐一口咬下油脂迸裂﹐霎時間雞油﹐香草油﹐烤烘味﹐一拼釋放﹐一時間情難自控﹐讓嫩滑的雞肉遊走於貪婪的口腔中﹐一輪翻雲覆雨之後﹐都分不清是那一種香味了。齒頰留香﹐最是磨人。嗅得到香氣﹐但吃不回實物。

醃得如此徹底﹐烤起來如此香的﹐真的 (so far) 只此一家。可以匹敵的﹐並非甚麼其他雞翼﹐而是 Queeny 姐做過一次給我們吃的鹵水雞翼。Queeny 做的鹵水雞翼﹐據聞先醃一星期 (!!)﹐讓雞翼從骨到肉﹐裡裡外外都是鹵水味﹐再放到焗爐去烤﹐進一步將雞肉中的脂肪和鹵水混和濃縮。烤出來的雞翼﹐件件都是香味傳屋的茶色至尊雞翼。可惜只數年前吃過一次﹐就未試過第二次了。

佐敦白加士街17號伯嘉士大廈地下 (比較近九龍公園泳池)
Tel: 2375-5699

查一查 openrice, 原來仲有一間係紅磡：
紅磡民泰街17-27號黃埔新村永華樓
Tel: 2765-6855

11 Aug 2006 東寶小館 & 明記甜品

<<始得東寶宴遊記 >> + <<小明小明小小明記>>

話說上次我想去東寶小館同中同們食飯﹐但奈何好鐘意食東寶的阿朱唔得閒﹐要番工陪梁思浩玩 (後來先知) ﹐唯有放棄。不久﹐阿朱打來約人食東寶﹐今次係「崩牙黨」的人﹐應該會玩得仲癲。

點知就係放工的時候發現 Acct 果面要 release 的 report 要趕 (不嬲都要架喇) 。咁於是係佢地d fixtures 入唔切的情形之下我當然要幫手入埋一份喇。點知就係咁樣攪攪下攪到好遲先去到。去到先發現原來我成為左罪人﹐因為東寶夠晒寸﹐唔係過半數就放你入去﹐係要齊人先可以放入去喎。痴線 …咁唔怪得阿朱狂打電話催我來啦 …對唔住呀大家。

卒之我去到的時候﹐ Elvie 都係未到。再等多三個幾字﹐終於有位。辛苦大家喇﹐係咁熱的環境底下忍受咁耐就係為左要等一餐飯。 (唔怪得我帶我阿爸食的時候佢咁唔 like)

坐低左﹐原來係要搭檯的。我地七個人要半邊﹐另外就同兩 group 人搭檯。咁我來之前就已經係親愛的 openrice 上面抄低左好多大家食過話好食的菜名﹐寫成左一個 list 。 但係因為有好多架﹐所以我都係叫佢地睇下有乜野合心水的然後 choose from within﹐點知佢地係差唔多要晒咁多樣野囉撞鬼。

睇下我有無記錯我地叫左乜野先(排名不分輕重先後)：

牛油四菇 (我寫左什菇﹐比老闆笑)
墨汁墨魚麵
椒絲腐乳通菜
沙拉骨
海鮮羹
鴨汁荷葉飯
黃金蝦
風沙雞

後來要查番先記得的
豉椒炒蟶子
炸豬手
椒鹽九肚魚

最後送上薑汁涼粉

大部份食物都好好味
但要等咁耐位就真係…連我都覺得唔想等﹐咁就真係好多好多人都唔會想等架喇。之但係其實仲係有好多人係甘心咁去等位囉。

比較 surprise 得到我的係個牛油四菇。估唔到佢會炒得d 菇咁入味﹐值得一讚。墨汁墨魚麵其實都幾好食﹐但係因為佢成碟野都係黑色的﹐個賣相真係非常之唔吸引﹐少不免都會影響你對佢的觀感架嘛。通菜﹐荷葉飯同個湯都係交功課水準。蟶子唔錯﹐豬手我自己唔係太喜好所以少吃﹐九肚魚炸得香﹐抵讚。沙拉骨大家話普通﹐但我覺得好好食喎。

因為我地唔係訂位﹐亦都無話我地要雞的﹐所以去到的時候老闆 (露比哥？) 話無雞。後來我「 choke」多佢幾野佢就話要留番俾d 訂位的人﹐同佢地都唔要喇d 雞先會 release 出來俾其他人的。咁我梗係第一時間扭佢計叫佢有就記得通知我一聲喇。到後來就真係有﹐可惜我一時興奮得滯﹐係大家都已經好飽的情況之下叫左一隻 instead of 半隻。攪到大家後來食到個樣都呆滯﹐真係過意唔去。

除左風沙雞﹐另一道名菜就係黃金蝦。呢一味就真係唔使介紹。好食到震﹐隻隻蝦都又大隻又新鮮﹐咸蛋黃都係用靚的﹐所以炸出來的 quality 真係奇高無比。每一隻蝦我都連碟底的咸蛋黃汁都撈清光！絕對係港島必食之選之一。
不過﹐一分錢一分貨﹐佢樣樣[食送] 都係六七蚊 only, 但一味黃金蝦就已經 $240! 佢 menu 就話係時價。但係上次我同阿爸阿媽食的時候都只係 140 定 170 之嘛….嘩….一個風沙雞一個黃金蝦呀﹐兩大件野攪到個 total amount 不知拉高左幾多。唉﹐希望佢地食得開心喇。

後來 Gloria 都來埋。八個人一齊用凍碗飲酒﹐真係人生一大快事。如果可以的話﹐我希望我地可以好好地坐番一張自己的圓檯 instead of 咁樣搭檯法….因為咁樣傾偈真係好唔方便﹐好無親切感架！

飲飽食醉﹐埋單位位 $146。大家都豪氣得很﹐我諗除左我係攪掂左筆數之外﹐其他人都係要 150 找四蚊的﹐但係大家都話四蚊就算啦﹐咁於是有五六個人都話「四蚊就算啦」的情況之下﹐我地就無等到佢找錢就走左﹐足足比左廿幾三十蚊 tips! 嘩~~~~大家幾時變得咁豪架？！

之後﹐我地話要上阿朱屋企因為無人﹐我地可以作反﹐係佢的掩眼法 + 視線轉移大法 + 注意力分散法 + 恰你 lu lu 乜都唔識大法之下﹐佢就誘導左我地行左好遠的路﹐過晒佢屋企先有人問「好似過左龍喎」。梗係過左龍喇哥仔﹐佢住北角﹐呢度天后喇！一輪商議﹐最終﹐都係食明記糖水。

<<小明小明小小明記>>

選擇呢個咁騎呢的名做 topic 係因為明記天后分店的 size。真係好 L 細。逼到阿媽都唔認得﹐佐敦的甜品屋開係廟街旁邊的行人路仔呀﹐都無你咁逼。呢間咁的明記真係細到收買人命。

坐低﹐都費事諗食d 乜野。求其「蜜瓜西米露」就算。但係因為個人都已經幾疲累下﹐加上之前又係東寶小館「折騰」完一輪﹐更累。

果碗咁的蜜瓜西米露﹐我真係想成碗車埋佢塊面度。D 蜜瓜生到呢…好似係近瓜皮位切出來的白色肉一樣咁硬。大佬呀﹐你話我自己切開個瓜係咁都話算呀﹐家下你整俾我來食甜品都整到咁﹐你咪係想唔做生意呀。

其他人的甜品其實都無乜特別﹐反而係阿鍾的咩咩「曲奇妙脆」就幾好飲。

飲飽食醉﹐地鐵都唔想趕尾班﹐拿住手上僅手的廿蚊雞搭紅 van 怒奔回家。

5 Aug 2006

今日星期六﹐照計我就應該去游下水減下肥的....但係即如最近的兩個星期一樣﹐我都好似中毒咁﹐係都要打機。真係好得人驚﹐似足d 道友咁「拍」野﹐搣都搣唔甩﹐連我細佬都話我誇張...唉。

咁鬼武者真係好好玩呀嘛。佢真係一個出得好好的系列來架喎！...

夜晚同阿媽細佬落去食「豬肉佬」餐廳﹐好食﹐但好貴﹐唔使食咁貴的其實...不過阿媽唔聽我講﹐算。食完飯傾左一陣﹐咁先係我鐘意的 family gathering 來架嘛﹐傾得好好地地咁。唔係下下都指令式的被訓話﹐好好多。

2 Aug 2006 一生任食料理

雖然八月過左兩日咁大把﹐但係我直覺話我知呢間野好有實力﹐可以競逐到今個月的 Tommy 重點推介。

「一生任食」

睇名係咪覺得好誇張呢？之但係呢個係佢餐廳的名。佢全名好似係「一生彩食健美日式放題料理」諸如此類。Anyway 我同 Kevin 都覺得「彩食健美」未免有點嚇人同埋「娘」。一生任食聽起上來好似係「成世任你食」咁過癮﹐所以都係咁叫算數。

睇見佢平日九點半後特價 128 加一﹐又見開飯網的人讚得咁緊要﹐咪「冒」名而來囉。之但係都未夠鐘﹐就去行下街先。點知就出事喇。

九點半﹐我地兩個番到去明珠城的「一生」﹐諗住佢平日都應該無乜人﹐搭 lift 上去﹐一開 lift 門…嘩﹐點解會企滿人架？點解會企到出 lift 口架？唔該俾我出 lift 呀…死火啦今次。估唔到佢已經出左名到咁的地步添。咁唯有拿張籌然後等啦…都只不過係七號枱者…

跟住經理開始叫枱號。咦點解佢叫枱號係幾個位的數字來的？我地都係七號之嘛。咦點解佢叫數字之前有個 B 字的？咦點解佢叫數字之前仲有個英文字﹐聽落咁似 booking 的？…

BOOKING?!

唔係嘛？！訂左位的都未入得架原來？！OMG!!!! 咁我地兩個「白撞」的幾時先有得入呀？天呀~~~十點鐘喇﹐我餓到暈喇

就係咁﹐由九點半一路聽佢斷斷續續咁叫 booking 的位叫到「白撞」的位﹐足足叫到十點二先有得「埋位」。真係學 Kevin 話齋﹐早之唔行開﹐係度 book左個位先﹐仲咁老定走開去行街﹐真係 「Loligin」….

好喇﹐真係坐低。我地坐係最中心的位置。細心睇呢個場都唔細﹐而且分開左幾個 section 每一個都有一種自己的裝修。例如近 sushi bar 的地方就係米色主題﹐用竹為主。另有一個矮牆圍開的地方﹐係要除鞋入去坐低的﹐坐低左就其他人都見唔到你。新門口又有半月型的大 table。入到去又有幾間 VIP 房。整個餐廳都係用深啡木做主題。燈光較得好好﹐比金滿庭光猛但唔見得搶眼﹐做得幾好。

坐低左係四人枱之後﹐好快就有個姐姐走來同我地 brief 一次係點叫野食。一張 A4 咁大的點菜紙上面佢話有一百三十五種食物 (多係多﹐但無咁多呀嘛….)﹐每次限叫六樣 (定八樣？唔記得)。但係阿溥強烈建議大家唔好當佢地係其他 cheap cheap 日式放題一樣﹐預左佢會漏單而報大數。因為食左成晚﹐佢d 野來得再慢﹐都一定唔會漏﹐成晚入左六次單佢一樣野都無漏過。我仲特登考下佢有一樣野寫得寧捨細個「1」字﹐都無睇漏﹐好野。所以若然大家當佢係其他「十上九漏」的日式放題咁報大數就必然食爆你自己。

餓到發慌﹐於是拿拿聲入一張單先。先來一個「一生式」的蟹腳鍋..咁我諗住即刻可以飲湯架嘛…點知又係要等佢滾。當時我留意到身邊放出一張大枱﹐上面放滿碟﹐兩個類似大廚的物體鎮守住。好似自助餐派燒牛排一樣。

唔使幾耐﹐就有個經理走到場中間﹐即係我地隔離﹐用咪宣佈﹐大意係多謝大家光臨﹐依家有咩優惠時段﹐會送埋個牛肉刺身俾大家﹐要的就舉手話佢聽要幾多份等等。跟住就開始叫「第十六號枱幾多份？第十六號枱五份！第十八號枱幾多份？第十八號枱三份！…」一路咁叫落去。成場人都舉晒手﹐情況好似好 high 咁﹐我仲諗﹐呀幾識攪氣氛喎佢地。

之但係﹐我地係八十五號枱囉。佢叫左唔使幾耐就叫到我地﹐我地要左兩份﹐仲係度笑緊佢地攪氣氛﹐之後兩分鐘…仲嗌緊….五分鐘….仲嗌緊…喂大佬呀﹐好街市呀你攪到。叫極都未完﹐唉。

第二輪食物到的時候佢就停左。之後﹐又來。今次係特價飲品 (即係要另加錢喇)。好明顯要錢的野就大家都醒爬好多﹐無中招又傻更更咁舉埋手。所以今次靜好多。

野食方面﹐當然係 good 啦。叫過的野食好多﹐好多都好食﹐我試下記番低食過乜野係好食。

炸蠔 – 交到功課
炸蝦 – 超爽滑！極罕見的炸完仲咁嫩滑咁大隻的蝦！
刺身 – 有俾個心機同佢地扮靚靚先拿出來的日式放題﹐買少見少﹐值得加分﹐再者﹐刺身都算幾好﹐呢個價錢直頭係抵到震。
沙律 – 和風汁沙律﹐幾新鮮
自燒系列 – 有幾樣野係生肉來的﹐佢會俾個燒碟你﹐似韓燒﹐自己燒﹐d 肉好食到痴晒線﹐我地叫左一個﹐之後再叫﹐足足叫晒六個。
三文魚子蘿蔔蓉 – Kevin 的至愛。一濃一淡﹐相輔相承﹐好正！
牛油菇 – 幾好呀

普遍來講﹐賣相同味道佢地都做得好好。服務算幾好架喇﹐起碼我覺得佢地有做過野。我地絕對會再 encore 多次！

唔知今個月會唔會遇到可以同佢對抗的對手呢？

星期一至四晚九點半後 $128, 星期六日的 lunch 都好似係呢個價。要加一。飲品另計﹐有免費清茶。

一生任食料理
Add: CWB百德新街24-32號名珠城1樓 (要係暗角轉灣位行入去搭 lift)
Phone: 2808-0384 (你睇完我講都知訂位好d 啦)

28 Jul 2006

我諗今日其中一樣最唔開心的事就係知道「大雄」死左。
http://hk.news.yahoo.com/060724/12/1qf2w.html
http://zh.wikipedia.org/w/index.php?title=%E7%9B%A7%E7%B4%A0%E5%A8%9F&variant=zh-tw

今日搭地鐵睇 am 730, 得知多年來為「大雄」配音的無錢資深配音員盧素娟病逝。一直陪伴著大家童年每一天的「叮噹」(叫叮噹﹐我死都叫佢做叮噹﹐唔叫咩多啦 B 夢﹐難聽到死。「胖虎」？！OMG! 收皮啦唔該！俾番個技安我呀！) 卡通裡面的大雄聲﹐就此成絕音。

本來我都只係婉惜一下。後來上網睇到更多人的討論﹐發現原來好多人同我都一邧Y咁鐘意叮噹﹐又咁鐘意最原班人物的配音﹐又覺得佢地係最代表到我地呢一代的童年集體回憶的﹐一時間﹐果種隔著 Internet﹐隔著空氣﹐但係又感受到「天涯若比隣」的集體回憶的感覺﹐係空氣裡面漫延﹐係好奇妙的。
Take a look at here:
http://www.doracity.net/

唉﹐童年……感覺就似﹐因為咁樣﹐童年的某部份﹐就隨著其他不能控制的人和事﹐一齊沉到未遺忘的歷史深淵裡面。你可以望到﹐但要好用心先可以望到﹐但永遠都不能再觸摸得到﹐感受得到。

聽聞將會上畫的「叮噹之貓狗時空傳」將會係盧素娟最後一次為叮噹系列配音的作品。本來我對呢套戲無感覺﹐但作為最後致敬又好﹐當睇多一套卡通又好﹐當懷緬過去又好﹐當趁熱鬧又好﹐我都想睇。

心中迴響著同一首歌﹐一些很舊但又很親切的彩色卡通片畫面...

「叮噹呀！技安同牙擦仔佢地又蝦我啦！嗚嗚嗚....」

「離奇神化不可思議心中一想就得到…」

...迴盪著的歌

曾經的童年…..童年的曾經…..

27 Jul 2006

Tommy 七月重點推介：(又係) 金滿庭

咁耐之後先打番﹐全因為自己懶﹐寧願有時間都去打機之嘛。

話說我本來想約大家出來食下飯﹐點知就係因為我約人不力的關係﹐攪到大家都好混亂咁﹐到最後呢﹐就攪到 Anna 同 Juliet 都出唔到來食飯。於是就得番四條麻甩一齊係風雨交加的星期四晚去食飯。咁我當然就唔錯過呢個機會去食我至愛的「金滿庭」喇！Yeah~~

因為今日真係幾大風雨﹐所以我估應該都無乜人出來食飯喇卦 (滿臉自信)﹐於是就更自信地提議食金滿庭。去到銅鑼灣食通天樓下﹐嘩﹐士多啤梨你呀﹐排隊等搭 lift 的人龍長到出去 Land Crawford 門口？無野呀！喂﹐大家！今日好大風好大雨呀﹐出街食飯好危險架﹐大家都係唔好同我爭快d 番屋企喇…..嗚嗚嗚…..明明大風大雨架嘛….做乜野出來同人爭飯食喎….

坐低無幾耐我地三個就決定唔等 Wilson, 先叫幾樣冷盤頂住肚先。起碼本身係凍的﹐佢來到的時候都唔會話變得太難食咁樣啦。

花雕醉雞
雲白肉
鎮江肴肉

我諗佢地真係唔多鐘意食鎮江肴肉喇﹐因為都算係食剩左幾多。反正雲白肉就一如所料 - 好 sell 得。本來怕辣的 Jess﹐睇見個 menu 話雲白肉個 sauce 有兩個辣椒咁多都驚﹐點左一條來食之後就話「都唔辣的」。係唔辣架喎﹐唔知點解有兩條辣椒咁多。醉雞的貨色依然唔係話好正﹐不過都幾好。都係果句﹐要浸耐d 先好食。咁即係話佢地餐廳果方面無浸得夠耐。呢度要扣分。

三條友等到發「牛豆」﹐果條所謂的才子都係不見人影﹐索性唔理佢﹐叫熱野食。一諗到可以叫野食就大家都開心晒﹐呵呵。

必叫小籠包
上海排骨菜飯
雲吞雞1/4 隻
傻佬炒飯
螞蟻上樹
叉子燒餅

就係小籠包來到的關鍵時刻﹐Wilson 竟然到喇！衰人呀﹐較到d 時間咁準呀嘛﹐唔俾你食！(當然失敗喇﹐佢咩磅數得架…)

先來的竟然係小籠包。當然大家就夾到d 汁流到周圍都係。是日手勢不佳﹐向來自負夾小籠包手法出神入化的阿溥都竟然失手﹐2 out of 2 都夾爆左….你話我點對得住陳家列祖列宗…

排骨菜飯﹐大家都問點解碗飯上面有塊雲腿。是但啦﹐人地送俾你咪食囉。總之果塊唔係排骨就得喇。螞蟻上樹...好靚﹐賣相好鬼吸引﹐但係唔明邊隻螞蟻上緊邊棵樹。叉子燒餅…試一兩次都夠。傻佬炒飯就係今次的新嘗試。好正！蝦乾的味道好香濃﹐加埋少少鹹魚﹐雲腿﹐肉鬆﹐上海濃鼓油…嘩塞！真的是超屌的！ (咦點解食上海野講台灣話的？) 係我好飽的情況之下都食左兩三碗呀。下次再去都一定要叫先得。

飲飽食醉。醉雞炒飯都食剩左﹐大家都捧住個肚叫飽。忽然﹐係呢個時候﹐有一道謎之聲傳出：

「你捨得唔食佢地的桂花酒釀丸子咩？」

阿溥的小宇宙又突然爆發﹐兼且煽動其餘三位無辜的肥仔﹐一齊叫甜品。你媽咪呀﹐一個二個話飽﹐碟炒飯都未食晒﹐我一話不如食甜品者﹐就一個二個即刻睇 menu, 仲一人叫一樣添？！你睇你班人幾 cheap 呀真係 (咁你自己呢？酒釀丸子…)

如是者﹐Jess 同 Wilson 就 share 一份豆沙鍋餅﹐Eric 表演鯨吞高力豆沙﹐我就繼續我甜到漏油的丸子之旅。

埋單位位 $145。係貴左d ﹐話晒有食剩﹐又四個都係男仔。

Add: CWB Times Square 食通天十樓﹐最多人等位的就係
多人時候可以試下搭巨型貨 lift ﹐幾得意﹐不過好慢。

Phone: 2506-2525
基本上無得訂位﹐有得訂都要六點十五分之前入座﹐蘇州過後無飯食。一係就俾個 minimum charge 訂 VIP 房﹐幾正架﹐圍起上來都係百零蚊個人之嘛﹐金滿庭咁的 quality ﹐俾得過。

27 Jul 2006

Below is copied from the Internet, I've added some comments to some of the lines....kind'a interesting, really!

TVB劇集的99個常規鏡頭

01、聽到噩耗，手中的碗一定會掉到地上碎掉。 (Tommy 按: 近來興杯多過碗)

02、遭遇突變，傷心難過時沖到外面，天氣一定是打雷下暴雨。(Tommy 按: 係喎﹐可以考慮下落雹﹐又係近排興)

03、掉到懸崖底下一定死不了，因此，跳海跳崖是百試不爽的逃生法。(Tommy 按: 咁你咪試下囉)

04、直覺一般總是對的，不祥的預感總是應驗的特別準，算命先生的話一般也挺準。(Tommy 按: 若果有條友不停咁「預言未來」但係無句中﹐我諗你梗係睇緊周星馳)

05、臨死前的話一定要說完。(Tommy 按: 中呀中呀！)

06、不敲門闖進去一般會遇到兩件事，上吊和洗澡。(Tommy 按: 仲有捉姦)

07、女主角或男主角一般在一部電視劇中至少洗一次澡。(Tommy 按: 嘩老世﹐你睇緊乜野片呀….)

08、女扮男裝被識破一般有以下四種方式：帽子被打掉，掉進水中，碰到胸部，換衣服被看到。(Tommy 按: 仲有好多 18 禁的方法…)

09、好人躲進府中，任壞人怎麼搜一般都搜不到。(Tommy 按: 中呀！間間屋都係歸雲莊來架﹐搵極都搵唔到。不過話時話﹐搵到的話個效果會好好笑….)

10、一般壞蛋boss第一次都死不透，總要垂死掙扎一下，非要再被砍一刀再死。(Tommy 按: 中呀﹐通常壞蛋都係九條命﹐主角就有十八條命)

11、大戰之前一般都有意中人贈送護身符。(Tommy 按: <<蜀山>>麼？)

12、奪刀（包括剪刀）的結果一般是一個人被割傷。(Tommy 按: 中呀中呀！仲要高速噴血！)

13、電視劇中新出現一個配角，一般接下去發生的事情（和案件）就和他有關。(Tommy 按: 無關的出現來做乜野？)

14、逃跑的時候，要不就是逃到懸崖；要不就是逃到闊地，然後周圍突然殺出大批人馬。(Tommy 按: 中呀)

15、太師一般都是壞蛋頭子，不管他姓什麼。(Tommy 按: 又係喎…)

16、對一句重要的話常常一下沒反應過來，之後又重讀一遍，這才大吃驚訝。(Tommy 按: 弱智的麼)

17、擋在男女主角之間的第三者的下場一般都是死。(Tommy 按: 以前就係﹐衣家第三者的下場分分鐘好過主角)

18、久別重逢的關鍵時刻，電話總是不合時宜地響起來。(Tommy 按: 咁現代的…)

19、逃跑時，在山上走路時特別容易拌腳或者摔跟頭(Tommy 按: 你有無試過逃跑架…)

20、先拍鏡子裏面或湖面的倒影，之後轉到真實場景，是影視拍攝的常用手段。


21、世上總有兩個長得一模一樣的人。(Tommy 按: …….)

22、爬山的時候總會踩到一個石頭一滑。

23、心情不好，事業不順時就頭髮散亂，長滿鬍子（武俠片中，本來沒有鬍子的男主角這時候就會留起鬍子）。(Tommy 按: 咁我咪日日都心情唔好事業不順)

24、人一死，鏡頭一轉，就是一張黑白照片。(Tommy 按: 作者睇來係二十年代的阿嬤)

25、女人突然感到噁心只有一種可能，就是懷孕。(Tommy 按: 男人突然感到噁心只有一種可能﹐就係知道自己的女人懷孕)

26 、戰爭片中常見場面，地平線盡頭逐漸出現部隊。(Tommy 按: 鬼軍珠？！)

27、表現時光飛逝一般有兩種方法：1、用字幕說明多少年後，2、主人翁作一個動作（如騎馬，跑步），做著做著就突然長大了。(Tommy 按: 中呀中呀！咁多年都無變)

28、阻止敵人的最後一招是抱腿，而抱腿的結果一般都是壯烈犧牲。(Tommy 按: 抱腿？Yoga?!)

29、衣服濕了，燒火烤衣服或避雨一般都會發生緋聞。(Tommy 按: 現實都係呀)

30、比武時兩人對峙，一般都要按照目光、表情、姿態的順序仔細描述一番。(Tommy 按: 所以先好笑架嘛)

31、女主角傷心的時候，跑呀跑，最後一定是抱著一棵樹開始哭。(Tommy 按: 或者燈柱。…都話女人鐘意d 又硬又直的野架喇！又唔信我….)

32、壞人偷偷向主角開槍，一定有一個人突然在後面說"小心"替主角擋槍。(Tommy 按: 呢d 叫「謎之聲」…)

33、一旦失去工作，又急著要錢，就去（或揚言要去）碼頭扛麻包。(Tommy 按: 唔係作奸犯科咩？)

34、壞人將好人壓倒在身下，一般都會雙手舉刀高舉過頭來作致命一擊，不過一般此時黃雀在後，最後死的還是壞人。(Tommy 按: OMG! 好經典呀！)

35、武林最厲害、最有名的武功一定是一門邪功。(Tommy 按: 呢個世界就係咁﹐正不能勝邪！)

36、生氣的時候會隨手拿起附近的東細砸在地上撒氣，因此在主人生氣時上茶，那茶碗一定會被砸碎。

37、羞辱別人總是讓對方鑽過自己胯下。(Tommy 按: 經典！)

38、敵眾我寡時，總會有人自願殿后，最後壯烈戰死。

39、武俠片發生的門派一般都是武林第一大派，其掌門是武林盟主。

40、為了表現一方武器占優，總要讓另一方被砍出幾條傷口。(Tommy 按: ???)

41、“放長線，釣大魚”是最常用的伎倆。(Tommy 按: ??? x 2)

42、閉關練功的時候一般會出事。(Tommy 按: 都唔係呀)

43、壞人發的毒誓一定會應驗。(Tommy 按: 邊個發的都應驗架喇﹐唔信你試下)

44、一旦放別人走，就說：“你走，走的遠遠的，我以後不想再看見你。”

45、夫妻一齊死去總要把手握在一起。(Tommy 按: 咁唔係你想點)

46、一開始就喜歡的後來會變成愛恨交加，一開始不太喜歡的反而有可能終成眷屬。(Tommy 按: 中呀中呀！衣家都係咁！)

47、骨灰一定灑入大海。(Tommy 按: 未必….)

48、即使在古代，也特別講究一夫一妻（男主角一般只會在諸多紅顏之間選擇一個）。(Tommy 按: 你話係咪多餘)

49、被人罵急了都是一個大嘴巴扇過去，而被打的人一般會嘴角流血。

50、權傾朝野的權臣，不論是太監還是王爺，稱號都是九千歲。(Tommy 按: 咁九千歲真係一個好威的名來架嘛)

51、古代女主角死了，一般都放到一條船上，上面鋪滿花。(Tommy 按: 我張床都鋪滿花架喎….)

52、古代男主角的隨身書童肯定會與女主角的貼身丫鬟對上眼。(Tommy 按: 嘩唔係嘛！…)

53、抓個人質是逃跑的最好辦法。(Tommy 按: 而人質通常都係最抽得果條友﹐於是逃跑果個就仲慘)

54、凡是不知該說不該說的話肯定是要說出來的。(Tommy 按: 哈哈哈哈！….睇左五十三條﹐終於有一條係真係好笑架喇！….好中 point 呀！)

55、當被問道“想聽真話還是假話”，所有人都會選擇聽真話。(Tommy 按: 而通常「真話」都係假的)

56、電視劇中有釣魚的鏡頭，一般都是兩個人在談話，但談話結束時肯定會釣上一條
魚。

57、頭撞到牆上一般都有個釘子，很多人就是因為這個莫名其妙的死了。

58、打電話時因為猶豫半天不說話，對方也不掛。(Tommy 按: $80 就有900 分鐘喎﹐使乜收綫？)

59、喪失記憶的人最終一定會蘇醒，但他選擇的不是原來的生活，而是喪失記憶後的生活。

60、所謂最後一次，以後洗手不幹，一定會出事。(Tommy 按: 我日日都話想唔撈架喎﹐咪又係咁)

61、想偷偷溜走時總是碰到一個帶響的東細。(Tommy 按: 好中 point 呀！)

62、逃跑的時候，一般找個地方躲起來，等追的人沖過去，再出來。躲藏的地方一般是籮筐、草叢。

63、神秘之地外面都立個石碑“擅入××者死”，不過進去一般都沒事。(Tommy 按: 我間房..)

64、第三者欲拆散原來的一對，常用辦法是故意讓一方看到自己與另一方親熱。(Tommy 按: 萬試萬靈)

65、穿越時空的人，不論 是去未來還是會古代，都會在新的環境裏生活的更好。

66、描寫非常害怕就給一個褲子濕了的特寫。(Tommy 按: 你睇咩劇集架大佬！「庇護工場傳」呀？！)

67、電話總是要一直響到有人接為止。(Tommy 按: 你打電話唔係咁的嗎？)

68、不知情的人在犯罪現場發現兇器，總要撿起來看看。(Tommy 按: 然後印上自己的指模)

69、晚上（或清晨）偷偷回屋肯定會被發現。(Tommy 按: 之咪就係我囉)

70、第一次試驗新發明（特別是火器）肯定會失敗。(Tommy 按: 愛迪生發明電燈泡失敗左過千次)

71、救過的人以後一定會在關鍵時候幫上忙。(Tommy 按: 中呀中呀)

72、逃跑、打鬥的時候一般都會把路過的小攤弄得亂七八糟。(Tommy 按: 咁先好睇架嘛﹐有幾可呀)

73、掀蓋頭一般不會見到想見到的臉。(Tommy 按: 都話結婚係殘酷架喇)

74、電視劇中的高學歷者往往不是什麼好人。(Tommy 按: 現實都係啦﹐挑！)

75、看見心愛的人睡在床上，一般都會給他蓋被子。(Tommy 按: 你可以選擇除晒佢d衫的….)

76、說在路上還有多少分鐘就到肯定不會按時到；同樣，到對朋友或家人說：“你等會，我一會兒就回來”的人一般都不會按時回來。(Tommy 按: 之咪就係我囉…)

77、一段談話結束，在一人離開時，另一人會突然說：“××，謝謝你。” (Tommy 按: 係日劇嗎？)

78、給別人酒裏下毒後， 在別人喝的時候一定會盯著對方。(Tommy 按: 我阿媽逼我飲涼茶個陣都係咁)

79、懷孕期間流產的概率總是特別大，造成流產的原因大多是從樓梯上滾下。而且一旦流產就很可能喪失生育能力。(Tommy 按: 仲有撞車)

80、一旦得了絕症，就故意把自己的男朋友（或女朋友）氣跑。(Tommy 按: 中呀中呀！好中！)

81、主動摘下面具的人為女性的可能性比較大。

82、被打中伏在馬背上肯定死不了。(Tommy 按: 咪就係！都痴線的)

83、男女相愛一般都用“金風玉露一相逢”那首詞。(Tommy 按: 咩來架！？)

84、勸說人的理由都是：“你要是為他好，就……”。(Tommy 按: 勸人的對白來來去去都係咁架喇)

85、劇中人物（特別是古裝劇中）總有一個經常聚會的餐館。(Tommy 按: 係咪怡紅院？)

86、劇中人物對只需回答“是與不是”的問題一般都不會直接回答，或者不回答，或者顧左右而言他。(Tommy 按: 最後一個選擇係「直接回答」。咁3 out of 4 的選擇你都要左﹐仲想點呀大佬)

87、物體從高空落下，一定要拍一個落下的鏡頭。(Tommy 按: 花咁多製作費去拍一個咁的鏡頭﹐唔係唔拍呀嘛？！Matrix 咁樣用 bullet-time 來拍添呀！)

88、當聽到自己被懸賞時，一般都要對價碼做一個評價。

89、真正的兇手總是因為言多必失，說出了自己本來不應該知道的東細而暴露。(Tommy 按: 似無知的女主角多d 喎)

90、兩人交談完畢，一人離去，總要拍攝一下另一人此時的表情。

91、用洗澡、睡覺來掩飾是常用的手段。(Tommy 按: cover what?)

92、惡習難改的人一旦表示要痛改前非，他就離死不遠了。(Tommy 按: 事實的確係咁)

93、一個人住院，總要先拍一下手術室外人的感受。

94、縫衣服的下一個動作就是拮到手。(Tommy 按: 唔通拮到腳咩！)

95、信上看不清楚的字肯定是關鍵字。(Tommy 按: 現實都係呀。學校公司出俾你的信﹐最緊要的位一定係用埋d 你查完字典都唔知佢講乜的字句)

96、心慌的時候開汽車門一定會掉東細。

97、撤退的時候明明沒人追趕，非要有個人自願留下來，說：“你們先走。”而這個人在接下來一定會出事。(Tommy 按: 無謂式英雄主義嘛)

98、以前認識的人的重逢總要因為種種原因而錯過，但最後一定會重逢。(Tommy 按: 電視總係完美的)

99、一陣劇烈咳嗽後用手帕捂嘴，一般都會吐血(Tommy 按: 吐第二d 野會以為你賣 M 巾廣告)