尊嚴, 原則, 堅持。

有個香港朋友係外國生活左一排番番來﹐席間提到佢都挨得好辛苦但只係想活得有尊嚴。我呆一呆﹐話係香港地已經好耐無聽過有人講「尊嚴」呢樣野。為生活﹐尊嚴值幾多錢？堅持值幾多錢？唔值錢。

佢話﹐你唔係第一個﹐前幾日我同我另一班朋友講起﹐佢地直頭呆完之後 high 爆要大叫「飲杯！」添呀。

我想話﹐我之前雖然只係做書店﹐做一樣人人都以為好 hea 好舒服的工﹐但都真係試過有高層「開解」我的時候講：「做人有原則值幾多錢？堅持值幾多錢？唔值錢。」

我用左好大的氣力﹐都說服唔到自己 「唔好信佢」。

我信﹐我信﹐係香港﹐原則﹐尊嚴﹐無謂的堅持﹐都係唔值錢的﹐都係無謂的。

我已經信。

因為專注‧所以專業

「因為專注﹐所以專業」是一個廣告的 tagline. 最初聽見的時候覺得比較奇怪﹐似乎撰稿員只是想用「專甚麼」來做一個前呼後應的 tagline。

後來在這個書店的小位子做得久了﹐竟然就明白到這一個的道理所在。

同樣的十件工作﹐同樣的十個步驟。A 和 B 兩個工作單位﹐都是要求所有員工都懂得做 10 x 10 = 100 個步驟。在一個開門做生意的小店子來說﹐這也是無可厚非的。但要懂﹐不等於要天天都做。

A 的工作單位﹐五位員工﹐都被要求「輪流做所有工序」。於是﹐每天一定時間﹐就會有「內部換更」的事情發生。早上十時﹐各人做一件工作﹐每人都要做開首的五個步驟。到早上十一時﹐到了換更時間﹐另一個人就會接上﹐做餘下的五個步驟。原先的同事﹐就去做其他工作﹐或者接手另一位同事﹐做的另一件事﹐的第六個步驟。早上十二時﹐又再換﹐未做完的﹐交下一位做。

這一個工作程序﹐還有幾個極度非常十分之 UNREALISTIC 的前設：
1. 這店子是沒有顧客﹐沒有電話﹐沒有 E-mail, 總之不會有其他人和事打斷那十個步驟的。
2. 每個人都剛好做到第五個步驟就換更
3. 而且人人都速度效率一致
4. 換更的時候不須要花時間交代做到甚麼地步
5. 下一手可以立即上手
6. 下一手的人不會問你問題﹐而
7. 你亦不須要問上一手你剛剛 send 出了的 email 在那一個 folder?
8. 只有十個工作﹐每個工作只有十個步驟。而且﹐每個步驟所須時間相若
9. 不會亂插工作序進度

A 單位的好處是：它實現了「人人都懂得所有步驟」﹐所以﹐最令管理層頭痛的「所有事都只得某君知道﹐某君請假或更甚突然消失了﹐就沒有一個人可以接得上」。

管理層覺得用了 A 的方法﹐實在妙極。現在人人都知道和做過 100 步驟﹐而同每天都做﹐管理層不會再聽到有客人投訴「乜你地d 野淨係得阿邊個一個人識架咋咩！？」這一個挑起每條神經線的問題。

非常好。這一個問題不會再出現。因為根本不會有一個人知道任何事情的全面真相。

人人都係「識d 唔識d」﹐就不會有人「識晒」而又有人「唔識」。 太好了﹐所有經理都安枕無憂。 不是很完美的結局嗎？

-----

B 的工作單位﹐一樣的五位員工﹐一樣的 10 x 10 步驟﹐一樣的情況。

不同的是﹐每一個人只負責兩件工作﹐二十個步驟。他們受訓的時候﹐都聽過或做過其他人要做的八十個步驟。但學過了就不會再每天都「插手」。你懂了﹐但不必再每天都做﹐須要你的時候﹐你不會是白紙一張﹐可能會很生疏﹐但起碼懂得過。

好處是：其餘時間﹐每人專注於自己的二十個工序上面。有突發事故﹐都還可以有空間「吸納」更多步驟。不單效率大增﹐而且越做越專業。更會令員工容易有歸屬感﹐最基本﹐是回到店子裡面﹐你起碼知道有一個地方﹐是你的辦公地方。你起碼可以放一個杯子﹐放幾件文具﹐也不會被人說成「這是公眾地方﹐你放了自己的東西別人放哪？」這等令人毫不會有歸屬感的說話。

壞處是：管理層最怕得要死的惡夢：「乜你d 野得阿邊個知架咋咩？！」 一旦有任何人提出這一問題﹐managers 都幾乎會用最高警戒級別去應對......

==========================================================

所以我的工作單位行的是「B 制」。我很喜歡﹐起碼我不會迷失﹐不會混亂﹐不會浪費時間 pick up 其他人剛做過的事﹐不會「所有都插手做反而所有都不懂」。

===========================================================

二百三十幾年前﹐有一位蘇格蘭人﹐到了一所做「大頭針」的廠房參觀。當時的「專業」技藝﹐主導的仍是每位工人「由頭到腳」包辦一切。這樣的工作效率下﹐蘇格蘭人發現這十數個工人每日的總和可以做最多數十個大頭針。

但若實行分工制﹐每位工人只專注幾個工序﹐得出來的結果﹐是同樣的工人﹐同樣多的工序﹐廠房能夠生產出來的大頭針﹐每日四千八百個。

We're talking about 四千八百個和數十個之別！

蘇格蘭人大開眼界﹐決定要把這件事和他的其他見解結集成書。洋洋數十萬字論文﹐作為開首的第一章﹐我相信他有更多深奧的理念可以放入第一章。但他沒有。書成﹐第一章第一節第一部份﹐寫的﹐就是「論分工」。

我不是他﹐不知他的腦在想甚麼。但這一個 prime chapter, 放的﹐應該是最擲地有聲的硬道理﹐最簡單﹐最有力的鐵一般事實。

這一本書﹐直至二百幾年後的今天﹐仍被視為經典中的經典﹐不朽中的不朽。所有略懂最基本經濟原理的人﹐無一不識無一不懂。

==========================================================

但事實呢？

Open Office

其實我覺得 Open Office 真係好好。

當 Director 同你都係一齊坐的時候﹐其實係會無形中令大家的士氣都好得多。以前我唔識得欣賞﹐成日都覺得老世就咁坐係我隔離的時候好大壓迫感﹐要蛇王的話又好唔方便(HAHA)。但依家諗番﹐其實如果佢獨霸一間大房然後窮凶極惡﹐我寧願佢坐出來窮凶極惡。

不過算啦﹐老世係好人的話﹐坐邊度都係好人﹐係衰人的話﹐你都唔想同佢有「大家坐埋同一條船」的感覺。

跳海

側聞本公司的 Management Trainee Programme 又開始招聘

唔明白的是﹐點解 MT Programme 要跳海？

仲要係去丹麥跳波羅的海

莫非成功跳海的﹐就可以成為獨當一面的經紀？

如果肯挨凍跳海游番個靚水﹐就會「掂」

咁我咪做股東都綽綽有餘？

大失預算

咩叫衰多口？

例如你話自己份工好得閒﹐白「逗」人工係度齋坐。一心以為自己加左人工之後回巢都係一樣齋坐唔使做。好喇﹐衰多口﹐依家終於做到趴係度。

我都未試過d e-mail 係覆極都仲有的。又未試過d 人做鑊的速度竟然係快得過我補的速度。

依家﹐死人 Oracle 的防盜器仲壞緊﹐叫到成層樓都聽到叫左成兩個幾鐘﹐就來人都癲。馬克王子係度睇緊醫生﹐未有 results 出。大隻咪俾落的野﹐死線就來到。

都話架喇﹐所有騎呢野都係有個習性﹐就係一係唔來﹐一來﹐就闔家一齊來！

Eyes Flowers

我呢份工的好笑之處﹐就係一係無野做﹐一係就有好大堆的悶野做。無野做的時候﹐悶到癲﹐於是成日都想有少少野做下。

好喇﹐到有野做個陣﹐好似依家咁﹐對住幾千個城市名﹐逐個逐個查。

原來頭昏眼花﹐唔一定要年紀老先得。

係呢一刻﹐我好想向各大地產商提議﹐係興建寫字樓的時候﹐請將一間休息室納入圖則。呢個休息室係可以俾一d 坐到腳痺的人拉筋﹐同時可以俾谷到想死的人大叫而唔會嘈到其他人的。

講完﹐繼續做野。下一個城市係…Frederiksvaerk…

下？

做住下一個先…Fredrikstad….

下……?

咁下一個囉…Fueringhavnq…

…邊 Q 度來架!!!!

The Next Episode or just Sequel?

有道是：「好馬不吃回頭草」。其實我都唔知邊個講的。

但事實係﹐我番左舊公司做﹐仲要係做番同一個位。好神奇呀可？呢個香港居然仲會有人咁樣做。

Anyway, 今次番來係短期工性質﹐應該唔會做得長的。講明左簽約做三個月 only, 我希望我真係可以做到三個月之內搵到新工跳槽。

但係我終於都醒覺﹐我真係要搵一條路 (A profession to specialize in) 行先可以。到左我呢個年紀﹐應該已經係有三年工作經驗﹐三年工作經驗﹐大學畢業﹐其實應該係做到 Manager 級。但係我衣家連 Asst Man 的可能性都勁低﹐睇住身邊的朋友尋日仲講緊「好慘呀又低級又打雜」﹐今日就已經唔聲唔聲「我升左做 Mgr 啦無話你聽咩」。

都咪話唔驚。

我一路係JobsDB 搵工﹐一路心驚。如果我三五年後仲係咁樣的話﹐明明有成五六年經驗﹐但係就焗住搵一d 一年經驗就可以做到的 Junior 位來做的話﹐interview 果陣仲要同個乳臭未乾但活力爆棚的後生仔坐埋一齊爭工做﹐我諗我都應該會幾唔開心。

到底大家用左幾耐﹐先知自己的方向？你有無入錯行？

呼…

My Last Day in Maersk Broker

最後一日番工

特別興奮

終於都做到之我辭職了

己經不是第一天的決定了。

很早的時候﹐當我做了這份工不久的時候﹐有很多親朋戚友﹐聽見我的工作性質之後﹐其實都說我應該離開。

因為真的太過沒有前途了。做起上來的事都不像是一個年輕有為的畢業生該做的 (噢﹐原來我那麼有價值的嗎)﹐還是不好浪費時間早點離開為妙了。

但我貪心﹐好食懶飛嘛。

雖然每個月的薪金只得 10K , 但其實對我來說﹐是「已經有 10K」哦。我已經很滿足的了。始終﹐以前都曾經嚐過貪心的滋味﹐很不好受的。於是﹐我沉醉於小小的10K 而又沒有工作的日子。

每天都是如此的番工等放工﹐放工鬆一鬆。

其實﹐工作最重要就是平衡﹐如果你可以選擇的話。極忙的生活﹐或者是極重複的生活﹐當然會令人感到很辛苦﹐但其實﹐若然是太無聊的話﹐工作其實也可以很辛苦的。我聽過不少朋友說到﹐忙的時候固然辛苦﹐但有一點點忙的時候其實感覺是頗充實的﹐相反﹐如果太無聊的話﹐就更辛苦。坐在自己狹少的位子裡面﹐不停地扮有工作做﹐扮勤力﹐扮忙﹐其實很難受。

所以我早早就決定了不委屈自己 – 不扮忙 – even though 大隻咪就正正坐在我身旁。

但如此瘋狂地打 Blog, 上網﹐上 discuss 的日子﹐就算只是呆坐就有人發薪水給你﹐終究會忍受不住。既然我的職責擴大到盡亦不過如此﹐我選擇離開我心愛的溫室﹐離開這個又暖又舒服的溫室。

我這樣做﹐不但止不是勇氣可嘉﹐簡直就是膽小如鼠﹐因為若然我有遠見的話﹐應該一早就知道我不該浪費青春於此。

遞上辭職信的一刻﹐大隻咪沒有驚訝﹐亦沒有特別的挽留我。嘿﹐我猜他其實已經等我自己出聲很久的了﹐所以連挽留都沒有特別的挽留我﹐只說說若有其他事要著我的話﹐可以多留我多一個星期。嘿﹐一個星期﹐看我多麼的重要。

想必是我以往多個月來瘋狂上網﹐上 forum, 上 MSN ICQ, 上 yahoo 睇新聞, 上 yahoo 知識 + 和上 Wikipedia 太多了﹐他也忍受不了。

那多好﹐happy goodbye.

走下公司的樓梯﹐沒有特別感覺。沒有失去金錢來源的恐懼﹐或者是未懂得恐懼吧。

Ole 退休遊香港

好 Q 眼訓﹐長話短說。

Ole 退休。之前他應該已經去過多個 office, 他跟我們說過﹐最喜歡的城市就是香港。他尤喜歡拿香港和日本來比較。他說﹐日本很多地方都沒有英文﹐人民又普遍不懂得英文﹐禮貌是極好的可是他們根本就不知他想要甚麼。香港四處都有人懂英文﹐而且比較便宜﹐又有很多郊遊徑供他們兩夫婦一起遠足 (你幾時聽過一對六十過外的丹麥夫婦要來香港行山的？行足幾日喎！)﹐而且人也較大陸文明。

今次他退休後到香港旅遊順便「義助」HKG Office 一些事務。Lunch 時大家一起到陶源酒家吃飯﹐很美味﹐也沒有多提到公事 (但畢竟多多少少總有)﹐這才是一餐飯裡面最「美味」的。一檯同事有老有嫩﹐有 Senior 有 Junior﹐有人有鬼﹐竟然可以不提公事﹐這一餐飯當真人間極品。

他去的地方﹐大概是真的很「遊客」﹐所以我們都覺得奇怪.....可能是因為我們自己根本都不會有興趣去的了。例如：

上環海味街 (他問我為何每一店門前都有很多很大的龜殼﹐我介紹他吃「龜O膏」﹐他當然不敢吃)﹐

在廟街大排檔飲酒 (但甚麼都不吃)﹐

黃大仙廟和志蓮淨苑﹐

行山入石澳 (無錯﹐他說行兩三小時 only, "it's so relaxed and easy")﹐

還有去南丫島「看」別人吃海鮮 ("I think it looks so expensive" "You can LOOK through it's expensive? You're da man, Ole! They really are!")﹐

然後到鯉魚門吃海鮮 ("I arrived and looked at the place and I said 'No way I'm not going to eat in this place!'...but the food turned out to be surprisingly good...though expensive, really" 你都算識食)

仲有讚西貢風光如畫。

都幾識搵地方呀佢。

Well, anyway, 他退休了﹐我想我可能最後一次見他。除非我去歐洲的時候刻意到丹麥探望他吧。

年初四之豬年開工大吉

時光飛逝﹐日月如梭﹐好快﹐又到左番工的日子喇。大家係咪好開心呢？ (無聲……..)

因為一早已經有左心理準備﹐唔好俾自己覺得呢個係普天同慶的農曆新年﹐要當佢只係其中一個好普通的假期﹐如果唔係到左初四要番工個陣就好痛苦架喇。

呢個「心理準備」﹐我成個農曆年一路都係度 remind 自己。驚死自己會投入左去個新年氣氛入面﹐驚死自己會沉醉於放假的庸懶之中。

OK, 我成功左囉。到今日我番工﹐我無話好特別地 holiday lag (我自己作的 term)﹐唔會話一路番工一路仲心散都震。但同樣地﹐我亦都無特別地覺得自己放左幾日假咁多。其實我唔使囉﹐我份工都無乜野做﹐使乜咁難為自己。

最覺得「蝕左」的係﹐公司根本就無「要開工喇」的氣氛。成個office都無乜人係度。一個二個都遲到﹐一個二個都無野做﹐於是一個二個都早走。大家都係度「為坐係度而坐係度」。痛苦。

And it’s only Wednesday now. My God.

一個人失敗總係有原因的...

有陣時真係好佩服渣老闆呀﹐CK 呀﹐CM 呀﹐AK 呀﹐Gideon 呀佢地。

點可能打到咁多字架？

我以前係 showhappy 的年代﹐都可以每日打到好長的日記﹐但係果陣係學生哥的年代﹐日日的生活都百無聊賴﹐而且生活實在無其他人可以做傾訴對象﹐於是打日記變成左我舒發感情的好地方。

但做埋老闆都咁多時間打咁多字…我呢個日日係公司度 hea 的 office boy 都未做到喎

唔認輸的講法係﹐我要做都做到的﹐反正我番工個陣係公司有咁多時間無野做﹐而且番到屋企之後只要唔打機咪得囉。

弊左番到屋企之後唔打機係好難的一件事來架嘛。點可能係公司已經咁無聊﹐無屋企都仲唔打下機開心番下呢？你話如果我係公司做到死就會想上來睇下 blog﹐ 留下言﹐放鬆一下者。但我日日係公司白抖人工無聊到死﹐番屋企仲睇 blog？

花多廿分鐘劏多兩條蒼櫻﹐我好似覺得仲實在仲開心。

基本上﹐我覺得我除左仲行得仲走得之外﹐其他所有野都變得好唔正常。我指我的生活。

我想睇報紙﹐我餓新聞﹐餓資訊﹐但朝朝番工都遲到飛起﹐最好派的 AM 730 天未光就派晒﹐頭條日報都派晒。俾錢買咩﹐我又無時間睇﹐無時間唔係我忙﹐而係空閒的時間我通常都會「機癮」到於是無睇。咁「機癮」呢個問題就攪到我想睇報紙都無睇到。

到第二朝起身番工﹐個感覺就好似好脫節咁﹐完全跟唔上香港個 pace. 咁我份工已經係好自閉架喇﹐再係咁就真係成個 Otaku 的諗樣。

跟住呢樣就真係重要：我要做去歐洲同埋 Salamanca 的 research. 這個 research 是很重要的﹐而且時間一定會很長。我要做的 research 係關乎去到果邊之後起碼兩個月的生活﹐豈容有失呢？我接受唔到自己「頭岳岳」地去到先知自己做 research 做得唔夠。

但我接受到自己用呢段時間打Monster Hunter 喎。Dill………

Well, 我接受唔到架 actually, 但係我照做囉。

好明顯呢d 咁的賤骨頭就係「不能自拔的沉淪」喇。

真係架喎﹐我覺得自己有d 去到強逼的地步。好多時我都心諗﹐又開部機呀？又係打呢隻 game 呀？儲極都唔夠料唔夠錢整新裝架喇…打來做乜鬼呀咁。

但係總會不自覺地就開左﹐然後一路玩到半夜。

熄機之後會諗：「又一晚喇﹐唉﹐waste 晒 d 時間來打機做乜呀…無出息。隻 game 都玩左咁耐乜野都玩晒啦﹐好停手喇。」…晚晚都係差唔多的 cycle.

咁仲唔係上癮﹐唔係強逼症﹐係乜野？

Gladys 同我係 Year 3 的時候已經講過好多次：「醒下啦！你要醒下架啦！你搣甩佢啦！佢會摧毀你前途架﹐你唔可以咁架喇醒下啦 Tommy！」

多謝你﹐ Gladys。你對朋友真係好。我真係令你失望。一年多後的今日﹐我仲係咁無出息。

類似的說話其實阿媽廿年前都同我講過…..

我要醒下喇...我的生活已經係一團糟架喇…

「弊可弊﹐非常弊」呀

Annual Dinner

尋晚又係一年一度的 Annual Dinner 啦。今年又係係會展。最好的事情係唔使錢食飯。

一如以往﹐都係有一班人跳舞﹐行下 catwalk 咁。但係今年少左好多無謂的進度﹐即係無大粒佬係度訓話﹐無業績報告﹐無演講﹐無廢話。基本上個 programme 係去得好快的。同埋今年因為d 野食好食過上年好多﹐咁樣: 少廢話 + 慳時間 + 多時間食野 + 好味道 = HAPPY.

尤其係…我地不嬲都係同 Group 裡面的其他人無聯絡﹐自成一角咁好似自閉仔的一間公司﹐當人地來 annual dinner 係手執一杯紅酒滿場飛有講有笑周圍撩人飲酒的時候﹐我地係坐埋一邊係度不停咁食﹐由乳豬食到豆苗食到芝麻雞食到擔擔麵﹐唔係 programme 要我地無得食的話基本上都無停過。

其實咁樣好似去左人地公司的 Annual Dinner 咁的感覺都幾唔好受。因為一路都覺得咁樣好似好無聊咁。明明係同一個 group, 但係就攪到好似無來關係咁。…well, 係我地姐﹐其他人都唔係咁的。

跟住呢樣先最唔開心：抽獎抽極都抽唔中我 .\_/.

激死人喇

算！吃不到的葡萄是酸的。

最後一次架喇。

差不多是時候了？還是從不是時候？

收到了 Double Pay. 正式地為我給了自己很久的辭職理由畫上等號。

拖拖拉拉了一年﹐我決定了些甚麼。

議而不決﹐決而不行﹐似乎我有做特首的條件。

誓神劈願地說會在農曆年後辭工不再浪費時間 - turn out to be 下一個農曆年來到了﹐我還是一舊飯地坐在這裡。

有人說﹐與其猶豫﹐不如狠決。背城借一﹐或可開出一片新天地。

有人說﹐未有計劃貿然辭工極危險。失了依靠反而得不到新的﹐所謂「兩頭唔到岸」﹐離開了 labour market 的人沒有價值﹐時鐘每一天都在倒數。

亦有人說﹐多試多看﹐才能掌握心中未發掘出的夢想。

又有人說﹐多試多看﹐到頭來一事無成。

更有人說﹐坐這山望那山﹐不如坐低食多餐。

人人都似乎知道自己想走的方向為如何﹐於是奔馳如雷。雙目空洞腦袋空白的迷途小羔羊﹐就更顯得徬徨。

「做咁辛苦都得個吉﹐點解唔舒舒服服打份政府工唔使愁？人生唔係就要來咁樣折苦自己﹐你又唔會係發大達的人」

「年輕力壯就做到咁頹做乜野？趁後生梗係搵得幾多錢得幾多。炒均全球股票廿四小時睇住個市賺到你 PK﹐呢d 野唔後生做邊個做？」

「使唔使搏到咁盡呀？你咁後生就放晒d 時間去搵錢﹐到你老左個陣都殘晒無晒力去 enjoy life 啦。如果你係為左以後日日環遊世界﹐何不趁後生時候環遊世界？」

「做就梗係要做大 firm 有名的先得啦﹐做埋d 無出息的豆腐潤公司把鬼咩」

「你做埋d 唔等洗又唔搵到錢的工都無用架﹐你話你老左點算呀下﹐我問你﹐你話你點算呀」

「我都唔旨意我老左你會養我喇﹐但我唔該你養得掂你自己之後個幾十年先喇下」

「好多人都係日日係度以為自己入到大 firm 有好前途 - 試問有幾多個真係好景」

「讀完大學點會做d 咁的工架﹐梗係做咩咩經紀﹐或咩咩會計師行﹐做大銀行或咩咩集團的阿 head﹐....下？你做緊 admin？喂你咪係男人來架？做d 咁的野？有大志少少都唔會似你咁啦下話」

「你廿零歲已經想唔辛苦﹐咁你點挨以後幾十年呀。後生唔學野﹐老左先來學呀？」

「其實人生可以有好多選擇架喎﹐唔一定係做辛苦的工﹐或者係膁好多錢的工﹐先係有出息...更何況﹐咩叫做「有出息」姐其實」

-------

埋頭苦幹讀左咁多年書﹐成績唔算好好但都算見得下人。以為咁就叫做有個交代。

埋頭苦讀﹐全世界的焦點都只在於一張書檯。一朝發現﹐當我要把頭和目光﹐都從桌上的書﹐抬起來望出前方一望無際的未來﹐才是茫然的開始。

從前我相信﹐當我有疑惑的時候﹐我可以問身邊的人的意見﹐可能得到意見﹐可能得到指示﹐可能得到答案。

今天我再有疑惑的時候﹐我都會問其他人的意見﹐可能得到意見﹐可能得到指示。卻從得不到答案。

得到最多的﹐反而是茫然的延續﹐擴大。

------

係 Blog 的世界走到中環﹐發現CK 的一篇文章。

算不上指示﹐更算不上答案。但起碼﹐算是個 hints

辭唔辭職係唔係因為經唔起考驗呢，有時好難有一個客觀標準既。一份工做得好長，亦唔代表你份人特別tough，你將呢幾樣野拉埋一齊去諗，你可能諗十年都搵唔到答案呀。只不過，或者你係時候檢討一下過去你辭職既理由係d咩，諗清楚你想搵一份點樣既工作。好多朋友不停轉工既其中一個理由係，佢地自己都冇諗清楚自己想要一份點既工作同職業。每份工都有好多唔好既地方，唔好既同事。當你做緊一份工既時候，你一定會感受到果份工果d負面既野。唯一可以令你支持到落去既，就係你「清楚知道」做緊果份工，係你想做既工作，係你想處身既行業，當然，最重要既，係繼續留響度做，有你想要既將來囉。如果你未搞清呢d野，咁工作上既任何一個負面Factor，都可以逼到你辭職架啦。

---------

A.A.O. Summit 將會三月底係「總壇」開幕。呢一個唔止係出國的差事﹐仲係大件事﹐仲要係去我夢想中的歐洲。

我應唔應該再拖？

發狗瘟

係我囉。係我發「狗瘟」囉。所以要勁貼佢的靚仔相。

你睇佢個「鬆」幾大個！仲勁過咩健美先生的大「鬆之」

所以攪到佢要著加大碼的衫仔....

更多的相 suppose 可以係最底下面個 flash slideshow 度睇到 (我用 "suppose" 因為唔知點解唔係好 stable)

淨係 post 呢張係度﹐因為呢張最型﹐我用來係公司的電腦做 desktop wallpaper!

yeah!

Bad Mood Day

今日心情超級的差。

唔知做乜野﹐又唔係話有乜野事發生左﹐公司裡面又無收到其他人的「說話」﹐屋企人都無﹐全日都過得好太平﹐但係就係非常之「I am nothing, nothing to me」。

唔知係咪呢排熱氣得滯﹐有朋友話佢熱氣得滯的話夜晚好難先訓得著。起初我笑佢作大﹐呢幾日就報應係自己的身上﹐晚晚明明累到 PK﹐但都訓係張床度眼光光成粒鐘。點幾兩點上床﹐三點都仲望住個鐘係度發呆。越不滿意﹐越多念頭。念頭越多﹐越難入睡。越係望住個鐘就越訓唔著。失眠第一大忌就係望住個鐘計下自己仲可以有幾多個鐘頭訓。

一星期五晚都係咁喎！好辛苦呀大佬。

累積到尋日﹐再加埋公司無野做…其實有野做架﹐但係因為個 database 淨番的 CONT 我唔想理…太煩啦﹐我做左一年﹐乜野煩野未見過？ (迷之聲：見得咁少都仲係度懶勁) 但係今次呢個 CONT 真係超勁激喪煩。我相信如果係我公司裡面個班身嬌肉貴的經紀大帝們去做的話﹐一定跳晒樓都未天光。

其他的事都因為太多人係附近乜野都做唔到。好灰。

好多個 moment 我都好想打人﹐又好想大叫。但係礙於環境所限﹐我去到廁所逃避﹐都唔覺得心境有所開朗﹐我想做個 slide 來「豪放」一下 - 都幾乎扭親腳。頂。

好累﹐好肚餓﹐好眼訓﹐好悶﹐好厭﹐好想走﹐成個 mood 都奇差無比。我會形容為一個「要跳幾十次 bungee jump 先能平服」的心情。

好辛苦先等到放工﹐乜都唔理﹐為求「解脫」﹐我第一時間諗到最能夠「解脫」我的方法﹐就係食！

食食食！

即刻過去 Queen’s 買個「薄餅」食下﹐足足 $7 ﹐你都估到有幾大個。食完之後行到寵物街﹐再食香港仔綠 van 站前面的燒賣。企多一陣又見到佢炸起一大堆桌球咁大粒的野﹐問佢咩來的﹐佢話係炸魚蛋。嘩﹐少理那星﹐係咪咁 L 大粒呀？整串來試下有乜 G 咁巴閉？！ (是日心情奇差粗口滿天飛好唔要得)。

基本上除左一口氣勁食完開心番﹐同埋飽番之外﹐就係因為最後一口氣食晒四粒剛炸起的魚蛋﹐滯到飛起。

再去世貿打機燒銀紙﹐終於都開心番d。

Er du Deiulemar?

超灰﹐今日真係忙到想打多幾個字都唔得閒﹐唔知咩事。

番工就係咁﹐一係就好日都無封 e-mail 收到﹐成個 inbox update 極都係好似 freeze 左咁。一係呢﹐就好似今日咁﹐雪片咁飛入來。

我老世好耐之前已經講過﹐話好多人都唔理個 CoDir 入名入成點樣﹐於是個 Full Name 果一個 field 都入到鬼五馬六咁﹐到最後出 invoices 的時候﹐個名就騎呢到唔恨。

例如間公司的 registered name 係 "ABC Shipping Co., Ltd." 。大細草唔對的有(abc shipping Co LTD)﹐串錯字的有 (abbc shipppin conpany limted) ﹐隔錯空隔的有 (abcshipping col td) ﹐無空隔一串字過的都有(abcshippingcoltd)﹐連人地間公司名都串錯的都夠膽死有 (efg ship ltd)。

離 Q 晒譜。

我初初番工果幾個月﹐日日打開個 Directory 都好似去錯左「愛麗斯夢遊仙境」咁....

果陣老世都已經話﹐有人會夠膽死唔理個 full name 會好以上面提過 d 咁無譜的名﹐就出 invoice. 後果係點都唔使我講到明。熟絡的﹐就側側膊當無事算。但人地唔側側膊的時候﹐唔該唔好當人地錯喇﹐好嘛？Invoice 係 Legal documents 來架﹐個名係乜野係好大關係架﹐你出錯 invoice 仲話人地唔肯找數﹐咁人地梗係發你脾氣啦。

天呀﹐係咪d 英國人的 general administration sense 都特別差架....點解可以咁「齊心」架佢地。

今次的主角係一間叫做 "Deiulemar" 的公司....呢個字係意大利文﹐根據我薄弱的西班牙文能力﹐呢名應該讀做...刁那媽 / 刁利媽....Oh well....

唔知邊條阿茂改左佢個名做 Deiulemar Shipping...咁人地意大利佬好 Q 有原則架嘛﹐梗係唔制啦。死蠢英國鬼又唔知﹐繼續 invoice, 然後話人地 "refuse to pay"﹐你點能怪人地火都來埋。阿水都知個名唔 match 唔過得數架喇。人地個全名叫做 Deiulemar Compagnia di Navigazione S.P.A. (死火打足成日打到識串) 架嘛…

仲有呀﹐我個名叫做 Tommy﹐雖然個名係有 d childish ﹐但唔該唔好再 “Hi Tony, …” 啦！你叫我 Thomas 的我 OK 無問題, but no “Tony”, please.

Deiulemar.....

p.s. 補充番 2006 年 12 月 19 日的「勝香園 與 蘭芳園」

東亞病夫

話說係呢個咁勞累的聖誕節之後﹐我都係無乖乖地早睡早起﹐於是就係今日出問題喇。

今朝起身的時候已經覺得好唔妥﹐但係係乜野就講唔出﹐淨係覺得好似想嘔咁樣。後來呢個唔多妥的感覺就一直維持到我代完同事 on duty 之後去食飯。

平時我真係好大食的時候﹐食一個吉野家下午茶餐的牛肉飯係唔夠的。至於平時我都會加一個海苔珍菌 (其實都係雜菇) 或者係加一個 salt 燒鯖魚﹐咁加埋平野飲其實就夠飽架喇。

但係今日我就連一碗仔的牛肉飯都食唔晒﹐咁你話咩事﹐我仲食到半路想嘔添。

呢種想嘔的情況一路都維持到成個下午﹐然後﹐呢個時候我的老世就話要同我講野。 OK, 咁等左成個下午之後佢終於同佢入去 meeting room 傾一d 好重要的野 - 前途。

弊就弊在我坐的位﹐係正個冷氣風口底下﹐d 風一路係咁吹住我個頭﹐我一路都 feel 到佢強烈的冰冷感覺。

係呢個咁弱雞的時候﹐我最需要 (又最唔需要) 就係呢種最後一 kick….一 kick-off, 就所有野來爆晒出來….

開完會我已經拿拿聲走﹐未番到屋企我已經係連行路都無力。好凍﹐一路行一路覺得超凍。番到去的時候我真係成個人都訓晒落去張床度﹐完全係唔識郁﹐蓋左好多張被﹐又覺得好熱﹐又覺得好凍……唔使問阿貴都知係發燒喇。

攪左一大晚﹐食番d 粥水﹐加粒 Panadol, 散左一身汗﹐邪從汗去﹐無咁辛苦囉。短短一晚之內由無事﹐到發燒﹐到坐起身食飯都無力﹐到食到粥﹐到退埋燒。第二朝基本上已經退晒燒﹐只不過係仲有d 咩肚痛呀﹐頭痛呀呢d 咁的「併發症」。但係聽日都係番唔到工… 因為實在係太 weak

好野﹐又請病假。難怪被同事謔稱為「東亞病夫」。

31 Aug 2006

尋日公司差唔多所有人都番晒來。乞人憎肥佬老闆 (暫叫佢做肥烏) 做到一單大生意﹐請晒全公司所有人 (其實咪又係得十二個人) 去陶源食飯。我本來都唔係好想去﹐我寧願一個人食。同埋﹐食左一年自己一個食 lunch 的日子之後其實都慣左﹐仲反而鐘意自己一個人食 lunch 多過同其他人一齊食。我其他朋友聽見之後就話：唔係嘛自己一個食飯咪好悶囉。

Well, 我份人人緣都唔算好﹐中學的時候都成日自己一個食 lunch 架喇。上到大學就更加係喇﹐有得一齊食 tea 已經好開心。所以都算係慣左一個人食。

講番果餐 lunch﹐真係好食到爆！(當然喇﹐咁鬼貴﹐陶源酒家喎) 其實佢最好食的反而唔係乜野特色菜﹐而係普通的中式點心。佢個燒賣仲要係鵝肝燒賣！痴線….

佢個花膠螺頭湯真係好飲到….我諗果一煲湯起碼八百蚊。D 湯渣多到呢…堆係隻碟上面幾吋咁高的一坐小山。有時候跟下佢地食飯真係正架。要陪笑都唔太緊要﹐最重要係好好食得來又唔使自己出錢。

仲有一次係我自己的老闆帶我落去樓下食 Inn Side Out, which is his canteen because he goes to have lunch there everyday. 又係好食到震。只不過係七八十蚊一個 set lunch﹐你可能會話嘩八十蚊喎﹐咁當然係喇大佬﹐一分錢一分貨呀嘛。Inn Side Out 的夜晚仲正呀﹐佢就係著名的「花生亂葬崗」的酒吧 – East End Brewery 喇。佢係 Quarry Bay 的小小酒吧區都有一間架。

==================

呀﹐講番肥烏。肥烏係我地公司的三個 senior 的其中一個。佢巴閉的地方係咁多丹麥鬼佬的高層之中﹐佢係唯一一個 non-“Danish White Male”, 仲要係香港人。因為佢做生意做得大同多。呢個係佢唯一一個優點﹐而佢作為一個「人」的缺點﹐就算十日十夜都數唔晒。不在此詳述….住。

佢最近做到一單大生意﹐聽其他人講係大到 “break record” 咁大。淨係分到的commission 都有六十萬﹐仲要已經係 share 左之後的份量…….嘩唔係呀嘛？！跟住當然係追問乜野船咁大隻喇﹐原來係 VLCC﹐仲要係做 BBC﹐咁我話 BBC 個 rate 唔係唔高的咩？「阿更等」三媽話：係十二年呀。

十二年？！嘩…..邊個咁大膽一租就租十二年？仲要係VLCC？

疑團堆積到今日就去找找資料…..話晒我都係少數開到 Operations System 的人喎﹐當然要濫用一下我的權力先得喇。咁當然﹐其實咁大單生意我唔使入OPS 都睇到廣發天下的 notice. 再問番三媽﹐又學多樣野。

原船主係 F, F 就將隻船賣左俾 N﹐N 就將隻船租番俾 F。我聽完之後呆左﹐攪咁多野做乜？點解 F 好地地自己唔用﹐要先賣又租番咁煩？原來呢一種practice 係 shipbroking 界係幾常見的一個現象﹐三媽仲話就算係香港地產都幾常見架。佢用比喻就話好似住宅咁﹐業主 F 唔想自己交差餉﹐交稅等等﹐就賣俾 N﹐但 F 自己又真係要地方住喎﹐於是就向 N 租番來住。咁佢點整間屋都無所謂﹐因為水電呀差餉呀等等都已經唔使佢揹上身。統統都交過俾新任業主 N。 就係咁喇。

OK, 原來呢個情況係 common 的。我都唔知添。

但係我想知咁仲有乜野 activities 會用呢個 practice 呢？而通常地產方面﹐佢地咁做又有乜野著數呢？要乜野情況先適合做呢樣野呢？幾多錢的樓以下係唔適合做的呢？香港人唔係個個都想有層樓[手查]手的咩？

Senor Preguntas!