I work for (Anywhere)

番到公司第一件事就係開公司的 system.

第二件事就係開自己個 blog。

第三件事就係開個 statistics 出來睇下個 blog 有無人來睇。

真係痴線。

跟住經過 KPMG 的 post, 忽然間有一個 idea唔知從邊度飛來﹐問我「莫非真係有人衝著 KPMG 來？即刻開番個漫畫出來睇睇。

唔使太細心﹐都能夠睇得出﹐呢條 strip 係俾人做過手腳來的。果然如此...我都估到係有問題架喇...點會有人咁夠薑話間 Big 4 得架....(謎之聲：好似係我提你你先諗到架喎！唔好係度懶醒喎唔該！)

無論係 "show the ID Badge" 定係 "which means I work for KPMG"﹐都係俾人改過。但俾人改過唔係咩大件事。

因為呢條 strip 本身就夠晒好笑。所以﹐大家喜歡的話﹐其實可以係漫畫中三處被人修改的地方﹐加入自己所喜愛的內容...咁就會有好多個唔同 version 的 "I work for XYZ...which means I have no money and no life!"

That's good...可以攪一個 technical gag.

有狗為樂

"擁抱"

"樂翻"

"累透了"

好鐘意呢幾張相

因為夠真

影到我真係鐘意佢﹐影到佢真係好可愛﹐影到我真係要去剪頭髮 =__=""

最鐘意第一張﹐因為佢望住鏡頭﹐而且唔係點影到我個樣...

ZGMF-X42S Destiny Gundam

本來我唔覺得呢部機有乜可能會值 590 的 cost...

我覺得佢除左機身夠堅有成 800 咁長的命之外﹐基本上佢的武器裝備都強的...只係點解 Bandai 會係個 game 裡面 set 到佢的勁武器﹐唔能夠好好咁出 combo 呢？

即係﹐例如點解 R2 (格+射) 係要 CIWS 彈呢d 咁 cheap 的野...而唔係綠色重炮呢？咁樣我相信會好過長按射掣儲炮囉...雖然咁樣唔使計彈數無限任射

其實佢的 armament 都幾勁。但係可能係個 game 的 settings 方面仲有進步的空間﹐所以唔明點解會有 590 咁高。佢似係 560 之流囉...甚至係 450 之流....

後來因為要玩 P.L.U.S.。玩得多﹐焗住要用 Destiny 用得多﹐開始對佢有情意結﹐覺得佢「其實都唔係咁差者」。

諗諗下其實都幾勁架﹐一把最堅的劍﹐一把最重的炮﹐一對回力劍﹐一隻劍光掌﹐算係咁。可能只係佢「生不逢時」卦。

上網搵佢的靚仔樣來 post, 反而搵到模型發燒友的網站仲多過其他網站。當中選左呢一幅個人認為頗為「型」的相。

唔識睇日文﹐但估計呢個網站係一個人做的。佢砌的模型﹐我唔識評論﹐淨係覺佢砌得好靚﹐上色上得好靚....that's enough, right?

Destiny Gundam 的模型相片集

主頁：POGIPOGI

孫燕姿 - 同類

看罷「盛夏光年」﹐深受感動﹐心中總感到一陣陣酸澀。但有如其他觀眾﹐完場時滿腹疑團﹐沿路上苦思不果。

鬱結在心﹐不服氣﹐上網看看其他人怎說﹐漸漸地把 research 越做越大﹐昨天用上了上班時 hea 的時間的 80% 做 research on this! 及後稍有頭緒﹐但仍須印證﹐今日將會於 lunch time 之時到訪書店﹐事成事敗就在於書店還有沒有我要的東西。 (後註：搵唔到呀, D!)

電影中插入了一兩首五月天的歌﹐都甚配合。以下這首「同類」與電影 (或電影劇本﹐或電影概念小說) 都無關。只是編曲上給予我的感覺﹐說不出的近似。那一種孤獨﹐與電影中的不盡相同﹐但就是「感覺」很像。

第一次聽此曲是孫燕姿香港演唱會﹐因為之前聽過她的歌不多﹐所以未聽過此曲。第一次聽的時候﹐看著歌詞﹐聽著編曲﹐感受著曲詞之間與及孫燕姿演繹的微妙關係...

最愛的﹐無非最後四(六?)句...無他﹐「傷春悲秋」的東西﹐總有個比較高的概率能觸動我的心。


同類 - 孫燕姿

曲︰李偲菘
詞︰易家揚
編︰TERENCE TEO

雨後的城市　寂寞又狼狽
路邊的座位　它空著在等誰

＊我拉住時間　它卻不理會
有沒有別人　跟我一樣很想被安慰

＃風　停了又吹　我忽然想起誰
天　亮了又黑　我〔又〕過了好幾歲
心　暖了又灰　世界　有時候孤單的很
需要另一個同類
愛　收了又給　我們都不太完美
夢　作了又碎　我們有幾次機會　去追

重唱　＊,＃

不曉得為甚麼愛　又稀少又昂貴

雲在半空中　被微風剪碎
回憶也許美　可是正在飛走對不對

「唔好話俾人知呀...」

你有無試過講呢句說話？通常係講完一d 野之後﹐你可能

怕對方會洩漏秘密; 你可能怕對方唔明白內容有幾重要;

你可能想好好控制「知情者的範圍」;

你可能講完之後後悔剛才一時之快想婉轉地向對方說 Ctrl+Z (即係 Undo) 但已無可挽回;

可能其實佢係你好好的朋友﹐你好想分享俾佢聽但又驚佢一時口快「令你衰晒」;

你可能覺得佢會好似你一樣周圍同人講完之後加句己經回頭太難的 disclaimer : 唔好同人講呀;

你可能有極強的控制慾想俾佢知但唔俾佢講咁樣的形式來恐嚇佢「你試下講出去呀拿」;

你可能只係想試下佢對你有幾服從﹐或好心d﹐同你有幾老友; 之餘此類

但實情係﹐我個人認為﹐如果我係唔想話俾人聽的話﹐我就一定唔會講﹐我會講的﹐我遲早都會講。我唔係話我唔會用呢個 condition, 但係我會比較少用。因為我知道呢個世界上﹐講真﹐口密的人﹐少之又少。

所以我好多時都係一係就講﹐一係就唔講。好似我想走呢件事﹐我完全無同過身邊的同事提過。雖然我呢個 blog 係人人都知我係邊個 Tommy 的日記﹐唔似得其他 blogger 咁樣要刻意 go anonymous, the risk is 同事亦有可能從一d 我估唔到的途徑找到我呢個 blog….

但基本上我每一次我同佢地講野都會克制住自己唔提任何有關想 quit 的事。即便是剛過去的 Annual Dinner, 都講到好似好期待明年再去咁。

好假呀可？

To be or not to be honest 呢家野﹐我係好細個的時候已經反覆思疑過好多次﹐亦經歷過好多次改變。因為我好細個的時候係 very honest 的﹐仲 very 戇居添﹐人地套我講乜野都會原原本本咁講晒出來。

多次改變﹐由 very honest 變到 very dishonest, 再變反 honest and open。大大少少都 shift 過幾次﹐比得上地球史上數次的南北磁極大逆轉一樣咁 dramatic。但其實來來去去都係因為兩個 condition...

"Open vs. Defensive"

針無兩頭利﹐你做哪一邊的人﹐都係有賺有賠﹐賺左唔係必然﹐賠左唔怨得人﹐只怪自己「技不如人」﹐好彩的﹐平手離場﹐and at the same time 應知進退。

忍唔住講秘密俾人聽﹐或忍唔住講大話﹐或忍唔住爆另一個人的是非﹐遲早都要本利歸還。

Open 得太多﹐我會覺得好無安全感﹐好無「自我」﹐太依賴其他人來 confirm 自己的 identity 同 idea。Defensive 得太多﹐好乞人憎﹐我照鏡見到自己個樣都想爆粗鬧 9 自己個種。

中國人一早就話「中庸」呢個 term 其實係做人之道。但如果大家玩過平衡木都知﹐平衡緊的狀態﹐其實先係最唔穩定。果一個 moment 其實先係拉得最「衡」﹐最舉步為艱的。反而你放棄式地側去一邊﹐你會感受到萬有引力拉動著你﹐無比的快感。不再顧慮﹐不再猶豫﹐還管甚麼「這邊過一點﹐那邊移一點」那麼煩人。

高速飛墮﹐萬物唯我。

然後﹐散落於肢離破碎之間。一切都會來得非常突然﹐沒有時間防備﹐沒有時間修補。

沒有時間後悔。

---------------------------------------------------------

Choose your path

---------------------------------------------------------

…唔係﹐我無野呀。不過唔知點解突然間諗起呢樣野﹐好想將我的諗法講出來﹐咁樣之嘛。Blog 就係咁用架喇。唔通你無拿拿企上 Times Square 個鐘樓度講呢番話﹐再行番落來扮無野咩﹐痴線。

講開又講喎﹐麥記依家換緊d Sanrio 公仔呢﹐隻馬騮仔真係幾鬼可愛喎。

I work for KPMG

Well 當然我唔係 working for KPMG 啦

呢幅野真係唔 post 唔舒服

by courtesy of a bored-to-death tax consultant working for one of the Big Four in Central...

一個人失敗總係有原因的...

有陣時真係好佩服渣老闆呀﹐CK 呀﹐CM 呀﹐AK 呀﹐Gideon 呀佢地。

點可能打到咁多字架？

我以前係 showhappy 的年代﹐都可以每日打到好長的日記﹐但係果陣係學生哥的年代﹐日日的生活都百無聊賴﹐而且生活實在無其他人可以做傾訴對象﹐於是打日記變成左我舒發感情的好地方。

但做埋老闆都咁多時間打咁多字…我呢個日日係公司度 hea 的 office boy 都未做到喎

唔認輸的講法係﹐我要做都做到的﹐反正我番工個陣係公司有咁多時間無野做﹐而且番到屋企之後只要唔打機咪得囉。

弊左番到屋企之後唔打機係好難的一件事來架嘛。點可能係公司已經咁無聊﹐無屋企都仲唔打下機開心番下呢？你話如果我係公司做到死就會想上來睇下 blog﹐ 留下言﹐放鬆一下者。但我日日係公司白抖人工無聊到死﹐番屋企仲睇 blog？

花多廿分鐘劏多兩條蒼櫻﹐我好似覺得仲實在仲開心。

基本上﹐我覺得我除左仲行得仲走得之外﹐其他所有野都變得好唔正常。我指我的生活。

我想睇報紙﹐我餓新聞﹐餓資訊﹐但朝朝番工都遲到飛起﹐最好派的 AM 730 天未光就派晒﹐頭條日報都派晒。俾錢買咩﹐我又無時間睇﹐無時間唔係我忙﹐而係空閒的時間我通常都會「機癮」到於是無睇。咁「機癮」呢個問題就攪到我想睇報紙都無睇到。

到第二朝起身番工﹐個感覺就好似好脫節咁﹐完全跟唔上香港個 pace. 咁我份工已經係好自閉架喇﹐再係咁就真係成個 Otaku 的諗樣。

跟住呢樣就真係重要：我要做去歐洲同埋 Salamanca 的 research. 這個 research 是很重要的﹐而且時間一定會很長。我要做的 research 係關乎去到果邊之後起碼兩個月的生活﹐豈容有失呢？我接受唔到自己「頭岳岳」地去到先知自己做 research 做得唔夠。

但我接受到自己用呢段時間打Monster Hunter 喎。Dill………

Well, 我接受唔到架 actually, 但係我照做囉。

好明顯呢d 咁的賤骨頭就係「不能自拔的沉淪」喇。

真係架喎﹐我覺得自己有d 去到強逼的地步。好多時我都心諗﹐又開部機呀？又係打呢隻 game 呀？儲極都唔夠料唔夠錢整新裝架喇…打來做乜鬼呀咁。

但係總會不自覺地就開左﹐然後一路玩到半夜。

熄機之後會諗：「又一晚喇﹐唉﹐waste 晒 d 時間來打機做乜呀…無出息。隻 game 都玩左咁耐乜野都玩晒啦﹐好停手喇。」…晚晚都係差唔多的 cycle.

咁仲唔係上癮﹐唔係強逼症﹐係乜野？

Gladys 同我係 Year 3 的時候已經講過好多次：「醒下啦！你要醒下架啦！你搣甩佢啦！佢會摧毀你前途架﹐你唔可以咁架喇醒下啦 Tommy！」

多謝你﹐ Gladys。你對朋友真係好。我真係令你失望。一年多後的今日﹐我仲係咁無出息。

類似的說話其實阿媽廿年前都同我講過…..

我要醒下喇...我的生活已經係一團糟架喇…

「弊可弊﹐非常弊」呀

The Sims 2 for PSP

聽聞 PC 版好玩到飛起﹐有人為此而沉迷得很﹐掛住好好管理虛擬世界裡面「自己」的生活﹐反而就完全唔理現實世界中的自己有幾糟糕。諷刺得很﹐為此﹐我決定試下玩下睇下係唔係咁誇張。

玩過一小時之後﹐同所有玩家的評論大致相同：就係 load game 的問題。

每一個小 step 都要 load 一 load﹐咁樣無論玩邊個種類的遊戲﹐都係會令人非常之沮喪的。因為咁樣「窒下窒下」﹐會令玩家對個 game 的 enjoyment 不停咁打斷…咁再好玩再沉迷的遊戲﹐都會每分鐘提醒你「我要 load 機」…咁實唔容易沉迷啦﹐因為根本就唔想玩。哦…原來呢個係佢地的策略來的…

Anyway, 因為我張 memory stick 得 1 GB 咁鬼小, 放左 The Sims 2 就放唔到我心愛的 Monster Hunter. 所以…我諗佢好快就要讓番個位出來架啦, HAHA…

講起 MHP, MHP 2nd 將會係 2月22日係日本發售。真係萬眾期待呀！(我期待佢的漢化版 ISO 多d…)

Annual Dinner

尋晚又係一年一度的 Annual Dinner 啦。今年又係係會展。最好的事情係唔使錢食飯。

一如以往﹐都係有一班人跳舞﹐行下 catwalk 咁。但係今年少左好多無謂的進度﹐即係無大粒佬係度訓話﹐無業績報告﹐無演講﹐無廢話。基本上個 programme 係去得好快的。同埋今年因為d 野食好食過上年好多﹐咁樣: 少廢話 + 慳時間 + 多時間食野 + 好味道 = HAPPY.

尤其係…我地不嬲都係同 Group 裡面的其他人無聯絡﹐自成一角咁好似自閉仔的一間公司﹐當人地來 annual dinner 係手執一杯紅酒滿場飛有講有笑周圍撩人飲酒的時候﹐我地係坐埋一邊係度不停咁食﹐由乳豬食到豆苗食到芝麻雞食到擔擔麵﹐唔係 programme 要我地無得食的話基本上都無停過。

其實咁樣好似去左人地公司的 Annual Dinner 咁的感覺都幾唔好受。因為一路都覺得咁樣好似好無聊咁。明明係同一個 group, 但係就攪到好似無來關係咁。…well, 係我地姐﹐其他人都唔係咁的。

跟住呢樣先最唔開心：抽獎抽極都抽唔中我 .\_/.

激死人喇

算！吃不到的葡萄是酸的。

最後一次架喇。

被發現了？！

好日都無 check 過呢個 blog 的流量﹐於是走去 check check﹐發現原來都有人睇我個 blog 架喎！好開心！個 chart 的讀數第一次唔再係貼住地下 (x-axis)﹐而係起飛lu。 不過飛時飛﹐最多都係得二十個人睇過……………好似…………

唔…

仲有就係﹐似乎都係無聊的上班一族先會睇。星期六日的 page view 真係低到貼近零。同另外五日的數字真係差好遠 (percentage-wise).

Anyway, 等我睇下個 Geomap Overlay 先。有過半數的 blog view 係來自 Central District…呢個位﹐呢個可能性﹐”Central District” 唔係講緊香港的中環唔通講緊深圳的中區咩。乜原來中環咁多無聊白領架。跟住有世界其他地方的人…我相信佢地都係 click 左 Blogger 上面的 “Next Blog” 先會被 random 抽中來呢度架姐﹐無咁岩的。我相信當中應該有d 人連中文都唔識睇。

跟住呢點就係最令我毛管棟…..係 Kobenhavn 竟然有 11 page view?!

…側聞過﹐所有公司的電腦其實都係 link to 總壇的 servers, 就算係 local servers 上網 (好似我依家咁)﹐其實都係會行大半個地球番到總壇﹐再行番大半個地球番來香港。

咁我聽過就算架喇﹐邊有放係心上面。仲係度諗﹐你無咁得閒請個 staff 日日坐係度睇下世界各地的職員係度點樣「吞泡」﹐去乜野 websites 度睇野唔做野架。呢個數應該都係個 system 要 scan 我地去乜野網頁的時候做出來的數來的。機器來架姐﹐機器來架姐﹐無人睇的。

跟住諗真係d ﹐唔係喎﹐我咁無聊的職位﹐公司都可以請我係度坐食山崩咁耐﹐請多個人來 mon 住其他人有無吞泡….有乜咁奇？

….死火！咁莫非……

咁點算好呢…so far 都未試道有識得中文的 staff 坐係入面的﹐但係 forward 一個網址又有幾難呢真係…

但係！「無人可以教我放棄﹐我係唔會放棄的！」

嗚啦啦~嗚~啦啦~阿拿姑啦~~~~

幾件有趣的事

摘自不同的 Blog, 有幾件有趣的事想跟大家分享分享....

Tired of Laughter,Beijing Gets Rid Of Bad Translations

Many Expats Regret Loss Of Wacky English in Signs;'Slippery Are Very Crafty'
By MEI FONGFebruary 5, 2007; Page A1

BEIJING -- For years, foreigners in China have delighted in the loopy English translations that appear on the nation's signs. They range from the offensive ("Deformed Man," outside toilets for the handicapped) to the sublime (on park lawns, "Show Mercy to the Slender Grass")....

See Full Article in HERE.

老實講﹐我都緊張你個 toilet 乾唔乾淨 rather than 你d 英文譯得好唔好喎。反正我都叫做「湯美那一個很大的」....

玩開有條路﹐睇埋 The Chinglish Files, 直頭笑死！同 Tommy the Great 簡直有異曲同工之妙！小弟甘拜下風！

From 鶴立雞群's blog.....

"Some people are like Slinkies
Not really good for anything
But they still bring a smile to your face…
when you push them down a flight of stairs"

- 陰毒呀哩?

譚魚頭火鍋

是日小朋友小聚會。講唔夠幾句﹐我心癮又到﹐於是又係果句：

「唔該大家報一報各自的最新近況呀。」

阿詩話: 「又係呢句﹐個個 gathering 的頭十句裡面實係有呢句。」

Sorry...咁講好似好無誠意咁﹐但係我真係唔知嘛....

-----------

譚魚頭火鍋﹐名就聽得多﹐食就未食過﹐試下都唔錯。

當晚叫左兩種湯底﹐一個蕃茄一個麻辣。「麻辣?!?!」 我一聽見就即刻驚一驚。一邊蕃茄...唔多鐘意食﹐另一邊麻辣...唔多食得辣。

咁我今晚食咩？

「無野的...無野的...實食到的」

但係都叫左一個蒜泥白肉先。一來係想立即有d 野食下﹐二來係想試下佢的「熟料」做成點樣。反正大家都肚餓﹐等得煲來﹐等埋水滾﹐等埋生肉變熟肉﹐怕且大家都餓死左。於是大家都好開心咁食。

蒜泥白肉上檯﹐大家見佢一碟底都係紅油﹐估計佢好辣﹐怕怕﹐果陣我先知 - 原來成檯人無幾多個食得辣。

咁點解叫辣湯底的..........??

拍心口講左幾次「呢個蒜泥白肉真係唔太辣」之後﹐大家就試左。係咪？都話唔辣架喇。

所以呢﹐後來上的辣湯底﹐其實﹐都唔辣的。可能為左遷就香港人口味而減辣。

佢地唔似傳統邊爐店咁放一個大爐係你面前。為節省地方﹐電磁爐放左係特製的檯入面﹐檯布之下。就咁睇﹐好似係放一個煲係檯中間佢就會水滾咁。呢個 design 我幾鐘意﹐因為咁真係慳好多位﹐而且又唔使d staff 搬來搬去﹐甚至係換氣 (for those older styles stoves).

食物方面...都幾貴下。所有的生料都係意料中內﹐無特別好食難食。其他如「魚子墨魚滑」等等亦都有。

值得一提的﹐係佢俾每一個人的「滋味碗」。呢碗野其實主要都係香料同調味醬﹐主要俾大家烚完野食之後用來撈一撈的。最大的 feature 係佢裡面大部份都係芫茜碎﹐加d 花生碎呀﹐辣醬呀﹐雪菜粒呀之餘此類﹐非常香口﹐非常惹味的選擇。芫茜呢家野﹐鐘意的人如我或者係阿瑪﹐就會非常之 like, 連阿 Wing 果碗芫茜碎都「立」埋﹐唔鐘意的﹐就好似阿 Wing 咁成碗「奉獻」出來任我同阿瑪「宰割」。

一個唔太辣的辣湯底﹐撈起一片肥牛﹐肉身尚滴著辣汁﹐放入一碗青葱翠綠的芫茜碎﹐內加一點花生碎呀﹐辣醬呀咁﹐撈一撈﹐嘩....香到呢....

一放入口﹐牙齒咬開芫茜碎的一刻﹐登時感受到一股清新得來又帶著性感氣味的芫茜香﹐湧入喉中。肉香橫流﹐辣汁在旁「煽風點火」﹐唉喲...

登時將所有平平無奇的「邊爐料」都化腐朽為傳奇！

我俾食物&環境&服務7.5分﹐滋味碗深得我心﹐另加極矜貴的 0.5 分﹐但因價錢真係太貴 ($177@)﹐要減番。總分 7.5 算喇。

地：TST 金巴利道 26 號 2 樓 (近 Knutsford Terrace, Quiksilver 樓上)
電： 2311-4848

p.s. openrice 上面人人都勁彈呢間的服務差到貼地﹐就我當晚所見﹐唔係喎﹐幾 good 喎...

p.p.s. Gary.....你自己衰咩你自己知喇.....下次小心d 喇......(講到好似唔關我事咁的﹐超衰仔呀我)

四本之角！

有討論區的朋友話

作為一個 MHP 的 Hunter, 其中一個最重要的里程碑﹐首選就係呢個任務 - 四本之角。

係村長五星任務之後所出的緊急任務。沙漠岩地之中一次過打兩條(雙)角龍。好 X 難。

不過！一次過就成功的感覺﹐係 very good 的。下一個任務﹐就係傳說中的老山龍...我去 unsave 的 preview 過一次﹐真係好~~~大隻。我諗佢起碼有現實世界的三, 四卡火車咁長。

唔怕﹐我用生果刀來慢慢片死你！....係佢撞門十下之前啦當然。

差不多是時候了？還是從不是時候？

收到了 Double Pay. 正式地為我給了自己很久的辭職理由畫上等號。

拖拖拉拉了一年﹐我決定了些甚麼。

議而不決﹐決而不行﹐似乎我有做特首的條件。

誓神劈願地說會在農曆年後辭工不再浪費時間 - turn out to be 下一個農曆年來到了﹐我還是一舊飯地坐在這裡。

有人說﹐與其猶豫﹐不如狠決。背城借一﹐或可開出一片新天地。

有人說﹐未有計劃貿然辭工極危險。失了依靠反而得不到新的﹐所謂「兩頭唔到岸」﹐離開了 labour market 的人沒有價值﹐時鐘每一天都在倒數。

亦有人說﹐多試多看﹐才能掌握心中未發掘出的夢想。

又有人說﹐多試多看﹐到頭來一事無成。

更有人說﹐坐這山望那山﹐不如坐低食多餐。

人人都似乎知道自己想走的方向為如何﹐於是奔馳如雷。雙目空洞腦袋空白的迷途小羔羊﹐就更顯得徬徨。

「做咁辛苦都得個吉﹐點解唔舒舒服服打份政府工唔使愁？人生唔係就要來咁樣折苦自己﹐你又唔會係發大達的人」

「年輕力壯就做到咁頹做乜野？趁後生梗係搵得幾多錢得幾多。炒均全球股票廿四小時睇住個市賺到你 PK﹐呢d 野唔後生做邊個做？」

「使唔使搏到咁盡呀？你咁後生就放晒d 時間去搵錢﹐到你老左個陣都殘晒無晒力去 enjoy life 啦。如果你係為左以後日日環遊世界﹐何不趁後生時候環遊世界？」

「做就梗係要做大 firm 有名的先得啦﹐做埋d 無出息的豆腐潤公司把鬼咩」

「你做埋d 唔等洗又唔搵到錢的工都無用架﹐你話你老左點算呀下﹐我問你﹐你話你點算呀」

「我都唔旨意我老左你會養我喇﹐但我唔該你養得掂你自己之後個幾十年先喇下」

「好多人都係日日係度以為自己入到大 firm 有好前途 - 試問有幾多個真係好景」

「讀完大學點會做d 咁的工架﹐梗係做咩咩經紀﹐或咩咩會計師行﹐做大銀行或咩咩集團的阿 head﹐....下？你做緊 admin？喂你咪係男人來架？做d 咁的野？有大志少少都唔會似你咁啦下話」

「你廿零歲已經想唔辛苦﹐咁你點挨以後幾十年呀。後生唔學野﹐老左先來學呀？」

「其實人生可以有好多選擇架喎﹐唔一定係做辛苦的工﹐或者係膁好多錢的工﹐先係有出息...更何況﹐咩叫做「有出息」姐其實」

-------

埋頭苦幹讀左咁多年書﹐成績唔算好好但都算見得下人。以為咁就叫做有個交代。

埋頭苦讀﹐全世界的焦點都只在於一張書檯。一朝發現﹐當我要把頭和目光﹐都從桌上的書﹐抬起來望出前方一望無際的未來﹐才是茫然的開始。

從前我相信﹐當我有疑惑的時候﹐我可以問身邊的人的意見﹐可能得到意見﹐可能得到指示﹐可能得到答案。

今天我再有疑惑的時候﹐我都會問其他人的意見﹐可能得到意見﹐可能得到指示。卻從得不到答案。

得到最多的﹐反而是茫然的延續﹐擴大。

------

係 Blog 的世界走到中環﹐發現CK 的一篇文章。

算不上指示﹐更算不上答案。但起碼﹐算是個 hints

辭唔辭職係唔係因為經唔起考驗呢，有時好難有一個客觀標準既。一份工做得好長，亦唔代表你份人特別tough，你將呢幾樣野拉埋一齊去諗，你可能諗十年都搵唔到答案呀。只不過，或者你係時候檢討一下過去你辭職既理由係d咩，諗清楚你想搵一份點樣既工作。好多朋友不停轉工既其中一個理由係，佢地自己都冇諗清楚自己想要一份點既工作同職業。每份工都有好多唔好既地方，唔好既同事。當你做緊一份工既時候，你一定會感受到果份工果d負面既野。唯一可以令你支持到落去既，就係你「清楚知道」做緊果份工，係你想做既工作，係你想處身既行業，當然，最重要既，係繼續留響度做，有你想要既將來囉。如果你未搞清呢d野，咁工作上既任何一個負面Factor，都可以逼到你辭職架啦。

---------

A.A.O. Summit 將會三月底係「總壇」開幕。呢一個唔止係出國的差事﹐仲係大件事﹐仲要係去我夢想中的歐洲。

我應唔應該再拖？

Charlie Brown Cafe (Tsuen Wan Shop)

眼見 Charlie Brown 係香港開的分店越來越多﹐而且見到 openrice 上面對旺角店的評價似乎亦都唔差﹐於是就心郁郁想去試一下。

晚飯後的 Charlie Brown 唔多人﹐叫左一個有 Charlie Brown 的樣子的 Cheese Cake 試下。上面係結實的朱古力...近乎 brownies 咁硬。下面係 cheese cake 加梅子 / raspberry jam﹐最底係類似麥維他的餅底。

老實講﹐唔係非常之特別﹐但係因為新開的關係無乜人﹐所以環境都算 ok. 我諗呢個 quality 如果放係旺角的話都唔錯的...始終...係旺角的上樓 cafe﹐因為開得太多的關係﹐粗製濫造之流實在太多。

當你去過一間同你屋企一樣咁殘的地方﹐飲一杯無論顏色同味道﹐都難飲過李斯德林開水的所謂 "drinks"﹐玩一副得四十幾張咭的 playing cards, 得九十幾張的 UNO, 玩無波子的波子棋盒(only 個盒), 仲要以此為賣點標榜自己係 "在旺角找到home feel" 的時候.....

....你就會明白點解我寧願幫襯大財團 Starfucks, Specific Coffee 等等....

地：荃灣廣場 3/F

電： 2783-9991

Candi & Kenny's Wedding

我表姐佢結婚lu。

一朝早起身﹐起唔切啦當然。於是就要三扒兩撥咁著好一套所謂的西裝﹐但係因為人窮志短 (只係志短﹐其他的都很長*_^) ﹐所以得一套夏天西裝﹐都要頂硬上….雖然今日只係得十四定十三度。

唯一可以做的事﹐就係加強「餡料」﹐係薄薄的裇衫底下﹐係兩件厚內衣﹐一件厚棉﹐一條條厚厚的縫線﹐睇得出呢件都幾勁﹐再加一件菊花牌長袖﹐將保暖力 extend 到兩袖。就係咁多。再加兩件毫無保暖作用的 Shirt & Jacket.

對腳都係靠佢…因為我無厚褲亦無保暖用的打底褲。都係著for 夏天的薄褲﹐冬季季候風一走過來同我 say hi 就凍到縮晒。

剛剛起身無耐﹐其實都好凍下。但係因為阿爸話係十一點鐘﹐所以都唔理得咁多﹐求其叮杯暖水飲兩啖當自己個身好暖﹐就立即飛的出門。如果我再早d 出問口的話﹐就唔使自己一個挨貴的啦。

點知去到﹐原來十一點只係準備影相的時間﹐十一點九先係註冊﹐妖…早之係咁我梳靚個頭先來呀。

影左一輪﹐發現文老表原來都係同我同病相憐﹐都係著「盛夏裝」。不過唔同的係﹐佢有錢去義大利買一件大絨褸保暖﹐我只得件大陸製造的紙紮來做當褸著。說時遲那時快﹐又有一陣清風吹過…好凍。走去買盒維他奶諗住暖暖身﹐點知山頂纜車站周圍都係無七仔的﹐唯有幫襯車仔檔﹐點知凍的﹐飲完﹐仲凍。救命。

最偉大的太陽伯伯﹐總算今日有開工。唔理太陽底下的其實企緊另一家人﹐我唯有立即「鼠」去取一取暖。

一月尾都算隆冬﹐Overhead Sun的角度雖然已經大過 23.5 度﹐但係都唔慌高得去邊。將近正午的太陽係最直照最猛的﹐但係呢個冬季季候風肆虐的香港﹐陽光再猛都好似個打火機仔咁暖 only. 都係企番入去室內最暖。

等多一陣﹐就可以去影相﹐正當我以為係上香港公園的註冊處的時候﹐原來係去私人公司做註冊。係喎﹐都唔記得左原來依家係可以係私人公司度做結婚註冊的添。

間野叫做「伊甸園」﹐係纜車站大樓上面其中一層的 office. 我去到﹐發現佢由朝早九點到下什五點鐘都有人來註冊﹐係排到 full 晒個種！成張 list 我諗起碼有二十幾對 couples. 嘩﹐乜香港有咁多人結婚架咩？又話d 人依家唔鐘意結婚的？好多人咁喎。

呢個地方其實一個一層過的 office 仔。其實都好細﹐佢地改裝左佢做個註冊場﹐其中一個最重要的地方就係個 hall, 但因為係舊式 office, 其實樓底係超低﹐一d “Hall” 的感覺都無﹐而且個 hall 佔地都甚大﹐基本上都用左佢成個 area 的將近一半。外有兩間房仔﹐作為新娘執好自己個樣的新娘房。有一個偏廳﹐俾親友「進場」之前等候等候。就係咁多。

有幾多人呢？就係上一場的人剛剛行完婚禮﹐佢地的親友都未出得晒來﹐我地就拿拿聲入去﹐到我地完左之後﹐想坐係度多兩分鐘都唔得﹐因為前後門都開左﹐然後下一場的親友竟然已經湧緊入來！嘩﹐咩事呀﹐我地都仲好多人坐緊係度﹐其他人已經湧緊入來﹐一時間﹐呢個所謂的 hall 擠滿左十幾家人﹐幾十個朋友﹐近百名親友﹐亂作一團。救命。OK 我明白你好生意﹐又明白你要做生意﹐但係婚禮禮成咁大件事﹐俾我地留多兩分鐘 savour 一下呢個人生中咁重要的 moment, 都好卦？

大功告成﹐但阿媽已經覺得好病。無辦法﹐始終佢係韓國病完一大輪番來之後﹐就一路係咁病﹐病足四日都未好得番晒。今次的婚禮我都覺得佢係勉強撐落去。咁於是佢好快就話要番屋企喇﹐咁我又唔想過尖咀飲茶﹐就拿拿聲同佢飛的番屋企啦。

番到去無野做﹐又唔記得要番公司 upload 尋日應該要 upload 的 report, 一味掛住打機﹐跟住又到夜晚的擺酒。

雖然今次係係酒店擺酒﹐都真係幾豪華﹐不過弊就弊在﹐個樓底﹐實在係太矮…

基本上﹐佢矮到以我一米七的身高﹐出力跳起都會掂到天花板咁矮。咁你話幾矮。當呢個情況放係一個廿五圍的酒席裡面的時候﹐就更加覺得超矮。主家席的前面﹐連台都無。主辦單位雖然係安排左魔術表演﹐但係因為無台的關係﹐基本上都只係頭幾檯睇得到﹐其餘的人嘛…繼續食翅囉。

老豆食食下翅中途被安排中玩魔術﹐好明顯佢個樣就係不情不願咁。HAHAHA...

今晚的野食幾好食的﹐起碼我都食得幾開心﹐同埋好多。

其餘的都唔講喇﹐因為差唔多個個婚禮都有的環節。唯一一個比較特別的﹐是有一個送玫瑰花的環節。材料係新娘一個﹐新郎一個﹐助手一個﹐賓客幾十個﹐玫瑰花九十九枝﹐經典歌曲 “Dream a Little Dream” (金莎朱古力主題曲) 一首不停播。首先將新娘放埋一邊﹐備用。賓客數十名分佈於會場大道兩邊﹐不分大小長幼高矮肥瘦﹐人人一枝玫瑰花在手。新郎哥放係走廊盡處主家席前﹐手執幾枝玫瑰﹐又係備用。

音樂一起﹐新娘進場﹐親戚朋友同事之餘此類三唔識七九唔搭八﹐紛紛夾道相迎送上紅玫瑰一枝﹐新娘子笑不攏嘴﹐慢慢地向前走著﹐慢慢地跟每一位道謝﹐金莎朱古力的主題曲於背後縈繞著。有穿得一身全套西裝的小朋友送上玫瑰﹐新娘子更為和顏悅色。近日枝玫瑰當然非一雙手所能盡持﹐後隨的助手其實是人肉大花瓶。走廊盡處是新郎哥﹐拿著手上最後十幾枝玫瑰﹐連同助手運到的﹐合共九十九枝長長久久﹐於眾賓客前半跪於地﹐送于新娘子。新郎哥自己便是第一百枝玫瑰﹐連同自己一起送給新娘子﹐百年好合﹐浪漫滿屋。

禮成~

環球嘉年華

由於預計自己都唔會做得長﹐而且開始左 2007 年之後都未請過假(車！開始左幾耐姐？一個月都未夠！)﹐所以想搵個機會 spend 咁d AL。

於是「本日休業」。

本來諗住可以下午的時候就去到嘉年華﹐但係因為阿媽條腰有問題 + 大少奶發脾氣所以 delay 左好耐﹐再加上要趕住買過對新鞋﹐Happy shopping 完一輪之後﹐去到金鐘的時候太陽伯伯都放左工。

基本上今次因為變左一次過入場收費﹐入到去之後玩機動遊戲就唔使錢(tokens)﹐所以變相地比以前的逐樣計錢吸收好多。而且唔知係唔係今次生意無想像中咁好﹐定係一開始定價太高﹐佢地推出左一個 weekday special package. 無分日夜場全日都係 $120 送唔知 25 定 30 個 tokens.

其實感覺上就好似係抵左咁的﹐因為話晒以前係玩每一樣野都要計錢架嘛。又每一個 item 都係四五十蚊咁呢﹐好似好貴咁。於是其實都係去的人多玩的人少。大家都係睇下玩下就算數。我諗佢地都 realize 到呢個營運方式﹐似乎唔係好適合香港地呢個咁多咁「小家」的人的地方。於是佢地都轉左做一次性入場收費。

咁好明顯各位「小家的人」就覺得俾一舊錢有得入去玩到盡﹐好似抵好多。而且玩起上來的感覺又會好似放好多﹐因為反正都俾左錢﹐唔玩盡佢就 wasted. 於是就會玩得開心左。另一方面﹐其實好多人都唔會玩咁多機動遊戲。咁其實個嘉年華仲賺左添因為你唔係「玩番夠本」呀嘛。

另一方面其實機動遊戲唔來都來左﹐而且又開著晒 up and running, d crew 唔請都請左。擺左係度﹐無理由咁浪費架？又無理由得小貓三數隻俾左錢就特登開成部 Top Buzz 俾佢架嘛。所以一次性入場收費套用係香港﹐其實搵得錢仲多。醒目。

詳情可以查詢你的經濟師, haha.

至於機動遊戲...都差唔多係果d 野。G-force, 跳樓機﹐Top Buzz, 踫踫車﹐兩種過山車﹐鬼屋﹐兩種會濕身的激流旅程﹐唔幸福的摩天輪 (因為六七個人一 car)。比較特別的係 (我覺得) 大滑梯。行幾層樓上到去﹐坐住個麻包袋 "sir" 番落來﹐成條滑梯起起伏伏似以前水上樂園的名作「五彩天梯」咁﹐都幾好玩架。

我諗「五彩天梯」應該仲好玩呀﹐可惜係我從來都未去過水上樂園。依家都似係無希望...

你話如果水上樂園重開的話﹐將會係幾咁盛大的一件事呢...

你見每個夏天都有咁多人逼係各大沙灘同泳池﹐就知有得做啦！....但係冬天又點好呢？成個樂園都食穀種乎？

諗得掂冬天可以點﹐我諗呢盤生意都算得過....

一雙憂鬱的眼睛

佢叫「拖肥」﹐今年都六歲喇。佢主人話﹐佢係臘腸狗同北京狗混種。


唔怪得佢的眼神﹐特別殺食﹐特別憂鬱。

佢主人係渣甸坊開店﹐似乎係同附近的檔口一樣係賣女裝內衣褲的。有一次我經過的時候一「立」眼見到有隻狗﹐就走埋去睇下。

咁就認識左拖肥。

平時我每日番工放工放 lunch 的時候﹐都會經過佢的檔口。每次都忍唔住望下﹐睇下佢係唔係度。如果佢開緊檔﹐通常都會走過去同佢 say hi, 摸下佢的頸﹐讚下佢乖。

不過因為渣甸街真係好窄好窄。人流一多起上來﹐我想企係對面士多望下佢都好難。更莫講話上前摸下佢。


不過今日好好彩﹐老板娘早開工﹐其他人又未開檔﹐就有好多空位俾我埋去。於是我就乘機同來影番輯即興沙龍

"你睇佢d 眼神幾憂鬱"

佢平時都係咁架﹐望親你個樣都淚眼汪汪﹐想喊想喊咁﹐好淒涼。

而且佢又好乖喎﹐唔會亂走﹐唔亂吠﹐唔會周圍「聞」其他人。我見老板娘叫佢 stay, 跟住行過條馬路掉完垃圾番來﹐拖肥都仲好乖咁坐係度等佢 - 就算係經過的車輛將佢地兩個的視線切斷左。

其實呢一年幾以來﹐我好想同佢玩。但係無辦法﹐因為太多人行過﹐個位又太逼喇。同埋老實講﹐阿老板娘的檔口其實真係好細好細個......我一個大麻甩佬已經可以混晒佢成個檔口的桔.....咁我又點好意思係阻住晒人地-所有-的生意呢。

行次如果你行過﹐都可以探下佢﹐睇下佢係唔係度。(拖肥的檔係卓悅果邊)

又發狗瘟

你睇佢對眼幾精靈﹐幾可愛！

個表情又無知﹐又純情﹐又可愛！

簡直係呃到晒所有人呀 - 除左見識過佢幾頑皮的人........

p.s. 佢呢件衫的背脊係繡左一條金龍架！黑幫大佬來架！

HKAPA Dance Studio

終於都俾我有機會影到佢一幅相喇

好鐘意呢個地方﹐因為佢夠大﹐又有勁~大塊鏡﹐仲有好舒服的地板添。 唔著鞋咁係度 「先」來「先」去﹐好好玩

下次一定要記得買到對 Jazz shoes 先得。