Bowling and Board Games

最近玩兩樣我以前好少玩的野

一樣係保齡 (唔係川久個隻~)

一樣係 board game

原來我真係無力到連玩兩局都無力﹐隻手已經累到完全拿唔起….

至於 board game, 原來呢個世界係有好多好玩過大富翁多多聲的遊戲

Tom Kha Gai

怱然間﹐好想食好想食 Tom Kha Gai.

第一次接觸呢樣野﹐係一年前去泰國。飲過呢味湯之後﹐我發現原來泰國的湯水﹐唔係淨係得一味「無陰功湯」。

Tom Kha Gai 的中文譯名﹐好似 so far 都無人就咁叫佢做「冬蔭雞湯」。有人叫「椰汁辣雞湯」 (慶過辣雞?!)。有人叫「椰汁雞湯」

我最想飲到的﹐係一碗極重香料味的湯﹐尤其係香茅。大大條香茅放係入面﹐一煲出來的時候﹐酸酸的甜甜的味道﹐叫人回味不已。

唔知香港邊度先有好食的泰菜呢….?

某天醒來

忽然間﹐很早醒來。霍然張開眼睛﹐一秒間從沉睡變成清醒﹐很突然。

原來只是八時多。

對於我來說﹐時間還早。

一覺醒來﹐忽然醒覺。原來我在公司是狐假虎威的。大家的 E-mail 來往之中﹐已見不滿的態度在彌漫﹐大家之所以會照我的說話行事﹐完全是因為背後的直屬上司﹐就是猶如威震八方的大將軍 - 大隻咪。

我已經在同一個崗位工作了一段日子﹐但依然要狐假虎威才能順利成事。

而﹐不少人都願意聽我的說話做事﹐做一些連我自己都覺得無聊 (但有用) 的修改。

是否如果沒有了「大隻咪」﹐我就會變成廢人一個？

為甚麼我做了兩年多的工作﹐還不能建立自己的「品牌」﹐建立自己的「威信」﹐建立其他人對我的「信任」﹐還有﹐我的「自信」呢？

是不是我一直都沒有長進呢？是不是我一直都太依賴「大隻咪」的庇蔭呢？

為甚麼大家會怕大隻咪而不怕我呢？我要如何做才能成為像他一樣呢？



唔…………


……點解我今日咁早起身架呢？仲可以訓多半個錯喎….

…..繼續訓…..

大失預算

咩叫衰多口？

例如你話自己份工好得閒﹐白「逗」人工係度齋坐。一心以為自己加左人工之後回巢都係一樣齋坐唔使做。好喇﹐衰多口﹐依家終於做到趴係度。

我都未試過d e-mail 係覆極都仲有的。又未試過d 人做鑊的速度竟然係快得過我補的速度。

依家﹐死人 Oracle 的防盜器仲壞緊﹐叫到成層樓都聽到叫左成兩個幾鐘﹐就來人都癲。馬克王子係度睇緊醫生﹐未有 results 出。大隻咪俾落的野﹐死線就來到。

都話架喇﹐所有騎呢野都係有個習性﹐就係一係唔來﹐一來﹐就闔家一齊來！

Eyes Flowers

我呢份工的好笑之處﹐就係一係無野做﹐一係就有好大堆的悶野做。無野做的時候﹐悶到癲﹐於是成日都想有少少野做下。

好喇﹐到有野做個陣﹐好似依家咁﹐對住幾千個城市名﹐逐個逐個查。

原來頭昏眼花﹐唔一定要年紀老先得。

係呢一刻﹐我好想向各大地產商提議﹐係興建寫字樓的時候﹐請將一間休息室納入圖則。呢個休息室係可以俾一d 坐到腳痺的人拉筋﹐同時可以俾谷到想死的人大叫而唔會嘈到其他人的。

講完﹐繼續做野。下一個城市係…Frederiksvaerk…

下？

做住下一個先…Fredrikstad….

下……?

咁下一個囉…Fueringhavnq…

…邊 Q 度來架!!!!

我不是 Blogger

要先懺悔 (高舉右手掌心向前) ：其實﹐我唔係真心鐘意 Blogging.

我的確係鐘意寫野﹐但如果一部電腦同埋一部 Wii 擺埋一齊的話﹐我相信我會打 Wii 的機會大好鬼多。

好耐之前﹐未有網上日記的時候﹐大家都係要用手寫本寫日記。媽媽覺得寫日記既可以舒發情感﹐又可以練習寫作﹐十分健康﹐所以勸我寫日記。我覺得此舉無聊之極。一個小學生日常發生的事﹐我當時都覺得無聊﹐用口講番出來都覺得芝麻綠豆﹐仲要寫？平淡如水的生活都要寫日記﹐呢個人一係太無聊一係太孤單。Even now 我都覺得寫敍事式的日記係好無聊。你生活平平無奇的﹐寫來都無謂; 你生活精彩的﹐多數都無時間一一記載。好似點講﹐都唔使寫咁。

可能係因為懶寫字卦。

中三中四兩年﹐唔知係咪青春期荷爾蒙發作﹐個人好唔開心。好睇唔過眼呢個世界﹐覺得好多野都唔係大家所相信的事實咁樣﹐就唔想講野。其實我懷疑係自己痴鬼左線。

不久之後﹐就開始 ICQ 的熱潮﹐然後就係 showhappy 的年代﹐咁我就開始 join 左呢個行列。然後就發覺原來可以一邊抒發自己的感覺﹐一邊得到其化人的回響﹐原來真係幾正。

後來 xanga 的年代來到﹐我無轉﹐始終﹐我已經 settled in showhappy already. Don’t want to copy all the things.

到後來﹐Blog 的年代開始﹐我終於都轉左去 Blogger @ Google. 但我得閒轉﹐有心做﹐都係因為一個原因：番工。

番到公司﹐無野做﹐唔可以打機﹐唔可以離開個位咁耐﹐上到網但又唔睇到其他野。被縛住係一部電腦面前﹐原來係好慘好慘的。於是﹐out of all possibilities, 我發現原來打 blog 都唔錯。唔錯的意思﹐係一來可以消磨時間﹐二來可以抒發己見。

原來﹐blogging 對於我來講只係一種係極度無助兼無聊的情況之下﹐先會有興趣投入的活動。曾幾何時﹐我真係好鐘意追各位的articles. 好似係度慢慢咁認識一個新朋友咁﹐聽佢講野。但同面對面咁識一個朋友唔同﹐你會一開始就聽到好多內心的說話﹐因為好多人都係隱姓埋名咁係 blogging 的世界裡面出現﹐將好多平時講唔出口的說話 (或者講出來都無人有心機聽的說話) 統統都化為電子文字。於是呢種似遠亦近的微妙關係﹐就咁樣開始左。

但到我辭左職之後﹐就幾乎完全無掂過個 blog。原來﹐我唔係咁熱中架咋。我都係到左果一刻﹐我先醒覺。就係因為被困係度七八個鐘﹐先會有心機打咁鬼多字。如果唔係？睇怕我都去左「猝死式打機」咁樣墮落法 lu…仲慢慢打字咩﹐都無野好講。

對唔住喇各位 bloggers. 我的確係好鐘意睇你地的 articles, 但係我唔會夠膽講我係你地的 die hard fans, 不過我依然會支持你地。



By the way…CM 好似呢…做左老豆之後呢…長氣到呢…佢篇篇都長到呢…我真係有心無力去睇晒佢所有的 articles….Sorry ar CM...

The Next Episode or just Sequel?

有道是：「好馬不吃回頭草」。其實我都唔知邊個講的。

但事實係﹐我番左舊公司做﹐仲要係做番同一個位。好神奇呀可？呢個香港居然仲會有人咁樣做。

Anyway, 今次番來係短期工性質﹐應該唔會做得長的。講明左簽約做三個月 only, 我希望我真係可以做到三個月之內搵到新工跳槽。

但係我終於都醒覺﹐我真係要搵一條路 (A profession to specialize in) 行先可以。到左我呢個年紀﹐應該已經係有三年工作經驗﹐三年工作經驗﹐大學畢業﹐其實應該係做到 Manager 級。但係我衣家連 Asst Man 的可能性都勁低﹐睇住身邊的朋友尋日仲講緊「好慘呀又低級又打雜」﹐今日就已經唔聲唔聲「我升左做 Mgr 啦無話你聽咩」。

都咪話唔驚。

我一路係JobsDB 搵工﹐一路心驚。如果我三五年後仲係咁樣的話﹐明明有成五六年經驗﹐但係就焗住搵一d 一年經驗就可以做到的 Junior 位來做的話﹐interview 果陣仲要同個乳臭未乾但活力爆棚的後生仔坐埋一齊爭工做﹐我諗我都應該會幾唔開心。

到底大家用左幾耐﹐先知自己的方向？你有無入錯行？

呼…

Heath Ledger

看見有線新聞台下的「走字板」時﹐先呆一呆﹐再嚇一跳。跑到電腦前上網查證﹐他真的死了。

噢﹐很可惜。真的是天妒英才。

本來對於他將會上畫的 Batman Begins 2 已很期待﹐現在依然期待﹐但心情完全不一樣。

我不是他的影迷﹐但喜歡看他做戲。(那又不是影迷？奇也)

聽見他逝世的消息﹐沒有悲痛﹐只有黯然。

世上又少了一個 (本來已經買少見少的) 好演員

Settlers of Catan with family

約好家人一齊於晚飯後玩﹐唯獨二少要補習﹐很晚才回家﹐於是該局幾乎十點才開始。

今次我有整整一個小時可以慢慢準備棋局﹐可以慢慢研究出一個比較平衝的設定。須知道﹐玩 Settlers of Catan 其中一個重要的因素﹐就是一開始的擺位。而島上的資源和碼頭本身的分佈﹐亦甚重要。

我向爸媽解釋玩法﹐他們越聽越覺得無比複雜﹐差點兒想「縮沙」。

到最後﹐表面上糊里糊塗連玩法都弄不清的媽子﹐勝出了。到我們三父子發現他已經九分的時候﹐為時已晚﹐無力回天。

Home Party (飛典版)

楂飛話﹐佢三秒都唔使就估到呢個係乜野﹐好勁﹐要影相留念。(但都係決定唔post 佢個樣好少少)

如果我無記錯﹐幅圖好似係 Elvie 畫的﹐畫到勁卡通咁﹐我仲估係唔係乜野船﹐或者係咩揚帆出海的時候。個答案竟然係

「鐵達尼號」

真係撞你個鬼。佢連舊冰都未畫就估到﹐借問聲幅畫有邊忽似係鐵達呢號…



然後就係切 Cake 的時候。一次過恭喜晒 Zenia + 朱 + 楂飛 + 典﹐一個 cake 一個場合一次過攪掂晒﹐真係又方便又有誠意。

個 Cake 係聞名已久的 Teresa Festival 的招牌貨 (頭牌?!) Marble Cheese Cake. 當然﹐又係係 Openrice 度聽番來。我自己都未試過就膽粗粗咁買一大個番來俾大家食﹐仲要食 $300 一個 7” 大的 Cheese cake 番來。

好彩﹐到最後都好好食﹐有超濃的 cheese 味﹐仲有兩層﹐外圍的唔係布條﹐係朱古力 (which makes cutting the cake much more difficult)。我呢個貪吃的死肥仔就話好好食﹐但其他朋友一致認佢「都好食﹐但超級極度(漏)﹐好似食左十斤芝士咁」。
Well, 可能因為佢真係用左十斤 cheese 來整卦…I don't know.


切 cake 中途﹐有兩名傻仔拿裝飾的絲帶玩...如果各位係街上見到佢地﹐請聯絡警訊~~~~YEAH

之後﹐我同朱同二少又玩 Settlers of Catan。真係要多謝聲 Elvie 姐拔「棋」相助﹐然後又要多謝Dick 少見完家長都捧住成部 Wii 番來陪我地玩。

就咁樣﹐我地四個男子組就打Wii 打到三點三 Tea time, 大家先拖住疲累的身軀回家 (我係回房)

攪 Home Party 真係唔錯…如果對大家唔係遲到早走的話

p.s. Pictionary 真係一個絕佳的 Party Game. 尤其係人多到玩 UNO 都可能唔夠牌玩的時候。

飛典婚禮的感動 (又名 Jardian 婚禮)

在得知要成為伴郎的時候﹐其實心中十五桶水﹐七上八落。到底伴郎要做甚麼？婚宴去得多了﹐但幕後如何﹐到底要做甚麼？

第一次做「兄弟團」﹐人人都不太清楚到底做兄弟姊妹是如何做的。一群人「柴娃娃」的走在一起﹐為自己的知心好友攪好一次人生的盛事﹐儘管連同新郎哥在內﹐其實人人都是「認真地實驗性質」﹐但大家都用心﹐盡力。

幸好一對新人早已註冊﹐當日的行程輕鬆得多。兄弟姊妹統統都是老朋友﹐該玩甚麼可以玩甚麼﹐十幾年來都玩過了﹐反而在玩新郎的一日﹐大家很有默契地不會再玩很激的遊戲﹐以免意外生。可能大家聽過太多大陸新聞是玩新郎的時候玩得太過激﹐於是弄到紅事變白事的地步。

大吉利是。百無禁忌。

開席後﹐諸事不順。擰炮很多都不會爆開﹐咪高峰時有聲時無聲﹐場地淺窄﹐音樂燈光都不容易控制﹐最差的﹐是人。帶頭的部長﹐一副辦喪事的咀臉﹐處處控制我們的進度﹐完全不給機會我們讓我們的節目順利進行﹐到最後﹐連深情剖白的環節﹐也被逼變成了 Happy Ending. 真的讓人頭痛。幸好一路在旁的攝影師和化妝師﹐總在危急關頭的時候為我們提供主意。但其實他們在這一天之前﹐基本上隱形過隱形眼鏡﹐所有的計劃都是靠我們幾個人的。

到最後﹐張記的同學們有默契地在其餘賓客都走了的時候都留下﹐我們幾十人圍在一起﹐連同老師﹐竟然唱起校歌來！在婚宴散席後的酒樓中間﹐幾十個舊同學竟然圍在一起唱校歌來…簡直有點匪夷所思。

離校多年後的今天﹐大家都不再穿校服﹐不再只是少不更事的學生﹐大家在社會上的際遇都大有不同﹐有喜有悲。但慶幸的是﹐幾番轉折之後﹐我們還有一次機會﹐一次由新郎新娘帶動的機會﹐聚首一堂﹐唱一首屬於我們的歌﹐也是一首只有我們才會真正懂得用心回味的一首

校歌。

歌聲悠揚﹐我拍著手唱﹐有幾句歌詞幾乎忘了。我望著四周每位同學﹐有的從來不多交談﹐有的略有交情﹐有的曾經共患難﹐有的曾經「如膠似漆」﹐有的不再多話﹐有的像酒一樣﹐時間越久友誼越醇。我感動了。

要多少緣份﹐再能做朋友？又要多少緣份﹐才能相隔多年﹐又能聚首一堂﹐做一次如此肉麻煽情的舉動？這一份感覺﹐就算不足以回憶一輩子﹐也足以讓你半生難忘。

以前﹐我覺得「久旱逢甘露」很容易想像到﹐於是很容易理解到。但「他鄉遇故知」何德何能可以與之並列﹐則一直都不解。人長大了﹐就漸漸明白到﹐原來﹐是我還不夠成熟世故。今日﹐也許我又向前邁著了一步。

要屈蛇﹐先要學識咩叫做「醒醒定定」

男 女 共 宿 中 大 生 罰 停 學 一 年 27/12/2007

【 記 者 梁 美 寶 報 道 】 為 嚴 打 學 生 在宿 舍 內 亂 搞 男 女 關 係 ， 中 文 大 學 校 方 近 月 決 定 嚴 打 男 女 居 住 在 同 一 宿 舍 單 位 的 「 鴛 鴦 蛇 」 ，一 名 中 大 工 程 系 二 年 級 男 生 因 在 女 友 宿 舍 居 住 ， 被 校 方 重 罰 停 學 一 年 。 有 中 大 逸 夫 書 院 宿 生投 訴 稱 ， 校 方 近 日 瘋 狂 「 打 蛇 」 ， 有 職 員 未 經 學 生 同 意 擅 入 宿 生 房 間 ， 侵 犯 學 生 私 隱 ， 但 中大 發 言 人 否 認 指 控 。

中 大 學 生 紀 律 委 員 會 在 5 月 份 的 會 議 中 ， 指 有 一 名 就 讀 工 程 系 二 年 級 的 男 生 因 屢 次 違 反 宿 舍規 則 ， 多 次 在 女 生 宿 舍 「 屈 蛇 」 ， 又 被 投 訴 滋 擾 其 他 同 學 ， 屢 勸 不 改 ， 終 被 委 員 會 判 罰 由 今年 9 月 起 停 學 一 年 。 據 悉 ， 該 男 生 不 滿 校 方 的 決 定 曾 作 上 訴 ， 惟 校 方 最 終 仍 維 持 原 判 。 據 悉 ， 該 男 生 長 居 於 其 女 友 位 於 聯 合 書 院 湯 宿 二 樓 一 單 位 ， 女 友 的 同 房 對 他 長 期 居 於 房 間 感極 度 不 滿 ， 雖 曾 多 次 投 訴 ， 惟 情 況 仍 無 改 善 ， 該 男 生 也 曾 三 度 被 校 方 「 捉 到 」 於 女 生 宿 舍 出現 ， 校 方 最 終 作 出 停 學 決 定 。 一 名 中 大 授 說 ， 各 書 院 均 嚴 打 「 鴛鴦 蛇 」 ， 若 被 發 現 男 女 同 住 一 宿 位 ， 會 立 即 被 勒 令 停 宿 ， 且 日 後 不 再 接 納 其 入 宿 申 請 。 中 大學 生 會 會 長 黃 永 志 認 為 ， 同 學 「 屈 蛇 」 令 其 他 同 學 受 騷 擾 並 不 應 該 ， 現 時 宿 舍 已 規 定 晚 上 12 時 後 ， 學 生 不 可 往 異 性 宿 舍 。

宿 生 指 職 員 擅 闖 房 間

不 過 ， 他 指 月 前 收 到 有 居 住 逸 夫 書院 二 宿 突 擊 「 打 蛇 」 ， 宿 舍 職 員 在 同 學 睡 覺 時 衝 門 而 入 ， 有 同 學 向 學 生 會 投 訴 指 感 到 被 侵 犯私 隱 ， 但 當 時 職 員 聲 稱 旨 在 檢 查 房 內 傢 俬 有 否 移 位 ， 若 學 生 被 發 現 曾 搬 動 傢 俬 ， 宿 舍 方 面 會向 有 關 學 生 發 出 警 告 信 ， 若 有 損 毀 更 需 賠 款 。 黃 永 志 指 ， 有 些 學 生 只 因 家 具 擺 位 不 方 便 而 作 移 動 ， 無 傷 大 雅 ， 他 批 評 校 方 不 應 因 而 懲 罰 學生 ， 更 不 應 在 同 學 沒 有 準 備 下 進 入 其 房 間 。

中 大 發 言 人 否 認 物 業 管 理 處 早 前 曾檢 查 宿 生 有 否 改 動 家 具 擺 位 。 但 宿 生 則 指 校 方 「 講 大 話 」 ， 更 向 本 報 提 供 了 宿 舍 嚴 厲 警 告 學生 不 可 搬 動 家 具 等 通 告 及 有 關 照 片 。
======================
多謝好友 Wilson 爆料

即係咁…下

屈蛇呢家野﹐其實係中大真係好普遍。好似我呢條粉腸咁都係 Year 1 的時候屈蛇係 Wilson 度屈足兩個月。無錯﹐就係呢個爆料的 Wilson。相信佢 forward 呢封 E-mail 俾我的時候都應該係「語帶雙關」。

但係普遍還普遍。男女交叉式互屈的情況﹐其實大家都仲係幾避忌的…。但係觀乎呢篇報導﹐似乎呢位「賤二」學生﹐面皮極厚之餘仲要膽大包天。

OK! 我就俾你鴛鴦蛇。但係都唔該你係女人走去男人個宿度屈, instead of 男人老狗走入去人地女宿度呀…。你一個麻甩﹐係人地個女仔場度行來行去﹐咁點得架。一個女仔係男宿行來行去同一個男仔係女宿度行來行去﹐聽起上來好似一樣﹐但係對唔住﹐係今時今日呢個唔平等的香港來講呢﹐係完全唔一樣的的。點樣唔一樣法﹐如果你係香港人的話相信應該會明白。

可能…我住的三年裡面﹐見過好多次有女仔係我個層行來行去…well

OK! 咁我就當你男人老狗屈女宿﹐都唔好屈咁耐呀。一次半次﹐完事就走喇。仲要係度賴屎咁賴﹐真係人頭豬腦。

OK! 就當你面皮再厚﹐喂﹐湯宿係三人房來架喎。你要人地另外兩個女仔點呢？睇住你地兩個係度依依泣泣﹐仲要唔係一次半次喎。

OK! 就當呢樣都忍得。「又 被 投 訴 滋 擾 其 他 同 學」 咁樣聽落九成九係「聲浪太大」啦。好心你就寧俾人知莫俾人(聽)見啦死蠢。

仲要捉左三次都唔識死﹐我真係懷疑條友心口一係有個「勇」字﹐一係有個「七」字。

Judge Tommy’s Verdict: 維持原判﹐因為被告太笨七

好慶幸自己唔係教會學校長大

【 本 報 訊 】 正 當 學 界 苦 惱 如 何 及 早 向 學 生 灌 輸 正 確 性 觀 念 時 ， 有 天 主 教 學 校 依 然 視 性 為 洪 水 猛 獸 。 位 於 馬 鞍 山 的 直 資 學 校 德 信 中 學 ， 一 直 將 中 一 科 學 教 科 書 內 有 關 性 知 識 和 避 孕 方 法 的 內 頁 撕 掉 ， 才 派 發 給 學 生 。 校 方 否 認 避 而 不 教 ， 強 調 是 要 待 時 機 成 熟 。 不 過 ， 有 社 工 認 為 學 校 推 行 性 教 育 宜 早 不 宜 遲 。 　 記 者 ： 林 浚 川

發 生 撕 書 事 件 是 具 天 主 教 背 景 的 德 信 中 學 ， 該 校 採 用 的 是 朗 文 出 版 的 《 Interactive SCIENCE 》 中 一 科 學 教 科 書 ， 共 分 A 、 B 兩 冊 。 該 校 專 責 行 政 及 家 長 教 育 的 李 主 任 表 示 ： 「 我 哋 一 早 同 出 版 商 傾 好 ， 啲 書 會 撕 走 嗰 幾 頁 至 送 嚟 畀 學 生 。 」

稱 家 長 支 持 做 法

記 者 翻 揭 該 書 A 冊 ， 發 現 第 三 章 提 及 人 體 生 育 過 程 及 正 確 避 孕 方 法 ， 並 刊 有 多 幅 男 女 生 殖 器 官 手 繪 圖 像 ， 以 及 避 孕 套 和 子 宮 帽 圖 片 ， 表 達 手 法 平 實 ， 並 不 淫 穢 。 李 主 任 卻 形 容 ： 「 後 生 仔 睇 咗 圖 可 能 有 衝 動 。 」 又 批 評 該 書 內 容 誤 導 ： 「 唔 係 有 圖 就 叫 性 教 育 。 」 至 於 為 何 該 書 「 誤 導 」 卻 仍 獲 採 用 ， 李 主 任 解 釋 ： 「 書 本 其 他 內 容 冇 問 題 ， 只 係 科 學 科 老 師 唔 適 合 教 性 知 識 。 」 李 主 任 強 調 ， 校 方 並 非 恐 懼 或 逃 避 性 教 育 ： 「 我 哋 喺 中 二 開 始 就 會 由 倫 理 科 教 師 向 學 生 講 解 性 知 識 ， 要 佢 哋 明 白 性 係 創 造 生 命 ， 唔 係 為 咗 享 樂 。 」 他 又 稱 校 方 做 法 一 直 獲 家 長 支 持 。

不 過 ， 香 港 青 年 協 會 督 導 主 任 徐 小 曼 認 為 ， 青 少 年 性 觀 念 日 趨 開 放 ， 學 校 推 行 性 教 育 越 早 越 好 ， 「 以 免 學 生 聽 埋 啲 歪 理 都 唔 知 。 」

德 信 中 學 由 東 亞 教 育 促 進 會 主 辦 ， 該 會 則 由 天 主 教 屬 會 主 業 會 （ Opus Dei ） 創 立 。 近 年 因 被 暢 銷 小 說 《 達 文 西 密 碼 》 描 述 成 反 派 教 團 而 名 噪 一 時 。

特 稿
性 知 識 不 等 於 鼓 勵 開 放

對 於 有 學 校 撕 書 避 免 學 生 看 到 性 知 識 內 容 ， 教 育 評 議 會 副 主 席 何 漢 權 認 為 學 校 不 必 這 樣 做 ， 「  家 初 中 大 部 份 課 程 都 有 講 性 知 識 ， 甚 至 好 多 小 學 都 會 向 高 年 級 嘅 學 生 講 性 知 識 。 」 他 指 學 校 可 以 邀 請 志 願 團 體 到 校 舉 辦 講 座 或 設 計 教 材 ， 如 他 所 任 教 的 風 采 中 學 ， 每 年 都 會 邀 請 護 苗 基 金 及 母 親 的 抉 擇 負 責 人 到 校 ， 向 中 一 新 生 講 解 性 知 識 。 灌 輸 性 知 識 及 避 孕 手 法 ， 不 等 於 鼓 勵 性 開 放 ， 「 何 不 及 早 預 防 ， 總 好 過 出 咗 事 至 輔 導 。 」

===========================================================

Tommy 問: 你今日 O 咀左未呀？

Merry Christmas Home Party

趁父母去左旅行﹐放間屋出來做 Party venue. 反而係 25 號出街都係好貴﹐如果去 book 一間 cafe 的話我地又唔夠多人﹐唔能夠壟斷晒佢成間舖頭﹐仲要俾好多錢買埋d 化學飲品﹐仲要係通常都勁難飲。

咁不如我趁自己有地方﹐就自己話晒事﹐攪一個我地自己的 Party. 估唔到的係大家都有興趣。如果係楂飛同阿典可以出現的話﹐就更人齊。

Elvie 提議攪 Party 最好有 Cake, 佢一話想買拿破侖﹐我就估到係 Mimosa. 無他﹐因為我都食過﹐覺得好食。果然大家係呢個話題上都係心意相通。

Elvie 仲大家引入左一隻叫做 Settlers of Catan 的棋﹐好好玩﹐攪到我上左癮。我就提供電視同新版 Monopoly (The here and now edition)﹐教主就提供 Wii, Dick 就提供另外兩 set 手掣。唔好意思﹐小弟家徒四壁﹐開個 party 都要籌旗咁籌﹐拉雜成軍。

是晚玩到三點﹐大家先盡興而回。

可以再攪。

兩個人的做節

今日下午爸媽就啟程前往機場﹐準備乘飛機到成都旅行。旅行社的安排「絕妙」之極﹐去程竟選搭晚上七時多才起飛的飛機﹐到達後一輪擾攘﹐已經是該回到酒店睡覺的時間了。就此將整整一天的行程活生生的騙走了﹐好狠的搶錢計。

就這樣﹐冬至的晚餐﹐因為沒有父母的情況之下﹐未能做節 (不是不能…)﹐於是我和弟弟兩個人﹐好好醜醜都總得要吃一餐﹐我未至於相信「冬大過年」﹐可能是因為被近年的商業廣告策略洗腦的後果﹐我覺得過年更大件事﹐但我仍然有一種比較傳統的感覺﹐冬至做節﹐是一定要和家人吃的﹐而且越多越好。

走到半路﹐我忽然想起今晚只有我們倆﹐可以不必「被逼」只吃附近的餐廳。一顆心立時飄到銅鑼灣﹐弟弟一貫的沒有意見﹐我就提議「挑戰難度」﹐於冬至的晚上﹐walk-in 去吃金滿庭。

弟弟的面上﹐有很多紫色直線。連他的背景也一樣。

一場歡喜的結果﹐通常都是換來一場空。到了門口的時候﹐見到輪候的人竟然比平日還要少﹐已經感到甚錯愕。再走多兩步﹐竟然見到裡面有甚多空檯﹐更錯愕﹐心感此事甚不妥。再走多兩步﹐見到 LED 走字板連號碼都沒有叫﹐更奇怪。再走多兩步﹐門口負責派籌的侍應去了哪兒？再走多兩步﹐見到玻璃窗上貼著紙﹐大意是今天只接受訂位﹐而且已經訂滿了。

侍應從接待處的底部忽然鑽出來 (literally!)﹐我提出我已經打定輸數的疑問﹐她給我一個證實死亡的肯定。從蒸籠裡面拿出熱騰騰的「流金歲月」然後飛快地咬破它的皮讓它滾燙的奶皇流滿嘴唇的快感﹐忽然間變成只能在腦中憑空地幻想。

Oh my god.

垂頭喪氣﹐漫無目的地走上扶手電梯。小南國有不少人在等位﹐但今晚的心已經託了給金滿庭﹐此刻忽然找個替代品﹐無疑是一手把自己連人帶心丟到溝渠去。事實非如此我當然理論上懂得﹐但溫家寶的一句「感情上過不去」套用於此刻就真的恰到好處。

經過一輪猶豫之後﹐走進了 California Pizza Kitchen. 上海小籠包變美利堅比薩﹐意料之外﹐是圍骰﹐通殺也。既然是特別情況的做節﹐吃一些平時做冬不會選的餐類﹐反而是理所當然的。至少我是這樣想。

目標徹底地改變﹐轉變又急又突然﹐變得完全不同﹐那就不再是為選擇兩個相似的心愛女人而猶豫﹐而是忽然從愛女人變成愛男人。口味轉變依然有跡可尋的話﹐會給人一種「變心」或「負心」的感覺﹐相反口味轉變太激烈的時候﹐反而難說成是「變心」﹐會「感情上過得去」﹐吊詭之最也莫過於此。

坐下來﹐呷一口凍檸茶﹐跟弟弟談談他自己。或許我倆的齡差七年是真的差太遠了﹐向來我倆哥兒都不多話。但慶幸媽一直都有跟他談談話﹐所以他不致於像我一樣﹐甚麼都不愛說給家人聽。自己總覺得﹐他們不是我的傾訴對象﹐我們是在完全不同的 bandwidth 之內的。大家的波幅波長﹐都很不同。只有很偶然的時候﹐我們的振動才會終於有一刻靠得很近﹐那一刻的共嗚﹐有一種很親切的感覺﹐我們是終於都同一渠道之中。然後﹐像波浪一樣﹐又各自各回到自己既定的頻譜之中。於上上落落之中﹐期待意外。

這一晚的做節﹐我覺得很愜意。但願二少亦是如此認為。

終於濃縮

玩左 Facebook 都有一段日子。有玩過的朋友應該都知道﹐佢特別之處就係每日都有推陳出新的小 program﹐俾你玩完再 share 出去。

之但係好似我咁玩左一段日子的朋友亦應該已經醒覺到﹐果d 無日無之的的 Requests, 又真係幾煩的。尤其係當佢地已經由十幾個累積到變成一大條國殤之柱咁長的 requests 的時候﹐你就會頭痛。但全部都 accept﹐你亦都會頭痛﹐係好痛個隻。但如果你 accept 某朋友又唔 accept 某朋友﹐accept A 君的 grow-a-gift 而唔 accept B 君的 grow-a-bitch, 佢地又會唔開心﹐你仲頭痛。

我諗我知點解 Facebook 咁成功﹐因為佢地將一樣野發揚光大﹐呢樣「既野」﹐係中國人先鐘意玩﹐鐘意在乎﹐外國人應該比較少。

呢樣野﹐叫做「人情」。我英文無阿陶傑咁勁﹐姑且用自己的薄弱的 vocabulary 譯佢做 “favour”

能夠將「人情」呢家中國自家製的無聊極品融入一個新世代的交友網﹐創作者真係抵讚。

所以你話﹐Facebook 幾好玩。

終於到呢個地步﹐Facebook 終於將我的 requests group 埋一堆。Mama Mia, Hallelujah.

失禮到爆炸的離職信

我係之前間公司做到今年的四月廿二。臨走之時﹐公司俾左一封離職信我。秘書對過﹐我對過﹐無問題﹐簽收。

西班牙番來之後我拿住封信﹐不停咁 send 信出去 apply 工。一路都唔覺得有乜野唔妥。

今日見工﹐俾份正本個 HR 小姐睇。佢睇左一陣﹐覺得唔對路。

「你話你做到今年的四月廿二？」

「係呀。」

「但係你封 reference letter...」佢指著那一句﹐說明我由幾時開始番工﹐番到幾時的那一句 「佢呢句話你係 until 22 April 2006 喎...」

下？

2006?

我眼花？我睇錯？我未訓醒？我拿錯信？我睇錯字？佢睇錯字？佢掉左包？秘書打錯字？我記錯....？其實我只係做左半年野？

喂咩事呀﹐睇真d ﹐真係打住 2006 架喎！

天呀！原來我封 reference letter 上面個日期一路都係打錯的﹐點解一路我都發現唔到？其他 HR 都發現唔到？ (以會俾機會我 interview 的計) 點解甚至係之前的機場地勤﹐直頭俾埋 offer 我﹐都發現唔到的？

突然間﹐我面紅耳熱。四月離職﹐十二月先發現推薦信有如此重大又重要的錯字﹐真失禮死人。

唉﹐都唔知點解會咁....咁切身的事我都竟然可以睇漏。

Indian Nipple Song

傷仲永

金谿民方仲永，世隸耕。仲永生五年，未嘗識書具，忽啼求之。父母異，借旁近與之。即書詩四句，并自為其名。其詩以養父母、收族為意，傳一秀材觀之。自是指物作詩立就，其文理皆有可觀者。邑人奇之，稍稍賓客其父，或以錢幣乞之。父利其然也，日扳仲永環謁於邑人，不使學。

　　予聞之也久。明道中，從先人還家，於舅家見之，十二三矣。令作詩，不能稱前時之聞。又七年，還自揚州，復到舅家，問焉。曰：「泯然眾人矣。」

　　王子曰：「仲永之通悟受之天也。其受之天也，賢於人材遠矣；卒之為眾人，則其受於人者不至也。彼其受之天也，如此其賢也，不受之人，且為眾人。今夫不受之天，固眾人；又不受之人，得為眾人而已邪？」

矯枉過正@我愛香港所以愛之深責之切

餐廳禁煙果面﹐講左好耐﹐終於都有結果。而且 so far 我所見到的係﹐成效都唔差。可能我去親的餐廳都幾守法。

跟住就來一個停車熄匙。呢個都係一件好事﹐但係﹐立法？Well….

曾幾何時聽過﹐其實停車熄匙﹐唔會比起唔熄匙﹐好得幾多。不過﹐因為車的廢氣的排出口真係好近行人﹐簡直就係自己腳底一樣﹐所以問題就會好似「近左好多」咁。

停車熄匙﹐我唔係反對立法﹐但點樣執法﹐真係好大疑問。立法後﹐會唔會情況好左？定係人人都選擇唔停車﹐慢慢咁向前行呢﹐或者死兜爛兜﹐總之就係唔肯停車呢？

呢個未發生的事﹐唔可以算佢「矯枉過正」。以下呢件﹐就珍珠都無咁真。

GOD 俾人充公晒 d 衫個單。

我真係諗爆頭都唔明﹐點解會 target 佢地。係﹐咁佢地大熾熾咁寫晒個名係度﹐的確有少少唔好。但咁樣踩界的衫﹐成個香港都係啦。你拉得幾多？

今次的 “IDEA”, 唔知係淫審處班古老石山諗出來的﹐定係警察自己食飽飯諗出來的﹐定係海關呢 (關海關咩事呢其實？我又諗唔出喎)？ OK 你想拉晒所有你地睇唔過眼的野﹐咁同專制獨裁﹐又有乜野分別呢？呢度係香港﹐唔係北韓喎﹐我地唔想有人民的思想控制。

跟住﹐就係到底決定話要告佢地的人﹐佢地明唔明咩叫做創作？

成日話香港係文化沙漠﹐無人肯創作。依家有啦﹐你睇下攪成點。如果你話小朋友唔肯去試新野﹐但攪左個大頭佛出來又一味係罰﹐到頭來又灌輸「要乖﹐唔準曳曳」的意識俾佢。過多一段日子就發覺小朋友點解一d 創意都無﹐成舊飯咁慒盛盛….

….咁應該怪邊個呢？好明顯啦下嘛﹐唔使畫魔鬼畫出腸….

跟住﹐就係到底決定話要告佢地的人﹐佢地到底知唔知 G.O.D. 平時做開乜野生意的呢？佢地的風格又係如何的呢？

老實講﹐雖然我個人應為GOD 的野真係好 X 貴﹐我完全買唔起﹐但我好欣賞佢地的氣質﹐佢地創作。正當我地一點一滴咁失去緊我地自己好寶貴的本土文化之時﹐佢地用左好多唔同的方法﹐將我地的本土文化一一咁用商品或者用品呈現番出來。而且佢地唔係做一次半次的 theme, 或者係一年半年的 promotion period﹐而係一路咁做落去。

我唔覺得佢地係第一個人 / 第一班人會用香港本土文化來做 theme 的 designers, 但堅持左咁耐到最後可以挨出個名堂的﹐相信都極少。香港人的眼光向來都好奇怪﹐一時好醒﹐一時懶 G 醒其實豬頭炳。所以佢地可以做到咁耐﹐我覺得應該支持。而且我間唔中都有去 visit 下佢地的總店﹐真係唔錯架喎 d design.

我真係好想問廣大的市民﹐唔通你地真係覺得咁樣係岩？雖然係大纜都扯唔埋﹐但我都想問埋﹐當年國際知名的大衛像﹐因為塑像係全裸的﹐所以就係「不雅物品」？你地班香港人唔係想其他人笑死我地下嘛？

喂我唔係反中亂港﹐但我真係唔想俾人睇到我同共產黨d 保守派係同一樣眼光呀。我地呢一代﹐衰衰地都叫做讀「番書」大的﹐我好相信我地唔應該有咁樣的「世界觀」同埋「文化觀」。咁樣真係太可悲﹐太可恥啦…..

唔怪得我去到西班牙﹐其他人問我以家香港回歸祖國﹐係唔係夜晚有 curfew? 有無黨領袖崇拜？有無禁制我地的言論同埋封鎖消息？

唔係一個人問﹐係將近十個人﹐係唔同的城市遇到的。

你睇下我地香港依家俾左個乜野的 image 人地睇﹐我真係唔敢相信﹐我地呢個最愛的香港﹐我呢個最感自豪的自由之城﹐我呢個最感自豪的City of Educated…..

原來﹐唔單止人地睇我地的外表都唔覺﹐原來自己身處其中睇番﹐都唔覺。喂你地睇下啦唔該﹐醒下啦唔該。