29 Apr 2003

清晨四時, 還有五個小時就要考 GRM 2103 Research Methods
不太緊張, 也不太放心
明明要計很多的數啊, 為甚麼你仍沒有睡呢?
我也想睡, 卻不知怎的, 總是睡不著。躺在床上一個半小時, 怎睡也是睡不著。
有點點擔心了, 還睡不著, 怎算? 明天腦袋仍能 function 嗎?
.............我真的不想 Re-take......絕對不可以...........

25 Apr 2003

唔想溫書, 但係就黎考試, 唔溫唔得。
打三國志打到上晒癮, 好好玩, 我差少少就統一到中國。記住等我。
Research Methods 勁憎, 又唔識, 好在有妹豬教我! 勁野! 終於都識少少喇!
Globalization and Development 超多野溫, d 野又勁 vague, 都唔知點讀
China Geog 作都唔識作, 吹都唔識吹, 溫都唔知佢想點, 勁唔知點
同房東食飯笑到反肚, 同大家姐 and 文物館雙煞食飯情況更嚴重, 笑到痴左。
好快就要 quit 宿, 有少少唔捨得, 但係我一諗起呢度樣樣都要錢, 又有少少想走。
唔想溫書
唔想考試
唔想唔想
都無得唔想
唉

發動兵法‧奮鬥.....佐治都話未夠, 要出埋突進


不如出象兵呀~
^0^

20 Apr 2003

今朝唔想起身, 但係想去飲茶, 咁咪去囉。起身飲完, 係阿麻屋企幫完手, 就去左港運城。
點解又番去? 唉, 考試喇嘛。本來想搵番之前個位去讀書既不過....咁鬼多人, 其實係好多賓賓, 咁算喇, 我的"愛位"隔離仲有幾個賓賓係度。成個星期無見, 佢地一定好多野講, 仲要講到好大聲咁添, 我咁我過到去都無用喇。走人。
渣華道library, 超多人, 無人驚肺炎, 高朋滿座, 潑水不入。走人。

好, 番到去則魚涌圖書館...好有 feel 呀....
當年, 就係呢個library, 就係呢個自修(自閉)室, 我同三兩個中學同學係度, 有文有理, 一齊去抗高考狂魔...呢度成個月的生涯, 就好似係上個星期發生的事一樣....唉, 光陰似箭, 歲月不饒人呀...(講乜野呀, 關乜事呀?)

見到個自修室咁多人, 費事入去爭喇, 人地要會考, 我一個大學生都仲入去? 好似好怪咁, 雖然我以前都見過唔少既, 但係....算喇, 圖書館都得架喇, 一樣者。之後就入左去喇。
讀得一陣, 就忍唔住拿一本 AL past paper 睇。個本黃 gum gum 的野, 一拿上手, 真係好有 feel 呀! OH GOD~! 我太掛住中學喇~~ (不過唔掛住高考, 唔該彈開~)

之後? 梗係發夢喇~~~一個鐘都唔夠, 就夠鐘又閉館, 走人。臨走前, 特登拿一本 2002 AL Exam Report 睇下, 快快脆睇下 Geog 個面係點先....衣, 好多 good 呀, satisfactory 呀, very satisfactory 呀咁喎...無乜 poor, mediocre, very poor 喎....比想像中的少喎。咁點算? 咁係咪即係上年份卷其實算易? 唔好掛? 諗諗下, 有少少失落添....唉, 原來份卷咁樣都算係容易。人人都識答既, 唔開心~~~~!

之後就回家了。當然又係 wasting my time. 完全控制唔到自己唔去浪費寶貴的時間。考試隨時都會殺到埋身, 點解仲唔好好裝備一下自己呢? 咁點對得住自己呢? 唉。算, 打埋下鋪機先諗, 我輸得唔抵。下鋪又下鋪, 下鋪又下鋪....

半夜, 同阿爸 share 一個罐頭淡菜。我都唔知淡菜係乜, 仲以為係真係菜。一睇個英文先知, 原來係海產貝類食物, 真係無知的少年。紅燒淡菜, 味道唔錯, 有少少辣。衣家係半夜三點, 係食完之後的一個小時左右, 我面上的唔知乜野腫瘤, 可能係超大的暗瘡, 變得極腫, 極痛, 身上長了的暗瘡的地方都腫脹起來, 好痛...好痛, 到底係太多油, 定太辣, 惡化了那些暗瘡, 定係...呢種海產於我而言, 太毒呢? 我無乜海產毒架喎...乜都食得既, 鐘唔鐘意食咁解之嘛.....唉也, 好大粒, 好俾火燒灼的感覺...... 好辛苦呀.....點解會咁大反應既? 好"那" 呀....好灼呀......

>__<

13 Apr 2003

其實衣家已經係早上四點四十分, 已經係星期一, 但係我未訓, 都未算到左第二日。
開番學喇, 終於都...唔再停課。終於都, 就黎要考試。
尋晚我成五點幾六點先訓, 今日一點幾先起身, 好快, 就寫完 the remaining parts of the paper喇。
然後, 竟然係打左成日機。三國志九真係會令人上癮, 上得好犀利, 中毒咁。

唔好以再咁樣架喇, 因為考試喇.....考試喇....唔係講笑架喇。

衣家係度聽 Ricky Martin 的一隻 CD, 叫 Vuelve. 原來呢隻 CD 囉過 Grammy Awards. 真係好好聽。好彩買正版。
呢隻 CD 係我中四去美加個陣, 成程都拿住個 discman 咁聽既。十幾個鐘飛機, 好多次十幾個鐘的巴士, 連同其他的 CD, 我一路聽黎聽去都係呢幾隻 CD. 個陣我好鐘意呢隻 CD, 尤其係當我係長程巴士, 成車人都訓晒, 得我一個係度聽 Discman, 聽住佢的音樂, 望住馬路上好多好多飛也似的走過的白線, 望住好多我見都未見過的名勝, 望住好多我見都未見過咁肥的女人...真架, 坦克車呀大佬,...我會諗番起好多野

忽然, 我夢到自己一個人背起了背包, 一個人站在歐洲的廣場上。明明是陽光普照, 卻感到陣陣涼意。身旁的人都是外國人, 他們都一如以往的在自己熟悉了的街道上無意識地走著。我卻是個初來報到的小伙子, 對一切他們認為是理所當然的都感到好奇。然後, 我想起了一種感覺。就是 "我到了! 我終於都到了某某地方了..." 的那一種無言的喜悅。那的確是一種久違了的感覺, 而我很想再次感到。

更重要是我想像到, 我會在那一刻感到甚麼。五點了, 天快亮了, 有緣再寫。

12 Apr 2003

撞鬼你, 呢個 website 越來越難 log in。好幾次我想寫日記都入唔到黎, 都唔知做乜野。
其實今日係星期六, 我係度趕緊中國地理的論文。雖然話只係要寫二千字, 但係都唔知點解都係有少少擔心。唔奇既, 俾著你頹做一份 paper, 你都會擔心喇。但係想唔頹都唔得囉, 因為自己懶左成兩個 reading weeks 喇。人地呢, 就係度讀書, 係度做 paper, 我呢, 係度不停咁打機, 又唔睇 references, 又唔讀書, 又唔溫考試。都唔知自己想自己點先係。好快就考試 lu, 點算好呢。

尋日去dentist, 佢話, 今次都仲係未拆得個kool, 因為仲有一個地方硬係合不上...咁大家都無晒辦法。佢問我試唔試多一個月, 我心諗, 如果呢個月真係補救得到既, 算喇, 忍多幾個月囉, 唔係點者.....足足三年喇, 你估好好玩咩。我同人講我唔開心, 人地都以為我係度講笑喇, 反正我個樣都係好好笑架喇。尤其係衣起棚牙個樣, 仲唔係傻仔? 唉, 算。好想再試一次香口膠的滋味。

今日搭火車, 見到有一 pair。係火車地鐵見到呢d 一pair 二 pair, 唔出奇呀, 係嘛? 係。我又明明唔識得佢地架喎, 但係唔知點解, 我望住佢地, 感覺好似好親切咁, 好似幾時識過佢地咁, 好似幾時代入過佢地咁, 好似...幾時我曾經係主角之一或者想係主角之一咁。多看兩眼, 心頭竟然有一點點的酸溜溜的感覺, 別過頭就不看了。
為甚麼呢? 我明明已經忘記了愛是甚麼的感覺。我明明已經做了一個非常獨個兒的爛佬。真的, 真的我己經不在乎我是不是一個人。偶然想起, 也會感到奇怪。從前的我, 視愛情為天下第一的事情(笑), 今天...為甚麼呢? 站在火車中的一角, 看著他們, 有一點點 admire, 有一點點 sad.

再望望天空, 看著架空電線整齊地滑過藍藍的天空, 好像我生命中有很多事都是會這樣的 - 滑不留手。別以為這是甚麼色情的 description。當你感到生命中很多事, 很多人, 很多經歷, 很多回憶都是滑不留手的時候, 我想你也未必能笑得出了。

中大裡面, 有時候還會看見一些令我有一點點想, 說得難聽點, "去馬" 的。但我自己卻很清楚一點, 當我自己問自己一個最簡單的問題的時候, 一切都明顯不過了
"但, 你愛她嗎?"
答案就簡單而直接了: "不愛"
不愛, 就不必費神。若然"去馬"了, 跟那些 "得閒拍下散拖, 溝下幾條女" 的公子哥兒有甚麼不同? 那又跟 GRM 某 year 2 有甚麼不同?

複雜一點的問題我也問過自己。"若然有拖拍了, 會比現在的生活開心嗎? 會比現在的生活好嗎?"
..............
....................................


...........你先說吧。我想不到。

6 Apr 2003

好耐無寫過日記...真係耐得好誇張, 成個日記好似停頓左咁樣。因為之前個份 paper 同埋中國社會個份讀書報告實在係趕到人都癲。
就係個一日我趕好兩份 paper 之後, 就聽到宣佈停課了。
Oh....
即刻係感到開心, 因為 China Geography 的 paper 同 presentation 都推遲了, 開心到癲。
然後, 成個假期都係度打機, 打到癲左, 因為買左隻舊 game 俾 PS - Diablo.
好玩呀, 真係好玩。

然後呢, 就係有幾日番左中大。好正呀, 成個中大都無晒人, 好好 feel.

以後? 唔知喇, 唉, 又係做 paper 囉, 做完就好開始溫書, 因為好快就會開大考囉。

23 Mar 2003

今日焦點: 大專戲劇節
總結論: 非常好睇, 比我想像中好睇得多好多。就如崇唱所說: 睇到拍爛手, 笑到無氣抖, 正到唔想走!

中大篇:
第一場就係中大先出場。出場前司儀叫各大學的同場觀眾替自己的大學打氣, 可惜, 中大人少力弱, 基本上都沒有人叫, 好慘。
中大的劇講述一個小時受到繼父虐打, 性虐待, 以致出現人格分裂, 多重人格的一個可憐人。這個叫"比利" 的人, 有史上以來最多的人格 - 共廿四個。最後, 比利因為受其中一個人格某一時間內支配著, 而做出強暴, 搶劫等行為, 最後被捕。由於世俗不接受如此的一個人, 到最後就算好心律師出手相助, 亦難逃世人的眼光, 被判死刑。
好, 論演員。先論張好仔。好仔戲內的角色叫阿瑟, 是比利的其中一個人格, 是智者型的人格。果然入型入格, 反正他自己的樣子也似是有幾分書氣。不過他上到台上, 又似跟台下的沒有幾多分別, 除了表情的確(亦一定會)比效誇張之外。
然後, 就是女律師。超勁, 勁到癲。入型入格, 字正腔圓, 句句清晰, 表情做足, 勁。咁多要講得咁快的對白佢統統都講到, 仲要 clearly presented. Good.
然後, 就是其他人...唉, 超級痴"利"根...尤其以角色 "雷根" 為最嚴重, 痴得好犀利, 完全最唔到佢講乜野, 好嚴重。
其他的, 都沒甚麼問題。整體上而言, 四套戲之中, 中大此齣戲最為沉重, 很完之後我的心情真的很沉重, 不知怎樣似的。風格上, 我完全不懂話劇, 亦因此完全不懂得評論, 但跟據我看過的新亞劇社的表現, 似乎是次 "二十四個的‧他" 演出的風格跟新亞的 "記憶的年輪" 的風格最為相近。亦因此, 看上去有一些似曾相識的感覺。
台下: 其他人大部份都懂得欣賞話劇, 唯部份人真的是市井之徒得很。時而叫囂, 時而放聲大笑, 時而在不適當的時間大聲鼓掌, 實在惹人反感。我這麼一個粗俗之人, 還以為自己已經算是不懂得大體, 不懂得欣賞。今日一見, 方知自己算是 "低處未算低"。那一 group 人貫穿全場亦是如斯低劣表現, 實在是大專生的恥辱。

科大篇:
之後上場的就是科大。科大的劇一開始就打正旗號為比較輕鬆的劇, 果然亦是如此。其中以火雞舞的一幕最動人。笑位笑爆肚, 真的笑到眼水流, 感動位亦不過不失, 好! 但其中一幕不停地 hard-sell 科大, 就未免有點兒那個。科大有無? 有無乜野? 色狼呀? 白痴呀? 勁人呀? Well...算喇。懶得理你。
演員: 最少的演員, 亦應該是最少的backstage. 但出來的效果亦算不錯, 低成本(我想是)的一套劇, 不錯。

之後 Break 一 break, 就讓我撞見了阿瑟。他真的興奮死了, 因為今晚演出真的不錯, 而且有人來看他表演。知道我只有自己一個來的時候, 他就跟我坐在一塊了。開心, 終於有一個朋友來陪我坐了。

浸大篇:
不得不承認, 浸大的劇雖然有一點點胡鬧, 卻是我認為四齣刻中最好最好的一齣。真的非常好! 刻本構思不錯, 笑位多到完全無氣抖, 如果Wilson 跟我一塊去看的話, 我倆一定會笑到人仰馬翻, 狂笑至窒息~~! 笑位之多, 記不起了。例如美恆變魔術; 劇中的編劇改了又改, 情節越改越古怪; 一眾小矮人走出來抬走巫婆; 魔鏡說巫婆原來跟王子有路, 小矮人是淫媒; 小矮人們有如打機式的排陣, 與大火龍對戰等等等等...So many!
演員: 焦點所在, 在於相識八載的黃美恆。美恆今次演的角色是小矮人中的 "懶訓", 應該就是 "Sleepy"。角色令她經常都抱著一個骨頭狀的枕頭, 像是快要睡著似的。美恆的獨腳戲不多, 但相對於其他小矮人(博士除外), 她的戲份已經算不少的了。有一幕, 眾小矮人飛奔出來抱走巫婆, 只剩低美恆一個反應比較遲鈍所以未走, 到最後才後來車上......那一幕所模仿日本卡通片橋段, 真的似模似樣, 非常好笑。美恆這次算是演活了這個角色了 (會不會是因為現實中的美恆也是這樣睡不醒的呢? 哈哈)

港大篇:
最後一齣, 講述一個年輕兒子, 有一個極度照顧又極度緊張兒子的母親。一晚, 兒子被解僱, 母得釋之後憂心忡忡, 心臟病發死去。其後以灰姑娘身份重回人間尋子。最後, 兒子體諒母親, 母親安祥地去了。整齣劇都很悲傷。尤其是當我回想到我自己的時候, 有一刻真有一點點感動的位置。但那一刻我因為要出去聽電話, 被卡住了在山頂, 回不了坐位, 不能跟好仔在旁細說。
演員: 亦只得很少人。男主角得一個, 經常低頭, 表情極少, 無從評論。母親角色不錯, 確能把養兒一百歲, 長憂九十九的神緒演出。反而灰姑娘呢...可能因為大家都是年紀輕輕, 未能真正的想像母愛, 我個人覺得她像是用男女之情的愛讓自己入戲, 並非母子之愛。算吧, 我都是在齋 talking, 我根本連一點點的 drama 也不懂, 只是在扮識野。要真專家? 找張好仔就行了。

21 Mar 2003

為左一個月會, 攪左我成朝早。等我仲以為呢個又係好似上次李遠哲個個咁鬼悶。點知原來唔係, 今次講的係舞蹈, 足足介紹左成十隻舞。好鬼勁。我個人睇完咁多隻之後, 依稀記得最鐘意係 拉丁舞中的 Samba 同埋標準舞中的 Waltz。一個節奏明快, 音樂快樂動人, 令人巴不得立刻起舞狂歡! 一個節奏幽怨, 舞步不徐不疾, 緩緩地表現愁中獨舞。用心聽起來, 真的好像看見兩個人在為一件不得不傷心的事, 卻不知如何可以紓發這愁緒而無奈地, 慢慢地起舞...好一個華爾滋!

之後, 因為自己的樣子太可怖, 實在不能這樣跟子暘阿爸拍照, 就飛倒回恆生。整理自己後, 就飛回崇基, 跟快要畢業的子暘拍一張照了。噢, 那就走了一個組爸了。

見到 CC 送舊(見到他們)真的很開心, 很令我 admire, 我也很想有一個這麼開心的活動可以在一起一塊兒玩。上中國社會的 break, 我望著王福元樓, 看見其他 professors 的房的 windows, 我在想: 他們還是會依舊在這裡教書; 世界還是會不停的轉動; 其他人都會在活著自己的世界裡面; 街上的行人依然是半分都不會鬆懈, 一切都照著時間的流動而逝去。當時間都不經意地飄過之時, 很快, 下一個畢業的就會是我了。那一刻, 我就要到社會工作去了, 連最後一個可以躲藏的溫床 - 大學, 就要離開我了。我要怎麼樣過這三年的大學? 我到底想做一個甚麼樣的人? 我要怎樣令這三年更加令我難忘? 我很不想像以前中學生活的過日子方法來過大學的生活。無奈地, 這大半年我都是這樣的情況下過來我的人生。我又怎能不慨嘆? 世界就像在這一刻轉得特別快, 特別快...甚麼都不會為你留下, 而甚麼都好像過得了這一刻都過不了下一刻。很多事情都不是你掌握的, 很多你不想發生, 不想到來的事情, "要來的始終會來"。
我很不想
有很多我不想
可是有很多事情都出現了
我見的世面一點也不多, 甚至是一個很幼稚的人
可是, 我所見的世面已讓我覺得不很高興, 很不安
而對其他人, 其他事, 那麼客觀存在著, 那麼現實的事, 我都感覺到那麼觸不到, 那麼虛無縹緲, 那末, 我又怎能對"時間" 不失去控制的信心。
我都不知自己在說甚麼
只想說, 人大了, 人浮於事的感覺就特別強

人浮於事...

人間.....時間.....

箭一般的飛過
鐵一般的絕情


"要來的始終要來, 要走的始終要走" - 很可怕, 真的很可怕的感覺

19 Mar 2003

今朝睇牙, 都唔使一分鐘就攪掂, 撞鬼你, wasting my (transportation) time.
好在係屋企出黎, 唔係係中大出黎, 唔係的話, 肺都激爆。

番到中大, 上中國地理, 怒抄, 張力好勁。之後就地資盃乒乓球比賽。

好野, 好多人到呀, 好開心呀!! 估唔到咁多人肯到喎! 真係估唔到...唉, 終於都鬆一口氣。
你唔明架喇, 咁用心去攪一個活動, 估唔到咁多人到個陣, 佢偏偏咁多人到....真係好感動。YEAH~~~~~
地資盃, OOOOOoooosh~~~~~~~!
好, 仲有個足球要我黎呀, 仲有個牌類同閉幕典禮等緊我地呀, 要快手快腳喇~!

地資盃, 真係一場漫長的戰鬥....

我個腦真係完全唔掂
自從上個星期暈左怒"hum"左一野個頭之後, 又黎多劑撞牌意外, 撼到個頭傷晒。衣家我記野又唔係咁記到, 諗野又唔係諗得以前咁快, 又無諗到咁多野講。人地講乜野我都唔明, 要問完一次又一次, 要其他人解完一次又一次之後, 我...都係唔明。
好似尋日開會咁之嘛, Frankie 講的 idea 人人都明, 唯獨係我講極都唔明。老婆仔都睇見我咁樣都呆在當場, 阿妹都呆住。我都唔知自己係度做乜野, 做乜野乜都唔明架? 點解會咁, 莫非我真係撼得個頭太勁?

更令我發覺呢個問題的原因, 係因為我覺得自己近來真係好容易疲倦。訓左六七個鐘, 起身之後做半日野之嘛, 就眼訓到癲, 唔知做乜野。好想訓覺, 仲要即刻趴落床, 訓到不醒人事個隻。只能有一個解釋, 就係個頭的傷影響....如果唔係, 就應該係上一個星期太倦的關係而令我今個星期的周期性疲勞未能得到 restored.

總之, 幾辛苦下。想做乜野都做唔到。每一日活著都好似得個幾個小時的 limit 咁。一過左, 個日就唔能夠做到 any more productive things...點解呀~~~

醫生醫生~~唔好咁易眼訓得唔得呀~~~~

17 Mar 2003

尋晚仲以為好醒, 唔番中大, 諗住係屋企好訓d, 點知到左成兩點幾先知原來聽朝早八點半會有一個 globalization 的 tutorial, 即時PK. 仆倒去上床訓覺, 訓都訓唔切咁。

今朝, 都係遲左, 算, 遲少當早 (輸少當贏?!)。之後即刻番宿訓一陣, 好左好多。然後上Banner, 果然有番一定程度的難度, 尤其係我地的 Banner 咁鬼簡單...全人工~ 好彩我地醒, 一齊諗到同一個方法, 吊上去。Yeah. 然後食李慧珍意粉, 貴野果然係好食d.

跟住就係 Remote Sensing of the Environment. 好彩無乜野, 唔係好訓, 都幾好。然後就係等 Vincent 打波, 撞鬼, 佢個 CCGRM 會天光開到天黑, 好彩我都好乖仔咁睇左兩三頁 references.

七點, 都仲未食飯, 就要到 O camp 傾莊。好唔情願咁做左福利部的一員, 唉。其實我真係想做節目部, 無奈係同個度的人唔會夾得去邊, 所以...
有好多野真係人夾人緣, 係鐘意就會鐘意, 係唔鐘意的話你點逼我都唔會想做。而且, 我又覺得如果同個一班人唔係夾得來的話, 又...咁做乜野要逼自己去做一個 O Camp 呢? 唉, 我最怕就係同一d 自己完全唔鐘意的人係埋一齊, 仲要係如果自己有得揀的話, 我會更 "dum" 心
但係我又唔想做出版咁頹....做出版真係會好廢, 好似唔係 O Camp 的一 part 咁!

唉．．．又一個令我唔知點算好的問題。人生都已經夠晒多問題架喇。

夜晚同阿 Rose 同 Wendy 一齊狂歡, 好開心呀! 真係好耐都未試過咁樣笑到有氣都無訂抖, 笑到牙都甩~

唉
好想有一個大少少的房

13 Mar 2003

尋晚我番到宿, 十點幾已經訓左。因為都知道自己無可能溫得到落去。果然, 一訓就訓著左。今朝起身, 九點。Research Methods 溫都無溫過, 心口有個勇字就去考...到最後, 當然唔得。真係好唔得, 五題裡面得兩條我識得答, 只有文字題先識得答, 計數的題目真係完全唔識, 我連上個 sem 的東西都已經完全忘記, 好唔開心。我已經係唔識答到...唔知點好, 我淨係識得坐係度, 然後諗都諗唔到任何野。我好想記番起以前學過的東西, 但係我連 standard error or something like that 都記唔起。個一刻, 我好想好想走, 好想離個呢個我根本唔想再留多一秒的地方。最後我走左。五條裡面三條無答, 情形同Global 簡直一樣,...點解會咁。

點解會咁...我一路係咁問自己...點解我會唔識得咁緊要? 係咪因為自己真係太懶? 係咪因為自己攪活動之後俾自己藉口唔溫書? 係咪因為無自制能力?....點解會咁

一個人, 考完之後番到 reference room. 下意識地囉番起 2103 的 reference box, 打開, 發現裡面都係一張張充滿著好多好多數字的 references, 全部都係我唔鐘意的數。但係個一刻, 唔知點解, 我覺得好灰, 好唔開心, 心頭好酸, 有點點想哭的感覺。

但深吸一口氣, 回想自己仍在 department 之內, 就算了。走了, 回 222 讓自己做地資盃的旗海吧。做一點不用腦袋的事, 會令自己好過一點。從前的哲人以砍柴來令自己的腦袋休息, 同出一徹。

做旗海, 真真正正的令略到人多就可以做得很快很快; 相反得我一個, 做的速度真的可圈可點。之後吃了一點蛋沙律三文治 (正), 就乘車入 Shaw。幹甚麼? 考 IT Proficiency Test 也。每個中大人都會經歷的一段。原來不太難, 尤其是考的時候, 簡直和從前的 CA TAS 一樣! 不單令我回味從前考 TAS 的日子, 還令我覺得這份試卷份外容易! 哈哈。最沒有用的一科 CA 終於發揮了他的作用了! 考過 IT Test 之後, 心情也開心了很多。

但那一刻我卻在想: 為甚麼大的, 重要的事我就做不了; 少的, 不重要的我就做得比較好呢? 像上一個 semester, Major 都得不到好的成績。反而PE 就因為游泳所以得了 A-, elective 的 Sociology 還得了 A! 開心得不得了。這一個學期, 無關痛癢的普通話, 只計一個學分, 我走了個五個星期的課, 卻給我在 mid-term 拿了個 A- ! 天理何在。現在的 IT Test, 雖然未出 results (亦不知何時出), 但我估計也一定及格的了。唉, 果然不是大將之才, 係小混混也。

算~~~~小人物先有小人物的開心, 無大將之才先有的壓力~~

好, 講番我的地資盃。今天就是地資盃球類活動的第一日 - Basketball。唉, 以我兩年以來的紅社經驗, 都攪唔掂一個地資盃的球類, 唉....好唔開心。明明買水買 glucose 呢 d 咁簡單的野, 年年都有做開, 點解我今次都係醒唔起? 完全係 messed up. 淨係買野我都跑左三趟, 氣都咳。最後? 當然係人多勢眾的崇基贏喇, 真係無佢乎。咁多個咁高的人, 仲要車輪戰咁恰我地, 來來去去都係三個人打晒連續一個鐘頭, 鐵人都死喇, 係嘛?! 唉...Shaw 又係, 休息左足足一個小時, UC 的三個就足打左一個小時, 唔公平之極。但係無法, UC 的人係咁....有佢地三個我己經好開心。

另外, 就係 Vin 完全出唔到場。見到佢個咁失落的樣子, 我都有少少唔安落, 仲之後特登 tum 番佢問遲d 同佢打波好唔好? 佢話 "你? fuck, 俾我數就有你份!" 原來有時候女人都真係幾易 tum, espeically when there is comparison to be made between the 2 sexes...

然後眾志大家一齊食飯, 大家一齊整埋 the rest of the 旗山旗海, 好野! 超正...如果可以貼滿整個中大就好了....

我還看見, 整個中大的欄杆上, 真的貼滿了很多地資盃的旗海....綠色的地資盃, 橙色的籃球, 淺米色的乒乓球, 藍色的足球, 粉紅色的牌類和閉幕典禮.....滿山都是.....

要GPA? 還是要工作過程的快樂?

8 Mar 2003

開始覺得
寫呢度的日記
好似來來去去都差唔多
尤其係我呢排仲忙緊地資盃個陣
好多事都變得又係差唔多
想寫野落黎
但係又諗唔到寫乜野好
再寫我點樣係中大走黎走去走到索氣
又好似好悶咁
你睇起上黎都悶喇, 又唔會感同身受既
唉
可以挨到三個月, 今次寫日記的目標都算係咁囉
我以前邊有咁有恆心架
希望可以 keep 住上喇

3 Mar 2003

終於都比較忙完
好開心
但係遲d 又係會咁忙
仲要有個幾驚下的普通話考試, 想唔驚都唔得。

三月一日, 星期六, 做過乜野....唔記得添
呀係, 要留係宿度做 presentation, 到最後都係放左唔少時間係 fellowship of the ring 個度。估唔到突然打爆左。然後番到康怡, 好開心因為同番屋企人一齊食飯, 而且有好多好食的東西。有些感覺是回到家庭身邊才回消失的, 例如緊張。跟住去住祖母家, 幫佢 ready 床舖被褥 for visitors. 然後就係屋企度上 internet 睇楊汝萬本書睇到人到癲...為左一個 present, 無計。四點先訓。

三月二日, 星期日, 一早起身就要飲茶, 因為已經成十二點 ( 無錯, 都算係 "一早" 起身的)。之後買左對拖鞋, 一桶蒜香粒粒, 唔夠五分鐘食晒, 貴得好味。然後番屋企。番屋企的途中, 睇到好多好多唔同的地鐵廣告版, 有好多上左的電影我完全唔知, 番到過黎港島先知我期待左好耐的 DareDevil 原來已經神不知鬼不覺地上左畫, 我都呆左。Suddenly feel 到自己好似去左一個好遙遠的地方之後, 成個世界已經唔同晒, 但係你都懵然不知...多麼可憐 and 可悲的感覺。廿歲仔, 係條街度頭 "愕愕", 左望右望, 好似岩岩係大陸落黎咁....真係灰到爆, 仲要明明我係地地道道的港島人!!!!! 下午時份, 我趕住做 persent, 我細佬死霸住我部電腦唔俾我用, 我睇唔到楊汝萬本書, 手頭上的書又幫我唔到, 唯有拿拿聲番宿, 點知一做就係做到五點半....AM......天都快亮了, 好辛苦。

三月三日, 今日, 七點九起身, 八點半落到CC 做 presentation。口又窒, 講野又唔掂, 又未訓醒, 個 topic 我又無興趣, 完全食晒 X. 好辛苦挨完, 之後又做地資盃 Banner,....仲以為應該唔太難, 點知係難到飛起, 一做, 就兩個鐘, 本來諗緊可以係 222 訓左算數, 唔得 lu, 做完, 都夠鐘開地資盃個會....當然又係一開就兩個鐘。越開個人越唔掂, 要不停咁撩Candy 呀, Claudia 呀, 嘉威呀佢地玩, 笑下, 交換下身體的氧氣, 咁先無咁辛苦。之後 Remote Sensing, 死挨爛挨先挨完, 好在眾志的奶茶果然冠絕中大, 好飲, 又好 powerful. 之後? 到左 UC Lib 借左兩隻 Godfather, 一隻 English Patient, 就番宿...真係好累了....當時還是五時許六時左右。

28 Feb 2003

終於都考完 mid-term
雖然遲d 會有個普通話, 但係我都當考晒喇...好辛苦呀
今日 globalization 怒炒, total 有八題, 我淨係識做一三五七題, 二四六八都唔識做, 二六試左做, 四八就真係完全漏空左。今次真係大獲。
仲有, 今日又怒奔走中大。好辛苦, 我 feel 到自己的雙手雙腳都係麻痺左, 肢體末端都已沒了反應。handball 堂的一堂三分鐘超激怒奔, 更可怕, 將我全身的氣力都 drain 晒去...大佬呀, 今朝八點都未夠就起身喇, 唉。
仲有一個地資盃要應付...真係殺到埋身。
唔打喇, 真係挨夠喇。好辛苦呀, 幾多支狂潮都救唔番。Goodnight

23 Feb 2003

一早起來, 就到嶺南場, 因為今天是中大四十周年慈善健步行。在嶺南場還有一個很大型的 Carnival, 怎說也該出席去看看吧。到了那兒, 很擔心, 因為我在聯合真的一個熟的朋友也沒有, 有比較熟的也沒有來。唉, 最多的朋友還是在崇基那兒, 要不就是在新亞, 可是新亞的都沒有來, 那我該怎辦? 我又不想坐到聯合那兒。唯有扮崇基人, 坐到崇基那兒吧。戴起一頂棗紅色的CC帽子, 躲在人群裡, 扮作CC 人, 詩雅說根本沒甚麼好擔心, 根本沒有人會知道你是誰, 我自己就擔心得很了。

長青線真的很短, 很快就走完了。之後的嘉年華, 還不錯, 不過全部時間都放在排隊等一個看面相掌相的檔口, 而且江湖術士的話, 真的不太準。未免....

爸媽還駛了車子進來中大, 看嘉年華。他們都挺開心的。不過最辛苦是背著 Cindy 的超重電腦四處走, 幸得我未有宿之前 "久經訓練", 應付得來。

整天也沒有溫過書, China Geog 的 notes 真的太深了, 又太簡單了, 怎看也看不懂得在說甚麼。唉, 後天就是考 mid-term 了。天呀。

21 Feb 2003

又走左堂。唉, 怒奔走。連月會都起唔切身, 唉...灰到爆。PE 堂...一樣地唔想上, 但係一樣地要上。中國社會, 一樣的悶, 但係一樣的有好多野要抄。夜晚, 出左去買檯燈, 之後無飯食, 一個人係度食沙爹豬頸肉飯, 好頹。

好多野都開始一模一樣...可不是嗎? 就算係生命中的點滴都不同了, 但生命的大方向還是一樣。連入了大學之後的生活其實都是差不多, 怎麼攪的, 怎麼總是一模一樣的。我都開始覺得有點悶了...只是總是沒有信心去勇於突破自己而已。為甚麼呢? 唉。

我幾時先至唔會再 "唉" 呢?

20 Feb 2003

拿
我真係打左野架
講左好多關於個陳奕迅演唱會架
話佢快歌唔得慢歌好好聽架
不過佢個 server breakdown 左定係 something like that
攪到我 post 唔到上黎咋
唉
又無左成個日記

18 Feb 2003

掙扎了很久, 才能起床。始終, 昨夜睡得那麼少, 做Banner 又做得那麼辛苦...唉, 要起床上早堂真的一點也不容易。但我之前的兩次都走了這 PE 早堂, 再走...好像不太好。起床的時候已經很遲, 再用十五分鐘飛到U Gym...氣都咳。

PE 課...教七個打六個的戰術, 我個人覺得很複雜, 非常難明。又要用腦, 又要用體能...無疑地手球這運動真的很有益, 很益智, 但由我這個沒頭沒腦的人來打, 未免...

所以我喜歡游水水~可以自己一個人, 不和其他人一起也可以進行的運動, (不用四處找朋友當球友或是當對手, 自己一個, 幾時游就幾時游) 又不會和其他人有衝突 - 我常聽見很多人在籃球場上跟不認識的人會有很多不快, 口角, 甚至更 worse. 游泳則不會, 其本上我看見池裡的人都是一個又一個自閉的個體呢。但當然, 也有三五成群嘻嘻哈哈地"游"玩著的, 我也很 enjoy 這一種。而且呢, 其本上我覺得游水不太須要用腦, (太好了, 不要用腦的運動~) 跟據我的認識, 也好像不太多戰術, 像了接力時會有一點人興人之間的協調之外, 好像整個世界都是你和水的, 沒有別人。

自由, 去那裡也行, 不用腦, 不用跟別人協調, 不受制於別人, 也沒有人會笑你, 不會出汗, 不會熱, 不會發出汗臭味.......多麼的好, 想想也好。

只是, 我想強調一點, 我只想當swimming 為興趣, 不想公式化 & 工式化它...即是, 不喜歡 training.

說回今天, 原本約了朋友上完體育課就到他宿睡覺, 因為非常近, 但發覺尚有其他事未做完, 唯有先回 department, 再直接回到樓梯宿睡覺。當然就是睡不著。自己本身已經夠緊張的了, 旁邊還要有阿嬸在吸塵...吸塵機的聲浪大家都是清楚的...唉。到最後, 還是沉沉入睡了。

一小時後, 就被 Vin 的電話吵醒。相約了到旺角買剩下來的拉炮和飲品。趕出宿, 跑上士林路, 忽覺不對, 一摸褲袋, 空空如也, 手電呢? SHIT. 遺了在房內. 又要從陳宿地盤跑回恆生再跑上自己房。知道趕不及Shaw 18 分開出的轉堂巴, 就唯有乘穿梭巴。先跑上五樓半再跑上恆生梯...一日跑幾次恆生梯, 命都短幾年。

很久沒逛過旺角了, 感覺...好像是甚麼被我遺忘了的感覺似的。買過六打拉炮 (開心! 有得狂拉!) 也買過裝飾會場的皺紙, 就到麥記吃孖芝, 再在迷失了的旺角找百佳, 買了 7 x 6 = 42 包紙包飲品...兩個人抬走....唉, 命都短幾年。

ELT 也決定走了, 回到宿, 用了十分鐘做該做的功課, 用了餘下的時間不停打電話安排 helpers 的位置, 不停轉人, 不停 contact 大地的莊員, 也不停的趕...然後, 為了可替所有 helpers 做 briefing, 又趕不及50 分的轉堂巴, 就背著 4KG 的物件連飲品 **跑上恆生梯** .....第三次了, 我想死...背上的負重真的很重, 雙腿都麻痺得很, 索氣的聲音幾里外都聽到。但我不能停下來, 還有十分鐘就要開始準備了, 整個 schedule 都很 tight, 不可能再遲的了。一定要跑, 多辛苦都要跑下去。想著想著, 就已經跑下了UC 梯, 跑過田家炳, 跑過文化廣場, 走到 Lady Shaw, 賤錶, 小橋流水, 神學樓, Chapel...終於都到了, 好辛苦地打開了LT4 的門...裡面竟然已經~~


一個人都沒有, 一個人都未到。
失望指數達頂點。
咁我為乜野要咁趕。個個都唔到。命再短幾年。

原來他們都在 222 分衣服, 又在談天說地。我個人就趕到 PK, 他們就好像一點也不怕不夠時間。整個會場都未開始佈置過, 也沒有人準備過。難道真的一點危機感也沒有? 我就危得可以了, 我不知他們在想甚麼。

然後, 在會場之中, 很混亂, 我那一刻才得到分紙, 貼紙, 其他東西。要影相沒有地資盃, 拿了一個棒球就算數; 要派分紙不夠分紙, 竟然...竟然不夠, 那麼重要的東西都可以不夠, 我能怎樣? 好不容易才送了地資"杯" 給 Professors, 又變得參賽隊伍混亂起來。唉...當他們終於出發了的那一刻, 整個會場只剩下我們四人之時, 我真的有點想頹然倒下哭出來。唉。再多的籌備都似在一刻間崩潰。

就在那一刻, Fione 尖叫, 大家都忘記我們取消了一個 Checkpoint - 二宿停車場。唯有我立刻出馬。但, 沒有轉堂巴, 下一班穿梭巴又要很久以後, 又不會入 Shaw....那即是, 唯一的 Choice 就是.......

跑入 Shaw。又短幾年命。

中間的過程不詳談了, 只想說, 從沒有那麼辛苦, 比以前玩 Gala 後要別人扶起才能離開池邊更不堪, 更休克。能走完全程, 能趕得及在 George 一組離開之前給貼紙, 完全就靠加菲貓所說的一句 : "Sheer Willpower."

到了, 我頹然倒下在斜坡上。雙腿已沒有知覺...很嚇人。後來終於可以走了, Shaw 的夜色真美。
回到王福元, 大家都在散 Band 了。但見大家都玩得頗開心, 得到的都是正面的 feedback, 很感動。有一點從前紅社的感覺回到身邊, 湧上心頭。

晚上的眾志, 本來是很美好的一餐, 只可惜生化系在旁邊春茗, 吵鬧得很煩人。回到恆生, 我洗了個澡。很久沒有這種感覺的洗澡, 多麼的 free, 多麼的舒服, 熱水很舒壓, 冷水很醒神。洗過澡後, 就完了。甚麼都完了, 要 mid-term 後才能再戰。但我已經很滿足了。

終於可以休息了。再不休息的話, 沒幾多年命可以再短的了。

17 Feb 2003

做 Banner, 可算是今日的焦點所在。
只有我, Fione, Claudia, Vincent 四個人。後來, Fione 因為要做MC 走了, Claudia 因為要趕火車所以走了, 只剩我們在挨下去。終於做完了, 已經兩時半了, 跟可愛的Banner 完成品拍了幾張照, 就行回恆生樓....由 Department 行回恆生樓....唔講得笑....形同行路入Shaw 一樣咁遠。
路上, 我一個人走在昏黃的街燈映照下的馬路上。我走在三線行車的馬路中心, 沒有一輛車, 也沒有一輛校巴, 也沒有一個行人。只有一棟又一棟的 buliding, 和一支又一支的街燈在我身後遠去。走在三線的車路上的正中央, 我一點也不害怕會有車撞過來。反而, 我覺得這一刻很舒服, 很值得玩味。只是夜已深, 恆生仍是遙遠, 不敢再怠慢下去。回來宿舍, 很想把這一刻立刻記下來, 遂不顧得自己已經非常睏, 還要上這裡, 記下來。

明天就是地資盃的中大定向比賽了。雖然很少, 很少人參加, 但我仍感到滿足, 只是, 若有更多人參加, 我會有更高的成就感。

16 Feb 2003

和我戀過的每一個她 和每一扎長滿刺的花
和每一吋戀愛的創疤 還有每次落淚像雨灑
害怕 怕又愛 愛後更害怕 最終孤單一個
為何定要花開不結果 誰人面對分開不痛楚

而每一次戀愛的痛楚 如要給我寶貴的一課
除過加過減過的結果 求到答案就是『別要拖』
聚過 過後散 散後再覓過 世間不只一個
抬頭面對分開不再躲 明白在世間最愛是我

* 聽聽呼吸聲 身心轉化 將一堆的她 放落熱茶
若是悶極了 對鏡說話 多麼的孤單 也不必怕

聽一聽心經 喝淡熱茶 閉上了眼睛 終於消化
放我半天假 若未太清醒 再放半天假

人覺差我不覺得太差 人要醒覺應要有點化
人太真看一看真太假 男女世界就像霧裡花
代價 有沒有 哪沒有代價 最多一些牽掛
流淚為了風中的碎沙 為何問我一個快樂嗎

放我半天假 若未太清醒 再放半天假

祝,
生活愉快
人生得意