今日本來諗住去九公游水, 都係算, 唔夠時間。拿拿聲番去公司幫阿媽做野算。
夜晚去阿 Wing 同 Sara Birthday Dinner gathering. 又遲到. 對唔住呀各位....>_<
去泰簡單度食, 無想像中咁好食。可能因為本身個天已經連日暴雨無停過, 我地仲要坐出面, 仲要成腳都濕晒, 仲要著住爬山鞋, 仲要shoes and socks都濕到「林」(第六聲) 晒...對腳係咁 up 住晒, 好辛苦, 好凍, 個身又濕....唉
個位又陰陰暗暗咁....個天又....唉
其實我諗個度d 野食真係 ok 的, 只可惜我無乜心情之餘, 又睇唔到自己食緊乜....所以....
我本來都好鐘意落大雨架
番到屋企見到所有窗台都滲水, 我間房尤其嚴重的時候, 就好想殺人
係 windowsill 位的 wallpaper, 可以甩出來的統統都甩晒出來。簡直係令人....ARRRRGGGHHH~~!!!!!!!!
停雨呀！你聽唔聽到呀！停呀~~~俾我d 窗台同 wall紙休息下啦唔該~~!!!!!!!
標籤：
Diary
乜都唔使理
你睇下個天氣就知 (1/07 註：係「暴雨」)
我出街想買定d 衫準備番工都唔得
到最後都只係買到一條西褲咁大把
仲要又係 G2000
就來正式番工, 都唔知點死
唉
唔想番工呀, 想放假呀
標籤：
Diary
唔明自己點解可以寫日記都咁無恆心
已經係 online 的日記來架喇
仲要無乜心機打
可能依家比起以前的日子過得快樂, 所以無咁多唔開心的野要周圍話俾人知。
對我來講的日記, 可能就只係用來記住一d 特別的事。無乜特別的, 可能都已經落選。
當然喇, 仲要睇下本少爺我係唔係有心情打字先得架。
一號風球珊瑚
大家以為會打到來, 點知都係同我一樣 - 「屎波」~~!
標籤：
Diary
七點鐘起身, 不得了, 我竟然起得到身喎。好野。雖知道我家陣每一日都係四點幾五點先訓然後一點幾兩點先起身架嘛。(呵呵呵...係咪好妒忌呢~~~呵呵呵~~~你地唔恨得咁多架喇~~~~)
之後就走落無乜人行的大街上面。我須要食個早餐, 但附近的餐廳都未開﹐吉之島都未開, 美食廣場都未﹐附近係無茶餐廳的。於是唯一的 choice 就係 M 記。 但係我估唔到 M 記真係得小貓三數隻。雖然話晒都只係得七點半﹐但係都唔使咁~~少人係嘛, 我記憶中的 M 記早上係好多人架喎。
搭過海巴到紅磡轉火車。天橋上面好~多~人~呀, 條橋好似就快塌咁。見到好多人係度派免費報紙﹐讀報的人有福了！既然睇落份份都差唔多﹐就會一份 am 730 睇下施永青有咩咁巴閉。Metro 唔使拿喇, 以前睇過好多次。頭條日報的外觀唔吸引, 更何況我使鬼睇咁多份來來去去差唔多的免費報紙咩？一份就夠。幾好睇喎 am 730。
「靜音車廂」？咩來架？我畢業前都好似未有的？真係好靜架？
(試搭三十分鐘之後) 挑！把鬼！完全唔覺得有寧捨靜過！
大埔落車, 走上 20C 綠 van, 走往大尾篤去。
其實今日係要去學一星的獨木舟﹐即係最最最初級的。一到場的時候就驚會遲到。到左喇, 又輪到「陌生環境下緊張症」發作。
死喇, 我唔記得帶 cap, 會唔會好曬呢？但係今日落雨喎。
死喇, 我唔係著 swim suit 添。會唔會曬到對手臂甩皮？好痛架喎
死喇, 我唔記得帶橡筋添, 一陣副眼鏡掉左落水咪搵唔番。
死喇, 頭先係大埔唔記得買麵包添。一陣 lunch 咪無野食？
死喇, 我唔記得帶for 落水的毛巾添？
死喇, 出面橫風橫雨, 起晒白頭浪咁, 會唔會俾d 流帶到出公海架？
呢樣死喇....個樣死喇....
到最後, 其實無乜問題。除左個教練好騎呢﹐又唔係教到d 乜野俾我之外, 其實 so far so good。尤其係臨走的時候突如其來了一場傾盤大雨﹐感覺好爽之餘﹐睇見成個海面都好似一塊好厚的﹐深綠色的布咁﹐下面有好多人係度慢慢咁郁佢。而雨打落海面的時候, 因為好大雨 and 好大粒雨, 所以打起好多 splash, 白茫茫一片﹐真係令人難忘。
番到屋企, 累到貼地。
而中午因為出過好一段時間的太陽﹐所以終於都係曬親。頭面頸手都宣佈失守﹐曬到紅 bok bok, 第二朝仲痛添！哎喲~~
Anyway, 係幾好玩的活動。如果可以一班朋友包起一個班的話, 就肯定會俾自己一丁友去學好玩到好多好多倍。
標籤：
Diary
尋晚因為俾嚇人的網頁嚇親, 呆左成晚都唔敢訓...無錯, 我就係咁細膽, 都唔知點解會咁樣...我講俾其他人聽佢地又唔信, 都唔知點解...痴線...
於是我就好慘又好眼訓咁坐係度等天光左先敢訓
可能你會覺得 on 居
但係我真係一合上眼就會見到得人驚的野
所以....完全唔敢關燈 / 合上眼。
於是今日順理成章咁訓到兩點先起身。一起身, 眼屎都未抺就睇報紙。係近來的習慣, 唔知點解。無乜野好睇, 無乜野追緊, 亦無乜野特別。可能係一個字：「八」。
之後就要執野走人。星期一係阿媽公司最 Q 忙的一日, 一定要四點左右番到去, 最遲喇當然, 所以嘛, 今個下午都係游唔成水的了。
執執下野, 又係因為八卦睇下舞台界猛人羅冠蘭的「香港直播」。佢好多野講, 而且有條不紊, 幾勁。呀, 係咪做得舞台的人都係會比較健談 (註：唔係「識講野」。「識講野」呢個 term 係香港通常都係有少少負面意思, 通常都似有或無咁暗示該人係講野轉彎抹角避重就輕)。因為我上次睇呀高志森又係咁, 嘩個肥佬一輪咀咁講, 把口唔停咁講, 但係講野又唔係無料 / 悶架喎, 所以我先咁諗。
又遲左出門口。
番到公司, 阿媽不在。咁就自己拿野來做啦當然, 發覺都無乜野交低, 可能星期一真係太多會要開太多其他野要做, 連 clerical work 都無時間寫低俾我。我慢條斯理咁做左幾樣之後, 想走的時候, 佢就番來。成個節奏即時急速左好多倍, 佢 bang bang 聲咁俾野我做, 我又 boom boom 聲咁跑來跑去仆倒咁做, 唔使十五分鐘, 就做多左好多野 (証明老世唔係度伙記唔做野係千古不變的定律)。但唔知做乜, 佢就係出現左個十五分鐘, 之後我一擰轉頭, 佢就走左。神龍。
六點幾, 做得果兩個零三個鐘野就想走。呢排真係越做越頹。
去打機, 又係果幾味。自己都打到厭。
去食野, 又係果幾味街邊野食, 有少少食到厭。
去游水, 又係九龍公園, 都還好, 夠大, 九蚊好似好抵咁。不過唔明點解夜場都咁~~~多人。下午個太陽咁靚就話者。Dinner time 都咁多人, 為乜呢？
即係咁, 你游都無所謂, 唔好霸住條快線嘛。你地霸都無所謂, 唔好咁多人呀, 一條線塞咁多人, 玩韻律泳咩。你地塞我都忍, 可唔可以唔好自把自為呢？人地話到明係左上右落, 乜得你班阿姐咁 Q 煩係到要右上左落。我知我識得一路游一路扭波咁扭開你地向前游, 都唔使咁考我d 腰力架。仲有, 我唔係話自己識游水就睇低其他人, 但係既然九公都出 post 叫大家「學會游泳, 並了解自己的泳術」, 乜解救你地唔去「了解」下的呢？雖知道「快線」的「快」字唔係真係高速公路咁的快的意思, 但起碼唔好釀成阻塞先啦。唔止我架, 我見其他的善泳者都好無奈。唉。
游下水, 浸下水, 游下, 浸下咁, 到左九點, 好多人都散去, 租用的 lanes 都放番兩條出來, 當堂鬆動晒！！開心, 從來未見過九公咁少人的！立即去馬！......但係已經有心無力。咁少人係打 turn 的好時機...都無心機。
趁少人玩番個背泳先。嘩, 原來又幾好玩架喎！不過好累....游左廿五已經投降, 轉番身來個「阿伯蛙」過埋對面算。之後餘興未盡, 來一個背 start....簡直就係將一大片豬肉狠狠咁 Daat 落水 - 不知 daat 到個背脊幾痛~~~無計, 無學過, 無師扮自通, 當然係啞子吃黃蓮。
真係無乜人喎, 來挑戰極限 - 蝶式！！
即係咁...蝶呢, 就係要隻手向前撲, 然後撥水, 再出水向前撲。咁係完全不自量力的阿溥做出來的時候, 就係好猛力咁 (佢以為) 係水底划一野, 再飛出水面向前力撲。Idealistically should be like that.
現實版係：有條傻仔撥完水後背部肌肉唔夠力, 又無學過蝶式, 對手又無力, 條腰又唔識配合, 於是對手上唔番來, 情況 embarrasing (唔記得中文點寫), 唯有臨時臨急踢下對腳....一時間, 水中出現了一隻外星怪物進行某種極似叫救命的神秘儀式, 嚇得池中人人雞飛狗走。
夠瘀未？
Anyway, 我鐘意泳池無乜人。沖涼都唔使排隊。
之後同毛毛兩個人食左一間上樓印度餐廳。膽粗粗試下, 一入門口, 見到勁多印度定尼泊爾定泰國定唔知邊個國家的人, 但係膚色唔深的, 係度開 birthday party. 當然係唱緊 Happy Birthday. 全間餐廳都無佢地以外的國籍的人。我登時想打退堂 drum. 不過阿 waitress 姐姐好 nice 咁帶左我地去一個 window 位, 望街景, 幾得意。然後睇下佢地又老又中又小朋友咁玩得好開心, 亦無咩騎呢感覺了。諗都費事, 一於就 set dinner, 反正都唔知食乜野。
先來印度薄脆。幾好。個 sauce 太辣, not for me.
之後鐵板 (熱的, 滋滋聲的) 香料雞。似咖哩 (定沙嗲？唔記得)。香料多, 幾好食, 但太辣, (又)唔岩我。不過平心而論係香的, 幾好吃的, 只係我個人食唔到辣。
之後 Garlic 炒椰菜。全晚最似中國菜的一道。我不嬲都係Garlic 的 fans, 而佢又似中國菜, 所以食得最多。
咖哩雞, 唔辣的。但就係因為唔辣, 所以應該香料落得唔多, 所以唔香。而且好~~溜(第六聲), 食多幾啖都填滿個胃。所以少食。
白飯同 Nan Bread. 無乜特別, 可以用來送咖喱。
Mango Lassi. 我飲的, 印度特色飲品。似奶昔, 口感 creamy, 幾好。飲到完餐時都無話變味變酸。
甜品係 surprise: 叫做 Gulan Julab...好似係咁卦, 係炸奶粉球喎。熱的, 幾好食。 Golf 咁大粒, 但一人一粒已經係太多。太溜。
140 蚊兩人, 仲不停有現場的小朋友過來撩我地玩, 仲有不停的印度勁歌播放, 仲有現場真人一家大小係餐廳中間興起就跳印度歌舞, 值回票價。
呀係！
之前因為~~~終於~~~試左久仰大名的「澳洲牛奶公司」的炒蛋多士同埋凍奶茶, 所以胃口減少。炒蛋果然係好味, 多士果然係大塊, 凍奶茶果然係好好好好好好好好好飲。
不過, 因為睇過太多次其他人讚到天上有地下無的嘉許, 所以 expectation 太高, 所以第一下食落其實覺得無乜特別。不過 overall speaking 係 GOOOOOOD 的。
p.s. 打下打下, 講下又多d 講下又多d 咁, 篇日記又攪到咁鬼長的....又會....點解我一係唔打日記一打就咁多..... O____o
標籤：
Diary
開心
今日一早就起左身 (11am , 真係好早)
就係為左同大同唱 K。呢班大同就唔話得囉, 計埋我一共四個人, 大家都係屬於 FYP 周貴虎口倖存劫後餘生大難不死組的我, 阿 Wing, Vincent, 同埋一d 倖存成份都無的阿基。
我地一班可憐的醜小鴨, 終日俾果隻又肥又醜, 明明係海象係度扮鴨(男人老狗扮鴨)的周貴娘(讀第一聲陰平聲, 中大語精教的, 呵~), 口頭上工作上態度上眼神上E-mail 上電話上不停地咁折磨, 將我地四隻醜小鴨的自尊同人性都踩都谷底的井底個底咁低。我地幾個可憐的醜小鴨, 日間被周魔鞭打過後, 夜裡只能夠偷偷地躲在一角, 連講佢的壞話都唔敢, 就好似 Harry Potter 裡面的 Voldemort 或者係 Lord of the Rnigs 裡面的 Dark Lord Sauron 一樣 - "You Know Who".
幾許風雨, 呢幾隻醜小鴨終於歷盡多時的辛酸, 苦劫, 磨難, 終於能夠逃出周貴娘(都話陰平聲咯)的魔掌, 變成三隻又白又漂亮又自信又有智慧又有美貌又有才華又高貴又有性格又有抱負又有未來的天鵝喇~~~
而剩番個隻, 因為夏天的太陽好吸引, 而佢本身太懶唔做運動的關係, 變左一隻好~~肥美的燒鵝。
你話死唔死。
Anyway, 大家都係共過患難的朋友, 係危急的時候大家都幫過大家手, 你幫我我幫你都數唔清, 所以今次甩難之後大家都好 friend 咁一齊去唱番次 K 開心下。
是日去左尖東的 Neway CEO, 好~~~大間房, 痴線架, 四個人間房大到好似十人大房咁, 十個 Vincent 手拖手先圍得晒呀。
之後夜晚同 Carmen Rose Zia Claudia Asa 一行六人去左太古城食野。全程都有旁述員詩雅提醒各位太古城對佢呢位住係大埔的千金來講係有幾咁山卡啦咁遠, 佢搭車來用左幾多光陰同幾多銀兩...謹此致謝。
到最後, 因為 peak hour 的關係, 所有係人食的餐廳都已經爆滿晒人, 我地唯有挨下貴, 去冰場左近的 EAT 食美國餐。幾好食喎。不過貴左些少。
是日陳溥溥很開心。
標籤：
Diary
各位~~~~~~~
我已經「的」起心肝﹐趁我仲放緊假的時候﹐係我仲有好多青春可以浪費的時候﹐我就的起個心肝將我偉大的台灣遊記用電腦打番出來！！！
係咪好偉大呢！
但係呢...因為我個陣寫遊記, 通常都係坐車或者係百忙之中用筆求其「了」幾個字落去記低重點﹐好多事都用英文來記低會快好多﹐於是呢﹐就有好多資料零碎 / 含糊其辭﹐仲有﹐就係好可能會斷斷續續﹐要我打的時候用自己的 memory 配合番先得。所以, 大家要忍讓忍讓。
好！
因為台灣的 Trip 係係 2004 年 12 月 24 日作為第一日的, 咁所以呢, 我會特登將所有的台灣遊記 *特登 * 放番係 2004 年 12 月 24 日。
如果大家有興趣睇番小弟的台灣遊記, 請移玉步至 2004 年 12 月 24 日作開始。
多謝各位捧場！！！
(1/ 2007 註：算吧啦你....)
標籤：
Diary
嘩
乜原來我咁耐無打過日記架喇
咁又好似係, 睇番上個日記竟然係差唔多兩個禮拜前, 我自己都唔係好相信
仲覺得好似係不久之前發生的咁
今日最大件事咪就係去馬士基度 Second Interview 囉。準備得唔夠好就當然架喇, 仲要係幾乎遲到﹐要飛的去都只係剛剛好趕得切, 好險。(仲好貴！)
老實講我覺得份工唔係話好好但係我好想得到
一來大公司
二來 direclty under 鬼佬老世
三來係銅鑼灣番工 (同長洲係天淵之別)
不過都有問題
一來我唔係有耐性的人
二來我唔係一個好 organized 的人
三來我唔係一個對 details 好敏感的人
四來我唔係一個愛整理 (tidy) 野的人
咁.....就係咁
唔理
要左先
佢真係請左我先算
到時睇下係邊一家誤上賊船~~~~
hahhaha
(1/2007 註：我依家坐正係呢個 office, 可以大大聲咁話番俾一年幾前的你聽：「係你自己誤上賊船囉﹐懵炳！」)
標籤：
Diary
尋日去左搵 Vincent 同 基基 同 Carmen 玩
佢地做野我就踩單車, 之後游水水
好開心
但係想聽一d 夏日d 的歌
唔知邊度會有呢？
今年有咩比較夏日 feel 的歌呢？
唔該唔好講 Twins 的乜鬼野森巴皇后, 我諗起都 "......."
標籤：
Diary
可以話完全好番晒囉
本來個傷口仲係食親凍野, 飲親凍野就痛到飛起, 衣家可能因為d 牙肉生番厚左, 可以抵得住d 凍野的刺激, 所以都係微微痛。係可望的將來都應該會好番好多
都怪自己唔做義工
唔做暑期工
唔多進修增值自己
唔做多d 野
唔見到d 世面
好喇, 衣家要搵工, 填親份份工的 form 都係交白卷
明眼人一睇就知呢個係頹廢學生
連工作經驗都夠膽死 ZERO 的
你可以話我有型格
可以話我有膽色
更絕對可以話我有排受
哈...哈哈
標籤：
Diary
情況依然係無乜改善
唔食止痛藥的話就會痛得好 agitating
所以都係每幾個鐘頭就食一塊止痛餅落去吊命
好多謝 Yolan 的好心建議
佢話只要用溫水開 salt 含係口就會好好多
果然係有用
希望快d 好
全日都係屋企都做隱蔽青年
打機食粥電視打機
好悶第三日
都係咁樣痛落去
決定唔可以太過頹廢
本來已經好頹廢, 養病呢個藉口就更架令我覺得自己好頹廢坐食山崩
所以我衰衰地都幫阿媽打左少少野
但係由於係好簡單的關係, 我好快就攪掂晒
於是又無野做坐係度痛
於是我就聽 Rose 介紹上左 Jobs DB 個度搵工
攪左一大輪的手續之後, 都係攪唔到份 resume complete
於是都係唔可以立即就可以 apply jobs
攪左咁耐, 都係睇左好多好多的工, 但係就好多好多都唔岩心水, 激死人
夜晚, 我決定出一出街散散心
屈左係屋企咁多日真係一d 都唔好受
我見自己個咀好番少少就立即出街
點知....盡興一輪之後番到來屋企個傷口就痛到不得了
我明明已經無乜講野架喇
點解仲會咁樣架
好痛呀大佬﹐明明我不久之前先食過止痛藥....莫非止痛藥的藥力越來越短？呀....
好痛呀.....
標籤：
Diary
情況依然係無乜改善
唔食止痛藥的話就會痛得好 agitating
所以都係每幾個鐘頭就食一塊止痛餅落去吊命
好多謝 Yolan 的好心建議
佢話只要用溫水開 salt 含係口就會好好多
果然係有用
希望快d 好
全日都係屋企都做隱蔽青年
打機食粥電視打機
好悶
標籤：
Diary
話說﹐我有隻智慧齒係打橫生的。又話說﹐醫生話要我剝左個隻智慧齒﹐但係因為牙齒係會不停咁生的﹐所以剝左一隻就一定要剝埋上面個一隻﹐如果唔係就會越生越長好似老鼠咁。於是我就要排期剝牙。又話說﹐我的牙因為大部份都係牙肉入面﹐所以要割開d 牙肉先可以拿到隻牙出來﹐所以要做一個小手術。咁醫生問我你怕唔怕, 我話怕到震, 佢就提議如果係咁就不如做一個局部麻醉﹐咁就可以一覺訓醒隻牙已經剝左。好, 信你。
話咁快就到左要剝牙個一日喇。之前的星期日晚, 即係尋晚﹐我已經特登走去食一餐好的。到底有幾好呢？其實都幾豪下。我先去連城廣場的 Domon 食一個便當﹐普普通通咁喇。然後呢﹐就果然係貴夾唔飽﹐於是好心的阿正就陪我去和民再食過。今次就 happy 喇﹐食左好多野, 有兩樣野係一定一定要 recommend 俾大家的, 仲要係 highly recommend.
第一樣就係牛油焗帶子。對於一個鐘意焗, 蒜蓉, 牛油, 帶子, 香味, 同埋油的人來講﹐呢一味簡直係 GOOOOOOD. 我係無乜期望的情況之下將呢舊帶子放左入口之後﹐佢竟然將我的味蕾一下子間帶到了上天堂！嘩~~~~
第二樣係朱古力軟心蛋糕。熱的古古力蛋糕﹐有凍的Vanilla ice-cream 陪襯；硬的古古力蛋糕表面﹐有軟的古古力漿係入要陪襯；一啖凍的白色雪糕﹐一啖熱的古古力漿﹐一啖軟綿綿的 cream, 一啖硬硬地的古古力蛋糕……啊……
仲有﹐唔係所有寫左「人氣」的食物都咁好食﹐「廣島燒餅」就係一個好例子。兩個字：「徙錢」
正所謂一念天堂﹐一念地獄。好開心咁食完我最後的晚餐之後﹐我就番屋企接受現實﹐等待被屠宰。
今朝一早我就起左身去醫院﹐心情平靜。然後我走左入去病房﹐要換衫。係一片好迷惘的情況之下我就走左去換衫。然後出番來係度呆坐﹐一路我都淨係識得左望望右望望咁。又唔敢做其他野, 又唔知要做乜野, 又唔知要等幾耐, 又唔知個過程會點﹐又唔知幾時先到我﹐又唔知可以做得d 乜……
係一片迷惘之中﹐醫生來了。原來呢間房咁多個麻甩佬都係來做割牙的。都好, 有人陪下我, 雖然咁多人都係做同一樣的手術令我感覺到呢度有d 似屠場……+___+
醫生解釋完個手術我聽之後我就簽左一份生死約﹐之後我就真係覺得好無聊但係又有少少緊張﹐於是就走左去訓覺。話晒我都訓得咁少﹐當然係一倒頭便睡著。
一個小時後﹐睡得正好﹐有個醫生突然係我床尾出現。
「可以入手術室架喇。」
「轟隆~~~!」背後突然響起一聲巨大的雷響。唔係呀嘛！真係到我喇！我未訓醒呀, 未有心理準備好呀, 喂, 唔好推我入去呀, 喂, 喂~~~
就係咁, 我坐左係架輪椅上面俾推到手術室裡面。呢度真係好凍好凍﹐我已經好驚, 仲要咁凍﹐又驚又凍有乜好做？梗係打冷震啦﹐狂震個隻。
護士repeat 左幾次我個名同埋我要做的手術俾我聽, 我心諗﹐到底佢地係為謹慎起見, 定係以前 careless 得滯推錯病人入錯手術室劏錯人…? 嘩~~~唔好諗唔好諗…
之後最最得人驚的時來了。打一隻用來輸入麻醉劑的管入去血管入面﹐我以前睇過本書好好笑的﹐叫做「我是實習醫生」﹐佢好似講過話呢種叫做「點滴」(Drip)。 我諗都係。以前我英國來香港的表哥水土不服入左醫院﹐我都見到佢左手手背插左一隻管狀物體。我同佢走的時候親眼兼近距離睇見醫生幫佢拿番出來的時候的情況。支管係皮膚下面點樣好似一條大蟲咁滑過﹐血管點樣立刻變形﹐我表哥的表情係何其地痛苦……所有所有, 我都歷歷在目。此刻竟然突然間到我！叫我怎能不驚。
我依然記得好清楚﹐佢地要拿左我隻左手﹐然後抹酒精﹐然後超出力咁「連」實我手臂…跟住就feel 到手背有一度劇痛。我簡直係依家都仲可以想像番出有幾痛。手背已經好少肉﹐又多血管﹐仲要打橫咁插支針落去﹐傻架？！
我已經好痛﹐個人又好驚, 我本身又好怕痛, 個地方又凍, 個環境又得人驚, 仲要佢地攪極都未攪完﹐插左支針入去我手背之後仲要chok 來 chok 去, 天呀﹐我真係成個人都拉到衡晒, 差d 就精神崩潰。
誰知惡夢未了。佢地話我的手背的血管有太多 valves, 所以頂住晒, 要再來過。我聽見呢個消息之後已經想死﹐點做醫生架你地！？好彩跟住佢話要係手臂插唔係手背。喂, 手臂同手背喎﹐根本不可同日而喻。到佢地又好大力咁楂我手臂谷完血之後, 我已經好似手臂撞親咁痛 – 打左入去了。
你睇！差幾遠！一早就應該打入手臂啦！攪乜鬼野手背者！無聊！痛到我死！手臂肥騰騰咁多肥膏 byebye肉你唔打, 係要打落去d奀挑鬼命的手背！痴線架！我都忍唔住出口怨佢地「唉早知手臂無咁痛你地就應該一早打手臂啦﹐攪到我咁鬼痛！」
好快﹐就推左入手術室正室。我話我真係好凍好凍﹐佢就俾左一塊好似新鮮焗完的被俾我蓋左…好暖好暖…
…終於都暖番晒…好暖好暖…我望住天花皮上面的手術燈…一盞, 兩盞, 三盞…
……
……好暖……
之後, 我只係記得閃過一個 moment, 係有幾個醫生的頭, 個個都望住我, 應該係做緊手術的時候吧。然後又睡著了。
……..
晒番的時候, 我已經係番病床上面﹐頭先的一切都好似係發左場夢咁。
當然﹐之後的先係惡夢。係訓下又醒下的情況之下, 我終於都決定起身走人。唔想留係度。想番屋企。想食野﹐想飲水。我已經十幾個鐘頭無食過野無飲過水。好辛苦。好想好好咁食番一d 可以飽肚的野……雖然我知我個口咁痛根本就無可能。但係我對打機同雀友打麻雀一樣, 認為係能醫百病的﹐所以我都一心希望我可以番到屋企之後開開心心咁打機忘記口裡面仲不停咁流緊血的傷口有幾痛。
係等緊拿藥的時候我個口都仲流緊血﹐不停個隻﹐仲要混合埋口水一齊, 痛到飛起。時間一分一秒咁過去﹐麻醉藥的效力亦都係度一點一滴咁消失﹐我開始覺得越來越痛﹐尤其係到後來番到屋企的時候﹐簡直係痛不欲生。
我想飲水都唔係好飲到﹐飲水的時候個傷口就特別痛﹐莫講話食野﹐但係因為實在係太肚餓﹐當時我肚餓到連飯咁大粒咁硬都想就咁唔理三七廿一吞落去…到最後我阿媽拿拿聲幫我叮一個叮叮粥﹐我淨係食d 粥食唔到d料。但係已經係好好味﹐佢本身已經係好好味﹐係我餓左十幾個鐘頭之後就更加覺得好好味。
到後來真係好痛好痛, 我又無食野咁耐﹐但身體都無食物去燃燒﹐個人開始變得好凍。大熱天時我都可以著衫…平時我係屋企唔著衫都出晒汗架。我著左衫都覺得寒, 係寒, 從心而發的寒。當時我實在係痛得好緊要, 我只能夠躺在床上悲傷地等止痛藥的藥力發作…一面不停地後悔 「why me?」點解個天要我隻牙好生唔生打橫生？
最痛無過於今次。上次係湯石打波拗柴都係好痛, 但係痛得可以忍受得到。今次﹐真係痛得不得了, 而且是不停地痛, 沒有一刻是不痛的, 亦真真正正地痛得我淚水都忍不住了。每一刻我都感覺到口裡面好像是被人用鋸刀慢慢地剖開﹐牙痛得連頭都痛了, 好像是孫悟空的金鋼圈一樣緊緊地掐住。
在劇痛和流血中睡著。我醒來的時候已是天黑﹐家人都吃過晚飯了。最疼愛我的媽媽就因為陪伴了我一整天沒有時間工作, 晚飯都沒有吃就外出去工作。苦了她。
晚上﹐我吃過一些不太稀的粥。吃過百福的燉奶。感覺好了一點點。
但願自己早日康復。唔好有***任何的***手尾。
標籤：
Diary
我真係好 lost
好迷惘
唔知自己可以點
原來太多 choices 都係一個問題
太多條路放係自己面前
反而等於 no choice
我真係唔想再走錯路, 行錯步
我已經入左文科, 行錯第一步
我已經入左 GRM , 行錯第二步
我相信自己有才能
但係唔知邊方面
我相信自己有才能
但唔想再行錯第三步而被自己的錯誤而埋没
我唔想
我唔要
標籤：
Diary
超開心
用左四個字左右的時間去 present
比起阿基的一小時三十分鐘
阿 Vincent 的一小時十五分鐘
同阿 Wing 的一小時
我實在係賺左
原因：老世趕住走
實在要多謝阿 Wing, Vincent and KK
多謝你地呀！！
無你地 pre 得咁精彩咁長, 我一定挨唔過今日架！
你地係我最好最好的 groupmates!!! Love ya all~
標籤：
Diary
聽聽下 Onda Cero
竟然聽到有廣東話, 好神奇
細聽之下, 原來係講緊香港的人口問題
佢地話好諷刺, 中國就太多人, 香港就叫人生多d
但其實都係個惡性循環...出生多左的小朋友遲早都會變成老人家, 難道就要再多d 小朋友來 support 佢地...?
well, 竟然係由一個西班牙的電台來報導。
標籤：
Diary
好野 FYP Deadline 延期
開心
不過newsgroup 好多 debates
我覺得無必要囉, 無謂
做好, 咪交囉, 做唔好, 咪改囉, 時間 allocate 得唔好唔忿氣, 咪嘈囉, 任你嘈
如果我就來做完先知改, 我都會唔忿氣, 但一定唔會蠢到係咁係度投訴, 因為時間賺左係我的. 之前係可能 sacrifice 左好多野, 但唔改都改左 deadline, 唯有利用時間再執靚份野先交。再係度怨這怨那, 時間過左去不回頭, 連「既然多左時間就再執靚佢先交」的機會都無岩, 就真係 waste air.
阿瑪話過
人人都做緊的錯事依然係錯事, 唔會變成正確的事
但人人都唔做的正確事, 就算無人做緊佢依然係一件正確的事
無錯, 佢講得好岩, 我同意
不過唔係今次
標籤：
Diary
