心有雜念

---做人不能太 CNN---

CNN Cafferty 事件﹐其實係對中國人的一個考驗。我個人覺得﹐好多中國人睇見自己傳聖火的時候俾人咁樣「蝦」法﹐個心一早有條杉頂住唔開心。通常咁樣就會堆積左「火藥」於心中。今次 Cafferty 係呢個時候講d 咁侮辱性的說話﹐實在係不智﹐明顯地錯在佢。但中國(人)就好似等左呢個機會等左好耐咁﹐終可以有個 topic 可以借題發揮﹐調兵遺將高調反擊﹐似乎已經到左一個過火的地步。

又難怪﹐佢地從來都係「一呼百應」的。觀乎文化大革命是甚麼一回事﹐就可以想像中國人是一群如何不冷靜思考又容易煽動的一個民族。

我咁講唔代表我覺得 Cafferty 係對的。佢咁講野﹐老實講我都係中國人﹐我都無做到佢口中所講的中國人咁衰。但佢一竹篙打沉一船人的說法﹐太民族仇視之餘﹐亦太唔符合佢新聞工作者的身份。若然佢係一個市井之徒係度亂叫﹐相信大部份香港人應該都唔會理佢﹐又得佢繼續自己痴線 (但大陸人應該會激動一百倍)。

但佢講錯野﹐佢衰﹐我地又係唔係要陪埋佢一齊癲呢？佢喪家犬式的亂吠﹐我地覺得佢侮辱左我地喇﹐我地又係唔係要激情澎湃地煽動十幾億人民來一齊大叫﹐來所謂「抗衡」佢呢？

如果件事去到一個人對一個人的層面上﹐即係﹐有人出言侮辱﹐又講粗口又阿爸阿媽﹐你又會唔會咁做？你會唔會選擇同佢一樣亂吠？你覺唔覺得咁樣同佢一般見識係「做 cheap 左自己」？

若然你每次俾人話﹐都花盡吃奶的力去反擊﹐去維護自己。呢個世界咁多人﹐咁多張嘴﹐你可以反駁得幾多？嘴巴長在別人身上﹐佢地要講乜你可以控制得幾多？佢地要侮辱你的﹐你又可以嬲得幾多個？日日都攪行動去「抗爭」﹐不如冷靜想想﹐如何善用資源﹐善用時間﹐改變自己﹐叫人無從批評﹐以行動來攻破一切指証。講得白 D, 有咁多人動員能力去聯合人民﹐激起佢地的愛國之心﹐抵制法國美國﹐倒不如咀嚼一下別人的指責﹐將如此龐大的力量﹐用於工業改革﹐品質檢定﹐人權改善﹐文化質素提升之上﹐豈不是更積極﹐更有用的方法？浪費時間於漫無目的的謾罵﹐倒不如捲起衣袖﹐做好份內事。

俾人鬧兩句﹐就要全國一齊呢樣行動﹐個樣號召﹐呢樣怒罵﹐個樣抵制…

…成熟d 啦唔該。2008 年啦﹐學人攪奧運喇﹐全世界都睇住啦﹐要大個仔要生性架啦﹐要有冷靜的頭腦﹐要有定力架喇﹐唔好再咁唔成熟啦好嘛？

---世貿機舖搬屋啦！---

不嬲佢都係五樓﹐但新聞話佢會引入「戰場之絆」﹐所以會搬﹐不過我記得佢係搬上十一樓﹐但網上的人就話係六樓。一陣放 lunch 等我去睇下邊度至係真。

V 太案…咁都唔算強姦？唔係呀化

另外﹐願墮樓的建築師和他的好友都能安息。

手機記載生活系列 (2)

05/09/07 索子已經六個月了﹐進入少年期。還真的像個小妮子一樣﹐活活潑潑的﹐不過就是太過怕陌生人。


近年能在旺角找到能吃入口的東西(註：未必代表好味)比以前多了。起碼越開越多的香港仔魚蛋就是其中一門。

MegaBox 開幕﹐大鑼大鼓。山長水遠專程去走一趟﹐發覺除了很新很光鮮之外﹐沒有甚麼吸引之處。到 Food Court 找食的﹐只能到看起來比較「不化算」的 Te 吃意粉。我的估計正確：的確不化算﹐亦不飽。

日本吉列專門店﹐初見乃價錢「天比高」。但其炸物的確美味非常。但既為炸物﹐價錢又為天價﹐只能「多多益善」﹐望門輕嘆。

蘭桂坊始終都不是我的地方。

我寧可躲進山腳的 Starfucks﹐居高臨下地望著那些沒有錢去「蒲」卻想參與「在蘭桂坊飲酒作樂」的人﹐密密麻麻地擠滿了那一間「七仔」。

Alfredo @ SOHO Elgin Street. Reasonable and acceptable enough for their food quality and price in a luxury place like that.

好奇心驅使我壯起膽子來走進全港最富豪級的 Landmark. 竟然驚見 Giordano. 到底是對 Landmark 的幻想太過多﹐還是我對 Giordano 的成見太過深？

呆滯間走到 ThreeSixty 買了一個加菲貓最愛的 Lasagna. 標榜用料有機的肉醬千層麵﹐六十多元一塊﹐每一口都是有機的材料。最「有機」的應該是痴肥和膽固醇過高。

Kubrick Café 的三文魚沙律。油麻地真是越來越得我歡心。

攔路狗可能很兇﹐但攔路貓多數都是很懶。像這一隻維園的攔路貓﹐經常都喜歡在同一個位置在﹐在熙來攘往的人群之中﹐懶洋洋的趴在地上﹐眼睛左望右望﹐不停向途人施放「電功」﹐期望有傻人 – 例如我 – 會被牠的電功留住﹐蹲下來替牠搔搔耳背﹐刷刷毛。可能是因為牠已經做了絕育手術的關係吧﹐所以比較不怕陌生人。當其他在維園流浪的野貓都很怕陌生人的時候﹐這一隻貓卻像流鶯一樣﹐很「濫交」。

多謝深水埗地膽嘉威哥的介紹﹐讓我認識譚仔麻辣米線。除了他們的麻辣米線﹐他們的蒜泥白肉亦是一絕。當其他餐廳都用「廣東式」的少油少蒜式的「微蒜白肉」的時候﹐他們卻用傳統上海式的「激多蒜蓉紅油浸滿白肉都沉晒底」式的蒜泥白肉。

咁唔健康的食物﹐當然就係「賣飛佛」。

依然是 Kubrick. 今次試一試蛋糕﹐沒有期望﹐沒有驚喜﹐沒有印象。

麻布茶房的名字聽聞己久﹐但從來未曾真的嘗過。今日一試﹐發覺它很像心目中的日本餐室：

穿 Lolita 裝的女侍
乾淨的餐室
精緻得很的食物
賣相非常漂亮
味道非常普通
份量非常小

用餐完畢﹐感覺像造了一場夢﹐一點都不覺得飽肚之餘﹐還有點「欲求不滿」的感覺。帳單來的時候﹐才發現我還在現實世界中。

手機記載生活系列 (1)

旺角。這個位置﹐之前開過了很多間小食店﹐一直都做不下去。這個位置其實距離人流最旺的女人街不遠﹐而且對面就是好景。做小食店這種要求「旺丁不旺財」的業務﹐明明應該會很「好景」的。但不知為何從來都開了一些不受歡迎的小食店。

肥媽開店後﹐生意極好。我不太好鹵水內臟﹐但鹵水紅腸又未得其神韻﹐雖然只吃紅腸﹐但亦覺甚為美味。鹵水味道清香﹐不過鹹。

幾星期後﹐電視台有人推介此店﹐遂廣為人熟悉﹐就開始出現長長的人龍。看見了﹐不禁輕嘆。

因為要見工的關係﹐到尖沙咀的歷史博物館走一趟。相比起其他國家的博物館﹐香港的歷史博物館其實毫不遜色﹐甚至有過之而無不及。假日想不到好去處的﹐又或者不想再龜縮在家只懂打機的 (這情景好像見過…)﹐尖沙咀的歷史博物館是一個不錯的選擇。

西灣河太安樓東端﹐近二記餐廳﹐有一間生果店。店外有一隻懷了小貓的貓媽媽﹐快要分娩﹐胖得動也動不了﹐很可愛。

Delifrance 做推廣﹐一道煎魚一道炸蝦為主打。吃過之後﹐覺得不外如是。未夠飽﹐再跟友人叫一道「雪糕 + 心太軟」。竟然其味極佳﹐令人讚歎不已﹐至今仍回味無窮。

到超市「入貨」﹐貪便宜買了本地雞蛋﹐才發覺原來比家中原有的美國大雞蛋體形小很多。我還一時貪便宜﹐見它價錢便宜但雞蛋數目多了﹐不為意原來是小雞蛋。雪櫃的蛋格怎樣也安放不了那麼多雞蛋﹐還能怎樣？

雖然很麻煩﹐但還是燒紅了鑊﹐下了油﹐打了蛋漿﹐炒起蛋來。那邊廂取出小焗爐﹐放進家中僅有的牛油排包﹐慢慢的烘烤起來。

炒到一半﹐下一點牛油﹐頓時將一隻隻平凡的雞蛋變成炒蛋多士。雖然﹐跟天下無雙的「澳洲牛奶公司炒蛋多士」﹐仍相距極遠﹐但已吃得我滋味無窮。

油麻地廟街的美都餐室﹐裝潢非常懷舊﹐而且是真正年代久遠﹐而不是簇新扮懷舊。一直對裡面的飲食極感好奇﹐因為如此老字號的一間餐室﹐能屹立不倒﹐又能不換上時髦的裝潢﹐必定有其獨一無二的賣點。

照片中是美都的招牌菜焗排骨飯。的確甚特別﹐但除此之外﹐食物質素不見特色。

百思不解。

公司從來都不喜歡安排吃晚飯﹐因此從來都沒有 Annual Dinner, 只有 Annual Lunch。而剛巧兩位丹麥老闆都很喜歡日本菜﹐於是公司的傳統就是每一年的農曆年假後﹐找一天來全公司一起 Annual Lunch, 而基本上都一定會是日本菜。

我愛死這個傳統了。

今年我又有幸出現﹐能吃到這一餐盛宴。選址東角中心的「和三味」。大家每人都選擇了八百多元一位的和牛套餐﹐或接近二千元的二人套餐一起分享。另外還有鐵板燒(表演)﹐無限量的啤酒﹐和無限量的日本清酒 Sake。當中﹐以 Sake 最好喝﹐連我這個不太好酒的人﹐也覺得真的很好喝。原來真正的好酒﹐可以是如此易入喉﹐如此芳香﹐如此教人甘心為它醉。今日一嚐﹐令我對「 清酒」這兩個字﹐有了全新的評估。

在渣甸坊的「拖肥」

上海三六九的酸辣湯﹐醉雞。不覺得有何驚為天人之處。

一直見到網上有人讚賞 Puerto Rico 是近年少見好玩的策略性版圖遊戲﹐但鑑於缺乏耐性和理解能力低的問題﹐一直都看不懂它的說明書。在一知半解下與朋友嘗試玩一次﹐後果是不歡而散。後來到了 Jollythinkers 得到註場 tutor 指導﹐於一個小時之內速成了。

原來﹐San Juan 比較好玩。

相中是 What is Café 的「後備場」。原來於週末顧客人數眾多的時候﹐店主們會向旁邊的私人補習社租用他們的大課室﹐作為後援。檯上的一條條用電線膠紙貼出來的線﹐應該是用來分隔小朋友的 “User Area” 吧…真有趣

非常極度狐疑誰發明 / 發現這種東西的。

為甚麼是汽水不是茶？
為甚麼是可樂不是七喜？
為甚麼是薑不是蒜頭？
為甚麼是檸檬不是雪梨？
為甚麼是熱的不是冷的暖的？
怎麼可能想到煮汽水？
怎麼可能聯想到醫治傷風感冒？

一杯檸樂煲薑﹐跟餐加$9。老闆很體貼﹐一見到我這幅病貓樣子叫檸樂煲薑﹐就懂得問我﹕「要多薑的吧？」

果然﹐還未下班﹐感冒已經痊癒了八九成。強得沒話說。

比起其他香港地道飲食文化﹐除了很有代表性的蛋撻﹐街邊魚旦之外﹐怎能遺留了這一杯「檸樂煲薑」？蛋撻能治感冒嗎你說。

跟家人遠赴粉嶺雲泉仙館拜山﹐路遠迢迢得像行路上廣州一樣。午後共膳於齋堂﹐齋堂外有一隻外表醒目的白鸚鵡﹐原來在吃橙。鸚鵡會用一足支地一足吃橙尚不為奇﹐奇就奇在﹐你細看牠在吃一個部份？

猜對了﹐相中的牠尚未開始吃﹐牠在挑橙核。輕輕咬下去﹐用巨大的喙準確的咬著細小的橙籽﹐然後再吐出﹐面上再帶個不屑的表情﹐像是說「今天又是吃橙﹐天天都只是吃橙」。整個情景尤像「阿伯食橙」一樣﹐好不惹笑。

馬克王子不幸惹上窮兇極惡的牛蜱﹐一粒比米粒還小的牛蜱就一口吸掉三千元﹐好昂貴。

我還在讀小學的時候﹐鰂漁涌的幾條街還只是很寧靜的舊樓區﹐只有幾間車房﹐很地道的食品店﹐幾間廢紙回收﹐一兩間地產公司﹐僅此而已。

太古坊開幕以後﹐成功吸引很多大型跨國公司進駐﹐周邊的飲食﹐都慢慢地轉變起來。露天餐廳﹐高級餐廳﹐酒吧﹐漢堡包﹐咖啡店﹐拉麵﹐甚麼都有。從前只有碟頭飯的一條街﹐變了幾條街的小蘇豪。不只這一邊﹐近太古城的那一邊亦是。

經 Openrice 介紹﹐認識了這一間函館元祖拉麵。這一碗鹽味牛油拉麵﹐叫我上癮﹐吃完再吃。唯價錢要七十元一碗﹐亦似乎太貴。

Open Office

其實我覺得 Open Office 真係好好。

當 Director 同你都係一齊坐的時候﹐其實係會無形中令大家的士氣都好得多。以前我唔識得欣賞﹐成日都覺得老世就咁坐係我隔離的時候好大壓迫感﹐要蛇王的話又好唔方便(HAHA)。但依家諗番﹐其實如果佢獨霸一間大房然後窮凶極惡﹐我寧願佢坐出來窮凶極惡。

不過算啦﹐老世係好人的話﹐坐邊度都係好人﹐係衰人的話﹐你都唔想同佢有「大家坐埋同一條船」的感覺。

真‧頂上決戰之 San Juan

好友 Masa 生日﹐提議去 Board Game Café 食意粉兼玩 Board Game.

老實講﹐我實在有點兒怕。自從上次復活假期一連去三日之後﹐簡直有點兒反胃的感覺。就如牙擦蘇所講﹐「兩個月內絕不再去 Board Game Café！」, 皆因頻率太高﹐去到見 Board 生厭的地步。

Masa 知道我學會了 Puerto Rico, 而我上次亦教了他玩。兩人都得出一個結論：San Juan 比較好玩。

先講講最重要的一點：San Juan 這個字﹐是讀成(大約)「散玩」﹐因為此字是西班牙文﹐並非英文﹐所以用英文拼音讀成「散朱晏」﹐是錯的。J 這個字﹐在英文讀成「Jay」﹐在西班牙文則是「Jota」(HOT-ta)﹐而發音則是近似 H 的喉嚨音﹐有點兒似吐痰的聲音﹐雖然﹐我極奇討厭這種比喻(亦很討厭這個發音)。

離題了。

San Juan 其實是繼 Puerto Rico 之後﹐跟據 Puerto Rico 的玩法﹐將之簡化﹐並將其細節濃縮於一張張卡牌上﹐令每張卡牌都能同時成為代表貨物﹐金錢﹐建築物和分數。

而整個 San Juan 的玩法﹐亦比 Puerto Rico 多了一層很重的隨機感。而這一種隨機性﹐可以說是兩種遊戲之間最大的分野。Puerto Rico 非常著重規劃﹐而且大部份的資料都是公開﹐可見。因此﹐如何走一下步﹐基本上頗為清楚。亦因此﹐要是你開始落後﹐要回追的話就會比較難。但亦因為比較少的隨機性﹐比較多的技術要求﹐對高級玩家來說比較吸引。

但對於我這種人﹐不必那麼「高級」的了。

始終﹐我覺得一個遊戲﹐一定要有 Randomness 才會好玩的。畢竟﹐現實生活就是如此的 Random。做好本份的未必會飛黃騰達﹐貌似落後的可能突然走運﹐胸有成竹的可能一時大意﹐無心插柳的也會大樹成蔭。

這才是現實嘛。

另外﹐如有朋友懂得玩的應該記得﹐當第十二座建築物建成之時﹐就是遊戲結束﹐開始點算分數之時。但照片中 Masa 足足建了十八座﹐是我倆提議嘗試的改例。最後我輸了九條街。十二座原來有其原因﹐限制遊戲回合﹐不致於有人建了十八座﹐有人卻連十二座都建不了(我)。遊戲一完結的時候﹐無論如何計分﹐都追不回的了。

總括來說﹐我還是比較喜歡 San Juan。只可惜此遊戲最多只能四個人玩﹐真的是個問題。

另外﹐相中的煙肉芝士炸薯條﹐味道普通﹐但香味滿屋。純粹乃因我自己對此食品的情志結﹐平凡的味道吃起來都變極品。相比起人數多的時候必叫的「熱氣拼盤」﹐我會比較鍾情此品。

跳海

側聞本公司的 Management Trainee Programme 又開始招聘

唔明白的是﹐點解 MT Programme 要跳海？

仲要係去丹麥跳波羅的海

莫非成功跳海的﹐就可以成為獨當一面的經紀？

如果肯挨凍跳海游番個靚水﹐就會「掂」

咁我咪做股東都綽綽有餘？

重整遊記

距離西班牙之旅差不多一年了﹐遊記真的沒有進步。一天就是一天。

後來發現﹐沿途的筆記極凌亂。記憶又開始模糊了﹐有些大事會記得﹐其餘的﹐看了照片也回憶不起。

但重整遊記的同時﹐讓我記起了很多其他的點點滴滴。每一頁紙都記載著我做過的資料搜集。每一頁紙都穿插著我用紙和筆跟旅途上遇見﹐來自世界各地的旅客們和我圖文並茂的溝通。每一頁紙都記載著當我言語不通的時候﹐一手從背包拿出筆記本子讓對方把字寫出來的瑣事。

這一切﹐讓我回想起西班牙之餘﹐也讓我很想再去多一次。

但今非昔比了。

改名

改名

其實係唔靚的﹐我明。其實係抹煞其他人的創意﹐我都明。但我真係覺得好亂。

講緊係 MSN 個名。

早係以前的 ICQ, 大家已經非常沉迷於網路世界裡面建設自己的另一個身份。所有個人資料的空位都填上一個令人完全想像唔到同你有關的資料。咁好正常我都知。但有人會好似我咁用左十年個 ICQ Nickname 都係一樣﹐有人就當個 Nickname 係日記咁日日將自己的心情寫上去﹐有人就當個 Nickname 係創作坊咁推陳出新。

到左 MSN 的年代﹐呢個情況仲嚴重左。中文日文英文火星文又有﹐符號Icon Emoticon 自製形狀又有﹐新聞時事天氣愛情親情人生道理前人思想最潮資訊都有﹐乜野都可以變成你的 nickname.

係﹐的確係五花八門百家齊嗚。但係﹐喂﹐NICKNAME 來架喎。唔係咁用架嘛？好眼花呀﹐大佬。我年紀大﹐頭腦無咁靈活﹐頂唔順你(地)日日都唔同 nickname.

咩「¤©Ω∂□◊~~~其實我少少咁諗真係唔係好似你講咁樣架咋~~~¤©Ω∂□◊」…咁都係一個 nickname?! 唔係呀化….

尤其係唔熟的朋友﹐或者係比較少係 MSN 見到的﹐突然間見到佢「登登」的時候﹐真係呆左。「呢個邊 Q 個？我個 List 有個咁的人架咩？」

睇埋幅相﹐十之八九都無幫助。既然個名都咁「有型」﹐幅相就一定萬花筒咁變。睇下個 e-mail 可能認得呢﹐佢個 e-mail address 前半部, 仲複雜過我個 e-mail password, 完全 no clues.

認輸﹐send 個 msg 過去問個究竟。「咪我囉！阿 XYZ 呀﹐頂你﹐又問﹐今個禮拜問左我第 N 次喇！」

唉﹐一了百了的方法﹐將此等人一律拖出午門﹐斬「名」。

謬誤與諷刺

謬誤與諷刺

- 謬誤 -

番工最鐘意豎高隻耳仔聽人地講野﹐唔知點解阿媽生得我咁鬼八卦的 (媽之聲：衰仔！自己八卦又懶阿媽！生舊叉燒好過生你！)﹐係公司人地講親乜野我都想聽完之後插咀。

今日聽到兩位同事的對答﹐大意係某秘書生左個女﹐今年兩歲﹐但已經講明要佢讀女校。大意係﹐費時佢男女校初中就拍拖俾人攪大個肚。

類似的說話﹐相信每一位都總會聽過身邊唔止一個人講過唔止一次。男仔要讀男校費事攪大人地個肚﹐女仔要讀女校費事俾人攪大個肚 / 亂攪男女關係。好多家長的無知型恐懼﹐以為讀親男女校就十之八九都會攪男女關係﹐咁d 家長就無形中令到自己有好多多餘的「性幻想」。諗到 / 講到 / 形容到 好似一讀男女校﹐就會變成一個雜體性交場咁﹐D 學生番學就淨係識做愛同拍拖。

喂﹐人地當初創立男女校的原意﹐我相信絕對唔係咁囉。 And by the way, 我讀左十三年中學+小學都係男女校﹐我的經驗可以話俾你(地)聽﹐唔-係-咁-囉----。

老實講﹐我覺得如果你係一個單性學校的環境底下長大的時候﹐可能會更加唔開心。原因太多﹐亦可能係我自己想像出來的。但始終﹐呢個世界係有男有女的﹐而學校既然應該係社會的縮影﹐咁何必要有男校女校呢。

讀男女校唔一定要拍拖﹐拍拖唔一定要攪野﹐攪野唔一定會大肚﹐大肚唔一定要生出來﹐架嘛。

差d 講句﹐你寧願佢十五歲攪大左 / 俾人攪大左個肚﹐而慌失失唔知點算好﹐定想佢三十五歲攪大左 / 俾人攪大左個肚﹐先至來第一次慌失失唔知點算好？

老實講﹐如果幾十歲人先至來第一次拍拖﹐第一次面對女仔﹐第一次發現原來自己鐘意攪大人地個肚 (!!!), 都幾悲哀。

- 諷刺 -

酒樓東主係同一個位不停開酒樓﹐拖久幾十萬薪金之後﹐就停業﹐宣佈清盤﹐仲勁過財務公司的「欠薪一筆清」。之後係同一個地方﹐改名換姓﹐再開酒樓﹐又使一招﹐又欠薪幾十萬﹐連累多個家庭之後﹐又無事甩身。多年來﹐最高刑罰都係罰錢了事﹐無人坐監。

那邊廂﹐補習老師雖為人師表但 EQ 仲低過我 (i.e. 咁真係好低)﹐忍受唔到蠢的學生而 mit 佢塊面﹐打佢個頭。唔使打幾多次﹐一次﹐就係打過一次咁多者﹐就被判入獄三個月。

我好細個小學果陣補習﹐係南豐新村一個住宅單位﹐家庭式運作﹐好多小朋友都去。個阿媽就係補習老師﹐有咩唔鐘意就打。我果陣時都覺得有乜理由呢個阿叔都可以打我？但既然佢係阿爸的朋友﹐阿爸仲要特登請佢食飯﹐我就唯有死忍。如果以打一下個頭就要坐監坐三個月﹐我諗淨係計佢打過我的﹐都夠佢坐到依家都未放番出來！莫講話所有其他的學生。

我所講的諷刺 mainly 唔係呢個﹐而係﹐我覺得欠薪同打學生﹐兩個都唔岩。但若果要二揀一去坐監的話﹐一定係欠薪果個﹐而唔係打學生果個。點可能呢個 practice 做左咁多次﹐害左咁多無辜白做無錢的基層﹐仲可以罰款了事？佢最多的就係錢﹐你罰佢錢﹐不如罰我通宵打機把啦。多舊魚！

Bowling and Board Games

最近玩兩樣我以前好少玩的野

一樣係保齡 (唔係川久個隻~)

一樣係 board game

原來我真係無力到連玩兩局都無力﹐隻手已經累到完全拿唔起….

至於 board game, 原來呢個世界係有好多好玩過大富翁多多聲的遊戲

Tom Kha Gai

怱然間﹐好想食好想食 Tom Kha Gai.

第一次接觸呢樣野﹐係一年前去泰國。飲過呢味湯之後﹐我發現原來泰國的湯水﹐唔係淨係得一味「無陰功湯」。

Tom Kha Gai 的中文譯名﹐好似 so far 都無人就咁叫佢做「冬蔭雞湯」。有人叫「椰汁辣雞湯」 (慶過辣雞?!)。有人叫「椰汁雞湯」

我最想飲到的﹐係一碗極重香料味的湯﹐尤其係香茅。大大條香茅放係入面﹐一煲出來的時候﹐酸酸的甜甜的味道﹐叫人回味不已。

唔知香港邊度先有好食的泰菜呢….?

某天醒來

忽然間﹐很早醒來。霍然張開眼睛﹐一秒間從沉睡變成清醒﹐很突然。

原來只是八時多。

對於我來說﹐時間還早。

一覺醒來﹐忽然醒覺。原來我在公司是狐假虎威的。大家的 E-mail 來往之中﹐已見不滿的態度在彌漫﹐大家之所以會照我的說話行事﹐完全是因為背後的直屬上司﹐就是猶如威震八方的大將軍 - 大隻咪。

我已經在同一個崗位工作了一段日子﹐但依然要狐假虎威才能順利成事。

而﹐不少人都願意聽我的說話做事﹐做一些連我自己都覺得無聊 (但有用) 的修改。

是否如果沒有了「大隻咪」﹐我就會變成廢人一個？

為甚麼我做了兩年多的工作﹐還不能建立自己的「品牌」﹐建立自己的「威信」﹐建立其他人對我的「信任」﹐還有﹐我的「自信」呢？

是不是我一直都沒有長進呢？是不是我一直都太依賴「大隻咪」的庇蔭呢？

為甚麼大家會怕大隻咪而不怕我呢？我要如何做才能成為像他一樣呢？



唔…………


……點解我今日咁早起身架呢？仲可以訓多半個錯喎….

…..繼續訓…..

大失預算

咩叫衰多口？

例如你話自己份工好得閒﹐白「逗」人工係度齋坐。一心以為自己加左人工之後回巢都係一樣齋坐唔使做。好喇﹐衰多口﹐依家終於做到趴係度。

我都未試過d e-mail 係覆極都仲有的。又未試過d 人做鑊的速度竟然係快得過我補的速度。

依家﹐死人 Oracle 的防盜器仲壞緊﹐叫到成層樓都聽到叫左成兩個幾鐘﹐就來人都癲。馬克王子係度睇緊醫生﹐未有 results 出。大隻咪俾落的野﹐死線就來到。

都話架喇﹐所有騎呢野都係有個習性﹐就係一係唔來﹐一來﹐就闔家一齊來！

Eyes Flowers

我呢份工的好笑之處﹐就係一係無野做﹐一係就有好大堆的悶野做。無野做的時候﹐悶到癲﹐於是成日都想有少少野做下。

好喇﹐到有野做個陣﹐好似依家咁﹐對住幾千個城市名﹐逐個逐個查。

原來頭昏眼花﹐唔一定要年紀老先得。

係呢一刻﹐我好想向各大地產商提議﹐係興建寫字樓的時候﹐請將一間休息室納入圖則。呢個休息室係可以俾一d 坐到腳痺的人拉筋﹐同時可以俾谷到想死的人大叫而唔會嘈到其他人的。

講完﹐繼續做野。下一個城市係…Frederiksvaerk…

下？

做住下一個先…Fredrikstad….

下……?

咁下一個囉…Fueringhavnq…

…邊 Q 度來架!!!!

我不是 Blogger

要先懺悔 (高舉右手掌心向前) ：其實﹐我唔係真心鐘意 Blogging.

我的確係鐘意寫野﹐但如果一部電腦同埋一部 Wii 擺埋一齊的話﹐我相信我會打 Wii 的機會大好鬼多。

好耐之前﹐未有網上日記的時候﹐大家都係要用手寫本寫日記。媽媽覺得寫日記既可以舒發情感﹐又可以練習寫作﹐十分健康﹐所以勸我寫日記。我覺得此舉無聊之極。一個小學生日常發生的事﹐我當時都覺得無聊﹐用口講番出來都覺得芝麻綠豆﹐仲要寫？平淡如水的生活都要寫日記﹐呢個人一係太無聊一係太孤單。Even now 我都覺得寫敍事式的日記係好無聊。你生活平平無奇的﹐寫來都無謂; 你生活精彩的﹐多數都無時間一一記載。好似點講﹐都唔使寫咁。

可能係因為懶寫字卦。

中三中四兩年﹐唔知係咪青春期荷爾蒙發作﹐個人好唔開心。好睇唔過眼呢個世界﹐覺得好多野都唔係大家所相信的事實咁樣﹐就唔想講野。其實我懷疑係自己痴鬼左線。

不久之後﹐就開始 ICQ 的熱潮﹐然後就係 showhappy 的年代﹐咁我就開始 join 左呢個行列。然後就發覺原來可以一邊抒發自己的感覺﹐一邊得到其化人的回響﹐原來真係幾正。

後來 xanga 的年代來到﹐我無轉﹐始終﹐我已經 settled in showhappy already. Don’t want to copy all the things.

到後來﹐Blog 的年代開始﹐我終於都轉左去 Blogger @ Google. 但我得閒轉﹐有心做﹐都係因為一個原因：番工。

番到公司﹐無野做﹐唔可以打機﹐唔可以離開個位咁耐﹐上到網但又唔睇到其他野。被縛住係一部電腦面前﹐原來係好慘好慘的。於是﹐out of all possibilities, 我發現原來打 blog 都唔錯。唔錯的意思﹐係一來可以消磨時間﹐二來可以抒發己見。

原來﹐blogging 對於我來講只係一種係極度無助兼無聊的情況之下﹐先會有興趣投入的活動。曾幾何時﹐我真係好鐘意追各位的articles. 好似係度慢慢咁認識一個新朋友咁﹐聽佢講野。但同面對面咁識一個朋友唔同﹐你會一開始就聽到好多內心的說話﹐因為好多人都係隱姓埋名咁係 blogging 的世界裡面出現﹐將好多平時講唔出口的說話 (或者講出來都無人有心機聽的說話) 統統都化為電子文字。於是呢種似遠亦近的微妙關係﹐就咁樣開始左。

但到我辭左職之後﹐就幾乎完全無掂過個 blog。原來﹐我唔係咁熱中架咋。我都係到左果一刻﹐我先醒覺。就係因為被困係度七八個鐘﹐先會有心機打咁鬼多字。如果唔係？睇怕我都去左「猝死式打機」咁樣墮落法 lu…仲慢慢打字咩﹐都無野好講。

對唔住喇各位 bloggers. 我的確係好鐘意睇你地的 articles, 但係我唔會夠膽講我係你地的 die hard fans, 不過我依然會支持你地。



By the way…CM 好似呢…做左老豆之後呢…長氣到呢…佢篇篇都長到呢…我真係有心無力去睇晒佢所有的 articles….Sorry ar CM...

The Next Episode or just Sequel?

有道是：「好馬不吃回頭草」。其實我都唔知邊個講的。

但事實係﹐我番左舊公司做﹐仲要係做番同一個位。好神奇呀可？呢個香港居然仲會有人咁樣做。

Anyway, 今次番來係短期工性質﹐應該唔會做得長的。講明左簽約做三個月 only, 我希望我真係可以做到三個月之內搵到新工跳槽。

但係我終於都醒覺﹐我真係要搵一條路 (A profession to specialize in) 行先可以。到左我呢個年紀﹐應該已經係有三年工作經驗﹐三年工作經驗﹐大學畢業﹐其實應該係做到 Manager 級。但係我衣家連 Asst Man 的可能性都勁低﹐睇住身邊的朋友尋日仲講緊「好慘呀又低級又打雜」﹐今日就已經唔聲唔聲「我升左做 Mgr 啦無話你聽咩」。

都咪話唔驚。

我一路係JobsDB 搵工﹐一路心驚。如果我三五年後仲係咁樣的話﹐明明有成五六年經驗﹐但係就焗住搵一d 一年經驗就可以做到的 Junior 位來做的話﹐interview 果陣仲要同個乳臭未乾但活力爆棚的後生仔坐埋一齊爭工做﹐我諗我都應該會幾唔開心。

到底大家用左幾耐﹐先知自己的方向？你有無入錯行？

呼…

Heath Ledger

看見有線新聞台下的「走字板」時﹐先呆一呆﹐再嚇一跳。跑到電腦前上網查證﹐他真的死了。

噢﹐很可惜。真的是天妒英才。

本來對於他將會上畫的 Batman Begins 2 已很期待﹐現在依然期待﹐但心情完全不一樣。

我不是他的影迷﹐但喜歡看他做戲。(那又不是影迷？奇也)

聽見他逝世的消息﹐沒有悲痛﹐只有黯然。

世上又少了一個 (本來已經買少見少的) 好演員

Settlers of Catan with family

約好家人一齊於晚飯後玩﹐唯獨二少要補習﹐很晚才回家﹐於是該局幾乎十點才開始。

今次我有整整一個小時可以慢慢準備棋局﹐可以慢慢研究出一個比較平衝的設定。須知道﹐玩 Settlers of Catan 其中一個重要的因素﹐就是一開始的擺位。而島上的資源和碼頭本身的分佈﹐亦甚重要。

我向爸媽解釋玩法﹐他們越聽越覺得無比複雜﹐差點兒想「縮沙」。

到最後﹐表面上糊里糊塗連玩法都弄不清的媽子﹐勝出了。到我們三父子發現他已經九分的時候﹐為時已晚﹐無力回天。

Home Party (飛典版)

楂飛話﹐佢三秒都唔使就估到呢個係乜野﹐好勁﹐要影相留念。(但都係決定唔post 佢個樣好少少)

如果我無記錯﹐幅圖好似係 Elvie 畫的﹐畫到勁卡通咁﹐我仲估係唔係乜野船﹐或者係咩揚帆出海的時候。個答案竟然係

「鐵達尼號」

真係撞你個鬼。佢連舊冰都未畫就估到﹐借問聲幅畫有邊忽似係鐵達呢號…



然後就係切 Cake 的時候。一次過恭喜晒 Zenia + 朱 + 楂飛 + 典﹐一個 cake 一個場合一次過攪掂晒﹐真係又方便又有誠意。

個 Cake 係聞名已久的 Teresa Festival 的招牌貨 (頭牌?!) Marble Cheese Cake. 當然﹐又係係 Openrice 度聽番來。我自己都未試過就膽粗粗咁買一大個番來俾大家食﹐仲要食 $300 一個 7” 大的 Cheese cake 番來。

好彩﹐到最後都好好食﹐有超濃的 cheese 味﹐仲有兩層﹐外圍的唔係布條﹐係朱古力 (which makes cutting the cake much more difficult)。我呢個貪吃的死肥仔就話好好食﹐但其他朋友一致認佢「都好食﹐但超級極度(漏)﹐好似食左十斤芝士咁」。
Well, 可能因為佢真係用左十斤 cheese 來整卦…I don't know.


切 cake 中途﹐有兩名傻仔拿裝飾的絲帶玩...如果各位係街上見到佢地﹐請聯絡警訊~~~~YEAH

之後﹐我同朱同二少又玩 Settlers of Catan。真係要多謝聲 Elvie 姐拔「棋」相助﹐然後又要多謝Dick 少見完家長都捧住成部 Wii 番來陪我地玩。

就咁樣﹐我地四個男子組就打Wii 打到三點三 Tea time, 大家先拖住疲累的身軀回家 (我係回房)

攪 Home Party 真係唔錯…如果對大家唔係遲到早走的話

p.s. Pictionary 真係一個絕佳的 Party Game. 尤其係人多到玩 UNO 都可能唔夠牌玩的時候。

飛典婚禮的感動 (又名 Jardian 婚禮)

在得知要成為伴郎的時候﹐其實心中十五桶水﹐七上八落。到底伴郎要做甚麼？婚宴去得多了﹐但幕後如何﹐到底要做甚麼？

第一次做「兄弟團」﹐人人都不太清楚到底做兄弟姊妹是如何做的。一群人「柴娃娃」的走在一起﹐為自己的知心好友攪好一次人生的盛事﹐儘管連同新郎哥在內﹐其實人人都是「認真地實驗性質」﹐但大家都用心﹐盡力。

幸好一對新人早已註冊﹐當日的行程輕鬆得多。兄弟姊妹統統都是老朋友﹐該玩甚麼可以玩甚麼﹐十幾年來都玩過了﹐反而在玩新郎的一日﹐大家很有默契地不會再玩很激的遊戲﹐以免意外生。可能大家聽過太多大陸新聞是玩新郎的時候玩得太過激﹐於是弄到紅事變白事的地步。

大吉利是。百無禁忌。

開席後﹐諸事不順。擰炮很多都不會爆開﹐咪高峰時有聲時無聲﹐場地淺窄﹐音樂燈光都不容易控制﹐最差的﹐是人。帶頭的部長﹐一副辦喪事的咀臉﹐處處控制我們的進度﹐完全不給機會我們讓我們的節目順利進行﹐到最後﹐連深情剖白的環節﹐也被逼變成了 Happy Ending. 真的讓人頭痛。幸好一路在旁的攝影師和化妝師﹐總在危急關頭的時候為我們提供主意。但其實他們在這一天之前﹐基本上隱形過隱形眼鏡﹐所有的計劃都是靠我們幾個人的。

到最後﹐張記的同學們有默契地在其餘賓客都走了的時候都留下﹐我們幾十人圍在一起﹐連同老師﹐竟然唱起校歌來！在婚宴散席後的酒樓中間﹐幾十個舊同學竟然圍在一起唱校歌來…簡直有點匪夷所思。

離校多年後的今天﹐大家都不再穿校服﹐不再只是少不更事的學生﹐大家在社會上的際遇都大有不同﹐有喜有悲。但慶幸的是﹐幾番轉折之後﹐我們還有一次機會﹐一次由新郎新娘帶動的機會﹐聚首一堂﹐唱一首屬於我們的歌﹐也是一首只有我們才會真正懂得用心回味的一首

校歌。

歌聲悠揚﹐我拍著手唱﹐有幾句歌詞幾乎忘了。我望著四周每位同學﹐有的從來不多交談﹐有的略有交情﹐有的曾經共患難﹐有的曾經「如膠似漆」﹐有的不再多話﹐有的像酒一樣﹐時間越久友誼越醇。我感動了。

要多少緣份﹐再能做朋友？又要多少緣份﹐才能相隔多年﹐又能聚首一堂﹐做一次如此肉麻煽情的舉動？這一份感覺﹐就算不足以回憶一輩子﹐也足以讓你半生難忘。

以前﹐我覺得「久旱逢甘露」很容易想像到﹐於是很容易理解到。但「他鄉遇故知」何德何能可以與之並列﹐則一直都不解。人長大了﹐就漸漸明白到﹐原來﹐是我還不夠成熟世故。今日﹐也許我又向前邁著了一步。