Wednesday, March 29, 2006

29 Mar 2006

乞人憎到死
又話要刪除我個日記又乜野又乜野咁


終於打完金滿庭美食之旅, 三月廿六

Sunday, March 26, 2006

26 Mar 2006 金滿庭

「車品品」變「金滿庭」
傳說中﹐係大角咀的一個 isolated area 裡面 ( 其實即係奧運站個頭, 你話係唔係 isolated) ﹐有一間叫做車品品的車仔面小店。傳說中的呢一間小店係有好好的車仔面…….點好食法就唔知道喇。於是我一路都心郁郁想去試下﹐終於俾我約到同我一樣咁為食的肥仔正同我一齊去「尋花問柳」。
基本上我係完全唔識得去的。我所見到呢﹐呢個地方同旺角油麻地好近﹐但係中間就有一大片空地係你穿唔過的。留下的只有南面的一個入口同北面近奧海城的一個入口….聽起上來簡直就係好似以前的城咁﹐只有南北城門可進。令人期待。
咁於是我地就慢慢又奧海城爬過去咩富花園﹐中途超大風﹐「北門」的風管效應令本來已經好勁的強烈季候風訊號更強烈﹐吹到我頭到暈埋。但就係呢d 咁劇情化的現象先會令我更加 very 期待。

係我地搵左一大輪之後﹐終於搵到呢間咁細咁隱蔽的小店喇!

無開門。

我呆左。好 Down. 點解會唔開門。點解星期日晚的黃金時間都竟然可以唔開門?我好失望。肥仔正話可能執左笠喇。我話無咁快架喎….

點解?因為收到風話呢間咁正的車仔面將會係月尾就結業。消息一傳左出去﹐openrice 的食友統統都牙痛咁聲。由於人人都想去趕食「最後的晚餐」﹐網上的留言及食評數目突然直線上升﹐收到的回音都係一致讚賞令人回味。距離月尾越近﹐大家就越急急腳咁趕去食。你話我見到咁的情形﹐點解夠唔去一去呢?唉﹐點知就踫著佢唔知無開定執左。

咁的失望情況之下我唯有走人。再經「北門」走﹐呢個時候急勁的寒風唔再令我覺得「有氣氛」﹐只有冷的感覺。

咁唯有番入去奧海城喇。奧海城裡面﹐仲有邊間出名得過金滿庭?雖然佢係有好多人係度等緊位﹐但係既然我食唔到車品品﹐我唔想求其搵間 Pizza Hut 安慰下自己算數!I’m in the mood for food! Quality Food! And I mean it!

我等金滿庭。死都等。到最後我等左痛苦的一個鐘。足足一個鐘。餓到我人都扁。一個鐘過去之後我終於有位﹐簡直係感激流涕。

坐低之後﹐發生左一件小事﹐都幾無聊的。如果大家知道乜野係麥兜的「魚蛋粗呀﹐無魚蛋呀; 墨丸粗呀﹐無粗面呀」的故事的話﹐你一定知我以下落來想講乜野。

「先生想飲咩茶?」
「um…飲咩茶…香片呀」
「無香片呀」
「咁水仙啦」
「無水仙呀」
「咁壽眉啦」
「無壽眉呀」
「咁….咁….咁普洱囉」
「無普洱呀」
「醒你個勢…..(已經餓到暈到阿溥﹐肚餓的時候最差脾氣)…咁~你~有~乜~野~茶~呀~~~~~(每個字拖足一秒來講)」
佢打開個 menu﹐裡面有五六種茶﹐有咩人蔘烏龍﹐龍井﹐碧螺春等等。激死我﹐扮 high-class 呀嘛?我 high 唔起咩家陣?大我?車!我要碧螺春!…..巴之閉…..趁我咁唔好老脾的時候仲要來谷爆我個「潑婦-o-meter」?!作死呀你…..

好 L 肚餓﹐打開個 menu 見野就叫﹐好明顯因為我地已經唔睇錢﹐又唔理時間已經係九點半﹐更加唔理食唔食得晒﹐只求忘我。食﹐就係要食得暢快食得爽﹐食到忘我先係開心。

我地點左:

醉雞
皮蛋豆腐
雲白肉
和尚戴帽 + 叉子燒餅
四川擔擔麵
小籠包
紅油抄手
酸辣湯
酒釀丸子

係。我地得兩個人。係﹐我地係叫左九樣野。係﹐後面個檯四個後生仔都係叫咁多野。不過其實我仲想點多d….

我地隔離左右的人的眼神真係話到俾你聽佢地真係覺得好神奇好驚訝好似見到有人用手行路用腳食飯咁架﹐交足戲架佢地。

碧螺春清清地幾好飲。但係據我所了解﹐綠茶係唔應該用太熱的水去沖﹐如果唔係就破壞左 and 飲唔出綠茶的果一種「嫩」。所以…如果唔係咁熱會好d 囉。同埋蠢左呀我﹐唔叫埋龍井試下。(不過淨係擺野食都唔夠地方﹐莫講話放多壺茶。….


等左一陣﹐竟然係後叫的紅油抄手先上。皮做得很薄﹐都見到裡面的餡係咩樣。我向來都唔係一個食得好辣的人﹐但係我都食到呢個紅油抄手﹐而且係辣得好好味添。辣我食得多﹐好少會食到辣得來想繼續食的。呢個咁平咁多件的紅油抄手做到了。
可叫度: 抵叫

後來來左雲白肉。雲白肉係一片片切得好薄的豬肉。顏色方面真係白雪雪架喎。肥膏部份當然係白色﹐但係 non-肥膏部份都係白色架。一大碟圍成車輪狀的白肉中間有一碟辣油。夾起一塊來睇﹐肥瘦分得幾好﹐唔會成片都係肥膏。我先試一片沒點辣油的。一食落口的時候肉香未出﹐反而係感覺到師傅的刀功了不起﹐將肥豬肉切到咁薄。其次係選料很好﹐一入口肥膏即溶﹐有食過豬油的朋友就知豬油幾鬼香。滿口豬香之後﹐就到享受瘦肉的時候。白雪雪的瘦肉有預期中的粗糙感﹐我覺得係正常的。雖然有豬油香﹐但係我唔覺得好油膩。辣汁黑黑的看似普通的辣椒鼓油﹐但味道很不錯。雖然……感覺上很似那紅油抄手裡的辣油。
可叫度﹕大叫

跟住上皮蛋豆腐。…..喂唔值四十五蚊喎。
可叫度﹕可以唔叫

然後上左擔擔麵。不過因為小籠包都到喇﹐所以要聲食左小籠包先﹐凍左唔好食。小籠包好抵食﹐廿八蚊八隻﹐最衰叫得野多﹐如果唔係﹐咁抵食的話我一定一人一客!網上的食評好奇怪﹐有人話佢的皮太厚唔得﹐有人話佢個皮太薄一夾就穿。我就覺得d 人都痴線的。小籠包就當然係皮薄的靚。呢度的小籠包就薄得來可以同「翡翠拉麵小籠包」有得 fight﹐外表一d 都唔差。至於個d 話塊皮太薄一夾就穿咁的小籠包好唔得的人…..收皮啦唔該。自己唔識夾小籠包仲懶人地塊皮薄得滯﹐仲要係度懶地硬﹐都痴 L 線的。

講番小籠包。呀幾好食喎﹐一咬開佢就立刻有肉汁爆出來的。而且係滾燙的。建議大家吃的時候取一個腑首的姿勢﹐讓包中的肉汁向下聚集﹐免得燙咀。

咬到入餡的時候﹐小籠包的肉香已經係湧晒出來﹐一發不可收拾。再加埋肉汁一齊做 reagent, 一個皮﹐肉﹐汁的 chemical reaction 就係個口裡面不停咁翻滾著…..簡直爽到我要輕閉雙眼來感受清楚!小籠包的汁似連咀巴都裝不盡﹐似要在雙耳噴出來一樣! (誇張得很)
可叫度﹕喪叫!

到擔擔麵。都幾好食﹐麵條有少少「鞋口」﹐但都ok, 個醬唔夠濃﹐辣度對我來講係「仲頂得住」﹐但對於好辣的「辣哥辣妹」來講未免太弱。最得意佢擔擔面唔係搶口咁辣﹐而係飲到落喉嚨 “ding” 先覺得辣﹐吞埋之後仲有「回辣」。嘩~~大佬~~飲茶就話有「回甘」者﹐點可能食辣都有「回辣」架﹐痴線架……
可叫度﹕就係「可叫」

到醉雞。中規中矩。普普通通。算合格的醉雞。
可叫度﹕叫雞喎﹐仲使問

和尚戴帽 & 叉子燒餅﹕全晚最飽肚我一味[食送]。聽到和尚呢個字都知度係齋。其實應該就係一d 好多豉油炒成的麵咁…有少少似上海粗炒咁囉。上面有一大片炒得勁得意的蛋。成隻碟面咁大咁平﹐幾好食。將麵條放入一個類似手機袋狀的叉子燒餅度食。老實講﹐真係無乜特別好食。不過叉子燒餅幾脆幾特別﹐裝滿又油又黑的麵條 & 炒蛋一齊食係一個幾新鮮的中式 Kebab 體驗….但, 唔會再叫囉。無他﹐因為唔係特別好食之嘛。
可叫度﹕唔夠[食送]咪叫下囉

酸辣湯。我頂。餐牌上面話係「海鮮酸辣湯」註明係「改良版」。酸辣湯本身已經係一樣唔錯的湯羹﹐好好奇佢可以點樣「改良」。於是叫左一碗試下。就好彩係叫左一碗咁大把﹐如果唔係全晚的心情都俾佢攪 wor 晒。唔酸唔辣唔好味。
可叫度﹕慘叫~

食到呢個時候其實仲有半碟和尚未食完﹐然後仲有幾件醉d唔醉d 的雞。但係因為已經好飽的關係就再唔食喇。正當我想話「雖然我好飽但係我仲係好想食少少甜品做 conclusion」的時候﹐waitress 姐姐就走來話已經 Last Order 喇你兩條肥仔仲叫唔叫野呀﹐就係我地對望一眼之後的兩秒﹐我地就暽速咁拿住個 Menu 求其點左一個酒釀丸子叫做試下。因為太飽﹐一碗兩份 share 算數。

呢餐金滿庭食得咁開心﹐得到咁高分﹐壓軸的呢一小碗酒釀丸子功不可沒。係我地兩個都飽到撐的時候﹐呢碗小丸子就來到喇。我以前食過好多酒釀丸子﹐俾我的感覺都係一碗痴立立的唔知乜野裝住幾粒麵粉團就算。叫的時候我都預左係佢食的多﹐我最多都係試下味叫做有個交代就算。從來都唔敢對呢味咁奇怪的甜品有 expectation. 點知係我張開呢個「無期待的咀巴」之後…我地食過第一啖之後﹐兩條飽到嘔的肥仔竟然爭食!就係為左爭食呢碗酒釀丸子!天呀!好飽呀!但係好好味呀﹐點算呀…..

我覺得最好係個湯底…..應該係糖水至係。佢用左好多酒釀同埋桂花。D 桂花真係超香﹐勁香。我咁耐以來都係食埋一d 唔香唔好食的桂花﹐仲係度不停咁諗點解d 咁的花都會有人食架陣味咁奇怪又唔香唔好食的。點知原來係我一直以來食的桂花都唔係高 Quali 的桂花。呢碗丸子一開蓋就一陣桂花香滲出來。飲落口非常舒服受用。雖然你會感覺到呢碗糖水係好甜﹐甜到你唔應該飲咁多﹐但係一道又一道的桂花香係口裡反來覆去﹐滲透五官似的﹐成個人都好似 Tempo 咁爽晒。甜甜的糖水做得好潤喉﹐飲落好甘甜﹐好自然。不期然地就會飲多啖…..又飲多啖。丸子係咩味都唔記得﹐反正都只係食過一粒。肥仔正話有芝麻做餡的酒釀丸子好少有﹐通常都係無餡的。但都無所謂﹐我所有的 attention 都放晒係糖水之中﹐幻想緊自己係桂花湖中蕩漾著….
可叫度﹕眼泛淚光地叫完再叫

就係咁﹐兩位大豪客係又食又力的情況之下﹐捧著超脹的肚腩﹐滿足地離開呢次金滿庭美食(或喪食) 之旅。咁的暴食九大簋情況之下﹐埋單位位二百元正。

等一個鐘都抵。

金滿庭
大角咀海庭道18號奧海城2期UG06B舖 (Copy from Openrice)
即係 Olympic Station 出來奧海城上一層轉右行一陣…..最多人等位果間就係…唔識就問人
Tel: 2910-1000 (有心食 / 無心等/ 人數多的絕對建議訂位)

Friday, March 03, 2006

3 Mar 2006

你睇我個樣 free 成咁, 就知道我又到左 boss-free 的日子。今日何止 boss-free, 簡直就好似係度放假一樣﹐只係俾人困左係 office 裡面。

無錯﹐我老世又出 trip 喇﹐我又試無人理我。不過﹐我都要等到今日星期五先可以堂堂正正咁打日記 (死未)。因為雖然話我老世唔係度者, 但係仲有好多其化人係度架嘛﹐俾佢地見到我係度唔知做乜野總之就唔係做緊公司野的話, 好失禮架嘛。所以我都要等到今日連其他「哨兵」放假的放假﹐出 trip 的出 trip 我先可以咁肆無忌憚。但係話時話喎, 我真係開始習慣左呢一種極度靡爛又無謂又頹廢的日子。

我本來都已經唔係一個有雄心壯志的人來架喇﹐我向來都係見到一d 好有雄心壯志﹐背後有一團熊熊烈火的人就會怕左, 然後避之則吉的人來架嘛。好難得我用左成個暑假的時間來儲左個少少的雄心壯志 (其實都係無乜, 都係番工的頭幾日先有少少「志」, 仲要係唔「壯」的)﹐點知就碰著呢一份咁騎呢的「織織復織織﹐阿溥當戶織」的工作。日日就係坐係度坐足八個鐘頭﹐渾渾噩噩﹐無所事事﹐無沖擊﹐無挑戰﹐無溝通﹐無野學。坐﹐坐﹐坐。呆﹐呆﹐呆。一日﹐兩日﹐三日﹐四日﹐………

咩志氣都沉啦。

志氣越沉﹐個人就越無心去搵過第二份工。實在係太容易喇。相比起其他人來講﹐我的 working effort-salary ratio 實在係太可觀。因為 working effort 係零﹐你個 salary (分母)係幾細都己經無所謂。

為此我想 skip 左本來想講的十萬字 description, 直接跳到後半部。請問大家﹐你地係點樣搵到自己的人生目標的呢?咁我呢個毫無目標的人又應該點樣搵我想做乜野呢?學似其他人咁搵 recruiting agencies 又可唔可以解決到問題呢?

多謝大家相助。請小心車門, please mind the dork, do do do do do….

===================================================

尋晚 ICQ Kilkenny 突然間搵我﹐問我個陣時做 Thesis 用左邊幾種 statistical analysis……嘩我即係起晒 “gong” (陽去聲)。 我鬼記得咩 N 年前的傷心事。

於是我又諗起好多以前 222 的事情。回憶總是美好的。

=============================================

尋晚我花左好多時間去搵番自己係 N 年前開過的一個 Xanga Blog site. 今朝我就花左好多時間去 modify 佢……..咁佢始終都真係多好多 function, 同埋我話晒都係第一次用之嘛。但係正當我好想準備要打野入去的時候呢﹐我就估唔到佢竟然無 backdating 呢個咁 simple 的 function.

嘩﹐大佬呀﹐你無得 backdating, 咁我點可能將我 showhappy 裡面超過三年的悠長日記統統都「搬屋」呢?呢個有錢 Xanga 都唔識得賺的情況之下﹐我就決定暫時唔搬住。佢一日無呢個 function 我就一日都唔會走。

其實呀, backdating 係一個非常之 simple 的 function, 好多 blog site 都有呢個 function 架喇, 典解頂頂大名的 Xanga 竟然會無架!有無九菜呀真係。

======================================

我入職呢間大公司之前﹐係要做一個 Aptitude Test 的。呢個 Aptitude Test 的其中一部份﹐就係要係一大張sheet 裡面填好多好多 describe 你自己的詞語的 MC. 例如你覺得你份人係好無品的﹐就係「橫蠻無理的」隔離剔一剔。如此類推。連做幾份, 一份係自己睇自己﹐一份係(你估)人地點睇你﹐一份係人地通常點話你。

我一直都聽聞呢個 Aptitude Test 真係好死準。但係我就一直都無機會睇番自己個 test results, 於是我今日就趁得閒 (笑咩笑, 唔准笑!) 問下大秘書。

雖然到頭來我都係問唔到﹐但係得知原來呢個 test 真係好勁架, 好似。佢出的 results 係出幾個 graph, 然後就將你歸納為幾種人 (ABCDE)。你有填乜野, 無填乜野﹐係邊個位填﹐統統都會影響到你的 results。

咁我就問呀大秘書﹐點知大秘書話佢得閒先幫我搵喎。咁即係以後都唔會幫我搵喇﹐waste air。

不過佢話佢記得我係一個好 high D 的人。唔係好 high 的人, 亦唔係好鐘意落D 的人﹐係 D 系性格裡面的表表者。咁 D 係乜野呀, 我問。佢話即係一個好 detail, 好 follow book, 好 bible 的人。

好 detail
好 follow book
好 Bible

喂﹐阿姐﹐你咪 up 得就 up 喎。我陳阿溥邊忽似呀。

不過……話時話﹐我又真係幾 follow book, 又真係唔識得獨立思考的….

我番埋自己位之後﹐個腦不停咁轉﹐不停咁係度諗「我真係咁的人?我真係一個咁~~~~~~~的人?唔會卦…..唔係嘛……」



*唔會卦…..
唔係嘛……
咁咪好唔掂…..
唔會卦……..
唔係嘛……..*

Repeat ***