Sunday, December 28, 2003

28 Dec 2003

當一切有關聖誕的事都過去的時候, 我先上黎呢度講下廢話

平安夜
TST 擺明就係癲左, 激多人, 多到痴晒線, 我同 fd 行到腳跛之餘, 飯又無地方食, 要買外賣坐出海皮食先有得食, 好似好慘咁。周街都係人的情況之下我地入左新港打機...which is a wrong decision, 因為裡面仲多人, 多人到喊。想打機? 你會發現跟機的人多的是, 成排一蚊餅一字咁排開係部機上面, 我地想放多一個都幾乎無位。痴孖根。想走? 尖咀的地鐵站已經係十個有九個出口都封左, 我地要行行行行行到佐敦入到 MTR 站, 行左成十個鐘, 想唔腳跛都幾難。一點左右到中環, 猶豫左好耐去唔去睇下嘉年華關門了沒有。到最後? 梗係食白果喇, 岩岩 1 am 關門, 我地一點零鐘去到。 望門輕嘆, 一大咋白果塞入口。其間見到中環的變色龍聖誕樹, 好美唷。再向前行, 以為水兵M 記會開門, 點知無開, 朋友都要 toilet, 於是行到金止驚廣場先有 toilet。肚餓, 又要出行出24 M 記....越行越多, 成晚就係行, 再講多一次, 腳都跛。
今年...無咩 x'mas 氣氛, 唔知點解。但係明明周圍都係多左好多的佈置。

聖誕日
唔記得有做過乜野有意義。我仲以為可以一家人一齊食聖誕大餐, 點知到最後係去左阿姨家打邊爐。Family gathering 氣氛有餘, Christmas 氣氛更不足。其間, 十三歲的細佬仲同十四歲的表弟打交, 我同阿爸阿媽睇在眼裡都非常之不是味兒。唉, 十三歲人仲「兩堂鼻涕」咁同個表哥打交, 天呀, 你叫我點放心個細佬。唉。唉。唉。夜晚, 開始打番 Dino Crisis 1, 好好玩, 亦都好驚, 玩到夜一夜都唔想訓。

打拳日
無拳可打, 無禮物可拆。阿爸阿媽番大陸, 得番我一個好可憐咁對住個細佬。我唔出得街因為我要每分鐘都睇一睇我細佬係唔係做緊功課, 係唔係發緊夢。佢有幾多功課要做, 而且一放完假就要考試, 一定要快快脆做完功課開始讀書先得。於是我唯有係度打 Dino Crisis, 跳下 DDR, 打下 ICQ, 睇下有線無聊台(幾乎個個台都無聊), 純粹打發時間浪費青春。咁又一日。半夜四點半, 終於俾我係兩日時間之內打爆 Dino Crisis 呢隻 gea 野. 唔知係因為自己太勁呀, 定係打爆左咁多次熟能生巧。

廿七日
痛苦。又係睇住佢做功課, 每隔十五分鐘入去佢房一次監視下佢係唔係仲做緊野, 係唔係發緊夢, 催佢做功課, 阻止佢借飲水為名不停出黎睇我打機....等等等。夠啦, 我忍夠。夜晚入中大打邊爐 (係喎, 又係打邊爐?!) 同飯團一齊, 個種感覺好耐都未試過咁開心, 見番佢地真係令我即刻諗番起好多好多張記的往事。令我諗到如痴如醉咁。其實我都幾 enjoy 有一班咁樣的朋友一齊。surprise 的是, Jackie 番左黎。臨走的時候, 大家又因為已經幾夜下, 所以大家都要怒奔走。成晚就係係度怒奔走。
番到屋企, 發現我出左去的七個鐘頭之內, 我細佬只係做過三條數。每一條數大概須要三分鐘去做, 三絛數大約係十分鐘。我好想知道, 佢到底有無為過自己七個鐘頭做三條數內疚。佢到底有無為過自己就黎要考試, 書都唔夠時間溫, 莫講話做晒d 功課佢, 佢到底有無因此而緊張過, 而擔心過。我好想知道到, 佢到底有無緊張過自己的成績, 佢到底有無緊張過呢d 全家人都為佢緊張的野。
萬一佢真係答我無, 我唔知我會唔會出手一刀宰了他。
怒氣已經漸漸地 accumulate 起來。

廿八日
搵錢, 見番好耐無見過的杏花村小子, 兩個都係好似以前咁挑皮。原來我都有少少 miss 佢地, 不過當工作開始之後就無乜喇。買左一盒 melty kiss 俾佢地, 當係 christmas and new year gift 囉。夜晚又係食美心, 席間問細佬今日又做左幾多。幾經辛苦追問佢先肯開口講一講 - 大約三四條。幾好呀, 每日做三四條, 幾時做得完 total 八十一條數呢? 幾時開始溫書呢? 幾時考試呢? 仲有幾多日呢? 你有無內疚過人人都為你緊張係得你自己一個唔緊張呢? 講到呢度, 我真係火都黎埋, 我實在忍夠佢。我所謂監視或照顧左佢三日, 我已經覺得生不如死, 呢個廢人簡直係無藥可救, 簡直係渣滓都不如。我真係嬲到無野好講, 咩兄弟之情都唔使講, 食完飯我都自己一個走左, 成晚都唔想再同佢講野。佢亦都好勁, 番到黎衣然係乜野都唔做 - 我話之佢死, 佢死佢事, 佢唔做功課佢的事, 佢唔怕無時間溫書佢的事, 佢完全唔怕留班亦都係佢的事, 我做阿哥的已經盡左力。佢要自暴自棄, 根本就無人可以救到佢。我唔明我阿爸阿媽係屋企點樣可能忍得到佢。我本來都唔想俾我細佬一種 being abandoned 的感覺, 但係經過呢幾日之後, 我實在忍夠佢, 我都要 abandon 佢。
自生自滅喇你。
起碼, 等我今晚道氣下左先。
你死你事, 自暴自棄的廢物。

Monday, December 22, 2003

22 Dec 2003

今日係星期一, 我係宿。尋晚就係 *特登* 番入宿黎打機。因為隻 game 個名叫 Lord of the Rings - Return of the King. 係一隻玩得有少少似三國無雙的 game. 你諗下 Aragorn, Legolas, Gandalf 個 d , 係度好似三國無雙咁樣打交的話....幾令人興奮~!!!! Gandalf 直頭係殺敵無數添呀!

今日幾番戰爭, 已經打到尾二個關 - Black Gate, 就係 Mordor 的大門 Black Gate. 好難打. 之前咁多咁難打的都俾我打到, 竟然 stuck 係呢一關度。唔睇攻略都唔得。點知都係無乜幫助, 呢d skill-dependent 的 game, 唔係次次都睇攻略就得, 又唔係 Lara Croft 個種....係咪先?

好不容易考完試, 一定要好好鬆下自己, 好在同房都係度。佢係度做乜? FYP 是也。睇見佢就慘, 我睇見佢就怕怕自己之後就會係咁。

聽日先終於睇 Lord of the Rings. 機不可失也!興奮, 等我今晚爆左佢機先得! Crack of Doom, 我來也! YAAAAAAaaa~~~~

Wednesday, December 17, 2003

17 Dec 2003

誠意點一隻關心妍的放生俾 Soil and Environment :-(

Wednesday, December 03, 2003

3 Dec 2003

好難得得閒上黎
諗唔到有乜野寫, 再老套d 黎個 summary
今日考 Geomo, 以溫左廿幾個鐘頭的功力去考。無錯, 以前的功力都的確幫輕到少少, 但係唔多, 樣樣野都唔同晒咁滯。就好似我同 Candy 講咁: 根本好多野以前都讀過晒都無用, 樣樣野都唔同晒, apple 變 orange, banana 就變grape...Candy: 不過其實樣樣都仲係生果~
死唔死? 死啦
仲要趕 E-man paper
兩份 Geomo field trip report.
一份 ELT
唔死有鬼

Monday, November 24, 2003

24 Nov 2003

好忙
死亡周
大考就到, 莫講話開始溫書, 連做 paper 都做唔完, 講乜野溫書
做得完 paper 的時候, 恐怕連溫書的時間都無
隻腳好左好多, 行得番
不過未消腫
多謝各方好友支持 / 探問
我唔想今個 sem 死左
努力

Friday, November 14, 2003

14 Nov 2003 斷腳日

好耐以前, 我曾經有排好鐘意自己咁 active。鐘意自己成日都癲下癲下咁樣周圍走, 做甚麼都好像開朗得不得了的。到那兒去都去像很容易, 做甚麼都可以在別人哭喪著臉的時候我就「算啦, 唔係好難者」這樣地過去。然後, 更喜歡自己可以完全不受拘束的愛到那兒, 就到那兒。經典例子是走到家後的後山, 自己一個人走沿著溪澗往上走, 越走越遠。那時可是沒有人知道的啊。
然後, 就愛著自己的自由, 愛著自己可做甚麼就做甚麼, 去那兒就去那兒。沒有甚麼東西可以阻礙得到我。
那時候, 的確甚為開心。

到了夜晚, 最開心的事就會倒映在夢裡。但同時, 一些日間最不想去想的事, 一些日間最不想發生的事, 最反高潮的事, 往往就會在夢裡都倒映了出來。於是, 有一晚, 我發夢自己突然跛了。雙腳都走不動了。

雙腳不能動了。

那一種震撼....那一種震撼....

我不能再走來走去。也不能在游泳池暢泳。也不能跟我的朋友打羽毛球, 也不能跟我的朋友在山坡上趁 field trip 的 professor 講廢話的時候偷偷地走了, 也不能跟朋友一起突然間「不如我們一起衝到那兒」, 大家一起出街的時候又要經常說「這兒輪椅上不到」「那兒 Tommy 過不了」然後大家敗興而回。也不能到機舖玩跳舞機。也不能自己照顧自己, 無時無刻也有一個人在我身邊照顧我, 幾乎要餵我吃飯似的。

我接受不了, 真的接受不了。我感覺到我整個生命都恍如死了一樣, 根本就不是生命, 根不就不是生活。這一個人根本就不是我自己。我根本就不能想樣, 更不能接受自己有這樣的一日。我是很健康的溥溥呀, 我是總比別人走得快的小狗。怎麼今天我會變成這樣! 夢中的我清楚地感覺到不可能的無奈, 不可能的忍受。這是一個沒有靈魂的生命。太可怖了!

那一個夢真的很令我感到哀傷和擔憂。而且, 一不離二, 二不離三。這個一噩夢我不知發了幾多次。有一次醒來的時候眼角還真的有一點淚光。





Queeny, Wendy, Claudia, Gary, 嘉威, Anna, 多謝你們。要是今晚沒有你們的話, 我真的不知道該如何是好。第一刻我除了那撕裂般的痛之外, 我就立刻會想起那一個夢。沒有你們在旁邊跟我談話的話, 或許我就真的會怕, 怕這個夢會實現, 怕得哭出來。沒有你們的話, 或許我就會這樣在湯石沒人理會, 死了也沒有人知 (邊有咁誇~)。見你們都各有各忙的為了我一個笨豬奔波, 很感動。Vincent, 阿基, 多謝你們探我。沒有你們的話我可能會整天都趟在恆生樓不知如何是好, 餓死都沒有人理啊!

每一位幫過我的朋友, 我都很多謝你們。

其實我很惱自己。我很惱自己為甚麼總是攪出一些麻煩來給我的朋友去奔走。

Thursday, November 13, 2003

13 Nov 2003

一早 E-man, 又遲到。唔得, 真係好唔想跑, 反正都係九點正, 索性企定定係度等富貴巴。嘩富貴巴呀, 四個半呀。雖然明知我跑都會快過等佢, 但係唔想郁就係唔想郁。等就等啦。咁就搭左我人生第一次的富貴巴喇。(未入中大之前同 Wilson 誤闖十一苑的一次唔計)
跟住, 就係盡可能趕係星期一之前溫晒大通 mid-term, 好慘, d terms 勁煩, 份 notes 又悶, 完全頂唔順。

Tuesday, November 11, 2003

11 Nov 2003

咩事, 點解會咁躁, 係咪大姨丈到? 連同學們都話我近來脾氣差左好多, 好多時我都忍唔住發左脾氣, 面都唔俾。尤其係 Vincent , 非常可憐地間接成為我的出氣袋
真係要同佢講聲對唔住
但係我真係好多時候都好 mun , 勁想殺人個種。而, 好多時都係佢自己的「言論」令我發晒脾四。

Sunday, November 09, 2003

9 Nov 2003

今日就係兩年一度的地理日喇!
尋晚食完 Claudia 的好好食蛋糕之後, 都未做得完個 board, 今朝就特登飛番去 ELB 做野。然後就好期待咁等人黎喇喎。點知, 過左好耐, 除左好似 O day 咁會突然有一大咋同學飛入黎睇野, 之後就大致上都係一個字 - 悶。估唔到會悶成咁。我又整得塊 board 咁鬼靚喎, 又上得塊 banner 咁辛苦喎, 撞鬼, 都無人黎既, 激死我。又悶又無聊又唔訓得。都唔知係度做乜野。想去睇 opening ceremony 又睇唔到, 想去 greenhouse 又去唔到, 想去聽 seminar 又聽唔到, 想去見大粒佬又見唔到, 想去睇大會盛況都睇唔到, 淨係坐左係個 board 後面係度 「on duty」。
救命。

好唔容易先挨到第一盤美食, 係其他嘉賓係自然地理實驗室食剩送過黎的。陰公, 我地班 helper 好似放出黎的咁樣, 怒搶。人無聊就會肚餓, 仲要係餓到傻左個種。

後來, 去左聽 postgraduate presentations. 先聽 Gordon 的, 嘩, 灰到爆, 同平時的 Gordon 完全唔同。之後失望的離去, 然後等左一陣去聽 Becky 的 presentation, 果然係勁! 幾有趣, 我無訓到。之後的 topic 用 remote sensing 去測珠江的 Suspended Sand Concentration, 好得意, 但係因為佢言調太平之過, 我幾乎訓著。之後的重點, 當然就係地資之寶 - 肥培 - 啦~~~

嘩肥培真係笑到你死。完全未見過咁唔正經的 tutor. 我仲離遠見到 Becky 笑到幾乎抽筋, 其實我地呢邊都係~

夜晚, 同 Juliet 慶祝生日, 竟然俾我係旺角的創興見到 ROSE!
驚訝~ 原來大家都係同自己的中同食飯。開心也。我同Jess 佢地食左好多野, 好飽。中間仲有個小插曲, 就係當 Jess 食食下野的時候, 突然間頭頂滴水, 之後越滴越多, 之後變成三條水線! 簡直嚇死大家。我地仲以為上面全部都係儲滿左水, 就黎會BANG~一聲, 成個天花板塌下來, 所有水都滴到周圍都係。

行街, 行女人街, 行西洋菜街, 行到火車站, 行到入恆生。
又一天

忽然間
我覺得呢一切都好假
我好似一個故事的主角
我好似唔係我自己
我好似做緊一個故事
一本書的一個主角
一齣戲的廿歲青年的主角
總之, 我一路都係度做緊一d 野
但係, 我好似已經 follow 緊一個戲本去做
而唔係, 好自然咁做。
點解會咁
呢個 feeling, 呢幾排特別強烈。

Thursday, November 06, 2003

6 Nov 2003

尋晚同阿 Ann 佢地傾偈的野我到今朝都記住, 唔知點解。
今朝明明已經多得 Queeny 怒打電話黎 call 我, 但係我到最後都係遲左成廿分鐘先入場。算啦, 遲好過無, 我都好怕自己會遲晒大到, 但係都唔怕得幾多架喇, 要遲的始終都會遲, 係咪?! YEAH~狡辯

之後呢, 我地就同阿 Rose 慶祝生日。我落去火車站個陣, 美心d 麵包西餅蛋糕先岩岩由貨車送到。我問佢, 呢度(個咋大膠盤)除左有麵包之外, 有無蛋糕架? 佢話有, 然後逐層掀起俾我睇。咦, 我見到有鮮果情仁喎, 就試下呢個喇, 橫掂上次個芒果情仁咁好食。

佢生日我地係李慧珍慶祝。地方唔錯, 大家都幾開心。個蛋糕雖然好食, 但係明顯地唔夠芒果情仁咁好食, 上次真係令我一食傾心。

之後就上左 U lib 搵左一陣 ELT 的書。然後 ELT 堂就訓著咁滯。我知道自己個陣時真係太眼訓, 所以我都係輕輕交帶一聲就拿拿聲上轉堂巴番宿。我同房好驚訝我點解咁早番到宿, 我答佢一句今日 special d 嘛, 佢問我有幾 special, 我已經換完衫昏迷左係張床度。Special 在於我近來眼訓得好快, 好犀利。唔知點解, 個 sleepiness 一旦 strike 到黎, 就真係好利「灰」。

我以為我訓醒又係食晚飯的時間, 因為我通常都係咁。點知原來都只係訓左一個鐘頭多d 咁樣, 幾好成績呀。起身拿拿聲趁仲有太陽洗衫。洗完之後出去同阿瑪傾地理日的野。點知就係果一個時候俾我撞到姓潘的同埋阿 Rose 同埋阿瑪。佢地係度錄 Video 俾 Gladys. 終於我都覺得佢做番次 constructive d 的野。

攪左一輪, 連 tutor 隊都影埋, 就走喇, 我幾乎無乜同阿瑪講過乜野。反正佢又要番屋企煮飯, 咁算啦, 聽日先啦。同阿 Rose 同 Claudia 係 CC Can 食飯, 好飽, 一路睇住人地係度準備舍音盃, 一路係我地身邊"cheat chat "咁轉, 我地就係度慢十拍咁食飯。個 contrast 都幾可愛。個陣時我係度諗, 舍音盃, 以前 Vincent 仲係成個頹精(佢話佢想淨係讀書的)個陣, 都竟然玩過一次。surprises are always around us. 今年, 佢連宿都無住, 我就反而俾蛇佢屈, 「人面全非」呢個 term 好似誇張左d, 但係都形容得幾貼切。

短短一年, 好多野都變左。正如之前個晚我都同 Wendy 講左好耐正經野。我無諗過可以同呢個人講正經話, 講真, 對住佢我都想笑。不過可能係教會 train 到佢個腦開通左, 佢終於明我唔係一個一味低能的人, thank goodness.唯一入教的好事? 唉, 費時評論, 免得個d 好狂熱, 好愛神, 好鐘意自己個宗教的人出黎鬧我。

諗下都心寒。
唉, 頂~你唔順。

Wednesday, November 05, 2003

5 Nov 2003

本來諗住早d 起身趁太陽好洗洗衫, 點知都係遲起身, 仲要係突然間話俾我聽 Sandy 的 Briefing 會係一點鐘。唯有拿拿聲飛身番 dept。
上世紀工程, 一樣係世紀眼訓。之後本來諗住食野, 點知阿媽突然打個電話黎話佢黎左中大。呆在當場。咁難得, 梗係去同佢食野啦。於是同阿基食左少少野, 上左本部交一交錢, 番同火車站佢就話佢岩岩得閒。於是就同佢上恆生....銀行, 攪些少錢銀瓜葛。然後同佢去 Snack Bar 食檸檬批。依然係好好食。之後就送佢落火車站 lu。雖然行程短短, 但係對佢黎講, 已經係好辛苦, 因為中大對佢黎講實在太大, 而且佢對腳又有毛病行唔得多。
之後同阿瑪講左一陣野之後, 就要上夏頂雞。同佢地一齊 Land Training 之後再好多人咁一齊係 Snack Bar食飯真係好開心(雖然又~~係 Snack Bar) 好難得咁多人一齊笑一齊食飯。我覺得好 warm, 老實講, 有時真係 even 組聚都俾唔到呢種咁特別的 feeling 我。當然, 亦有組聚可以令我有咁樣的感覺。
之後同泠漳, 阿 Ann, 阿 T, Gela 五個人一齊係 UC 傾偈...當然又係講人是非。不過都幾得意, 收到好多料。
番到房, 發現 E-man 真係有新 notes, 於是試下用自己部 printer print 出黎....又得喎~
然後, 狂搽 Deep Heat, 搽到成間房都係白花油味。因為雙腿實在係痛到癲......
好酸, 好痛耶~
努力

Monday, November 03, 2003

3 Nov 2003

今朝我都係決定左走大通, 因為我基本上已經係好無興趣再追落去。我好明白我點追都係追唔到番黎, 最多都係我係大考個陣讀多少少咁喇。至於拿唔到 notes...呢個就係我唔想起身的原因。我根本都唔想我起身就係因為我要拿個幾張 notes, 然後就係咁樣係咁訓。我唔想咁樣浪費自己的時間, 我諗如果我真係好想要 notes 的話我會問子龍借黎影印。我唔想再問呢個 professor. Even 我係俾左成二十蚊的無良影印費佢。我亦都唔再對大通存有太多的期望。

每一次我諗起呢件事, 我都好嬲自己。尤其係仲有咁多個星期, 我要面對呢個咁差的事實。尤其係當我想去 exchange 而明白到自己將會肥左呢一科的時候, 我真係唔敢諗。好灰係唯一一個形容詞。我好想去 exchange, 但係我 feel 到就係因為呢一個 mistake 會令到我後悔好耐。我唔敢話會後悔一生, 但係肯定會好耐, 因為只係一個咁小的 mistake 令到自己以後的影響咁大。好唔抵。亦都好唔開心。

只能怪自己蠢, 怪自己七。

之後, 連上其他堂都無乜心機。連 Geomo 份野我都係索性抄人地好過自己做。


無心機原來係一劑幾厲害的毒藥。

Sunday, November 02, 2003

2 Nov 2003

終於都十一月。
話咁快第二年的生活就咁樣進入左第二個月。我都唔係好知道自己係呢兩個月做過乜野, 尤其係 major 方面。你知我架喇, 非常之懶, 好多 major 的野都放低晒, 無乜做過。我明明同自己講過呢個 sem 要做呢d 野做得好努力架嘛。點知到頭來都係無乜做過一d 有意義的事。
好似黎緊呢份馬鞍山咁, 我諗我都係九成會抄人架喇。但係我會盡一切努唔去囉, 因為我同自己講過呢個 sem 盡可能一份功課都唔好抄人。因為我真係想今個 sem 學多少少野, 唔係求其好似上一年咁樣....希望我會做到喇, 大家都知道我的恆心真係有限公司。我都唔想滅自己的志氣, 不過 past statistics 真係咁樣 show 出黎我都唔想。
打破 past statistics 的 expected progression 係好多人的目標。簡單黎講即係做一個新的自己。
做到就好lu.

我應該要做。我更應該識得分清楚「應該要做」同埋「真係有做」。我應該盡力將呢兩樣野拿拿聲拉得更埋。

我應該囉。英文係 SHOULD.

用下共產的口吻先﹕「熱烈希望陳同學成功將 SHOULD 高能量轉化作 IS DOING 為人民做福!!!!!」

yeah, 多謝各位。小弟要 on duty 了﹕SLEEPING~~~~

Friday, October 31, 2003

31 Oct 2003

好耐無寫過日記 lu
近來都唔知點解無乜野 mood 寫咁多野, 唔係因為我心情唔好喎
只係因為我根本唔想寫咁多野
以前可能因為心情唔好居多
所以寫野會多左
家陣可能因為時間真係少左好多
好多時我都有好多野要做
可以 hea 的時間真係越來越少。
所以我都係由得個日記係度
但係其實中間都有唔少事發生左 lu
例如我地的 UC Team, U Team, UC 千人宴, Gloria 來訪, Shawlane, 組聚, 唱 K , Wendy 生日呀, 更多的其他事等等。
變變變 ~~ 一切都變了。很多人都變了, 我覺得自己也變了。

點變? 唔知。其他朋友有沒有這種感覺?

只肯定我是不再是那麼的熱心
神奇地
沒有熱心了


為甚麼

Thursday, October 23, 2003

23 Oct 2003

誰能想像我竟然能
mid-term exam
都無知地
走了堂
miss 了
誰能想像
我也不敢
或許你會覺得很爆笑
我笑不出

Tuesday, October 14, 2003

14 Oct 2003

今日又唔記得起身。好走唔走走左最重要的 Soil. 起身個下超憎自己點解會咁。

真係好難, 我做 lab 用左好耐時間先 catch up 得到

Soil 好難

Sunday, October 12, 2003

12 Oct 2003

聯合賽同四院賽都終於完左。兩個試刀石都試過了。發現自己表面上進步了
但係因為別人實在太強自己實在太廢
不必再比下去
因為我已經被比下去
不能出大專, 我是非常明白
沒有絲毫不服, 因為我了解
但心裡總是有一點點少少的, 酸酸的感覺
揮之不去


日記開始寫少了, 除了因為生活上沒有太多值得記下的事之外
除了因為工作多了很多的關係之外
除了因為很多時候我不想說話之外
就是因為我現在沉迷打機
一開機, 就會打機
Diablo 2 , Paladin. 太沉迷

Sunday, October 05, 2003

5 Oct 2003

嘩嘩嘩呢度真係好死恐怖
你一唔打日記多一陣者, 佢地就雞咁腳要 delete 你個 account
我呢排比較忙, 真係放低左成個日記係度無掂過。我收到佢地個 warning letter 之後都一直有擔心過會唔會因為太耐無上過黎而到最後一個唔該俾人 cut 左我個 account. 好彩到最後都無。
無乜野寫, 好開心考筆試 pass 左, 但係因為我無乜野時間所以要遲d 先開始學車。有d 緊張, 但係真係好想識得楂車, 個 feel 實在係太正喇。
下次先講。

Monday, September 22, 2003

22 Sep 2003

實在起唔到身。今朝明明係有一個大通的 lecture 要上, 但係真係累到唔想起身。明明見著個鐘已經係八點, 但係都唔想起身, 因為我都估到自己就算起左身都唔會有精神聽書, 不如算數把啦。但係個頭又係度諗, 佢計 attendace 架喎 (雖然好多同學睇到呢度就會覺得好唔人道, 區區一個大通, 得個兩個 credit, 仲要M 1-2 , 仲要計 attendace ?! 係呀, 不過佢多學生喎, 次次都幾乎坐滿一個 lecture theatre) 最衰係, 佢次次都會派 notes, 如果呢次我唔去, 即係拿唔到 notes....咁就玩完啦。但係唔想起身就真係唔想起身, 我唔知點解自己仲係會咁累。

於是到我起身個陣, 已經係十點咁滯, 於是我就拿拿聲起身飛去上世紀工程的堂。但係我個心一路都係度諗住一陣間去睇 UHS Clinic。個心都囉囉luen。佢話唔係咩事, 應該係拉傷下神經線咁啦, 但係佢又講唔出係乜野。

之後同詩雅食飯, 然後就番落 CC 去上 E-man 的 tutorial. 其實唔係我上的 tutorial , 係人地上, 我去 sit 架者。點解咁無聊連 tutorial 都要 sit 呢? 就係因為呢一個 course 的 tutorial 係用 role play 的形或去玩的。因為要睇的 reference 勁多, 又唔容易, 對手又難, 又係第一次做咁的野, 所以大家都好緊張。於是大家都好想知道到底會係點樣的, 於是我就連同阿瑪一齊去 sit 堂。後果係發覺, 大家都有好多好有料的說話講得出口, 唔容易。走個陣, 我同阿瑪都怯左一怯。

夜晚, 去練水。連 warm up 都游唔到, 我開始意識到自己的體能係何其的差。旁邊的人都超過我了, 而且我喘氣喘得不得了, 腳又開始想抽筋。我完全意識唔到自己的 de-training effect 原來可以咁強, 可以黎得咁快。好辛苦。最後的 sprinting training 我完全係摺埋一邊跟陳伯學游水。唉。

辛苦
但係都係要挨落去
我要

Friday, September 19, 2003

19 Sep 2003

一朝醒來, 已經係十一點半。同房好好心咁幫我入多兩個 credit 先走, 等我唔使睡夢中焗死。訓醒, 做完基本梳洗之後就拿拿聲起身睇 E-man. 我從來未試過為區區一個 tutorial 咁緊張。除左因為今年的 course workload 真係大左好多之外, 亦都因為我唔想再做一個 GRM 學生做得咁頹。亦因為我唔想人人都識得係得我一個係度豬狗不如咁樣。亦因為我自己已經開始事事都要逼自己做到為止。所以從前我一起身就打機, 今日我竟然一起身就睇 reference...

...雖然...個份白皮書真係超~~悶。我睇左一個鐘左右就頂唔順, 想死咁滯。

好唔容易等到三點, 就同 Queeny 影下印, print 下 notes, 食下 tea, 又到五點。然後出發。

首先我完全估唔到 Juliet 無見我一排之後會熱情到咁~~然後我完全估唔到上堂的地方的環境會係惡劣到咁, 然後我估唔到個堂係會悶到咁~~~~~~真係悶死我, 但係唔聽又唔得, 我依稀記得佢講的野, 因為真係幾無謂。

之後同 Wilson and Eric 一齊食野。佢地一路食一路講笑, 唔知點解, 我個心好實, 佢地講乜野我都好似笑唔起咁樣。即係, 覺得 not amused. 唔知點解, Wilson 笑得好開心, Eric 都係, 但係我就諗極都諗唔明有乜野咁好笑。個一刻的心情係, 「俾盡你咪又係幾好笑, 幾得意, 邊度會至於勁好笑」咁樣。唔知點解, 我無乜野唔開心喎, 亦都唔係佢地的問題, 但係, 我就係好似笑唔起咁, 唔覺得有乜野咁好笑。

咩事呢?

其實今日同 Queeny 食 tea 個陣都有少少覺得, even Queeny 已經係同我幾好傾架喇, 但係唔知點解都係唔覺得有乜野好講, 我自己講的攪笑野連我自己都問自己有乜野好笑, 當然, 我見到佢仲可以開懷大笑個陣個心都安落d, 但係就唔知點解我自己就 suddenly 唔癲, 唔好笑, 唔低 B, 唔「唔正經」。我衣然會見到幾個較熟的 GRM 同學的時候, 仲會怪叫幾聲, 然後大家一齊開心咁笑。但係我覺得自己個一下叫, 個一下笑, 突然僵化左好多, 好似做慣左先做, 唔係真係好大意慾同佢地發癲發低 B 先叫咁。

咩事...呢...?

坐低係房, 同同房傾計個陣會幾開心。之後呢, 就會對住個 mon 係度皺晒眉咁

????
So.........................Strange.

Thursday, September 18, 2003

18 Sep 2003

今朝好早就起左身, 然後食早餐...食早餐? 好少聽見我會食餐喎。係呀, 家樂氏粟米片個隻添呀, 加奶添架, 好有營養架。之後就去上 E-man, 可能因為太耐無食過早餐的關係, 一食就不得了, 勁眼訓。
之後 Spanish 堂繼續 sit 堂。好野, 佢無趕我走。繼續 sit, 好野, 佢教的野我仲勉強記得。
之後 ELT, 基本上我已經好累。
之後 Vincent 同 Carmen 係文化廣場 shopping, 我就悶死左。無疑地 Nike 的正牌衫的確係幾抵, 但係佢抵咁又點? 我無錢的話你平左幾多對我黎講, 都係貴。於是得個睇字。之後好後悔為左十蚊雞, 食 Franklin 的茶餐...簡直...不知所謂到無以復加的地步, 我覺得佢地未免當左中大係貧民窟, 當中大學生係饑民, 當中大其他的 canteen 係垃圾。太恐怖, 竟然仲係同好好味的李慧珍係同一間 company, 點可能令人聯想一齊? 天壤之別, 皆在中大。
跟住係 ARL 搵 Wendy 影印野。唔知點解, 番左呢個 dept 一年之後, 覺得開始有d 唔開心, 唔再有個種好期待的心態, 或者係好似番緊一個自己的地方咁, 只係覺得 "我番緊 dept" 咁簡單。
番到宿, 竭力唔俾自己訓著, 但係都唔得。唔知點解自己有一個「惡疾」, 就係無論幾咁精神, 一到六七點食飯時間, 就會超級眼訓, 係非常非常個種, 比起夜晚的睡意更加嚴重, 好似兩日無訓過一樣咁眼訓。日日如是。我覺得咁樣好有問題。但係我又唔知可以點做。係 diet 的問題呀, 定係睡眠的問題呢? 係生活習慣的問題呀, 定係根本體力不足呢? 唔知, 我真係唔知。我淨係知我個陣好眼訓, 到最後我真係訓左, 一起身, 已經係八點, 訓左兩個鐘。點解會咁呢? 點解....咩問題呢....
夜晚食完頹麵, 同尖子, Gela, T 四個一齊係思源館同阿 T 開小小生日會。有得飲, 有得聚, 有得食, 有埋思源館個 mood, 真係幾正。不過, 今年件 T-shirt 的 design 真係...未免....有點兒...太過....唉
好在, 我地之後花左好多時間係度整靚個後幅。好犀利呀尖子, 佢竟然可以將所有人名都塞晒入去個 10 x 10 的方格入面, 強呀子揚! 副隊長好野!
講完晒個陣, 已經係三點幾, 衣家已經係四點半, 超級眼訓, 好在聽日 Day-off, 如果唔係...人都癲

Tuesday, September 16, 2003

16 Sep 2003

我想起身都起唔到。我起左之後就已經係九點幾, 我諗我都係趕唔到去上 Soil , 尤其係當舍監係咁唔鐘意人地遲到的時候, 都係唔好亂黎。於是我就留低 message 俾 Vincent 拜託佢幫手聽埋我個份。然後自己就番房預備一陣 ELT 的野。老實講, 我舊年上左成個 sem 的 ELT 都從來未預備過, 次次都係毫無準備咁就出現左, 甚至係有時因為懶, 有時因為地資盃所以怒走堂, 攪到我到最後得個 C , 超劣。

今個 sem 我既然話過俾自己聽唔可以再咁頹, 就要言出必行。 ELT 的野我都要睇兩眼。正如星期一去左練水, 我覺得真係好辛苦好辛苦, 我完全 catch up 唔番佢地個 level, 但係我再慢再唔掂都要游, 我同自己講, 我一定要游番番黎。唉, 逼死自己。

其實 year 2 的壓力真係唔細, 唔知點解我覺得雖然已經係 Week 2, 但係我都覺得好似時間過得好快咁, 好似今日先係第三定係第四日番學咁樣。但係其實原來已經過左十四日有多。Time flies....flies 到你自己都唔覺得 fly 左。

星期一晚去到知行, 俾 surprised 左一個 B-day little party. 幾開心。不過當我見到知行靚成咁~~~~再諗番舊年的知行, 再諗番衣家的恆生....

FUCK x 100000!!!!!!!!!!

Sunday, September 14, 2003

14 Sep 2003

九月十四呢個日子一直以黎對我都有唔少的意義。因為呢一日就係 signify 我大左一歲的日子。
今年的意義其實應該都唔少, 因為我今年正式變左二十歲的日子。唉, 咁就變左二十歲, 唔再係 TEENager.
No special celebration. No party. No freaking out. Normal and Calm and Peaceful.
very normal.
at night, dinner with parents in Spice Market, my favourite (and expensive, wow) Buffet.

normal, but, happy.
when i backed to my hall, there are a lot of ICQ mesages and i can see them really congratulating me.
i really appreciated that. i love them all.

this will be my 20th birthday
no more teenager.

shall i grow up / pretend to be grow up?
or should i stay stupid / pretend to be stupid?

god knows.

Wednesday, September 10, 2003

10 Sep 2003

比預期中的差。我吃到不太想吃。可能因為你, 可能因為他, 可能因為我自己。

今日只得一堂世紀工程, 而且甚悶。晚上匆匆趕到食晚飯, 看見出了院的祖母, 坐在輪椅上, 樣子比之前好了。但其實還是甚憔悴。很好吃的晚餐, 我吃得很飽。

晚飯過後, 幫手搬祖母回家。那一條短短的斜路變得很辛苦很辛苦。若然之前沒有福利部一個月的地獄式訓練, 我想我托不到一會兒就會把祖母摔倒在地上。

回中大, 要過海。最便宜的方法, 莫過於天星小輪。兩塊錢也不用, 那裡去找? 還可以看一看美麗的海景, 別浪費, 大飽眼福。之後, 開展了漫長而汗流浹背的旅程 - 天星碼頭到紅磡火車站。但一想到可以慳錢, 就不太多計較, 而且又不是真的非常遠....雖然感覺上我像是從中環徒步走回北角似的~~

回到宿, 倦極了。
sleep.
at 2
Tomorrow E-man lectures H 1- 2

Tuesday, September 09, 2003

9 Sep 2003

今朝早堂, 我起到身, 仲有充足的時間俾我慢慢著衫, 然後先快步走落 CKB。鄒貴的堂, 果然係可以同張力不相上下, 我今日係第一堂上 Soil, 亦都係第一堂聽佢講番文, 平時上世紀工程都係聽佢講唐文。之後奇怪, 點解 Claudia Vincent Wendy 三個有 take 的人都無出現的? 原來 Claudia 一早就坐左係我面前我自己睇唔到 (白痴仔), 但係 Vincent 就唔知做乜野 miss 左一堂, 要成九點半先到。Wendy 更慘, 佢肚痛黎唔到。

之後轉堂去上 Charles 的 Academic Writing. 撞見 Wilson, 睇怕今晚都無緣上佢個間鬼火咁靚的紫霞樓喇。講講下, 竟然幾日轉堂巴都滿晒, Vin 上唔到車添! 到最後唔知佢係唔係行左上碧秋。

去同張香港地圖過膠, CUSU 個度竟然無合適的膠片, 激死我。同組妹食過午飯之後, 就上二手書攤搵好書。人就好多, 書就無乜, 失望感都幾大。唯有去大學書店, 經過我三番四次五番六次的爭扎之後, 終於都買左 Soil 本 textbook 。超級厚, 960 頁, 成二百幾三百蚊, 肉都痛。

之後係百佳買野, 再到 ILC 睇戲。我想睇的, Rose 同 Queeny 都話唔想睇。Queeny 話想睇的, 我覺得我會悶個半死, Rose 話想睇的, 我覺得我會悶到生不如死。我話想睇的, 佢地又話好低級, 到最後就焗我睇一套我唔知係乜 Q 的戲。衰女包, 早知唔話你兩個知我會黎睇戲~~~

最衰, 係當我覺得套戲都 ok 個陣, 佢兩個竟然訓著!!! 仲竟然話番宿訓唔到, 黎呢度睇住d 咁的戲就會訓得住喎。我未至於火都黎埋, 但係就一頭都係問號 - 點解咁都得。

睇完, 係 U lib 睇一陣書, 番到宿做一陣運動, 聽李鵬飛講夜話, 一個人係 Small Common Room 睇 24 (後尾有 Vicky join 我), 然後番房同 ICQ 人打牙較, 幾好的一天。





其實沒有感情
生活也可以活得那麼好
或許
你會覺得愛情比友情來得重要
真的很重要
但若然如此
就用多點兒的朋友陪伴你吧
總有一個數目可以填到的
填不到的心靈
....也沒法了, 總會有一些的不快
總之
一切還可好
沒有別人的日子, 好像有。有別人的日子, 好像沒有。

Monday, September 08, 2003

8 Sep 2003

今朝又唔係好起到身
成個人都勁頹咁, 個 alarm clock 嘈左好耐我都係無動於中。我同房就黎殺左我, 佢明明係俾我個鬧鐘嘈醒左, 但係又唔夠力起身殺我, 如果唔係佢實會一手拋我出恆生梯, 再拋我個鬧鐘出去。其實我覺得自己好似好衰咁, 明明係我上得多早堂, 但係我就鋪鋪都起唔到身。上次恆生樓有個 fire alarm 響左, 成棟恆生都嘈到癲左, 我都聽到...少少。我覺得好煩, 而且我好眼訓, 於是我就再訓算數, 無理過佢。好犀利地, 我竟然可以繼續訓, 而我同房就嘈到訓唔番。事後問番佢, 佢話佢聽見個 alarm set off 左成五至十分鐘, 但係我就係最後一兩分鐘先開始醒, 個 alarm 響左成七八分鐘我先有反應, 「你簡直係昏迷。」

我就係咁, 唔知點解, 一訓著左, 其他人簡直難辨我是生是死。開始左少少想訓, 就會不停咁 acculmulate, 然後好快就會進入好危險的狀態。我試過係好眼訓的情況之下過馬路, 以為係綠燈可以過, 點知....大家都估到喇。到衣家, 我都仲係咁樣一訓就無晒知覺。個次 pre camp, 阿 vincent 訓左成晚都訓唔到, 好多人都訓得唔好, 我一訓低就昏迷, 到第二朝先醒, 太好喇。因為我試過訓唔著的難受, 所以我會更加珍惜我可以一覺訓天光的喜悅。

今日同詩雅食飯, 先知原來係 O camp 個陣都發生左唔少的事。但係可能因為我一路都係度掛住做其他野的關係, 無理過 / 打聽過。聽完, 其實或多或少都覺得呢個 O camp 的問題真係唔少。

夜晚, 我係 CC 趕番上泳池, 睇下今年的選拔。好犀利呀! 今年原來有好多男仔係 UC 架~ 開心死喇! 我同尖子終於都唔使再驚喇! UC 有男仔喇~! 更令人開心到死的是, 其中有一個 Davis, 原來係港青黎架! 佢好強呀, 仲竟然咁好彩 (定係唔好彩? 唔知) 係我地 UC 呀。唉, 太好喇。我見到佢同阿豐竟然可以鬧得咁上下個陣, 真係又驚又喜。阿豐為中大的一等一泳手之一, 簡直難覓對手, 但 Davis 都居然可以同佢鍊過, 好! 唉, 我呢d 二打六, 都係企埋一邊幫大家去買野飲好過。

其實我仲想繼續睇落去, 但係那邊廂的 215 正在開 O camp 的大 E, 或多或少我都應該到一次, 最後一次 voice 我的感受。雖然講的事不多, 但係大家都終於肯「比較開腔」。咩者? 有不滿咪講囉, 不畏強權喎, 更何況, 都唔係真係強權呀。

之後幫 Wendy 出去搬電腦, 唔重, 輕過自己個部。之後係火炭泰源食宵, 好好食, 但係之前已經食包包食飽, 而且唔想食太多難消化的野, 所以唔多食。

番到宿, 將 Gladys 送俾我的「熊出沒注意」貼係門口 - 反正我同房叫林 BEAR 嘛。幾得意呀。

聽朝又早堂, Soil.

Thursday, September 04, 2003

4 Sep 2003

天呀
按錯一個制
又 delete 晒所有野
唔打番喇, 好多野呀, 好眼訓呀
今日sit Third World, sit 唔到 spanish, 開 UC 會, 去沙田買野, 因為一份生日禮物不太高興。
that's all

Tuesday, September 02, 2003

2 Sep 2003

無錯, 颱風。
第二日, 我又係要一朝早就起身, 今日要上的堂有早堂的 From Genes to Life, ELT Academic Writing, 要 sit Astronomy, Critical Thinking. 今朝的早堂好辛苦先起到身, 係要同房叫醒個種。飛身落去謝昭杰室, 完全唔能夠醒來, 根本成個人都極有倦意, 釣魚都釣左好多好多次, 我好想清醒, 我覺得佢地的內容真係唔錯, 但係我真係唔能夠集中精神, 好辛苦, 每一刻都係度諗緊幾時可以完, 因為我真係可能會當眾訓著。我已經三晚唔夠訓, 再唔夠訓的話, 何只神智不清, 心生幻象都似~~

果然有個幻象: 我仲以為自己 d 英文都應該仲得, 點知已經生晒銹。呢堂 ELT 要我地講少少英文不特止, 仲要寫野架嘛, academic writing 呀嘛, 係唔係? 我唔記得晒一篇 paper 要寫乜野咁濟, 灰。

呢堂 ELT 的之前之後都有一段小插曲, 我本來以為得我同 Rose 兩個人 take 左呢個 course, 上到巴士先知原來好多熟人, 幾乎我地成個圈子的人都黎左...Carmen, Claudia, Zia, Rose, Queeny, Vincent...再加埋一兩個 freshmen 同埋丁丁, 簡直係 GRM 的大本營! 其實我上個 sem 跟 Wilson take 完個 ELT 1108 之後就開始有少少後悔。唔知點解, 可能我同佢一齊玩就會幾開心既, 一齊學習似乎唔係太適合咁 (奇怪之極, 我明明跟佢 "一齊學習" 左四年), 於是我今個 sem 係唔同任何人提及的情況之下, 想自己一個人 take 呢個 academic writing...點知...係 ELT 堂攪組聚, 成組的組妹都幾乎黎齊, 開 party...WELL~~算啦, 大家一齊都應該會做野既, 唔會拆左人地個課室既....

我諗...唔會卦。 *__^

跟住上堂個陣, 小組討論。原來我地個組的兩位女士係 postgraduate. 唔講唔知。跟住個 professor 就捉住左佢地出左去講好耐野, 我地就自己吹水。唉, 記性真差, Phebe 同我打招呼, 我都諗住一輪佢係邊個先醒起...我家陣記唔得幾多個 freshmen. 好多都唔肯定, 好多都認唔到, 唉。講番, 原來 ELT's funding 係講明左俾 undergraduate 用既, 咁所以 postgrad 係唔可以修讀的。於是佢地就唯有上埋呢堂算數, 下次就走人架喇。嘩, suddenly 覺得自己仲係 undergrad 實在係好幸福呀, 原來 postgrad 咁多制肘架。

跟住, Coffee Corner 食飯, 去二手攤買野的時候, 見到有個大大大的 Spiderman, 考慮左幾耐先決定買, 十蚊雞, 大大隻 Spiderman, 你想點? 出番黎個陣, 已經話仲有十分鐘就會打八號波, 於是就用多五蚊買多把核突傘速速番宿舍。但係風雨交加, 有傘其實都差唔多等於無。

番到宿舍, 好累, 入左 credit 開左冷氣之後, 就開始頹, 無幾耐, 大覺訓。一次過還清三晚的債。由於太眼訓, 就算張床再唔好訓, 都訓著左....雖然每個鐘頭都係會照起一次身。

夜晚, 風勢極強, 外面的樹都被吹得打橫倒了, 恍似是下一分鐘就要斷的。街燈下的雨點清楚的看見是打橫飛過的, 不是直直的從天而降的。窗是關上了的, 但可怕的風聲就從幼細如絲的窗縫中發出, 聽得出狂風是多麼使勁的吹過。我忽然間覺得自己就算是棲身於恆生樓之中, 亦不見得有多安全。

同房一直都沒有回來, 直到夜晚。他很早就睡了, 我就悔恨自己只顧打機, miss 了 24.

夜了, 看見新聞報告說今晚凌晨就會改掛三號, 其實我跟 Common Room 裡面多位一起看著電視留意新聞報導颱風消息的宿友一樣反應 - 喝倒采。

Sunday, August 31, 2003

31 Aug 2003

大學第一個暑假, 人生尾二的暑假。最後一天。離愁別緒? 也許有吧。

今天要搬宿。一切比想像中的來得容易, 比起為 O camp 搬 sponsors 竟然還要容易。同房是一個讀生化系的 year 3, 為人不錯。宿舍又是看著那個 stupid and boring 的恆生梯景, 令人氣悶。趕到大地開會, 奶茶未能令我提得起多少的精神, 長長的會議開了四個小時, 開到神智不清。終於開完的時候, 我方才明白到當初跟我一起共事於地資盃的 PIC 們為甚麼那麼討厭連開三小時的會。到美心吃晚飯, 我連 Gladys and Panda 那一份也一塊兒吃掉了。誰不會這樣, 餓壞了。

回到自己的房間, 看著幾乎又是一模一樣的光景....你會有多興奮? 沒有。
還又為著自己的 course 煩

煩...煩...煩得很
.........

Friday, August 29, 2003

29 Aug 2003

今日好疲累呀個人, 成個人都累了。沒有做過甚麼, 只是游了一陣水, 行了很多的路, 到過中央圖書館借過書, 喝過奶昔, 當然是朱古力, 探過病倒在醫院的祖母, 回家吃過晚飯, 又一天。

快要開學了, 卻有很多的事還沒有做過。最重要的事, 莫過於立刻 plan 好真真正正的 timetable 再 add drop, 因為實在 plan 得太過垃圾了, 實在令人難以接受。所以唯一的辦法就是由頭再 shift 過所有的 course。這會費我很多的時間呢, 沒有辦法, 一定要做。星期六....即是明天, 就要開會, 然後就要入宿, 入宿又要做一大輪的 packing of luggages, 這一步又要費我很多時間....

又一天, 又一個暑假, 又一個沒出色的我。

Thursday, August 28, 2003

28 Aug 2003

世界真恐怖。
首先有蛇頭推女人蛇落海, 唔使詳閱內文, 淨係頭個 headline 已經夠晒慘不忍睹, 睇埋幅相, 見到個女人浸死個樣, 加埋抱住佢果個救人的人個無奈樣, 一切都已經說得很明白。
然後有印度人踩人事件, 大家為左係一個宗教儀式上爭先恐後咁落恆河...最後變成翻版蘭桂坊慘劇。都仲未計佢不久之前有個孟買大爆炸, 三百人死傷。
仲有今朝凌晨有一架飛行服務隊的直昇機撞山墜毀, 機上兩名機師皆殉職, 機身碎片散落鳳凰山下。傳說中鳳凰乃浴火重生的神鳥, 希望兩位機師都會如此, 至少, 來生投一家好胎。

都有好事既。
今日係火星大衝。睇報紙話, 火星大衝即係火星同地球最接近的一個時段。係二萬年黎最近的一次喎, 二萬年喎, 唔少野喎, 冰河時期呢個 term 聽落好似好遙遠咁, 其實最近一次都係一萬年前的時咋喎, 咁咪....即係總之係好難得啦。今日我游游下水, 個班救生員都係度衣衣呀呀咁講見到火星喎, 係見到有粒大野係天空既, 不過無眼鏡乜都睇唔清楚。你班友, 有人浸死你班友都唔知喇, 掛住睇火星。

今朝補習, 好耐好耐無搵過我的太古城終於搵番我。一開門, 嚇一跳, 高左勁多呀個仔。我細佬不過中二, 都就黎有我咁高, 我即時諗到, 呢一代的細路哥, 真係勁高大, 仲要係高得勁快。以前我阿爸阿媽個d 親戚先會講的「嘩無見一排就高左咁多喇」個 d 客套說話, 估唔到今日我都會脫口而出。莫非我已經係咁老?

唔好卦。
最近一排, 有好多老歌都出精選碟。Vincent 推薦我聽 "Folk Together", 歐瑞強的, 我睇過佢的廣告, 廣告之中個幾隻歌我其實一早就識唱, 唔知點解, e.g. Puff the Magic Dragon (其實呢隻好好聽), Country Road, Take me Home 等等。 最近有一隻老餅 Disco 碟, 更嚴重, 佢廣告播左六隻 sample 歌, 我數得好清楚, 我識其中四隻。雖則話, 好幾隻都係因為玩跳舞機而聽過的改編歌, 但係...
總之突然間好 shocking 自己咁老。

今日去過自修室, 竟然一開門就見到曾賀星, 心裡面 Well 左一聲。繼續搵位算數, 坐低左, 對面有書放低左。過左一陣竟然又係一個張記人坐低 (另一個唔識); 出左去聽一陣電話, 竟然再見多個張記人...莫非呢個自修室已經俾張記人瘋狂佔據左 ?! 莫非呢一代的張記人都會勤力到咁樣 ?! 嘩...嚇呆左。

本來約左 Simon 今日去游水, 點知佢話隻手突然間腫左, 因為昨日佢番中大 Clinic 打針, 打完腫左喎, 我聽完之後「下」一聲, 呆左。腫左? wow. 咁你咪仲勁過步驚雲~~? ^__^

Friday, August 15, 2003

O' Camp Day 2; 15 Aug 2003

O camp 第二日

唔想起身, 一句講晒。其實我唔知點解, 我係 sense 到有人會入黎, 所以 George 入黎叫醒我地之前, 我已經醒左一醒; 個電話想 alarm 之前, 我又醒一醒。但係我都係唔想 100% wholly wake up。尤其係, 當我仲見到對面的 Gary 都係醒完再訓個陣。我心諗, 你都唔想起身, 咁我都唔想。我睇你頭架喇, 你醒我咪醒囉, 你都繼續訓我又唔介意繼續, 你都公然抗旨(雖然無聽過話有呢一道旨意), 咁我都想訓多陣, 反正我想 conserve energy....我唔想我唔夠訓, 仲要一早起身做早操, 係夏鼎基跑圈...一黎好疲累唔想跑, 二黎覺得咁樣太健康唔似我, 三黎覺得好似賽馬晨操咁...

於是, 我連 Wendy 同 Queeny 係對面房的怒 Call 都唔理, 反正朝早我記得都無野要做。第二朝成朝都係d freshmen 係度聽 academic counselling 之嘛, OC 無作為。點知, 起身之後先發覺賴野。

明明今朝 Wendy and Queeny 都知道無野要做, 點解唔見左佢地既? 佢地應該都係唔去晨操架喎。於是就出去睇下, 點知發覺佢地係度推緊架車仔, 車仔上面有乜野我就唔記得喇, 點解要推推去邊我都唔記得, 但係係文質出面條路見到佢地好似拾荒的婆婆咁樣推架車仔推得好辛苦個陣, 我就知道我已經訓晏左。我就拿拿聲一個箭步飛上去幫手喇, 跟住 Queeny 已經唔夠訓, 又累又辛苦又叫極我都唔醒, 於是一見到我就鬧左我一餐。唉, 俾人周就緊係唔開心架喇, 咁點喎, 今次係自己衰既, 唉, 算啦, 頭先見到佢地係度推得咁辛苦個樣, 就俾內疚感 cover 晒。

搬完野, 好似無乜野做。我記得係 222 有一段時間係度上緊網, 節目部的同事就係度幫 OC 畫定一d 畫 - 因為我地一陣會係本部個度畫一幅大畫。其餘時間, 唔係頹就係搬野, 直到下午, 收到消息要係人生大富翁幫手。

係 pre-camp 個陣, 我已經 choose 左人生大富翁要做未圓湖個一個, 因為果一個 checkpoint 無野要做, 淨係幫 freshmen 簽番個名就得, 無 task. 而且我唔係太怕熱, 無所謂。briefing 之前, 阿 George 話佢無 checkpoint 所以話想 join 我, 我無所謂呀, 大家咪一齊係獅子亭傾下偈, 吹下水過日晨囉。可恨的是, 我之前竟然完全忘記左獅子亭一個令人聞風喪膽的別名!

- 喂蚊亭 - !!!!!!

去到一陣間就覺得好嚴重喇, 我坐左係度, 明明係著長褲 (黑白迷彩, yeah! 買左三年喇, 衣家先著呀), 但係都咬到我對腳。好驚, 即刻拉低d 條褲。之後就咬手咬腳咬頸, 我就俾d 蚊不停咁煎熬左成兩個幾鐘, 但係反觀阿 George 呢, 佢話佢完全 feel 唔到有蚊喎! 佢仲係著短褲幾乎係袒胸露臂個種呀....點解呀, 好痕呀, 好辛苦呀...唉。我覺得好唔掂, 於是就醒起我地的 sponsor 之中有一樣係白花油, 我仲記得好清楚應該有剩, 放低左係 dept, 於是係下一次打電話的時候就問下總部, 總部答我會有人送白花油黎...點知, 等了又等, 到左四點幾, 個 game 就黎完我都就黎 off-duty 個陣, Travis 就拿著枝白花油黎喇。嘩當我見到有白花油個陣, 真係開心到癲左呀。太好喇, 太清涼喇, 太舒服喇....

其實未圓湖呢個 checkpoint 如果唔係因為有蚊的話, 真係超正。因為我地呢度好靜, 雖然我地無聊個陣無野玩 (聽聞有好多 checkpoint 從未有發生過「無聊」呢件事, 唉) 但係起碼有兩個人係度, 悶到多野講下呀。最好的就係, 當我同 George 都肚餓的時候, 兩個人一齊守的威力就發揮喇, 哈哈哈~ 我同 George 都可以輪流去非常就近的眾志食野呀, 佢都係飲野咋, 我直頭食左個 tea 呀, 超開心呀 (雖然因為有工作在身唔敢慢慢食, 食得幾急下) 今晚可以挨到好夜都得喇。

講開食野, 做 OC 真係幾時有得食就好拿拿聲食, 唔好等, 一有機會就要食, 一有機會飲水就好飲, 一有機會去 toilet 就好去。因為你真係唔知幾時再有機會食野, 好多 OC 係要由朝挨到夜晚都無食過野, 餓到死咁滯。仲有, 雖然話中大水機大把, 但係我地 not really 下下都有時間可以去水機 refill, 尤其係忙得不可開交的時候, 忍渴變成唯一的辦法, 渴得耐左, 烈日當空, 其實個感覺真係幾 dehydrated. 至於 Toilet 呢個問題呢, 其實好小事, 因為你不停咁做野, 水又未必下下有得飲, 仲要不停咁流汗好似開水喉咁, 仲邊有 excess 俾你去 toilet 呢? 不過依照旅行的經驗, 去得就去, 食得就食。食完呢餐唔知幾時有機會再食, 有機會就唔好放過。

Wendy 同 Queeny 就好明白呢個道理, 所以係佢地番左文質得個一陣的時間之中, 佢地就已經拿拿聲滾左一個杯麵黎食。佢地話雖然佢地唔肚餓, 但係都要照食, 幾大都食左先。果然, 係人生大富翁之前 1pm 佢地食過的一個杯麵, 就要挨到半夜兩點。

講番人生大富翁, 番去 debriefing 個陣見到好似 d freshmen 都幾 enjoy 個 game 咁, 又開心多一次。跟住, 當我地一班 OC 都係度休息緊個陣, 突然我就收到阿 Rose 的緊急 calling, 話節目部係 215 有事發生, 須要大量人手幫手, 好緊急個隻。個語氣緊張到我聽見都驚, 於是我都不敢鬆懈, 一收電話就即刻講件事俾所以係我附近的 OC 聽, 然後盡「立」更多的人手殺上 215 睇下幫乜野手。

上到去, 發覺原來係要幫佢地搬野上本部準備一陣的萬人齊畫畫....唏, 我地邊有萬人, 百人都勉勉強強之嘛, 總之就係一個幾大型的 mass event 啦。節目部見到我地突然間有咁多人黎幫手個陣, 都呆左一呆。咁我地就一齊搭校巴上本部啦, 去到先知大問題。

我地 designated 左的地步係係大 tent 底下畫畫。咁我地就要做一個 precautionary steps 就係地面鋪上一層層的膠檯布。呢d 膠檯布就係我今朝係 222 頹個陣都有份幫手剪開的垃圾袋, 黑色的。咁我地就滿以為就咁用膠紙貼左佢地係地面就得喇, 點知...原來百萬大道的地下係非常凹凸不平的石地, 仲要係一塊同一塊石塊之間的 gap 係勁大。本身石地已經唔會食實d 膠紙, 再加上咁凹凸不平, 更加唔會食得d 膠紙實, 再加上近來有落雨, 雖然係個 tent 底下, 但係都有少少的濕, 令膠紙有一定程度的失效, 再加上石塊之間又有一條條大 gap.......到最後, 其實係完全食唔實d 膠紙。

咁我地就成十個人(十幾個?)一齊係係地下度幫手貼膠紙啦, 但係真係好難呀, 因為風真係幾大下, 而且我地又唔可以由得個d 已經放低左係地下的膠紙唔理....因為佢地啜唔實呀嘛, 於是就要用好多的雜物壓低佢地, 但係咁大塊地, 我地邊度夠雜物頂住呢? 我地都無辦法, 唯有淨係用佢地壓住某幾張係外圍的紙, 裡面的, 無論d 風吹得佢地幾起, 我地都無計。

The clock is ticking and the tension grows enourmously. 我地唔知d freshmen 實際上會係幾時幾分到達, 我地淨係知道衣家一分一秒都好緊要, 因為萬一佢地到晒的話, 我地就會好無奈, 係佢地面前趴晒係個地下度幫佢地鋪野。突然唔夠膠紙, Rose 飛到去買多d 膠紙, Travis 同我就飛出百萬大道接力, 當然, 笨手笨腳的我又 screw up 左~ 既然 reinforcements 都到左, 咁我地當然就係士氣小振, 然後繼續快手快腳啦。

緊張的氣氛越來越明顯, 大家都不停咁加快速度, 叫人的聲越來越多越來越響越來越急。天氣好差, 雖然無太陽, 而且我地又係個 tent 底下, 無乜空氣流通, 只有好弱的風, 但係已經足夠吹起d 膠紙, 於是大家都覺得好熱又好"ngai", 大家又緊張又忙, 於是個個都汗如雨下, 成身濕晒, d 汗一滴一滴咁滴係膠紙面上, 人人都撐落去。

Freshmen 到, 大獲, 仲未貼完。行政的 OC 立即醒水, 帶住d freshmen dem 下 slogan 先, 問下一d 有關頭先好唔好玩呀, 一陣我地會玩乜野等等的說話, 拖一拖時間。我地都將近最後完工, 太好喇....我地終於可以好好停一停...雖然話唔係好疲累, 但係心理上的負擔同埋個種熱, 令人喘不過氣。

跟住, 我地一班 OC 就咁樣翹埋對手係度睇佢地畫畫。我呢, 就同嘉威一齊落去百佳買野飲。休息一陣, 番到黎個陣, 佢地都已經差唔多攪掂, 開始搬 d 畫出去, 係空地砌成一大幅完整的畫。當我地睇到佢地漸漸地, 將一塊塊的細畫仔拼埋, 變成一幅大畫個陣, 唔知點解, 我覺得好感動同埋好佩服。感動, 應該就係因為一, 好少見到自己有份 participate 的咁大型的 event, 二, 應該就係因為我覺得節目部今次做得非常之好, 真係好好, 你俾我做, 我一定做唔到咁大型的東西出來, 三, 係因為我覺得呢一樣係好可以 link 埋咁多個 freshmen 的一件事, 四, GRM....好少做得出大事來, 大家都知喇, 唉。影左幾幅相, 趕得切係落大雨之前收埋, 好好彩。

然後是 freshmen 吃晚飯的機會, 我們就趕快收拾東西。收拾好殘局之後, 就到跳營舞...I mean Camp Fire. 這一次, 我第一次見到 freshmen 跳舞, 還不錯哩, 看來節目部教得不錯, freshmen 也學得不錯哩。看見他們都會很投入的樣子, 我想到, 明天他們玩全港定向之後, 就一定會對這個系的歸屬感更加強。

Camp Fire...我從來未試過那樣的累, 有好幾次真的累得要抓著友人的肩膀來扶著。總之幾個小時的跳舞, 都很開心, 都很 enjoy. 是文字寫不出來的。可是很高興。

很 enjoy
腦袋一片空白的跳
身子都濕透了
但心中是快樂波浪在心海中翻滾

(2006 註:03 年9月1日先補番)

Thursday, August 14, 2003

14 Aug 2003

今日好~~最重要, 我知道我遲幾多次都得, 今日真係唔得。今日係 O camp 的第一日, 我地一班 OC 要好早就番到中大去準備一下。之前我已經睇多 Camp log 幾次, 因為我想 firm 多d 自己到底要做乜野, 所以我一番到中大就拿拿聲幫手 Shift 野...又係做野的第一步。我唔知道, 原來我之後的咁多日都係 mainly in charge of shift 野, 更唔知道, 我亦因此變得大力左(少少)

第一件事, 係影相。因為我地要為 sponsors 影一張 dummy 相, 所以要係佢地用張 Banner for proper use 之前盡快攪掂。唔知點解, 皇上同皇后叫佢地過黎一陣, 三兩秒咁多, 幫手影幅 dummy 相都唔肯。咁算數, 我都唔係好希罕。自己做自己野, 係佢地活動教學咁教我既。

原來搬檯都唔易, 我地搬左一輪之後, 就覺得有問題。因為我地原先想訂立位置的地方都有濕左, 好難再放 luggage, 咁點算呢? 臨時臨急又要轉, 於是我地就運用人力, 立刻將本來要放係地下的 luggage 放係一條條長條型的 luggage desk 上面, 仲拿拿臨用 colour tape 痴好。

最後三十分鐘, 我地好多人咁一齊將一袋二袋好多的營衣呀, 營袋呀咁, 輪流鍊咁來回搬運。同時間競賽, 有時係幾得意, 又幾辛苦。

最後二十分鐘, 收到電話話火車站個度有人片人, 要人去支援...老實講, 如果我地有人的話, 當然會好似打杖派救兵咁樣出去支援喇, 但係衣家風頭火勢, 人人自危, 係唔係有更多比片人更有意義的事要趕住先做的呢?

最後十二 / 十三分鐘, 我再上多次 215 同 222 check 清楚有無漏野, 因為我知道一陣間一開始左, 就唔好以停, 有咩出錯的話皇上又會龍顏大怒降罪子民。

最後十分鐘, 呢個時候我先記得有件事唔多妥 (衣家唔記得左係乜野事)。於是立刻飛奔番 215 , 攪左一輪, 先攪得掂。再飛奔番黎, 已經係最後的準備, 我仲係度周圍叫緊人黎幫我手, 因為我一個人 hold 唔住晒成個 counter. 但係我周圍搵都搵唔到人, 個個都唔知點解突然間有野要做, 我心諗, 我一個人應該要點樣做先岩呢? 跟住就一路執野一路諗自己的流程。

最後五分鐘, 我拿晒d 衫出黎, 分好晒 size, 拿定表格, re-confirm 一次自己的流程。之前我仲入左一入去 SB LT2 "裝" 下節目部最後練舞添。好齊喎, 無咩唔妥, 心諗今次 O camp 實掂。出番去, 星自己兩巴掌, make sure 自己清醒, 準備開始。阿基同 Vincent 都可以幫到我手, 立時舒了一口氣。話多次俾自己聽, 今次 O camp 不容有失。

最後兩分鐘, 四個 counter 都已經準備就緒, 我 feel 到呢一刻就好似 24 裡面的 Jack Bauer 咁樣, 每一刻都聽到時計的聲音....咦, 24? 又真係幾似喎。同步緊張呀嘛。Jack Bauer 話過呢一日估唔到會係我一生中的 longest day, 我呢, 都估唔到。

最後一分鐘, 我已經收到輔導部係下面打上黎的電話, 話大軍即將殺到, 準備。

緊張刺激。我睇住d freshmen 入黎個陣, 我淨係識得聽 Vincent 的指令, 佢話大碼, 我就拿拿聲拿一咋大碼俾佢, 佢話細碼, 我又拿拿聲 pack 一疊出黎交俾個 freshmen。我估唔到呢個執衫的 counter 居然會忙成咁。雖然話今日係烈日當空, 有好猛太陽係度曬住我, 但係都唔使滴晒汗架, 直頭係睇住一滴滴汗珠跌落張檯度, 好彩我不停咁抹, 如果唔係, 滴左落d 衫度就唔係咁好啦。

好辛苦先攪左一輪, 好似就黎可以休息個陣, 竟然已經係過左二十分鐘, 十點二十分個一批 freshmen 即將殺到, 唔準備唔得, 我拿拿聲同 Vincent 講要 ready 啦。我都只能夠閉一閉目回一回氣。再黎過。

過晒兩輪人之後, 就準備入會場喇。點知就係呢個時候, 都唔知係天公造美定係唔造美, 佢竟然落大雨。於是我地就好狼狽咁拿拿聲將所有的行李檯都推晒入有瓦遮頭的地方。好, 係因為佢等我地攪完晒先落雨, 唔好, 係因為好麻煩, 好突然, 好混亂。

之後, 我地就要入會場喇。咁但係d 行李點算呢? 於是我就話不如立刻搬晒上 101 store 好佢先啦。皇上話唔好, 因為咁樣我地會唔夠時間喇, 佢提議我地不如先搬去 UG 03, 一陣先再搬去 101, 然後遲 d 先再搬去文質啦。

我個一下其實呆左, 我唔忍心鬧佢, 但係我覺得咁樣實在係....太戇居。我就真係唔係好信由個度直接行去 101 會比行去 UG 03 花多幾多時間。呢度所慳左的一程係慳左好多的人力物力架。一陣既然又係要上番去個陣, 點解唔衣家一次過做埋呢。係, 的確我地係會遲左入會場, 可能會錯過埋個部介添, 但係區區一個部介又有幾緊要。有幾多個 freshmen 真係可以一次過記得低晒你地咁多個名。我諗今次我係比較務實個個囉。不過, 既然佢叫得皇上, 當然人人都要聽佢講啦, 萬一佢發脾氣俾面色你睇咁點算。呢件唔係咩大事, 我唔打算同佢講咁多野, 佢話點就點, 我都唔想自己諗咁多野, 佢話乜就乜啦。

跟住又係人鍊式咁樣將所有的檯, 所有的椅, 所有的行李都搬晒入 UG 03。咁多人來來回回咁搬咁多野, 睇落其實真係幾壯觀, 我即時諗起劉創楚係中國社會講過的毛澤東年代。個個時代, 中國好窮, 無錢買機器發展中國。但係阿毛生睇得出中國勝在人多, 多到嘔, 所以就諗到可以用人力黎代替機器。Mobilize 得到千千萬萬個人一齊同你做一件事, 就好似用緊好多部 machines 黎幫你做野一樣。於是, 你無錢都可以築大壩, 挖運河, 抵抗日本皇軍等等。

咁我地呢個皇上又係咪咁呢? 我唔知, 我淨係知我係 Coolie 。其實搬野真係幾疲累下, 你諗下, 我 O camp 完幾日之後都仲係好累....well。

講番個開幕禮, 幾得意, Neo 一句 CC 係最好 or something like that 又攪到三間書院係度嗌生嗌死, 我都有份幫手。咦?我唔係好憎 UC 架咩? 做咩幫佢嗌? 是但啦, 嗌落又幾得意喎。

過左一陣, 就輪到我地要自介喇。其實 Wendy 好緊張呢一次自介, 唔知點解。我就反而好似唔多緊張咁, 好似諗緊只要做好左自己的本份就得喇, 自唔自介都係得個講字架者。好喇, 落到台, 就衣照原來的安排由 Wendy 先講起, 之後就到 Queeny 講關於我地 mark 到的 sponsors 的總值。原來都有成四百幾五百蚊架。嘩....今年的 freshmen 真係好幸福呀, 我同其他 OC 都己經唔係第一次講如果我地係今年的 freshmen 就好喇, 咁筍。

不過班 freshmen 好似對呢個...對我地黎講已經係天文數字的數字完全無反應, 無動於中。唉。
點解會咁, 好貴架真係, 俾d 反應呀唔該, 唉。

不過都唔緊要啦, 見到佢地咁整整齊齊咁一大排排開出黎, 一個二個精精神神黃gum gum ~ ( 因為第一日的 freshmen Camp Tee 係芒果黃個件), 組爸組媽呢, 就純白的白, OC 呢, 就最型, 作為幕後的最大功臣, 一個二個都著晒黑色衫, 包圍住成個Lecture Theatre, 型呀! 有氣勢呀! 好似黑社會呀 (笑)!

然後, 就係要搬野, 搬野, 同埋搬野。「個開幕就黎完架喇, D freshmen 好快就會上到黎李慧珍架喇, 要快d 搬好晒d tables and chairs 啦」於是我地就係個一間咁細的 function room 裡面 bing bing bang bang 咁搬檯, 好不容易先攪掂, 又要番 215。終於可以休息一陣。中途, 落大雨, 我地拿住四大支吹氣 Tabasco 到 U Gym, 玩競技。個一截路其實幾辛苦, 雖然搬的野一d 都唔重, 但係因為一黎落雨, 周圍濕漉漉, 抱住個一大支 inflatable Tabasco 又係 plastic 做的, 好唔舒服, 個人又行到熱晒...熱, 膠, 濕, 累, 我最唔鐘意的野全部都有齊, 妖~

U Gym, 實在係太~~~大喇, 係呢度玩 mass game, 好似顯得我地好細個 dept 咁, 有成半邊場都係用唔著既( 可能之後用得著我唔知, 我走左) 。當 Gary 話有一套音響黎左個陣, 我直頭呆左, 咁大 set 既?! 咁重既?! 唔係呀化, 大開眼界。

Mass Game, 係對於唔使做野的 OC 的一個休息的好好機會。可以全程係度睇佢地做野, 我就幫下手影下相, 幾得意, D freshmen 都好似幾肯玩, Thank God they liked it. 不過坐得耐左, 我就開始擔心一樣野, 原來我差d 唔記得住我今日要 reg 科, 於是我見反正呢段時間我都係比較無聊, 不如拿拿聲番 dept 攪掂自己之後一整年的幸福。

番到 dept, 就正正經經咁坐係 reference room 裡面拿住本大枕頭係度啃。原來下個 sem 的科係容易諗好多, 尤其係當 major 方面有 landscape ecology 同埋 applied climatology 個陣, 幾乎唔係好使用腦就已經 firm 左自己一定會讀呢兩個 course. 我已經好耐無接觸過似 Mark Sir 的野喇, 老實講, 個一刻其實我真係好掛住 Mark Sir 同埋佢教的 Geography 堂,...實在係太容易, 俾得太多有用的野我喇, 令到我好似不費吹灰咁就得到好多 Geography 的知識, 句句精簡到肉, 唔會花費左你唔應該花的時間...反觀衣家...唉。算, 接受現實, 繼續 reg 科。攪左好一大輪之後, 我就唯有求求其其咁 reg 左幾科算數, 可笑的是, 我 reg 完個一刻, 我已經即刻唔記得自己 reg 過d 乜野。咁你話點算。

就當我準備幫 Rose 都 reg 埋, 係度等緊個陣, 我同嘉威同皇上講開 reg 科的事。佢地對於我下一個 sem 只係 take 左上三下三個 major 好驚訝。講講下, 佢地原來仲對個 dept 有希望, 佢地依然想係個 dept 度學到野, 想係GRM 的 courses 裡面學到一d 野。我唔知點解我會有一種熱血的感覺。我明明係已經幾失望下, 失望, 唔單止係因為自己懶所以成績差, 仲係因為我真係學唔到d 乜野。我入左大學一年之後, 發覺左好多同我想像中根本好唔同的地方。有好多我想 expect 的野, 到最後都出唔到黎。其實我有一排真係幾 sad, 但係我都攪唔清楚我係 sad about CU, sad about GRM, 定係最大的可能, sad about MYSELF. 我可能之前太過活左係自己的世界裡面, 然後想像 CU 就會好似我想像中的半大學半中學的型式一樣。於是我就自己過左呢種半大學半中學的生活, 於是我就成年都唔覺得自己係入左大學, 反而係似, 好似我有一次係校巴聽到有位CU 學生所講, 「我根本唔覺得自己係讀緊大一, 我只係覺得生活都係一模一樣, 就算我心理上的感覺都係差唔多咁樣, 我只係覺得自己係一個中八, Form 8。」

呢一句說話, 我無心聽到, but it struck my heart HEAVILY. 難道我就是那一種人? 難道我就是會一直讀到「Form 10」而沒有讀過「大學」的人?

當我仲同嘉威講緊個陣, 呢一切一切就突然閃過我的思海。原來 I have led my life in the past year in this way while I'm not aware of it, but not at all. 我諗番我岩岩 reg 的六個 major, 我諗緊, 其實係因為個 dept 同我想像中的唔同, 定係根本成個大學的生活都同我想像中的唔同, 所以先攪成我今日咁樣半自暴自棄的生活模式呢? 我諗係我自己的問題。我第一次可以咁肯定得到一件事之中係我自己的問題。因為我面前 at least 有一個, 其實有更多更多的成功 example。其實可以試下架喎, 三年的生活, 得三年咋喎, 好快過架喇喎。咁點解唔好好去盡佢呢? 可能我遲d 想入番黎大學都已經無機會架喇喎。咁不如俾多次機會自己喇, 話唔定今個 sem 我會讀得來呢, God knows. 於是我就諗, 我要 reg 多一個 for each sem。大學得三年咋, 三年實在係太短喇。

攪掂, 番番出去會合大隊個陣, 已經係將近七點幾。跟住, 就到左今晚的高潮所在 - 搬行李。

首先, 我絕對估唔到原來所有的行李係有咁~~~ 多。我見到係 101 鋪晒出黎個陣勢其實都已經怯左一怯。但係我估唔到要 call van 仔之餘, 仲要係質爆左一車 van 仔都唔夠擺 !!! 首先就係阿詩係 101 將所有的行李好似拋垃圾咁掉晒出黎, 個一刻我見到阿詩個兇狠樣, 簡直就好似俾男友 (Leo?)欺負完之後, 好憤怒咁執行李想番娘家, 將所有行李都掉晒係地下個樣咁。我都忍唔住 wow 左一聲, 估唔到佢個一細細粒的女仔一手秤起的行李多成咁。然後就輪到我係出面接應, 將一件件行李由 101 門口捧到去後門走廊盡頭, 交俾出面的接應。出面呢, 就交俾皇上 and 幾個 OC 一齊協力搬上車 / 塞上車 / 質上車。未完呀! 仲有 sponsor 袋呢! 於是就有另一批的 OC 係 215 搬晒一袋二袋的 sponsor 落黎, 又有 Magic-pro for freshmen 的超大袋 sponsor, 又有 Tabasco for Others 的大袋 sponsor。係一次過要搬咁多 sponsor 的情況之下, 聰明的皇上就發明左用一條竹桿將所有的膠 / 紙袋一次過串起, 然後就一前一後咁挑起, 再運落一樓, 再運出後門, 再運上車。sponsor 有幾重幾大份? 運得都唔夠三轉, 兩條竹桿的其中一條就已經應聲而斷, 斷開兩截。恐怖。今次真係幾辛苦下, 我個腦真係得一片白霧, 乜野都諗唔到, 只係知道自己要快快脆搬晒所有的野走, 要趕係所有 freshmen 番到黎之前攪掂所有野。搬完個一轉之後, 其實個人都仲有力, 好彩, 因為仲有一轉。

因為所有行李都太多的關係, sponsor 唯有下一轉先上。皇上就叫左我地幾個行上文質做接應。行的途中我發現到一樣野, 就係只得我同 Queeny 可以仲有力行快兩步, 仲可以一路行一路勁講之後的安排, 可能我地俾福利部的工作「鍛鍊」過一個月之後, 真係力氣都好左自己都唔知。又可能只係假象。

番到文質, 其實個人都已經幾累下。不得已, 唯有坐低休息一陣。到個陣時, 先可以好好休息一下, 回番條氣。我個陣己經係成身都濕晒, 簡直係 100% saturated. 好恐怖, 估唔到會熱成咁, 但總之個一刻, 真係乜野都諗唔到, 好熱好熱好累, 成個人跪係梳化, 汗如雨下。但係唔等得好耐, 架車就到, 我地又人鍊式咁不停搬到梳化上面。之後仲未完呀, 仲要分番好邊組的行李還邊組, 排得好好睇睇咁, 費事 d freshmen 見到自己的行李好似垃圾咁堆埋一齊唔高興。終於做完頭一輪工作, 好辛苦先回一回氣, 買左一包飲品, 好快飲晒, 食多個說謊蛋糕, 補一補體力, 準備下一車再殺過。力量不足, 唯有係搬行李的時候叫多幾聲, 簡直係如狼似虎, 似山賊又似張飛。搬到索晒氣, 但係當我眼見到一袋二袋 sponsors 個陣, 其實我真係好開心, 因為我地等左成個月的日子終於都到喇, 我地終於都到左要派 sponsor 個一刻喇, 我地終於都要將我地咁多的心血分俾所有的 freshmen 喇, 嘩~~~......我嗌乜野?

好唔容易先攪掂晒所有野, 我地終於有時間休息一下。個一刻, 其實我地個個都幾乎訓街咁累。個一刻, 我地的 freshmen 係李慧珍個度跳緊舞, 節目部的 OC 係度教緊佢地跳舞, 組爸組媽就常伴在身傍。我休息左好耐, 覺得係時候過去睇下d freshmen 點喇, 與其係呢度頹, 不如趁機會多d 把握短短四日三夜的時間多d參與 freshmen 的活動, 對不?於是我就番過 department, 再過李慧珍喇。不過, 我完全估唔到夜晚的李慧珍會係咁~~~~恐怖。呢個絕對係考膽量的頂級挑戰。我一路打呢段回憶的時候, 其實心裡面亦都不其然泛起左當晚的恐怖回憶...個一晚我真係好驚好驚, 我見到有光個一刻, 我真係好想衝過去, 見到成個房都係人果一刻, 真係長吁一口氣。我都係唔多講喇, 我已經鉤劃出太多當晚的回憶, 我怕今晚成晚訓唔著....好驚....唉, 好驚。

去到見到佢地跳舞個樣都好似幾 enjoy 咁, 我又開心多一次。不過呢, 節目部 dem 的 slogan 我完全未聽過, 所以我都唔知企係度做乜野好, 唯有影相, 無所謂, 反正我黎都係想影相架喇。當我見到佢地好似想走個陣, 就拿拿聲打電話番文質, 叫佢地第一時間準備。到 freshmen 番到黎個陣, 我地就一條龍咁樣派 sponsor 俾 freshmen。

煩囂過後, 我地一班 OC 就咁樣攤住係大堂個度死狗 / 死豬一樣。之後我仲要煩下搵房個件事, 但係算啦, 唔想記載咁多野。沖涼個陣, 已經係一個人都無, 好多 freshmen 都已經攪掂晒訓左, 雖然我地男仔淨係得二樓一間 toilet, 但係都唔多人。我同 Gary 仲可以一路沖涼一路傾兩句, 但係大家都實在係太過疲累, 都係專心沖涼好過。

再過多陣, 就已經係好夜, 唔記得幾多點。要開 E 喇, 個陣時我已經幾頹下, 要一路食野一路飲水一路開 E, 仲要不停咁怒打呵欠疲累得很。不過其實組爸組媽俾的意見幾有用, 而且有唔少都係一矢中的, 例如暗示我地唔好再分 team, 我地已經係一 team 人, 唔應該再分話你係邊個部, 我係邊個部咁樣, 應該係大家一齊做野先岩。我都好明白呢個 point, 但係事情發展到呢個地步, 有咁多人都唔願意講自己個邊到底會係點樣做個陣, 咁又點樣可以攪得到「三十歸一」呢。當好多人都鐘意自己 hold 住晒所有的 information, 或者係, 以為人地會知道所以唔講出黎的話, 咁又算係乜野呢? 點解大家一齊做野總係有咁多唔同的隱瞞的呢? 呢一層我明白, 因為我地福利部心底裡面都隱藏住一個願望, 我諗其他部的人未必會明。

其實就係, 我地想 d freshmen 覺得感激 / 感動。其實就咁聽落好似真係一個幾攪笑的希望, 但係我真係咁樣希望架, 至少, 我覺得我地做過咁多野之後, 真係可以一次過俾到所有 freshmen 佢地所有的 sponsors, 如果當初可以的話, 我想可以一次過俾晒所有的野 including 營袋。因為咁樣一次過俾佢地, 同埋當著面俾佢地, 我會覺得開心好多, 我會覺得 freshmen 會覺得開心好多, 震撼感會大好多。好過...就咁放晒係佢地間房咁樣...好無癮, 唔太 surprising。我諗佢地會覺得無乜特別添囉, 真頭係, 入到房見到有咁大袋野都唔開心, 因為佢覺得呢個感覺實在係太過似住緊酒店喇...唉, 我都唔知講乜, 總之, 唔係太想咁樣。

不過, 最後都係可以一人一袋咁樣親手交俾佢地, 雖然 d freshmen 都係例行講一句 Thank You 算數, 但係我都覺得幾受用架喇!

夜喇, 我同 Gary 傾多兩句, 講多些少聽日的流程, 就訓喇。我完全唔須要擔心陌生環境陌生床的問題, 因為一黎文質實在太舒服, 二黎我真係 SUPER 疲累, ZZZZZZzzzzzz....

(2006 註:休息到 8 月 28 日先補番的)

Wednesday, August 13, 2003

13 Aug 2003

十三號。係 O camp 前的最後限期。聽日就係四個月的辛苦成果。到底會係成功定係失敗? 無人知。到左呢一刻, 大家都係番左黎 Dept 趕工。起初係下午個陣其實都係得大約一半 OC 番到, 但係就越來越多, 到左夜晚個陣簡直係空群而出, 應番的都番晒 lu 。

我地自己福利部都好多野要忙, 估唔到, 真係估唔到。仲以為應做的之前都已經做晒, 應該都無乜野可以再 additional 咁做落去。點知都係突然之間搵到好多問題要我地去處理, 世事就係咁樣架喇。於是我地都做到九點幾十點先走。個陣時我地都好清楚, 呢個時候唔走就無機會走, 我地唔係節目行政, 唔使留到咁夜, 但係你話幫手咩? 又唔知有乜野可以幫手之餘, 我地都無執到行李一齊來, 所以都一定要走架喇。


我從來未試過係 dept 咁夜仲見到有咁多人走黎走去, 仲要係咁多人都係為同一件事而走黎走去, 我唔知呢d 係唔係團結, 不過驟眼睇落都幾眾志成城。

聽日就係喇...大家一定要努力, 做番一場好戲俾 freshmen 睇呀...無論我地之前係幾咁分化都好, 我係呢一刻都希望成個 Camp 會正常舉行, 節目部會 run 到成個流程, 行政部會 hold 到成個 camp...and many many things else

總之, may the Force be with the Camp.

Saturday, August 09, 2003

9 Aug 2003

晨咁早起身, 無非都係為左一個東平洲之旅。今次的東平洲之旅其實講左好耐, 今次終於去得成, 係真係去得成個隻。我出門口之前仲係度諗緊我係唔係發夢, 雖然東平洲都只係一個香港地, 但係唔知點解我地要去就好似硬係有少少阻滯咁樣。今次雖然只得我同 Vin 兩個人去, 但係今次意在睇景, 同埋可能因為會路途比較辛苦, 所以少 d 人亦唔係壞事。

首先就係阿爺佢自己遲到啦。佢本來唔記得帶張紙出街, 番轉頭囉, 之後就出事喇, 成船人等佢一個 / 兩個連埋我。個 guide 都略有微言架喇, 但係可以點樣? 唔係差好多者。上到船, d 景真好正, 湖光山色, 目不暇給, 永和八年, 慧風和暢 (哈哈), 天朗氣清, 陽光普照, 山也青青, 水也柔柔, 一二三四, 恭喜發財...(傻左)。

遊左一陣船河之後, 先發覺原來自己已經好耐無坐過船。個一種感覺其實有少少唔同, 唔知點解。 個導遊其實一路都係度講緊野, 但係佢俾我的感覺真係好頹, 頹到我唔係好想理佢個隻。因為佢講個d 野我都好似聽過咁, 尤其係 Vincent 不停咁話佢上去旅行社個陣都係聽呢d 說話個陣, 我覺得佢好似我 - 講黎講去三幅被。個一刻我已經覺得, 下一次就可以自己黎喇。

到左第一個景點, 就係棺材石。其實係一舊長方柱體的大石, 橫放係海邊的亂石中間。驟眼睇落, 又真係幾似棺材, 好少可見到咁得意的石, 跟住個導遊話喎, 佢後面個一d 亂石就係哭喪隊...something like that la, I don't know la. 之後呢, 就到左第一站 - 塔門。

塔門俾我第一個感覺真係好似去左世外桃源咁。四周群島圍繞, 天也藍時水也清。細小的碼頭上面, 還有著漁民拿出來晾曬的響螺, 魚乾。水上浮著的不是遊艇, 是木造的漁船。波浪的起伏令船身載浮載沉, 木板之間的摩擦產生一種已經很久沒有聽過的老聲音, 那一種聲音, 聽起來滿是令人回想還是以漁農為生的老香港。

經過塔門的老街, 就走到天后廟前面。其實天后廟無乜野, 都係廟一間, 聽聞話神檯的底下可以通到塔門的塔定係門, 都唔記得, 聽起上黎好似幾得意, 不過係唔係真呢? 就唔知喇。

跟住我地就到大草地。一大片開揚的草地係山坡之上, 外面就係西頁同埋長長的石灘。我一見到個景就覺得好靚, 好值得我去影相, 於是我就即刻怒影。其實下面仲有一個 Cliff, 但係因為個斜坡太斜, 所以我唔係好敢向前行黎睇清楚, 莫講話影相。之後就到呂字疊石, 好正, 估唔到有咁勁的石, 點知原來唔會同我地落去, 咁都無乜癮, 下次要自己黎, 仲要自己落去, 咁先好玩。

後來就係一間頹餐廳食飯, 味道都 ok , 但係明顯地係頹野, 雖然我好鐘意食墨魚丸, 但係做餸好似頹左少少。不過我都係照食, 反正我都係乜野都食。食飽飽之後, 我就開始周圍行下, 因為我想好似 Vincent 咁樣坐係度郁都唔郁咁。反正一場黎到塔門, 點解唔周圍睇下呢? 走走看看也好。

影多幾幅相之後, 飛奔去上船喇。成程船都好多野睇。

首先, 就係離開塔門的景, 我就照左一幅喇。好快就到左「孝子遙望棺材石」的「孝子」喇。出左大海, 就見到有一個好 regular shape 的 stack, 真係幾圓下。導遊話, 呢舊係獅子戲球的球, 又真係幾似喎。不過, 最令我覺得非常之 impressive 的就是赤洲。

赤洲其實只係一個小島, 小小的島上有三角錐體的山。我睇見的應該就係赤洲的東面, 非常 impressive, 令你一見難忘, 成坐山都係紅色的, 坡面直直的, 好似一塊二塊巨型鉆板斜放係山上, 幾乎睇唔到有曲線。係東北角, 仲有一個好震撼的大海洞, 雖然今日烈日當空, 晴空萬里, 但係裡面睇落就好似係另一個世界咁樣, 完全見唔到裡面有乜野, 深邃得令人膽怯。但係總括而言, 赤洲真係好強, 好"近", 令我好想好想去下。

東平洲...唔知係唔係因為之前自己太過想去的關係, 於是就睇定好多資料性的野, 尤其係 photos, 又可能係因為個一d photos 太過靚, 影得太過逼真, 所以我去到的時候, 明明係見到好多奇石, 但係都無我自己想像之中咁驚喜若狂...奇怪。Anyway, 見到一個咁 spectacular 的景色, 係人都會嘩嘩聲。如果呢度唔係咁多咁多咁~多~人的話, 我覺得我會更有 feel...多人多到好似大嶼山咁, 即刻無晒 feel.

更樓石..比想像中的細小, 不過都已經係幾得意下。海蝕平台, 幾壯觀下, 好少見到咁樣一排排的石頭。好想留多陣, 好想周圍無人...唉。難過水, 真係好難過, 過唔到你仲 "難過", 就好似 Vin 咁, 佢因為對鞋太過唔掂, 所以唔係好敢過。無辦法, 我唯有衝過先。過到, 但係等佢等左好耐, 無辦法, 我明白佢對鞋唔係 for 行山。

都無乜野喇...番到中大之後, 就去左眾志食 tea, 唔夠飽都無所謂。再番去 dept, 睇一睇下 d sponsor 放得好唔好, 見到咁多袋 sponsor 咁鬼壯觀個樣, 真係開心過見到東平洲咁多石頭排晒出黎呀。

夜晚, 我同 Family 係 Marco Polo 食 buffet, 開心死, 真好食, 食到肚爆先出黎。阿媽仲因為食夠次數所以 book 到間房, 免費的, 開心, 我踢走阿爸同細佬, 同阿媽係酒店訓, 超正, 正到無倫, 一訓落床就不省人事, 太舒服, 自己亦都太過疲累喇。

Friday, August 08, 2003

8 Aug 2003

八月八號, 晴.....梗係晴天啦, 晴到飛起添呀, 我成條頸成塊面都晒到紅晒傷晒呀~~!

八月八號, 唔算係「Longest day in my life」不過都算係「Very long」

八月八號, 今日係中大的 Reg Day, 亦即係今年新入黎的 Freshmen 要係今日番黎中大做所有register 的工序, 以証明你真真正正成為左我地的一份子。

今朝一早就要起身呀, 因為我地要九點鐘之前就要番到中大去 prepare 呀。我本來起到身既, 但係到後來都係唔多頂得順, 一個唔覺意照訓番。大獲喇, 竟然訓番。一醒就係八點, 死得。飛到番中大個陣已經係九點, 我自己直接飛上本部, counter 岩岩開左無幾耐。

一入到中大就已經 feel 到個種熟悉的感覺....個種勁眼訓但係又要做野又下意識地走向巴士站搭巴士去唔知邊度的感覺。我上年的頭半年都係咁樣生活。唯一今日唔同的係, 有一段為每一位 freshmen 而設的錄音, something like 歡迎各位新生, 今日, 係中文大學的新生註冊日, 各新生可以前往巴士站乘搭校巴前往本部的潤昌堂辦理註冊手續.....

一聽, 我就 remind 左自己, 原來我已經過左一年....原來我已經係呢度不知不覺, 無聲無色咁 pass 左一年, 原來, 原來我已經係 Year 2, 唔再係無知的 Year 1。原來我已經...

變左做無知的 Year 2~

到本部, 拿起塊星星牌, 就跑到前線做所謂的 「Juno Fans」。見到對面的大 O 的人不停咁跳舞, 真係幾好笑, 個個都係度頹跳咁樣, 頹成咁就咪鬼跳啦係, d 音樂已經不停重播勁煩架喇。講起音樂, 個面中文系馬不停蹄咁不停不停不停~咁重播王力宏版的龍的傳人...聽一次都已經好夠, 仲要不停咁重播, 我真係想死, 你又唔係有恆心到不停咁跳營舞喎。好彩我地無癲到不停咁播 LA LA 世界, 如果唔係我一定會走人唔做落去, 怯爆。

其實係最前線要 spot out 到d freshmen 都唔係好容易架。有好多時佢地都唔會貼上左我地專用的粉紅星星貼紙 (其實我都唔會好想貼), 於是就搵唔到佢地係邊度。有好多 freshmen 係問佢地係唔係讀地資系, 一個二個都唔想答你咁。做乜野者, 讀咩野系好失禮你自己咩, 講都唔肯講。唉。雖然...我都唔係每個場合都唔怕人地知道我讀 Geog 的。

點解咁少 freshmen 架呢? 點解係個邊黎架呢? 經其他 OC 冒死查探之後, 發覺原來大 O 班人竟然完全視中大戒條為無物, 係 RRS 後面當街當巷拉客, 之後就威逼利誘佢地前往大 O 的 Tent 底下, 引誘佢地寫話要參加大 O....乜你地咁樣架, 做埋d 咁樣的事, 咁即刻擺明持住自己係大 O 就恰我地呢d 細小的 dept 者....咁你唔好去死, 咁樣玩弄我地之餘又玩弄我地d freshmen。

今日真係好熱好熱。個太陽完全不避嫌咁狂晒住我。無錯, 我係鐘意同陽光玩遊戲, 但係都唔係玩到成塊面成條頸成對手臂都燒熟左咁樣架, 下嘩?! 簡直係乾煎。企左好耐, 又晒左好耐, 我真係頂唔順, 走番 counter 幫手。其實都係一樣咁晒, 因為我唔會入去個 tent 裡面幫手架嘛。但係可能因為要做多d 野, 唔使企定定係度, 又可以走黎走去, 所以咁晒都唔係咁覺得, 起碼我覺得因為工作量大左反而俾齋企係度舒服得多。但係其實一跑, 就知自己好辛苦, short of breath 的情況好嚴重, 我幾乎好似asthma 發作咁樣, 對手禁住對 knees 係度索晒氣, 成頭都係汗。我不嬲都唔跑得, 一係跑得慢, 一係索晒氣。今次明顯嚴重左好多, 唔知點解, 可能係因為晒親, 可能係因為太累, 可能係因為唔夠訓, 唔知。

好不容易先挨過左成個 reg day 時間, 有兩個 freshmen 唔知因乜野事無到。所以我地就係度等佢地喇, 一個唔係好大的塑膠 tent 底下堆滿左十幾廿人, 係三十三度的氣溫, 十二時正的烈日當空底下, 四周無風...你都咪話唔死得人多, 好在大家都身體好, 如果唔係, 我諗好多人都已經中左暑。「正所謂有大鼠小鼠, 唔大唔細囉喎, 就梗係中鼠 / 暑啦。」

等左好耐, 個兩個 freshmen 到最後都係唔到, 咁我地都唯有鳴金收兵。我地番到 dept, 終於有好強勁的冷氣, 可以令我呢個灼熟左的燒豬仔逃離烈陽無情的陽光, 最重要的, 係我可以飲到水。因為係碧秋的水機已經賣晒, 乜都無得飲, 我已經渴左好耐, 個 throat 乾到好似就黎裂開咁, 唉。皇上竟然肯買野飲俾我地, 唉, 都算佢識做喇, 開心, 飲野, 大家又試坐晒係 Dept 的電梯口個度排排坐地下, 合法集會。飲多幾飲, 開始覺得無聊, 自己一個人番到三條二嘆冷氣。跟住係李慧珍食飯, 最驚係突然間見到阿培係出面坐低左。我地四個都立刻怯爆, 又係佢, 唔好喇卦。佢個次係火車個度已經嚇死我同 Wendy, 今朝又係度攪到成個 Reg Day 的 freshmen 都俾佢嚇走晒....唉。都唔知佢係 dept 之福定係 dept 之禍。總之驚左佢。

跟住, 就係全日最令人手足無措的一節。我地食完飯準備吹水之際, 祥興就打黎喇。突然之間話佢地已經準備好所有野, 叫我地得閒就可以上去囉喎。咁就大獲喇, 聽日我要去東平洲, Queeny Wendy 都唔得閒, 後日呢, 星期日, 星期一呢, 都唔得閒, 得閒個陣祥興都關門了, 到星期二就已經太遲喇。咁唯一的方法就係今日立刻去深水步走一趟, 立刻攪掂成件事。

於是我地就飛奔番去三條二, 個度d 人聽到咁突然的消息都呆左。佢地都呆左, 我地福利部咁切身的聽到個陣你話呆唔呆。問到桃姐借架車仔之後, 就飛到深水步, 點知...原來佢地仲係度拆緊箱分緊野。咁樣我地就唯有係出面周圍頹行一陣先喇。我仲帶左 Wendy and Queeny 去睇下 Kawaii Shop, 帶佢地睇下我最愛的 Garfield 精品添!

番到祥興, 一睇, 死喇, 原來個個箱都勁大個, 個個袋都超大個, 用呢架車仔都好難拿得晒, 仲會好難 manage 個隻, 咁樣唯有叫下車, 跟住好在仲有祥興的 Sammy 幫手抬一抬, 如果唔係一定搬死我地。上到車, 先覺得可以鬆一口氣...原來真係好多好多, 個 size 完全唔係我地可以應付得到。

番到中大, 以為一切完結, 點知唔係。

我地坐低晒係地下個度點貨, 點清楚係唔係有咁多件衫。攪左好耐「力的表現」之後, 我就知道我地要開始做 pack 箱的野, 因為今日同時 Tabasco 都送左佢地的 sponsor 黎...佢地簡直係 sponsor 之王, 全場主力。難得皇上係度幫手, 你知喇, 佢咁「高高在上」喎。做左好耐野, 大家都一齊係度流水式作業, 似足工廠咁, which the Exe. Board 好鐘意。跟住, Gary 打電話黎催左兩次。到最後佢真係頂唔順, 一定要有人幫手係 CU 抬個副 Hi-fi 去青衣先得。咁我又唔識得去佢個一個地方喎, 於是就搵 Gladys 幫手, 咁我地又唔夠手喎, 又要 Wendy 幫手喎。咁我地就跟足Gary 的講法, 先去上水, 再搭巴士就到喇。

好, 出發。原來套 Hi-fi 都唔輕, 咁得我一個男仔, 當然就係我拿最重的一 part. 落到去火車站就已經幾累下。之後到上水, 我地完全茫無頭緒要去邊度。落左車, 就打電話俾 Gary 喇, 咁佢話係上一條天橋再落 escalator 喎。咁係我地面前就有一條天橋喇, 咁我地咪上囉, 都知去邊度。行完一陣, 就見到有巴士總站, 就落車囉。點知問問個站長, 佢話唔係呢度呀, 要上天橋過對面先搭度呀。我心諗, 我地咪就係係天橋的另一面黎架囉。個時已經成身都係汗, 抬住部 Hi-fi 真係辛苦死。但係一諗到我地時間緊逼, 成個節目部的人都係度等緊, 我地要「救」佢地, 就唯有行快兩步。我地走左好耐左後, 成身都濕晒, 好辛苦, 之後就衝左入去商場, 心諗實無死喇, 呢度有個咁大的巴士總站, 一定會係呢度。落到去, 真係見到個架巴士喎, 我地都好開心, 飛到落去, 心諗今次終於可以休息一下。一睇, 衣, 點解去荃灣既? 唔係總站去青衣架咩? 一睇, 真係無去青衣架喎。咁點算? 打俾 Gary 之後, 先知原來記錯巴士 number...唉, 我個一刻真係想死。Hi-fi 個蓋都唔知點解都裂開左喇。問過個站長之後, 佢又話「係天橋的對面, 你上番天橋過番去對面就係架啦」我聽見呢句之後更加覺得好辛苦好不滿, 點會咁架。好辛苦再上天橋, 對手已經斷開咁濟, 過左一半, 我地不停咁問人, 之後終於係一個完全唔同的地方搵到個車站, 上車, 走。唉

好辛苦。我地成程車都係度怒數節目部, 不停咁怒罵佢地。我地知道, 當我地去到個陣, 都已經差唔多係十點, 到左都無乜用。唯今之計, 就係要節目部幫手抬番部 Hi-fi 番中大。亦因為咁樣, 我地更加唔想理佢地的生死。後來我地係 KFC 食野個陣, Gary 打電話黎, 話其實都唔關節目部的事, 因為節目部根本就唔知道 Book 場的事。所有 Book 場的事都係行政部的事, 係因為行政部同埋節目部的溝通不足所以先攪成今次咁樣, 而我地就一味以為係節目部攪練舞而竟然乜野都唔知道 and 無準備。唉, 其實今次節目都錯唔晒, 好多時就好似今次咁樣, 其實係行政都應該負下責任。今次其實我所聽聞, 係阿 Rose 應該會負責呢件事, 縱使 Fione 已經知道個場係無 Acoustics 。我聽完呢件事之後, 就第一時間諗到, 係呢個時勢之下, Rose 最好走番出黎交代成件事。如果真係佢做得唔好的話, 我覺得佢好應該道歉一下。至少, 起碼可以令節目遲d 唔會有乜野話柄話番行政部。行政既然咁樣認為自己係眾部之首, 好有必要事事立起一個榜樣。其身不正的話, 就好難怪其他部做得唔好。自己都唔肯公怖做過乜野的話, 就唔好話人地無公佈做過d 乜野諸餘此類。如果行政視自己為眾部的中心 / 重心的話, 就更須要做得更公正同埋中立。呢一次, 其實我都唔知邊個係對邊個係錯, 但係我知道, 我地一定已經無乜時間再去爭吵一d 無謂野。與其真係係度爭吵一d 唔需要爭吵的項目, 不如大家一齊化不滿為力量, 係最後呢幾分鐘的緊張時刻, 大家真係要純為 freshmen 著想, 唔可以再點樣點樣架喇...咁樣大家先可以做得出一個完滿的 O camp 架嘛...

希望...一切如願啦。

Wednesday, August 06, 2003

6 Aug 2003

今日放榜。中五中七都係。

平時我或者我會擔心Simon 多過 Winston。不過今次呢, 唔知點解, 我淨係有少少緊張 Simon, 好似預左佢一定會入得到中大囉。反正馬馬呢, 我就覺得佢表面上好似諗到自己想點樣, 但係內裡其實無乜頭緒咁樣。尤其係 Simon 個成績好過馬馬好多, 所以我覺得馬馬就算係已經預左要遠卦西洋, 佢都可能係呢一刻唔係好識得為自己算。

一切都如我所想, Simon 果然成功了。雖然我知道佢真係好想做醫生, 好想好想個隻, 但係無奈佢的成績真係唔係有神助, 無辦法。我果時望住佢個成績單個陣, 我心裡面都係度想「我唔想唔想」。但係點樣唔想唔想我就係諗唔到。至於佢自己嘛, 我不嬲都唔知佢係度諗緊乜野, 所以 even 佢話俾我聽入得到 Nursing 咁退而求其佢都 Happy 的時候, 我都唔知信唔信佢好, 我都唔知佢係唔係真係開心。

輪到馬馬。慘了。我本來仲希望佢會得到一個唔錯的成績。可能係十四呀, 十六呀咁, 係入唔到黎, 但係都唔會係好差個種囉。點知, 十分。我都呆左。我即時諗到, 好在佢仲有一個後門走 - 去外國, 如果唔係我諗佢都唯有 Repeat. 我問佢點, 佢好似都唔係好知自己想點咁。我明白, 每一個人係呢個情況之下都會唔知點算好架喇。比著係我都唔例外。 好在佢唔使在係香港留低咁樣囉。如果唔係佢會仲麻煩。好在佢都好似唔係一個非常介意的人, 佢又好似一早預左會有咁樣的成績, 咁我當然就係少說話多鼓勵喇。我一直對馬馬都有一定的信心。佢份人游水咁鬼勁, S. 1 到 S. 5 都係 Gold Medallist. 佢份離校推薦書不知寫得幾靚, conduct 又高, sports achievement 又成功, 不愁無學校唔要佢。但係佢最後都係要左係李潤田 Repeat, 咁樣呀...都好呀, 我話, 反正佢都係用呢幾個月係度 hea 之嘛, 無所謂喇。

聽聞今年張記個成績真係唔係幾好, 好多人都有單位數字的分數, 有好多人都唔知點算好。俾著我囉到咁低分的話, 我都會非非非常之徬徨。

Tuesday, August 05, 2003

5 Aug 2003

今朝好早就飛起身番中大, 因為之前個晚 Rose 打黎話要人幫手搬 Social Science mark 到的 Sponsor. 雖然我其實真係唔多想去, 但係無辦法, 佢又咁樣「威逼」我, 又好似真係無人咁樣喎。咁咪去幫下手囉, 反正我都係要番中大去開會架喇, 早少少, 唔所啦。

番到中大呢, 就幫手搬野喇。其實我見到有咁多其他 dept 的人有咁多人, 我地個 Social Science 得個三個人仲要得我一個男仔...唉。我唔想搬都係好自然的事。

其實只要有一架車仔, 搬八箱野都唔係問題。人類的智慧真係勁, 咁厲害的工具都俾佢發明得到, 可以一個人運送八箱野。

Monday, August 04, 2003

4 Aug 2003

今朝起身, 見到阿媽攤左係廳中間, 收音機開著, 佢就毫無起色咁訓著左。佢迷迷糊糊咁同我講我細佬發燒, 我入到房個陣見到個細佬面向下無蓋被咁倒在床上。成個 scene 都好恐怖, 一個阿媽倒在廳中間, 一個細佬面向下咁趴左係床上, 十足十兇殺案現場, 一早起身就見到d 咁的場景發生係自己屋企, 你都咪話唔虛驚一場。

阿媽細佬都病左, 我唯有唔出街。但係呢, 其實佢地都唔似係好須要我 take care, 尤其係個細佬, 佢直頭想打機。無錯, 佢係有少少發燒, 但係都唔似係病得好重個種。所以嘛...佢有朋友叫佢去游水個陣我都唔係咁俾佢去。當然喇, 我希望佢唔係病個陣就會去番游水喇, 佢身體好差下呀, 做乜野運動都好過無喇。

跟住全日都係度頹, 唔知有乜野好做。最唔開心係打 TR, 呢個蘿拉真係超超超超難控制。好明顯今次 Eidos 做得好唔掂, Control 方面成為極大的問題。Inventory 去左邊? 無人知。我都搵唔到, 玩唔掂。咁多集TR, 第一集唔計, 處女下海, 做得唔係咁好係好常的事。更何況, 第一集其實真係唔錯, 如果唔係都唔係有第二集更強的 TR。第五集, 好明顯係來硬黎, 唔係咁好玩, 但係都好過無。今次第六集, 我除左 Graphics 靚左, 人的 Design 又靚左, CG Smooth 左好多.....唉。我唔明點解 control 呢樣咁緊要的野, 係成個 TR 的神髓, 竟然攪到咁~~~ 爛...

唉, 好灰, 唔想再玩落去。我好少可會因為真係唔好玩而唔玩。如果係因為我過唔到關, 諗唔到點攪, 我會試, 我會搵方法。但係如果係因為我完全唔想玩, 咁呢個 game 就真係好失敗。天呀, 我最愛的 Lara Croft 竟然俾 Core and Eidos 班友攪成咁。心痛兼心淡。






其實我還沒有為你的來電而開心過
我們只是鬥頹, 是嗎?

soy no entiendo, si, soy verdaderamente no entiendo...

我這苦心開過沒有
但試過散心旅遊如何答沒有
閉起雙眼我最掛念誰
眼睛張開身邊竟是誰
感激車站裡 尚有月台能讓我們滿足到落淚
擁不擁有也會記住誰
快不快樂有天...總過去
愛若遺了永不失去
誰勉強娛樂過誰
愛若難以放進手裡
何不將這雙手放進心裡

Thursday, July 31, 2003

31 Jul 2003

今日係遊完澳門的第二日, 成個人都散晒, 仲未恢復完氣。今日仲要開一個 UC GRM 的會。個會一開始就變左係 O' Camp 大會, 大家都係度掛住交代番晒 O' Camp 各部所做過的事。之後就開始講番 UC 的事。大家都諗唔到有乜野可以送到俾 freshmen, 不過送木牌的 idea 都唔錯。

開會之後, 我地就去左 Pacific Coffee 再吹水。第一次去 Pacific Coffee, 真係幾好, 不過成個金魚缸咁, 就好似唔係幾好。呢間 Pacific Coffee 就真好多好多野玩, 又有電腦, 又有 PS 2 打, 又有得捉棋, 超大副西洋象棋, 仲有成個 magazine corner, 又有 Sony Wega 的 Corner....真係乜野都有, 似豐澤俱樂部多過似 Pacific Coffee。仲有個杯貴到媽媽聲的 Iced Chocolate, 好飲, 仲好肥。

跟住去 Causeway Bay 拿考牌証, 都無拆開過睇下有乜野就走人, 睇都唔多想睇下係乜鬼野。唔知點解突然無心機到咁。

夜晚組聚, Queeny 突然間唔黎得。Wendy Rose Queeny 三個最吵鬧的都唔到, 我都好驚個組聚會悶左好多。後尾先發覺, 其實我地個個都係好好笑, 淨係睇下阿爸阿媽都已經夠好笑, Eva 勁似飲醉酒, 浩賢又繼續一樣係傻傻地...

都幾美好, 都幾開心。

Wednesday, July 30, 2003

三傻遊馬交之二 30 Jul 2003

三傻遊馬交二之二

講明七點半起身, 佢地都好似起到身, 但我就完全無咁的能耐。Even 我到最後遲左好多先起身, 但係都係好眼訓。無計, 一次唔夠訓, 好多次都補唔番。起身之後就去左樓下食酒店的自助早餐。兩人房三人食, 於是要俾多一個人的錢, 即係五十蚊。好得人驚, 一入到去見到d 野食, 明顯地係你唔會俾五十蚊去食既。算喇, 諗下仲有兩位係免費架喎, 就咁算喇。

都算喇, 唉。我依舊食超級多野, 可能因為尋日係太陽底下曬左足足一日, 曬到個人 Vitamin D 就大把, energy 就無晒。食飽就行行行行行左好耐先到賽車博物館。整棟大樓係賽車同紅酒博物館連埋一齊。我地先到賽車博物館。

其實我覺得賽車博物館真係唔夠大, 雖然 Eric and Wilson 都覺得佢已經夠大。我見到有唔少車, 但係好多都唔係真係咁靚, 不過又係「旅行心態」作祟關係, 都覺得好好睇。反而紅酒博物館, 未去過就可以去一去, 去過一次就絕對唔使去下一次。其實兩間館都係, 不過紅酒博物館的情況比較嚴重。可能我今日精神真係差左好多, 所以心情亦差左少少, 講野都少左。

遊完呢一程, 澳門之遊都差唔多喇。番到酒店, Wilson 趁機再番葡京一轉作最後的戰役。真係想整首周杰倫過佢~ 我同 Eric 呢, 就出去頹行多一轉, 我就趁機等自己熟路一下。行左足足兩日, 我第一次去 concern 下自己到底行左去邊度, 真係打起精神去理下d 路, 攪清 d locations。我都覺得自己犀利, 攪清d directions and locations 之後, 不久我地就行去議事亭買手信個陣, 我就見到Eric 以為自己行錯路, 轉方向再行, 先真係行多左路。

鉅記手信已經幾乎係大會指定。估唔到的係我會肯大破慳囊, 買左三個人之中最多的手信....當然, 十之八九都係俾自己食算數。HEHE~~~

之後係新八百伴食最後的午餐, 好好食, 又食到好飽好飽。然後就怒奔走去碼頭, 飛奔到船上。船上仲見到一個好恐怖東史郎, 好彩唔係坐佢隔離。

番到香港水域, 第一次打個電話俾部主, 問下拿 sponsor 的事情弄得怎樣, 好彩唔重。番到屋企, 簡直係成個人都散晒。聽日仲要 UC GRM 開會, 唉。






我覺得, 瘋狂左兩日之後, 我的心情或多或少都好左好多。好彩呢個旅行來得及時。好多時, 同佢地兩個傻佬一齊, 講下廢話, 吹下水, 真係幾開心幾放架。難得可以係另一個地方開放一下自己的心靈, 真係唔錯。

總好過, 係香港, 自己一個人, 自己一個人係度亂諗野, 越諗越唔開心個種嘛。

衣家聽緊一隻歌, 係陳奕迅的「兄妹」, 好好聽。我就無鐘意任何的「阿妹」, 但係覺得呢隻歌的歌詞真係幾 touch 我。反正佢自己本身都幾好聽。連埋十面埋伏 and 安哥之歌我都好鐘意聽

Tuesday, July 29, 2003

三傻遊馬交之一 29 Jul 2003

三傻遊馬交二之一

好耐之前, 都已經同幾個中學同學講過, 一齊去一次旅行。經過好多波折之後, 變成左得番我同 Eric and Wilson 三個人。最後就變左三傻遊澳門。

八點鐘船, 上環港澳碼頭, 於是為安全起見就要七點三就出門口, 六點九就要起身準備。對於我呢個「一點不露」的人來講, 早左六個鐘頭起身簡直就慘過要我去死。不過, 到最後我都可以起得到身, 仲要係第一個到達信德中心的人, 強者也~~

之後 Eric 都到喇, 我地一齊係度食緊麥記的早餐。一直以來, 我地都無懷疑過 Wilson 的起身能力, 我更強以為, 近來約佢佢都少左遲到好多, 應該會有改善啦。所以我都無打電話俾佢, 縱使係佢以前的「紀錄」何等差。不過, 今日我真係做左一個好錯的決定。我成七點三, 當我覺得 Eric 都食緊早餐, 當我覺得有不祥預感, 最好打個電話 confirm 一下的時候,...就出事喇~~

船呢, 就一定八點開, 唔等人架喇, 比起飛機更加唔等人, 即開個種, 因為有太多人係度排緊 Stand-by. 所以, 無論如何, 都一定要係七點九之前, 入到閘。如果唔係, 就要補多好多錢坐下一班船。所以當我一打去 Wilson 度, 聽見佢把聲咁鬼頹, 個 background 咁鬼靜一d 地鐵應有的噪音都無個陣, 我就知道「今次 PK 喇...」佢好滋悠咁問我家陣幾點, 我話七點三, 佢仲竟然反問我 ARE YOU SURE~? 我好肯定佢答佢係, 佢話, 我即刻飛黎。

噢。七點三, 你係西灣河, 早晨呀。我地七點九上船, 係上環。不過我地的船飛都係你身上喎。

好難得咁, 我地的劉公子肯用佢八十幾蚊搭的士飛過黎。佢好肉痛, 八十幾蚊, 仲要飛地鐵沿線, 佢個樣又殘又亂, 根本唔使講你已經覺得佢勁想打人。

到左澳門, 第一件事就係搵路。今次我完全唔理佢地去邊度, 反正一開始 Eric 就安排好晒, 我就好放心咁由得佢幫帶路...佢黎過澳門五次喇嘛。我信晒佢喇。

第一度, 我地就搭巴士去到議事亭。之前, Eric 係碼頭出面拿左張 leaflet。一睇, WOW~, 全部都係唔出得街的野, 例如 冰火九重天加毒龍鑽做足一個鐘一百 only. Oh my god. 我睇見都呆左, 佢兩個就勁興高彩烈。我地去到議事亭之後, 就行上去大三巴。太陽真係好猛, 不過, 因為被到貴境, 所以樣樣都「比較」新奇。去到大三巴, 睇過前前後後, and 天主教紀念館, and 骨室等等。雖然老實講都係幾普通的野, 但係我都抱住一個「去旅行就乜都睇」的心情, 所以都睇得幾開心。

好自然地, 就行到去隔離的澳門博物館。入到去真係好多野睇, 抱住呢個 traveller 的心情, 就會樣樣野都睇得好耐, 亦都好似好新奇咁樣。上面個一層有一個芳艷芬展覽, 我連佢個鳳冠都睇左好耐下, 因為真係幾靚。之後, 就出左去大炮台, 又係紅紅烈日之下行左一大個圈, 影相。之後就怒行, 行左好耐好耐, 都係為左搵野食, 又行前, 又行後, 左左右右, 先搵到一間以前食過的台式 restaurant. 又係小泉居的分店。咩叫小泉居呢? 小泉居就好似香港的仙宗林 / 仙跡岩咁樣, 係一個台灣的小茶居, 個一度就好似一個餐廳咁囉。小泉居的野飲真係好平, 係香港買一杯珍珠奶茶, 都要成十八蚊細杯, 小泉居呢, 八蚊就大杯, 六蚊就細杯喇!!! 好平呀! 真係想怒飲~~~

之後就夠鐘番酒店 check-in, 放低行裝, 頹一頹。再出發搭巴士仔去黑沙灣, 五蚊車錢搭左成半個鐘都有, 抵到爛。黑沙灣...d 沙果然係黑色的, 幾得意呀, 不過唔係全部都係黑色, 近海的先係黑色, 近岸的就係普通的沙黃色。我都唔知點解d 沙會係黑色的, 我都好想知, 佢兩個傻仔就一味講廢話, 咩 heavy industrial pollution 呀, 大亞灣發電流出黎的 radiative pollutants 呀, 珠江數十萬人排出黎的 manure 呀(仲夠膽拿上手?!)....唉, 兩條傻仔。

跟住, 我地就沿住沙灘漫步。好奇怪, 唔知點解沙灘邊會有咁多好大舊的花崗岩。應該係地盤工人搬過來的。我執左兩舊石, 都係好似原始人用的矛頭, 細細塊幾得意。不過, 最奇怪的是, 我見到有一大塊銹紅色的石。當初低頭一睇, 以為係一舊生銹鐵。點知近近一睇, 好似係石頭喎, 好奇怪喎。拿起黎 examine 完一輪之後, 肯定係石頭喎。點解會咁呢? 點解會咁似一舊生銹鐵既呢? 雖然 Eric 同 Wilson 兩個衰人係後面不停咁揶揄我, 但我都費時同佢地一般見識, 繼續睇石。我試過放佢落海水洗洗, 但係無乜表面污糟野, 亦唔見有類似鐵銹咁的東西洗得出黎。試過用「石矛」挫佢, 好易碎, 簡直幾乎係用手都可以搣碎一部份出黎個種。咁 brittle, 我即刻停止左搣佢。Take 一個 close-up look, 原來係由好多好多細石痴埋一齊的大石一塊。我即時諗起 conglomerate / breccia, 我起初就以為佢就咁樣一舊我認為「低級」的石種喇。點知, 細心一睇, 原來佢仲有一層黑色的野。咁樣 distinctively 有一層, 就明顯係 any kind of sedimentary rocks 啦喎。咁樣就「高級」左唔少喇喎。不過...咁樣兩隻 mix 埋一齊, 仲要係黑還黑, 紅還紅, 仲要係明顯的鐵銹色, 即係含鐵量極高, 不正常地高。真係咁樣的話, 我諗呢舊石作為紀念也好, 拿回去給伍世良問下又好, 總之拿回香港就幾好喇, 係咪? 於是我係佢兩個一片錯愕的恥笑聲之中拿起舊石, 用 Eric 給我的膠袋袋好, 放入背包決心帶回香港。

然後, 大家就繼續在黑沙灣上面漫步。行到我地三個人都好累的時候, 我地坐低左係度休息。玩玩下, 竟然玩起沙上黎。起初都係佢地兩個用沙埋下我隻腳 ( 註: 我無除鞋, 佢兩條友, 打得少...) , 然後就開始用沙作武器, 最後.....好似三個大細路咁樣勁掟沙, 掟到手又係, 腳又係, 鞋又係, socks 又係, 衫又係, 褲又係, 底褲到係...天呀, 黑色架d 沙~~ 如果係沙黃色的話, 咁都可以話「同肌膚最親近」呀, 出番澳門係條大街上面行都無咁騎呢。一身都係黑色的沙...好似係屎坑爬番出黎咁, 陰公。仲要係成廿歲仔都玩泥沙, 仲要唔止一個, 唔止兩個, 係三個, 玩到興高彩烈個隻。

等車等左好耐先等到, 離開路環, 就好「乙水」仔。第一件事, 就係食一件地道的葡撻。果然好食到飛起, 不過佢地嫌太甜。行左一輪, Eric 都唔知自己想去邊, 我話去邊都得喇, 你帶路呀嘛。於是我地就去左大利食豬扒包喇。不過好可惜, 豬扒包已經賣晒, 只係得番豬扒多士。豬扒多士? 唔係化, 仲有無豬扒漢堡呀, 豬扒蛋糕呀, 豬扒蛋撻呀, 豬扒梳乎里呀等等。唔使喇, 一個豬扒多士都夠喇, 太多豬扒受不了, 中大已經有大把, 日日見。不過呢個「食得的」豬扒多士, 依然係好好食, 不負大利的名聲。食完之後又係吹水時間。吹完, 本來想去荷蘭花園, 點知突然發神經, 以為自己唔見左個銀包, 因為我唔應該無帶自己的身份証 , which is inside the wallet, 出去架嘛。為安全起見, Eric 同 Wilson 就提議即刻番酒店....反正佢地都好似唔係好想行咩咩荷蘭花園。

個半個鐘頭車程, 緊張到我死呀。我好耐未試過咁緊張, 緊張程度, 幾乎比得上比賽( 任何賽) 企係跳台上面, 準備起跳個陣一樣咁辛苦。好在, 之後都係酒店房裡的書包搵得番。原來係自己諗住出澳門唔係咩危險地方, 就係銀包抽起身份証, 放低無錢的銀包走人。舒一口氣之後, 又到左頹頹時間。大家一齊很累地頹到七點鐘, 就出發去澳門墟。

澳門墟位於澳門旅遊塔之下, 有少少似以前冬季嘉年華的「沒有機動遊戲版」兼縮水版。整體上創意真的不差, 很好。但可能因為範模實在太小了, 所以對我們三位香港客來說, 沒有甚麼的吸引力。溜躂了一會兒之後, 就走了。其間還 took 了很多 photos.

走到半路, 看見了一個大大的噴泉。我立時想起在 The Amazing Race 3 裡面看過的大噴泉, 那是其中的一個 checkpoint, 該是瑞士吧。實在太相似了。大噴泉就是一條由南湖灣中噴出的一條大水柱, 直射上天, 大約也有十數層樓那麼高, 剎是壯觀耶。旁邊還有幾個小水泉, 伴著彩色的燈光, 還有從大喇叭播出的柔和音樂....一切都是那麼的好。其實要是這一刻不是那麼熱, 那麼大汗淋漓, 更不是和他們兩個傻仔來的話, 肯定會變得很浪漫。

再走了很久很久, 走到人也緊極了, 就到一所叫做陶陶居的酒家吃飯。外面的橫街有很多很多的手信店, 負責兜售的阿嬸全部都「賴係」熱情咁樣叫你黎試下肉乾, 試下杏仁餅。老實講, 你整得好少少, 你個鋪面唔好咁頹, 你唔好捉實我隻手唔放, 叫極都唔放個隻, 咁樣我都會考慮試下, 不過你地衣家咁樣...唉。最後拿拿聲入酒家避開呢班恐怖的人。

坐低之後 Eric 負責叫野食。包括叫左「老虎拼盤」同埋「蒜子風扇煲」...極度笑爆咀。好好食, 我食到好飽好飽。去埋議事亭的小泉居買三杯野飲, 攪掂, 番酒店。Wilson 呢隻賭徒就去葡京搏殺, 我同 Eric 就番酒店「洗呀洗呀洗澡澡, 寶寶金水少不了...」諗起起 Wilson 唱呢隻歌, 真係毛管都動。個 BB 係廣告唱我已經滴晒汗, 由Wilson 呢個老而不唱....唉~~~~

成晚 Eric 都勁黑仔。首先係小泉居的飲品掉左落地, 都算啦, 有個 thermally sticked 的膠蓋架嘛。穿左, 即刻穿左, 流到成地都係, 酒店的地毯全部索晒, 成間房都係荔枝味。超得意。Eric 要搬開d 本來已經拍埋左的床, 抹一抹個地下, 搬完d 床之後, 兩隻鞋都「sip 」左入床下低, 佢點拉都無力再拉開張床, 我沖沖下涼都要出黎救佢。我沖涼個陣, 酒店俾我地的包裝 Bathing foam and Shampoo 都搣唔開。我要試另一包, 得左。點知到 Eric 沖個陣, 剩低的包包全部都開唔到, 超慘, 要用佢自己支 Clean and Clear 黎沖涼。用洗面泡沫黎沖涼, 都真係第一次聽。其實個包野真係好騎呢, 我用浴室的晾衫繩咁粗糙的野鋸開佢....都鋸唔開佢, 你話, 幾離譜。都仲未計 Eric 哥對間房有幾多幾多的不滿, 煩到我同 Wilson 都話唔使咁煩。

半夜, 佢兩個仲想玩, 我已經眼訓到死。訓得個三個鐘, 係人都唔夠, 佢地鐘意玩就玩, 本少爺要覺覺豬。於是三個大男人訓兩張拍埋的單人床, 大家用越講越頹越眼訓的語氣吹水, 我就最後係一片頹聲頹氣之下訓著左。第一日澳門「奇妙」的旅程就咁玩完。

Monday, July 28, 2003

28 Jul 2003

有時, 有些東西, 你得到的時候不覺得甚麼。失去了的時候才會珍惜。這一個道理很多人都明白。
但有時候, 你以為自己得到了一些東西, 卻其實你從沒有得到過。就像得到了一個獎之後, 忽然醒來發覺南柯一夢, 一切都原來是自己的假想, 幻想而已。你會如何呢? 更糟的是, 若然是一個別人告訴我的話, 可能他們會是我的朋友而附加一些安慰。而如果是自己發現的話, 不開心的程度自然倍增。

就好像愛情這一件事, 很多很多的人都苦苦追求, 唯半生之後仍獨身一人, 總是得不到自己的所愛, 或是愛得到的卻得不到諸如此類。有很多人卻相反, 不想求愛, 卻總是被身邊的桃花弄得團團轉, 身不由己的令不少局外人羡慕。也有不少人, 不論愛一個人愛得怎樣, 不論被所愛的欺負的怎樣, 也堅持下去。也有很多人, 愛了很多人, 愛過很多人, 受過很多苦, 之後, 還是擺脫不了「情」一字。

受傷嗎? 痛苦嗎? 酸溜溜嗎? 不想面對嗎?

對不起, 你不找「它」, 「它」也會來自動來你...

也不是第一次
也不止一年兩年
也不是自己第一次給自己一巴掌
也不是第一次摑醒自己
也不是...第一次不開心
有甚麼好傷心的

很快就會沒事的一樣

曾幾何時, 我說過「要是這個世界完全沒有愛了, 那會是多麼的平靜, 多麼的好」
有人應過「要是這個世界真的變成這樣, 就會很可怕了」
我說道「難道此刻被愛一個字苦苦折磨的世界, 會是很美好嗎? 會比沒有愛更好嗎?」

明知自己強詞奪理了
想不到的是
那位朋友也說不出話來
無言以對

Friday, July 25, 2003

25 Jul 2003

今日番 CU 做野。

好早我就約定同 Queeny 一齊係尖沙咀出發, 我去幫佢搬野。唔知點解, 我又遲到, 唉。
到我地到左火車站個陣, Wendy 就打黎話會遲到。到最後佢又係早到左。Queeny 仲鬧我「個個都好似你咁樣架咩」。三個人, 再加埋個傻仔 vin, 一齊番去做 Banner。

首先, 就係d 野都幾重。搬完之後都已經係大汗淋漓。番到 dept 仲撞到皇上。噢, 我皇萬歲萬歲萬萬歲。

跟住, 吹水, 講笑, 做野, 食飯, 做好耐好耐的 Banner...其實我幾鐘意呢種唔係好使用腦的 workshop feel. 離開 215 個陣, 真係覺得呢度好似好似 workshop...當然, 你唔好去理佢似唔似庇護工場先啦。

I love all these feeling.

夜晚, 我地走個陣, 又真係幾似放工。

唔知自己講乜野, 我覺得我頭先講得好平淡, 好悶。但係我明明有一種 feeling 想講出來。
算喇

Thursday, July 24, 2003

24 Jul 2003

不停咁追番d 過左好耐的日記
都唔記得晒囉
記得低的, 多數都係因為日日番祥興, 好似番工咁。
做左三件衫, 一條毛巾, 一個豬腰袋。祥興發到好似豬頭咁。
祖母跌傷, 斷骨, 入左 hospital, 好得人驚, 因為 SARS, 唔探得, 唔睇得, 個個都係乾著急。
阿媽條腰傷左, 好嚴重下。難得阿爸好番, 又到阿媽大獲...做仔的都唔知做得乜野好, 阿媽份人又火爆又急躁, 做親乜野都好似食左成擔火藥咁, 好難令人同佢相處。最慘佢仲要成個世界人人都好似佢咁快咁趕, 得閒 X 唔閒病咁, 如果唔係, 就當你無用, 做野完全「無效率, 跟唔上我」
真恐怖。我竟然係佢生出黎既。

今日好頹。個死人颱風攪到我乜野都做唔到, 想去游陣水都唔得。激死人。聽日要搬野番中大, 要訓喇, 好眼訓。

Friday, July 18, 2003

18 Jul 2003

因為尋日個件事實在係鬧得太大, 部主覺得事態嚴重, 一定要問多一次祥興囉佢地個 quotation, 仲一定要逼到佢地個價夠低為止。因為經過尋晚之後, 我地都覺得如果祥興的 price 真係可以好低的話, 就太好了。因為, 衣家最主要的問題, 就係祥興能唔能夠低過 Goldtex. 如果得, 咁我地就要轉, 如果唔得, 我地就 hold 住係 Goldtex. 基本上其他的考慮都可以唔使, 因為, 我地覺得經過尋晚之後, 大家都表現得好想要祥興, 咁如果佢地咁想要祥興, 又咁信得過佢地的話 ( 即係咁鐘意舊年的質地的話 ) , 咁, 我地根本就唔須要做任何野, 只能接受祥興。

無錯, 咁樣同 Goldtex 一齊做左成個幾兩個月的功夫, 都會等於白費左。但係, 咁樣唔代表我地真係會放棄左。至少, 係同 Goldtex 一直洽談的時候, 我地三個人的經驗值都提升左唔少, 升左唔少 level 架 ! 所以當我地同祥興講的時候, 就可以只係用左九個字時間就講成單生意, 因為佢地想要的野, 我地都估到, 而且一早準備好晒; 佢想講乜野, 我地又估到, 唔使佢問, 都講定埋; 佢要點樣的圖, 我地都準備埋...除左後來佢話要黑白的圖之後, 基本上佢已經可以即刻開始做咁滯! Goldtex 知道左之後, 實會覺得好似係度為人地做嫁衣裳咁...算啦, 你都已經接左 Econ 同大大個 Engine 的生意囉, 補番數囉。

其實, 同祥興做, 唔係無好處既。至少, 無論係信心定係事實, 都覺得祥興可能真係人做慣做熟左大專的訂單, 識得點樣去做咁喇。我地鐘意著乜野衫, 都係比較做慣商業社會的 Goldtex 清楚d...卦。之後, 就係 price. 當然, 祥興呢招屈尾十, 無人估到, 都殺我地一個措手不及, 當堂唔知點算好。另外, 就係質地的問題。可能大家對舊年祥興做的 camp tee 都有好壞參半的成份。但係我覺得, 如果做番舊年個件的話, 可能大家的信心會大d 。有時d 野唔係好似 vin 咁講, 我地全權左就乜都得。我地都知道呢件係好多個人一齊著的衣服, 仲要對住成個中大, 仲要係全港定向的時候走出街見人架。真係唔可以太過頹架。就算我地厚面皮到好似過得到人地個關, 我諗就我個人而言, 我都唔想件衫著兩次就變成左地布。最後, 就係為免爭吵。多一事不如少一事, 既然大家都覺得舊年件祥興係無問題的話, 就著番舊年個一種衫喇。唔好再係呢個問題上面喋喋不休喇。

總之, 一切都好似坐緊過山車咁樣, 由最高點, 「付」衝落去最低點, 再抵受好高的 G force 被扯番上高點....氣都喘不過, 魂魄也定不來的時候...

....事情就過去了。過山車也要下車了。

Thursday, July 17, 2003

17 Jul 2003

估唔到突然間醒左。其實都唔算突然間, 因為我成朝都聽到好多好多的聲音, 又大聲, 又唔好聽, 攪到我又訓唔到, 好 X 煩。不過算喇, 我正式起身的時候出奇地精神, 唔知點解。我其實只係訓左四個鐘頭。不過根據人地所講, 深層的睡眠其實四個鐘頭都夠....咁我的睡眠係咪好深呢? 唔知。我做完一輪梳洗之後, 就趁 Vin 仲訓緊個陣, 做左少少 streching, 反正我有精神, 一陣又要學營舞, 當準備。

係李慧珍食完早餐之後, 就跳舞喇。原來係 Boy'Z 的 la la 世界, oh my god. 無所謂, 反正我第一次聽晒成首歌, 不過我諗我好快就會因為學舞聽到厭。隻舞其實比想像中的唔低 B , 亦即係難左少少咁。但係其實我 prefer 難。因為難少少的話, 就算跳得唔好睇的話, 都至少有難度分補救。

其實我都幾鐘意隻舞, 我跳緊個時都幾 enjoy 下。尤其係好多人都係一齊係啦啦啦個一段轉身拍掌個段, 唔知點解, 我覺得個一段先至似係 o camp 的舞。雖然個一節係老土少少, 但係我反而鐘意, 有時有d 野, 係要懷舊 d 先似樣架嘛。

練完, 成個人頹晒。都要費唔少力架。之後, 教舞個個人走埋我度, 想問我肯唔肯上台幫手做 performance。我諗都無諗過就拒絕佢。我好唔鐘意做呢d 對住咁多人做事的事。要我對住好多人講野, 或者係做野, 我都唔多鐘意, 更何況係跳舞呢家野, 一定唔得。好彩佢都好好人, 見我唔肯, 佢都唔會亂黎, 呢一點我都好多謝佢。我最怕係個 d 人完全不識好歹, 總之就係死纏爛打咁樣, 直到你好不情不願咁答應為止。

其實我唔係唔鐘意跳舞。我覺得跳舞其實好好玩, 可以學到野之餘又可以郁黎郁去, 郁黎郁去又唔係好似 monkey 咁亂黎, 跳完出一身汗又會幾舒服, 幾好架。不過, 我就極度唔喜歡係咁多人面前跳, 唔得, 仲要係咁多眼定定睇實你的人, 更唔得。

Lunch 之前, 肚痛已經出現, 並漸漸增強。Lunch 之後, 我已經係好肚痛。因為我又飲左狂潮又飲左牛奶, 再加埋跳舞, 我諗幾樣野的 Chemical reaction 撞埋一齊之後, 就唔得喇。上吐下瀉, 好在唔嚴重。不過下午的 pre-Camp Fire 完全無晒心機, 頹跳。

之後仲有好多細節, 唔講喇。我地最後係222個度躲藏了起來。仲關掉所有的燈, even 成個行政部的人係出面做緊旗海, 但係佢地都唔知道我地係入面, even 我地的電話已經好大聲咁響左幾次。個感覺其實都幾得意, 好似做緊賊咁。不過皇上有旨, 唔可以係入面喎, 因為馮伯伯會唔開心喎, 咁咪走出黎囉。

之後我實在覺得我無必要留係呢個 pre-camp 裡面, 衣家唔走, 更待何時? 我唔想再徹夜難眠。你知唔知我都還好呀, 我之前個晚訓得三個鐘, 所以係應林裡面, 一訓底就訓著左, 好歹都叫訓左四個鐘頭呀。Vin 佢完全係一個好醒訓的人, 佢根本成晚都無訓過呀, 我今朝見到佢個樣係雙眼都係血...紅色架, 陰公, 唉。所以我就知佢今晚一定唔係再係呢度訓架喇。That's why 我都叫埋佢走。到最後, 我地都真係走左。太好喇, 終於出營。

點知, 恐怖的事就發生係後面...當我地離開之後, 行政部同節目部就展開左一場開會生死決。

首先, 我淨係聽過行政部的版本, 所以你可以話, 一切都係我係行政部聽番黎的一面之詞。仲有, 我真人當時並不在場, 所以根本唔算係親耳聽見。不過, besides 呢兩個好似 disclaimer 咁樣的理由之外, 我好相信我所知道的都係真的 (雖然可能唔係事實的全部)。

我真係完全唔明, 點解你地今次可以咁大火氣, 點解可以咁樣。
到底你地有乜野唔滿意, 咁三口六面講清楚佢囉。你有乜野覺得其他部對你地唔住的, 咪講清楚囉。不過, 大家都係成年人, 講野係唔係應該先諗清楚先呢? 你咁激動咁講晒人地個部有乜野做得唔好的事候, 你地到底有無反思過你地做的野做成點呢? 難道你覺得你地自己真係做得好好? 好到你可以好開心咁插人地四個部個陣, 你自己個部可以完全係置身度外? 其他四部都好似大罪人咁, 唯獨係你地個部做到天下無敵? 真係人人都喜歡你地做出黎的野?你地唔似係咁天真的人喎...反省下啦唔該。當你地大大聲, 兼夾爆晒粗咁樣數臭人地其他部的時候, 你有無諗過如果易地而處的話, 你係做左咁多野, 放左咁多心機落去, 都係俾人咁樣有理無理先插左你的時候, 你會唔會開心呢? 你會唔會好過呢? 定係好難受呢? 仲有, 如果你認為自己~真係~做到咁 perfect 的話, 人地咁樣插番你轉頭個時你「受唔受得起」呀? 如果你認為你會比我地做得更好的話, 點解你自己唔黎做呢? 如果我地開會之後你有乜野不滿的 results, 點解你唔同我地講下呢? 或者係, 如果你想知我地做過乜野的話, 可唔可以唔好咁 hurt 咁直接問「其實你地做過乜野架」咁呢? 如果你真係好關心我地的進度的話, 你咪黎 sit 會囉。你無喎, ===!!!你係完全無喎!!!===然後就去質疑人地做過乜野。你覺唔覺得你呢種思維方式有問題呀。聽聞你自己開會都係係度吹水食野睇雜誌咋喎。或者你會話咁樣你先諗到野, 我唔知喇, 高人自有妙計呀嘛, 我咁蠢就唔識喇。

我唔講其他部的事, 就講番我地自己福利部。你識講粗口, 我唔識呀, 我聽完你講我地的野之後, 我都識得講呀, 多多都有得講添呀。

黑色的營衣, 當時又係你地話要深色的衫做水戰, 又話淺色會透, 又怕濕左水之後, 其他色的衫都會透等等等等。好喇, 咁咪做黑色衫囉。你地又諸多"Gee" 吉咁話大熱天時著黑色會熱死人, 會好辛苦。阿水唔知呀?! 我地打從第一日開始已經諗到啦, 咁又係你地話要既。更何況呀, 我地決定做邊件衫之前, 係有同咁多位 OC 做 plebiscite. 黑色衫係三件最高票數的衫的其中一件黎架。佢個 design 係一開始就已經係黑色架喇, 我地無做過任何手腳架。咁其他 OC 都有投的一票, 都算民主喇卦? 其實正確地黎講我地根本無必要做呢一步架。行政部打從第一日開始已經講到明做營衣係福利部全權負責的事。我地按章工作的話你根本可以收聲。

$26 @, 好, 就唔計你地係唔係無知而嘩然起哄。我就真係好想問一問你, $17 一件的消息你點聽番黎架。你話 $17 一件兩個網, 聽落好似抵過我地個offer 好多呀呵? 又係喎呵。咁我又想問你, 你知唔知咩叫做兩個網? 兩個網即係兩隻色呀, 係前幅同後幅左袖右袖獨主分開計的一個網一隻色呀。即係話, 如果你前面兩隻色之餘其他乜都無, 就係 $17。如果前一色後一色就係 $17 就叫兩個網。如果好似舊年件白色地球衫咁樣叫做前三色後三色係 total 六個網呀! 仲有, $17 一件個個 offer 係 for 混棉, 唔係 100% 純棉。

仲有, 一開始唔搵祥興, 係因為佢仲好口硬咁話, 如果根據我地個 design , 佢會 $28 件。無得改。你聽見一個肯派 agent 上門同你傾件衫的, 仲有成個 CU Engineering 肯同佢做既, 仲要 $26 件的, 你自己都會揀 26 個間啦。仲有, 係有人, 包括今年同上年的人, 都話祥興的料唔好呀, 或者係其他野呀零零碎碎咁, 所以我地先唔試祥興。

你驚個 design 唔好, 唔對你胃口。我都好驚你 d games 唔對我胃口喎。咁點算呀。我地個 design 你唔鐘意都係要著上身架喇, 你地個 game 唔好玩又無聊的話我地都係要玩架喇, 你想點? 我地個 design 有投票過喎, 你呢? 你咁著意會著乜野上身, 我地做野個陣你唔問? 我地開會個陣你唔黎 sit? 我地去同製衣商傾個陣你唔黎? 我地徵詢 design 個陣你唔投稿? 我地投票個陣你唔出聲? 好喇, 我地福利部三個人, 用左成個月時間嘔心瀝血咁去幫手做一件 camp tee, 就黎臨門一腳個陣, 你先黎話呢樣唔好, 個樣唔好, 仲要成個部都起晒哄咁喎, 犀利啦。我地做野個陣你係邊呀請問。要推翻要破壞一d 都唔難呀, 要建設先係最難架。我地辛苦左咁耐, 晚晚都開會, 次次同 garments 個邊傾親都幾個鐘, 努力左咁多, 然後, 你一句, 否定晒我地所做過的所有, -----所有----- 的事。好好玩呀? 你黎做呀。努力就我地出, 功夫就我地做, 辛苦就我地挨, 口水就我地講到乾, 然後, 你就係最後一關, 當我地做到筋疲力盡的時候, 明明係路人甲就當正自己係大阿頭, 係度幫我地做 QC, 兼呢樣兼個樣, 呢樣唔好個樣唔對你胃口。總之乜野都係我地錯。工作就唔係你做, 生死決定就你做, 世界又會咁轉既。幾時輪到你呀, 我想請問! 你憑乜野, 你憑乜 Q 野呀?!

個一下, 我聽完之後, 唔單止係「心裡有氣」, 直頭係怒不可遏。

之後仲有好多好多的 Emotion 浮現心頭, 但係都已如雲煙去。

我始終都覺得我想到的其中一句, 講得好岩。「你唔鐘意我的 camp tee你都要著; 我唔鐘意你的 games 我都要玩」你可以話我咁的說話都講得出, 好 irresponsible 喎。我覺得呢句好現實。

總之, 無論點, 我呢道氣都好難消。

好難消。

人生中不如意事十常八九, 但呢件事永遠都會係我心裡面的其中一條刺。
只係, 時間會將佢變小變淡。

亦令我見多左一種人, 一種...



極度極度極度無恥無知的「人」。

Wednesday, July 16, 2003

16 Jul 2003

係囉。時隔好耐喇呵?i mean 距離上一次打日記。係既, 因為...呢幾日發生的事, 真係好多好恐怖。我同 Queeny 都話有個同感, 就係覺得好似係度玩緊過山車一樣。突然間, 好多野湧到黎然後一次過咁樣係你面前出現。
上個星期我成個星期都係度期待的, 當然就係我地地資系, 偉大的 pre camp 啦。咁呢度有無睇我日記而唔知 pre camp 係乜野黎呢? pre camp 就係, 一個 rehearsal, 應該會將 O camp 裡面會玩到的遊戲, 會行到的路線, 會 run 的節目, 會做的事, 原原本本咁做一次出黎, 作為一次正 Camp 前的演習。
應該。今次我好著重應該呢兩個字。因為 pre camp 「應該」就係咁樣。
首先就係, 之前個一晚要準備好第二朝同 David 洽談的內容, 所以要 print 定唔少的野出黎。仲要因為上次的經驗, 所以要帶多d 架生去, 咁樣先可以講得成。所以今次我地又要帶軟尺, 又要帶顏色筆, 又要帶Tee Samples, 又要帶 floppy disk, 又要帶成疊 sample 的 file, 仲要帶埋好多其他無聊野例如筆袋呀, Cal 機呀咁樣。傾一件 Camp Tee 都好似要去開片咁, 唉。
仲要係呢個時候, 我行李又唔係 100% 執好, 房裡面部機又傻左, 出面部機 print 緊野又傻埋, 涼又未沖, 四面楚歌。咁我房裡面個部黑煞係我最愛的 computer 黎架嘛...梗係我第一時間攪掂左佢先喇。之後又要安撫出面個部大帝, 又要拿拿聲沖涼....都已經天都光咁滯, 唉。
當然第二朝又係遲到喇。不過唔緊要, 我的作風係, 人遲我更遲, 人地更遲我當自己無遲。...講下笑者, 你估我都真係咁想遲咩, 唉, 好好玩咩, 鋪鋪都要趕到上氣唔接下氣咁。之後, briefing 啦, 上 user area print 野啦, 無聊啦, 係 LT4 做看更啦, 第食飯啦, 食飯啦, 同 David 傾野講左三個鐘喇, 講人生大富翁啦, 又到食晚飯啦, 係215 勁頹啦, 同阿瑪開生日會啦, 番宿啦, 番 222 啦, 番宿啦, 開 E 開勁耐啦, 沖涼訓啦, 無聊到死啦, 成日都唔知自己做過乜野啦, 勁無 schedule 啦, 唔知下一件事做乜野喇, even on schedule 的事都唔知係度做緊乜野喇。就係咁樣。點解會咁樣。我都好想知道。
其中, 當然就係仲有好多好多的事情, 當中, 我最記得的, 反而係唔開心的事。
首先我估唔到, 我身為一個福利部的人, 原來 o camp 開始之後, mark 完 sponsor 之後, fax 完 proposal 之後, 就真係無野可以再做到。我估唔到我係 pre camp 的第一個職責就係俾皇上充軍塞外 - 叫我落去看住 LT4 的野, 因為成個 LT 無晒人。
咁我唯有去啦, 皇命難違。點知同是福利淪落人, Queeny 同 Wendy 都俾人發左去守 215 Geomo Lab, 情況一樣。只係我自己一個對住成個空了了的 LT, 佢地對住對方之餘仲對住好多舊石。雖然, 話唔定出左去行遊蹤的 OC 們其實也要頂住烈日當空好辛苦, 但係, 今次我寧願我係出去製造維他命 D 果個囉, 好過....唉。
跟住, 到食飯。比想像中的好喎, 唔係太難食, 不過好似太多的肉。不必喇, 大家都已經熱死, 仲食咁多肉...
跟住, 同 David 講件Camp Tee. 唔使呀嘛, 講左成三個鐘, 每一個細節都講到, 件衫要點樣, 個 Logo 要點樣, 要係衫的對左右幾多吋, 對上下又幾多吋, Logo 的橫直係點樣, 係邊個位, 用乜野色比較好睇, 有乜野做法可以兩全其美....淨係咁樣講, 都一件衫平均一個鐘。你都咪話唔驚。講完之後, 基本上我地三個都係已經疲勞轟炸完一樣。
人生大富翁...點解可以有強姦呢一樣野架, 有無攪錯呀, 到底節目部d 人點開會架, 佢地到底有無諗過呢一個 game 所帶來的 impact 到底會有幾咁大架。我以為文杲會 sensor 過所有的開會流程。咁樣睇黎, 佢都係有份贊成架喇。咁乜野都唔使再講喇, 節目部人多勢眾財大氣粗。你鐘意點玩班 freshmen 咪點玩d freshmen 囉, 反正中大家陣性騷擾件事攪到咁大, 節目部都既然係想玩野, 意識唔到個嚴重性的話....咪當我係神經過敏囉, 咪當我係古老石山囉。既然係「人生可能遇到的不愉快事件」的話。
我放長雙眼。
跟住, 食完晚飯, 我完完全全唔知係 215 做乜野等左成個鐘頭。或者好多人已經忘記左個一小時。但係我記得好清楚, 因為實在係無野做, 好多人都係我身邊個度吹緊水, 我就係度閉目養神。我真係等左好耐都唔知我地係度等緊乜野, 原來係等緊阿瑪的生日會。原來係咁...唉。早講。即刻我唔係話唔應該慶祝呀, 我都覺得阿瑪生日應該開開心心咁慶一餐先係。但係唔該你地講聲喇, 乜都唔講咁就坐左係度, 各人有各人的吹水, 你又唔講你想點樣, 咁大家咪繼續大家做自己野囉。好喇, 原來有目的, 都唔該唔好要我地等咁耐呀。
唉, 唔知自己講乜野, 亦唔知佢地為乜野。
之後, 我已經唔係好頂得順佢地。番到宿舍個陣, 我先真正覺得我終於有一個自己的時間, 係一個有理性, 有目的, 有意想的時間。陰公, 呢個 camp 攪乜野呀。之後就玩佢地個個原來叫做滅門的 game. 唔好意思, 我真係有少少同意 Queeny 所講, 唔覺得呢個係大學生玩的 game。我的感覺無咁強烈, 我覺得玩下都無妨, 但係係應林呢個細到喊的 hall 裡面玩....仲要玩得個兩層, 仲要係咁多個 OC 一齊玩, 係唔係真係太過離譜呢。我問 vin 你玩唔玩, 佢話玩, 我唔跟, 反正我手頭上仲有工作, 要 print 野, 我都係「鼠」左番三條二。222的設施新淨, 應林舊到死; 222有電腦玩, 呢度得一部電視; 222 無人, 呢度簡直係塊塊地板都企左人; 不過, 最最最重要的係, 222 有冷氣, 呢度, 成棟都無。因為每個人要俾三十蚊 for 一晚的超高價, 我地索性熱死罷就。
番到222, 我先覺得, 一切的瘋狂, 紊亂, 終於都平靜落黎。太好喇, 自己一個係冰冷的222個度靜思, 然後做少少福利部的野, 個人都輕鬆左好多好多。後來 vin 都玩完個滅門 game, join 埋我。唉, 若然應林的客觀因素唔好, 都可能有其他人文因素好補救, 令我留低, 不過...你睇到喇。
之後, 開一個 E, 開極都唔完, 唉, 仲要係後面根本都無位坐。一d 都唔好, 尤其係我尋晚只係訓得個三個鐘頭, 我可以挨到咁夜其實都算係一個奇蹟架喇。我以為自己好快就會眼訓到完全唔想打開眼。開 E 之中, Betty 提到一樣野, 就係「強姦」個一個問題。都幾好。之後更有用的提議, 就係有人講番阿本話過, 呢個pre camp 實在係太過求其, 有好多野都好似無周詳的計劃咁。後來我聽人地講番, 阿本係 GRM newsgroup 個度就呢一件事炸板...好似好大件事咁, 但係我上唔到 VPN, 乜都假。
個 Common Room 真係好熱好熱。個個人都係度死狗咁, 勁多人走去後面個部汽水機買野飲, 賺死 CC 班人。開完呢個, 再開埋個 OC 的 E, 終於有得訓。我唔使幾耐, 即訓左。

Saturday, July 12, 2003

12 Jul 2003

又補習, 又開會。
其實補習都真係幾悶下, 次次都係差唔多咁做。攪到我自己都越來越頹。

開會先係今日的重頭戲。因為實在太~ 悶。
我都唔明, 本來一個只係分工, 同埋宣佈pre camp 流程的會, 點解可以開咁耐, 中間夾雜左咁多本來可以唔使講的廢話。我已經係無食飯先黎架喇, 開會開到成十點都未有得食飯, 我成個人都已經非常之頹, 因為無野食就成個人都無晒 energy 咁樣。我都唔想, 但事實係我當時勁想即刻訓著覺算數。個會又唔係好多有建設性的野講到喎。應該咁講, 個會好少講到有關我地福利部的事情。咁樣我聽落去都無乜意義。可能你會話, 可能同全體 OC 有關呢。又唔係喎, 真係關得晒全體 OC 事的真係唔多。於事好大部份的時間我都係係度齋聽, 之後發夢, 連潘威開始講福利部的事我都完全唔知道。唉救命。

跟住阿 Frankie 仲話想留低講多一陣, 我幾乎想死。如果佢開始講野, 我諗都幾難停亦幾難頂。好彩到最後唔係講得耐。

之後, 我急急腳咁走, 希望可以盡快去到搵任何的野食。我諗住去 Food Court, 不過諗諗下個度都應該無乜野可以食架喇, 已經係成十點幾, 不如去百佳買幾個頹包算數喇。

係百佳, 我發覺原來我真係連搵個頹包都要好小心好小心咁樣, 驚死會使得多左錢買左一d 自己唔想食的包咁樣。唔似得我d 朋友咁, 肚餓就乜都買左先。到最後我都係忍唔住要咁樣揀咁耐, 求其兩個頹包一包頹牛奶(健康哩~?) 就算數。之後發覺自己無tissue, 就邊食邊上去麥記, 買一個Chocolate Sundae 換幾張沙紙一樣咁粗糙的 napkin 紙。

個包入口個一刻, 我先明白我自己生於香港真係好幸福。食物的供應永遠都係太多, 你想係邊度買都有得買, 你想食乜野都有得食, 你想幾時食就幾時食。睇番好多地方, 有好多人每朝都要一早起身去麵包店前面排隊, 搶購碩果僅存的糧食, 搶購到的還好, 至少今日可以填得包個肚。搶唔到的, 又要挨一日餓。一日呀, 我幾個鐘都挨唔住。跟住我就諗過一個我阿媽同我講過的道理。

個道理係古文黎既, 但係我唔記得住係點樣讀架喇。個內容就記得, 大概就係講, 養一個仔唔可以成日都俾佢食到盡, 食到飽, 飽到滯。亦都唔可以俾佢著太多的衫, 俾太多溫暖佢。一句言之, 唔應該俾太多的溫飽佢, 應該俾番兩分的飢寒佢挨下。點解呢? 咁樣個仔先會有更強的抵抗力, 餓下唔會就餓死, 又會乜野都食得落又唔肚痛。凍下又唔會凍死, 又可以增強自己的抗寒力, 抵抗力等等。

其實聽落幾有道理架。尋晚, 我睇最後一集的成吉思汗, 長春真人丘處機同成吉思汗講道, 其中之大義, 真係聽完之後都令人豁然開朗。我本來都同Vin 講緊電話講 IQ 題, 但後來我都話我唔講住喇, 我要聽丘處機講野。

點解我要提起呢樣? 就係因為當中一樣成吉思汗同丘處機都有講過的問題就係我岩岩先講過的一個問題。太多溫飽會令人變弱。成吉思汗話, 神仙 (即丘處機) 你講得好岩。我以前細個個陣係草原挨苦, 同我的兄弟姐妹, 土撥鼠, 樹根, 樹皮, 硬果, 乜野都要食, 無得揀; 於是衣家就練就出我的兄弟們同我一個二個身壯力健。你睇下衣家的下一代, 甚麼好穿就穿甚麼, 甚麼好吃就好甚麼, 到最後一個二個變得弱不禁風, 不知所謂。

連一個唔係讀得書多的成吉思汗 (雖然佢真係強人) 都識得咁的道理呀。何想而知。


跟住我阿媽話, 就係因為咁, 你都唔好再食咁多野喇, 等我慳番d 家用喇, 費時浪費咁多錢呀。日又食夜又食, 米缸都食穿呀。

我﹕「...........」

Friday, July 11, 2003

11 Jul 2003

時隔多日, 一路都無乜心情打日記。唔知點解。一係就係幫 O camp 搬野入中大搬到手都軟, 唔想再打, 唔想用腦。一係就係根本乜都無做過, 係屋企超頹, 連家門都無踏出過半步的。所以呢...你話呢...咁頹的生活, 日後睇番都會後悔...唉

無乜野想講
呢幾日, 日日都係一樣, 最記得就係去上環拿八十幾把傘, 之後就成個拖「口急」咁拖去柴灣, 之後就一個人三隻手咁上 118 巴士, 之後就入沙田~咁遠的大學放低d sponsors.....唉, 好辛苦。烈日當空, 兩個人拿住應該分五六個人拿的野, 行上中大的 dept. 我從來未感覺過咁苦力, even 我幫 Wilson 幫 Emily 搬宿搬到人到癲個陣...都無。我一路行, d 汗就一路係頭頂度落黎, 成件衫都係汗水, 太陽猛過你阿媽, d 野食話得6Kg, 都唔知係唔係, 重到癲, Queeny 懷疑 6 KG 只係net weight~

不過, 辛苦過後, 係李慧珍飲番一杯野, 食少少怪味沙律, 都幾好 feel 。如果個太陽仲係度, 又有帶swimming sets, 真係想上去本部游佢一游。如果太陽唔係度, 行下百萬大道, 行下未圓湖, 或者係有冷氣的 canteen 裡面嘆一杯, 好似我個時咁, 都真係唔錯。

就快 pre camp。亦就快 O camp. 老實講, 無左 Queeny 同 Wendy 係度指三指四, 得番我一個係度做件 Camp Tee, 我即刻感到一陣陣無名的恐懼。突然比人掉左出去做一件我本身已經唔係咁想做的事, 更何況我唔係一個有 taste 的人...至少, 從小到大, 我身邊的朋友都這樣「教導」著我, 說我是一個不懂得潮流的人, 暗示我總是一個過氣了才知道發生過的人, 人人都正在做了你也不知道的人, 也說我是一個dressing style 穿了十九幾年也沒有變的....這樣的一個人幫百多人做衣服....不感到壓力大才怪。

別人已經懂得在唱 K 唱得很賣力的歌, 我才第一次聽。而席上只有我一位如此。
不奇怪的事。因為每次都是如此。

別人已經懂得穿的打扮, 我還是一件 Bossini T-shirt 還要是廿九蚊一件的。
加一條千遍一律的褲子。

沒有頸飾, 沒有指環, 沒有手項, 沒有新潮的皮帶, 沒有新出的波鞋, 還是那對上山下海熱死把就的爬山鞋, 也沒有最近的手提電話, 也沒有跟大家一起用 Super X 的袋, Campion 的衣服, Chevignon 的衣服, Izzue.com 的衣服....我連 Esprit 也覺得很貴, 又不是件件都好看。

...我的小時候, 總是沒有人會批評我這些東西。沒有人會追著穿上最特別的衣服, 最有品牌的物件上身。大家都是老老土土的小孩子, 甚至上了中學, 也是一個老老土土的中學生, 也就是「七」。

......從前, 都沒有人會關心這些事情。最關心的, 還不過是誰的成績比較好, 那一套卡通片的劇情還何會如此發展, 你明不明白昨天那一套電視劇在說甚麼, 為甚麼我們上課前要中烈日當空的操場上唸經, 你記得上一次我放了那一張很重要的閃卡在哪兒嗎, 你會不會喜歡鄰班的女孩子, 你想上那一間中學, 你沒有到過科學館, 你有買最新的某某卡通的玩具嗎, 你記得那一個很怪誕的同學嗎, 你還有沒有「空簿」借我做功課, 你交了回條沒有, 你今天有沒有抄手冊, 我來不及抄, 你想我們十年, 二十年之後還會是好朋友嗎....


.....往事。為甚麼我總是經常提起往事。


現在。每一個人都看著你走出來的樣子, 每一個人都只會看你的表面。你裡面實質上是一個怎樣的人, 其實到底還有沒有關係, 其實到底還有沒有人會理會。我起初還只是想, 不會吧, 應該會好像電視劇一樣, 他們總有一天會明白到, 其實一個人給別人外在的印象, 只是一個係浮光掠影的一個外表而已。最重要的還是他們的內在美, 最重要還是那種從心底裡發出來的, 心底的美。那一種美, 應該是扮不來, 應該是掩不住的。

應該。
我想是。

「來吧伴我飛
不休不睡去飛
來盡力忘記
兩腳降落何地...
...回望即使太蠢
都相信我做得對..」

人浮於事十數年, 尤其近幾年來, 感覺尤是強。

一切都不過是一個世俗的空想。電視劇中的劇情都真是「純屬虛構 如有雷同 實屬巧合」編劇都不過是一群想取悅觀眾夢想成真的心態, 希望能從電視的娛樂中, 在最後的一道防線之中, 把自己抽離於現實的殘酷, 去實現一下編劇們為大家編好了的, 一個大家都想著的一個夢。只有這一刻, 大家才可以把被俗世的每一日, 的每一個既定的觀念, 都打破了。人人可以都是灰姑娘。真愛原來真的可以發生在你身上。醜的人還會有人喜歡。別人真的不會介意你的身份。你做不成事會有人原諒你。有才華就最終必會遇到伯樂。有內在美, 就算沒有外在美, 就會有人賞識你。



發夢。


發夢...







有一首歌...其實有很多歌, 歌詞都有很深的意思。深, 是深度, 非難度。其中一首, 我第一次聽, 就被歌詞打動得不得了。




那首歌,
叫「天黑黑」。

Sunday, July 06, 2003

6 Jul 2003

明明阿爸話左要十一點起身架嘛, 我已經係 set 晒電話的 alarm, 但係都係醒唔到。我已經聽到個電話係度陰聲細氣咁樣整埋一d 令我覺得好煩的聲音, 但可能因為我真係太過眼訓, 我根本 don't give a shit on it 。由得佢繼續嘈。我細佬最後成功叫得醒我個陣, 同我講個電話已經嘈左成個鐘頭....個時已經係將近十二點鐘。死喇, 趕唔切飲茶添! 即刻飛身走出去, 以最快的速度飛去地鐵站。諗起兩樣野。一, 我同個細佬一齊係條街度飛奔, 忽然覺得好似 The Amazing Race 3 咁, 因為裡面都有 at least 2 隊係兄弟班。忽然覺得我地似裡面的 Derek and Drew。不過呢...如果我可以有 Derek OR Drew 咁靚仔就好喇...嘩...真係靚仔到呀...我都係咁靚仔的話就引死唔少無知少女囉。二, 就係我即刻想變做 X-men 的 Nightcrawler. 佢係邊個? 就係識得 teleportation 果個。勁。識得咁樣 teleport, 就唔使趕到大汗疊細汗, 仲有一身好刀 (劍?) 法 and 好身手添。講講下都想打機, 打番 X-men Mutant Academy 2 。

到最後趕到個陣, 各位親戚都係度講緊七一的大遊行。好令我開心地, 有發言的親戚都係同我同一陣線 - 倒董。可能當中有支持阿董的親戚我唔知喇, 但至少我真係唔多滿意佢。有一個被訪問的上街遊行的人話, 「你數一樣野, 數一樣董建華做得好的事。....你數得到我即刻唔上街番屋企。」強, 我即刻心諗, 又真係考起我, 我都好想幫佢諗到一件事, 等我挑戰下個一位「口出狂言」的遊行者, 但我真係諗到腦汁都用盡, 都諗唔到老董做過乜野好的事。一件都諗唔到...又真係俾佢考起添~~~真係諗唔到, 服左個位遊行者, 我愛你們。

下午, 繼續沉悶, 但係唔做就連少少錢都無的補習。唉。唔可以叫做苦差架喇, 因為好多人連工都無一份。我應該多d 叫自己開心d 面對呢份工先係....唉....開心d喇阿溥....唉。

夜晚去左銅鑼灣的 Delifrance 同爸媽食飯....食左一個餐, 當然唔飽。

之後就奇怪喇。我明明係好想好想去街的, 但係我當企係最繁華的銅鑼灣星期日的夜晚的時候, 縱是我弟弟都已經站在我的身邊, 我都感到我的快樂沒有人體會到, 我的孤單沒有人可以解決到。我很想去打機, 但我想到當我拋下弟弟時候自己一個去打機, 難道會有一種從前有的快感嗎? 沒有, 我答自己。到最後我會感到很快就失去了興趣, 很想流連在那裡, 但那裡已經沒有值得我流連的東西, 沒有值得我留戀的事情, 我還是因為沒有其他的地方可去, 被逼要回家。我失去了一種感覺。一種對我非常重要的感覺。我感到那真是一種很重要的感覺, 我是十萬個不情願地流失了這種感覺, 因為對我而言, 實在是太重要了。我感應不到這種感覺到底實質上是甚麼, 可以用甚麼的詞句來形容它, 但, 我感應到那是一種很重要的感覺。

我肯定, 那是我不願意失去的感覺。

我立刻就感到我很想有一個能聽我傾訴, 不會說太多話, 又不會給我壓力, 又可能在附近的朋友。那一刻的感覺很奇怪, 好像....I don't belong to myself, or to anyone on Earth anymore. Kind'a like falling into an abyss without anyone knowing.

幸運地, 我找到了Simon 而他又有空, 不介意出來走走。漫無目的地遊蕩著, 邊走邊吃, 邊走邊喝, 邊走邊談。談的都不是真的很重要很緊張的題目, 大都是閒聊, 間中才談到高考的事。

感覺很好。我感到, 若然這一刻這麼一個朋友在我身邊出現一下, 我整晚都會感到很古怪, 很不舒服, 好像還有一些該買的東西沒有買回家, 有一些該做的事還沒有做就回家似的。很怪。但很 influential.

一面打日記, 一面聽著很多很多的好歌...野孩子, 回到過去, 假如讓我說下去, 最後的歌, 人來人往, 花火, 抱抱, Happy Valley, 一個人飛, 十面埋伏....





在銅鑼灣那一刻的感覺, 我有一點點, 很少很少的, 想像到為甚麼你執意要走, 走過半個地球去。

那一種失落
叫路過的人都感概

Friday, July 04, 2003

4 Jul 2003

美國獨立日。
唔關我事架其實, 講講架咋。

其實今日係高考放榜的大日子, 所以對我的意義亦甚大。一年前, 我就係呢日收到我的成績單, 知道左我終於都....考得到了。雖然有比想像中的好, 也有比想像中的唔好, 但係, 我都好滿意個成績。至少, 當我知道我要入中大的話, 呢個成績應該唔係問題的時候, 我就好開心喇。但係其實個一下我真係開心唔黎, 因為好多人的成績比想像中考得差, 考得非常差的都有, 完全想像唔到佢會考得出一個咁的成績。個一刻呢, 其實我見到我好多好朋友都考出一個「驚為天人」的成績。我最記得, 個一刻其實我最擔心係阿朱。我估唔到佢放左咁多心力落力去讀書的時候, 竟然出左一個咁樣的成績。佢就睇落無乜野呀, 你知佢架喇, 喜怒哀樂都不形於色, 到底佢心裡面諗緊乜野, 都無人知。佢個一刻到底係非常唔開心, 定係少少唔開心, 我都唔知。唯有 keep 住用我個d 一d 都無用的安慰去安慰住佢先。個一刻我記得我已經唔使理自己成績係點, 淨係諗下點樣可以幫阿朱呀, 阿 Anna 呀, 阿 Jess 呀咁樣。但係我...都係窮著急, 乜都做唔到。

今年我識的人唔多, 多數識落的都係因為 Red House 工作的時候識的。但係好多已經都無再聯絡下去。好多人都已經連名係乜野我都唔記得。慘不忍睹。所以我今次番去的 main point 都只係為左睇下Simon 係點。其實我仲應該睇番今年的 7B 係點樣, 但係因為我唔夠時間的關係, 基本上我番到去張記的時候已經係太遲喇, 基本上如果我唔係叫住佢同 Emily 係度等我的話佢地都可能已經走埋。

點解會咁遲呢? 因為我朝早要去睇牙。今次就堅喇, 佢又幫我洗牙, 洗走剩下來的牙膠, 咁我d 牙先至會比較白架嘛。之後又要幫我棚牙做模 as a record。之後就大獲喇, 佢話我聽, 我隻無智慧的智慧齒因為打橫咁生左出黎, 頂住左前面的大牙(臼齒)。咁個一位就好容易地 sip 左野食入去, 但又唔係容易挑走。咁長此下去的話, 打橫生的智慧齒的面, 就會開始蛀, 前面的大牙, 亦會因此受波及.....到最後, the worst scenario 就係兩隻一齊拔。咁所以, 預防勝於治療, 衣家先拔左隻智慧, 遲d 就唔會有呢個problem. 但係咁喎, 要拔個隻, 係要做個小手術喎, 去東區醫院做一個要局部麻醉的手術......我聽完之後就成個人呆住係張牙醫椅上面。

唔係嘛。我唔想呀。

講番放榜。佢的成績其實比我想像中的...差。我以為佢會考得好好, 仲好過我個種。但係, 可能佢份卷真係好難, 所以...唉。我見到的其他人都考得唔好。唉

總之我成日除左打機之後, 就係擔心緊佢點轉 JUPAS choices 好。


Wednesday, July 02, 2003

2 Jul 2003

今日個太陽真係超正, 勁想去晒太陽, 可惜要做野, 唔得閒。

今日我同 Queeny 一齊去大角咀個度一間有 sponsor 我地的指南針公司個度拿指南針。我地去到都要搵一輪先搵到...你知喇, 大角咀喎, 你又有幾何會去個度呢。跟住就驚喇。原來佢個棟係一棟好舊式的工業大廈, 個d 電梯呢...先要係出面打開, 上下打開個隻, 入去個陣要用腳踩開下半邊閘, 咁上下就會一齊打開, 出去個陣就要用手拉低上面半邊閘....裡面呢就一排普通公屋用的鐵閘。我同 Queeny 都話...何止大開眼界, 簡直係 adventure...

入到去間公司, 楂電梯(即係幫我地拉大閘踩大閘個位) 提示我地要按門鐘。我地一按落去, 個「門鈴」的聲音竟然唔係「叮噹」, 而係好似走火警個種火警鐘叫聲...我忍得好辛苦先至唔大大聲笑出黎。

拿晒之後, 我地落番地鐵站睇。「都幾好喎, 唔頹喎! 」...開心, 又有多一樣野俾大家享用下, 個種為大家的福利而爭取成功的感覺都幾好。

夜晚, 癲囉, 同 Wendy 去見製衣的 Bosco 。我同 Wendy 原先話不如大家係地鐵個陣講講一陣講乜野好, 點知都最後又係變左吹水大會。尤其係 Wendy 把聲, 成個車卡都望住佢, 佢都好似唔知咁....oh WELL...不過, 又真係幾白痴, 講講下話咁快就到左九龍塘。

今次的談判快左好多。因為其實真係無乜特別野可以講到, 唔似得上次咁樣要講咁耐。幾好呀, 速戰速決我鐘意。

夜晚, 我食野個陣因為" sip" 左d 野食係牙縫之間, 痛不欲生...所以我試左好多方法 「了」佢出黎, 都唔得, 到最後, 「了」都出左幾次血之後, 竟然「了」出左一舊牙肉!!!! 我敢肯定個d 一定唔係我食過的野。而且個一小塊Jelly 狀的物體, 一按下去就有血出黎, 出極都仲有, 藏血量甚豐...亦很恐怖。我半邊口都係血, 停都停唔到。我以為, Kool 完牙之後應該乜野都完喇, 點知原來係更深重的災難。我同阿媽講, 佢仲理直氣壯咁話自己無錯。之後講過乜野, 我心裡面諗過乜野, 我都唔想再講, 再講我只會更更更憤怒。我夜晚臨訓著之前, 都仲係非常憤怒, 一肚怒火。.....我唔想再講番, 費試重燃怒火。

我記得自己同自己講過, 就算我以後同阿爸阿媽關係幾好, 就算佢地有後悔過, 係呢件事之上, 我一定唔會原諒佢地。呢世都唔會。

Tuesday, July 01, 2003

1 Jul 2003

其實我好想去今日個遊行。我覺得, 既然有咁多人肯去, 而不嬲職業 politicans 又幫唔到我地香港人個陣, 係時候要我地出手去 voice 我地自己的願望。我自己呢, 比較希望英國回歸。你即管話我係漢奸, 我覺得中國黎左咁耐之後完全 do us no good. 反正我自己本身都唔鐘意中國架喇。所以董建華都我係反硬。

但係今日我去唔到, 因為個細佬聽日要考試。你知佢架喇, 一無人睇住佢佢就亂黎架喇, 佢會即刻唔溫書架喇, 所以我地教都教唔到。萬一我地真係唔係度的話, 佢又會打機又會睇電視, even 佢聽日其實係要考升班試, 佢都一樣無有怕。升唔升班, 升唔升到, 佢好似完全唔會在乎咁樣。你話咁樣激唔激氣。

大約三點鐘個陣, 我反到屋企之後, 就一路都睇實有線新聞台, keep track 住成件事的進展。當我終於係電視上轉播直升機拍到的景象個陣, 我見到, 區區一個維園真係完全唔夠容納晒所有人! 仲有超多人係東面, 逼到去天后的地鐵站, 係西面, 逼到去何止三越。係灣仔仲一路源源不絕咁仲有人黎到, 不停咁向維園方面走, 希望可以俾警方計到人數。我阿媽係現場話, 張文光企上個燈柱上面, 叫d 人唔可行入維園喇, 向前吧啦。

當我見到真係有咁多咁多人的時候, 當我見到人龍逼滿八條行車線, 當我見到龍頭一早就到政府總部而仲有好多好多人係銅鑼灣個陣, 當我見到人人都著住黑色衫反廿三條士氣好高漲個陣, 當我見到就算被困在金鐘地鐵站月台的人都上下一心地叫口號個陣....

...唔知點解, 我覺得幾感動下。終於都多人喇...

我之前怕, 呢個遊行會唔會雷聲大雨點小呢? 香港人係英國政府的統治之下, 被教到只係識得 / 知道 / 著重搵錢, 政治呢味野毫無興趣。今日, 經特區政府六年「洗禮」之後, 竟出現了五十萬人上街遊行示威的爆破性人數。五十萬....我相信唔止呢個數。真係好犀利...真係忍夠喇。

好感動。大家都真係有共同的目標。我覺得自己都可以稱自己為香港人, 歸屬感大左少少 (雖然我都無行過~ ^_^ ) 大家都明白生命 and 自由都係大家的手中, 不可浪費機會。

九點先叫做比較少人, 算臨近完場。都咪話唔誇張。

另外, 講番我細佬。依然無心機溫書。我唔知點教好。我唔想好似其他人咁一味叫佢死讀書, 我知實有人唔鐘意讀書, 唔適合讀書。但我唔知佢係唔係呢種人。我更無可能係呢個時候同佢講細佬呀, 你唔讀書都一樣得架。呢d 係我心底話, 但今時今日咁的競爭環境, 我絕對無可能講出口。尤其係我細佬係一個好唔通曉世事的人, 個性亦都係非常之求其。咁樣佢大個一係俾人教壞, 一係成日俾人呃佢 / 欺負佢自己都唔知。

我唔想咁。我可以點。

有無人可以教下我細佬。佢已經係中一喇, 我怕再拖會太遲。但我又唔知點救佢好。

唉。

Monday, June 30, 2003

30 Jun 2003

月尾。咁就一個月。唉, 我唔想個暑假過得咁快。雖然, 我認我係有少少頹。但係咁難得我終於適應得到呢種生活方式, 而我又活得咁開心的時候, 何苦要咁快就離開我呢...雖然仲有一半日子。

今日一早起身, 食阿爸煮得幾生下的麵, 然後同佢去一齊去尤德醫院做物理治療。之前都預左會等得耐, 但係都唔估到會做咁耐...咁我唯有係出面一邊等佢, 一邊睇埋我本 Man and Boy. Man and Boy 呢本書囉過好多獎, 好似好架勢咁。但我睇黎, 又唔係咩令我睇完之後覺得驚天地泣鬼神咁。開心位係少少好笑, 傷心位又唔係真係咁傷心, 儲得 mood 黎又轉左情景。要快的時候唔夠快, 要慢的時候飛晒去, 噓, 玩野咩。不過, 總的來說, 還可以咁啦。

等爸爸的時候, 我發覺牆上掛滿左好多的錦旗。當中好多都係病人送既, 表揚物理治療部的醫護人員偉大的醫德, 妙手回春地為佢地醫番好個身子, 好多仲係多年舊患。我睇完之後的第一個反應, 係 「阿爸今次有救喇, 入面班人應該都靠得住喇咁樣。」之後係「其實我都有一份想救人, 想盡自己的力去救一個我可以救的人, 個一份感覺。只係, 可惜我好怕見到同血呀, 內臟呀等等有關的野....唉, 悲乎。」

等左好耐之後, 我地去左港運城。無錯, 又係從前我的溫書集中營港運城的 foodcourt. 今次帶埋阿爸黎, 又可以飲珍珠奶茶, 又可以探下港運城, 又可以食下野, 幾好。之後, 我地去左幫阿媽買藥。呢隻大陸的藥真係得人驚, 叫做康復新液。咁呢支康復新液到底有乜野得人驚呢。首先, 係佢既爆笑材料。你估下呢樽 100 ml 但係賣 $40 RMB 的野係用乜野做? 答案: 康復新。康復新液係用康復新做既。康復新係乜野? 邊能個知...仲有, 佢盒身上寫住的地址係「云南省昆明市黑龍潭」就係咁多, that's all. 等於我話俾你聽「廣東省香港市新界」一樣咁無聊兼無稽。

驚人的係, 跟據藥方, 我阿媽一買買廿枝。二十支...痴那線。佢同事又要, 託我地一次過買埋, 我一次過抬住四十支番屋企, 唉。

所以話, 身體健康係重要...因為有錢都買唔到, 買唔番...「我只想~~身體健康~~」

番到屋企打 Diablo II 。屈指一算原來都幾耐無打過機。立刻怒打。但係發覺越來越悶, 來來去去差唔多的背景, 來來去去差唔多的人, 來來去去差唔多的顏色, 打極都唔完, 又打極都唔夠我超強白骨兵團打的水皮怪獸, 仲有版圖大到喊, 行成日都未行完一個部份的版圖, Holy ....
無辦法, 唯有繼續玩到尾。Though the best is yet to come, we will meet it in the front.



對留言: 第一, 我唔算好文彩。Dick So 日記文彩仲好過我, Wilson 都好, 不過佢收埋左。
第二, 多謝你咁「睇得起」我
第三, 出書? 咁多無聊廢話都出得書? 唔怪得Lemon Tse 都居然夠膽走番出黎唱歌, Boy'z 都可以咁多歌迷。睇怕遲d Wilson 都可以開歌迷會...............技安都有。 ^__^

Friday, June 27, 2003

27 Jun 2003

今朝約了 Simon 一早起身去游泳。本來我能準時起床的, 但後來我又發覺自己根本沒有精神在預定時間之內收拾好行裝, 便打個電話索性告訴他我來不及了, 等多一會兒。反正他也還沒有出門, 沒甚麼大問題吧。

很久不見, 他整個人也長大不少了。乍看下去, 不再是從前的那一個傻小子。我一直都希望你能比我更快的長大, 更快的比我了解自己的人生, 了解自己存活著的世界。這一個願望希望真的能實現吧, 因為這個世界太過須要你長大了才去面對, 這個世界太多事你不長大不成熟不了解就會吃虧的。雖然我不是很老, 不是看透了很多的世事, 但我見的, 我有信心比你多…

回說去游泳。本來我想游早場的, 因為自己貪睡和手腳慢, 收拾細軟用了很多時間, 去到的時候已經是十一時, 真的要游的話只能游一小時, 還沒有計算中間的更衣時間…這樣趕來趕去實在是太沒趣了。於是臨時改變行程, 先到歷史博物館看 Napoleon Bonaparte.

那一位破崙兄嘛…又真夠他囂張的, 軍事力又強, 城府又深, 心計又高, 又有自己的帝國。可是呢, 其實我覺得他不應該那麼快就恨不得捲土重來。如是他能忍一時之氣, 能在 Elba Island 上多忍一時, 多屯積勢力, 以時間來沖淡敵對三國的防備, 就不會落敗於最後的 Waterloo. 實在也是太悲哀的, 一名顯赫一時, 東征西討的將相之才, 就此敗了最決定性的一陣。最後落得放逐荒島, 「赫」死異鄉。也罷, 英雄但求顯赫一時, 名出一世。一代英傑, 就是像拿破崙一樣, 也有煙花般的生命 – 綻放過燦爛的煙花, 縱是生命再短, 數百年後依然人所共仰。

回說展覽本身, 展覽場地其實比我預期中的小。我以為會好像香港故事一樣的大。但不同的可能是因為香港故事是常設的展覽, 基本上接近永久展覽, 所以做得大型一點, 做得華麗一點, 也不怕在入場費中, 在短時間中難以回本。但其實拿破崙大展自己本身都來頭不少, 雖然有很多展品是我 1 想不到會是展品之一 2 想不到他們(歷史學家) 居然可以弄到手 3 想不到那麼微不足道的東西也可以道出一大個故事出來。至於展品當中的, 首選皇宮中的地毯。該塊展出的地毯, 本來是放在拿破崙的皇宮 ( 應該是 Palace of Fontainbleau ) 裡面的。我最忘不了, 是因為它的 size. 香港中的家庭沒有多少個可以放得下…足足有一個課室那麼大, 一整張過的正方型的非常華麗的地毯….要不是那兒是博物館, 要不是我從小就被教導不可觸摸博物館中的展品, 真的很想摸摸它。另一件就是大家(有讀 history 的) 都非常熟悉的一幅油畫。那一幅油畫就是破崙兄騎著一隻白馬, 那白馬前蹄躍起, 馬首仰天, 殺氣騰騰。但馬上的破崙兄卻氣定神閒, 但又不失英姿凜凜, 高舉右臂指向連綿不絕的重山險峻, 誓要麾下的兵馬火速越過 The Alps營救意大利。肩上鮮紅色的斗篷被風吹得棋掛在背, 仿似在你面前颯颯有聲的, 好不威風。這一幅畫, 就是各張記同學初中時 History 書的封面圖案, 就是 exactly 那一張拿破崙的油畫。今天我見到真的那一張…非常大, at least 有三米高兩米闊。如此的一張大畫再被掛起, 以射燈照射著, 區區的一個 Tommy 仔站在前面, 無論我如何把自己直立, 讓自己也像佇立在展場中的一個男人, 都不及一個畫中的一個…巨人。先是那種 absolute size 上比較了的感覺, 然後是那種英雄感的風範, 感到比壓下去了, 也是正常的。就像 Beacon Hill One 那樓盤所說的﹕「風範, 是說不出來的。」

至於我自己嘛…其實我還是很睏, 很睏。所以我很難才能真的集中十二分精神去欣賞那些展品, 去讀那些解構該件展品的小牌子, 去思考那一些故事, 去找藏在腦中在深深處的, 僅存的一點點 history knowledge. 雖然展館不大, 但也用了我們一個多小時去走走。真的細心看, 真的有心情看的話, 肯定不止。

之後到了麥記吃lunch。又是麥記, 救命。Why don’t they just have something different for me to try, God damn it. Always those crappy foods! 然後於閒談之間, 才想起我還沒有知道他的放榜日子, 一問之下, 才知道原來下個星期五就已經是了…本來那一個星期五是我和 Carmen, Claudia and Vincent 四個人一起去旅行的, 後來我要看牙醫, 逼不得已, 又要推遲。現在又要放榜, 又要看牙醫…怎算? 牙醫的檔期可一不可再, 下一次要排到九月! 簡直無稽。

下午二時許, 終於可以游泳了。其實也算不上是游泳, 因為實在太多人了, 而且有兩個人在, 不會是訓練為目標, 大家都是純粹優閒得很, 非常怡情地「浸」水。有九龍公園的泳池還真的不錯, 一來真的很大, 二來又有很多的泳池可以選擇, 各適其適。我們一開始就不選擇大池(標準池), 先以外面的橋底戶外大池作個熱身。才下水, 就覺得水比想像中的冷。而且今天沒有陽光, 池水不能「充電」, 不是想像中的和暖。然後就是走遍各池。淺水池很好, 水又暖, 又遠離外面的人群 – 要知道, 九龍公園的泳池是很「變態」的, 是 open to public 的, 每一個在九龍公園內的行人都可以輕易地看著所有戶外池中的泳客, 而且可以看得很近距離。為此, 冠羽不斷地似有還無地怨著太多行人把我們 (不只我們, 所有泳客也是) 當成動物園中的動物一樣的看, 差點兒沒拋食物進來餵我們。後來我爸爸也說, 很多女孩子都不喜歡到那兒, 因為實在是太過「危險」了, 橋上路上, 到處都是想一飽眼福的「伯父」, 唉, 又難怪, 如此設計, 男孩子都會感到怪怪的, 莫道女孩子了。

在淺水池中, 有一刻風突然刮得很厲害, 池水都起了很多的皺紋似的波浪。我把身子壓低, 在淺淺的水中四肢爬行著, 眼前所見的, 就好像一隻大船, 在無邊際的茫茫大海上逆風破浪而前。我曾經在Star Leo 的頂層真的見過那一種景象。黑黑的, 無盡的海面, 海風刮起一層層遠看似是漣漪, 其實已是滔天巨浪的波紋。天上沒有一片雲, 只有一輪白得透明的月亮, 把整個漆黑的海面都照亮起來。明月旁邊的星兒都不甘落後, 迸發著能與明月爭輝的星光。從前我聽小學的老師說, 月亮附近的星星都看不見, 因為月亮太光了, 那天一見, 才知道天外果然有天。巨大得嚇人的郵輪繼續向前滑動, 剪過無力抗衡的海浪。一切都很美, 一切都很浪漫。一切我都記得非常清楚, 只因一切都實在太美了。就是因為望著那一刻的美, 更讓我想起自己的殘缺。就是因為太浪漫了, 我想的事都完全沒有發生過, 某些事的發生讓我感到非常孤獨。我其實根本就沒有心情去那一次旅行。那一刻, 我還記得心中有不揮之不去的傷感, 我獨自一個在沒有人的promenade 近船頭上, 獨個兒對月說心底話。情之所致, 傷亦深。

夜了, 這篇越打越長都還沒有打完的日記有點兒令我手足無措。下次再說。

另外, 多謝 Chris and Vincent 的留言。下次答幾時識你。

Wednesday, June 25, 2003

25 Jun 2003

(續)
而其實, 是不是因為暑假的生活太過無聊, 才會令我有這一種體驗呢? 要知道, 通常人在百無聊賴的情況之下, 心景總不及活躍的時候開朗, 亦可能因此, 心中的想法會比較灰暗。我認為我的暑假生活或多或少當然有影響。而如果你叫我去找一些令我自己開心的事做時, 我也會有一點點不知所措, 因為我以前最渴望的打機, 要生要死也要打機的心態, 已經減弱了。只是, 很偶然地會有一兩隻真的比較吸引我投資很多時間的遊戲時, 我就會投放很多時間和精神下去。近來的遊戲, 只有三國志九和 Diablo II 。玩得最瘋狂的時候, 是我還住在恆生的日子。那時候, 就算是考試, 也玩得無日無天。也許, 這就是我考得不好的原因 (又也許, 我不用加 "也許" 這二字在前面)。

從少到大最愛做的事, 熱情已經減退。就找新的刺激吧。有甚麼新的刺激...



今天約了 Goldtex 的 Bosco 出來傾生意。

隆重其事, 我先飲一杯奶茶提神。 Energy Level 提升之後, 就和 Queeny and Wendy 一起, 跟兩位商家佬隻抽。一開始就先給他們一個下馬威, 讓他們明白我們不是對成衣毫無認識, 也不是你們的待宰羔羊。過程由 warm up 到大戰, 到最後換地方, 然後...大獲了, 我的奶茶力降低了, 整個人都開始頹下來。之後就沒有多說話了, 之後一直到是等他們多說, 自己就有須要的時候才提問多一兩條問題。

後果? 等他們報價。大家姐覺得, 他們很商家, 很蠱惑。是嗎? 已經不算是蠱感的了。
很好呀。

希望可以有DOS 那樣的 quality 吧。

GRM 2003~! OOooosh

Sunday, June 22, 2003

22 Jun 2003

今朝一早俾阿媽叫醒, 去灣仔接祖母來飲茶。之後, 因為阿媽個同事要幫佢係屋企煎藥, 所以我都係拿拿聲走。既然都未番得屋企, 不如就出街行下先, 好過咁早番到屋企。

離開灣仔之後, 又係向東行, 走向 188. 走到 188 後, 發覺裡面起了一些變化, 很多商舖的位置都改變了, 又有很多以前有商舖的地方都變了。正當我想找一個我從前買 PS Game 的翻版店之時, 發覺它也已被對面的漫畫店吞拼了。掃興。整座 188 也沒有賣 PS Game 的地方了, 走。

前面的 298, 一樣的多人, 一樣的沒有遊戲。走。

走著走著...我才想, 為甚麼我從前很喜愛這樣的狂, 現在呢, 卻沒有了那一種邊走邊期待著下一個中途站的心情。走著走著, 我才覺得, 我好像是為了甚麼目的似的才行這一條路, 甚至, 有一點兒像上班, 像工作一樣似的 on duty 才到此一遊。沒有興奮, 也沒有期待的狂街, 感覺未至於不好受, 只是未免有點君子之交。

走到時代廣場, 下意識地想走到九樓去打機。才又想起這早已成了歷史, 心又沉了一點兒。滿街都是人, 我卻像之其中一個沒有靈魂的驅殼, 心中沒有思想的瞎走著。我不會用行屍走肉來形容自己的...因為我根本不是, 只是, 感覺很「虛」。

然後想想, 很久沒有到洪葉書店了。從前, 聽別人的介紹, 很愛每個星期天都到這裡遊一敞。從前的每個星期天, 在灣仔飲完茶後, 總會沿著剛才說的一條路徑, 走到銅鑼灣, 然後打機, 或看別人打機, 也會看上半天。離開時代之後, 就會走到洪葉看書, 因為有椅子坐嘛。

洪葉沒有太多的改變, 仍是這麼的舊模樣, 樓底還是這麼的矮 (想到這裡就想到 Vincent) 。然後, 就拿著一本有關叮噹收藏集的書本, 拼命的啃。我很小的時候已經很喜歡叮噹, 當年的我, 完全地「刨」熟了叮噹的劇情。 這書真的很有趣, 要是給 Gary 知道有一本這麼的書, 我想他會當場發癲。換了是我, 那天在太古城的 Hong Kong Book Centre 裡看見一本有關加菲貓的收藏本, 我也眼睛掙大, 呼吸也大了~

看完叮噹那本書之後, 忽然感到鬆一口氣。「怎麼會有這種感覺的呢?」我奇怪的問自己。想想, 可能是因為自己已經太久沒有看書了, 太久沒有看一些真正令人鬆一口氣的書。我這兩年在追的, 都不過是那一本厚得要命的 Lord of the Rings. 沒完沒了的追看, 卻不是真的很吸引, 只是想, 看來看去都看不完, 卻又不捨得突然間不再看, 唯有快快的看完了它。

我感覺到的是, 我很久沒有很書了。我很久沒有再看那種書, 是看完之後能令我感到 impressed, 能令我感到心靈上有一點清涼的書。我一直看的書, 一直看的報紙, 一直看的大學, 一直看的世事, 都只是給了我很多的心靈上的 burden....而我自己也不自知地日漸地吸收著...還要是灰色的心埋 burden. 感覺當然不好。只是, 我自己一直都不感覺到這一個問題。我一直都只是覺得自己漸漸地和從前的自己不同了。但是, 有甚麼的不同呢? 我就是說不出來。具體的來說, 我沒有了思想。很多的時候, 我根本都不想用腦袋, 要用的時候, 也只會在工作上發揮到一點點的用。其他的時候, 我已經忘記了如何思考自己的問題。我已經忘記了如何想想自己是一個怎樣的人, 今天我做的事對我有甚麼的意義...我只是如同上班一樣, 如同 on duty 的, 像是有一種職責的 - 活著。而不是有趣的, 也不是有活力的。

生活就此漸漸地色彩褪去了也不知道。從前我看的世界, 色彩多麼的明顯和鮮艷。今天的世界, 不知不覺的, 竟然變得暗啞了很多。鮮紅色的變了淺紅色, 鮮黃色變了不光鮮的泥黃色, 耀眼的白色變了暗淡的粗糙的米色。最怕的, 不是變了, 是變了我自己也不感覺到。直到此刻。

別人說過, 長大了, 看的事物就不一樣, 很多年少時看到的 excitement, thrills 等等都沒有了。生活會變得一成不變, 世界會比你所看到的, 所想像到的更灰暗。我從前也想像得到, 那會是一個多麼沒有趣的世界, 那會是一個多麼令人感到只是活著卻沒有活力的人生。所以我那時也想像得到, 我是多麼的不想長大。而接近我的朋友都知道, 我當然是一個長不大的傻仔。

我當然希望自己是局部的長不大。局部, 是因為有時候你真的須要比較成熟一點, 有時候你大可以不成熟。我當然希望這一個局部是如我所願的局部。而事實, 則不知不覺的跟我心想的, 不盡是一樣了。

也有人說過, 不要老是想著自己從前如何如何, 應想著自己以後應該如何如何。可是, 當變化真的來了的時候, 而不是別人造成的, 我能怎樣呢? 往後看的態度, 有時是消極, 有時, 是更消極。



老實說, 我總覺得自己真的很笨。說了這麼多的話, 我還是表達不到自己心裡的所想。不錯, 之前所述的確有一點我心中所想的。但我估計那只是說中了心中的一兩成。

Saturday, June 21, 2003

21 Jun 2003

無野做。
今日都係咁, 交低份暑期乘車証申請俾 Wendy , 然後補習, 然後番屋企, 花左好幾個鐘頭, 跟住網上的指示, 照辦煮碗地用 Hex Editor 改左我玩緊 Diablo II 的 Character....by Trial and Error 我終於整到一個好勁但又唔係太勁的 Character. 實驗成功之後, 我就用係我真正玩開的角色 Hellforge 身上。Hellforge 係一個 Necromancer, 係我甚為喜愛的角色, 加上佢年少時 (初初玩個時) 就已經得到好的裝備, 如魚得水, 玩得份外順利。今次我一次過為 Hellforge 強化, 改左幾次個 Hex data, 就終於令佢由十個人 / 十排骨 變成 三十六排骨! 強! 白骨兵團 !!! 開心!

夜晚食 Pizza Hut 外賣, 好食, 我鐘意, 但係阿爸話太滯, 食完無幾耐話覺得好滯。
佢話, 我鐘意食的佢唔 like, 佢鐘意食的我唔 like, 呢d 就叫 Generation Gap.

唔係卦? 咁解法架咩??

Friday, June 20, 2003

20 Jun 2003

今日一早起身, 就飛身去中環, 去睇牙醫。
訓係牙醫度, 個人都根本未訓醒, 好多時候都係好想訓, 但係因為佢係我d 牙度又整呢樣, 又整個樣, 攪到我好多時都幾痛下, 所以根本驚都唔夠膽訓著。然後睇住佢又落膠水, 又落鐵線咁樣...攪左成個鐘頭, 我個口就打開左成個鐘頭, 乾晒...完全乾晒。

不過, 我願意挨。我不介意口乾, 也不介意眼訓。

因為, 今日拆箍了。

真的拆了。

三年。

三年了...

之前, 的試過發怒, 試過發脾氣, 試過麻煩, 試過俾人取笑, 試過自卑, 試過不高興, 試過怨恨其他人, 甚麼都試過。為一副牙齒, 弄去了三年的光陰, 換來終於整齊的牙齒。

值嗎? 不知怎地, 我沒有半點開心的感覺。反而, 我的感覺早已經麻木了。太多次的空歡喜了。就算今次是真的, 我也沒有多麼誇張的開心。反而, 如果牙醫再跟我說又要再拖多一兩個月, 我也已經習以為常, 如像八達通裡的錢用光了, 久不久又要增值一樣。

我去了牙箍的那一刻, 那一刻真的很突然。好像失去了一個我不太在意的朋友一樣。我不會很在意 / 喜歡他, 但消失了, 又有一點兒想起他。

犯賤? 不是吧?

我只知道, 有時我很想快快拆掉, 有時, 沒有那麼在意。 別人說, 有一排很漂亮的牙齒, 理應感到開心和自信呀。我想, 我的牙是整齊了很多, 但是我的樣貌都不好, 牙齒雖齊, 卻黃黃的, 何來好看。或許, 會有人覺得是吧。希望是吧。

我沒有自信嗎? 我不敢肯定。也許有也許沒有。 God knows.

Tuesday, June 17, 2003

17 Jun 2003

呢兩日都無出街, 幾悶下。
無理由呢個時候搵工架?
補習...佢地唔搵我, 都無辦法架, 我都想做多幾轉。
打機...我開始覺得有少少罪疚感。始終, 好似真係打得太多喇。
去街? 我都唔想去邊度先好。呀, 講講下, 不如今日去行山算喇, 反正難得個低壓槽走左, 風和日麗。

近來見到好多朋友仔係我個日記度留言。多謝大家支持。其實有時都會幾開心, 原來有咁多朋友仔都八八卦卦地走到我呢個 website 度睇下我講過d 乜野。有中學同學喇, 有預科同學喇(其實都即係中學同學), 有大學同學喇, 有唔識的朋友喇等等。

不過我又係度諗, 如果咁多人睇我個日記的話, 而如果我又想講一d 會令佢地唔多高興的說話個陣, 咁點算呢? 拿, 我當初想係度講野, 無非都係因為我唔想當住其他人面講出口, 所以先係呢度打打打。但係如果我想講一件事, 係我唔滿意某人, 而某人又係會睇我呢個日記, 咁...我應該點呢? 我應該自己繼續講自己想講的野? 定係為免日後面左左而就住就住? 而如果就住就住咁講, 咁我係呢度打日記黎做乜野呢? 仲有咩意思呢? 唉。Another mystery of universe~!

Saturday, June 14, 2003

14 Jun 2003

今日同 Wilson 慶祝生日, 當然, 事先佢係唔知道的。

今日食 Marco Polo 的 Spice Market, 如我所願, 開心! 好食到癲左, 今次果然無錯, 連勁咀刁的 Jess 呀, Janette 呀, Wilson 呀, 都話好食, 咁就當然係好食喇, 我阿爸都好鐘意食。
我地起切就出左去囉左五件不同的切餅, 咁就叫做生日蛋糕, 上面仲有 candle 架!
跟住...恐怖的事就發生左喇...壽星公趁我地出左去囉野食個陣, 一口氣食晒五件餅。之後話好, 再出去食多半打...然後話好飽, 但係跟住都食左十幾廿支串燒....

講起串燒, 真係好味。沙爹 sauce 又正, 食落唔係一味得個辣字, 有燒出黎的香味, 有肉汁係裡面(燒物都有肉汁係裡面, 好難架, 燒個個人仲要次次都 manage 十幾廿支串燒, 燒耐左少少都唔得了) 咁即係到底有幾好味? 每張[木台] 都有人爭住食, BBQ 個檔口永遠都有人係度等囉串燒, 仲不時要出手出力爭到先有得食....

跟住, 魚生, 每次食 Buffet 都會食 (如果有的話) 今次水準依然很高 (雖未致極高), 每一卡都咬落有口感, 好有三文魚味, 色水都好鮮, 正! 我本來想怒擦一餐, 但係諗下仲有好多其他野食, 唔好一味食晒, 一個唔覺意, 食飽左個肚就真係大檸樂。

沙律, 正, 配埋佢個mayonnaise / thousand island, 就算凍冰冰的沙律都會聞到香味, 莫講話食落口! 又係個句喇, 唔係驚太易飽的話會食多一碟!

不過....佢有個檔位係出肉的。個個位通常係dinner buffet 呢就係好 high 地有位廚師係你面前燒一隻something like 羊脾的物體, 你話要幾多, 要邊度, 佢就切俾你。lunch buffet 當然無人 serve 你喇, 但都有舊肉係度。當我以為係好正的乜乜肉個陣, 食落先知原來係唔太高級的肉, 有少少失望。其實有少少似...冷盤呢, 通常咪有幾種凍肉既? 個種囉, 不過煮熟左, 燒過下咁囉。

中式食物...唔多, 亦唔及串燒受歡迎。燒肋骨配些少炒飯, 唔錯。不過唔夠咖哩好食, 有蛋咖哩 and 豬咖哩。蛋咖哩比較平平無奇, 但豬咖哩就食到我 lam lam 利~~!! 再加些少印度三色米炒飯, 有少少硬身, 配多件印度薄[缶掌], 撈埋d 豬咖哩汁, 有加埋一齊煮過, 但都竟然仲有磨菇味的磨菇, 幾隻味一齊出晒, 嘩~~~~~欲仙欲死~~~~~~~

但係, 咖哩好味都會辣架喎, 個口痺晒, 點食其他野, 例如試真d 其他野的味呢?
無問題, 食番一口入口即溶的 Papagallo 雪糕, 有我至喜愛, 超級 like 的朱古力味, 仲有好有咖啡味的炭燒咖啡味, 有入口即溶得更快的芒果雪葩...入口清新。 食幾淡雪糕/ 雪葩, 清一清個口, 試真d 其他野食的味道, 你會發覺....嘩~~~~~~欲仙欲死 x 10 ~~~~~~~~

之後, 仲有令人一食就難以停低的朱古力 mousse. 天呀...如果我好似牛咁有四個胃就好喇....

跟住, 知道玩具反斗城開倉, 就飛到去 shopping. 然後, 經過好大輪的麻煩野之後, 就幫 GRM 的 O camp 買左四大把水槍, 勁大支, 都係八十蚊支, 正。然後先飛到去補習, 又遲大到。

今日除左壽星公之外, 我都好 happy 呀! 因為有好多好野食同 friend 一齊 share 呀~~

Wednesday, June 11, 2003

11 Jun 2003

今日焦點: 組聚

嘩真係笑到癲左, 幾個白痴隻埋一齊, 痴痴呆呆坐埋一台, 超正, 低能過小學的笑話 and 笑料源源不絕, 保証有氣無定抖。呢度比較好的地方, 其實係講野比較放好多。以前我遇過的某一種朋友, 講野要就住就住, 真係幾唔暢快下。呢度, 講起笑上黎真係無面俾, 都幾得人驚下~~
就係咁, 詳細情型都無乜好講, 總之笑死。
至於食野呢, 就係食 Neway 的 K Buffet。野食少得黎又唔好食就預左架喇, 算喇, 我份人要求好低, 你做得出咁上下都 ok la. 唔通我去到邊個 Buffet 都要求到好似 Spice Market 咁正咩...又唔係果種價錢, 傻咩。
不過, 食 K Buffet 有一個好大的問題, 就係, 你會不停咁食食食, 因為好多時我都唔想唱歌, 所以就會坐左係度, 又因為佢不時都會換下野食, 所以我都會不時咁出去睇下仲有乜野新野食咁樣。Just like this, 不經不覺就食左將近係兩餐的份量, 我自己都飽到想死咁滯, 雖然唔係太好食。
that's all.

仲有, 今日收到新的成績表。呢一份 Revised 的成績單竟然係將我個 Grade 不升反跌, 好令人沮喪 and 不忿。係 Geography of China. 我估唔到佢仲會再 downgrade 我。我真係唔知佢想點樣。我有幾唔開心, 我諗你都估到。

Monday, June 09, 2003

9 Jun 2003

講番加菲貓專門店
本來Vincent 同我一齊去既, 不過後來行左好耐都搵唔到, 佢就番左屋企食晚飯喇, 咁但係我唔想咁快就放棄喇嘛, 所以我就繼續行住先囉。我真係諗住, 既然我都已經搭左咁耐車, 一場黎到, 咁點解唔由頭行多一次呢。為左我可愛的加菲貓, 就算對腳已經累得不能再行, 都要找!
到最後, 找到了。唉, 真係幾開心下。不過原來間野變得非常之殘, 又唔係想像中咁多加菲貓, 仲夾雜左好多其他卡通人物, 唉。都唔係純正的加菲貓店。算喇, 咁遠水路, 一場黎到, 都買番些少 "手信" 番去咁喇。好過無呀嘛。

回中學
星期五, 番張記。個 feel 幾開心, 竟然同 P lui 同 Anna Eric 等等一齊吹水吹幾個鐘頭!
睇黎我地都真係幾八卦~~~哈哈哈

星期六日, 悶, 補習, 悶

今日, 著到成個白痴仔咁去 mark sponsor. 上左去一間叫菲士蘭的公司個度, mark 到好大個 gift pack 番黎, 每人一個添呀! 好犀利呀! 真係估唔到會咁好, 我仲以為佢會考慮下先俾我地, 即係, 好可能係唔會黎任何野我地。到最後, 都幾好呀, 我都幾鐘意佢地個 offer, 雖然, 佢地個一個要我地幫佢地 hard sell 到咁樣的條件又真係幾難攪下....你知喇, 我地都唔想個 O Camp 攪得太過商業化架嘛。點到即止咁喇。仲有呀, 我真係好鐘意 T-shirt 牛仔褲出街, 實在太輕鬆。又鐘意背囊喎, 一黎又唔會淨係用一邊 shoulder, 二黎又唔使我用手拿住, 等我可以有兩隻手空出黎拿野。



即係話, 我唔鐘意公事包型物體, 唔鐘意恤衫, 唔鐘意打tie, 唔鐘意 Formal

Sunday, June 08, 2003

8 Jun 2003

上次講完 quit 宿, 今次又多少少新野講下。
其實開始有少少覺得, 呢本日記開始變成週記...實在太少上黎喇, 要多多留言先得。
端午節前一晚, 阿爸終於肯出街。親戚們見到他, 都有點開心, 因為他終於都可以走到街上了。而大家都談論的是, 他的肥肚腩整個不見了。整個人都瘦了幾個碼。以前的褲子都只是覺得緊緊夠闊, 現在呢, 每一條褲都鬆得像快要脫下來似的。足足瘦了幾吋的腰圍, 換了是我也會甩褲。而他亦勉為其難地坐了整整一個多小時。回家的那一程的士上, 他累得, 也痛得像一灘爛泥似的。唉。

之後第二晚, 端午節那一晚, 我們到"娘家"做節。大家又是差不多的反應, 說著我就是見到陳生嘛, 你又說不是...他說他不會來的嘛, 我怎知他會挨痛來的...諸如此類。爸爸不能再喝酒, 席上獨剩低姨丈一個人喝酒。既見到桌上有多了的酒杯, 就說道: 你代父飲吧!!

滴汗....
.....我鐘意飲酒架, 死野! 你.........唉

到最後, 挨左一杯。面都紅晒, 人都慶晒。不過沒有滿足的感覺, 因為不愛喝, 不擅喝, 就不會想喝。

星期四, 到了Vincent 仔的家煮飯仔。其實都真係幾遠, 不過既然佢一路都想叫我去, 咁我當然都會去喇。佢間屋呢....就真係大囉。又多空間, 又乾淨, 又整齊。....反觀我間屋....唉...恰恰相反。之後, 估唔到等佢煮一餐要等咁耐, 我以為我遲到左咁多之後佢已經整好晒, 點知都係差唔多我去到佢先煮。果然手勢唔差。不過學佢話齋, 佢d 雞翼又真係鹹得滯...好彩我自小食鹽多過食飯, 頂得住!~

之後, 飯後吹水會, V 對 T, 我又將所有 Mark 哥遺留落黎的 Natural & Agriculture 的心血(仲有我親筆寫下的好多心血) 借晒俾佢。希望佢睇完會有我咁勁, 哈哈~~(雖然佢已經勁過我好多, 佢今個 sem GPA 完全 outrun 左我....嗚嗚嗚....唔好提....嗚嗚) V_______V

之後就打 X-men Academy 2。估唔到佢會鐘意, 我仲以為佢會唔鐘意打鬥 game or something like that, 或者係會嫌佢低能鐘意。幾好呀。之後打 Metal Slug X, 呢隻我同我細佬打爆晒, 又係一面叫手軟一面打到鬼咁肉緊。好玩。

係佢屋企的時候亦見到佢的弟妹, 尤其以佢弟弟最驚嚇。我的確望住佢成秒都呆在當場。驚嚇之處係乜野呢, 唔話你知, 不過唔係衰野^^

之後走到葵涌葵芳尋找傳說中的加菲貓專門店, 之後呢, 現在沒有時間說了, 下回分解。

Tuesday, June 03, 2003

3 Jun 2003

今日諗住好好野喇, 可以係七點鐘佢關個 website 之前黎到寫日記。點知, 俾我見到佢突然間話全面開放...咁即係開到幾時呢? 唔知喇, 希望下次的開放時間係半夜三更喇。

上次寫日記又係好耐之前喇。中間又發生左少少事咁喇。

首先, 就係我要 / 已經 quit 宿喇。本來我以為我都唔應該係咁多野, 以為一個大紅白藍袋已經可以裝得七七八八。點知....到最後竟然大大小小都有成十袋咁多。都真係幾誇張。
就係我等緊第二朝 quit 宿的前一晚, 俾然俾我知道左一個噩耗...我下年又係要住番恆生樓。
點解會咁架。....即係咁, 我又唔係真係完全唔想住恆生樓, 話晒佢都叫做有一個好靚的大 Common Room 同 Washrooms.
但係!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
佢d 房真係極度極度殘到你驚, 我真係好懷疑係唔係八六年落成之後完完全全未裝修過。咁樣諗落, 又真係越諗越得人驚。而且間房又細...真係幾細下。尤其係當其他人都話崇基何宿都算細....我就覺得個d 人真係痴線。你睇下新亞志文同我地恆生...轉個身都會一拳打到你同房飛出窗。
所以, 我本來都有少少離愁別緒...但當我一知道我出年都係要住番係呢間 "令人身體健康" 的宿舍之後, 就一d 離愁別緒都沒有了。仲拿拿聲執野走人。
第二朝....
因為知道要預多少少時間作最後 pack 野, 所以一早就起身。但係其實 "一早" 都成十一點幾十二點。好唔捨得咁執好埋部電腦, 神神就打電話黎求救。三點鐘就 quit 宿, 佢居然可以仲有好多好多野未執好, 仲大安旨意咁等我黎同佢執....唔係呀化。
無計, 無可能睇住佢死, 唯有過去幫佢做牛做馬。之後佢仲寸我話好熟手喎, 讀完地理出黎唔"dup"石仔都可以做搬運呀下。
之後, 我地訂的所謂"中大搬宿"服務 fig 起我地, 竟然話黎唔切。攪到 Emily 拿拿聲打去另一間問價, 好彩 book 到。但係諗番轉頭, 竟然係同我之前所搵到的一個比較相熟的人, 差唔多價錢。唉, 仲要上上落落都要九秒九, 唔係就會俾人扣錢。雖然個司機都幾好人肯幫我地, 但係我諗番起所有野, 真係得番個DILL 字....

Saturday, May 24, 2003

24 May 2003

嘩 ! 上一次寫日記竟然係成個月之前?! 真係太太太誇張喇....
唉, 無辦法喇, 呢個日記的 site 半開關狀態嘛, 我都唔想。個日我諗住考完試, 都好耐無上過黎盡下日記之主的responsibility, 點知先知原來個 site 已經 closed. 個一下都幾 shocked. 雖然唔知點解我覺得呢個總會係遲早的事。通常都係咁, 尤其係 internet 的免費野, 通常好快就玩完。原因不外乎 suddenly 好多人湧入, 以免費運作的 server 頂唔順, 頻頻整又頻頻壞, 到最後, 網主索性收錢, 然後, 十之八九的 free users 都走佬, 到最後, 無乜人有心留底俾錢用, 到最後, 成個網都收皮。
通常都係咁
香港人嘛...

真係好耐未上過黎。呢個朝五晚七的政策真係唔多岩我。事關我通常都係晚十朝四先打日記, 如是者, 呢個月黎都未打過。你知喇, 我家陣日日都係係度打機, 晚晚都打到夜一夜, 朝朝訓到"黃蕉疊晏" (咩黎? 唔知, 我阿媽成日講) 邊度有可能有時間打日記?

近期...都發生左唔少事lu。有好的有壞的有中性的。好的, 就係我打爆機。壞的, 就係我打爆眼(的微絲血管)。中性的, 就係部機無事。....

...講笑者~

其實, 好的, 我暫時都想不起。也許就是馬馬 and Simon 都考完公開試了, 可能有時間跟他們出去玩~(just not swimming is ok, i think)紅社都好耐無聚舊了, 好掛住那一種感覺啊! 而Sarah 呢, 就在新亞裡頭賴死唔走, 話好享受裡面的生活喎! 其實我都係好享受架, 但係奈何有時都想番下屋企, 有時又係須要而不是想番屋企....所以咁囉。下年喇, 希望下年會好少少喇。人人都話我實走唔甩恆生樓架喇喎...我唔知喇, 希望走得甩喇。走唔甩....咪當強身健體囉....唉 x 100。

至於唔好的事...就多囉
首先, 我阿爸的坐骨神經痛日趨嚴重, 仲要係幾嚴重下。根本都坐唔到, 企都痛都瓜瓜嘈, 唯有訓低係度先會比較無咁痛...都仲要係咁痛咋, 唔係唔痛呀。睇左好多次醫生, 使左好多錢....唉, 倒水咁倒....都唔知點算好。未完架, 仲有得講, 仲有我細佬跟佢個d 豬朋狗友學壞左....攪到對面樓幾乎報警...唉
趕搵食呀, 有機會先再打。.....唉

Saturday, May 17, 2003

17 Apr 2003

好眼訓
我想話
成個 sem 就黎完, 都係乜都無做過咁樣...好似好無聊咁樣, 好似好無建設性咁
有些少後悔...
游水個度....我諗番起, 其實我真係未夠班, 真係好唔夠。可能係因為佢地想要新血所以先逼住不如搵埋我咁樣...我並非刻意妄自菲薄, 我覺得好可能係 partly 的事實。
所以我一諗到呢點, 就會覺得自己連今年比較最大的成就都會無埋。我都就會覺得唔知點算好咁樣喇。話俾你聽我無唔開心都係假架喇。但係我又唔想做到自己咁唔開心。我身邊好多人都己經係咁唔開心, 我都唔想幫唔到佢地。就係咁。
但係, 幫到人唔代表幫到自己。

Tuesday, April 29, 2003

29 Apr 2003

清晨四時, 還有五個小時就要考 GRM 2103 Research Methods
不太緊張, 也不太放心
明明要計很多的數啊, 為甚麼你仍沒有睡呢?
我也想睡, 卻不知怎的, 總是睡不著。躺在床上一個半小時, 怎睡也是睡不著。
有點點擔心了, 還睡不著, 怎算? 明天腦袋仍能 function 嗎?
.............我真的不想 Re-take......絕對不可以...........

Friday, April 25, 2003

25 Apr 2003

唔想溫書, 但係就黎考試, 唔溫唔得。
打三國志打到上晒癮, 好好玩, 我差少少就統一到中國。記住等我。
Research Methods 勁憎, 又唔識, 好在有妹豬教我! 勁野! 終於都識少少喇!
Globalization and Development 超多野溫, d 野又勁 vague, 都唔知點讀
China Geog 作都唔識作, 吹都唔識吹, 溫都唔知佢想點, 勁唔知點
同房東食飯笑到反肚, 同大家姐 and 文物館雙煞食飯情況更嚴重, 笑到痴左。
好快就要 quit 宿, 有少少唔捨得, 但係我一諗起呢度樣樣都要錢, 又有少少想走。
唔想溫書
唔想考試
唔想唔想
都無得唔想


發動兵法‧奮鬥.....佐治都話未夠, 要出埋突進


不如出象兵呀~
^0^

Sunday, April 20, 2003

20 Apr 2003

今朝唔想起身, 但係想去飲茶, 咁咪去囉。起身飲完, 係阿麻屋企幫完手, 就去左港運城。
點解又番去? 唉, 考試喇嘛。本來想搵番之前個位去讀書既不過....咁鬼多人, 其實係好多賓賓, 咁算喇, 我的"愛位"隔離仲有幾個賓賓係度。成個星期無見, 佢地一定好多野講, 仲要講到好大聲咁添, 我咁我過到去都無用喇。走人。
渣華道library, 超多人, 無人驚肺炎, 高朋滿座, 潑水不入。走人。

好, 番到去則魚涌圖書館...好有 feel 呀....
當年, 就係呢個library, 就係呢個自修(自閉)室, 我同三兩個中學同學係度, 有文有理, 一齊去抗高考狂魔...呢度成個月的生涯, 就好似係上個星期發生的事一樣....唉, 光陰似箭, 歲月不饒人呀...(講乜野呀, 關乜事呀?)

見到個自修室咁多人, 費事入去爭喇, 人地要會考, 我一個大學生都仲入去? 好似好怪咁, 雖然我以前都見過唔少既, 但係....算喇, 圖書館都得架喇, 一樣者。之後就入左去喇。
讀得一陣, 就忍唔住拿一本 AL past paper 睇。個本黃 gum gum 的野, 一拿上手, 真係好有 feel 呀! OH GOD~! 我太掛住中學喇~~ (不過唔掛住高考, 唔該彈開~)

之後? 梗係發夢喇~~~一個鐘都唔夠, 就夠鐘又閉館, 走人。臨走前, 特登拿一本 2002 AL Exam Report 睇下, 快快脆睇下 Geog 個面係點先....衣, 好多 good 呀, satisfactory 呀, very satisfactory 呀咁喎...無乜 poor, mediocre, very poor 喎....比想像中的少喎。咁點算? 咁係咪即係上年份卷其實算易? 唔好掛? 諗諗下, 有少少失落添....唉, 原來份卷咁樣都算係容易。人人都識答既, 唔開心~~~~!

之後就回家了。當然又係 wasting my time. 完全控制唔到自己唔去浪費寶貴的時間。考試隨時都會殺到埋身, 點解仲唔好好裝備一下自己呢? 咁點對得住自己呢? 唉。算, 打埋下鋪機先諗, 我輸得唔抵。下鋪又下鋪, 下鋪又下鋪....

半夜, 同阿爸 share 一個罐頭淡菜。我都唔知淡菜係乜, 仲以為係真係菜。一睇個英文先知, 原來係海產貝類食物, 真係無知的少年。紅燒淡菜, 味道唔錯, 有少少辣。衣家係半夜三點, 係食完之後的一個小時左右, 我面上的唔知乜野腫瘤, 可能係超大的暗瘡, 變得極腫, 極痛, 身上長了的暗瘡的地方都腫脹起來, 好痛...好痛, 到底係太多油, 定太辣, 惡化了那些暗瘡, 定係...呢種海產於我而言, 太毒呢? 我無乜海產毒架喎...乜都食得既, 鐘唔鐘意食咁解之嘛.....唉也, 好大粒, 好俾火燒灼的感覺...... 好辛苦呀.....點解會咁大反應既? 好"那" 呀....好灼呀......

>__<

Sunday, April 13, 2003

13 Apr 2003

其實衣家已經係早上四點四十分, 已經係星期一, 但係我未訓, 都未算到左第二日。
開番學喇, 終於都...唔再停課。終於都, 就黎要考試。
尋晚我成五點幾六點先訓, 今日一點幾先起身, 好快, 就寫完 the remaining parts of the paper喇。
然後, 竟然係打左成日機。三國志九真係會令人上癮, 上得好犀利, 中毒咁。

唔好以再咁樣架喇, 因為考試喇.....考試喇....唔係講笑架喇。

衣家係度聽 Ricky Martin 的一隻 CD, 叫 Vuelve. 原來呢隻 CD 囉過 Grammy Awards. 真係好好聽。好彩買正版。
呢隻 CD 係我中四去美加個陣, 成程都拿住個 discman 咁聽既。十幾個鐘飛機, 好多次十幾個鐘的巴士, 連同其他的 CD, 我一路聽黎聽去都係呢幾隻 CD. 個陣我好鐘意呢隻 CD, 尤其係當我係長程巴士, 成車人都訓晒, 得我一個係度聽 Discman, 聽住佢的音樂, 望住馬路上好多好多飛也似的走過的白線, 望住好多我見都未見過的名勝, 望住好多我見都未見過咁肥的女人...真架, 坦克車呀大佬,...我會諗番起好多野

忽然, 我夢到自己一個人背起了背包, 一個人站在歐洲的廣場上。明明是陽光普照, 卻感到陣陣涼意。身旁的人都是外國人, 他們都一如以往的在自己熟悉了的街道上無意識地走著。我卻是個初來報到的小伙子, 對一切他們認為是理所當然的都感到好奇。然後, 我想起了一種感覺。就是 "我到了! 我終於都到了某某地方了..." 的那一種無言的喜悅。那的確是一種久違了的感覺, 而我很想再次感到。

更重要是我想像到, 我會在那一刻感到甚麼。五點了, 天快亮了, 有緣再寫。

Saturday, April 12, 2003

12 Apr 2003

撞鬼你, 呢個 website 越來越難 log in。好幾次我想寫日記都入唔到黎, 都唔知做乜野。
其實今日係星期六, 我係度趕緊中國地理的論文。雖然話只係要寫二千字, 但係都唔知點解都係有少少擔心。唔奇既, 俾著你頹做一份 paper, 你都會擔心喇。但係想唔頹都唔得囉, 因為自己懶左成兩個 reading weeks 喇。人地呢, 就係度讀書, 係度做 paper, 我呢, 係度不停咁打機, 又唔睇 references, 又唔讀書, 又唔溫考試。都唔知自己想自己點先係。好快就考試 lu, 點算好呢。

尋日去dentist, 佢話, 今次都仲係未拆得個kool, 因為仲有一個地方硬係合不上...咁大家都無晒辦法。佢問我試唔試多一個月, 我心諗, 如果呢個月真係補救得到既, 算喇, 忍多幾個月囉, 唔係點者.....足足三年喇, 你估好好玩咩。我同人講我唔開心, 人地都以為我係度講笑喇, 反正我個樣都係好好笑架喇。尤其係衣起棚牙個樣, 仲唔係傻仔? 唉, 算。好想再試一次香口膠的滋味。

今日搭火車, 見到有一 pair。係火車地鐵見到呢d 一pair 二 pair, 唔出奇呀, 係嘛? 係。我又明明唔識得佢地架喎, 但係唔知點解, 我望住佢地, 感覺好似好親切咁, 好似幾時識過佢地咁, 好似幾時代入過佢地咁, 好似...幾時我曾經係主角之一或者想係主角之一咁。多看兩眼, 心頭竟然有一點點的酸溜溜的感覺, 別過頭就不看了。
為甚麼呢? 我明明已經忘記了愛是甚麼的感覺。我明明已經做了一個非常獨個兒的爛佬。真的, 真的我己經不在乎我是不是一個人。偶然想起, 也會感到奇怪。從前的我, 視愛情為天下第一的事情(笑), 今天...為甚麼呢? 站在火車中的一角, 看著他們, 有一點點 admire, 有一點點 sad.

再望望天空, 看著架空電線整齊地滑過藍藍的天空, 好像我生命中有很多事都是會這樣的 - 滑不留手。別以為這是甚麼色情的 description。當你感到生命中很多事, 很多人, 很多經歷, 很多回憶都是滑不留手的時候, 我想你也未必能笑得出了。

中大裡面, 有時候還會看見一些令我有一點點想, 說得難聽點, "去馬" 的。但我自己卻很清楚一點, 當我自己問自己一個最簡單的問題的時候, 一切都明顯不過了
"但, 你愛她嗎?"
答案就簡單而直接了: "不愛"
不愛, 就不必費神。若然"去馬"了, 跟那些 "得閒拍下散拖, 溝下幾條女" 的公子哥兒有甚麼不同? 那又跟 GRM 某 year 2 有甚麼不同?

複雜一點的問題我也問過自己。"若然有拖拍了, 會比現在的生活開心嗎? 會比現在的生活好嗎?"
..............
....................................


...........你先說吧。我想不到。

Sunday, April 06, 2003

6 Apr 2003

好耐無寫過日記...真係耐得好誇張, 成個日記好似停頓左咁樣。因為之前個份 paper 同埋中國社會個份讀書報告實在係趕到人都癲。
就係個一日我趕好兩份 paper 之後, 就聽到宣佈停課了。
Oh....
即刻係感到開心, 因為 China Geography 的 paper 同 presentation 都推遲了, 開心到癲。
然後, 成個假期都係度打機, 打到癲左, 因為買左隻舊 game 俾 PS - Diablo.
好玩呀, 真係好玩。

然後呢, 就係有幾日番左中大。好正呀, 成個中大都無晒人, 好好 feel.

以後? 唔知喇, 唉, 又係做 paper 囉, 做完就好開始溫書, 因為好快就會開大考囉。

Sunday, March 23, 2003

23 Mar 2003

今日焦點: 大專戲劇節
總結論: 非常好睇, 比我想像中好睇得多好多。就如崇唱所說: 睇到拍爛手, 笑到無氣抖, 正到唔想走!

中大篇:
第一場就係中大先出場。出場前司儀叫各大學的同場觀眾替自己的大學打氣, 可惜, 中大人少力弱, 基本上都沒有人叫, 好慘。
中大的劇講述一個小時受到繼父虐打, 性虐待, 以致出現人格分裂, 多重人格的一個可憐人。這個叫"比利" 的人, 有史上以來最多的人格 - 共廿四個。最後, 比利因為受其中一個人格某一時間內支配著, 而做出強暴, 搶劫等行為, 最後被捕。由於世俗不接受如此的一個人, 到最後就算好心律師出手相助, 亦難逃世人的眼光, 被判死刑。
好, 論演員。先論張好仔。好仔戲內的角色叫阿瑟, 是比利的其中一個人格, 是智者型的人格。果然入型入格, 反正他自己的樣子也似是有幾分書氣。不過他上到台上, 又似跟台下的沒有幾多分別, 除了表情的確(亦一定會)比效誇張之外。
然後, 就是女律師。超勁, 勁到癲。入型入格, 字正腔圓, 句句清晰, 表情做足, 勁。咁多要講得咁快的對白佢統統都講到, 仲要 clearly presented. Good.
然後, 就是其他人...唉, 超級痴"利"根...尤其以角色 "雷根" 為最嚴重, 痴得好犀利, 完全最唔到佢講乜野, 好嚴重。
其他的, 都沒甚麼問題。整體上而言, 四套戲之中, 中大此齣戲最為沉重, 很完之後我的心情真的很沉重, 不知怎樣似的。風格上, 我完全不懂話劇, 亦因此完全不懂得評論, 但跟據我看過的新亞劇社的表現, 似乎是次 "二十四個的‧他" 演出的風格跟新亞的 "記憶的年輪" 的風格最為相近。亦因此, 看上去有一些似曾相識的感覺。
台下: 其他人大部份都懂得欣賞話劇, 唯部份人真的是市井之徒得很。時而叫囂, 時而放聲大笑, 時而在不適當的時間大聲鼓掌, 實在惹人反感。我這麼一個粗俗之人, 還以為自己已經算是不懂得大體, 不懂得欣賞。今日一見, 方知自己算是 "低處未算低"。那一 group 人貫穿全場亦是如斯低劣表現, 實在是大專生的恥辱。

科大篇:
之後上場的就是科大。科大的劇一開始就打正旗號為比較輕鬆的劇, 果然亦是如此。其中以火雞舞的一幕最動人。笑位笑爆肚, 真的笑到眼水流, 感動位亦不過不失, 好! 但其中一幕不停地 hard-sell 科大, 就未免有點兒那個。科大有無? 有無乜野? 色狼呀? 白痴呀? 勁人呀? Well...算喇。懶得理你。
演員: 最少的演員, 亦應該是最少的backstage. 但出來的效果亦算不錯, 低成本(我想是)的一套劇, 不錯。

之後 Break 一 break, 就讓我撞見了阿瑟。他真的興奮死了, 因為今晚演出真的不錯, 而且有人來看他表演。知道我只有自己一個來的時候, 他就跟我坐在一塊了。開心, 終於有一個朋友來陪我坐了。

浸大篇:
不得不承認, 浸大的劇雖然有一點點胡鬧, 卻是我認為四齣刻中最好最好的一齣。真的非常好! 刻本構思不錯, 笑位多到完全無氣抖, 如果Wilson 跟我一塊去看的話, 我倆一定會笑到人仰馬翻, 狂笑至窒息~~! 笑位之多, 記不起了。例如美恆變魔術; 劇中的編劇改了又改, 情節越改越古怪; 一眾小矮人走出來抬走巫婆; 魔鏡說巫婆原來跟王子有路, 小矮人是淫媒; 小矮人們有如打機式的排陣, 與大火龍對戰等等等等...So many!
演員: 焦點所在, 在於相識八載的黃美恆。美恆今次演的角色是小矮人中的 "懶訓", 應該就是 "Sleepy"。角色令她經常都抱著一個骨頭狀的枕頭, 像是快要睡著似的。美恆的獨腳戲不多, 但相對於其他小矮人(博士除外), 她的戲份已經算不少的了。有一幕, 眾小矮人飛奔出來抱走巫婆, 只剩低美恆一個反應比較遲鈍所以未走, 到最後才後來車上......那一幕所模仿日本卡通片橋段, 真的似模似樣, 非常好笑。美恆這次算是演活了這個角色了 (會不會是因為現實中的美恆也是這樣睡不醒的呢? 哈哈)

港大篇:
最後一齣, 講述一個年輕兒子, 有一個極度照顧又極度緊張兒子的母親。一晚, 兒子被解僱, 母得釋之後憂心忡忡, 心臟病發死去。其後以灰姑娘身份重回人間尋子。最後, 兒子體諒母親, 母親安祥地去了。整齣劇都很悲傷。尤其是當我回想到我自己的時候, 有一刻真有一點點感動的位置。但那一刻我因為要出去聽電話, 被卡住了在山頂, 回不了坐位, 不能跟好仔在旁細說。
演員: 亦只得很少人。男主角得一個, 經常低頭, 表情極少, 無從評論。母親角色不錯, 確能把養兒一百歲, 長憂九十九的神緒演出。反而灰姑娘呢...可能因為大家都是年紀輕輕, 未能真正的想像母愛, 我個人覺得她像是用男女之情的愛讓自己入戲, 並非母子之愛。算吧, 我都是在齋 talking, 我根本連一點點的 drama 也不懂, 只是在扮識野。要真專家? 找張好仔就行了。

Friday, March 21, 2003

21 Mar 2003

為左一個月會, 攪左我成朝早。等我仲以為呢個又係好似上次李遠哲個個咁鬼悶。點知原來唔係, 今次講的係舞蹈, 足足介紹左成十隻舞。好鬼勁。我個人睇完咁多隻之後, 依稀記得最鐘意係 拉丁舞中的 Samba 同埋標準舞中的 Waltz。一個節奏明快, 音樂快樂動人, 令人巴不得立刻起舞狂歡! 一個節奏幽怨, 舞步不徐不疾, 緩緩地表現愁中獨舞。用心聽起來, 真的好像看見兩個人在為一件不得不傷心的事, 卻不知如何可以紓發這愁緒而無奈地, 慢慢地起舞...好一個華爾滋!

之後, 因為自己的樣子太可怖, 實在不能這樣跟子暘阿爸拍照, 就飛倒回恆生。整理自己後, 就飛回崇基, 跟快要畢業的子暘拍一張照了。噢, 那就走了一個組爸了。

見到 CC 送舊(見到他們)真的很開心, 很令我 admire, 我也很想有一個這麼開心的活動可以在一起一塊兒玩。上中國社會的 break, 我望著王福元樓, 看見其他 professors 的房的 windows, 我在想: 他們還是會依舊在這裡教書; 世界還是會不停的轉動; 其他人都會在活著自己的世界裡面; 街上的行人依然是半分都不會鬆懈, 一切都照著時間的流動而逝去。當時間都不經意地飄過之時, 很快, 下一個畢業的就會是我了。那一刻, 我就要到社會工作去了, 連最後一個可以躲藏的溫床 - 大學, 就要離開我了。我要怎麼樣過這三年的大學? 我到底想做一個甚麼樣的人? 我要怎樣令這三年更加令我難忘? 我很不想像以前中學生活的過日子方法來過大學的生活。無奈地, 這大半年我都是這樣的情況下過來我的人生。我又怎能不慨嘆? 世界就像在這一刻轉得特別快, 特別快...甚麼都不會為你留下, 而甚麼都好像過得了這一刻都過不了下一刻。很多事情都不是你掌握的, 很多你不想發生, 不想到來的事情, "要來的始終會來"。
我很不想
有很多我不想
可是有很多事情都出現了
我見的世面一點也不多, 甚至是一個很幼稚的人
可是, 我所見的世面已讓我覺得不很高興, 很不安
而對其他人, 其他事, 那麼客觀存在著, 那麼現實的事, 我都感覺到那麼觸不到, 那麼虛無縹緲, 那末, 我又怎能對"時間" 不失去控制的信心。
我都不知自己在說甚麼
只想說, 人大了, 人浮於事的感覺就特別強

人浮於事...

人間.....時間.....

箭一般的飛過
鐵一般的絕情


"要來的始終要來, 要走的始終要走" - 很可怕, 真的很可怕的感覺

Wednesday, March 19, 2003

19 Mar 2003

今朝睇牙, 都唔使一分鐘就攪掂, 撞鬼你, wasting my (transportation) time.
好在係屋企出黎, 唔係係中大出黎, 唔係的話, 肺都激爆。

番到中大, 上中國地理, 怒抄, 張力好勁。之後就地資盃乒乓球比賽。

好野, 好多人到呀, 好開心呀!! 估唔到咁多人肯到喎! 真係估唔到...唉, 終於都鬆一口氣。
你唔明架喇, 咁用心去攪一個活動, 估唔到咁多人到個陣, 佢偏偏咁多人到....真係好感動。YEAH~~~~~
地資盃, OOOOOoooosh~~~~~~~!
好, 仲有個足球要我黎呀, 仲有個牌類同閉幕典禮等緊我地呀, 要快手快腳喇~!

地資盃, 真係一場漫長的戰鬥....

我個腦真係完全唔掂
自從上個星期暈左怒"hum"左一野個頭之後, 又黎多劑撞牌意外, 撼到個頭傷晒。衣家我記野又唔係咁記到, 諗野又唔係諗得以前咁快, 又無諗到咁多野講。人地講乜野我都唔明, 要問完一次又一次, 要其他人解完一次又一次之後, 我...都係唔明。
好似尋日開會咁之嘛, Frankie 講的 idea 人人都明, 唯獨係我講極都唔明。老婆仔都睇見我咁樣都呆在當場, 阿妹都呆住。我都唔知自己係度做乜野, 做乜野乜都唔明架? 點解會咁, 莫非我真係撼得個頭太勁?

更令我發覺呢個問題的原因, 係因為我覺得自己近來真係好容易疲倦。訓左六七個鐘, 起身之後做半日野之嘛, 就眼訓到癲, 唔知做乜野。好想訓覺, 仲要即刻趴落床, 訓到不醒人事個隻。只能有一個解釋, 就係個頭的傷影響....如果唔係, 就應該係上一個星期太倦的關係而令我今個星期的周期性疲勞未能得到 restored.

總之, 幾辛苦下。想做乜野都做唔到。每一日活著都好似得個幾個小時的 limit 咁。一過左, 個日就唔能夠做到 any more productive things...點解呀~~~

醫生醫生~~唔好咁易眼訓得唔得呀~~~~

Monday, March 17, 2003

17 Mar 2003

尋晚仲以為好醒, 唔番中大, 諗住係屋企好訓d, 點知到左成兩點幾先知原來聽朝早八點半會有一個 globalization 的 tutorial, 即時PK. 仆倒去上床訓覺, 訓都訓唔切咁。

今朝, 都係遲左, 算, 遲少當早 (輸少當贏?!)。之後即刻番宿訓一陣, 好左好多。然後上Banner, 果然有番一定程度的難度, 尤其係我地的 Banner 咁鬼簡單...全人工~ 好彩我地醒, 一齊諗到同一個方法, 吊上去。Yeah. 然後食李慧珍意粉, 貴野果然係好食d.

跟住就係 Remote Sensing of the Environment. 好彩無乜野, 唔係好訓, 都幾好。然後就係等 Vincent 打波, 撞鬼, 佢個 CCGRM 會天光開到天黑, 好彩我都好乖仔咁睇左兩三頁 references.

七點, 都仲未食飯, 就要到 O camp 傾莊。好唔情願咁做左福利部的一員, 唉。其實我真係想做節目部, 無奈係同個度的人唔會夾得去邊, 所以...
有好多野真係人夾人緣, 係鐘意就會鐘意, 係唔鐘意的話你點逼我都唔會想做。而且, 我又覺得如果同個一班人唔係夾得來的話, 又...咁做乜野要逼自己去做一個 O Camp 呢? 唉, 我最怕就係同一d 自己完全唔鐘意的人係埋一齊, 仲要係如果自己有得揀的話, 我會更 "dum" 心
但係我又唔想做出版咁頹....做出版真係會好廢, 好似唔係 O Camp 的一 part 咁!

唉...又一個令我唔知點算好的問題。人生都已經夠晒多問題架喇。

夜晚同阿 Rose 同 Wendy 一齊狂歡, 好開心呀! 真係好耐都未試過咁樣笑到有氣都無訂抖, 笑到牙都甩~


好想有一個大少少的房

Thursday, March 13, 2003

13 Mar 2003

尋晚我番到宿, 十點幾已經訓左。因為都知道自己無可能溫得到落去。果然, 一訓就訓著左。今朝起身, 九點。Research Methods 溫都無溫過, 心口有個勇字就去考...到最後, 當然唔得。真係好唔得, 五題裡面得兩條我識得答, 只有文字題先識得答, 計數的題目真係完全唔識, 我連上個 sem 的東西都已經完全忘記, 好唔開心。我已經係唔識答到...唔知點好, 我淨係識得坐係度, 然後諗都諗唔到任何野。我好想記番起以前學過的東西, 但係我連 standard error or something like that 都記唔起。個一刻, 我好想好想走, 好想離個呢個我根本唔想再留多一秒的地方。最後我走左。五條裡面三條無答, 情形同Global 簡直一樣,...點解會咁。

點解會咁...我一路係咁問自己...點解我會唔識得咁緊要? 係咪因為自己真係太懶? 係咪因為自己攪活動之後俾自己藉口唔溫書? 係咪因為無自制能力?....點解會咁

一個人, 考完之後番到 reference room. 下意識地囉番起 2103 的 reference box, 打開, 發現裡面都係一張張充滿著好多好多數字的 references, 全部都係我唔鐘意的數。但係個一刻, 唔知點解, 我覺得好灰, 好唔開心, 心頭好酸, 有點點想哭的感覺。

但深吸一口氣, 回想自己仍在 department 之內, 就算了。走了, 回 222 讓自己做地資盃的旗海吧。做一點不用腦袋的事, 會令自己好過一點。從前的哲人以砍柴來令自己的腦袋休息, 同出一徹。

做旗海, 真真正正的令略到人多就可以做得很快很快; 相反得我一個, 做的速度真的可圈可點。之後吃了一點蛋沙律三文治 (正), 就乘車入 Shaw。幹甚麼? 考 IT Proficiency Test 也。每個中大人都會經歷的一段。原來不太難, 尤其是考的時候, 簡直和從前的 CA TAS 一樣! 不單令我回味從前考 TAS 的日子, 還令我覺得這份試卷份外容易! 哈哈。最沒有用的一科 CA 終於發揮了他的作用了! 考過 IT Test 之後, 心情也開心了很多。

但那一刻我卻在想: 為甚麼大的, 重要的事我就做不了; 少的, 不重要的我就做得比較好呢? 像上一個 semester, Major 都得不到好的成績。反而PE 就因為游泳所以得了 A-, elective 的 Sociology 還得了 A! 開心得不得了。這一個學期, 無關痛癢的普通話, 只計一個學分, 我走了個五個星期的課, 卻給我在 mid-term 拿了個 A- ! 天理何在。現在的 IT Test, 雖然未出 results (亦不知何時出), 但我估計也一定及格的了。唉, 果然不是大將之才, 係小混混也。

算~~~~小人物先有小人物的開心, 無大將之才先有的壓力~~

好, 講番我的地資盃。今天就是地資盃球類活動的第一日 - Basketball。唉, 以我兩年以來的紅社經驗, 都攪唔掂一個地資盃的球類, 唉....好唔開心。明明買水買 glucose 呢 d 咁簡單的野, 年年都有做開, 點解我今次都係醒唔起? 完全係 messed up. 淨係買野我都跑左三趟, 氣都咳。最後? 當然係人多勢眾的崇基贏喇, 真係無佢乎。咁多個咁高的人, 仲要車輪戰咁恰我地, 來來去去都係三個人打晒連續一個鐘頭, 鐵人都死喇, 係嘛?! 唉...Shaw 又係, 休息左足足一個小時, UC 的三個就足打左一個小時, 唔公平之極。但係無法, UC 的人係咁....有佢地三個我己經好開心。

另外, 就係 Vin 完全出唔到場。見到佢個咁失落的樣子, 我都有少少唔安落, 仲之後特登 tum 番佢問遲d 同佢打波好唔好? 佢話 "你? fuck, 俾我數就有你份!" 原來有時候女人都真係幾易 tum, espeically when there is comparison to be made between the 2 sexes...

然後眾志大家一齊食飯, 大家一齊整埋 the rest of the 旗山旗海, 好野! 超正...如果可以貼滿整個中大就好了....

我還看見, 整個中大的欄杆上, 真的貼滿了很多地資盃的旗海....綠色的地資盃, 橙色的籃球, 淺米色的乒乓球, 藍色的足球, 粉紅色的牌類和閉幕典禮.....滿山都是.....

要GPA? 還是要工作過程的快樂?

Saturday, March 08, 2003

8 Mar 2003

開始覺得
寫呢度的日記
好似來來去去都差唔多
尤其係我呢排仲忙緊地資盃個陣
好多事都變得又係差唔多
想寫野落黎
但係又諗唔到寫乜野好
再寫我點樣係中大走黎走去走到索氣
又好似好悶咁
你睇起上黎都悶喇, 又唔會感同身受既

可以挨到三個月, 今次寫日記的目標都算係咁囉
我以前邊有咁有恆心架
希望可以 keep 住上喇

Monday, March 03, 2003

3 Mar 2003

終於都比較忙完
好開心
但係遲d 又係會咁忙
仲要有個幾驚下的普通話考試, 想唔驚都唔得。

三月一日, 星期六, 做過乜野....唔記得添
呀係, 要留係宿度做 presentation, 到最後都係放左唔少時間係 fellowship of the ring 個度。估唔到突然打爆左。然後番到康怡, 好開心因為同番屋企人一齊食飯, 而且有好多好食的東西。有些感覺是回到家庭身邊才回消失的, 例如緊張。跟住去住祖母家, 幫佢 ready 床舖被褥 for visitors. 然後就係屋企度上 internet 睇楊汝萬本書睇到人到癲...為左一個 present, 無計。四點先訓。

三月二日, 星期日, 一早起身就要飲茶, 因為已經成十二點 ( 無錯, 都算係 "一早" 起身的)。之後買左對拖鞋, 一桶蒜香粒粒, 唔夠五分鐘食晒, 貴得好味。然後番屋企。番屋企的途中, 睇到好多好多唔同的地鐵廣告版, 有好多上左的電影我完全唔知, 番到過黎港島先知我期待左好耐的 DareDevil 原來已經神不知鬼不覺地上左畫, 我都呆左。Suddenly feel 到自己好似去左一個好遙遠的地方之後, 成個世界已經唔同晒, 但係你都懵然不知...多麼可憐 and 可悲的感覺。廿歲仔, 係條街度頭 "愕愕", 左望右望, 好似岩岩係大陸落黎咁....真係灰到爆, 仲要明明我係地地道道的港島人!!!!! 下午時份, 我趕住做 persent, 我細佬死霸住我部電腦唔俾我用, 我睇唔到楊汝萬本書, 手頭上的書又幫我唔到, 唯有拿拿聲番宿, 點知一做就係做到五點半....AM......天都快亮了, 好辛苦。

三月三日, 今日, 七點九起身, 八點半落到CC 做 presentation。口又窒, 講野又唔掂, 又未訓醒, 個 topic 我又無興趣, 完全食晒 X. 好辛苦挨完, 之後又做地資盃 Banner,....仲以為應該唔太難, 點知係難到飛起, 一做, 就兩個鐘, 本來諗緊可以係 222 訓左算數, 唔得 lu, 做完, 都夠鐘開地資盃個會....當然又係一開就兩個鐘。越開個人越唔掂, 要不停咁撩Candy 呀, Claudia 呀, 嘉威呀佢地玩, 笑下, 交換下身體的氧氣, 咁先無咁辛苦。之後 Remote Sensing, 死挨爛挨先挨完, 好在眾志的奶茶果然冠絕中大, 好飲, 又好 powerful. 之後? 到左 UC Lib 借左兩隻 Godfather, 一隻 English Patient, 就番宿...真係好累了....當時還是五時許六時左右。

Friday, February 28, 2003

28 Feb 2003

終於都考完 mid-term
雖然遲d 會有個普通話, 但係我都當考晒喇...好辛苦呀
今日 globalization 怒炒, total 有八題, 我淨係識做一三五七題, 二四六八都唔識做, 二六試左做, 四八就真係完全漏空左。今次真係大獲。
仲有, 今日又怒奔走中大。好辛苦, 我 feel 到自己的雙手雙腳都係麻痺左, 肢體末端都已沒了反應。handball 堂的一堂三分鐘超激怒奔, 更可怕, 將我全身的氣力都 drain 晒去...大佬呀, 今朝八點都未夠就起身喇, 唉。
仲有一個地資盃要應付...真係殺到埋身。
唔打喇, 真係挨夠喇。好辛苦呀, 幾多支狂潮都救唔番。Goodnight