Friday, December 24, 2004

24 Dec 2004 台灣 Field Trip Day 1

Day 1

尋晚要成四點先有得訓﹐於是今日就非常之疲累。今日要係六點半起身﹐即係得個兩個零鐘頭訓覺﹐想唔死都幾難。完全唔想起身。之後我怕搭巴士趕唔切於是就搭地鐵。我到左的時候﹐已經見到 Raymond 同埋 Rose 同埋 Asa.

其實呢一刻的感覺係﹕無野。乜野都無﹐對乜野都無晒感覺﹐無晒興奮﹐無晒期待咁。呢一期唔知做乜野﹐做好多事都係咁樣無晒 feel 咁樣囉﹐覺得好多野都係係度 wasting my time﹐完全係唔切合聖誕節呢個咁開心的節日的主題的。

上到飛機﹐精神一振﹐因為架機都算係好正﹐大鄉里出城的阿溥簡直係興奮﹐尤其係估唔到前面個面板會有咁多野。我以為好似坐澳門坐咁只係有一塊餐板拉落來架咋嘛﹐點估到佢﹕有餐板﹐有放手提電話網網兜﹐有一個用來掛衫用的 knot, 仲竟然有一塊鏡仔係前面喎。自問係港男級的阿溥當然就立刻照一照自己塊滿佈暗瘡的爛面啦﹐呵呵﹐好得。

之後呢樣野你仲驚呀﹐咪話我話呀。係手掣呀。拿﹐你見人地的飛機廣告就見得多喇﹐通常都係有一個小朋友係度打機咁樣架嘛﹐係咪?佢會拿住個手掣架嘛。咁大鄉里就梗係以為呢d 咁 high-class 的野係要係好 high-class 的 business class 或者係 first class 先有架嘛﹐點會估到佢係我地呢班賤民坐的 economy class 裡面都竟然可以人人有一個呢?呵呵。

原來呀, 佢面係手掣架搖控器﹐另一面呢﹐就係連碌卡槽的信用卡收費衛星電話。嘩嘩~~好 compact 喎~~嘩嘩~~好先進喎…

未住…未完架!跟住先係好戲呀。我以為呀﹐飛機上面個d 戲都係又殘又舊, 個d 歌都係「搵你來聽」個類啦。點知一開個 menu 出來, 戲係新到唔恨的 (按﹕好似係 “Shark Tales”, 當時係戲院先開畫無耐)﹐簡直係唔使去戲院睇。歌呢﹐仲新﹐新上 Chart 的統統都有喎。仲有機打﹐仲有其他節目睇﹐仲有收音機聽﹐仲有唔算醜樣的空姐…喂﹐想點呀你!?你咁樣叫我搭得果個零鐘機點收科呀咁……..唔該阿機長你同我起碼飛到南非再番高雄呀~唔夠的話來多 round 歐洲呀~

就係咁﹐呢隻傻溥就好開心咁玩足全程﹐心情靚番少少。

其實飛到上去天上面﹐我的心情都唔係好好。係呢一刻我感覺唔到雲海﹐我只係見到一片凹凸不平的 cream 在飛機之下浮動著﹐感覺﹐總是沒有想像上的那麼好。可能因為太累﹐對很多事情的熱誠都冷卻了﹐有點兒令人氣餒的感覺。從前的期待去了哪?有時候真的懷疑自己為甚麼會這樣的死氣沉沉﹐尤其是對這一趟旅程。

聽著五月天的「瘋狂世界」﹐機上的我份外出神。
===========================================
落機了!

等了很久才有落地簽証申請到。那一刻的感覺就好像是回到了中國大陸似的。台灣遠比我想像中的差。我以為是很發達的怎料其實很……應該說跟想像中的差得很遠。沒有美國的現代﹐沒有歐洲的整潔﹐也沒有香港的繁榮。想像不到。台灣是任何一樣也做不到…也許只是一天的 feeling only. 遲一點到了台北﹐經濟重心可能會好得多 (邊望著高雄的發展邊想著)。

巴士唔夠位!天呀﹐點攪架。好好地一架 coach, 竟然唔夠位坐﹐點攪架佢地….唉, 唔開心囉。你知唔知我要坐邊…天呀, 我係坐最後排的最中間個位呀!即係一 dup 車就會成個炮彈飛人咁飛出走廊﹐甚至係撞爆個擋風玻璃飛出車外果個呀!無天理呀!(What I don’t know is, 係之後的咁多日舟車勞頓裡面﹐係我好想好想可以挨埋一邊訓覺的時候﹐先發覺原來我的兩邊四個位都係女仔!我根本就無一邊可以挨埋架!天呀!果時真係後悔都爆燈呀!)

Lunch at 黃鶴樓。硬地板﹐粗糙的桌布﹐簡單的鐵椅﹐圓型的轉盤上面有著沒甚特別的菜式﹐一切都感覺都實在太過…

…大陸。

我選擇了坐在「節目部」的一圍。哈﹐這麼久之前的事了﹐我還是會間中叫他們一伙做「節目部」。感覺很好, 很輕鬆﹐只是我還沒有完全的融入他們。


之後到高雄師範大學地理學系。一字記之曰﹕「悶」。

暗淡的燈光﹐深綠色碎花 tiles on floor﹐發黃的假天花…..總之就係…. Feeling very 大陸。

OMG.

伍世良講野。唔使講, 一字記之曰﹕「屎」。我都唔明﹐點解我地成個dept 都要用齊晒兩文三語﹐但係就一個二個 professor 都講到成 pat 屎咁的呢?阿 5 世的普通話, 簡直係可以俾人係娛樂版登大字報唱足一個禮拜咁差。Ung 耳的程度可以俾八個半至九個佢 (十個滿分)。只能用丟架來形容佢。

台灣的 professor 話佢地唔容易攪 field trip, 因為錢的問題﹐佢地來一趟香港的費用聽起上來夠我自己去歐洲。多謝佢提醒左我唔好以為 field trip 係必然的, 係 take it for granted。No, because there is nothing on earth can be taken for granted.身在福中不知福呀﹐小溥。


然後一個小時的車程去睇泥火山。

未上到泥火山已經見到山路上面有很多灰銀色的「熔岩」﹐either dried or still fluid, 係地上面。要好考腰力咁先可以避得開晒﹐中左的話….都幾大獲呀你都咪話!

(之後的, 係我用記憶打出來的﹐因為個遊記突然間 stop 左, 我諗係我太累﹐係車上面訓著左寫唔到)

見到泥火山﹐嘩﹐好高喎都﹐有成層樓咁高喎…走上去睇下先。嘩好攪笑呀﹐有一鍋灰色的泥漿係度煲緊呀!佢時不時都會突然間出一個大大的氣泡出來…然後一爆左呢﹐就會彈到附近的人身上面有一點點的泥漿﹐我都中左一招呀。好得意呀….但係都唔使留係度咁耐架﹐走得未呀。
(之後發生乜野事都唔記得﹐要睇番相參考先記得番﹐呢樣未做, 遲d 做, 遲d補)

Saturday, December 18, 2004

18 Dec 2004

Greenhouse Present 完畢, 高興過度, 走左去睇 Ocean's Twelve

影評:
高檔爛片

所有資金用來請大卡士明星, 無錢請其他靈魂人物, 例如==編劇==。十個該死俾九個半佢。

總評分 : 4 or 5 over 10

Wednesday, December 15, 2004

15 Dec 2004

今日天氣好正呀!


唉, 休息一天, 原本今日要做 Literature Review 的.....話晒星期六就要 present, 不過....好似無乜原動力咁, 我做左好耐都唔係有好大的進展咁囉。

係做左唔少野, 但係原來搵 lit, 尤其係有目標地搵, 先係花我最最最耐的時間, time - effort efficiency 係極低....而如果你漫無目的地搵, 可能結果會仲快出到。

天呀

唔好 kill 我呀老世, 雖然我唔知你做乜唔 reply my E-mail....

Tuesday, December 14, 2004

14 Dec 2004

好辛苦先考完個 popu, 當然要放一放自己輕鬆一下!唔係講笑!咁難得我係前一晚三點決定自己溫唔切 ( 無錯, 我的中文的確係幾差, 但係「決定自己溫唔切」呢句咁 gap 的說話當時的確係一個「決定」來的, 多謝各位~~~) 於是就做左一個好大膽的決定 - TIP 題!!

絕體絕命!我從來都唔敢咁樣 tip 題, 通常就算我係 tip 題, 我都係每一 part 都識少少咁, 然後就再集中讀一 part 讀熟佢, 呢種就係我所謂的 tip 題。但今時今日(其實係果一刻) 唔同喇, 我無時間喇, 係好多野都唔識的情況底下, 我唯有tip 題。

我 download 晒近四年殘花敗柳出過的 Popu 卷, 發現佢對 Demographic Transition Theory 的兩個 chapter 特別有好感, 咩 Ageing 咁樣就年年都無。於是我就將攻擊範圍收窄到第六、七個 chapter。然後再仔細分析, 發現佢前年出過 Caldwell's Theory. 拿, theory 就得兩個咁大把, 一個 Easterlin , 一個 Caldwell. Easterlin 呢, 都無咩好問, 好難出得到一條 Essay. 但係 Caldwell 就唔同喇, 百搭咁滯。大前年無, 前年有, 舊年無, 今年....仲唔出?!你條殘花敗柳出題出得咁咩咩 (諗唔到形容詞, sorry~ ) 仲「裝」你唔到?哼!

就係呢個時候, 我發現原來已經四點幾, 時間無多, 速刨 references. 背得幾多得幾多, 務求谷盡全力七孔流血地發揮香港典型填鴨式學生絕爆的 Cache memory - 51200000 KB! (如果唔知 Cache memory 有乜特別的朋友請翻閱 ASL CA notes 第一個 chapter)

終於, 係九時三十三分, 掀開試卷的一刻, 看見 Essay Questions 出現 "Inter- generational wealth flow " 字眼的一刻, 我就知道我孤注一擲的圍骰, 中了。我笑了。

Monday, December 13, 2004

13 Dec 2004

拿即係咁....我對你老婆咁好, 堂堂都上足晒 (tutor present 第一日除外), 上堂又唔訓覺, 又專心聽書, lab report 又交足晒, lit rev and report 又盡力寫, 仲學到好多野, E 個度又俾好高分佢, 總之就錫晒你老婆喇....

....
....咁....你聽日可唔可以唔好 kill 我科 Popu 呀, 靚仔花.....?....麻煩你出得易少少呀唔該....我真係乜都唔識架.....我真係走足你咁多堂架, 真架, 我淨係上過四堂都唔夠呀成個 sem...求下你啦.....


>__________________<

Saturday, December 11, 2004

11 Dec 2004

乜都唔好講住~
我睇見個 counter 顯示我個日記
自 03 年 1 月 1 日以來
累積瀏覽人次
快要到一萬人次了
好開心呀!
一萬人次!開心死!
XDDDDDD
多謝咁多朋友的支持
無你地, 就無 Tommy 仔了!多謝大家唷~~
^ 3 ^

Thursday, December 09, 2004

9 Dec 2004

今朝其實去同 mentor 食飯, 但係點知我完全起唔到身, 所以攪到好狼狽...唉....當我以為我自己已經可以起身的時候, 原來又訓番, 到阿美打番俾我的時候, 睇一睇個鐘十二點, 先知道出事喇今次~~!!!!

好彩今日係畢業典禮, 有好多加班車係本部送人落火車站, 直通個隻。所以我先咁夠膽跑到本部就等車...到最後好彩唔係遲好多...

之後又係浪費溫書時間, 做咩唔講。

夜晚同 Zenia 慶祝生日, 好開心耶。大家係 Tony Roma's 食飯食得好開心, 好耐無試過咁樣。都係佢地先夠低低 B B. 不過後尾越講越眼訓, 所以就無乜心機笑。然後趕尾班火車番入來。番屋企讀唔到書嘛。

開始覺得自己無乜心機打日記。越打越瑣碎, 越打越無乜野講, 無乜內涵, 芝麻綠豆的事都打上來, 有深度的說話買少見少。

唔.....語文素質下降了......

Tuesday, December 07, 2004

7 Dec 2004

又係碧秋。今次係 GRM 5110 Statistical Analysis in Geography 的「終極無間」。越來越辛苦, 睇怕都無得訓。

唔讀唔讀都讀左兩年幾三年, 就來畢業, 當初自己有本錢選其他科的, 唔選, 扮清高, 扮有型; 亦是自己親手改 first choice to GRM 的, 怨得了誰?

百萬大道 set 好晒場準備畢業典禮。我站在連綿百米的帳幕下, 呆住了。明年今日, 真的別要再失眠。如果有幸會面。

如果。

Sunday, December 05, 2004

5 Dec 2004

十點半補習, 挑戰。

之後 hea 左一整天, 唔知點解一d 都唔驚, 可能係因為 job 唔 press 到來就唔會知驚的道理一樣...總係咁樣...

今日同阿正講開之前學校的事...講左好多好多野, 發現出好多好多的唔同。其實不禁令我真的很擔心。

其中一個 point 佢終於會肯無咁隱晦咁講出來。你地一大班人成廿個人就一個大 group, 於是就大家一齊有功課就抄, 有 source 出來就一齊抄咁。你話我應為正常的人, 就通常係俾你地孤立的人, 例如係收埋d 功課唔肯拿出來俾你地抄的」

我聽見呢一句個一下都唔係咁震撼, 係後尾講完好耐我諗番先覺。唔借功課俾你地抄的就會俾你地孤立...

好難想像

我以前都試過做 source, 好乖咁做功課, 然後同學知道了, 都找我抄功課。當時我唔覺得係一件咩事, 無乜所謂。但係之後漸漸地發覺做呢樣野的人越來越多, 而且抄功課不但之無令佢地學少左野, 反而其實同做過功課的我一樣咁學到。而且, 佢地因為抄功課, 功課上的成績唔會差得過份 original source 太遠。仲有, 佢地可以慳番好多時間去玩。一舉十得, 可樂不為?

呢一刻你一定會話, 咁今日我借你份功課抄, 聽日我借番你份功課俾你抄囉。

聽住先囉。

你諗下, 咩人會抄功課?唔做 / 唔識的先會抄。ok, 我俾你抄幾次都唔係問題。但份份功課都係你抄我, 我就從來都無見過你個份拿番出來俾大家抄。咁你好著數喎。大家都要做野, 唯獨係你一個就次次一分 effort 都無落過就可以拿到相同的好處。我俾你抄係人情唔俾你抄係道理。仲有, 抄開有條路, 抄開的人係絕少會俾番 source 出來, 因為, 反正其他人一定會俾 source 出來, 有都唔抄我的。咁佢就自然更唔會放 source 出來。一面就白做功課俾人抄, 一面就不停咁抄, 有幾公平一眼睇晒。大家都係同學, 幫輕下都好。

或者你實會話, 大家朋友無計咁多的, 做朋友的邊有得計。的確係無計得咁清楚, 但總唔會一方狂 debit 另一方狂 credit 架, 係嘛。咁樣係一個 unhealthy 的 friendship...為得朋友付出當然就無計...只係, 你點知佢當你係唔係朋友?或者, 佢當你係朋友的用意係唔係為左你的 source? 你知唔知佢平時想唔想同你一齊?定係唔想你唔放 source 所以先間唔中痴下你咁樣?只係為左得到你的好處的人太多, 呢d case 我係中學見得多, 呢d 人我都好唔鐘意。好多時會係鐘意抄功課的人就再唔熟都走埋你度拿 source, 然後就拍拍屁股走人, 以後你有你我有我大家份屬堆...我唯有講句你都得架囉。可能你咁樣覺得我份人真係好小氣, 但呢個係對方識唔識做人的一樣野。

我都自問抄過好多功課。但起碼我識得問人, 半問, 半抄, 半學, 半做, 半記; 咁樣起碼我有心學, 有心跟 source 人學, 一邊問佢內容一邊抄先, 亦有做過出來俾人抄番。我自問抄功課呢方面算係有良心。

所以我一聽到「唔借功課俾你地抄就會俾你地(當成唔正常然後)孤立」的時候...我真係呆左...

個一下的文化沖擊真係好大。

想像唔到囉。唯一想像到的, 是一群烏合之眾...我又唔想像你地想像成咁...

唉, 所以...你明我想講乜的

Friday, November 26, 2004

26 Nov 2004

係囉﹐又係毛毛。嘻嘻

今日好成功﹐我只係用左一個下午的時間就完成左 almost 所有的 spcies 的 measurement. 我都估唔到自己會突然之間快左咁多。不過﹐話說回來﹐都要多得阿基的幫手先會有咁快的。

今日出左沙田食飯。都無乜點諗過就 choose 左 Stage Cafe. 但係其實原來都係普普通通的一間 cafe 仔﹐完全唔似係一間好 high class 的 cafe. 食的野其實都係好普通。唔多滿意咁喇。

之後無芝士無牛油無沙律食有少少發脾氣。不過已經係半夜兩點的事來喇。

Monday, November 22, 2004

22 Nov 2004

其實尋日真係幾唔開心, 話晒我都叫做做左好多個 on 居的 decisions. 連續兩次都落左唔應該落的車, 出左兩次唔應該出的閘。真係拿來攪。

其實真係 no one's fault, 但係我隱隱約約咁好嬲, 我呢份人, 又情緒化, 又麻煩, 又容易皮蛋, 所以好多朋友都怕左我 (溥溥謹此向所有 依然當我是朋友 / 能容忍我的朋友 / 不覺得我情緒大的朋友 / 連我情緒大你都夠膽死唔知的朋友 致謝~~~) 所以嘛, 通常我發脾四都係大發特發, 而當我的怒火係遏抑到原來自己都唔係好 feel 得到的時候, 原來我都會怕左自己。I mean, who else will beat the lamposts with bamboo sticks along the way?! 仲要係下下都狠劈, 番到宿直頭有少少肌肉酸軟。

不過, 夜半的時候, 我因為一餐宵夜用極速 and 極擔心衝出去, 跑出一身汗, 食左一餐好到爆的宵夜 (手指公放咀下呀唔該~) 心情由 -70 跳到 +60 。唔講得笑~


今日嘛....除了上 Spanish, 度 Chlorophyll, 度 Chlorophyll, 度 Chlorophyll, 度 Chlorophyll, 度 Chlorophyll, 同 Gladys 食飯, 都無乜特別。

最特別的, 可能就真係阿正的爺爺過身了。佢好似無乜野咁, 反而我就有少少擔心佢咁「無乜野」。話晒呢個都係佢最鐘意的「祖父母輩」。唔聲唔聲走左, 其實我收到消息的時候都好愕然...好愕然。

唔....我唔係特登煽情, 不過我呢個時候的 Winamp 就真係 play 到張學友的 << 給朋友>>.....

唔....希望佢唔好屈住屈住....

Monday, November 15, 2004

15 Nov 2004

唔打喇
咩日記來架
打左咁多野, 一個唔小心 back 左就乜都無晒

簡單而言
星期四, 恆生 apt test, 飲茶, 鳳爪, 同阿正打波, 游水, 城門谷, 唱 K, 勁多野食, 勁正, 唔想番宿

星期五, 上得堂, 做得到野, 下午上最後一次 UCFYP 堂, 好似幾得意咁, 之後去 Anna CityU Asso Degree 畢業典禮同佢影相, 開心, 出旺角, 又係食小蕃茄, 勁好食, 開開心, 去朗豪坊之後食西頁滿記Mango Pancake, 開開開心, 之後同 fd 去埋人和, 番到 greenhouse 仲可以淋水, good.

星期六, 大日子, CRE, 山長水遠仆出去, 行到腳跛的 MMW 書院, Apt test 最淺, 只做不了一題; 中文第二難, 好多都做到我 ????? 咁的樣, 英文最深, 深到喊, 完全唔知佢想點, 做到厭戰的感覺都萌生了。夜晚徐仲亨生日會, 食物好食, 氣氛熱鬧, 但無聊。

星期日, 飲茶, 見到我的 Baby 軒軒, 開始聽得懂他說甚麼了。之後行一陣街, 然後補習, 然後吃晚飯, 然後街景不好, 但地點好, 氣氛好, 格局好, 食物不值這一個價, 但我只怕不飽的不是我, 甚麼都好, 值得紀念的一晚。起碼豪一次嘛。

星期一, 即係今日, 原來又要度 Chlorophyll。原以為 Mi Mono 可以得閑入來幫我好開心, 點知唔記得原來要聽 DBS recruitment Talk, 累到佢要呆等我好耐。之後又掛住吹水, 總係做唔得快。七點幾做到十點幾先做得四個 species, 比起一個人做當然快左, 但比起平時兩個人做其實慢左。

又開始食宵夜了....秋涼了....可能真的是時候儲肥了....不等這個時候, 還待何時?要幾肥得幾肥....

Friday, November 05, 2004

5 Nov 2004

今日好大意義呀。

拿首先﹐我之前的幾晚都係碧秋過的。前晚我做到朝早七點先走﹐尋晚我做到五點先有得走﹐剛剛的今晚六點有得走。天邊剛泛魚肚白的光﹐感慨。

首先, 之前的兩份工作係兩份 Stat﹐一份係 Lab report, 另一份係 Assignment。老實講, 兩份都係做得好那西。但係因為佢勁到好似以前的 UEP Lab Report 咁樣﹐所以其實就算做得那西都會做到你 PK 咁樣。就係咁﹐我又有好幾晚係碧秋做到夜一夜都無得走。好慘。

之後呢, 就係完全俾人忘記左的 Popu Project。我完全無 idea 要做乜野﹐尤其係已經係星期四﹐我已經好多晚都唔夠訓﹐個腦根本諗唔到野﹐於是我就上 WEBCT 睇下其他人點樣做﹐然後大大概概咁抄下佢地的 format 就算...於是最後就匆匆咁影左好多新移民的資料就離開 UL 了。

之後就做左成晚的 popu, 老實講﹐做得晒都要還神喇﹐係咪。我用左唔夠七個鐘定 topic, 搵料, 印野, 打野, 做完。簡直係頹作的極品。我係 tutor 我都會想殺左自己﹐交埋d 咁的頹野浪費人地的時間。

之後成個星期都有做緊的當然就係最最壓軸的 UC FYP。好似永遠都做唔完咁的﹐又好似永遠都唔會做得好咁的﹐令人氣餒得很。要睇好多的 video, 好多的書﹐又要好擔心做得唔好﹐唔能夠把自己腦裡面好好的 idea 發揮出來﹐浪費晒。唉都唔知點好。

於是﹐成個 week 都係死亡 week﹐不停不停咁做野﹐個人累到不得了﹐喝幾多的 Coffee 都似乎開始於事無補了。

仲有好多野講
唔講住﹐真係好累了。

總之﹐最乜差咁恐怖的死亡周終於都過了。

Monday, November 01, 2004

1 Nov 2004

十一月一日
一個新的開始
無錯﹐又係一個新的開始

呢個星期肯定係死亡周
一份 GRM 5110 Stat Lab Report
一份 同樣的 Assignment
一份 Population and Resource 的 Project, 而我係完全無 idea 佢要做乜野﹐我根本連要交一份咁樣的野都係最近先知, 你話我可以有幾咁嚴重
最激的一份應該算係 UC FYP 的 presentation, 將會在 coming Friday 一鑊熟。多謝各位。(呢期好鐘意咁講野)

無錯, 好在有另一些因素令我開心左
一定要整番個 achknowledgement 俾番呢樣野先得, 如果唔係對唔住 lu

唔,
即係咁
我鐘意的
都是有關的
排名不分時序先後高矮大小
都是大 M 賤, 大洗錢, 尖東, 海傍, 月波, 小主, 沙律, 要學手語, 百佳 shopping 準備 dinner, 洗澡, 反毛巾 (嘩哈哈哈...), 疆屍三, 兩[食送]飯, 行到盡頭的 Samba, Greenhouse, Halloween, 天星小輪過山車, 街邊檔, 吉野家牛肉飯會發脾氣, 「真」皮袋, Belgian Chocolate, 薄荷忌廉釀絲瓜 (嘩哈哈哈哈哈哈....), 仙[足宗]林, Italian Tomato, 沙田, 大學, 我們, 10000000^

好彩....

好開心....

Monday, October 18, 2004

18 Oct 2004

這陣子來....我嘗過我一生中從來都沒試過的營營役役。真的是營營役役。沒有目的地營營役役。就是那一種, 整個 schedule 都堆得滿滿的, 從早上到晚上都是如此, 就是沒有一刻可以閒著, 躺在房裡吃著零食, 聽著音樂, 窗簾之間透著下午的陽光, 整棟恆生都靜謚得叫人很舒服的情況再出現。.........

...深呼吸...我在幹嗎?
...深呼吸...這一切的營營役役都真的有意義嘛?
...深呼吸...這些理由都是強行去 justify 我的忙碌嘛?
...深呼吸...深呼吸...


深呼吸....然後....
給我一個理由

Friday, October 08, 2004

8 Oct 2004

一塊表面鍍了銅的金牌

一次最後的比賽

一些悕虛

別矣

Tuesday, October 05, 2004

5 Oct 2004

現在時間: 早上六時零七分

現在地點: 御書房(碧秋部)

現在工作: Population and Resources tutorial group 1 presentation

現在進度: 尚算惡劣

現在狀態: 想殺人

現在精神: 還可以, 但係想死

已工作時間: 四小時

預計完工時間: 兩小時後

下一份工作: 5110 Stat Lab report

預計總完工時間: 下午五至七時不定

預計總工作時間: 長到阿媽都唔認得

預計精神狀態: 已經殺左人 (可能好幾個)

最想殺的人: 所有叫自己做 tutor 的物體

Saturday, September 25, 2004

25 Sep 2004

星期四游左 UC 水運, 比想像中的要好。最後一年了, 完了。

臨走前, 還發現了一個叫 Johnny 的 Med 1, 100 蛙的前 50 他還是 lead 著我的。要知道那已經是我唯一的強項來了。真的被他嚇得心膽俱裂。他還有五年, 好好的 serve UC Swimming Team 吧。

星期五, 很累。還是要上早堂, 累得很, 回宿再睡, 一睡, 再睡, 醒來的時候竟已經二時許。第一次在宿煮麵吃, 沒有肉, 只有菜, 不夠飽。晚上練習, 非 X 常之辛苦。只能 completed 50% of the programme. 太差了。

之後跟阿言, Denny, Shannon, 輝仔一起吃晚飯, 笑到我明白甚麼叫「噴飯」。

要發奮, 於是到碧秋。那裡是滿載我, 嘉威和 Gladys 一起挨苦的記憶, 今天, 還是九月, 開學都不算太久, 我就要回來了。唉, 誰說大學生很無聊的?

我好像見到王維國的妹妹....好像是在 king por, 好像是 BA 人...

之後 training room 1 原來改制, 夜晚九點半就關門了。於是我就回到我最愛的 training room 3. 再回宿拿東西, 之前到 NA 拿了 Wendy 弄的冰皮月餅, 幾好食喎, 見得下人喎, 唔太滯喎。

再出來, 好辛苦地做了 Stat 的功課, 還勞動了全家幫我計數, 還有 Geoff 的 factorization, 雖然我不大聽得明白。多謝大家~

很累, 回宿三時許, 但睡不著。下午睡得太多了。再玩一回電腦, 五時才睡。

星期六, 早上又上早堂, 頂。Maggie 的 FYP, ok 有用。

回宿, 睡過了頭, 遲了起來跟 Wendy and Claudia 在 Coffee Corner 吃飯。飯後回宿, 才回碧秋。做不了一回正經事, Bottle 打電話來, Wilson 打電話來, Wendy 打電話來, 阿爸打電話來...

=__=""

到眾志拿回 Amber 的 Essay, 然後出去信和。竟然遇著如狼似虎的海關攻擊, 第一次見到那麼強勁的畫面, 我那麼 chicken 的膽子當然都嚇呆了。但妹子當前唯有先護著她們 and 扮無事, HEHEHE~~

走了一回再選定了發達行的渡假屋, 在塘福唷, 應該有十二三個人吧。期待。

晚飯在 60/F。很久沒有看香港的夜景了。站在玻璃窗前凝望了很久, 心裡千絲萬縷。

真的千絲萬縷。

Wednesday, September 22, 2004

22 Sep 2004

尋晚同阿品 farewell, 今晚佢應該靜悄悄地走了。大家問極佢都係唔願意講佢的 departure time, 好正常的, 俾你都會想留番個一刻俾你同家人一齊。

可惜的是 Popeye 都唔知。Gaia 等人都好似唔知。

講起 Gaia, 佢的婚禮已經訂左酒席。真係開心。席間, 見到阿牛, 大佬, 阿匡, 阿寶, Elaine, 阿品....咁多個前 Year 3 。佢地一齊好開心, 好令人 admire 的一班 friends.

番到來得知原來出面落過超大雨, NA 水運都 cancelled. 可惜。ICQ 上 Gary 訴說他在 NA 大笪地遇著雷雨的狼狽情況。

世事多變。

今日同 Simon 食飯。好奇怪, 感覺變得非常生疏。我嘗試重拾以前我們的感覺, 我嘗試顯得不生疏, 但其實, 大家話題有限得很。很讓人傷心的感覺。

唉。
對著 FYB User Area 的電腦 Screen, 玩著 Gold miner, 對嘉威有說有笑。其實我想著的是從前的日子。

5110, 依然係難到飛~~~起。我 2102 and 2103 都係拿 C 的。C 喎, 差到極, 點可能仲 take 一個五字頭的 stat course? 簡直係送死。不過, 君要臣死, 臣不得不死。熟我的人應該一睇就明呢句。

好奇怪點解 Vincent 夠膽抗旨。想死乎?

經過 reading room, 見到好多好多 year 1 傾大地的莊, 令我感動。我的仔女也有 join , 好!不枉爸爸努力培訓你地, 嘩哈哈哈哈 (痴線中)

也許, 聯地有人上, 大地有很多人想上, 還可能撼莊, 是歡送我最後一年的大學了。讓我看見原以為不可能發生的, 活生生展現在我眼前。

崇基水運, 好悶, 但毛巾好靚, 好可惜沒有。真係好靚。好想要一條。

同 Janette 食飯, 好開心。雖然得我地兩丁友, 但係都幾多笑話交流。望見她, 再一次地後悔自己當年中七的一時意氣, 將 Hotel Management 從第一放到第二, 把 GRM 從第二托到上首選.......

若然時間可以倒流, 若然我可以再選一次, 我的大學生活很可能會===完全===不同。

首先我一定不會選 UC , 更一定不會選到恆生樓。我會選回我最喜歡的 NA 。你會說, GRM 是沒有 NA 的, 你不能選。

我知道。
我有說過我還會選 GRM 嗎?

可能就此從 UCGRM 變成了 NABA 也說不定。

但沒有 UC , 就沒有泳隊的朋友, 沒有一起在思源館為阿 T 和 Gela 切生日蛋糕的日子, 沒有一起在 design Team Tee 的夜晚, 沒有一起出來吹水的夜晚, 沒有一起操水然後一起喊辛苦極了的日子; 也沒有了啤兒 - 我最愛的好同房。跟啤兒一起的日子真開心, 一起打機, 一起說笑, 一起躺在床上望著天花板吹水不想睡, 也沒有最後一晚大家一起吃 pizza 令我有點兒依依不捨的一刻。沒有了 GRM 呢?就沒有了更多的朋友, 多不勝數。

當然, 另一條時間線上發生的所有事情, 根本已經完全是另一回事, 難作比較的。所以不是全是壞事。

離開, 是為了回來嘛, 林一峰說的。(Gladys 應該會這個時候插咀: 無錯, 佢講咩都岩!)

從前的一時意氣, 令我後悔。我以為很多人大學讀 A 工作卻做 B 是很普遍....不錯, 那的確是很普遍, 但我的學科卻不是。根本沒有目標的, 怎能挨。論很多方面, 我們都會比 BA 的人都要輸蝕, 所以我還是很擔心我找極也找不到工作。到最後會做了一份怎麼樣的工, 真的想也不想再去想了。很可怕。

晚上, 突然很肚餓。拿著祖母送我的月餅, 吃著吃著, 想起出海外讀書的大學生, 只有過時過節才收到家人寄來的禮物, 卻已經是感動不已。我吃著, 想起多日沒有回家了, 爸媽還好嗎?有沒有掛念我?我可有呢。不離家, 真不知原來自己也會想家的。弟弟可好?有沒有只顧玩樂沒有努力?爸媽又有沒有罵他?他又有沒有更反叛, 不明白大家的擔心呢?公司可有 press 得媽媽緊了?是不是快要做不來似的?上次她晚飯後拖著我的手慢慢說自己公司的事, 我才感到她開始相信我長大了 (oh my god, why so late?)....

想著想著, 想家起來了。我似不似到了沙田 exchange 的~? 哈哈哈哈, 我的家的確挺遠的, 別說笑!:D

忽然間, 我感到有件事很不對勁!甚麼事呢?!我低頭一看自己的手.....月餅呢?去了那兒?....難道我呆呆入神的想這些事的時候......

Then something suddenly struck me : 整個吃掉?!

食左成個月餅?成個~~~~月餅喎!!!

雙黃蓮蓉喎 !!! 超級多油架喎, d 油多到可以炸 French Fries 架喎!!! 天呀~~~

即係咁, 以我的胃口, 食一個半個月餅當然唔係問題, 問題在於我快要睡了。我 fully awake 的話都要幾小時才能消化一整個月餅, 睡著了豈不.....天呀, 另一個問題是明晚就是聯合賽了!噢

真是「奧賣吉」!!!!!!!!!!!
我的咀都 O 晒了, 滴汗滴到缺水~~~



又一天。明天又要忙得不可開交了。

Monday, September 20, 2004

20 Sep 2004

Spanish 越來越難。
開始越來越多野逼過來。
突然間唔使見老世, 鬆晒。
篩泥, 好快攪掂, 阿 Wing 比我慘得多。
Training, 好 Amazed 自己未死。
忽然好厭惡所有情情塔塔的野, 只係想做個一刀切 down-to-the-earth 的憤怒青年。
一個人係宿, 忽然諗起我呢一生人做過d 乜野有意義的事。我大個左會唔會好似依家咁過活....一個人在宿舍的感覺很像未來一個人出來住。
明天, 又是 popu。
希望不要周身酸痛, 怎散也散不了的疼痛, 很難受的。

Wednesday, September 15, 2004

15 Sep 2004

GRM 5110 實在是太厲害了
我覺得我實在是挑戰自我充實自己...
...唉

恆生銀行的 management trainees' recruitment talk 都因為 Lucy 太遲放而去不到了。有一點點可惜。

回到宿舍, 第一次有自已的時間, 難能可貴。誰說 Year 3 無聊得很?!我真忙死了。

黃昏, 是泳隊的選拔。今年的新生很踴躍, 人數比往年的都要多。今年我們最出色的女孩子, 是 Italian exchange, Julia; 男孩子呢, 就是 Scolarship 的陳勁聰。勁聰真係「勁」「衝」, 強到嘔。正! UC 有望了!

講開又講。其實我真係唔多鐘意 UC, 連以前覺得無乜野的阿 T 都同我講佢開始覺得 UC 不是她想像中的對學生好。老實講, 要數UC 最值得我留戀的地方, 也許就是這隊人了。思源館當然都入選啦, 它這麼重要。

De-training Effect 已經嚴重地 kick in 了。還有一個星期就到聯合賽, 兩個星期就到四院賽。今晚小試牛刀也氣來氣喘, 怎得了?!天啊...我怕啊...

Tuesday, September 14, 2004

14 Sep 2004

廿一歲的生日
好多人都話係好緊要的
因為二十一歲的生日好似 signify 左d 乜野咁

其實我都覺, 但係我又唔知可否稱之為「變成大人」
因為好明顯我有好多方面都仲未算
但係天外有天人外有人
出面當然有多人係成熟過我
亦有好多人係.....過我
中庸之道, 向來最爽

早上, 帶著一點也不想上的心情趕會大學上 Popu
花哥...天呀, 點解可以有個係 London 讀完書的 Doctor
講出來的英文咁....動聽.....唉

堂上, 有幾位朋友向祝賀
開心
落堂的時候, 節目部送了我一張生日咭
雖然是「新鮮製造」, 但滿載誠意。多謝。這麼久了, 我還是稱你們一伙人為「節目部」。哈哈

太累了, 實在是太累了。專家說, 與其要靠喝 Coffee or Tea 去提神的話, 倒不如小睡片刻會更有用。於是我就回宿舍, 爭取時間睡一睡, 兩堂之後又上 Psychology of Everyday Life 的 tutorial.

雖然我的感覺就像剛剛睡得好就要起來的樣子, 但原來真的精神多了。上完一堂 Psy 之後, 記起 Wendy 說要到 Coffee Corner 吃 Tea, 就先回宿舍收拾細軟, 因為我想吃完之後去游游水。

Wendy 帶了他的組仔 Edward 同桌。從 Coffee Corner 的窗外看, 才記起泳池要用作教 PE 用, 不會開放的, Shit! 白帶一場! 激氣。唯有回 greenhouse 繼續沒完沒了的 Chlorophyll-alpha 的量度。Wendy 義助之下, 應該會做到幾個 species 吧....

怎料, 我們在 greenhouse 吹水吹水吹水然後還是吹水。到最後只做得一個南酸棗。

火車上, 我提出了對七千二百萬破天荒巨額的六合彩的興趣。怎料到沙田見到 Carmen, 她第一句就是「不如我地去買六合彩囉?」。興之所致, 我倆都興奮。打電話問問在餐廳呆等的 Queeny and Claudia 要不要買, 我們就和 Rose 一行四人走到擠擁不堪的投注站。電腦票的人龍, 少說也有四五十人, 未計投注站內的其他人龍。

作為壽星仔的我, 當然要放些號碼出來給大家。我隨口說了六和十三, Wendy 就劃了。(當然嘛, 到最後六和十三都沒有中! 我就是這麼沒抽獎運的人, 唉~) 我自己呢, 就買了四條, 二十元。

晚飯在香辣屋。少見的 Anna 都來了。大家都吃得開心。組妹和 Vincent 一塊兒送了我一個大大的背包, Nike 黑色的, 好型仔。Nike 的正牌貨, 我不知要儲幾多個月才夠錢買! 多謝她們。後來Eva 也來了。我的生日把兩代人都聚了在一起。

後來大家一起吃 Italian Tomato, 倚在玻璃窗旁邊吃邊拍照邊吹水。後來大家一起 check 六合彩。好野! 中了兩個字 = 乜都無。

自己一個人到了機舖玩了一會兒, 就回宿了。近午夜, 我出去跑一會兒緩步跑, 補足一下整個暑假都沒有游泳的不足。


在聯合, 在新亞, 在中大, 我一個人在跑。
黑夜, 橙色的街燈, 地上白色的線, 流著汗的我。





前面的路, 太黑了, 我看不清, 但應該還會很長。我喘著氣, 我也很猶豫, 但我會向前跑下去。

我一個人, 靜靜地, 在中大, 我一個人在跑, 從二十歲, 跑到二十一歲。從大學生, 跑到最後一年的大學生活。

Sunday, September 05, 2004

5 Sep 2004

出奇地, 我已經預左。

所以, you merely realized the long-expected.

我唔 reply your last SMS, 係因為我唔想答你呢個咁~~~~~~~~ foolish 的問題。





我唔識得點樣形容這一種哀傷。















祝你屋企火燭燒晒你d 咁貴的時裝。 (1/ 2007 註:做人可必咁執著﹐講野何必咁怨毒。幾年後又一條好漢﹐乜野都唔記得晒啦。更何況﹐你自己衰先的﹐仲賴人?真係唔要得)

Saturday, September 04, 2004

4 Sep 2004

今日入宿, 又係恆生, 令人不知不覺地產生了厭倦感。
好彩, 今年望海, 唔再係望梯。最後一年, 都算係老懷安慰。
期待最後一年的生活。

夜晚, 我睇中央車站, 心情異常的顛覆, 最後都係唔開心。

Saturday, August 28, 2004

28 Aug 2004

今日好遲先起身....呢幾日都係咁。因為 Phoenixus 實在讓我太著迷, 佢又有少少難玩, 但係又唔係太難玩難到你唔想玩。

今個下午突然間非常有 mood 做家務, 於是就洗了碗也吸了塵。若然不是 toilet 有人的話, 我就可以繼續拖地的了。

傍晚, 到了東園金閣吃晚飯, 未出門的時候媽子總是要爭著幫弟弟執拾手信...幹嗎, 怎麼不可以讓他自己學會處事的呢。我也是這樣的學會了一點點的處事方式。人總不能永遠都靠別人, 很多時候你都是自己一個人, 怎能每刻都靠著別人教你 or even 替你 solve problems 呢。所以我堅持很多時候讓弟弟自己做決定。因為 lassiez-faire policy 起碼可以讓你做過一次決定...而不是事事都好像十分 detached 了似的。

夜晚先去188, 對面地庫, 翠華, Starbucks, 惠康, 回家。愉快, 也奇怪。

Tuesday, August 24, 2004

24 Aug 2004

四日的細 O 終於都過去
老實講, 其實我覺得做 OC 真係開心好多
我一路都唔明點解, 可能係因為我做組爸做得唔好, 可能係因為我唔適合做組爸, 可能係因為d 仔女實在係太過靜的關係....我唔知點解, 但係我真係幾回味當我做 OC 的時候。
後來唔記得邊個 friend 走來安慰我, 應該係因為我做 OC 的時候投入的時間同精力都多好多, 時間長好多, 所以當個 O Camp 完的時候我就覺得回報大好多。

唔知自己講乜野。

講番個 camp, 我地一路都好驚會包尾, 但到最後原來我地唔使包尾的時候, 你都唔知我真係幾 relieved.「啤住梨」的組媽 Fione, Joyce and Sylvia 都好似我一樣咁驚。但係好明顯我地見到仔仔女女都唔明白我地點解要咁驚, 知道唔係包尾之後點解又要咁 relieved. 唉, 算, 好多野d 仔仔女女都唔明的架喇, 老實講佢地真係比我地想像中一碌木好多, 我 expect 的仔女係會俾多少少反應我。尤其係當我見到其他組的仔仔女女都最後的時候都會俾反多少少反應的時候, 而我的仔女就好似係政府總部門口靜坐咁樣, 其實我真係有好幾刻想放棄算數。不過到最後都諗緊, 就算我盡左力, 都未必盡如人意的, 既來之則安之囉...

只係, 我估唔到, 我地為佢地做咁多野, 佢地都好似多謝都無聲感動都沒有的時候, 其實做組爸的真係一萬個失望。見到其他組妹都由衰轉好, 由頹轉旺的時候, 其實我就更不是味兒。不是說其他組越來越好是一件壞事, 而是當有比較的時候, 遲上岸的總是會比較擔心的。縱然其他的組妹朋友亦有安慰過我, 但那一刻我真的不知怎樣做。到最後嘛, 我還是做回了自己想自己做的組爸就算了。

第三日玩定向, 大家的本性都出來了。有甚麼不快的事我都當忘記了算了。

第三晚食宵, 很感動, 見到了兩年前的景況。兩年前的當日, 我們一組人就在這裡認識了對方。我們一組人有兄有妹就齊人了。兩年後的今天我們又回到了泰源, 景物依舊, 人面全非。大家都長大了, 轉眼就已經是最後一年在地資系讀書了, 也應該是大家人生裡最後一兩個年頭做學生了。今天, 組爸媽已經不在, 自己卻做了組爸, 妹妹都做了組媽, 詩雅做為么女明早卻要飛到加拿大讀書去了, 時間沒有停下來, 只是人們卻想著從前和現在。

叫人怎能不感動。感慨。感觸。

粗口堂妹初長成
明早就要飛望城
無論你去到邊度
我地一樣掛住你

粗口堂 粗口堂
組聚之霸王中王 (勁霸氣的 slogan~~)

明年今日, 大家會在那裡?大家的生活又會變成怎樣?大家又會否已經忘記了大學時候的純真?大家又會否已經不再是從前的自己?大家又會否在社會裡感到很迷失了?……

明日愁來明日當, 舉一杯, 祝妹豬一路順風, 學成歸來。也許大家姐想的跟我想的都差不多, 可能因此大家都被感動了。

不知道在場的 freshmen 能否感受到我們的友誼呢?

之後, 我不想睡, 玩了一整晚, 天邊泛光的六時才睡, 睡了兩個小時就起來了。

分享的時候我說出了我和組爸的故事, 可能大家會覺得故事很老土很煽情, 必然是自己編出來的。我可以告訴大家, 是千真萬確的。我希望你們會感受到。

完了之後, 大家都拍了很多傻乎乎的照片。然後, 就真的散了。當我跟他們揮手的時候, 我就知道最後一個 O Camp 都終於完了。

完了。

跟嘉威阿瑪 Asa 在 UC Can 吃飯的時候, 我已經覺得累了。在校巴之上, 因為精神放鬆了很多, 所以睡魔就大舉進攻了...我幾乎在火車和巴士上都睡過頭了錯過了站。

回到家, 洗個澡, 六時睡一睡, 晚飯沒有吃, 宵夜沒有吃, 早餐當然沒有吃。起來的時候是早上十時。昏迷了十六個小時, 驚為天人!

完了, 沒了。

可以算盡興嗎?也許, 跟絲路一樣, 「像夢一樣」。

Tuesday, August 10, 2004

10 Aug 2004

今日本來諗住番中大, 但係太遲喇, 都係去買電話喇, 點知都係太遲喇, 問到 Wilson 有關學車的事, 然後去西灣河借左佢的舊電話來用用, 跟住就到尤德去睇牙。估唔到的係, 我竟然唔記得帶 GF 181, 攪到我要俾成舊水, 超無奈。之後就搭超長程車入荃灣, 係 Carmen 教路之下快跑到 bowling 場。原來 bowling 都幾好玩, 個感覺又幾休閒, 可以一面慢慢吹水一面慢慢來的運動。之後到左愉景新城食野, 幾好, 大家傾得好開心, 好耐未試過咁樣組聚。番到屋企睇 24, 好好睇, 已經尾二一集, 好快結局。之後番入房, 睇埋最後十幾頁的 The Da Vinci Code - 一本好睇到爆爆爆的書 - 之前有一晚攪到我不停咁睇, 追到晨早五點先係倦極的情況之下被逼停看去睡。令我追看的緊張程度竟然可以同金庸的小說有得 fight, 非常之唔話得。終於睇到結局, 老實講, 略嫌有點兒....爛...似乎作者係作過程的時候真係 very brilliant, 但作結局的時候真係....呃.....WELL.總之睇完。

有d 失落添。之前搭車等人都把握每分鐘去追呢本書。點知真係俾我一下子睇完的感覺, 好 fulfilled, 但亦都好 lost - 之後點呢?為左填充我未完的「追書飢餓感」, 我就拿起另一本同樣地係書展度買的新書, 四書之一的「孟子」來看。呢本孟子有埋注釋, 主旨, 同埋全白話文譯本, 幾 ok。我睇左兩睇, 發現原來要用心睇文言文真係好~~難。於是改用全程睇白話文, 點知阿軻少講的野越來越難, 齋睇白話文都唔得, 越睇越唔掂, 越睇越唔明, 睇埋原文 + 注釋 + 主旨 + 白話譯本都唔得, 不得了, 放棄哉。

啋~~~~

Friday, August 06, 2004

6 Aug 2004

頂!!!!!!
唔見左個手機呀!!!!!!!

英國的好朋友表哥又回來香港啦, 超開心唷。不過我近來又有人渣老世的 FYP, 又有組爸要做的野 e.g. 今日去練舞, 仲有個 UCFYP 就來要做, 真係....其實我都好唔開心 about 好多時都唔能夠陪到佢, 話晒佢咁多年先番來一次, 而且又同我咁老死喎....唉。

唔見左個手機真係十億個唔方便, 我都唔可以忍受係街度我搵唔到人, 人地搵唔到我的感覺....仲要係街邊入一蚊雞去 payphone 度打電話....真係回到九十年代。頂, 好辛苦呀。

好彩我仲可以 retrieve 得番以前用開的電話號碼咋! 不過無晒所有 SMS Message lu....亦無晒成個電話簿....呢野先係打得我最應。超煩。

同 William 行街, 一下子行得太多, 佢病左, 我右腳的死人頭舊患都竟然觸動到, 再加埋今日練舞, 一到休息的時候基本上已經覺得痛, 停定左個人之後, 痛楚更明顯...唉...我好怕....年紀輕輕就有埋d 咁的舊患....我想話呢d 絕對唔係囉來 show off 俾人睇後生有幾威有幾猛的 evidence - 佢只係會令自己記得個次跌得有幾傷, 個傷口有幾深同埋佢有幾怨魂一樣, 死痴住你唔走。

當我知道我腳痛的時候, 我好 amazed 原來我一直都未 100% 好番。我個一下真係好迷茫。
我心裡面只係不停咁諗住同一句
我可以點做
我應該點做, 先可以100% 除去呢個舊患
我唔想佢好似個計時炸彈咁埋左係我隻腳度
到我老左的時候先突然間爆
唔想
我唔想
我應該搵咩方法
我應該搵邊個醫生
我應該搵乜野療方先得
點算....

..................爸爸口裡說著的「話唔定番風落雨的時候你就會痛到哎呀哎呀咁叫」.....
.....
.....
...
.......
.....好恐怖呀
好恐怖呀.......

Thursday, July 29, 2004

29 Jul 2004

弟弟快要起行。他 join 了一個學校攪的遊學 program 到英國。二萬幾元。最初大家都為著 join 不 join 而掙執了很久很久, 幾乎變成了一個家庭的fighting。到最後媽說要問一下他是否真的想去, 若然是的話才付錢讓他去。我聽見的最後 version 是這樣的。到最後不知怎的就真的 join 了那一個 program。

他星期天就要起程了。但還是一點東西都沒有準備過, 一點執拾都沒有做過, 一件須要東西都沒有買過, 甚麼都沒有做過。我們起初真的很急, 真的很怒, 不知為甚麼。後來又放棄他了, 因為知道這人無論你怎勸都是沒有用的, 都是陡然的。

但最後限期始終會到, 終有一天他真的要上機了。到時又會怎樣呢。他會怎樣呢, 會不會缺了幾件衫少了幾件必需品。...

我不敢想。

今晚, 我跟媽吵架了。弟打機打至深夜仍不睡。就是這麼打打打打打打打。總是不去收拾行裝。大家都火了, 我尤其是火光得很, 不知道為甚麼他總是不去收拾, 不去準備, 愛理不理, 完全不理。你罵他, 就只會給你一個呆樣, 一幅「又怎樣」的樣子。絕對叫人想一巴打死他的樣子。

我好憎見到佢呢個樣。我好想知他到底有沒有聽我的說話。

今晚媽發脾氣鬧我沒有理他。當初放他去玩的是她, 說他玩得這麼開心何必叫他回來的是她。然後回到家裡說我們不理他任由他打機的又是她。你講晒啦, 玩野呀?!我當然企硬, 於是又吵起來。

我實在忍夠了。找弟來質詢。我一開始就問最簡單直截了當的問題「你到底想不想去英國」

料不到我催了幾次之後的答案竟然是一個搖頭。我很 shocked. 五秒後, 驚訝變成極怒。媽不是說要讓他說他肯去才付二萬多元的嗎?怎麼...怎麼....難怪他一直到用打機和懶得理你來逃避一切, 對執行李更漠不關心, 似乎下一刻就要上機的話都沒有甚麼問題, 似乎不去也沒有甚麼問題, 似乎二萬多元白花了也不是甚麼問題, 反正錢都不是我出的, 反正都是媽要我去的, 反正我都不在乎媽的血汗錢的, 反正二萬多元而已, 有甚麼大不了...

弟沒有說出來, 但從他的面容中, 我看到了這一切。他的漠不關心的眼神, 告訴我他的一生似乎都是被我們逼出來的, 他好像逼不得已才去英國....想到這裡, 我想, 必是游說的時候媽用盡方法令弟遻「好我去」才肯收聲吧。換了是我也會受不住。

但其實換了是我的話我會說不, 如果我真的不想去的話。大拿拿二萬蚊喎!!!!!!!!!!!!!!!!!!! 我明知爸媽賺錢是很辛苦的, 二萬多三萬元絕不是一個小數目。要掙很多個月才能掙到的數目。很多家庭都付不起的, 更可能是更多家庭一個月的生活費, 每餐都只能節衣縮食的。..........

他不知道。....他永遠都不會知道....他不會知道媽媽有多愛他, 因為他早已被溺愛寵壞得徹徹底底。他每一條骨子裡都認為爸媽對他好是應份的, 是自然的, 是應該的, 不可能不是的。他不明白這一個世界上根本不會再有另一個人會這樣的對他, 他也不明白爸媽不會再對世上另一個人這樣的。他不明白, 他覺得是應得的, 他以為是幸福是必然得很的, 他以為別人為他緊張是人人都會做的, 他以為這個世界上人人都會對他這樣緊張, 這樣徹頭徹尾的照顧著他....

想到這裡, 我心已經很酸, 很傷, 很痛。但我被更大的一股狂怒的怒火衝到上心來, 甚麼心痛都忘記了。那一刻, 我根本已經到達了忍耐的極限, 我很想很想很想很想抓拄他的頸, 狠狠地大聲地把他罵醒, 很想很想很想一巴一巴地打在他的臉上, 要他知道他是多麼的令人髮指, 多麼的不知所謂, 多麼的無知, 多麼的可怒也。

不想去都竟然讓媽媽付了二萬多塊為了他去一次他根本不想去的 trip...
大家竟然都不知道....
他竟然不一早說出來, 讓他不必去, 讓媽不必付錢, 讓這一刻的大家都好過...
他竟然不當整件事是一回事, 他竟然毫無不安之心, 他竟然完全不覺得媽給他這麼多錢是一件多麼人恨也恨不來的一份禮份...
他竟然不當是一回事....他竟然不當是一回事....
我真的火了, 火得緊了....火得不得了。
但我今次神奇地忍到。很神奇, 換了平時的我早就拿起椅子舉過頭往地下用力一摔要把他摔個椅背也彎, 再拿起可以拿的東西重重的向四方八面都亂摔過來洩氣了。

但我忍。原來別人說, 一個人極怒的時候反而不會發出來, 是真的。

回到房中, 我忍得更辛苦。胸口就快要爆開似的, 好幾百道氣湧過上心來, 好幾百遍我真的要在深夜中爆發出來的時候, 我都活生生的把一道怒火都吞回去。我忍得好辛苦, 好辛苦。要不是半夜三更的話, 我一早就發了脾氣。要不是爸媽都睡了的話, 我一早就找他們來好好質問。要不是我知道自己真的會發脾氣發得太過火的話, 我真的就把他們統統都叫醒來了。我真的受不了, 我受不了這一切無謂但實實在在的現實。我想不到我應該怎樣的做, 我只想找一個方法好讓我快要谷爆的身軀找一個出氣的渠道, 因為我真的很憤怒很憤怒, 即便是對著大海叫喊多少次都於是無補的憤慨。

我很憤怒。
我很傷心。
我很谷氣。
我很想爆發。
我很想狠狠地罵他。
我很想他給我一個比漠不關心更好的反應。
我很想他「在乎」。因為我很討厭很討厭他「完全不在乎」。
既悲且憤無處洩。我快要崩潰了。

天呀, 神呀, 甚麼都好, 請教教我該如何做。我對著我的家人真的快要崩潰了....我好想哭, 但又不想哭。想找個理由, 又似是找不到, 又似是找到。我很想有一個更快樂的家庭生活, 我很想有一個健全的家...為甚麼人願總是違得這麼遠...

我很憤怒。

(1/2007 註:施主~~~唔使咁勞氣~~~~
講個好消息你聽下
三年後的今日
你阿媽﹐你阿爸﹐你細佬
都係一模一樣

開心嘛?

點呀?係咪無咁嬲呢?
覺得死心哩?一早應該啦。
想放棄哩?做好自己就算吧啦。

心平~氣和~..............阿彌~陀佛~)

Saturday, July 24, 2004

24 Jul 2004

書展。我最鐘意人多多逼來逼去, 童心未泯的我, 不嬲都覺得好好玩。書展咁大個盛事, 梗係要多多人一齊逼逼逼先得意架嘛。如果成個書展得個寥寥幾人, 有乜野好, 好似呢個書展完全唔吸引咁。人人都話好怕人多逼來逼去, 乜都睇唔到乜都買唔到, 逼完之後成個人都累了, 有乜野為?!少d 人唔好咩?哈哈, 我唔係咁諗喎。多人逼逼逼, 多人撞撞撞, 尤其係我呢個巨型得黎 slim slim 地的身型, 攝位零舍易, 蛇一般的在人群中左游右游, 或推或撞, 過五關擠六將, 萬人群中凌波微步, 哈哈哈....


再神機妙算, 都算不到原來會碰著你。真的料不到。見到你一刻, 我連思想都停頓了, 腦子好像忽然離家出走了似的。我呆了, 連一句問候語「你近來可好」也不懂得說, 只懂得公式地笑笑, 然後再公式地說一些廢話來。大家都有大家的生活了。心亂如麻, 卻又似是一片空白。萬般思想, 卻又似是呆若木雞。難得大家都還記得臉上的微笑別忘了放上來。


現在聽著王菲的歌
「當時的月亮」最能鉤起回憶。歌詞實在太好, 令我不想想起某一些人, 包括你, 也不能。
「償還」依然 K 歌, 當然不是容易唱那種。聽罷了, 更回想多中學時的回憶。
「人間」讓我想起 Jackie, 讓我想起「守望麥田」, 讓我也想起了 Gloria.

Rose 說我整天都很多無謂的追憶, 一味傷春悲秋的。

我認。雖然這個批評甚為負面的。 (2007 註:三年之後的今日睇番都覺
得 Rose 講得好岩架喎。依家睇番﹐真係覺得果陣自己好麻 L 煩。成日都「唔開心呀」﹐「唔知想點呀」咁。睇得多﹐人都慶﹐「乜呢條友咁 L 婆媽架」)

「...誰能告訴我
要有多堅強
才敢念念不忘
當時如果留在這里
你頭發已經有多長 多長
當時如果沒有告別
這大門會不會變成一道牆
有什么分別 能夠呼吸的
就不能夠放在身旁
(回頭) 看 當時的月亮 曾經代表誰的心
結果都一樣 看 當時的月亮
一夜之間化做今天的陽光....
....
...當時如果沒有什麼...當時如果擁有什麼.... 又會怎樣....」

Friday, July 23, 2004

23 Jul 2004

一朝醒來, 聽見電腦的 Alarm Clock program 已經將 mp3 播得很響, 卻總是沒有想起床的心情。不知怎的, 我好像忽然間想起了甚麼。啊, 原來今天應該會大學跟 Carmen 他們一起傾傾 Silk Road Report 的事。那麼現在是幾點鐘呢?糟, 十時了, 我該十時就到中大了的。只得打個電話給 Carmen 告訴他們不必等我了, 但是我還是會回來的, 等我。

回來之後原來大家都是在做大家的事, 似乎沒有人記得我們是要談談 Report 的事宜。那還真好, 我想, 起碼不必再為這一份奇奇怪怪的 report 煩惱。不久, 大家都頹頹的走到李慧珍嘆 lunch。席間我告訴大家這裡原來已經裝修過了, 大家卻說根本就沒啥大分別。要是我是李慧珍的娘子軍們聽到了必然會感到很不高興。

在我們進餐的時候見到了一大群的小朋友, 他們好像甚麼年齡的都有, 似乎就是來 join 中大的 summer course / summer camp. 不過, 從他們的導師口中聽得出, 他們似乎在點食物方面毫不節制, 總是點得太多食物, 尤以女孩子為甚, 食剩的似乎有很多。唉, 聽見了就把幾火, 年輕人不懂得珍惜食物, 要甚麼就點甚麼, 吃剩的從不會感到不好意思 / 有悔點得太多, 胸中只有一些霸王心態「我付了賬, 想吃幾多就幾多, 我管得著麼」

這樣的心態真不要得。且不說這一代的人不應該有, 下一代以身作則的教育之中更不應該有。

轉眼就到下午兩點, 是我們 O camp 的 pre-game 時間。我們玩了「七手八腳」「反檯布」「奶鹽女」(不知所謂) 「夜遊人」(少少悶) 「動物大觀園」(幾好笑)等等。亦跳了 Camp Fire, 一隻是「My Bonnie」, 另一隻是「Changing Partner」。全新的兩隻歌, 新鮮感頗大。

「夜遊人」後就是回到三條二開 E 。之後大家就鬼鬼祟祟祟地走了出沙田吃晚飯。籵不到的竟然是吃扒餐....我之前的一晚才剛剛吃了一個日式的自助餐, 飽得不得了, 今晚又再吃大大的一片肉, 看來我的腸胃又有好受了。唉。

嘉威今晚對到機舖打機突然間感到非常的熱鉽。不知所謂何事。平時的他不是這麼愛好打機的一個人...至少當我還在場可以做一個 comparison 的時候。但不知道晚為甚麼他們這麼的有興趣, 三句不離兩句的總想提著我今晚飯後的下場就是去打機。我用很是奇怪的眼光望著他, 好想解讀一下他現在是甚麼的心理, 卻不懂看穿甚麼心思。

出奇的是, 我跟他在飯後到機舖的時候, 他竟然走了好幾個圈子也找不著自己想玩的遊戲。到最後只大家一起玩了幾次「手指指百萬富翁」就走了。

又一天。

Monday, July 19, 2004

19 Jul 2004

我終於都睇完書劍恩仇錄。好快睇完。
有一段我翻睇的時候印象幾深刻

關明梅低聲道:「大家當面把話說個明白﹐那最好不過﹐別把話憋在心裡﹐一憋就是幾十年﹐害了人家﹐也害了自己。」……關明梅望著漸漸在大漠邊緣沉下去的太陽,緩緩說道:“甚麼都講個緣法。從前,我常常很是難受,但近來我忽然高興了。”伸手把陳正德大褂上一個鬆了的扣子扣上了,又道:“一個人天天在享福,卻不知道這就是福氣,總是想著天邊拿不著的東西,哪知道最珍貴的寶貝就在自己身邊。現今我是懂了。”陳正德紅光滿面,神彩煥發,望著妻子。

關明梅走到袁士霄身邊,柔聲道:“一個人折磨自己,折磨了几十年,甚麼罪過也該贖清了,何況本來也沒甚麼罪過。我很快活,你也別再折磨自己了吧!”袁士霄不敢回頭,突然飛身上馬,說道:“去找他們吧!”天山雙鷹乘馬隨後跟去。

...........一個人天天在享福﹐卻不知道這就是福氣﹐總是想著天邊拿不著的東西﹐那知道最珍貴的寶貝就在自己身邊..................

總是想著天邊拿不著的東西........總是想著天邊拿不著的東西......

.......吁

Saturday, July 03, 2004

3 Jul 2004

今日已經係我係香港的最後一日喇。聽日我就會一早搭巴士上深圳﹐然後係深圳搭飛機入西安開始我一連十一日的絲綢之路之旅。

老豆話絲綢之路 = 死囚之路。唔係化。

既然聽日就要起程, 大家都估到我實係今日先開始執野。老實講, 我已經比我阿媽係呢一方面醒覺好多, 我一早就開始執, 我尋日已經 plan 定要執乜野, 尋晚已經拿拿聲開始執。但係都唔知點解個進度都唔係好得。

我用的係一個 55L 的大背包, 當然唔係我的, 問 Gladys 借回來用的, 謹此致謝得很。但係有個問題我一路都 sense 唔到…就係原來個背包似乎唔係好夠大。我一路都覺得佢真係幾大下架喇, 但係估唔到係要到我放野入去的時候先顯得佢…未能夠如我想像中「獨負重任」囉。佢可以放晒我所有要的野入去, 但係空位已經唔多甚至極少, 咁攪法回程的時候會好頭痛。因為每一次用完的衣物都總唔會好似剛從衣櫃裡面拿出來的一樣整齊。所以當每一件衫都不知為何地脹大了少許的時候, 你就要更多的空間 for 回來的衣物。咁都未夠死, 你估我會唔會買手信呀拿。

咪係囉。

係呢一個情況之下, 美國姨媽送的大大個 Addidas (我好似連 Addidas 點串都唔係好記得…) 運動袋就非常好了。唔單止可以作為一個隨身袋, 更大到可以做我的回程後備袋。大袋仲可以裝一個書本 size 的斜背包。甚佳也。

差唔多執完, 就出街要去買野。其實真係無乜野買, 好多都已經問阿爸又有問細佬又有。無的我通常都算, 除非真係非帶不可的。

食滯左, 唔想食太多野。午飯就無煮了。我見細佬為左打 GTA Vice City 發晒癲咁, 牙唔刷面唔洗早餐唔食午飯唔食放學回家衫都唔換….就係坐係部腦面前自我投入。我阿媽叫佢去做, 佢當然又唔聽。我叫佢, 都唔聽。攪到我三催四請五鬧六打七發狂八爆發佢先去求求其其叮一個叮叮湯飯食。…求其得佢。我想話, 叮叮湯飯唔夠架, 營養又唔夠, fiber 又唔夠, 對身體無好架。但係我都費時講, 你都唔知佢幾著迷。食完一個湯飯唔夠拿拿聲再去叮一個, 叮的時候又拿拿聲飛番入去打機, 一秒都唔浪費得…

使唔使咁呀。

之所以我好唔想我細佬咁, 除左係因為佢咁樣打機法好病態之外, 亦都係因為佢阿哥我, 其實說來慚愧, 我都係一個過來人。我以前都係咁。

依家我大個左 lu, 諗番轉頭就會明白, 當初我咁樣係 sacrifice 左好多野, 其實除左有時會回味一下「呀我以前打機打得好兇架」之外, 根本就係一段不足為外人道的醜事過去。但係我細佬人仲細, 唔明, 或者佢明, 不過佢唔理咁多, 「今朝有機今朝打」, 過左聽日都唔知阿爸阿媽會突然間又鎖機唔俾打。我好明白佢的感受, 因為我都係俾同一對父母養大過, 係同一個家庭下長大過, 而我同佢的性情有時都幾似。

就係因為我行過呢條路 (雖然我唔係咩飛仔犯過咩事) 所以我先更唔想佢咁樣。

講下第樣野。今日有幾樣新的奇遇。

首先第一樣就係係麥記買左個沙律。諗住試一次, 於是係超拿貴的情況之下都買左。然後跟據我的行程, 搭電車到北角借書, 食野, 再搭車番大學。

以上所講的幾乎樣樣都有新遭遇。搭電車…我呢個港島人, 雖然成日都俾人話我都唔知係唔係住港島的, 銅鑼灣都唔熟 (大佬呀, 我係乖仔黎架, 日日都係屋企, 都唔會出來「浦」的, 出親街來來去去都係去個幾度架喇, 我又如是朋友亦如是, 想點喎!) 之不過搭電車呢家野就因為夠冷門所以我比人略為技勝一籌。我仲記得好清楚有兩架電車係被囉黎做 modernization 的pilot study, 車號分別係177 同 178….好似係。但係今日搭果架呢, 係超舊款黎架。一上車, 樓梯不在你面前, 在你左邊, 即係係車的左邊; 係圓形的 spiral 梯。椅係木條排成的, 不是一大片過的 bench. Spiral 梯底下仲有一個人的位可以坐。車身亮青色, 窗框木造。燈係黃色燈膽, 並非白光管…嘩, 時光倒流十零廿年呀。

北角借書無特別。我睇緊書劍恩仇錄, 大本裝, 唔想拿住咁大本上大陸, 要搵細本裝, 我以為好容易搵, 點知原來非常搶手, 不知為何, 我上聯機搵, 好多間 library 都有, 但係好多都借出左, 得番北角先有。於是我要特登去到北角為本書劍恩仇錄瘦身。

電車上未食完的沙律, 係港運城的運城食坊再食過。運城食坊…係滿載住七八年的回憶的地方。由 F.3 開始來呢個地方, 到依家大二就黎變大三…唔知點解好多回憶都係呢度發生的。一時坐下來四下張望, 雖未至於感慨良多, 但心中卻是蕩漾著回憶。有機會再述。

番大學…老實講, 我好似未試過著西褲皮鞋番大學。無他, 因為今晚係楊汝萬的 Farewell Banquet, 係紫荊閣攪。我係 Student Representative 之一嘛…想唔到都幾難。希望唔會番到屋企再執行李的時候發現有野未買啦。聽朝要六點半前到九龍塘, 突然醒起有野未買的話都一定買唔切。

十一日GRM Field Trip。十個期待滿分我俾六個。十一日後又係一條好漢, YEAH! (痴線…)

點解呢篇日記咁長?因為我依家係 222 等緊 Banquet 夠鐘…哈哈哈 (苦笑)

Saturday, June 26, 2004

26 Jun 2004

你不明白我, 那也沒法子。一個對大家都好的做法, 我想應該是這樣子。我很開心, 縱然睡不夠也不是太介意。玩弄貓兒更樂透了

Wednesday, June 23, 2004

23 Jun 2004

今晚明明係輔聚。即係咁, 我估唔到會咁少人來。我本來都聽聞過唔會多人, 但係都唔好少到咁樣呀, 睇起上來似乎都只係我地識的人圍內係度攪一個組聚咁樣。真神奇。

今晚出去 jogging 的時候, 竟然俾我跑到一個無乜人行的行人路上面, 見到有一張廿蚊係地下。貪念叫我去拿, 廿蚊喎, 都唔少架。理智 & 多年的德育教育叫我路不拾遺。但最有說服力叫我唔好去拿的, 反而唔係呢d, 係一個發生係我家族的一首悲歌。我都係係祖母口中聽說回來的。

話說四十年前, 當時的物價依然很低, 一毛錢就真的能買到一條雪條, 或一枝可樂。一百元的金額, 實在是一個很大的數字。恰巧有一天, 我爺爺就在家中對面的垃圾房門口的地上, 見到大刺刺的一張一百元紙幣。

一百元哪, 祖母回憶說, 就算那時一家八口都至少夠吃大半個月了。

當時的經濟還沒有起飛, 香港人依然是窮的。一百元是一個很大的數字, 坦蕩蕩地在地上閃亮著的一百大元, 別說當年, 且看每天, 依然是一個令人怦然心動的誘惑。爺爺為了六個兒女都吃得好, 為了家裡的祖母不用多做工作粗勞, 自然而然地, 就拾起了那張一百元回家。舉家都很開心。

祖母說: 誰不知, 原來那張鈔票竟是「買命錢」

爺爺從來都是一個很嚴格的人。他嚴以律己是出了名的, 規行矩道, 嚴肅正經都是對他最佳的型容詞。因此, 可以推算得出他亦是一個在健康之上規規矩矩的人。誰也想不到他正值英年的時候會突然患上了腎病。他的病詳情是如何, 我可沒有問道。很多零碎的片段, 都是從我二十年來跟陳家的人一起飲茶吃飯閒談聽聞回來的, 再經我 piece by piece 地拼湊出來的。只是知道, 他很少這樣的病, 這一次從很健康到突然發病, 再不用多久就病情惡化, 到最後又不用多久就...走了。一切都發生得很快。很快。家人才匆匆的替病榻上的爺爺領洗入教天主教不久, 他就去了。(亦因此他撤手塵寰後能葬於跑馬地天主教墳場中)

祖母回想起, 似乎最能解釋的, 就是一張買命錢。天降巨額橫財, 家人開心都來不及的時候, 拾錢者亦賠上了性命。

她說, 若然你祖父沒有拾到那一百元...或者現在他還會在這裡。我信的。姑勿論爺爺的發病是不是真的天降橫財再降橫禍, 但我相信他若然能逃過那一劫的話, 他還會在跟我們一起, 看著他很多很多的孫兒出生, 包括我。

或許其他人會覺得不科學, 不理性, 不合 logic, 不可信。但我今晚一時許的時候, 四下無人, 看見地上的那張二十元的時候, 那一剎那間, 腦海裡面不停地回蕩著的, 就只這一個故事。就只兩三秒間, 我想了無數次這一個故事。

我停也沒有停下來, 繼續向前緩緩的跑。眼睛緊盯著鈔票幾秒過後, 轉過頭來轉心跑步算了。走著走著, 那一張天降的小橫財已經遠在身後。或許已經遠在四十年前。

累了, 就坐下來休息。喘著氣的時候, 心裡面惦念著的, 竟然是爺爺。他去後二十年我才出生, 我當然從來沒有見過他。但...我又有點怪怪的感覺在心裡面蕩漾著。

怪哉。

Saturday, June 19, 2004

19 Jun 2004

父親節前夕。除左睇住阿爸係屋企訓到好似一隻豬咁樣之外, 就係同佢同細佬一齊去左游水水。點知就攪到去 gathering 的時候遲左少少。我同 Eric 講我會遲兩個字到, 就真係遲左兩個字喎。哈哈, 我都話我係一個好準時的人黎架喇, 係咪?話到明遲兩個字就真係遲兩個字, 唔多唔少~~ ^ 3 *
今晚其實係一個 7B 的 gathering。但係好不幸地得番好少人黎。咁算啦。當係小聚一番囉。去 Club 35 度食。呢間野個名就聽得多, 但就真係未試過去食囉, 今次第一次去, 睇怕下次我都唔會再去...即係咁, 我雖然份人無乜野要求, 但係食野食左咁多年, 都開始對食野有番「小小」要求。所以...
之後就去 Starfucks 同李 Sir 聚一聚。其實都係分開兩邊講....車
之後就當然係上 P5 打機啦! Yeah! 燒錢燒得最多係太鼓, 六蚊一鋪, 請 Anna 打, 都已經去左我一半的 Tokens.

Saturday, June 12, 2004

12 Jun 2004

好耐無打過日記, 好多時都想入黎打, 但係超多人係度, 我又唔係 VIP, 攪到無入黎。激鬼氣。平時我又掛住打機喎。講講下其實我諗下轉做 vip 都唔係太大問題。時關都係五十蚊之嘛, 一d 都唔貴, 不過個步驟好似幾煩人下咁, 我睇過一次, 真係幾煩咪講笑。

講起打機, 衣家簡直係瘋狂地愛上了 Grand Theft Auto : Vice City. 簡直要高呼 I'm Lovin' it~~! 好, 既然咁好玩, 就梗係要係度講下玩乜野架喇。拿!!!!!!!!!!!! (用鄒桂的超高聲調突然爆發式的「拿」一聲來說) 故事就係扮演一個飛仔, 背景係 1986 年的 Miami 裡面的 Vice City。你要接好多人俾你的 missions, 然後由小混混變成江湖大佬。其中可以做好多野, 包括無那那係條街求其打死一個人 (唔好俾差佬睇到), 當街截停一架車再將司機拉出車然後上車 (即係搶車), 乜車都搶得, 的士, 救護車, 消防車, 軍車, 普通車, 警車, SWAT 車...每一種車搶到手又可以做 sub-missions, 即係搶到的士可以接客, 搖身一變 Crazy Taxi, 限時之內送客到目的地, 話之你走捷徑定車死晒路上的人都唔理。其餘的, 上警車可以扮警察做賊, 上消防車可以去救火, 上 pizza 電單車可以送 pizza. 超得意....日日新奇次次鮮, 總之玩到你唔厭。仲有好多野可以講, 不過講講下我又想玩!!!
hahaha!!!
下次打埋 the remaining parts! 本少爺講講下講到手癮到, 要打機喇。
呀! 仲有! 最精彩的地方! 係個主角叫做 Tommy!
Tommy! YEAH~~~
打機去也~

Thursday, May 27, 2004

27 May 2004

生活依然係充滿著

Occupied

Not Available

Away

Work

Greenhouse

Work

Proposal

Research

間唔中, 先可以出沙田玩一陣
燒下銀紙咁樣


其實做人應該會正面d
有野做的時候應該要覺得自己的生活好充實
無野做的時候應該要覺得自己的生活好 free 好寫意

咁先係架嘛

Friday, May 21, 2004

21 May 2004

除了疲累

還是疲累

非常疲累

Thursday, May 13, 2004

13 May 2004

今日, 係好值得紀念的一日。

話說尋日鄒桂突然間打我電話來, 問我聽日得唔得閒喇。咁我都估到佢係想我開工架喇, 之但係我估唔到的係會做成日囉。我聽佢講話要九點幾開工, 我以為係好快就可以完, 點知原來係做極都做唔完。

好, 由頭講起, 我今朝八點起左身, 因為想早少少準備好。點知係呢個時候, 有一個長途電話打來喎。原來係澳洲的 Annie Wong。好耐無聽過佢把聲, 唔知佢衣家點。點知講多兩句, 佢竟然話自己之前已經訂左婚。跟住我當然係成個都呆左喇。然後佢先慢慢講, 佢今年十二月就會同佢澳洲藉的老公仔結婚。

結婚.....!?

嘩。呆左。佢今年同我一樣咁大個咋。但係佢已經成為我生命中第一個朋友搶閘結婚。

呆左。

其實都幾登佢開心。因為佢去不嬲都鐘意鬼佬, 既然搵到個佢自己愛的, 又岩佢口味的, 都唔錯呀咁, 係咪。不過, 呢個 news 都幾 shocking, 咪講笑。

佢話, 想我係香港幫佢 spread 呢個 news 喎, 咁我又唔會寫大字報的, 不過就會係呢度寫出來囉, 因為我都知道有一兩個中同會睇我呢個騎呢日記的。

之後就到 Greenhouse 做野。原來鄒桂今次呢個 project 係想做 20 種 Native Species 係不同的 Nitrogen content 底下的生長情況。咁係一個 controlled experiment 底下, 所有的生長 factors 都一樣, 只有不同的是供給的 Nitrogen 份量, 咁就可以揮走晒所有可能的 distorting factors, 証明只係 Nitrogen - 呢隻植物的第一大 Macronutrient - 係 Native Species 身上有幾大影響。

Natives Species 共做二十種, 另加紅膠木同耳果相思兩隻 Exotic Species 做比較, 共二十二種樹。每種樹都要種十五株, 因為要個 sample size 大d 先有 significance。總共種樹三百三十株。每株樹一個盤, 每個盤連 pot 連 saucer 連樹苗連黃花沙 (Degraded Granite, 簡稱 DG) 只重二點二公斤, 加減零點零一公斤。三百三十株樹 x 二點二公斤的泥 = 一共要七百二十六公斤的泥。以一公斤等於二點二磅的計算, 共要黃花沙約一千六百磅, 未計被「西」走的, 大約要黃花沙二千磅。

二千磅....即係有一千個 Wilson 企係你面前.....你話份量係唔係好驚人, 一千個 Wilson 喎 !!!! 唔識 Wilson 的唔緊要, 有一千幾百個 James 咁話喇, 都夠你驚喇卦?!

我講咁多野, 無非都係想講下我幾累。由開泥包, 倒泥, 鏟泥, 拍鬆, 「西」泥, 搬泥.....都係得我一個人做。當然, Oscar 同李生都有好多幫忙呀, 好多謝佢地。但係通常都係我做泥個 part, 因為體力勞動最大.....於是, 係我不停咁彎腰, 鏟泥, 彎腰, 鏟泥...重複萬幾二萬次之後, 我條腰終於宣佈唔得了。

係十二點個陣, 我做到成身都係汗, 係「和藹」的「太陽伯伯」底下鏟泥, 原來真係人都暈。係我覺得我就黎暈的一刻, 我就拿拿聲入番 Greenhouse 裡面。好在個 Greenhouse 係有開冷氣的。但係原來唔講唔知, 就算開行冷氣落埋 Curtains, 間 greenhouse 係太陽底下都可以去到三十六度。

係三十六度, 溫度計話的, 令人震驚。

我好想飲水, 但係估唔到成個 Greenhouse 咁 "green" 竟然係一滴水都無。我帶來的水一早就飲 Q 晒, 我知自己再唔飲水就大件事, 於是唯有連水喉水都飲幾啖, 求神拜佛一陣千祈唔好肚痛。我去過水廠參觀, 都叫做幾信得過香港的食水的, 只不過....安全少少好 d 的。

跟住好唔容易先挨到 lunch time, 竟然係同佢地一齊去食紫荊閣。嘩紫荊閣呀, 我都未去過的。第一次去咋。原來真係幾靚架喎。點知...原來要...夾錢。真係「公平」。盛惠三十蚊。同老闆食飯, 當然無野好講。成餐飯我都係食食食算數。汲取從嘉威聽回來的「皮毛論」和 Travis 的「多言多敗論」, 當然唔出聲就係最穩陣, 千祈唔好以為自己好識講野好識 Social 就隨便開口.....

....氣氛好古怪的一餐飯, 肚子飽了, 心裡卻不太是味兒。

下午, 我知道自己可能精神上和肉體上都挨不住。於是拿拿聲飛到李慧珍買一罐可樂頂一頂。下午, 依然是極度 arduous 的 works。但我身裡面只有一個想法, 一個能令我多麼疲累都要挨下去的信念。

我要去旅行。

我要速速的把所有最煩的工作都做完。把最難做的 initial works 做完, 就可以有時間 plan 我的行程, 就可以有時間去準備我的行裝, 就可以好好的收拾心情去旅行。

我最想的, 就是可以一勞永逸。所以我不介意這一刻有多麼的勞。

再做再做, 下午五點, 連李生都走了, 我還在做。

跟 Gladys 和嘉威食晚飯, 他們聽見我的苦況之後竟然自動願意來幫我!! 感動 x 100000000!!!!! 那一刻真的很想緊緊的擁著他們啊。

Sunday, May 09, 2004

9 May 2004

我發覺原來我係完全唔識得安慰其他人。
當我身邊的人有事的時候我好想幫佢地, 但係講的說話永遠都係幫唔到佢地, 我個把咁的死人口講完等於無講過, 有時我覺得我唔講會仲好過講囉真係。起碼唔會令人覺得有唔開心野同我講係無用的咁樣囉。唉。希望你可以無事啦, 話晒大家都唔想睇見你咁樣, 你真係好唔開心的話咪番黎囉, 起碼係呢度有我可以得閒陪下你呀, 係咪? 起碼你都唔須要成日都為左生活而咁多苦瓜乾的面孔, 我相信你媽媽番來住的話都應該會開心好多囉。唉
唔想見到你咁樣呀, 有乜野事都好, 好的壞的, 就打個電話俾我好唔好。
擔心你的朋友上

Saturday, May 08, 2004

8 May 2004

一個月 :-(

Friday, May 07, 2004

7 May 2004

分手快樂

我無法幫你預言 委曲求全有沒有用
可是我多麼不捨 朋友愛得那麼苦痛
愛可以不問對錯 至少要喜悅感動
如果他總為別人撐傘
妳何苦非為他等在雨中

*泡咖啡讓妳暖手 想擋擋妳心口裡的風
妳卻想上街走走 吹吹冷風會清醒的多
妳說妳不怕分手 只有一點遺憾難過
情人節就要來了 剩自己一個
其實愛對了人 情人節每天都過

#分手快樂 祝妳快樂
妳可以找到更好的
不想過冬 厭倦沉重
就飛去熱帶的島嶼游泳

+分手快樂 請妳快樂
揮別錯的才能和對的相逢
離開舊愛 像坐慢車
看透徹了心就會是晴朗的
沒人能把誰的幸福沒收
你發誓你會活得有笑容

重唱 *,#,+

你自信時候真的美多了

Friday, April 30, 2004

30 Apr 2004

呢幾日都係溫書溫到想死
衣家都係
我衣家係碧秋趕 UEP , 一陣四點幾考試
就黎夠鐘食飯的時候, 口和鼻都忽然回想起一陣熟悉的感覺

是七重天餐廳

突然間回想起從前七重天的食物, 的氣味, 的人, 的環境, 的燈光, 的感覺。

忽然間, 我好像突然間回到了七重天, 穿著校服, 在想著吃 A 飯 還是 B 意粉 還是 C 薯菜, 湯就一定是白湯, 餐茶就比較難決定, 通常都是朱古力或是 Lemon Tea 的了, 一會兒應該一起坐的士還是坐小巴還是跑山去.....

四月三十星期五中午十二時十五分的碧秋, 我回到了七重天, 回到了張祝珊。


十二時十五分...? 咦....

......*微笑* Lunch Time 了。今天吃七重天好嗎?

Thursday, April 22, 2004

22 Apr 2004

飲了咖啡, 拼死溫了半日書, 不錯。

今日有: 係 UL 訓到傻左。
係碧秋爆發左三個鐘頭的小宇宙。
係 Med Can 自己一個食 Lemon Pie, 好食。
係 Coffee Corner 同嘉威, Claudia 食飯。檸蜜好好飲。見到有好多Teammates 係度食飯。見到可能係阿君的女朋友。
睇郭園醫生, 佢用左半個鐘 explain 俾我聽乜野係喉嚨痛,...真係麻煩晒佢。
兩點幾番宿, 行路中心, 好怕行行人路, 因為太多吊絲蟲, 上次兜口兜面咁食中, 超核突。
今朝好早起身, 打左一大輪機先記得自己唔記得要洗衫, 又 delay 多成個鐘頭先出得到門口。What a waste of time.
係碧秋打左好耐機, 打 TyperShark, 打極唔完, 好開心, Hard 都俾我打到上 Level 14, 唔好講笑。打完之後發現前面個 BA 人用差不多同等時間連 project 都做好, 羞愧地停止打機, 趕讀書, 飲咖啡, 爆小宇宙。
一早起床喉嚨劇痛, 一定要睇 clinic, 郭園都照殺。
一個人食 Coffee Corner, 同樣的好味, 缺少了人氣。一杯凍檸蜜令我好了七成。
與 Douglas 密斟式換 Messages, 殺掉不少溫書時間。一對住部電腦就唔得掂。

所有的事
人和事
光與影
不跟時序出現
最簡單的語句
最含蓄的感興
拼湊著簡單的一天
也許
也就是這樣地拼湊出
我的一生
和你們的





讀到一個人的 article, 只得四頁, 卻言簡意賅, 字字鏗鏘, 把現在全球人口爆炸, 食水和資源都極度貧乏的情況, 用最不煽情最中立的數字娓娓道出來。冷冷的表達有時比苦心的呼籲更見威力。讀後, 深深感慨。為何地球人到現在都沒幾多個人明白到...地球快要承受不了? 引一段不在這篇文章見過的文字 (從前 sit Methods 堂, Maggi 教的時候聽的) , 謹寫出所記得的: 難道要海裡最後的一條魚被捉了; 最後一滴的乾淨淡水被浪費掉了; 最後一個石油田都抽乾了; 最後一塊可耕的良土都被黃沙掩蓋了, 人們才明白 - 錢 - 不是甚麼都能買得到 - 的嗎? 難道要全人類, 終於到了這一天, 就算有再驚世的家財, 也買不到半口清水之時, 要活活渴死之時, 才來後悔自己從前對一切的自私和不負責任嗎?



UEP 的其中一份 Article, Tommy 仔深情, 或激動, 或感慨, 或無奈

的推介。

看過之後, 若然你真的半點, 一丁點感覺都沒有,...也千萬千萬別跟我說, 我不想知道你會是這樣的一個人。

Friday, April 16, 2004

16 Apr 2004

心情比較好了

剪了頭髮, 想起了梁詠琪的一首舊歌 <<短髮>>

不用多想買了一件新衣, 一件新褲子。不想給自己多想。買就買, 花錢就花錢。

讀了一會兒 landscape, 以為會很悶, 怎料說的全是 Soil (因為是 Fire), 興趣提升了。上 sem 模糊的記憶被打撈起來, 打撈起來後才發現學識與記憶都已殘缺不全。不管用了。

晚上, 失落又失眠的朋友打來訴苦; 給我一個機會還債。

啤兒在房跟女朋友談電話, 望著他, 我覺得我很久沒有見他了, 可是, 學期快完, 他也快要走了, 大家卻都各忙著。這樣就過了一年, 不捨得他。

人有悲歡離合, 月有陰晴圓缺, 此事古難全。

人有悲歡離合...

蘇東坡的悲情, 他對淚水的強忍的感慨; 鄧麗君天使般的聲音; 王菲夢幻般的歌聲...突然間, 都一下子全湧上心來。

這一夜, 很靜。天上的宮闕會不會就在窗外, 正等著我呢? 我真的不禁望了出窗外一下。

沒有。

還是孤寂的恆生梯。還是淒楚的街燈。

有一點兒寓意的感覺。突然間讓我想起<<大魚奇緣>>。推薦了阿 Wing 去看。得到她正面的反應, 感到很高興, 有人也有同感哩, 多麼的高興。

聽了好幾次「愛是恆久」。雖然我不大接受這兩個教, 亦覺得一直以來的聖詩, 不是太過肉麻令人難頂, 就是曲詞樂三者都配合得很差完全聽不入耳, 但這一首歌真的很好聽。好聽。一開始我就已經被歌詞吸引去專心細聽。

感受到, 卻感動不到我。

Thursday, April 08, 2004

8 Apr 2004

淌淚


































會過去的

Monday, April 05, 2004

5 Apr 2004

尋日去左拜山, 最記得係屯門依然係超級多人喇, 我係青松觀出力跑去兆康站搭西鐵, 同埋夜晚食飯食到超級油, 我從來都未見過有咁油的雞, 簡直係大開眼界。
今日無乜特別, 胃口依然係無乜, 去到越棧見到樣樣都無乜心機食, 但係又會覺得肚餓喎。

神奇。

番到 222, 又係煲 GIS 的時候, 真係幾悶, 咪講笑。我 take 過一次就夠, 如果有 course-E 的話我就開心 lu。好辛苦先挨得過佢做晒, 番宿, 打機, 打 Zuma, 勁難玩, 勁用腦, 已經夠晒疲倦架喇, 仲黎?! 夠喇。

我都唔知自己想點。我唔想再煩落去, 我想有個了結。

Friday, April 02, 2004

2 Apr 2004

無咩特別事發生。全日十幾個鐘頭都係 222 做 GIS 個死人 project, 所有的東西都係由頭做起, 乜野都唔識, 做到人都癲, 連最基本的 Network Analysis 我都要睇番 lab manual, 爆爆爆煩。死人 ArcView 同 ArcMap 又唔係聰明, 我做好多次先攪得佢掂。又要個個 data 都改, 條條 line line 個個 polygon 又要攪。 Dig 得唔準又要黎過, Snapping 得唔好又要 snap 過。呢條路又唔係好岩, 個條路又好似直頭 dig 錯....簡直係爆煩。

我都算好彩, 起碼我一路用開 find best route 都叫做無風無險。嘉威就唔同喇, 佢真係做到人都癲, 次次個 Network Analysis 都俾 pat 屎佢, 一事又話 syntax error, 一時又話 network problem, 一時又 segmentation problem 等等等.......到最後又要 dig 過晒旺角d 路。

大大話話都算係朝早十一點做到半夜三點先起程番宿。今晚的路上面有我, 嘉威, Gary, Travis 同埋嘉嘉。完全未試過的配搭。不願置評。

我發誓我以後都唔 take GIS workshop 或類似有關的野。

Thursday, April 01, 2004

1 Apr 2004

多得好友們關心, 我最難挨的日子都算是挨過了。預計另一個最難挨的日子將會是大考逼近的時間。希望會應付得來。

今天下午在李慧珍跟 Gary and Zia 在吃下午茶的時候, 忽然談到婚姻和婚禮, 讓我想到了一些事。那是有關伴郎 / 伴娘的。

其實你有沒有想過自己的婚禮將會是何等的樣子呢? 應該在那兒舉行呢? 應該在一個怎樣的環境下舉行呢?....等等。但這一切, 都只是代表著你和她。那麼你和她的婚姻於其他人的重點在何處? 就在你選擇於婚禮跟你最密切關係的人。我覺得, 這裡是 refer to 伴郎 / 伴娘。

當你跟你的最愛走過開心的, 不開心的日子; 經歷過很多平淡的, 變幻無常的日子; 有過苦, 有過樂, 有過一起擁著哭的日子, 有過一起苦苦思念對方的日子....終於, 到了一天, 你們都為對方戴上那情定一生的指環之時, 這一刻, 除了未婚妻 / 夫之外, 你最想誰在你身邊看著你們; 你最想誰伴著你走到這最神聖, 最莊嚴, 但又最浪漫動人的一刻呢?

如果要你選擇一個最重要的人做伴郎 / 娘這一個位置時, 你會選誰? 他會是誰? 是一個同學? 是你的青梅竹馬? 是你的初戀情人? 是你的八拜之交? 是你的親人? 是你臨時臨急找不到人的「求其是但一個」? 是你媽媽介紹的一個親戚? 連樣子都未見過? 是你這陣子最好的朋友? 是你中學時候最好的朋友? 是你的同事?.....?

你如何的抉擇絕對代表了那一個人的地位。因為一定有某一些原因令你只選擇了他而不作他選。

就像其他「誰是你好朋友」的問題一樣, 如果你能夠馬上就想到你要誰, 要在你一生一次的婚禮之上做唯一一個的伴郎 / 伴娘, 那就真的是太好了, 恭喜你, 你心裡面早已經有一個人有著很重要的位置, 而你亦一早擁有了一份無可最替的友情 / 親情。


這一個問題....我早就想過很多遍。
在我個人而言嘛...我朋友不算太少, 亦不算很多。熟悉的已經不是太多個, 而有時熟悉更不一定就等於我喜歡的朋友。熟悉之中的, 交心的極少。再上一層的....真的不能馬上想到一個出來。

不只一次想過了, 每當想到這一步的時候就會覺得有點兒灰~~



婚禮有想過, 葬禮也有想過。今晚夜了, 下次再記低於此。

Thursday, March 25, 2004

25 Mar 2004

諗左好多野。
思緒好亂。開始唔知自己係度做緊乜野。
其實我好想好多野都一走了之, 有好野我衣家都好唔想面對。我唔知點解我會無左好多勇氣。我唔知點解我對好多問題都應付唔來。
好大壓力。好辛苦。每當其他人覺得係呢個時候係好須要朋友來開解的時候, 我偏偏覺得我係好犯賤 - 我更加唔想其他人有事無事都好似走過黎扮晒關心我咁。好惡頂。
好灰, 好唔開心。今日係屋企番黎屋企的一程車裡面, 我諗左好多野, 前所未有咁多。明明有成個鐘頭的車程, 但係我都唔覺得長, 反而我低頭沉思之時, 好快就到左, 快到我唔想落車。我根本唔想落車。太多事。在我最須要你的時候, 你不是從旁支持我, 而是不停的用無聊問題煩我。我好想停一下, 我好想整個世界都停頓下來。好讓我可以自己一個靜靜地坐在一角好好的想。好煩呀。好大壓力呀。點解每一次我想自己做得更好的時候我身旁的事, 身旁的人都會屍橫遍野, 極目之下都是荒涼之景, 黑, 灰, 無氣, 無命, 沒有陽光, 千絲萬縷重重鎖住, 每一方面都不討好, 連自己都厭戰, 厭棄自己。


厭呢個字真係好
我真係好厭, 我亦都知道, 我沉得耐, 亦會越令人討厭。有時我真係會沉淪在令人討厭的黑暗之中。反正我都只想自己一個


有次訴苦後越說越激動, 自己也過不了自己的一關, 朋友勸我不來, 突然問我, 你想去那兒, 我陪你去。他的態度令我很感動, 他的問題令我很激動。我只想大喊道我只想走我只想走, 走...走到哪兒都好, 走到多遠都好, 總之甚麼都不再來就好...哪兒也好, 我想走, 我只想走我不想再留在這裡


綿綿細雨
回恆生的樓梯兩旁, 有著一株株我認得的朋友們。
霧鎖雲頂, 山嵐拂夜, 我心被沒在重重天淚中。

迷濛的前路似有暗黃的街燈映照著, 卻不知街燈照著的只是一條傷心的小路。街燈的心沒有一點傷心, 因為孤獨早已是家常便飯。只為了盡最後一分力為燈下的靈魂照出一點希望, 才幽幽的垂吊下一串串的燈光, 輕撫著疲累的心。
旁邊的老樹悄悄的惝開枯枝, 婆娑的樹影尤如老伯伯歷盡滄桑的雙手的輕輕撫慰著我。
這一刻的恆生梯, 份外孤寂, 也份外有一種超然的感觸。


低潮期
人人總有過
視乎你如何挨過
我從不怕自己挨不過
只怕自己挨過後傷痕更多
永遠
都烙印著心中, 腦中
我想趁未到盡頭之時走開一下

Friday, March 19, 2004

19 Mar 2004

今朝好乖, 八點起左身, 雖然, 到最後都係遲到上 landscape。

去未圓湖抽水, 好好玩, 好鐘意好多路人見到的眼光, 我反而唔覺得唔好意思。我仲著住 soc 褸, 驚死人地唔知我係地資系, 係度抽緊水板做緊 experiment。幾威。

攪笑點: 第一次 gary 拋個桶出去, 連繩都飛埋出去, 好彩執到。第二次, 繩還在手, 但係個結鬆左, 成個桶飛左去湖中心, 我地三個都呆左。個桶係湖心度浮下浮下, 我地三個係湖邊傻下傻下....

笑~ ^^

後尾去李慧珍食飯...好富貴呀, 好耐未食過咁富貴架喇, 好開心呀, 鴨胸飯, 感覺真係好豪下呀 ~

UEP 做 Lab, 起初好有精神, 好似番到 soil 的年代。之後, 頹晒, 超爆眼訓。

番宿訓一陣, 六點幾 Gordon 打左個電話黎, 講左一陣, 就同 Gladys 食 Coffee Corner。原來今日係中唱, Coffee Corner 超爆多, 好彩無賣晒本少爺最愛食的檬檬, 唔係發脾氣都似。

八點, 沙田麥麥傾 PROJECT. 超煩, 講極都 REACH 唔到 CONSENSUS. 救命. 講到十點幾, 好不容易地先定到個題目。

番到宿, 仲要執房, 攪左咁多日, 間房簡直係垃圾房一樣, 頂唔住之下執左一陣。但係太亂, 執足一晚都係半間房。

突然同房回來。面上倦容之厚, 嚇我一驚。他淡然地說他爸爸入了醫院, 中風了。

我呆住了。看見他的樣子, 很像快要 collapse 似的, 但又堅持支撐下去的, 那一刻, 我看到了很擔心。

他爸爸的事我早聽聞過, 但不知道會去到中風的地步。今日一聽, 就覺得不開心的事總是在身邊的不遠處。

同房沒有多說話, 基本上整晚都沒有說話。默然無聲的他令我更擔心。我很想為他做一點事, 但係又知道我做不了甚麼。怎說也是一場同房, 同居共室大半戴, 沒情也有感。很希望他的爸爸盡快康復, 我知道這陣子的啤兒已經是充滿心事的了。再加多的壓力, 只會令心情更壞。

好擔心同房...

這一刻, 大家都不說話。這一刻, 314 很沉重。

Wednesday, March 17, 2004

17 Mar 2004

快死了
那麼多工作

Tuesday, March 09, 2004

9 Mar 2004

竟然訓過龍唔記得上 UEP。既然係咁, 我要公平對待 GIS - 都唔上。無理由唔上 UEP 上 GIS 架下嘛...完全係調轉晒 d 輕重喎。
係宿做一輪野, 之後就去 UC LIB 睇帶, 爆悶, 成房的人都幾乎訓晒, 不得了。之後App Climat 做 lab, 同 Gladys 孖住上, 掂, 就好似力蘇所講的「好似打機咁」我地擺明就係雙打, SM 緊個大佬。

片段飛到做完番宿, 我同龜令一齊搭十一點架車, 番到宿即刻死左, 痴線, 超爆眼訓, 一起身就已經係六點九, 係張床度「典」下, hea 一陣, 沖個涼, 就七點幾八點喇

Monday, March 08, 2004

8 Mar 2004

今日要交 GIS 一份功課, 唔記得要做; ELT 一份 Field Trip Report, 唔記得要交; 一份 Applied Climatology 的煩野, 做極都唔完, 都算交唔切。
今日要同 Anna 慶生日, 無左一個夜晚。
聽日要上堂上到十二點幾, 一點幾要同 Sara 傾 present, 之後要趕番 ELT 同 GIS, 趕完應該就係上 Applied Climatology, 呢份野又應該會做我幾日。夜晚如無意外就做 APP CLIMAT, 如果唔係就做 FYP, 再唔係做 ELT 亦得。我咁死多 workload, 做邊樣都得。
話咁快就會到星期三, 要交一份好小的 ELT 功課, 好彩
星期四, 爆煩的 UEP lab 會來到。今日見所有的阿妹都做到想死, 我都好驚。應該會做我好多日。星期五 UC Grad Day, 應該係做 Lab 的時間....不停做
星期六...又無咁一日
星期日, Landscape Field Trip FULL DAY, 又無咁一日
下周一, GRM 個人 FYP Submission Deadline, 天大的事。 ELT 要 present, 勁驚, 組組都超有心機, 問你怕未。GIS Project dead, 我完全未諗過, 亦完全無時間諗。App Climat 都應該係呢一日 dead。四樣齊 dead, 我有九條命都唔夠死。

邊條粉腸仆街 laan 癱夠膽話 GRM 頹, 我一刀桶死佢, 唔死的話再加十刀, 諗都唔使諗
我衣家勁想, 爆想殺人

Tuesday, March 02, 2004

2 Mar 2004

冷鋒到。而且不是緩緩的到, 而是突如其來的撞了過來。冷暖氣團交鋒, 代價是迅雷不及掩耳的豪雨。幸虧自己向有習慣上天文台的網頁, 知道這個一冷鋒會大約於星期一晚到, 及早走到晾衣場取回自己的衣物, 不至於浪費多六塊錢洗衣。

今早真的起不到床。鬧鐘響聽不到, 來電響也聽不到。同房也被煩得醒了, 乍見我還在睡如死豬, 都忍不住叫我。唉, 又一次。都不知自己要折磨這位好同房多少次才懂得自己*準時*起床。

UEP 早堂, 沒有甚麼別的感覺。GIS 我想都沒多想就走了。實在不可不走。可是原來自己回到宿舍之後又是做無聊事多於正經事, 有一點兒後悔自己讓自己逗留在宿舍, 早該讓自己離開這一個充滿著電腦遊戲的房間。

一時許, 跟 Vincent 和 阿基吃飯。本來我想吃 Coffee Corner 的, 怎料 Vincent 選了蛇吧。也罷。跟他們一起的感覺竟然有一點點兒像回到中三中四的時間, 奇怪。

之後到了 FYB User Area 溫習 Applied Climatology. 不知道是奶茶的威力還是對新環境的興奮, 我竟然有很好的進度。甚為令人滿意, 我決定今天整天都留在 User Area. 有電腦用, 能談話, 能談電話, 又不多人, 又不是太吵, 比 222 多了一份新鮮感, 不俗。

到了 FYT 的 Briefing Session. 估到會是多人的了, 估不到的是感覺會是那麼的擠擁。原來 215 看似甚大, 其實也容不下我們一年的人。

忽然間, 想到「原來我們還真的不多人」「原來我們真的可以那麼 Close, 原來這裡就已經是一年的同學」

「為甚麼同為一系, 會分得那麼疏離鬆散的呢」

看別人的 ENS, 性質跟我們的都差不多而已。可是我聽聞的系風卻幾乎南轅北轍。一個熱情, 一個冷漠; 一個團結, 一個鬆散; 一個有家庭感, 一個充滿制度化的刻意疏離感...不明白為甚麼這一些東西會如此這般的存在著。我 feel 不到以前聽大哥哥大姐姐談的那一種「大學好比你的家」的那一種親切感; 我也 feel 不到那一種掛念感覺。若不是我們有一個 222, 我想我們的情誼會更退一步, 難為一系。

那一種, 若即若離的感覺。

乍暖還寒?


Briefing 過後, 繼續到 User Area 溫一會兒書。之後緩緩的走上小橋流水到本部吃我未了的 Coffee Corner 慾望。到了 Coffee Corn, 我望見有小牌子貼在 teal 色的餐牌子上, 黃底黑字的清楚但死板地用電腦打印了「檬粉售罄」四字。

我走了那麼多路就是為了一口最愛的撈檬呀。售罄? 心裡頭登時失望了一大截。

細想, 從來沒見過檬粉賣光了之後會貼上小牌子的。連收銀機前也貼上了, 表明了是次「事件」不大尋常。排隊到我的時候我用手指指著那個令人納悶的「檬粉售罄」, 讀出來讓收銀姐姐知道我分明想問個清楚。

「今天整天都沒有賣過檬粉。沒有檬粉賣。」

我心裡打了個突。檬粉是 Coffee Corn 的主力, 「整天都沒賣」?
但起碼可以解釋為甚麼會有時間貼上「檬粉售罄」的小牌子。我沒說話, 報以一個疑問的表情。收銀的姐姐明白我真的很想吃, 繼續解釋道:

「今早送來的那八十斤檬粉全部都沒有拿出來賣。我們看過了, 今天來的檬粉來貨真的不好, 不
能拿出來賣。我們決定索性不賣, 所以整天都沒有賣過檬粉」

心裡再打個突, 但為免阻礙了後面的人就速速地要了金邊粉代替。

那一刻的感覺覺得 Coffee Corn 很 pro。每一天都會新鮮的還來一批新的檬粉, 甚麼都不留隔夜, 不新鮮的都不用。縱然送來了的是八十斤那麼多的檬粉...八十斤的檬粉可值不少錢呀, 你想想, 一整天 Coffee Corn 賣出的檬粉 including 撈 and 湯檬呀。十次七點半收爐前才到的情況下九次都會賣光了的。要斷然放棄八十斤的檬粉可不是一個容易的商業決定。決絕, 但決定性。我想老闆也明白檬粉是 Coffee Corn 的主力, 不能為一日的生意額斷送整個名聲。

另一個感覺是: 原來大家竟然一日吃 / 這間 Canteen 一日賣出八十斤檬粉那麼驚人。八十斤耶...可不是小數目。

最後一個感覺是: 八十斤檬粉話唔賣就唔賣, 唔怪之得你間死人野 d 檬粉賣得咁拿貴...@#$%@%......

吃過晚飯, 碧秋再讀書。整晚都基本上再 ICQ 之上跟 Gldays discuss 很多的 Climat 東西。發現原來大家都可以臨急抱佛腳變水哥水姐。另發現水哥的可信度 (尤以 data) 不斷地下降。

我說
水哥吹水多
流料一蘿蘿
信左死人多
信自己好過

Gladys 認為
”水哥竭思底理多,
 同學前途真坎坷!”

各有千秋。

刻下我還在碧秋, 但我的戰意已經降到極低了。真的希望明天不會炒。還有 landscape 的 lit review 要挨, 之後還有 climat 的 lab report, 還有 FYT 選 topic 做 reserach 找 reference, 然後又到下個星期的 UEP lab...

活在當下。頂住....

Saturday, February 28, 2004

28 Feb 2004

無諗過會咁遲先起身。我本來以為自己十點鐘左會起到身, 點知都係成十一點幾先彈起身。今日先要做的事, 就係落 222 去 print 找尋日搵到的幾份 Journal. 好緊要架, 因為我要做 Landscape Ecology 的 Literature Review. 我一早都左要十五份 literature, 但係估唔到真係咁難搵。老實講, 諗番轉頭好似個陣時的 Mega-project 都無咁難搵。

飛到落去三條二已經成身都濕晒, 拿拿聲禁掣 print 野再拿拿聲飛去李慧珍買個三文治再拿拿聲飛番落三條二。...一切都係拿拿聲。然後就係飛去沙田搭巴士入東涌。

東涌日和
今日其實係去 English Through Nature 的 field trip, 去睇中華白海豚。我地須要係東涌地鐵站等齊人。正當我以為我自己係會遲到的時候, 原來我係早到左少少。都好好彩。兩班的人都係齊度晒馬。晒馬....呢個 term 好似有少少問題, 不過都 ok 啦。跟住我先知道原來 Richard 佢自己本人唔得閒, 淨係得我地同個 ENS 的 tour guide 一齊去。

行左一陣先到東涌碼頭。好靚呀隻船! 簡直係靚靚游艇! 成個地板都係光滑架, 打晒臘咁架! 嘩嘩聲呀...

之後呢, 沿著機場和大嶼山的小水道之間行。感覺...好似運河, 好平靜, 好舒服, 風和日麗, 不得了。

唔知點解, 其實今日心裡面唔係話咁期待想睇到有海豚 or not. 可能因為一早已經有定心理準備話俾自己聽唔好大咁期望。因為睇 nature 呢味野...永遠都唔好一開始就抱有太大的期望, 否則只會太失望。

唔好話睇 nature, 做人做事, 好多時我都覺得呢一種心態都幾緊要。好似上一個 sem 咁樣, 我明知自己再上一 sem 的時候成績唔好, 我一定要係「今個 sem 」努力d , 但係雖然我係咁諗....都唔係有好大的期望。我一直到希望我可以穩步上揚, 逐 0.2 咁上, 咁已經好好架喇。所以我最初都以為自己可以有 2.9 , 點知一爆就爆到過三, 開心死我, 開心到爆燈個隻!!!

講番睇海豚。出左無幾耐, 我地就已經見得到海豚。原來佢地真係好鐘意曲一曲個身咁樣上水面, 後尾先醒起原來佢地要上水面呼吸。一開始我都覺得好 awe, 簡直係令人...唔知點咁。總之 something like 好興奮。 不過我諗如果我地好似佢地d professional 咁樣日日睇都會悶。

大概都係咁睇海豚, 每一個 siting 淨係睇到兩三隻。一直睇到去分流。

最記得係一d 都唔 nature-friendly 的所謂生態遊囉。痴孖根架班人, 都無腦既, 死白痴。打正旗號話自己係生態遊囉, 但係一睇就知有幾白痴。見到我地睇得到有海豚, 就係幾公里以外狂衝過黎。又唔知自己隻船細喎, 個引擎又爆響喎, 仲要爆衝過黎喎, 你想睇海豚定係想趕走晒佢地呀大佬。三歲細路都知你咁樣實嚇走晒d海豚啦。真係好鬼死激心架呢d咁既無良低b夾低能奸商。

回航之時, 先至覺得唔掂。我以為自己又暈船浪喇, 點知原來唔係。係因為大風得滯, 吹到我個頭好痛, 越訓越痛, 都唔知點算好。落到船之後我同 Carmen 係東薈城食野。個度真係好大, 但係真係好少人。同 Carmen 一路食一路傾好多野, 好好傾。

我自己都好耐無見過 Carmen lu. 佢都話好耐無見過晒咁多個姊妹。一時間, 大家都無野講。可能 Carmen 唔覺得係乜野, 但係個一刻我覺得好無奈, 有唔少感概的感覺。心裡面未至悲涼的感覺, 但肯定唔係 positive 的感覺。一時間, 好似好多以前的好東西都不知道去了那兒。無奈。唔知點解。無奈, 係來自真正成長的無奈, 真正的控制不到的無奈。可能真係學似詩雅話齋, 我自己變左都唔知。我自己因為身邊有一些事緩緩地變化了而感到失控。我不知道。

雖然我的頭還是痛, 但是我都想過不少我們很多人以往的日子, 雖然我跟他們相處不過一年多, 但是已經回想起很多從前的事了。其實, 我對於很多事都很沒有回憶。已經不止十個八個人駡過我的腦袋是沒有記憶的了。但有一些事情, 我會比較記得的; 而我比較記得的, 不知道為甚麼, 又真的比較記得久。

很 enjoy 從前的感覺。這一刻的東薈城 food court, 充滿了只有我們自己組的一些歡樂, 八卦, 小事, 從前, 現在, 和停頓。

停頓, 有時真的太美好。美好得讓人落淚也不夠。

Friday, February 20, 2004

20 Feb 2004

Introduction to Environmental Science Mid-term Exam
炒。頂。
好辛苦先起到身, 以為佢好似 GRM 咁教一陣書先再考, 點知即刻開始考。其實份卷我知道係唔難, 但係我偏偏讀左 Energy, 佢只係出 Food 同 Population。食晒屎。

出去改考牌期。心情差, 唔多想采佢兩個。自己去百佳 shopping, 竟然發然兩蚊件 Sushi, 即刻買八件當 lunch。

真係要多謝 Simon 幫我頂左個月會。同佢同壞儀三個人一齊食 lunch。開始喜歡這一班 Year 1。覺得自己真的老了。任何時候也是的了, 對著一些比自己年紀小的人 / 思想比你不成熟的人 / 直頭係低能的人, 會令你覺得很老 / 老成持重 / 有見識 / 總之好似知多少少咁樣。
不過, 其實呢一種係一種幼稚的想法。太過定格。年紀比你小不一定比知得少。尤其是對我

回到 dept 不想做 UEP, 回宿打機休息, 到 NA 跟泠漳拍照, 回 Dept 浪費時間, 之後去看大專戲劇節。

又一年了。我記得上一次有一整天的日記都在談大專戲劇節。今晚很累 x 100 。不多說了。無意中遇見一個舊朋友。BU 依然最好笑, 不過舊年好笑 D, 真係笑到想死。中大反而令我有些失望, 可能太深奧, 可能節奏太慢, 可能自己本身太累, 可能劇本本身太長。

回到宿舍, 連打機的力量也不想勉強地從疲憊的身軀柞取出來。睡了, 別煩了, 別傻了。

Wednesday, February 18, 2004

18 Feb 2004

忽然想起張記的煎薯蓉。從前, 除了腸仔, 就最愛吃那種煎薯蓉。很想再吃一次, 很想再尋回一次從前的感覺。


為甚麼不愉快事件總要發生在大家都開始投入的時候
不知聽誰說過
那種
才剛剛開始習慣就要被活生生 detach 出來的感覺
很差, 很差


你明嗎? 我感覺到的是差不多
才剛剛習慣了....

Monday, February 16, 2004

16 Feb 2004

今朝又起唔切身上早堂, 好失敗。

今日 English Through Nature 係去嘉道理農場。我有幸坐到 Richard 架車, 係 Land Rover 黎架, 好有錢呀佢。我仲見到佢有隻 Swarovski 的望遠鏡, 真係有錢到你唔信呀我諗佢。

嘉道理農場....個感覺真係幾清新, 幾好呀。我見到有好多樹好多 Greenery。睇左唔少野。見到有好靚的黑白灰鵰。好型, 唔怪得金庸咁鍾意佢地。見到有好型的麻鷹。見到有好攪笑的鸚鵡。見到有好似雕像的梅花鹿。見到有被送入來又被人道毀滅的 python 。都幾好睇。

後來大家一齊番中大。我同 Sara 就飛奔番 dept 上 GIS 。我一路咬包一路上堂。做左好耐, 後來先發覺有個 step 做錯, 越攪越大獲, 好唔掂。到最後我索性成個都放棄, 我下次先 show 俾 LIxiang 睇。

跟住就係最緊張的一刻 - 見 potential 老世。詳情我唔講喇, 淨係好記得我係李慧珍俾佢問到我口啞啞。然後佢問親我好唔好, 我就好似 lur 飯應咁應佢「好!!!!!」....咁當然就係表現得太過「猴禽」啦....總之, overall 黎講我對自己毫不滿意。唉

我仲未肯定自已係唔係真係適合鄒貴。

之後番屋企食飯, 又同屋企人無那那鬧交。好頂唔順。唉

Friday, February 13, 2004

13 Feb 2004

呢一輪
其實我好唔開心
我唔知做乜野, basically 我依然有每一日的心情起伏。我依然會望到得意的野會開心笑, 遇著不愉快的事會唔開心。但係當我一個人靜下來的時候, 心情不是像以往的平靜, 感覺不是像以往的好。我只感到, 我對身邊幾乎所有的事物, 都失去了興趣。

我變得很冷淡。面對著甚麼, 都提不起勁。

我不知道是甚麼的一回事。但係其實很怕, 因為我從前不是這麼的一個人。我知道我這一次的心理轉變一定背後有因。但是因為甚麼我卻是總想不出個所以然來。我很想有一個人老老實實的答我我到底出了甚麼錯。為甚麼我會變得如此。

我感覺到...生命裡的一切都是那麼的一樣。就連生活都一模一樣。有時到了吃飯的時間我還不真的想吃飯, 就已經要吃了。有時候我雖然是肚餓, 但我還是感覺到我去吃東西, 根本就是一個fulling my duty 的事。是 fulfilling duty....天下間哪有人覺得肚餓了就吃飯是一種 duty?

從前我最愛的 Garfield, 今天我望著他, 發覺我竟然不再對他有著從前的愛。從前我多麼的渴望自己一個人住, 住了宿舍之後沒有甚麼的大不同。從前我很想跟朋友一起, 今天的我只懂得左看看右看看朋友有沒有約我。沒有就算的了。從前很多的事或物都會令我雀躍, 今日的我....

.....就像是斷盡了感情線的老翁一樣。

我很惱自已, 我真的很惱自己。完全不明白到底為甚麼有如此大的心理轉變。天知道今日的一切都將會發生的話, 當日的錯誤的決定就不會把問題推到現在。

我沒有感覺了。
我沒有情感了。

為甚麼?
是因為壓力太大嗎?
是因為工作多了嗎?
或只是身體累了呢?









對不起
我不會也不應是個這樣的人
但無奈, 你一直見過的, 只有這一個。
我一直期待著奇蹟的出現 / 另一個故事的結局。






Wednesday, February 11, 2004

11 Feb 2004

上午好忙。先係飛番黎中大上 Applied Climatology。無錯, 又係水哥的堂, 果然係金漆招牌, 真係悶到你唔知點算好。我不停係度「了」身旁的 Claudia 玩野。佢自己其實都麻麻地想聽水哥講野之嘛, 車。之後食頹飯, 好在係菜心同埋白菜, 立刻由頹飯變成菜蛋飯, 好, 有多少少菜, 可以幫我個胃舒緩一下。之後上 ELT, 然後仆番宿, 即刻洗衫, 即刻做 Climat, 即刻掛起 d 濕衫, 即刻執房, 即刻換衫, 即刻走人。

又一日。

Tuesday, February 10, 2004

10 Feb 2004

今日好神奇咁樣起得到身上 UEP, 但係實在係好眼訓, 之後我都係決定唔上 GIS, 反正我都認為佢係廢野, 都係無謂浪費自己的時間, 訓一覺我諗會仲實際, 反正我一陣間下午的時間都無得訓覺。於是我就番左宿訓左一陣。一起身已經係兩點幾, 係時候睇醫生。

今次我睇的是中大的中醫。我以前未睇過, 今次係第一次。但係我一睇到個診金個陣都唔明點解要成八十蚊一次咁貴, 仲要係未計藥費。藥費雖然係四十蚊一劑, 但係閒閒地都要成三四劑先會見效, 仲要未必係個個都會係三四劑就會見效個種, 真係因人而異。

估唔到呢度的中醫都幾「淡定」。睇我一個咁普通的症, 由等候到執藥到可以走人, 足足都攪左成四十五分鐘, 想話佢唔細心都唔得。好在我唔係趕時間, 如果唔係都唔知點算好。三劑藥加診金, 盛惠一日七十八蚊雞。因為學生的藥費有八折優惠。

之後就上 Applied Climatology 的 Lab。完全超乎你想像..........咁煩 and 咁難。連我認為最斯文的 Cindy Lam and Claudia 都三番四次話做到想殺人, 你話, 係咩程度的令人難以忍受。雖然只係用 Excel, 我又唔係未學過, 但係唔知點解我臨場用起上黎, 我學左年半的 AS CA 完全用不著似的。真令人沮喪。唯一一個令我開心少少的係我識得用 Macro, 可以每一次 Paste Special --> Value 的時候我可以用一野 CTRL + E 就得了, 慳回不少時間。

本來話左七點零鐘打邊邊的。但係我地一路做一路做, 做極都係做唔完, 大家又唔係咁想放棄, 不過無奈大家真係要走, 所以就係八點零鐘走左。難為其他一早到左的朋友要等咁耐, 尤其係 Wendy 姐要挨咁耐, 對住佢係度篤口篤鼻。唉。

呢一餐飯, 老實講, 係我入 U 以黎, 少有的食得那麼不高興。我還怕別人看不出我是不高興似的, 整幅咀臉都黑得很。老實講, 我又做 Lab 忍到食飯, 竟然仲要係飯枱上, 係我地珍貴的組聚之中....面對面?!

唔係呀嘛!
無野呀嘛!

我真係好嬲。我忍唔住係火車站出面發左陣脾氣。到最後我都係唔想放低我 d 阿妹係果度同佢食飯, 我挨義氣, 我明知山有虎偏向虎山行。頂死你。

多謝 Gladys 的超好食朱古力蛋糕。真係好好食。但係更重要的係, 佢好食到令我傾刻間忘記了一切的不愉快, 拋卻了一切的忿怒。那一刻, 不止朱古力好吃, 人也變得開朗了起來。我記得, 那是我全晚唯有突然有開心的一刻, 也是我黑色咀臉突然消失的一刻。

我知道, Rose 是明白我們的處境。但是在整晚的 dinner 之中, 我都不能不把錯失歸咎於她身上。我知她也知道我們會不高興, 那是十分肯定的, 但她未必知道的是, ultimately 不知就裡地招惹了不速之客的, 其實就是她。明顯不過。我不想 blame 她。過了這一晚甚麼事都當沒有發生過, 我的腦子今晚是 RAM, 希望不是 CPU。

夜晚回到家裡煲藥。出乎意料的 time-consuming。更出乎意料的苦, 超級激苦。十個苦是滿分的話我可以足給十個。十一個又點話。要不是我一邊喝一邊狂吃(山楂餅, 芝士餅, 芝麻梳打餅....)的話, 早就死掉了 XP

很夜了, 我該去睡, 還是該繼續未完的 Applied Climat?
做不完的工作。

今晚我跟 Sara 說了一句很有意思的說話
Play Hard, Study Hard

希望真的做得到

那將會是無悔的大學生活了

Sunday, February 08, 2004

8 Feb 2004

好凍。呢一期, 成個香港都陷入一片寒流, 我本來都係一個幾抵得凍的人, 點知呢一個 winter Monsoon...真係唔話得, 唔講得笑。

今日飲完茶之後, 就走左去行 188, 真係無野岩我行。間間鋪都賣超級多的 PS 2 disc,...總之, 一係就係 GBA, 一係就係 Xbox, 一係就係 PS2, 總之就係無 PS。於是係心情唔大好的情況之下繼續行向銅鑼灣。嘩, 真係好凍, 不過, 無論點凍都好, 我都夠衫著, 最緊要的一個 point 係, 無論幾凍都好, 都唔夠尋日係大棠凍。尋日係大棠....真係唔係人咁品, 我著衫的份量係多到係市中心會嫌熱,但係大棠就完全抵唔住, 個身不停咁震, 手指腳指都好似就黎要甩出黎咁樣, 痴佢個孖根...

行過銅鑼灣 Land Crowdford, 見到佢個縮寫標誌 LC, 竟然我第一樣野諗起的唔係 Lane Crawford, 係...紅膠木

話說上一個 sem 我 take 左 Soil。咁學期尾呢我地就要做一個 group project, 就係用我地咁耐以黎的 Soil Lab Results 做一份 report。咁呢, 我地個一組的題目就成日都要 mention 一 d 樹種的。而係我地抽取的咁多份泥土樣本裡面呢, 有好多份都係來至種植樹林 (plantation) 的。咁最常見的樹呢就有台灣相思 Acacia Confusa, 紅膠木 Lophostemon Confertus 同馬尾松 Pinus Massoniana。咁係word 裡面打字, 無理由下下都要打晒個全名咁熕架嘛, 你睇都睇到個 Latin 學名幾長架喇, 所以就用縮寫再遲d replace. 所以 ! LC 就會令我諗起紅膠木喇。而且, 我係做 Soil Lab 的時候所抽到的 Sample 都係 19-year-old LC Plantation, 咁你話, 我點會唔一見到呢隻字就諗起 Lophostemon Confertus 而唔係 Lane Crowford (我都唔去連卡佛~)

夜晚, 就去左小西灣打邊邊。又打邊邊。

Thursday, February 05, 2004

5 Mar 2004

凌晨四時
挨過了
四十八小時

Sunday, February 01, 2004

1 Feb 2004

吵架了
不開心

Sunday, January 11, 2004

11 Jan 2004

GRM 大旅行

今日就係 GRM 的大旅行, 但係其實我覺得大極有個譜囉....始終都唔係話真係好多人。本來今日約左阿瑪八點鐘係眾志等架...但係....唉, 我又遲到喇, 累阿瑪要等我等成半粒鐘, 真係唔好意思。我地拿拿聲咁食完個早餐之後, 又拿拿聲趕出去碼頭。點知行到中途原來成班 year 1 都仲係度等緊人, 連埋 Carmen 同阿牛。

之後就犀利, 見到勁多 professor 的親戚。父母子女乜都出齊, 好壯觀。其中最得意子女大獎由水哥的兒子 - 水仔 - 奪得, 因為佢實在係同水哥同一個餅印, 又超可愛。我仲記得 Gladys 個句「塞左棉花的黎明」, 簡直係 GRM 人聽見都會爆笑。跟住就係馮通, 佢個仔又係勁似佢, 不過無水哥咁嚴重。Lucy 個女又勁似佢 (好在唔似花哥者, 唉也.... *__*)。然後又發現, 林建枝有無帶屋企人一齊來呢? 當大家的眼神都係度極力咁搵一個人樣係會似林建枝個樣的時候, 竟然發現最似的係....桃姐~! XDDD 救命~ 好難相信, 但係個一下佢地企埋一齊的時候, 真係會令人以為佢地係兩兄妹定兩姐弟 XDDDD

出發了。又是這一個碼頭, 又是這一種船, 絕對容易地令人想起上一次大地攪的恐怖驚濤駭浪驚心動魄海盜船之旅...絕對係怕怕。今次就問定阿詩囉暈浪丸黎食, 因為實在好怕又會係咁多人面前失禮。好在今次整個船程都唔係太離譜。

第一站, 鴨洲。

一落船就有一身都鬆晒的感覺。鴨洲俾我的第一個感覺係...勁似蒲台島俾到我的感覺。一路行一路影相, 勁愛上Gladys 部 DC, 真係要好多謝佢俾我喳晒 fit 任我亂影一通。行左無耐就見到有狗, 一眾愛狗之人 including me 就飛身上前去影。一路上, 村屋, 村校, 沙, 石, 草, 柴火煲水, 都銃銃影之。

(待續) (2007 按:點解待續係變左「無續」架....)

Saturday, January 10, 2004

10 Jan 2004

今日有個機會遊一遊西鐵

整體感覺: 超大, 激大, 樣樣野都唔似一般 Hong Kong size...即係細

樣樣野都大到嘔, 淨係個車站幾乎係「見首不見尾」。美孚站作為市中心 (比較市中心) 的一個站, 都做得咁大, 真係好得人驚。然後新市鎮的站....個個都激大, 元朗大, 屯門仲大。出錯出口都咪話唔驚。第一個感覺係西鐵須要一間去似「地鐵的美心 / 恆生」咁樣先得, 因為恆生同美心都已經係地鐵好出名, 所以人人約人都會約係個度, 諗都唔使諗就知一定有, 黎手仲可能一個站有兩間恆生添。但係西鐵似乎未有咁樣的一個所謂的 "landmark"。 就算係每站必有的票務中心, 同一個站都好似有兩三個....仲要係相隔成百幾米咁遠, 你都咪話唔驚。(後尾先知原來全線西鐵已經有美心)

有機會遊一遊屯門的廣場, 其實同一般新市鎮的大型廣場都差唔多, 俾我第一個感覺係好似番左沙田, 類似新城市廣場 and it's neighbourhood 的新市鎮式商場咁樣。大概又係咁樣多商店, 多人流, 白雲石地下, 白色假天花間中有消防喉的紅色穿插其中, 兩旁有大玻璃, 外有 podium 內有 altrium. Altrium 之底又係一個展銷場, 叫賣之聲可以響徹全間 shopping mall. 裡面又是一種食肆商號夾雜的排列型式。每一個 block 之間又以密封式天橋連接在一起, 又一個區到另一個區有時可以明顯地感覺到商號的排列, 顏色, 用料, 人流, 商號類型, 光暗等等的不同, 從而推斷得出我們可以從這一個 section 的商場得出甚麼的期望 (覺得有甚麼賣)。有podium 的地方, 往下走就是一條又一條的巴士站。巴士站的樓底很高, 燈光是清一色的橙。很橙。有很多條巴士線的交匯點...這裡想必是一個很大的總站。不單巴士西鐵輕鐵會以此為終站 / 主要站, 小巴的士也會。在商場迷陣之中, 左穿右插的天橋之下有很多小巴和的士在「等客」。

出面的清一色磚紅色, 原來就是一系列的公共設施, 包括文誤中心 / 大會堂, post office, library 等等。回頭一看就見podium 之上的住宅了。雖然夜色已深, 但極目遠望還是看得到遠處的私人屋苑也是類似的鋪排。這一個比較有規律的 town planning 底下產生的市鎮, 的確一目了然, 井然有序, 尤其是和則漁涌, 北角那一些已經有很久發展歷史的地方相比, 更見不同。但老實說, 我還是會比較東區的 complexity. 那些新市鎮固然方便, 但住在那種地方的感覺....不知怎樣說, 就是因為每一樣東西都編排得那樣的 compact and concise, 很有一種住在模擬城市的感覺 ( 不是 SimCity) 。那一種感覺很沒味, 很像是一個又大又沒有人情味的 System , 或者一個很大的集體 system 裡面的其中一隻螻蟻....很沒趣。

臨走前計一計, 西鐵真係好拿貴。十二蚊一程, 真係西北大開發....

Friday, January 09, 2004

9 Jan 2004

日記好似變左週記咁

除夕晚
同Garvin and Zenia 等等朋友一齊食韓燒, 本來諗住可以九點幾就開始食優惠時段, 不過呢個決定好明顯係錯的。因為實在太多人係果間韓燒度等緊, 根本就係多人多到我幾乎連電梯都出唔到。後尾係個一個空氣唔多流通的地方度等左好耐, 終於由九點幾等到十點幾, 先至有得食, 勁唔 make sense. 好耐無見過佢地, 大家都係痴線的, 我都有少少頂唔順。讀左一年大學, 再見番佢地, 個感覺已經好唔同左。到最後就係韓燒館裡面望住個電視倒數, 都 OK 無癮。

元旦日
又打邊爐。
今晚係去 Jenny Wong 屋企。雖然佢地我比較唔係好熟, 但至少我會同Jenny 阿 Lone 佢地有幾句既。更何況, 我大部份時間都係食, 或者係玩貓。Jenny 的一對貓真係奇可愛無比, 又肥到震喎, 勁鐘意玩佢地, 幾乎想拋一舊骨頭出去佢地執番黎~ 如果佢地可以趴係我身上面就好 lu~
打完邊爐佢地就有下場, 我就無乜興趣 join, 番到屋企發覺自己呢幾日已經好滯, 食得太多....

一月五日開學日
好耐無番過黎恆生 lu. 今日就開學, 我第一堂就係第三四堂的環保學英語, 我以為自己未 reg 到呢一科喇, 點知佢點名個陣叫我個名喎, 哈哈, 即係得左喇, 好野。原來同我同一堂裡面仲有 Sara, 同佢一齊上完堂之後就被捉埋一齊去同龜 ling 食飯.....個感覺真係好 odd~~佢就話無野架, 阿 Wing 都成日係咁樣同我地三個人一齊食飯架喇, 但係我就覺得勁怪囉。好在 Sara 同 龜 ling 都係容易相處之人, 所以都唔係好大的「壓力」。之後見到Coffee Corner 出面有一個「中國旅遊圖片展」, 裡面展出左好多中國唔同名勝的照片, 如果十個「靚」係滿分, 呢個展簡直係十一個「靚」。裡面的名勝, 個個都勁靚, 色彩好鮮艷, 拍攝的題材好廣泛, 好多風土人情都拍得到, 由好多季節好多角度好多色彩好多構圖組成的照片系列。原來個展覽仲有免費中國旅遊書派, 大家當然就係怒搶...大學生好窮架嘛, 又貪婪喎, 係咪先~~~ ^__*

開學 Week - Day 2
人人都搶住想 reg 的 Urban Envrironmental Problems (UEP), 隔年先開一次, 機會難逢, 我就好好彩地 reg 得到。但係估唔到第一堂我就遲大到...早堂嘛, 係好難起身架喇, 成個假期都係度晚睡晚起, 係起唔到身架喇....之後上 GIS, 果然係悶, 但係唔 take 就無野好 take, 唯有硬住頭皮諗住學野囉....唉。之後 sit Transport, 嘩, 癲架, 極多野做, 多野做到癲, 簡直係 workload 之皇, 比得上 Maggi's Courses。之後又無堂上, 遇到 Vincent, 入左 Shaw 同嘉威三個人打籃波, 當然, 我對腳咁樣, 我只能夠定點射 key, 郁都唔敢郁 (但係我又會追校巴架喎)。之後嘉威上左黎打機, 勁開心

開學 Week - Day 3
今日的主題係 Applied Climatology. 不幸地我以為自己起到身, 點知一起身個陣已經係十點八, 遲 Q 晒大到, 仲要無位坐。夜晚, Rose 傷風, 我落去 Coffee Corner 食順便買外賣俾佢, 佢話我知 GPA 出左喇, 我呆左, 終於要面對呢一刻喇。我番落房 check E-mail, 點知無喎, 唯有上 RES 的 website check check....竟然俾我發現到自己終於都過三!!!!
過三呀!!!!!
係 GPA 過三呀!!!!!
我興奮都唔知講乜野好, 我恨左成三個 sem 就係恨呢一個「過三」的景象, 今日終於比我恨到番黎喇, 天呀, 實在係太令人感動喇! 實在係太令人感動喇........

開學 Week - Day 4
仲無聊, 得兩堂 Landscape Ecology。不過幾好上, 上完之後又打機又打機又打機, 又係 call 埋同我一樣咁無聊的嘉威, 怒打。夜晚自己一個人係蛇吧食頹飯, 勁無聊。想去 UL 找些少書, 竟然全部俾人借晒....使唔使咁癲呀。仲要三月先還, 你無病呀....唉