手機記載生活系列 (2)

05/09/07 索子已經六個月了﹐進入少年期。還真的像個小妮子一樣﹐活活潑潑的﹐不過就是太過怕陌生人。


近年能在旺角找到能吃入口的東西(註：未必代表好味)比以前多了。起碼越開越多的香港仔魚蛋就是其中一門。

MegaBox 開幕﹐大鑼大鼓。山長水遠專程去走一趟﹐發覺除了很新很光鮮之外﹐沒有甚麼吸引之處。到 Food Court 找食的﹐只能到看起來比較「不化算」的 Te 吃意粉。我的估計正確：的確不化算﹐亦不飽。

日本吉列專門店﹐初見乃價錢「天比高」。但其炸物的確美味非常。但既為炸物﹐價錢又為天價﹐只能「多多益善」﹐望門輕嘆。

蘭桂坊始終都不是我的地方。

我寧可躲進山腳的 Starfucks﹐居高臨下地望著那些沒有錢去「蒲」卻想參與「在蘭桂坊飲酒作樂」的人﹐密密麻麻地擠滿了那一間「七仔」。

Alfredo @ SOHO Elgin Street. Reasonable and acceptable enough for their food quality and price in a luxury place like that.

好奇心驅使我壯起膽子來走進全港最富豪級的 Landmark. 竟然驚見 Giordano. 到底是對 Landmark 的幻想太過多﹐還是我對 Giordano 的成見太過深？

呆滯間走到 ThreeSixty 買了一個加菲貓最愛的 Lasagna. 標榜用料有機的肉醬千層麵﹐六十多元一塊﹐每一口都是有機的材料。最「有機」的應該是痴肥和膽固醇過高。

Kubrick Café 的三文魚沙律。油麻地真是越來越得我歡心。

攔路狗可能很兇﹐但攔路貓多數都是很懶。像這一隻維園的攔路貓﹐經常都喜歡在同一個位置在﹐在熙來攘往的人群之中﹐懶洋洋的趴在地上﹐眼睛左望右望﹐不停向途人施放「電功」﹐期望有傻人 – 例如我 – 會被牠的電功留住﹐蹲下來替牠搔搔耳背﹐刷刷毛。可能是因為牠已經做了絕育手術的關係吧﹐所以比較不怕陌生人。當其他在維園流浪的野貓都很怕陌生人的時候﹐這一隻貓卻像流鶯一樣﹐很「濫交」。

多謝深水埗地膽嘉威哥的介紹﹐讓我認識譚仔麻辣米線。除了他們的麻辣米線﹐他們的蒜泥白肉亦是一絕。當其他餐廳都用「廣東式」的少油少蒜式的「微蒜白肉」的時候﹐他們卻用傳統上海式的「激多蒜蓉紅油浸滿白肉都沉晒底」式的蒜泥白肉。

咁唔健康的食物﹐當然就係「賣飛佛」。

依然是 Kubrick. 今次試一試蛋糕﹐沒有期望﹐沒有驚喜﹐沒有印象。

麻布茶房的名字聽聞己久﹐但從來未曾真的嘗過。今日一試﹐發覺它很像心目中的日本餐室：

穿 Lolita 裝的女侍
乾淨的餐室
精緻得很的食物
賣相非常漂亮
味道非常普通
份量非常小

用餐完畢﹐感覺像造了一場夢﹐一點都不覺得飽肚之餘﹐還有點「欲求不滿」的感覺。帳單來的時候﹐才發現我還在現實世界中。

手機記載生活系列 (1)

旺角。這個位置﹐之前開過了很多間小食店﹐一直都做不下去。這個位置其實距離人流最旺的女人街不遠﹐而且對面就是好景。做小食店這種要求「旺丁不旺財」的業務﹐明明應該會很「好景」的。但不知為何從來都開了一些不受歡迎的小食店。

肥媽開店後﹐生意極好。我不太好鹵水內臟﹐但鹵水紅腸又未得其神韻﹐雖然只吃紅腸﹐但亦覺甚為美味。鹵水味道清香﹐不過鹹。

幾星期後﹐電視台有人推介此店﹐遂廣為人熟悉﹐就開始出現長長的人龍。看見了﹐不禁輕嘆。

因為要見工的關係﹐到尖沙咀的歷史博物館走一趟。相比起其他國家的博物館﹐香港的歷史博物館其實毫不遜色﹐甚至有過之而無不及。假日想不到好去處的﹐又或者不想再龜縮在家只懂打機的 (這情景好像見過…)﹐尖沙咀的歷史博物館是一個不錯的選擇。

西灣河太安樓東端﹐近二記餐廳﹐有一間生果店。店外有一隻懷了小貓的貓媽媽﹐快要分娩﹐胖得動也動不了﹐很可愛。

Delifrance 做推廣﹐一道煎魚一道炸蝦為主打。吃過之後﹐覺得不外如是。未夠飽﹐再跟友人叫一道「雪糕 + 心太軟」。竟然其味極佳﹐令人讚歎不已﹐至今仍回味無窮。

到超市「入貨」﹐貪便宜買了本地雞蛋﹐才發覺原來比家中原有的美國大雞蛋體形小很多。我還一時貪便宜﹐見它價錢便宜但雞蛋數目多了﹐不為意原來是小雞蛋。雪櫃的蛋格怎樣也安放不了那麼多雞蛋﹐還能怎樣？

雖然很麻煩﹐但還是燒紅了鑊﹐下了油﹐打了蛋漿﹐炒起蛋來。那邊廂取出小焗爐﹐放進家中僅有的牛油排包﹐慢慢的烘烤起來。

炒到一半﹐下一點牛油﹐頓時將一隻隻平凡的雞蛋變成炒蛋多士。雖然﹐跟天下無雙的「澳洲牛奶公司炒蛋多士」﹐仍相距極遠﹐但已吃得我滋味無窮。

油麻地廟街的美都餐室﹐裝潢非常懷舊﹐而且是真正年代久遠﹐而不是簇新扮懷舊。一直對裡面的飲食極感好奇﹐因為如此老字號的一間餐室﹐能屹立不倒﹐又能不換上時髦的裝潢﹐必定有其獨一無二的賣點。

照片中是美都的招牌菜焗排骨飯。的確甚特別﹐但除此之外﹐食物質素不見特色。

百思不解。

公司從來都不喜歡安排吃晚飯﹐因此從來都沒有 Annual Dinner, 只有 Annual Lunch。而剛巧兩位丹麥老闆都很喜歡日本菜﹐於是公司的傳統就是每一年的農曆年假後﹐找一天來全公司一起 Annual Lunch, 而基本上都一定會是日本菜。

我愛死這個傳統了。

今年我又有幸出現﹐能吃到這一餐盛宴。選址東角中心的「和三味」。大家每人都選擇了八百多元一位的和牛套餐﹐或接近二千元的二人套餐一起分享。另外還有鐵板燒(表演)﹐無限量的啤酒﹐和無限量的日本清酒 Sake。當中﹐以 Sake 最好喝﹐連我這個不太好酒的人﹐也覺得真的很好喝。原來真正的好酒﹐可以是如此易入喉﹐如此芳香﹐如此教人甘心為它醉。今日一嚐﹐令我對「 清酒」這兩個字﹐有了全新的評估。

在渣甸坊的「拖肥」

上海三六九的酸辣湯﹐醉雞。不覺得有何驚為天人之處。

一直見到網上有人讚賞 Puerto Rico 是近年少見好玩的策略性版圖遊戲﹐但鑑於缺乏耐性和理解能力低的問題﹐一直都看不懂它的說明書。在一知半解下與朋友嘗試玩一次﹐後果是不歡而散。後來到了 Jollythinkers 得到註場 tutor 指導﹐於一個小時之內速成了。

原來﹐San Juan 比較好玩。

相中是 What is Café 的「後備場」。原來於週末顧客人數眾多的時候﹐店主們會向旁邊的私人補習社租用他們的大課室﹐作為後援。檯上的一條條用電線膠紙貼出來的線﹐應該是用來分隔小朋友的 “User Area” 吧…真有趣

非常極度狐疑誰發明 / 發現這種東西的。

為甚麼是汽水不是茶？
為甚麼是可樂不是七喜？
為甚麼是薑不是蒜頭？
為甚麼是檸檬不是雪梨？
為甚麼是熱的不是冷的暖的？
怎麼可能想到煮汽水？
怎麼可能聯想到醫治傷風感冒？

一杯檸樂煲薑﹐跟餐加$9。老闆很體貼﹐一見到我這幅病貓樣子叫檸樂煲薑﹐就懂得問我﹕「要多薑的吧？」

果然﹐還未下班﹐感冒已經痊癒了八九成。強得沒話說。

比起其他香港地道飲食文化﹐除了很有代表性的蛋撻﹐街邊魚旦之外﹐怎能遺留了這一杯「檸樂煲薑」？蛋撻能治感冒嗎你說。

跟家人遠赴粉嶺雲泉仙館拜山﹐路遠迢迢得像行路上廣州一樣。午後共膳於齋堂﹐齋堂外有一隻外表醒目的白鸚鵡﹐原來在吃橙。鸚鵡會用一足支地一足吃橙尚不為奇﹐奇就奇在﹐你細看牠在吃一個部份？

猜對了﹐相中的牠尚未開始吃﹐牠在挑橙核。輕輕咬下去﹐用巨大的喙準確的咬著細小的橙籽﹐然後再吐出﹐面上再帶個不屑的表情﹐像是說「今天又是吃橙﹐天天都只是吃橙」。整個情景尤像「阿伯食橙」一樣﹐好不惹笑。

馬克王子不幸惹上窮兇極惡的牛蜱﹐一粒比米粒還小的牛蜱就一口吸掉三千元﹐好昂貴。

我還在讀小學的時候﹐鰂漁涌的幾條街還只是很寧靜的舊樓區﹐只有幾間車房﹐很地道的食品店﹐幾間廢紙回收﹐一兩間地產公司﹐僅此而已。

太古坊開幕以後﹐成功吸引很多大型跨國公司進駐﹐周邊的飲食﹐都慢慢地轉變起來。露天餐廳﹐高級餐廳﹐酒吧﹐漢堡包﹐咖啡店﹐拉麵﹐甚麼都有。從前只有碟頭飯的一條街﹐變了幾條街的小蘇豪。不只這一邊﹐近太古城的那一邊亦是。

經 Openrice 介紹﹐認識了這一間函館元祖拉麵。這一碗鹽味牛油拉麵﹐叫我上癮﹐吃完再吃。唯價錢要七十元一碗﹐亦似乎太貴。

Tom Kha Gai

怱然間﹐好想食好想食 Tom Kha Gai.

第一次接觸呢樣野﹐係一年前去泰國。飲過呢味湯之後﹐我發現原來泰國的湯水﹐唔係淨係得一味「無陰功湯」。

Tom Kha Gai 的中文譯名﹐好似 so far 都無人就咁叫佢做「冬蔭雞湯」。有人叫「椰汁辣雞湯」 (慶過辣雞?!)。有人叫「椰汁雞湯」

我最想飲到的﹐係一碗極重香料味的湯﹐尤其係香茅。大大條香茅放係入面﹐一煲出來的時候﹐酸酸的甜甜的味道﹐叫人回味不已。

唔知香港邊度先有好食的泰菜呢….?

東寶小館

唔知點解﹐同阿 K 行行下﹐突然間話﹐不如今晚食東寶小館。

前往東寶的途上﹐遇到新光戲院門前的「十三座牛雜」。K 話好多人喎﹐我話你咪食囉﹐我怕食牛雜。佢排隊﹐買﹐食﹐然後笑。佢話好多年無食牛雜﹐因為呢幾年的牛雜越來越唔好食。今日終於食到好好食的牛雜。佢一路食的時候我一路係度睇店子貼閘框的剪報﹐當然全部都係介紹佢地的牛雜﹐重話自己係用新鮮牛雜﹐其他人因為鐘意用急凍牛雜﹐雖然方便好多但無咁好食。Anyway, 我食牛肉咁多年﹐唔知點解就係提唔起興趣食牛雜﹐總覺得過唔到自己心理果一關。

係佢仲想來多一串的時候﹐我就拉住佢走去東寶。

基本上成個渣華道熟食中心都係由東寶攪旺個場。平日夜晚七時許八時﹐東寶小館依然滿座。有去過東寶的朋友都應該知道﹐東寶的場有幾咁大。坐滿晒的時候﹐真係好有以前係中大年年都有得食的「千人宴」的感覺。當然﹐呢度的食物好過千人宴幾千幾萬倍。

好彩兩個人﹐易搵位。東寶生意多到唔憂做﹐要等位的話﹐唔係過半數就 OK,係要齊人！兩三個人要等齊人都唔難﹐八九個人要等齊人的話﹐真係等到蚊到訓。其他先到的人﹐等位等到打 PSP, NDS, 睇 Games Weekly, 忽周﹐東周﹐睇報紙﹐搽指甲油﹐補粉﹐畫 eye shadow, 煲電話粥﹐玩 PDA, 睇人玩 PDA, 玩電話﹐睇隔離位玩電話﹐睇公司的文件﹐睇隔離位的公司文件 (?!), 玩手指﹐睇隔離位玩手指﹐望天打卦﹐望地打卦….

我睇見佢地都辛苦。

食左一陣﹐我見到有個人的樣都幾搶鏡﹐睇真d….吳彥祖？！WOW! 吳彥祖都來呢d地方食野喎！

但咁都唔夠驚﹐你估下仲有邊個？係 Amanda S.! 不過佢真人都唔係幾得呀下….之間仲有好多個唔知乜野人一齊﹐應該都係陳志雲果種你唔識佢但其實佢隻手遮天的癲佬。

一路食﹐一路都見到一d 你會覺得佢似有名的人﹐但你又講唔出名的人﹐尤其係果d 闊太﹐你成日都係報紙見到佢地出入 Ball 場﹐但從來唔會留意佢地d 新聞的人。

之後﹐見到有個勁肥的背影行過﹐K 正想同我講﹐我話你唔使講﹐我睇見佢個背影咁肥﹐行路行得咁核突﹐就知一定係杜汶澤﹐right?
食多陣﹐見到張國強係前面行過來…唔高﹐好老。但個樣仲好英。

食多陣﹐見到王合喜從後面閃出來。好黑好 sporty﹐但完全唔明星。聽聞王合喜改左名想轉運。

食多陣﹐見到陳子聰。當時我諗﹐有吳彥祖有陳子聰﹐會唔會有埋連凱同尹子維呢？

今晚東寶小館做咩事….？開記者招待會嗎？

搜食‧海港城

最近經常出入海港城。有些好味的餐廳或食品推介給大家。





上面呢個叫做 Strawberry Cookie Cream Puff. 比起以賣 Cream Puff 而著名的 Bear Papa﹐呢一個 Cream Puff 做得更實在。佢裡面的 Cream, 比起 Beard Papa 打得更實﹐而且有好重的牛油香味﹐個人口味來講覺得呢個仲好味。而且仲有咁多 Strawberry 片﹐都只係賣 $12, 簡直係 fight 低晒所有 Beard Papa! 不過衰在我買的呢一件個皮已經淋晒﹐唔似得 Beard Papa 咁即叫即「泵」cream 入個 puff 入面。



係邊間舖頭咁巴之閉可以出到個 Puff 仲抵食過 Beard Papa? Panash 是也



海港城 Panash: 海運大廈近天星碼頭地面﹐從天星出來﹐往 Habitu 走進內﹐在和花亭對面﹐位於 KidX 的那一層。

上面呢兩隻係生蠔﹐部手機的相機 resolution 再低﹐都睇得出。呢度係太子酒店的自助餐, Spice Market @ Marco Polo Prince Hotel。由於阿媽係樓上番工﹐所以對呢度的「行情」瞭如指掌。亦因此﹐佢成日都係度食下午茶﹐食得多﹐就 join 埋佢地的 membership。於是我好耐之前就已經來食過。屋企講親話要食 buffet 都係來 Spice Market 因為有得平 (好多)。到最後﹐佢亦都幫我申請埋一張附屬卡﹐我就用呢張附屬卡來同一個 fd 食 buffet。兩個人一張檯的 discount 有幾多？ 50% off!

當晚由於係 Happy Friday 的 Friday night, 所以已經當係星期六日晚上咁的時段計﹐不過我地為左食宵夜時段﹐挨餓挨到 10pm 先食。但係正價都係 $148, 50%, 10% Service charge 只樣以 $148 為主來計算﹐即係除番開每個人都只係八十零九十蚊。咁就可以食到酒店自助餐﹐仲要係勁好食的自助餐。

最 surprise 的係﹐當晚係生蠔任食！平時酒店的自助餐都會有生蠔﹐但就唔係間間都有﹐而且通常都係供應有限。於是當晚生蠔一出的時候﹐各位香港人都一窩蜂咁走去搶。跟住經理又抬出一大盤生蠔﹐眾人又抓破臉皮的搶。然後經理又抬出一大盤生蠔﹐又搶光﹐又一盤﹐搶左一半﹐又一盤﹐搶左幾隻﹐又一盤....無人再搶。

我真係好 surprise﹐見到一個大酒店級的自助餐的生蠔﹐竟然多到無人要。係咪難食呢？絕對唔係。我不嬲都唔食生蠔的﹐但都吸引到我試一隻﹐竟然一d 腥味都無﹐仲有少少海水味﹐連我呢個唔鐘意食生蠔的都連食多三四隻﹐朋友直頭讚不絕口添。係咪太細隻呢？有圖為証﹐我一d 都唔覺得細囉。

其實我係見到每一檯都有人搶﹐到最後每一檯都有人食到一堆蠔殼﹐簡直係「蠔」氣干雲的一派景象！真係估唔到﹐九十蚊的自助餐 (對我來講) 都竟然可以有無限供應的上等生蠔﹐真係「對蠔當歌﹐人生幾何」！

除左生蠔之外﹐魚生﹐壽司﹐Chocolate Fountain, 沙律麵包﹐湯等等 standard 的野﹐統統都好好味。而且因為名字叫做 Spice Market, 所以有很多東南亞的食品。當中尤以泰式烤沙爹串和泰式冬蔭公湯特別好味。另外﹐就係有上圖的野。咩來呢？之咪就係生的蝦﹐生的魚片﹐生的假魚翅﹐生的蟹腳 (not in the photo)﹐等等囉。要來點食？就係夾好之後﹐交給專人為你整你自己選料的生~滾~粥~!

睇到上圖呢舊人唔似人﹐鬼唔似鬼的垃圾﹐一睇就知係 Waffle 啦﹐係咪？睇唔出？噢...你眼力差姐。其實佢係一舊 Waffle 來架。係我親手倒奶漿入去個烤 Waffle 機入面整出來架。之後再走到雪糕 stand 拿我最喜愛的 Haagan Dazs 雪糕於上面 (Vanilla 最 top, 下面是 Chocolate, 右下角那一 pat 是 Strawberry, 亦是 Haagan Dazs 的三大最正 flavour 之一) ﹐再灑一 D 朱古力碎入去﹐就變成上面 show 出來咁可愛的垃圾..... I mean, 甜品.......

Spice Market 香味屋: 海港城太子酒店三樓

Tel: 21136046

轉個口味﹐我地食中菜﹐一齊去「翡翠拉麵小籠包」。呢碗係紅油牛肉拉麵﹐今日下午同親愛的媽媽食的。起初見到佢個紅油紅到好似機油咁﹐以為會辣到飛起﹐點知原來係聲大大無貨賣﹐辣係辣﹐但絕對無麻辣米線咁辣 (都唔諗下兩樣野係完全唔同的﹐麵不同﹐風味不同﹐產地不同﹐用料不同﹐點可能拿佢來比較的呢)。麵身比起我心愛的金滿庭做出來的麵好得多。老實講﹐雖然我係金滿庭的 fans, 但係佢的麵﹐我真係食足咁多次都覺得要俾個 "mediocre" 呢個字佢。反觀呢間遠從獅城來的外援﹐做出來的拉麵真係好食多多聲。雖然有個無謂的 complaint, 就係麵身實在係太長﹐剪左都係嫌太長﹐我嫌麻煩。

至於小籠包﹐唔夠金滿庭好食。論價錢論份量論味道﹐都唔夠金滿庭好。「打遍天下無敵手」的不是「金面佛苗人鳳」﹐而係「金滿庭」。

最後呢位佳麗﹐係海港城 (甚至係香港) 的資歷係最短的。佢叫 "Freshness Burger"。你無睇錯﹐唔係 "Fresh Burger", 而係 "Freshness Burger"。聽聞佢係日本來的 Burger 店﹐係日本同已經進駐香港好一段日子的另一間來自東洋的 Burger 店 "MOS Burger" 都鬥得幾火紅火綠。 Freshness Burger 有幾食﹐我已經無心機再慢慢描述你聽﹐你自己試。但圖中的食物都會推介你一試。自左下 clockwise: 唔記得乜名 Burger A, 唔記得乜名 Burger B, 粟米湯﹐抺茶牛奶﹐炸薯格。當中以「唔記得乜名 Burger B」尤其好食。

同 Triple O's 來比嘛....當然無得比。但 Triple O's 的價錢亦都是「天下第一」的。同 MOS 來比呢﹐其實都算叮噹馬頭。

Freshness Burger: 海運大廈二樓 OT 242 舖。

Layman's term: Gigasports 知唔知係邊？Gigasports 後面有個籃球場﹐後面就係 Freshness Burger, 再後面就係「射精油輪」的登船 counters。如無記錯應該係 LCX 樓下。

MegaBox + Te + IMAX + Order of the Phoenix

MegaBox 開幕之前﹐我正在為旅行的各項大小事務作準備。MegaBox 開幕的時候﹐相信當時我應該人在英國。

後來我約了 Gladys 和阿瑪﹐但一來自己遲到了 (又遲到)﹐二來都沒有正式約她們到 MegaBox.

今晚終於有機會到 MegaBox﹐是因為很早之前訂了到 IMAX 看 Harry Potter and the Order of Phoenix 的戲票。

在德福轉接駁巴士到 MegaBox, 未進場之前看見五光十色的內部燈飾閃爍不停﹐火紅的外牆樓高數層﹐感覺有點兒像抵達某大頒獎禮的現場一樣﹐很夠氣派。

內部的設計有點兒像旺角的朗豪坊﹐可能因為大家都是垂直發展式的商場吧。因為有十數層的關係﹐很自然的就會有橫跨幾層的 express escalator﹐於是感覺更像朗豪坊。但與朗豪坊不同的是﹐MegaBox 的 express escalator 真的是 express, 速度甚高﹐能與那一條著名的「又一城接九龍塘地鐵站」相比。對比之下﹐朗豪坊那兩對「天梯」實在是慢如蝸牛。

至於食的方面﹐由於 MegaBox 實在是太多太多人﹐所有的食肆都滿座了。唯有選擇比較少人的 Te. 早見 Te 於海港城的 Citysuper food court. 當時見到 Te 所售的意粉﹐五十多六十元一碟﹐但材料奇少無比﹐狐疑著此等「不抵食」的餐廳可以能夠生存。

今次我選吃的﹐是試驗意粉的基本 - Spaghetti Carbonara (亦是我超喜歡的意粉)。 但基本還基本﹐我總以 Kubrick Cafe 的 Spaghetti Carbonara 來做比較﹐結果嘛﹐無論價錢和味道﹐一路以來都沒有對手。可喜﹐但又可惜。Te 的醬汁做得非常的香﹐意粉比較彈牙﹐我個人不太喜好﹐但平心而論口感是不錯的。可惜是整碟意粉只有三樣材料：意粉﹐醬汁﹐煙肉。Nothing else. 一絲香草都沒有﹐連略施香草作點綴的意識沒有﹐也沒有放入其他裝飾﹐賣相完全不吸引。若不是我親手付錢﹐然後親眼看見的話﹐還以為是二十元的港式茶餐廳所謂意粉的貨色。

還是 Kubrick 好。I love you.

至於 IMAX, 坐位很舒適﹐觀眾席斜度極大﹐有如置身海洋公園的海洋劇場﹐或是紅館﹐前面人高如姚明都不能全擋你的視線﹐是很久很久以前大劇院式的斜度﹐好得無話說。銀幕極闊﹐影畫質素亦很好。

至於 IMAX 的賣點 3D 電影方面...呃...可以不提。簡直有被騙的感覺。IMAX 的網頁上註明﹐只會在最後二十分鐘的魔法部大戰的時候才會有 3D 效果。但我想不到他們的 3D 幾乎等於沒有一樣﹐唯一一刻覺得有點兒 3D 的感覺﹐就是幾個小孩子騎著骷髏飛馬﹐飛越倫敦的場景。其餘的時候﹐幾乎不覺得有甚麼 3D。而且﹐所謂的「二十分鐘」﹐很快便過去了。極失望﹐完全不明白多付的四十多元的價值在何處。

至於 Harry Potter 方面...可能真的因為故事的結局已經在小說揭開了﹐很多人都因為知道了結局而對電影版不再有興趣吧﹐聽聞票房收入大大不如前幾集。不過平心而論﹐此集的確是做得比較不好﹐尤其是相對於上一集的「三巫鬥法大賽」。其實這一集的題材亦可以很好做﹐首先是 Dumbledore's Army﹐這一個學生當自強的組織其實可以做得更好﹐多給予更多的戲份﹐讓觀眾們真的感受到他們已經脫胎換骨﹐不再是流著鼻涕的小孩子了。但導演似乎未能達標。

另外﹐Dumbledore 終於出手跟魔王大戰的一段﹐其實亦可以做得更加好﹐因為我相信很多人跟我一様﹐對於這位校長總有份景仰﹐總希望能見到他「露兩手」一次﹐而此等高手當然要不嗚則已﹐一嗚驚人。但電影中﹐他們的對決之前﹐沒有甚麼大情節﹐沒有風暴前的平靜﹐沒有那一種關係已經拉到很緊的感覺﹐沒有前奏﹐沒有好好鋪排讓觀眾越來越期待。提起觀眾的期待﹐然後終於「交貨」﹐加一點出奇不意﹐加一點 "wow factor"﹐就能完全扭轉整個風格。而且對決的時候﹐電影中卻交代不出那一份當世兩大最高手對決的那一種「氣吞天下」的感覺﹐觀眾有幸一睹可一不可再的感覺。一閃而過﹐沒有氣氛的對決﹐跟 Harry 和幾個朋友柴娃娃地練習沒太大分別。

刻意安排恐怖片的感覺﹐但感覺極為土氣﹐簡直有看「攪乜鬼奪命習作」的感覺。哭笑不得。

場景方面﹐甚為不足﹐感覺上劇情不像是自然的推進著﹐似是被人逼著「跳格」似的。

電影音樂﹐最差。連我這個對電影和音樂都沒有認識的人﹐都認為電影音樂的部份做得 / 安排得極差﹐就真的很差的了。

希望只是電影版的問題﹐若然發現遲些的 DVD 足本版都是差不多的話﹐就真失望了。

期望第六部電影能換換導演。

卡樂 B 激辛味 薯片

見到佢個包裝靚成咁﹐就一於買來食下。因為好似「熱浪」之後﹐都無一隻辣的薯片係好食的。

好鐘意食辣的薯片﹐直頭覺得造物主創造薯片出來應該就係十個「熱浪」咁辣個種就係正宗﹐果隻。

但係要辣得來香﹐香得來好食﹐好食得來唔係一味死辣的﹐真係唔容易搵。見到佢個包裝咁靚﹐又咁夠膽叫自己做「激辛」﹐就等我領教一下。

....原來都係「熱浪」...一樣要食到就來食完晒﹐先覺得有少少辣。失望。

睇來都係要試下暴君薯片啦咁

買：吉之島超級市場 (康怡店啦當然)

HKD $8.9

潮州打冷‧憶中大食宵

其實我屋企附近係無得打冷的﹐我無記錯的話最近都要去到「香港大酒店」前面先會有一兩間。而且我屋企人通常都唔會選擇﹐因為阿媽的腸胃比較敏感﹐好容易肚瀉﹐所以都唔敢選擇「表面看起來」比較 dirty 的地方。

於是﹐我要到入到大學先比較多接觸潮洲打冷 / 大牌檔。

到今日﹐反而喜歡和朋友一起這樣吃飯。最實際的原因嘛﹐嘿﹐就是慳錢。三十五元一個小菜大大碟﹐十數元一支啤酒﹐五元一罐汽水﹐gathering 的「交際費」頓時變得很「鬆動」﹐想點甚麼菜就甚麼菜﹐不用想 budget 的問題。氣氛輕鬆﹐大吵大鬧﹐一樂也。

讀過中大的都知﹐我地係好鐘意去「食宵」的。同其他大學唔同﹐我地要食野一係就係大學入面食﹐若半夜三更食宵夜﹐就一定要有番咁上下「舟車勞頓」出到附近的 " satellite towns" 先有得食。咁於是我地通常都有兩大選擇：最近的火炭或者較遠的沙田。

沙田的「金沙角」我都喜歡﹐但是比較少去﹐反而火炭的「津津」我就去得多了。

一大班「出生入死」的同學﹐一起到「感覺粗豪」(instead of high class 的「感覺蘇豪」) 的大牌檔吃宵夜﹐每一碟都是熱氣得叫人喉嚨痛又勁爆暗瘡的小菜﹐但美味十足﹐再以一支又一支的啤酒送下﹐連女孩子都有豪氣干雲的感覺﹐大牌檔的一串串大燈泡﹐伴著露天餐桌上的月色﹐把洗過筷子的茶就這樣倒在地上﹐看著一條茶色的污水就這樣流到旁邊的小巴站﹐四周都是沒有人在工作的工廠大廈﹐想叫得多盡情就多盡情！旁邊的桌子也是中大人啊﹐跟他們打個招呼﹐也順便給那不認識的同學說聲「生日快樂！」。

一陣寒風吹來﹐就吃多一碗熱騰騰的蠔仔肉碎粥。還要多一點肉嗎？就來多一客沙拉骨或燒乳鴿。今晚就連蔬菜都不吃！讓不健康的一餐﹐不健康到底﹐吃壞人也是明天早上的事。你還記得的往事嗎﹐我叫破喉嚨的喊到餐檯對面的你﹐那管是那十數條椒鹽鮮魷已經令我喉嚨痛﹐但要叫就是要叫﹐就多喝一杯汽水﹐多喝一杯啤酒。來多一客炒蜆﹐誰的面前有一坐蜆殼堆出來的小山？來多一客煎蠔餅﹐鹹鹹的魚露配上鮮嫩的蠔肉﹐看來人人都要多一碗白飯才能好事成雙。

啊.........those were the days.....三年的大學﹐一眨眼就過了。三年﹐竟彷彿是上星期的事一樣。

對﹐我們該向前看。但往事多美好﹐如一切能重來一次﹐我怕我會暗暗感動得掉下淚來。

車品品 @ 大角咀

因為都諗住唔做落去﹐所以今日索性偷懶 (謎之聲：好唔要得呀d 人)。

一於就試下傳說中的「車品品」！ (Background 要震撼的 sound effect)

認識車品品﹐當然就係來自於開飯網﹐若然唔係﹐係大角咀的一間餐廳﹐再出名都唔關我事喇。以前地鐵奧運站未開的時候﹐更加係唔關我事喇﹐我連大角咀係邊度都唔知。

開飯網中的車品品﹐係長期的冠軍。不論係計淨笑臉的數目﹐定係計 笑臉：喊臉 比例﹐佢都係長期高企﹐連佢地內部的食家都話咁樣係奇景。

後來﹐近海傍的店子要關門了﹐過百名 fans 前仆後繼地湧向大角咀作個 last respect。更有不少網上食友拍抵照片﹐照片中的人龍長得像九七年前新盤開售的人龍一樣。當時我錯失了機會﹐以為就此沒有了。

劇情瘋迴路轉﹐深得人喜愛的老闆娘宣佈﹐重出江湖！新店位置埃華街 (各位港島人如果你咁都知係邊度的話真係要俾個「叻」字你)﹐我上次星期一晚係大角咀行到 PK 都搵唔到。個幾鐘頭之後﹐我放棄﹐打去 1083, 再打去問老闆娘。

老闆娘的笑聲果然係好甜﹐聽到人個心都甜晒﹐想跟佢一齊笑。但係佢話：「嘻嘻﹐唔好意思呀﹐我地星期一唔開架﹐嘻嘻﹐對唔住呀要你白走一趟﹐嘻嘻…」唔開………………………………我 XYZ ABC 123 你呀

好﹐講番今次的野食。

基本上呢﹐我都試左佢幾味招牌食品。但係唔知係咪期望過高﹐所以唔覺得咁好食。

基本上最大的問題﹐係佢無落添加劑。好少油﹐好少鹽﹐無味精﹐少豉油。好健康啦, Right?!

但係我覺得咁樣真係…太清啦。老實講我食唔慣。佢有好多野食我都係食慣重味的例如碗仔翅。碗仔翅係好足料﹐但係無乜味。車仔大雜麵係好足料﹐但係無乜味。雪梨茶係好香好好飲﹐但係無乜味。

所以唔怪得蘿蔔會跑得出。

蘿蔔係車品品眾多獲好評的食品當中﹐其中一樣最多人讚的。我食過﹐唔識分點先為之好食呀﹐無渣呀等等﹐淨係知道 – 好好食。可以叫多一大碟淨蘿蔔都無問題。因為係呢個咁清的味道底下﹐食蘿蔔就真係 fit 晒。

都算係「終於都食到」架。不過就唔係好大的 desire 咁囉﹐尤其係衣家試過之後。Anyway, 有機會的話我一定會再試的！

---===---

車品品
地：大角咀埃華街 92 號
(OK! 咁即係點去呢？拿！我就係MTR 奧運站 B 出口﹐行過對面 HSBC Building, 左轉落樓梯﹐直行過所有小巴總站﹐到公廁門前過馬路﹐直行過晒工廠車房(角祥街)﹐到第三個街口就係﹐車品品斜對面係好大間馬會)

電：2180-9655
價：$15-50@
格：超乾淨企理有心機打理的車仔麵小食檔
推介：蘿蔔﹐蝦子(超正)﹐魯肉餃
特色：看得出是很有心機的小店

Tonkichi 日本吉列專門店@CWB

再講「終於都食到之乜乜物物」的話﹐可能會講到口臭(謎之聲：本來就臭架喇)﹐但係今次應該都算係「終於都食到」系列之一。

好﹐拿﹐我講喇﹐「我終於都食到 Tonkichi 啦！」~~~~YEAH!

----====----====----

大約係一兩年前啦﹐係我去開的世貿機舖樓下﹐就發現開左一間新的日本餐廳。無中文名的﹐日文我又唔識讀。食的全部都係炸野﹐唔係炸豬就係炸蝦﹐典型的日本吉列餐。睇一睇個價錢﹐貴到飛起。幾舊仔的吉列炸物﹐一碗飯一碗Miso 湯最多俾埋一小碟漬物過你﹐盛惠兩舊水。

嘩﹐兩舊水食一塊手掌咁大吉列豬扒﹐你無野呀。

當時諗﹐佢呢間野只可能係兩個局。一係就係騙局 – 即係唔值呢個價錢﹐一係就係富豪飯局。

點知﹐兩個局都唔係﹐原來係「唔食唔舒服」。

OpenRice 的食評一面倒傾向讚佢好食。我好奇怪﹐開業頭一年﹐我都見佢無乜人排隊﹐無人幫襯﹐同隔離的 Tony Roma’s 差唔多 – 一樣無乜生意。

口碑呢家野﹐一係就無乜﹐一有就通常都 exponentially 咁上。尤其係 OpenRice 普及化之後﹐好快呢間野就開始有人排隊。而我都係因為咁而知道呢間野叫做 「井吉日本吉列專門店」。

一直都躍躍欲試﹐但係$200@ 真係好~~多錢。

後來麗池第一富豪「落街見」發起「富豪吉列飯局」﹐咁我當然捨命陪君子﹐趁機會去試試啦。

呢一餐﹐食得超開心。埋單每人 175, 我唔知抵唔抵﹐我唔知值唔值。但我會盲目地再去食﹐係講到明會「盲目地」唔理佢幾錢都照番去食多次。

吉列系列﹐係超好食﹐好食到唔識講。我最鐘意的﹐係佢樣樣野的水準都很高﹐尤其是醬汁系列。

第二盤吉列一來到, 大家就喪搶！

(有人見我掛住影無得搶, 示烕式地造 V 手勢; 圖右側的「落街見」直頭懶得理你, 講多無謂, 極速鬼影夾埋你果舊...)

吉列食左豬扒﹐豬柳﹐蠔﹐大蝦。統統都好食﹐最好食係大蝦。用來點炸物的醬﹐分別有他他醬﹐芥末醬﹐同埋一個自己磨的芝麻混醬。方法是自己用木樁將芝麻磨成茸﹐再混入特製的醬。很好吃﹐如果不是那麼稠的話﹐會更好吃。

呢個就係芝麻 & 小木棒

像生菜絲的椰菜絲﹐是任食任添的。侍應會不時捧著一大盆椰菜來問你「要加點椰菜絲嗎？」﹐然後毫不吝嗇放一大堆在你面前。

配椰菜絲的有兩種汁﹐是柚子和紫菜汁。兩種汁都好好味﹐用來配椰菜絲或配同樣是任添任食的日本米飯都是一流的。

我們坐的是半隱蔽式的房間﹐沒有門的﹐感覺非常之 good.

總之我會再試啦。

----====----====----====----

Tonkichi 日本吉列專門店
地：CWB 世貿中心 4/F (可於 Esprit 處右轉搭電梯直上 P4 免卻多重escalator)
電：2577-6617 (好似無得 book 位﹐唔肯定)
價：$170 – 200@
格：中上價格日本菜﹐有大格可坐 6-8 人
推介：所有吉列﹐尤其是蠔
特色：日本飯 & 椰菜絲任食任添
備註：坐得甚舒服的闗係﹐似乎整個樓面的 turnover rate 一點都不大。Peak Hour 可能會等得更久(甚多人)。