Settlers of Catan with family

約好家人一齊於晚飯後玩﹐唯獨二少要補習﹐很晚才回家﹐於是該局幾乎十點才開始。

今次我有整整一個小時可以慢慢準備棋局﹐可以慢慢研究出一個比較平衝的設定。須知道﹐玩 Settlers of Catan 其中一個重要的因素﹐就是一開始的擺位。而島上的資源和碼頭本身的分佈﹐亦甚重要。

我向爸媽解釋玩法﹐他們越聽越覺得無比複雜﹐差點兒想「縮沙」。

到最後﹐表面上糊里糊塗連玩法都弄不清的媽子﹐勝出了。到我們三父子發現他已經九分的時候﹐為時已晚﹐無力回天。

兩個人的做節

今日下午爸媽就啟程前往機場﹐準備乘飛機到成都旅行。旅行社的安排「絕妙」之極﹐去程竟選搭晚上七時多才起飛的飛機﹐到達後一輪擾攘﹐已經是該回到酒店睡覺的時間了。就此將整整一天的行程活生生的騙走了﹐好狠的搶錢計。

就這樣﹐冬至的晚餐﹐因為沒有父母的情況之下﹐未能做節 (不是不能…)﹐於是我和弟弟兩個人﹐好好醜醜都總得要吃一餐﹐我未至於相信「冬大過年」﹐可能是因為被近年的商業廣告策略洗腦的後果﹐我覺得過年更大件事﹐但我仍然有一種比較傳統的感覺﹐冬至做節﹐是一定要和家人吃的﹐而且越多越好。

走到半路﹐我忽然想起今晚只有我們倆﹐可以不必「被逼」只吃附近的餐廳。一顆心立時飄到銅鑼灣﹐弟弟一貫的沒有意見﹐我就提議「挑戰難度」﹐於冬至的晚上﹐walk-in 去吃金滿庭。

弟弟的面上﹐有很多紫色直線。連他的背景也一樣。

一場歡喜的結果﹐通常都是換來一場空。到了門口的時候﹐見到輪候的人竟然比平日還要少﹐已經感到甚錯愕。再走多兩步﹐竟然見到裡面有甚多空檯﹐更錯愕﹐心感此事甚不妥。再走多兩步﹐見到 LED 走字板連號碼都沒有叫﹐更奇怪。再走多兩步﹐門口負責派籌的侍應去了哪兒？再走多兩步﹐見到玻璃窗上貼著紙﹐大意是今天只接受訂位﹐而且已經訂滿了。

侍應從接待處的底部忽然鑽出來 (literally!)﹐我提出我已經打定輸數的疑問﹐她給我一個證實死亡的肯定。從蒸籠裡面拿出熱騰騰的「流金歲月」然後飛快地咬破它的皮讓它滾燙的奶皇流滿嘴唇的快感﹐忽然間變成只能在腦中憑空地幻想。

Oh my god.

垂頭喪氣﹐漫無目的地走上扶手電梯。小南國有不少人在等位﹐但今晚的心已經託了給金滿庭﹐此刻忽然找個替代品﹐無疑是一手把自己連人帶心丟到溝渠去。事實非如此我當然理論上懂得﹐但溫家寶的一句「感情上過不去」套用於此刻就真的恰到好處。

經過一輪猶豫之後﹐走進了 California Pizza Kitchen. 上海小籠包變美利堅比薩﹐意料之外﹐是圍骰﹐通殺也。既然是特別情況的做節﹐吃一些平時做冬不會選的餐類﹐反而是理所當然的。至少我是這樣想。

目標徹底地改變﹐轉變又急又突然﹐變得完全不同﹐那就不再是為選擇兩個相似的心愛女人而猶豫﹐而是忽然從愛女人變成愛男人。口味轉變依然有跡可尋的話﹐會給人一種「變心」或「負心」的感覺﹐相反口味轉變太激烈的時候﹐反而難說成是「變心」﹐會「感情上過得去」﹐吊詭之最也莫過於此。

坐下來﹐呷一口凍檸茶﹐跟弟弟談談他自己。或許我倆的齡差七年是真的差太遠了﹐向來我倆哥兒都不多話。但慶幸媽一直都有跟他談談話﹐所以他不致於像我一樣﹐甚麼都不愛說給家人聽。自己總覺得﹐他們不是我的傾訴對象﹐我們是在完全不同的 bandwidth 之內的。大家的波幅波長﹐都很不同。只有很偶然的時候﹐我們的振動才會終於有一刻靠得很近﹐那一刻的共嗚﹐有一種很親切的感覺﹐我們是終於都同一渠道之中。然後﹐像波浪一樣﹐又各自各回到自己既定的頻譜之中。於上上落落之中﹐期待意外。

這一晚的做節﹐我覺得很愜意。但願二少亦是如此認為。

生日應該快樂

又一年了。又大一歲了。

同屋企人到 Cafe Marco 吃 Dinner Buffet, 又遲到。

用優惠券﹐所以要分開兩張檯﹐是在 Spice Market 慣用的技倆﹐但料不到檯子分得那麼開。

三百多元一位的自助餐﹐半價後才覺得價錢正常。

謝謝爸媽。

失業半年﹐反而一點兒也不緊張。

活了多年﹐反而覺得天大地大。

覺得天大地大﹐反而想掘個洞鑽進去。

我好迷糊。賦閒在家的這段日子﹐明明每天都有事做。但又似沒事做。

到底有事做﹐還是沒事忙? 我開始抓狂。

有時候一個人就很容易抓狂。

這些賦閒在家的日子﹐其實每天都會出門﹐不是真的「隱蔽青年」。但性事越來越躁狂。

有時候﹐連覺得熱所以掙扎要不要開冷氣﹐都會變得讓自己抓狂。要不要去那兒﹐要不要吃比較貴的食物﹐要不要花這個錢﹐也會讓自己抓狂。有時事情其實不涉金錢﹐但都抓狂。

對不起﹐我讓身邊人都快瘋了。

生日應該快樂

你們都苦盡甘來了

今日會考放榜

媽媽為弟弟於試前四出奔走﹐為的﹐只是為取得考評局和教育署那一批被制度腐蝕透底的人﹐可以給我弟弟一個機會﹐給他讀寫障礙應有的支持。

弟弟﹐苦盡甘來。從他決心要做「整車」﹐到家人反對﹐到家人和解﹐到最後選擇「各安天命」。我們各都上了一課。

今天﹐成績公佈。賽前預計大約最多十四分﹐讓大家都跌眼鏡了。

I'm proud to tell, 我細佬考十六分！原校升讀！

勁呀！爆呀！

讀好個 A-level。就算香港已經沒有 Engineering 了﹐我相信弟弟都總會找到他所想的。

媽﹐苦盡甘來了。

每個男人身後的女人

每一個男人﹐成唔成功﹐身前身後身側邊﹐都總有一個女人....

...阿媽。

好煞風景呀可？

Well...呢個世界就係咁奇怪

=====

曾幾何時聽過一個類似係笑話的道理﹐就係話每一個孩子 (尤其男孩子)﹐無論佢係五歲定係五十歲﹐當佢同阿媽講一樣(佢以為係)秘密時候﹐每一個阿媽的心裡面其實都會講句....





.....「仔﹐其實我一早就知啦」

=========

今晚同作為某大保險公司首席 (只有我認為係) 財務規劃師的媽媽﹐談論左一輪閒話家常之後﹐終於談到錢的問題。

我呢個阿媽有幾爆炸呢？你睇睇

condition 1: 佢唔知我未番工之前有幾多錢

condition 2: 佢亦唔知我每次出街使幾多錢

condition 3: 通常買貴左少少野﹐或買平左﹐佢都唔會知﹐尤其係打機用品 / 衣著 / 食左落肚。我從來都唔講。

condition 4: 佢唔知我有無秘撈

condition 5: 佢唔知我有無出 bonus, 出幾多

condition 6: 佢唔知我有無借錢俾人

起碼我諗到呢六個 condition 先。咁係呢六個 condition 底下﹐你要去估一個人仲有幾多錢身家﹐都好難估喇掛？

不過﹐作為懷胎十月痾你出來再養大你的阿媽﹐要睇穿你個衰仔實在係太易。加上﹐仲要係考好晒試拿晒牌的註冊 Financial planner, 你話我副身家﹐仲有幾多秘密可以守到？


佢隨口一 up, 講左個數﹐雖不中﹐亦不遠矣。我暗抹一額冷汗﹐仲要扮無野。佢出左我房之後﹐拿拿聲睇下 HSBC 個 token 仲係唔係度﹐有無俾人做過手腳﹐佢唔係睇過 bank account (s) 的話﹐點會知得咁準？

好驚....

Candi & Kenny's Wedding

我表姐佢結婚lu。

一朝早起身﹐起唔切啦當然。於是就要三扒兩撥咁著好一套所謂的西裝﹐但係因為人窮志短 (只係志短﹐其他的都很長*_^) ﹐所以得一套夏天西裝﹐都要頂硬上….雖然今日只係得十四定十三度。

唯一可以做的事﹐就係加強「餡料」﹐係薄薄的裇衫底下﹐係兩件厚內衣﹐一件厚棉﹐一條條厚厚的縫線﹐睇得出呢件都幾勁﹐再加一件菊花牌長袖﹐將保暖力 extend 到兩袖。就係咁多。再加兩件毫無保暖作用的 Shirt & Jacket.

對腳都係靠佢…因為我無厚褲亦無保暖用的打底褲。都係著for 夏天的薄褲﹐冬季季候風一走過來同我 say hi 就凍到縮晒。

剛剛起身無耐﹐其實都好凍下。但係因為阿爸話係十一點鐘﹐所以都唔理得咁多﹐求其叮杯暖水飲兩啖當自己個身好暖﹐就立即飛的出門。如果我再早d 出問口的話﹐就唔使自己一個挨貴的啦。

點知去到﹐原來十一點只係準備影相的時間﹐十一點九先係註冊﹐妖…早之係咁我梳靚個頭先來呀。

影左一輪﹐發現文老表原來都係同我同病相憐﹐都係著「盛夏裝」。不過唔同的係﹐佢有錢去義大利買一件大絨褸保暖﹐我只得件大陸製造的紙紮來做當褸著。說時遲那時快﹐又有一陣清風吹過…好凍。走去買盒維他奶諗住暖暖身﹐點知山頂纜車站周圍都係無七仔的﹐唯有幫襯車仔檔﹐點知凍的﹐飲完﹐仲凍。救命。

最偉大的太陽伯伯﹐總算今日有開工。唔理太陽底下的其實企緊另一家人﹐我唯有立即「鼠」去取一取暖。

一月尾都算隆冬﹐Overhead Sun的角度雖然已經大過 23.5 度﹐但係都唔慌高得去邊。將近正午的太陽係最直照最猛的﹐但係呢個冬季季候風肆虐的香港﹐陽光再猛都好似個打火機仔咁暖 only. 都係企番入去室內最暖。

等多一陣﹐就可以去影相﹐正當我以為係上香港公園的註冊處的時候﹐原來係去私人公司做註冊。係喎﹐都唔記得左原來依家係可以係私人公司度做結婚註冊的添。

間野叫做「伊甸園」﹐係纜車站大樓上面其中一層的 office. 我去到﹐發現佢由朝早九點到下什五點鐘都有人來註冊﹐係排到 full 晒個種！成張 list 我諗起碼有二十幾對 couples. 嘩﹐乜香港有咁多人結婚架咩？又話d 人依家唔鐘意結婚的？好多人咁喎。

呢個地方其實一個一層過的 office 仔。其實都好細﹐佢地改裝左佢做個註冊場﹐其中一個最重要的地方就係個 hall, 但因為係舊式 office, 其實樓底係超低﹐一d “Hall” 的感覺都無﹐而且個 hall 佔地都甚大﹐基本上都用左佢成個 area 的將近一半。外有兩間房仔﹐作為新娘執好自己個樣的新娘房。有一個偏廳﹐俾親友「進場」之前等候等候。就係咁多。

有幾多人呢？就係上一場的人剛剛行完婚禮﹐佢地的親友都未出得晒來﹐我地就拿拿聲入去﹐到我地完左之後﹐想坐係度多兩分鐘都唔得﹐因為前後門都開左﹐然後下一場的親友竟然已經湧緊入來！嘩﹐咩事呀﹐我地都仲好多人坐緊係度﹐其他人已經湧緊入來﹐一時間﹐呢個所謂的 hall 擠滿左十幾家人﹐幾十個朋友﹐近百名親友﹐亂作一團。救命。OK 我明白你好生意﹐又明白你要做生意﹐但係婚禮禮成咁大件事﹐俾我地留多兩分鐘 savour 一下呢個人生中咁重要的 moment, 都好卦？

大功告成﹐但阿媽已經覺得好病。無辦法﹐始終佢係韓國病完一大輪番來之後﹐就一路係咁病﹐病足四日都未好得番晒。今次的婚禮我都覺得佢係勉強撐落去。咁於是佢好快就話要番屋企喇﹐咁我又唔想過尖咀飲茶﹐就拿拿聲同佢飛的番屋企啦。

番到去無野做﹐又唔記得要番公司 upload 尋日應該要 upload 的 report, 一味掛住打機﹐跟住又到夜晚的擺酒。

雖然今次係係酒店擺酒﹐都真係幾豪華﹐不過弊就弊在﹐個樓底﹐實在係太矮…

基本上﹐佢矮到以我一米七的身高﹐出力跳起都會掂到天花板咁矮。咁你話幾矮。當呢個情況放係一個廿五圍的酒席裡面的時候﹐就更加覺得超矮。主家席的前面﹐連台都無。主辦單位雖然係安排左魔術表演﹐但係因為無台的關係﹐基本上都只係頭幾檯睇得到﹐其餘的人嘛…繼續食翅囉。

老豆食食下翅中途被安排中玩魔術﹐好明顯佢個樣就係不情不願咁。HAHAHA...

今晚的野食幾好食的﹐起碼我都食得幾開心﹐同埋好多。

其餘的都唔講喇﹐因為差唔多個個婚禮都有的環節。唯一一個比較特別的﹐是有一個送玫瑰花的環節。材料係新娘一個﹐新郎一個﹐助手一個﹐賓客幾十個﹐玫瑰花九十九枝﹐經典歌曲 “Dream a Little Dream” (金莎朱古力主題曲) 一首不停播。首先將新娘放埋一邊﹐備用。賓客數十名分佈於會場大道兩邊﹐不分大小長幼高矮肥瘦﹐人人一枝玫瑰花在手。新郎哥放係走廊盡處主家席前﹐手執幾枝玫瑰﹐又係備用。

音樂一起﹐新娘進場﹐親戚朋友同事之餘此類三唔識七九唔搭八﹐紛紛夾道相迎送上紅玫瑰一枝﹐新娘子笑不攏嘴﹐慢慢地向前走著﹐慢慢地跟每一位道謝﹐金莎朱古力的主題曲於背後縈繞著。有穿得一身全套西裝的小朋友送上玫瑰﹐新娘子更為和顏悅色。近日枝玫瑰當然非一雙手所能盡持﹐後隨的助手其實是人肉大花瓶。走廊盡處是新郎哥﹐拿著手上最後十幾枝玫瑰﹐連同助手運到的﹐合共九十九枝長長久久﹐於眾賓客前半跪於地﹐送于新娘子。新郎哥自己便是第一百枝玫瑰﹐連同自己一起送給新娘子﹐百年好合﹐浪漫滿屋。

禮成~