Showing posts with label MK. Show all posts
Showing posts with label MK. Show all posts

Friday, March 09, 2007

終於都食過晒之最後一站 MOS Burger @朗豪坊


己經被咬了一口的帶子天婦羅珍珠堡


終於都食到。傳說中的 MOS Burger。漢堡旅程的最後一站。

星期五晚九點幾﹐應該食飯的人都已經食左﹐其他人都要番屋企準備訓覺聽日番埋半日工的時候﹐我鬼鬼祟崇咁約埋d 豬朋出去旺角 hea 下。見到 MOS Burger 少人排隊﹐立即試試﹐even though 要坐係露天位置天寒地凍仲要落埋雨﹐但難得少人排隊唔試唔心死。

廿蚊(超碼)一個包﹐未計汽水傻條。加汽水傻條要另外再加 $15﹐加汽水沙律另外再加 $20。都唔平﹐但係比起 Triple O’s 同 Burger King, 無得比。

我叫的是乜乜鐵板燒牛肉 rice burger﹐情不自禁地跟老麥的「牛肉飯tastic」比較。的確是 MOS Burger 的比較好食。但一分錢一分貨。朋友叫左「帶子天婦羅 rice burger」(佢地的米堡叫做「珍珠堡」﹐為免混淆視聽﹐我叫番佢做 rice burger, 雖然聽起上來無咁浪漫)﹐係全店單賣價最貴的一個堡。的確係好好食﹐燒汁好味﹐天婦羅唔脆但都好香(不過有人會認為叫自己做「天婦羅」但竟然唔脆等於呃秤)。兩個包都收貨。雖然成個餐的份量都勁細﹐$20 一個包都好似幾唔抵咁。

個沙律﹐可以唔食都唔會再特登俾多 $20。個傻條﹐佢話係厚切傻條﹐都幾厚的﹐可惜係我食的時候已經淋 Q 晒﹐如果係新鮮熱辣脆的話﹐肯定好味好多。

我飲南瓜湯﹐難飲到飛起﹐但唔飲又好蝕底﹐唯有落晒包黑椒想像自己飲緊煲過龍的「胡椒豬肚湯」。朋友飲抹茶牛奶﹐過得去。

吃過 McDonald’s, MOS Burger, Triple O’s and Burger King, 四大大眾化漢堡包比拼至此結束。(Triple O’s 都算大眾化?)

就店內環境﹐分店數目﹐食物份量﹐價錢﹐味道﹐質素﹐食物款式等等各方面而言﹐得出一個總冠軍。

而呢個總冠軍…….

就係……..

即係……

無錯…..

拿…..

即係咁….

大家唔好打我…..

總冠軍…..

係麥當勞。(雞蛋蕃茄如雨下般空襲過來 「哎呀﹐唔好打我呀﹐我都唔想架﹐哎呀﹐唔好呀……」)

你再睇多一次我頭先講的七大 criteria, 就會明架喇 (哎呀﹐唔好再打﹐我求你地….)﹐我都唔想架……但香港地事實真係如此。出年呢個局面會唔會有所改變﹐就不得而知喇。

--==--==--==--====-----=====

MOS Burger 旺角朗豪坊店
地:MK 朗豪坊 4/F 大平台Starbucks 隔離
電:3514-4301
價:$20-50@
格:室外/ 內快餐店
推介:乜乜燒牛肉 rice burger
特色:有丁點兒日本風味 e.g. 勁細的份量

Wednesday, January 31, 2007

譚魚頭火鍋



是日小朋友小聚會。講唔夠幾句﹐我心癮又到﹐於是又係果句:

「唔該大家報一報各自的最新近況呀。」

阿詩話: 「又係呢句﹐個個 gathering 的頭十句裡面實係有呢句。」

Sorry...咁講好似好無誠意咁﹐但係我真係唔知嘛....

-----------

譚魚頭火鍋﹐名就聽得多﹐食就未食過﹐試下都唔錯。

當晚叫左兩種湯底﹐一個蕃茄一個麻辣。「麻辣?!?!」 我一聽見就即刻驚一驚。一邊蕃茄...唔多鐘意食﹐另一邊麻辣...唔多食得辣。

咁我今晚食咩?

「無野的...無野的...實食到的」

但係都叫左一個蒜泥白肉先。一來係想立即有d 野食下﹐二來係想試下佢的「熟料」做成點樣。反正大家都肚餓﹐等得煲來﹐等埋水滾﹐等埋生肉變熟肉﹐怕且大家都餓死左。於是大家都好開心咁食。

蒜泥白肉上檯﹐大家見佢一碟底都係紅油﹐估計佢好辣﹐怕怕﹐果陣我先知 - 原來成檯人無幾多個食得辣。

咁點解叫辣湯底的..........??

拍心口講左幾次「呢個蒜泥白肉真係唔太辣」之後﹐大家就試左。係咪?都話唔辣架喇。

所以呢﹐後來上的辣湯底﹐其實﹐都唔辣的。可能為左遷就香港人口味而減辣。

佢地唔似傳統邊爐店咁放一個大爐係你面前。為節省地方﹐電磁爐放左係特製的檯入面﹐檯布之下。就咁睇﹐好似係放一個煲係檯中間佢就會水滾咁。呢個 design 我幾鐘意﹐因為咁真係慳好多位﹐而且又唔使d staff 搬來搬去﹐甚至係換氣 (for those older styles stoves).

食物方面...都幾貴下。所有的生料都係意料中內﹐無特別好食難食。其他如「魚子墨魚滑」等等亦都有。

值得一提的﹐係佢俾每一個人的「滋味碗」。呢碗野其實主要都係香料同調味醬﹐主要俾大家烚完野食之後用來撈一撈的。最大的 feature 係佢裡面大部份都係芫茜碎﹐加d 花生碎呀﹐辣醬呀﹐雪菜粒呀之餘此類﹐非常香口﹐非常惹味的選擇。芫茜呢家野﹐鐘意的人如我或者係阿瑪﹐就會非常之 like, 連阿 Wing 果碗芫茜碎都「立」埋﹐唔鐘意的﹐就好似阿 Wing 咁成碗「奉獻」出來任我同阿瑪「宰割」。

一個唔太辣的辣湯底﹐撈起一片肥牛﹐肉身尚滴著辣汁﹐放入一碗青葱翠綠的芫茜碎﹐內加一點花生碎呀﹐辣醬呀咁﹐撈一撈﹐嘩....香到呢....

一放入口﹐牙齒咬開芫茜碎的一刻﹐登時感受到一股清新得來又帶著性感氣味的芫茜香﹐湧入喉中。肉香橫流﹐辣汁在旁「煽風點火」﹐唉喲...

登時將所有平平無奇的「邊爐料」都化腐朽為傳奇!

我俾食物&環境&服務7.5分﹐滋味碗深得我心﹐另加極矜貴的 0.5 分﹐但因價錢真係太貴 ($177@)﹐要減番。總分 7.5 算喇。

地:TST 金巴利道 26 號 2 樓 (近 Knutsford Terrace, Quiksilver 樓上)
電: 2311-4848

p.s. openrice 上面人人都勁彈呢間的服務差到貼地﹐就我當晚所見﹐唔係喎﹐幾 good 喎...

p.p.s. Gary.....你自己衰咩你自己知喇.....下次小心d 喇......(講到好似唔關我事咁的﹐超衰仔呀我)

Sunday, December 31, 2006

除夕夜的「皮蒯」壽司

其實係「板前壽司」囉﹐但懂得打倉頡的朋友都知﹐打得手快又按錯埋果 d 數字掣來揀字的話﹐就好容易變左「皮蒯」。 打錯咁多次﹐索性叫佢做「皮蒯」

Anyway! 因為知道除夕夜的話﹐一定係成條街都係人﹐癲左一樣咁多人﹐於是就索性係屋企食少少野先﹐然後夜d 先出去食「第二 round」的晚飯。

同友人都鎖定左無可能食到自助餐﹐西餐的「蜂擁度」亦都會好高﹐都係唔好搏好d 。反正大家都係一定要求要係除夕夜食西式自助餐的...年紀大左﹐個人都開始「化」。以前我都會好重視呢個 period﹐好想好想可以食到西式自助餐﹐最好係高級酒店﹐仲要有埋高級的人係身邊﹐仲要好有聖誕氣氛﹐最好有埋一d都唔好食但有重要意義的烤火雞﹐同埋要開支白酒出來一齊飲﹐仲要望埋海景﹐有埋 music, 有埋 party, 成埋 friend 係一個高級的地方裡面低級地狂歡等等。

但依家都個人現實左好多﹐呢種畫面一 cross 過個 mind 就已經知「陡 Q 氣」﹐諗都費事諗。所以我好現實咁話不如就試下新開張的板前壽司吧啦﹐趁住佢好似仲係無乜人發覺的時候…….

新店開係旺角家樂坊﹐CPK 心愛的 CPK 對面。以前果間咁的乜鬼 Rainbow 想唔執幾難….好日都唔見佢有生意。新店同豉油街舊店其實只係差左一個街口﹐唔知佢係見咁多人所以想再開多幾間賺埋果個「未賺的錢」﹐定係想密謀搬舖。如果大家仲記得的話﹐不久之前﹐豉油街個間後舖發生過火警﹐當時一位員工正在休息﹐大火因為燒著化學品而火勢極猛烈﹐其他員工欲救無從﹐被困火場的員工活活被燒死。當時佢只不過二十歲多些。事後﹐又有低級雜誌報導話事發的貯物室有「冤魂不散」﹐有員工被嚇至「尖叫逃跑」等等﹐疑神疑鬼的氣氛縈迴於店。如果家樂坊的新店開張是為搬遷﹐絕對可以理解的。

好﹐講番間店﹐我覺得呢間靚好多﹐尤其係假天花的燈光佈置﹐唔知點解勁有 LV 的感覺﹐可能我日日番工都對住間 LV (仲有無闗係但讀音似的 LB)。因為我好好彩可以坐到普通檯﹐所以我覺得幾好坐。好多人都鐘意坐壽司吧﹐覺得 d 壽司係自己面前好似安全d﹐睇到佢係唔係新鮮整的﹐邊舊係放左好耐的唔好要…之餘此類。我又唔係咁擔心呢樣﹐坐得舒服好緊要﹐睇唔睇到佢整…我又唔係未見過﹐又唔係有表演睇﹐不希罕。亦都唔擔心佢用唔係即製的呃我。老實講﹐真係放左好耐的﹐一食就食得出﹐大可以叫佢換; 放左一陣間的壽司﹐你都食唔出所謂「新唔新鮮」的﹐何必執著﹐反正你都係無能力分辨到。

係呢個咁正的環境﹐食緊咁正的壽司的時候﹐竟然係隔離坐左兩個麻甩佬﹐the point is! 佢地講野好大聲。大佬呀﹐本身個房已經好應聲﹐仲要你兩條 laan tan 講野講到咁大聲﹐無論你個內容係講乜野都已經好令人討厭架喇﹐仲要個內容係無聊到爆﹐頭半餐真係食得好唔開心﹐因為有呢兩條茂利係度贈興。

肚餓得緊﹐先來一個麵豉湯。第一次來板前的時候﹐無諗過會等到位﹐坐到入去先唔知食乜野好﹐於是就打俾出左名鐘意食板前的 Patrick 問下意見。佢竟然話係麵豉湯。我的腦海即時浮現出一碗典型香港式的所謂「日式麵豉湯」- 一部機器的噴咀向著下面的碗子噴出啡色的湯﹐我隨手一翻﹐看見幾顆比骰子還要小的豆腐﹐和幾片比香口膠還小的海帶 – 嘩 Patrick﹐你叫我來板前壽司俾 $12 叫呢樣野唔係卦?「你信我喇﹐好飲架。」OK.

咁我半信半疑地叫左﹐嘩﹐好大碗。打開蓋﹐翻一翻…三文魚?真係三文魚來架喎。喂﹐貨不對辦喎﹐點解「麵豉湯」會有咁多三文魚塊架?點解咁多海帶?點解 d 豆腐咁大粒?十二蚊架咋喎呢碗野﹐點解唔係一碗頹爆的味精水來的?貨不對「辦」喎。

於是以後去親板前壽司都必定會叫番呢碗咁「貨不對辦」的麵豉湯。

跟住叫左「板前特卷」﹐無非貪佢廿五蚊就己經有得食一小小 pat 海膽同三文魚子。
「帆立貝壽司」係呢度的必叫項目﹐再加海鹽 – 少少好喇﹐怕免得搶味 – 就好好食喇。我曾經見過一對情侶﹐坐低之後狂叫帆立貝﹐埋單係超過二十碟帆立貝﹐得人驚。
跟住就係各有所好﹐我有我的「芝士飛魚子」﹐佢有佢的「蝦膏甜蝦軍艦」。
「火炙三文魚」唔及「火炙帆立貝」好食 – 都係覺得帆立貝熱食好味過刺身。
「鵝肝壽司」無味非常﹐可以唔使叫。
「軟腳蟹手卷」又香又脆﹐必叫。
「飛魚子墨魚」唔係咁特別。「油甘魚軍艦」唔識欣賞。
「蝦天婦羅壽司」配咖哩海鹽好味到震。
「火炙鰻魚」無乜特別。
想叫「蟹棒壽司」點知叫錯左做「蟹肉壽司」﹐唔好食又貴。都係「蟹棒壽司」好味﹐唔係出面紅色一卷的魚肉﹐真係唔錯架﹐都係最平的 $12 之嘛。

埋單 $384。嘩!友人話「差唔多喇食左咁多喎」。諗諗下又係喎。

出到去尖沙咀諗住去到星光大道倒數好似好勁咁。點知都係係 Pacific Coffee 李小龍像前面倒數﹐又大風又逼又悶﹐最大的問題係無氣氛﹐大家都唔知做乜野無來心機咁﹐倒數完個十下就算數﹐散水。好無癮﹐咁樣為乜呢?下次都係唔去尖沙咀。