Sunday, December 31, 2006

除夕夜的「皮蒯」壽司

其實係「板前壽司」囉﹐但懂得打倉頡的朋友都知﹐打得手快又按錯埋果 d 數字掣來揀字的話﹐就好容易變左「皮蒯」。 打錯咁多次﹐索性叫佢做「皮蒯」

Anyway! 因為知道除夕夜的話﹐一定係成條街都係人﹐癲左一樣咁多人﹐於是就索性係屋企食少少野先﹐然後夜d 先出去食「第二 round」的晚飯。

同友人都鎖定左無可能食到自助餐﹐西餐的「蜂擁度」亦都會好高﹐都係唔好搏好d 。反正大家都係一定要求要係除夕夜食西式自助餐的...年紀大左﹐個人都開始「化」。以前我都會好重視呢個 period﹐好想好想可以食到西式自助餐﹐最好係高級酒店﹐仲要有埋高級的人係身邊﹐仲要好有聖誕氣氛﹐最好有埋一d都唔好食但有重要意義的烤火雞﹐同埋要開支白酒出來一齊飲﹐仲要望埋海景﹐有埋 music, 有埋 party, 成埋 friend 係一個高級的地方裡面低級地狂歡等等。

但依家都個人現實左好多﹐呢種畫面一 cross 過個 mind 就已經知「陡 Q 氣」﹐諗都費事諗。所以我好現實咁話不如就試下新開張的板前壽司吧啦﹐趁住佢好似仲係無乜人發覺的時候…….

新店開係旺角家樂坊﹐CPK 心愛的 CPK 對面。以前果間咁的乜鬼 Rainbow 想唔執幾難….好日都唔見佢有生意。新店同豉油街舊店其實只係差左一個街口﹐唔知佢係見咁多人所以想再開多幾間賺埋果個「未賺的錢」﹐定係想密謀搬舖。如果大家仲記得的話﹐不久之前﹐豉油街個間後舖發生過火警﹐當時一位員工正在休息﹐大火因為燒著化學品而火勢極猛烈﹐其他員工欲救無從﹐被困火場的員工活活被燒死。當時佢只不過二十歲多些。事後﹐又有低級雜誌報導話事發的貯物室有「冤魂不散」﹐有員工被嚇至「尖叫逃跑」等等﹐疑神疑鬼的氣氛縈迴於店。如果家樂坊的新店開張是為搬遷﹐絕對可以理解的。

好﹐講番間店﹐我覺得呢間靚好多﹐尤其係假天花的燈光佈置﹐唔知點解勁有 LV 的感覺﹐可能我日日番工都對住間 LV (仲有無闗係但讀音似的 LB)。因為我好好彩可以坐到普通檯﹐所以我覺得幾好坐。好多人都鐘意坐壽司吧﹐覺得 d 壽司係自己面前好似安全d﹐睇到佢係唔係新鮮整的﹐邊舊係放左好耐的唔好要…之餘此類。我又唔係咁擔心呢樣﹐坐得舒服好緊要﹐睇唔睇到佢整…我又唔係未見過﹐又唔係有表演睇﹐不希罕。亦都唔擔心佢用唔係即製的呃我。老實講﹐真係放左好耐的﹐一食就食得出﹐大可以叫佢換; 放左一陣間的壽司﹐你都食唔出所謂「新唔新鮮」的﹐何必執著﹐反正你都係無能力分辨到。

係呢個咁正的環境﹐食緊咁正的壽司的時候﹐竟然係隔離坐左兩個麻甩佬﹐the point is! 佢地講野好大聲。大佬呀﹐本身個房已經好應聲﹐仲要你兩條 laan tan 講野講到咁大聲﹐無論你個內容係講乜野都已經好令人討厭架喇﹐仲要個內容係無聊到爆﹐頭半餐真係食得好唔開心﹐因為有呢兩條茂利係度贈興。

肚餓得緊﹐先來一個麵豉湯。第一次來板前的時候﹐無諗過會等到位﹐坐到入去先唔知食乜野好﹐於是就打俾出左名鐘意食板前的 Patrick 問下意見。佢竟然話係麵豉湯。我的腦海即時浮現出一碗典型香港式的所謂「日式麵豉湯」- 一部機器的噴咀向著下面的碗子噴出啡色的湯﹐我隨手一翻﹐看見幾顆比骰子還要小的豆腐﹐和幾片比香口膠還小的海帶 – 嘩 Patrick﹐你叫我來板前壽司俾 $12 叫呢樣野唔係卦?「你信我喇﹐好飲架。」OK.

咁我半信半疑地叫左﹐嘩﹐好大碗。打開蓋﹐翻一翻…三文魚?真係三文魚來架喎。喂﹐貨不對辦喎﹐點解「麵豉湯」會有咁多三文魚塊架?點解咁多海帶?點解 d 豆腐咁大粒?十二蚊架咋喎呢碗野﹐點解唔係一碗頹爆的味精水來的?貨不對「辦」喎。

於是以後去親板前壽司都必定會叫番呢碗咁「貨不對辦」的麵豉湯。

跟住叫左「板前特卷」﹐無非貪佢廿五蚊就己經有得食一小小 pat 海膽同三文魚子。
「帆立貝壽司」係呢度的必叫項目﹐再加海鹽 – 少少好喇﹐怕免得搶味 – 就好好食喇。我曾經見過一對情侶﹐坐低之後狂叫帆立貝﹐埋單係超過二十碟帆立貝﹐得人驚。
跟住就係各有所好﹐我有我的「芝士飛魚子」﹐佢有佢的「蝦膏甜蝦軍艦」。
「火炙三文魚」唔及「火炙帆立貝」好食 – 都係覺得帆立貝熱食好味過刺身。
「鵝肝壽司」無味非常﹐可以唔使叫。
「軟腳蟹手卷」又香又脆﹐必叫。
「飛魚子墨魚」唔係咁特別。「油甘魚軍艦」唔識欣賞。
「蝦天婦羅壽司」配咖哩海鹽好味到震。
「火炙鰻魚」無乜特別。
想叫「蟹棒壽司」點知叫錯左做「蟹肉壽司」﹐唔好食又貴。都係「蟹棒壽司」好味﹐唔係出面紅色一卷的魚肉﹐真係唔錯架﹐都係最平的 $12 之嘛。

埋單 $384。嘩!友人話「差唔多喇食左咁多喎」。諗諗下又係喎。

出到去尖沙咀諗住去到星光大道倒數好似好勁咁。點知都係係 Pacific Coffee 李小龍像前面倒數﹐又大風又逼又悶﹐最大的問題係無氣氛﹐大家都唔知做乜野無來心機咁﹐倒數完個十下就算數﹐散水。好無癮﹐咁樣為乜呢?下次都係唔去尖沙咀。

Thursday, December 28, 2006

東亞病夫

話說係呢個咁勞累的聖誕節之後﹐我都係無乖乖地早睡早起﹐於是就係今日出問題喇。

今朝起身的時候已經覺得好唔妥﹐但係係乜野就講唔出﹐淨係覺得好似想嘔咁樣。後來呢個唔多妥的感覺就一直維持到我代完同事 on duty 之後去食飯。

平時我真係好大食的時候﹐食一個吉野家下午茶餐的牛肉飯係唔夠的。至於平時我都會加一個海苔珍菌 (其實都係雜菇) 或者係加一個 salt 燒鯖魚﹐咁加埋平野飲其實就夠飽架喇。

但係今日我就連一碗仔的牛肉飯都食唔晒﹐咁你話咩事﹐我仲食到半路想嘔添。

呢種想嘔的情況一路都維持到成個下午﹐然後﹐呢個時候我的老世就話要同我講野。 OK, 咁等左成個下午之後佢終於同佢入去 meeting room 傾一d 好重要的野 - 前途。

弊就弊在我坐的位﹐係正個冷氣風口底下﹐d 風一路係咁吹住我個頭﹐我一路都 feel 到佢強烈的冰冷感覺。

係呢個咁弱雞的時候﹐我最需要 (又最唔需要) 就係呢種最後一 kick….一 kick-off, 就所有野來爆晒出來….

開完會我已經拿拿聲走﹐未番到屋企我已經係連行路都無力。好凍﹐一路行一路覺得超凍。番到去的時候我真係成個人都訓晒落去張床度﹐完全係唔識郁﹐蓋左好多張被﹐又覺得好熱﹐又覺得好凍……唔使問阿貴都知係發燒喇。

攪左一大晚﹐食番d 粥水﹐加粒 Panadol, 散左一身汗﹐邪從汗去﹐無咁辛苦囉。短短一晚之內由無事﹐到發燒﹐到坐起身食飯都無力﹐到食到粥﹐到退埋燒。第二朝基本上已經退晒燒﹐只不過係仲有d 咩肚痛呀﹐頭痛呀呢d 咁的「併發症」。但係聽日都係番唔到工… 因為實在係太 weak

好野﹐又請病假。難怪被同事謔稱為「東亞病夫」。

Tuesday, December 19, 2006

勝香園 與 蘭芳園

由於之前的「死魚星號」的經歷實在係太難頂喇﹐跟住落左船之後根本就完全無一個開心的感覺。不忿。於是回家放低多乜 X 餘的細軟之後再出番來﹐決定要好好開心一番!點可以浪費左我咁辛苦先儲到又唔捨得請的一日假架!

出番來﹐左諗右諗﹐不如就趁依家仲係平日下午﹐去一d 平時去唔到的地方食野先。咁諗下諗下仲有乜野例子呢?就一如去睇下傳說中的「勝香園」喇!

真係要多謝 Openrice, 唔係佢的出現我都唔會咁容易搵到香港咁多食野地方的資料。其中一個就係位於上環九如坊的「勝香園」。其實勝香園係香港碩果僅存的綠色鐵皮屋式大排檔。係呢個所謂「強政勵治」的政府底下﹐咁樣有歷史有風味有特色的大排檔真係拆一個少一個。所以呢﹐趁果班高官個屎忽腦仲未諗到要點樣趕盡殺絕晒香港的特色之前﹐真係好去得一次得一次喇。

由於之前已經經過佢個檔位﹐所以今次基本上都唔係好使點搵就搵到佢喇。檔口唔係好大﹐得幾張檯﹐但係都坐滿晒人﹐時為三時許。睇睇周圍的環境﹐又真係難怪政府會有咁的諗法。大排檔呀大排檔﹐我撐你還撐你呀﹐你都唔好污糟成咁~~先得架﹐張張檯椅都有漬﹐份份 menu 都好似有層黏膜咁﹐成個地下﹐唉也﹐個地下呀﹐真係呢….呢度有乜野飲品食物供應﹐基本上一 dup 低頭睇睇就一清二楚 (救命)。隆冬都尚且如此﹐你話盛夏會點。氣溫一高﹐濕度一高﹐所有細菌都蠢蠢欲動﹐一陣陣奇怪的氣味氤氳而上…..嘩…..

唔想再諗﹐望望個 menu 叫野食先﹐三點幾都未食 lunch 都幾肚餓。我好似記得呢個地方係出名「茄牛麵」﹐就叫一個茄麵來試試先。大排檔…點可以唔試港式奶茶?呢一小杯飲品基本上就係品評一個大排檔的「指定標準」來了。再睇一睇 menu, 係喎﹐呢度都出名呢個「檸蜜脆脆」的物體架喎﹐試試先。

等緊野食的時候﹐睇到幾個成身都污糟邋遢的地盤工人又坐低來食﹐又有幾個著得好靚好潮的「中環女」又來食﹐跟住又有個著一件全身大 ming 的貴婦來買外賣﹐然後又有一班小朋友來食﹐跟住又有幾個大學生(佢著住港大的 soc 褸) 食完係度hea….嘩睇來呢間野靠得住喎。

好!說時遲那時快(迷之聲:關乜事呀)﹐奶茶同檸蜜脆脆登場!




奶茶係幾好飲但係唔係話超級特別。個檸蜜脆脆就正囉﹐你睇佢圓圓地就知佢唔係普通包﹐係豬扒包的硬包來架喇。焗完之後一d 都唔太硬﹐仲真好脆﹐好香好好食。唔怪得大家都激讚呢度的檸蜜脆脆﹐果然係值得大家所講的食完再食 (可能因為我太肚餓的緣故添啦)。檸蜜兩隻味都控制得幾好﹐唔會好似 cheap cheap 餅乾咁一食就知係勁假的味道﹐淡淡然的反而來得更好。正呀!值8.5 分!

食完抖啖氣﹐就見到一碗咁的野遞上來…..



嘩﹐乜野來架呢碗?成碗野都血淋淋咁恐怖的?我幾經辛苦先係個底到挖到係個底的腸仔同埋個蛋來影呢幅相。真係好~多~蕃~茄~呀。

大家梗係好奇怪點解咁唔鐘意食蕃茄的我會突然間係呢度叫有咁多蕃茄的麵呢?無他﹐因為我勉強定得住蕃茄﹐而且係呢度的名菜﹐唔試下點得呢?於是就唯有硬著頭皮咁試囉。

試完…真係激多蕃茄… 有幾個 moment 係我覺得陣味 + 口感實在頂唔住要停食。後來都係食得完。當然個湯同d 茄就….

其實佢真係幾好﹐起碼我連個湯都飲唔晒的時候就知因為佢係用真材實料的蕃茄來煮的﹐絕對唔係一般「紅色的水」就叫做蕃茄湯咁不知所謂。每一匙羹「不」起上來的湯底﹐都係清楚見到有好多煲出來的蕃茄蓉。真係好似煲紅豆沙會起沙咁款架!唔單止咁﹐佢仲有幾個已經去皮的熟蕃茄係裡面。做到咁﹐都算得上係「童叟無欺」喇。

我相信如果鐘意蕃茄的人﹐會真係好鐘意﹐但係我只係接受到生蕃茄片﹐都仲要只係幾片﹐熟的蕃茄﹐真係唔係幾得….

成碗湯都係煮到「蓉」晒的蕃茄﹐再加幾個 (真係一碗麵幾個茄咁多!)煮到好稔好稔好稔好稔…(下省一百個「好稔」) 的蕃茄係度浮下浮下…係愛蕃茄者的天堂﹐亦都係…係囉﹐你明啦。

由於我係來自「不愛蕃茄的小朋友組別」﹐所以呢碗野我都係唔評分 (亦唔識評)。

飲飽食醉﹐就走走其他地方。沿路都發現好多舊樓已經舊到不得了﹐於有多似乎已經有政府的人來睇過﹐裝上儀器或量度器﹐為防止樓字進一步退化而做的 measures.

咁樣雲游下﹐又睇下景﹐通常都可以 consume 到唔少時間。行左咁耐﹐加上本少爺財少都身子弱﹐加上之前個晚的「把鬼星號」訓得唔係幾好﹐零舍容易覺得疲累。左走右走﹐忽覺自己到左結志街﹐眼珠一轉﹐醒起呢度應該有間類似大排檔好出名…又係果d綠色鐵皮檔呢…呀!就係呢度喇!

蘭芳園

其實我真係唔知佢出名乜野﹐我都係見到佢話自己的奶茶好出名我先諗住來呢度試下。反正一場來到試下無壞呀。

去到發現原來佢地的已經唔再係鐵皮檔咁簡單﹐一早已經上左鋪仲要係勁大間舖﹐出面又勁多 neon lights﹐成間「先到先等」咁的樣。…喂個樣好 cheap 喎咁

坐低左係舊舖果邊﹐發現都係呢種舊舖的樣我比較鐘意。影低左舊舖的樣:



正當我以為佢會好似「勝香園」咁得人驚的時候﹐發現原來佢好乾淨架喎﹐地下無食物碎屑﹐檯面係 acceptably 油膩﹐餐具都唔算太污糟﹐呢點真係有d 出乎意料之外。後尾睇睇 menu, 彩色的有相﹐有中文英文仲有埋日文﹐出面貼滿世界各地各種文字的旅遊介紹 – 當然就係介紹蘭芳園 - 噢﹐原來係咁﹐唔怪得咁乾淨。

坐低﹐唔理得奶茶十幾蚊一杯﹐比起勝香園貴﹐就先叫一杯﹐睇下佢標榜自己係正宗的香港絲襪奶茶到底有幾巴巴閉閉。再睇 menu 話佢點樣係撈丁的始祖﹐就試佢的招牌撈丁 「葱油雞扒撈丁」。

佢地的「撈丁」係標榜用自己特製的滷水汁﹐唔係求其用 generic 的豉油。同埋佢其他的做法係點點點犀利…我都唔記得。我個腦從來都係自動式選擇性過濾官腔口吻文字 / 說話。

先來撈丁﹐樣子不錯喎。



食過﹐葱油其實即係類似食白切雞時候附送的「薑葱蓉」。雞扒炸得來唔硬算合格。

撈丁…我份人唔鐘意食硬的麵﹐尤其係即食麵。即食麵本身個 texture 已經係好硬﹐再為追求所謂的「彈牙」而只煮半熟的話﹐恕我係阿伯無牙﹐我真係覺得太硬。唔係我d 牙咬佢唔斷﹐係我個胃頂佢唔住。

所以呢度個撈丁我鐘意﹐因為佢無想像中果種不必要的 al dente。而且用滷水汁﹐一來香﹐二來唔搶味﹐三來佢的 viscosity 比較低﹐容易撈到更多的麵﹐幫手軟化某部份「頑劣份子」。

不過由於我已經好飽的關係﹐even 兩份 share 一個撈丁我都覺得好滯。同埋本身撈丁就係一樣極肥極唔健康的 Junk Food. 再加上咁樣一碟就已經 $32所以… 6.5 分 only. 本著一試無妨的心可以一試﹐試過的如我都無乜興趣番兜一次。

奶茶就唔同喇﹐真係好好味﹐無得頂﹐真係好滑。唔怪得出面的綠色鐵皮檔已經被 convert to operational base solely for the purpose of 沖奶茶。

Good…我俾 9 分!值得再飲。

之後呢﹐五點九佢地就開始收舖﹐見我地得兩個人坐細檯個樣好蝦﹐就將所有的野都放晒來我地張檯﹐你睇下….



壯觀呀!

跟住 hea 多陣﹐去左 Landmark 睇新開無耐的 ThreeSixty, 係專賣 organic food and organic products 的超市﹐無想像中咁「天價」﹐但依然係好Q貴﹐我呢d中下階層都係早閃早著。

臨去到演藝上埋最後一堂之前﹐時間尚早﹐就當然係趁偷左老豆部相機的呢個機會﹐影番幾幅靚相先喇。

Monday, December 18, 2006

雙魚星號兩日一夜海上假期之大海茫茫呼天不應叫地不聞悶到你抽筋

話說阿媽有張 coupon﹐係可以用「超值價」 $550 來換取「兩日一夜麗星郵輪雙魚星號海上假期」的上將套房兩位的。跟住去睇睇原來上將套房係好高級的房來架喎﹐只不過係低級過最高的房一個定兩個 grade﹐於是就義不容辭咁去訂房囉。咁岩 Kev 又唔使番工﹐就問佢去唔去。雖然佢只能夠 Mon to Thur 先訂得不過都無所謂啦好似好抵咁。$550 兩個人有一大間房仲要係郵輪喎。當其他人都仲係訓緊板間房的時候我地訓緊大床喎幾大都請一日假試下啦係咪?

原來佢的兩日一夜係星期一 5pm 開始上船﹐上到 7pm。到第二朝呢就可以8am開始落船﹐最遲十二點走。下?咁咪即係唔使請假都得?算啦﹐我唔想咁趕﹐背包有咁多野仲走來走去第二日仲要番工好似好頻能咁。索性請一日假。

好開心咁睇住張單由本來的接近 $3000 減到 $550。到星期一晚﹐一收工就即刻飛奔去地鐵站﹐搭逼到痴晒線 (真係逼到傻) 的過海地鐵去海港城上船。

又跑又急步又索氣咁走到去﹐去到佢話「先生你呢張係上將套房來架﹐請過去果邊的 VIP 專櫃行特別通道辦理登船手續呀」

嘩~~~~~好 high-class 呀~~~~~點算好呀~~~我呢d 一芥草民未試過咁高級架~~~特別通道呀~~~專用櫃台呀~~~~好有錢的「揀Jer」呀~~~~~~~~怕羞添!耶!

攪一大輪﹐入到去﹐又播音樂﹐又歡迎你﹐又有工作人員同你一齊影相咁﹐好似真係去左渡假咁呀!

搭完船上面的 lift 去到十樓﹐搵左一大輪先係茫茫「房海」搵到自己間房。都 OK 大間喎!幾好喎!其他人的房都似係火車的軟臥﹐而我地呢間就真係有房有大床有電視有 window 有櫃有梳妝台有椅有檯…好骨子喎!

之後睇睇房入面的「精彩節目表」﹐發現原來佢地的舞廳係差唔多每一個小時都會有節目…等我仲以為佢應該會係每晚就會只有一個 Grand Show 架添。俾佢昆左添。再睇番佢其他的節目﹐原來係五點鐘上船之後就已經有好多節目架喇喎﹐我地好似 miss 左好多野咁添。不過睇真d ﹐原來好多都係咩「汽球紮作」呀﹐「現場樂隊迎賓」呀咁….即時覺得有唔妥。咁大隻郵輪整d 咁雞的節目?唔係卦。

點知呢個先係惡夢的開始。

由於我放工放得好遲﹐所以上到船的時候其實已經係成八點幾﹐所以我地就要拿拿聲去食 dinner. 基本上船上面係有三間免費的餐廳﹐係可以俾你上到船之後任食的。咁既然中餐的同西餐都食得多﹐就一於選擇比較細小的「泰皇苑」來食泰國菜囉。

去到泰皇苑﹐發現個場都幾殘舊下。D 檯檯椅椅都係好似我地屋企十年前用的質料一樣﹐令人失望。出到佢拿野食的時候﹐發現佢原來得好少野食。咁都算啦﹐我心諗﹐好食咪得囉。於是我就試下最前排又最多的沙律囉。咁佢都幾好有幾種沙律﹐但係好老實講﹐真係隻隻都唔好食。係得個大蝦沙律係勉強可以﹐其他的例如牛肉沙律真係唔得。

「我記得好多年前去獅子星號的時候唔係咁~架喎…試多少少先」

於是就試左個冬蔭功湯﹐OK 啦﹐絕對唔可以算好。之後試佢的熱盤….唔多得。

咁就無野食架喇。係呢個情況之下﹐我地唯有離開﹐諗住食第二間算﹐點知原來再去第二間免費 buffet 食的時候係要再俾錢架?唔係卦?算數。最衰當時問﹐後來先知我地的「上將套房」係可以食夠三餐dinner架。不過…知道又點呀

好唔容易地食完個餐八個難頂的所謂泰式自助餐之後﹐就諗住拿拿聲去睇佢七點九的大 show 唔知咩咩嘉年華喇。咁諗住個餐咁難食﹐睇番個大 show 補番下數都好呀﹐起碼個人都會開心番d 呀嘛。

係隻船度行左一陣﹐終於係重重的樓梯之間搵到個表演廳…….係一個比起我以前讀書的 FYB LT4 仲細的地方。下?呢度有個大表演?佢張紙上面係 highlight 左呢個 event 架喎…坐低睇下先…開左場架喇喎…點解有幾個人係度跳下跳下的?跟住就係一輪異國男人女人跳舞表演….無乜特別…跟住就係四個極醜樣的男人表演用不同動作跳無火的火圈……跟住又係異國男女團左扭腰右扭腰……之後就完左

下?發生咩事?

正當我一頭問號的時候﹐就走左兩個磨碌出來﹐講唔咸唔淡的廣東話問我地「頭仙的折木係咪巧爭彩﹐巧巧睇呢?」下…好唔好睇?…呆晒….「請各位嘉賓留步呀﹐我地緊接住的節目就精彩囉﹐就係要頒發呢個剛才完結的麻雀王大賽的獎項呀…」…呢個時候就有幾個二打六拉起一塊已經皺晒的頹 Banner 上面寫住「麻雀王大賽頒獎典禮」…..說時遲那時快﹐就有幾個貌似大陸人的人爭住上台拿獎……

OH MY GOD….我頂唔順啦….我要走呀!

佢仲話會有一個要收費的 Topless Show﹐「想買飛就要趁早」…..佢咁的 quality, 不如我除俾你睇算吧啦….我唔介意 topless 喎….

慌忙逃離出呢個咁荒謬的地方之後﹐我地就繼續係呢一條充滿大陸風味 (係 “Mainland”﹐唔係 “Continental”﹐千祈千祈唔好攪錯) 的船上面游走。唔單止係佢的裝修擺設同埋乘客(!)令人覺得佢有「大陸風」﹐連小賣店賣的野﹐都又殘又舊咁樣﹐唔光鮮的物品自然係霉下霉下咁﹐光鮮的野就好似假的咁。隔離的免稅煙 section, 因為未出到公海所以唔賣得住….咁你都搵個好d 的辦法間開呢個賣煙的 section 呀。你搵個摔角比賽用的大鐵籠來罩住成個賣煙的 section 做乜野呀…d 煙坐監呀?定買果個坐呢?離遠望入去﹐都唔知邊個會有興趣去個大監倉入面買煙呢請問。好低能呀….

咁唯有去其他地方搵野玩啦。點知原來成隻船都無乜野玩。大部份都賭賭賭賭賭。我去過咩地方呢:有個泳池﹐冬天唔開。有個按摩中心﹐睇來幾污糟。有幾個「俱樂部」﹐全部都係賭檯。有個電影院﹐無電影放的。有個「活動中心」﹐無活動的﹐得幾本張小嫻的小說借。有個「遊戲機中心」﹐無野好玩的﹐玩一鋪「料理大師」要HK$ 7.5﹐街霸第一代都要 $5。有個「兒童活動室」﹐無兒童的﹐佢話唔歡迎廿幾歲小朋友喎。Deck上有一個觀景台﹐半夜三更無野睇的﹐中心風力達至十級﹐連眼鏡都要用手指夾實﹐四周漆黑一片﹐絕對係跌左落海都無人知﹐跌到落去呢個又大又黑又凍的南中國海﹐實死無生﹐簡直係殺人滅口毀屍滅跡乾手淨腳的好地方!

係咁多架咋﹐其餘的統統都係賭場。睇來呢隻船的主要目的 / 收入來源都係賭場….

有 N 咁多個唔同型式的賭場﹐輸晒你副身家都未夠鐘食宵夜。

係失望到震的情況之下﹐唯有番入房去睇有線新聞台…..

到底我做緊乜野….雖然話呢間房係慳左好多錢可以住到一間叫做大的房 (其實都係一間極細的房)﹐但係都無奶油悶到咁架!

睇左兩個幾鐘電視之後﹐又到左十一點幾﹐就係宵夜時段的開始喇。又係食。

今次係食一間叫做「名廚」的 Canteen 式自助餐。坐低之後去睇下有乜野食﹐希望佢呢間大咁多應該會有多好多野食啦。點知…原來宵夜時段可以食的野仲少…我幾乎數都數得晒

有個粉麵檔﹐只有一種粉麵就係榨菜肉絲河﹐米粉都無。兩種粥﹐白粥同有蕃薯的粥。我不左一碗白粥加雪菜﹐d 雪菜難食到不得了。下一碗加「豆豉鯪魚」﹐罐頭總有質素保證。然後其他熱盤都不堪入目。成個宵夜我都淨係食豆豉鯪魚撈粥同埋比較能入口的滷水雞翼。之後再無食過野。第二朝連早餐都唔想辛苦自己。總括來講兩晚的「美食」之旅我會俾 0.5 分﹐總分係十。果 0.5 分唔係因為佢有乜野好食﹐而係因為果d 野係船上唯一的食物。我可以選擇俾錢食其他野的﹐但係唔使錢的都攪成咁﹐要俾錢的又會好得去邊?同一個廚房出架喎。

之後的時間﹐都係係房度睇電視….係睇我屋企已經有的有線電視。天呀﹐我第二朝仲特登請左一日假來去玩架嘛﹐點解會咁樣架。我覺得好似騙案。唯有不停咁同自己講「好貴架呢間房….好貴架呢間房….」

結論:貼錢都唔會再去



p.s. 所謂的泰國餐食到我地兩個都肚痛﹐一食完就唔舒服﹐一直唔舒服到第二晚.....

p.p.s. 雖然係 $550 包晒兩個人好「超值」﹐但係我落船的時候仲邊有面目收番阿 Kev 的 $225 先得架﹐你話呀...昆埋其他人一齊陪我做羊牯......我真係唔好意思到震呀....

Friday, December 15, 2006

Two Explorers

While I was searching for CUHK in the Wikipedia (one of my favourite sites), I clicked through the hyperlinks and found that even "Happy Corner" has an article for it.

Curious enough, I went inside and found a joke that was claimed to be popular among Taiwanese military and students (when performing their version of Happy Corner).

Two explorers landed on an island full of cannibals and were caught. The tribe chief asked the explorers to choose between death penalty or "being snapped on the penis with a rubber band". The first explorer thought there was nothing worse than death so he made the second choice. The second explorer, hearing the horrid screaming of the first explorer from the torture, chose death. However, the tribe's death penalty was "snapping the penis with a rubber band until death".

---OH DEAR.....I don't know whether I should laugh or not

梁啟智﹕請聽天星請願者說幾句話

梁啟智﹕請聽天星請願者說幾句話

(明報) 12月 15日 星期五 05:05AM

【明報專訊】佔據舊天星碼頭的請願者被驅離後,出現了一些頗為冷眼旁觀的評論,認為他們不該生事。在過去的數天,筆者雖然只能在碼頭圍板之外聲援他們,對其熱情和信念卻絕對支持和尊重。眼見 請願者曾在冷雨寒風之中苦苦熬了超過24小時,有感必要為他們討回一點公道。

首先,請願者的出發點絕非僅僅是懷舊,而是要突顯拆卸工程的不公義,提出公眾參與城市規劃的可能。透過重奪天星碼頭,請願者成功帶起了議題,引發大眾追問諮詢過程期間的種種漏洞。警方膽敢在立法會仍在辯論之時強行清場,更突顯了政府是何等蔑視香港的民意代表。強政勵治的化妝,在眾目之下回復了橫蠻無理的真像。

請願者的行動和學界與政界的力量是緊緊相連的。他們的訴求不止於反對拆卸,背後更有學界和民間團體提出另類方案,也有議員在議會內外和政府周旋。他們以天星碼頭為出發點,最終關懷的是香港城市發展的未來。如果只是出於小資情懷,大概只需到碼頭拍照留念,又豈會站在推土機的面前?

請願者也並非只是關心天星碼頭。來自嶺南大學的陳景輝,其實一直在跟進灣仔利東街的重建。還有獨立媒體的朱凱迪,也為裕民坊在報章寫了不少評論。重建區的街坊都認識他們,有的更親身來到天星碼頭現場支持。如果質疑他們「忽然」站出來,便實在是和事實不符

那麼為何請願者要到這個時候才抗議?其實他們一直都在抗議,只是政府充耳不聞。8月20日的保天星遊行,這次的許多請願者都有參與,筆者可以作證。在此之前,一直有民間團體批評政府假諮詢,把通過規劃大綱圖和拆鐘樓混為一談。倒個頭來,我們也必須反問,如此重要的地標需要拆,政府竟然以一籃子式諮詢來蒙混過關,可恥的到底是誰?

此外,也別忘了不少的請願者都是大學生,也就是說,城規諮詢之時他們還是初中生。今天他們發現了問題所在,便立即義無反顧地站出來。我們作為成年人的,自己許多年來也甘心當一個旁觀者如果現在還要譏笑他們後知後覺,又是否有點兒不講道理?

突顯拆卸工程的不公義

最後,請願者選擇以「人民重奪天星」來表達訴求,實是迫不得已之舉。政府要快刀斬亂麻的方式拆鐘樓,企圖製造既定事實。如果他們沒有進駐工地,不用兩三天整個地方便會被夷平。他們的付出,為議員為傳媒換來了寶貴的時間

在整個抗爭的過程當中,請願者也堅持了和平理性,沒有使用過任何暴力。回想60年代美國的平權運動,也有黑人進佔白人餐廳不肯離去。他們所佔的座位最後被送到美國歷史博物館,紀念人權之可貴。兩代人遙遙相應,請願者雖然選擇了公民抗命,但在強權的面前卻肯定合情合理。

相對於白人餐廳的座位,碼頭的主建築需然已被破壞,但是如果能立即停工,還可以把剩下來的變成香港城市空間抗爭紀念館,讓天星鳳凰涅盤。面對如斯政府,這想法確實是未免太天真,但做人如果沒有理想,「實在和一條鹹魚沒有分別」。

請願者的行動或者有不完善的地方,組織計劃也許有欠完備。但在批評他們之前,或者我們該先問一問自己,曾經為公義的城市發展付出過些什麼

Sony Robots Commercial



The first time I watch this commerical was on the AXN Channel in Cable TV (AXN is one my favourites). I was so awe-struck by the fabulous music, the concept, and the final transition from a robot to a man – the message Sony trying to convey.

It always is this final moment that reveals the whole plot of the commercial itself that catches the fascination of viewers to review it over and over again. I think it’s these almost-magical plot twists that makes a commercial from marvellous to masterpiece.

It is with my greatest respect and admiration to applaud these great designers. (Jesus Christ this sounds so crappy and cheesy....)

Thursday, December 14, 2006

天星碼頭啊!

鐘樓敲響民意障 諮詢決策須改革 (明報) 12月 14日 星期四 05:05AM

【明報專訊】房屋及規劃地政局(長孫明揚昨日在立法會表示,政府會在中區海濱覓地重建天星鐘樓,這個承諾,明顯有別於過去只答應將天星碼頭和鐘樓的特色,部分融入新海濱設計。我們歡迎港府修訂 立場,明確承諾遷址重建鐘樓,這應有助平息風波。

不過,港府處理今次天星鐘樓事件的手法,暴露了兩個值得檢討的問題:

(1)古物諮詢委員會和民政局,未能發揮反映和疏導民意的功能,埋下今次風波的禍根;

(2)問題浮現後,官員的態度過於強硬,處理反對意見人士的手法拙劣,激化矛盾。
孫明揚昨天的最新立場,與古物諮詢委員會前日的善後建議「不謀而合」,說明港府經過連日的風波,終於願意採納一個較務實的妥協方案。事後回看,若港府能在清拆碼頭前,就提出遷址重建方案,民間的反彈應可大為減輕。

總結今次事件,港府的手法有三大問題:

首先,港府雖強調在搬遷天星碼頭問題上做足諮詢,但官員對舊碼頭和鐘樓如何處置,作何種程度的保存,一直避重就輕,以致另覓地點重建的方案,得不到充分的討論;直至工程展開,市民才驚覺將失去這幢具有歷史價值的建築物,自然對政府有所不滿

其次,孫明揚昨日已準備向公眾作重建承諾,滿足保存集體回憶的訴求,但他早上卻拒絕與立法會議員見面和討論,最後竟發生議員跑到政府總部,乘孫明揚召開記者會時,當面逼他開會的荒謬場面。政府既深信自己有道理,何不理直氣壯地與議員討論?

第三,港府願意承諾覓地重建鐘樓,本來正好為解決包圍天星的示威者提供下台階。可是,正當孫明揚準備在立法會宣示最新立場之際,警方卻急不及待在天星碼頭強行清場,時機極不恰當,亦容易令市民得到錯誤信息,以為港府一意孤行,完全無視示威者的訴求。

天星鐘樓事件還突顯一個結構性問題──港府的決策過程,未能有效吸納民意。孫明揚昨日說,若民間早一年提出保留碼頭和鐘樓的討論,港府會有更多的空間。我們認為,港府也應反問自己﹕為何這個觸動市民的問題,在一年或更早之前未被提出?

在鐘樓存廢的問題上,古物諮詢委員會扮演關鍵的角色。可是,從公眾的反應可見,委員會在判斷和反映民意方面明顯有缺失。由2002至2006年,委員會一直未能帶領社會作理性務實的討論(例如舉辦公聽會,蒐集市民對搬遷天星碼頭的意見),更甚的是,直到前天鐘樓要動工拆卸了,委員會才公開表態,要求覓地重建,結果令港府和委員會都很狼狽。古物委會員的成員應深切反省,是否有負市民和政府所託?

香港的公民社會日漸成熟,現行透過諮詢委員會吸納民意的制度,成效備受考驗;今次天星鐘樓事件,為港府吸納民意的機制敲響警鐘。為提升管治質素,港府必須審視各諮詢委員會在決策過程中的功能,作出修補,避免重蹈覆轍。

Wednesday, December 13, 2006

風雨飄搖跑馬地

之咪就係喉嚨痛完一大輪之後就病﹐之嘛!

星期二﹐真係喉痛似火 (及早撲滅)。短短一個下午我飲左 2L 水 (有得計架因為我係公司飲水係用水樽唔用杯....因為我飲得太多喇平時﹐費時出出入入咁多次)﹐但係一d 都消唔到我的「喉痛似火」。

終於都挨完一天﹐第二朝起身的時候已經覺得有唔妥﹐於是就索性請假...反正都唔多野做。

一訓就訓到一點幾﹐真係爽。但係唔知係唔係真係開始病的關係﹐訓咁多都仲係覺得勁累。起身食左碗叮叮粥﹐打左陣 MHP﹐就出發去銅鑼灣。

可能係銅鑼灣番工﹐出入得太多﹐無左個種「我要出 downtown」的心情。Anyway, 趁下午時間﹐當然係食番個我最愛的下午茶餐 - 吉野家啦。

之後見自己無咁病﹐又見時間有剩﹐上完去世貿睇人行個圈睇人打機之後 (係睇﹐無錢打)﹐就搭左一程叮叮入去跑馬地。

其實一路都想入去跑馬地探下路架喇。一來覺得呢個地方好似同銅鑼灣好近但又好似好遠咁﹐好奇怪。二來就係知道呢度好多寵物店﹐多人養狗。三來就係因為聽聞呢度都幾多好野食﹐於是就....就係咁囉。

入到去又落大雨﹐於是唯有犠牲我親愛的 Levi's 牛仔外套擋雨 (外加一份 recruit V 字型咁搭係頭上面勁樣衰勁似阿伯)。行多一陣﹐就見到傳說中的彭慶記!

跑馬地都幾多寵物店﹐但係唔係我想像中咁「繁盛」。可能因為天雨關係亦唔見有人放狗....唯獨係見到一間花店裡面有兩大隻金毛係度守門口﹐趴係個地下度好無聊的樣子﹐勁可愛。

之後就一路行番出銅記﹐地鐵回家。

p.s. 估唔到跑馬地咁多車﹐咁鬼嘈...又多巴士﹐又多小巴﹐又多的士﹐咩車都多﹐車流多到呢...一d 都唔似豪宅區...

Tuesday, December 12, 2006

墨攻 電影版




起初都係抱住「睇下」的心態來睇﹐估唔到出到來的 outcome 幾好。

只可惜﹐有頭威無尾陣﹐中間一度守唔住﹐劇情同劇力都有崩潰的地步。

全場最有睇頭的一次一進攻﹐做得幾好。同 Hollywood 比﹐比唔上。同中國電影比﹐有餘矣。

p.s. 我未睇過漫畫版﹐但睇完戲之後都引唔起我的興趣去睇佢的漫畫

我俾75 分啦

Highlight: 梁城攻防戰 and 逐步腐敗的梁城

Wednesday, December 06, 2006

香港人人愛打機

香港大學民意研究計劃「市民對玩遊戲機行為意見調查」結果公佈

2006-11-07 更新

由鍾庭耀博士負責的香港大學民意研究計劃於今年八月進行了「市民對玩遊戲機行為意見調查」,透過電話成功訪問了510名15至40歲的香港居民, 收集時下青年玩遊戲機的行為習慣、對遊戲機種和遊戲類型的喜好、及其消費模式等之意見,其中發現:

A. 香港遊戲機市場前景秀麗,一百廿萬港人每日都打機,每年有關消費市場超過百億元

由於經濟環境改善,消費意欲增強,調查顯示,香港人每個月每人平均花費127元在玩遊戲機方面,包括電視遊戲、手提遊戲、遊戲機中心打機、相關書刊及精品等,每年有關消費市場逾一百億元,反映香港遊戲機市場前景秀麗。

對比2002年8月,AMI泛亞市場資訊有限公司有關遊戲機市場的意見調查,當年遊戲機市場為70億元,上升了30%,增長迅速。

B.

港人至愛 “PlayStation 2”香港售出140萬部, 加上第一代 “PlayStation”, 市場佔有率高達93%

三大電視遊戲主機中,“PlayStation”仍然是最受歡迎遊戲機平台,香港市場佔有的份額為93%,其餘逾140萬香港人擁有 “PlayStation 2”,其次是 “PlayStation” 的第一代遊戲機 “PSone”,該公司這兩代遊戲機合共的市場佔有率為 93%.而微軟Xbox 及Xbox 360共佔5%.

對比2002年8月,AMI泛亞市場資訊有限公司有關遊戲機市場的意見調查,當年 “PSone” 連同 “PlayStation 2”的市場佔有率為72%,該公司市場佔有率增加了21%.

C.

港人不愛本土遊戲, 大部份偏愛日本遊戲

60%的受訪者表示最喜愛的遊戲是日本遊戲, 其次9%為歐美遊戲。

本港雖然大力推動數碼工業, 但成績不及台灣。6%港人喜歡台灣遊戲, 但只有4%選擇本港遊戲。

D. 港人 “有壓力”, 靠打機可消閑減壓, 識朋友, 訓練思考

調查顯示,電子遊戲已經成為年青人的時尚消遣.在15至40歲被訪市民中,超過四成都(網站 - 圖片)是每星期甚至每天打機數次.四分一的15~20 歲被訪年青人每天 “無機不歡”, 每天都要打機, 而結識朋友更是近一半年青機迷的打機目的之一。

但另一方面, 77%市民都認同打機可以消閑減壓, 調劑心情, 十分有效。64%認同打機有助訓練思維, 邏輯思考。

鍾庭耀博士最後表示:「調查顯示, 電子遊戲已成為年青人的時尚, 而且可以消閑減壓。如果香港遊戲業界和教育工作者都能抓住市民的訴求, 好好發展電子遊戲的優勢, 和教育市民如何避免沉迷遊戲,整個社會都會有所得著.」

E.

男女打機習慣不同

45%香港男性都有購買過翻版遊戲碟, 但香港女性90%都購買正版遊戲碟。香港女性比較喜愛玩簡單的手提遊戲機, 比例較男性為高, 9%女性都有玩NDS, 7.6%女性有玩PSP, 而男性主要玩較為复雜的家庭用遊戲機 (27%玩PS2)和24%玩電腦遊戲。

小小遊戲機 大大有市場

(全世界遊戲機銷量統計, 資料來源: 2006年11月3日 “The Wall Street Journal”)


平台 總銷量 市場份額
PlayStation 102,500,000部 42%
PlayStation 2 111,300,000部 46%
Xbox 24,600,000部 10%
Xbox 360 6,000,000部 2%

Tuesday, December 05, 2006

印度女星銀幕接吻被控淫穢罪

印度女星銀幕接吻被控淫穢罪

(星島) 12月 05日 星期二 03:31PM


印度(相關新聞 - 網站)寶萊塢(Bollywood)著名女星、前世界小姐艾絲維亞莉 (好靚女架!),和男星希特力羅山(Hrithik Roshan)合演的電影《Dhoom 2》,因為在銀幕上有接吻鏡頭,而惹上官非,遭當地一名律師入稟法院起訴。


印度中央邦律師德維威迪上周入稟法院,指兩人在片中的接吻鏡頭貶低了印度女性的尊嚴,教壞印度青少年。他指出,那個鏡頭令其感到厭煩,因此以「公共場合淫穢行為」的罪名,向法院對兩人提出訴訟。法院已答應在下周一展開聆訊。 德維威迪說:「那些寶萊塢演員正在使各種粗俗行為在整個印度社會蔓延開來。普通的印度家庭根本就不可能去觀看這類電影,他們有的時候簡直俗得不堪入目。」

法律專家指出,幾乎可以肯定法院最終會推翻此案。但官司突顯出印度的保守觀念和西方電影界大相逕庭。

===============

無野呀~~~~~?!?!?!

!£)$*(&"£$~@@<~>??{!"£^&*)_!..................

Urban Ninja


撞鬼...我番工就係係度睇 Youtube....

類似的片我好耐之前已經睇過

佢地通常都係練得好勁﹐好似呢個 video 咁樣。我初初睇都真係呆晒。依家再睇番﹐依然係呆晒。

因為個種 balance & muscle power 係要好強﹐弱一邊都做唔到。

係美國﹐佢地呢d 都幾多人鐘意做﹐而且仲有一個共通點就係要做得靚。As you can see from the video, 佢地練除左係因為自己鐘意之外﹐仲要用來做 stuntman。電視電影中的打鬥﹐飛簷走壁都係搵佢地來做 - 咁當然個「美感」就會變得相對地重要。

我都想學到咁勁添....

Enjoy

Monster Hunter Portable 2nd Trailer Video

Release Date: 22 February, 2007



OH MY GOD......

Beautiful Coca Cola Commercial



Yes, this is the one that you HK people watched on the TV some time ago, and this is the full version of it (though just one minute).

I love the concept of this commercial IMMENSELY. And the music, and the graphic effects, and basically everything. The control on the mood and flow is very good. Brilliant ad.

Sunday, December 03, 2006

城門乾塘 + CPK

非常失敗地遲左起身﹐於是就錯過左一個非常之好的陽光。

城門乾得好緊要﹐我同 mark mark 就飛奔落去﹐諗住幫佢整番一輯靚仔相﹐點知....部相機唔夠勁﹐好黑 =_=

夜晚帶屋企人試下 CPK﹐佢地都話好食﹐咁就好喇。

忽然發覺屋企人肯多出街陪我食飯喎...奇怪喎...平時老豆老母唔鐘意架喎...

Friday, December 01, 2006

北美PS3距離40萬出貨目標仍需努力

北美PS3距離40萬出貨目標仍需努力
2006-12-01 更新


近日,美國科技調研公司發表了關於北美PS3(網站 - 圖片)出貨的調查和分析,結果顯示PS3在北美首發時的實際出貨數量只有12萬5千~17萬5千台左右,其中約有15000台PS3被送往各地供展示和試玩之用。還有,此分析數據與PS3首發前專家預測的數字基本吻合,但和SONY官方所預計的出貨量則相去甚遠。

早在PS3在北美發售前,SONY官方曾保證出貨數量至少會有40萬台,但按照目前的情況來看,實際出貨量能否達到此數目仍然令人擔憂,該分析更指出PS3在年底前的出貨量將沒辦法達至200萬台,意味著SON很有可能無法實現當初制定的計劃。

雖然至目前為止,PS3的實際出貨數量仍未公開,但相信將會有更詳細的數據在日後公佈,而且估計SONY將於不久後的財政報告中公開有關數據。

=================

感性上面我今次會支持 Wii 而唔支持 PS3﹐因為 PS3 真係太無創意喇...

...咁其實PS3 又唔係完全無創意的﹐如果有留意開佢地開發進度的朋友都會知道﹐佢地初初推出來的原型 (prototype) 係一部銀色的機﹐樣子跟現在的黑色機幾乎一樣﹐但手掣就精彩囉...係一個大 「U」型 或 「回力鏢型」的手掣。試問咁的手掣點打機?惡評如潮就必然架喇

咁岩呢個時候呢﹐Wii (當時仲係叫做 "Nintendo Revolution" 因為 Revolution 係佢地的開發行動代號。 我就覺得 "Revolution" 型好多)就推出左鼓舞人心的消息 - 佢地部新機的賣點會係一個感應 movement 的手掣﹐仲會有個喇叭仔發聲。

就係呢個時候!Sony 又再行錯棋。佢地宣佈決定用番同 PS2 一模一樣的手掣﹐大家都好開心因為覺得咁先係 make sense. 但係﹐佢地會加入 SIXAXIS (6-Axis) technology, in which there will be "motion sensing" capabilities in their controllers. 換言之﹐即係除左按掣之外﹐仲可以向 3D 空間的 3 條 Axis 六個方位移動........講咁多野﹐咪即係俾人一個感覺佢係抄任天堂架囉!

正所謂流年不利獲獲金。呢個時候的 PS3 (and Microsoft, too) 就俾一間專門開發 motion sensing & haptic technology 的公司 (Immersion Corp.)告佢地﹐話佢地的遊戲機手掣抄襲!Bill Gates 就庭外和解左 (應該係錢作怪)﹐Sony 就死頂﹐但節節敗退。最壞的可能性就係輸官司﹐in which Immersion Corp. 的其中一個條件會實行 - 即時停售所有 PS 1, PS2, PS3 所有有震動功能的手掣!

玩過 PS2 的朋友肯定會知道咁樣係幾大件事。無 DualShock 功能的手掣﹐仲可以有咩趣味?

Sony 有見及此﹐決定抽起新 PS3 手掣的震動功能﹐聲稱咁震法會影響個 motion sensing 的能力。Immersion Corp. 話呢個技術問題好多年前已經解決左﹐Sony 真係搵野來講; 任天堂無出聲﹐但係佢地的 Wiimote 係兩樣功能都有﹐亦 so far 未聽到會影響......咁 Sony 的理由﹐醒目仔一聽就明晒啦。

Sony 見勢頭不對﹐就重新 remind 大家佢地的 PS3 的影音功能都係冠絕行頭的。連 hardware 的部份 specifications 都公開﹐話俾大家聽我地粒 CPU 隨時勁過你地屋企部電腦幾部加埋。仲有比 DVD 強得多的 Blu-ray Disc technology, 樣樣野都係 state-of-the-art。龍頭地位勢頭強勁。

於是大家睇完個 spec 就話:咁一定好貴。而事實都係。香港的行貨「基本版」賣 HKD 3158, 已經係全球最平。 Wikipedia 有個 list, 裡面話賣得最貴的係 Denmark (咁岩的)﹐基本版的售價係 4295 Danish Krone。粗略兌換率 1DKK: 1.4HKD, 咁就會係 HKD 6013! 嘩!~~~無野呀!賣到咁貴﹐下次我老闆話要番老家的時候叫佢帶番幾部PS3過去﹐一轉手五五分賬我都分到千幾蚊@一部機呀!(發錢寒中)

講番任記﹐真係好鬼衰﹐總係識得睇時機講野...

Nintendo 係呢個時候就話:我地的主機會賣得好平 (唔記得幾錢)﹐而且 3rd Party games 都唔會貴過 USD 50.

我仲記得佢主席話過:之前遊戲機的風氣係就算係一d 好 mini games 的遊戲﹐都附加一大堆無用的野﹐然後賣到好似年度大作咁貴的價錢。咁樣係非常差的風氣﹐我地想一家大細都玩到﹐所以會 blah blah blah...

贏晒。 (註:但到目前為止世界各地 Wii 的售價依然極度不同﹐唔知咩事)

所以唔可以怪 PS3 一開閘就溜後﹐因為佢之前的「做勢」反而係「做倒勢」﹐PS3 最錯﹐就係錯在佢開發一樣大家唔多關注的野:影音質素。而成個 gameplay experience 係點﹐反而變成其次。

前兩日我睇人 demo PS3 Ridge Racer 7。係好靚﹐但係係遠景靚﹐近景無乜特別。

不過一切都言之尚早﹐Wii 的玩味性再高﹐唔出多d 好玩的遊戲都係拿唔到個 market share﹐到最後都會變成果隻成龍出的 game 咁樣﹐一味郁身郁勢﹐但畫面奇差﹐或者似 N64 同 NGC 咁埋沒左; 至於 PS3, 如果佢能夠好似依家咁壟斷晒個市﹐得到咁多 game developers 的支持﹐佢賣得再貴都會有人買。

任記仲未算正式攻入香港﹐且看07年上季 Wii 推出正式行貨時﹐兩皇交鋒鹿死誰手。

睇番 18 Feb 2003 日記後感

一路執個 Blog, 一路睇番自己以前寫的日記。

除左開頭某幾篇日記真係好難頂 (超級極度難頂﹐有機會再講) 之外﹐原來一路睇番自己每日做過乜野事都幾好睇 – 原來以前大學的生活真係好多姿多彩架喎﹐我都唔知添。衣家番左工﹐變左好多﹐每日都係差唔多的行程﹐悶到連講都唔想講。

仲有就係﹐乜我以前d體能好成咁的?成日都可以係中大跑上跑落咁的…UC 落 Shaw, Shaw 上 NA, NA 落CC, CC 上本部…..嘩….講到好似無野一樣咁的?乜我以前咁 fit 架咩?

早知係咁果陣時就 join Gladys 一齊「毅行者」啦~~~ 依家呢副咁腐爛又咁生銹的體格﹐真係行快步都虛脫死