Sunday, June 29, 2008

眼鏡 88 的專業服務

拿﹐咁話說啦 bor

我個眼鏡戴左成年﹐個鼻托 sir 晒落來﹐幅眼鏡好易變成阿伯戴眼鏡咁跌晒落來﹐而且都黃 gum gum , 所以﹐就諗住去整整佢。

呢個星期日行街到半路﹐見到眼鏡 88, 就一於入去﹐反正我幅鏡都係係眼鏡 88 度做的﹐而且佢地不嬲 service 都好好﹐信得過。

問佢調較 and 換鼻托使唔使錢﹐佢話唔使的。我話哦﹐好。佢收左我幅鏡﹐我就呆坐。

我無留意佢做咩﹐淨係擔天望地。跟住佢拿住我幅鏡番來﹐佢話﹐個鼻托斷左。

我望望幅鏡﹐個鼻托果條電線咁幼的鐵﹐斷左。我唔知咁即係點﹐我話「哦」﹐so?

佢話﹐我幫你睇睇可以點。

當時我完全唔知個問題有幾嚴重。

攪左一大輪﹐我等到有d 悶﹐問佢其實依家做咩事 (真係囉命我依家先去攪清楚到底乜野事)。佢話個鼻托斷左。

俾著你﹐你會問咩?

我好自然咁問﹐點解會斷的?

佢無出聲。

係咪你幫我整的時候整斷的?我再問

佢先至話係

我當堂係 --> !!!!!!!!!!

唔係呀化, 換個鼻托仔咁大把咋喎....

我已經唔想理﹐叫佢:咁你整番好佢啦

佢話﹐呢d 整唔到架﹐無得整。

我開始覺得有唔妥。「咁即係點?」我問得明確d。

我幫你睇下可以點。

又等左好耐好耐

佢番到來﹐都係無實質答案俾到我。

我又問﹐咁依家點呀

佢就勁囉﹐佢話

依家我都係唔收你錢幫你做呢樣野架者。即係...我都係免費幫你做架咋...我係唔收你錢架...整爛左你幅鏡我都唔想架...我都唔想見到呢d 事發生架﹐咁但係唔發生都發生左啦咁點者...

嘩﹐老實講﹐佢講到大意上係「呢個 service 係免費」的果句﹐我已經火都來埋。之後的句子有幾「火上加油」﹐我諗你見到佢個 L 樣會更加明白我當時的感受。

事情就係﹐我拿個眼鏡去俾你整。你整一整就整爛左我幅眼鏡。你無道歉之餘﹐亦渾然唔當係一回事。你唔重視整爛我幅鏡係大件事﹐亦唔覺得整爛我個眼鏡係你自己的問題﹐仲來一句「我都係免費架者~」來推卸責任。你唔負責任已經夠衰﹐都要絲絲叔叔唔肯俾我知。你越掩飾呢件事就越令我唔滿意﹐仲要我三番四次追問你先講。我追問完﹐你都仲未肯俾 solution 我。我開到聲叫你俾個解決方法我﹐你竟然答我「免費」呢個 concept﹐唔負責任之後竟然係將成件事推番落來我身上!

難道係因為我無俾過錢﹐所以就整爛幅鏡!

ok 咁樣講的確係有點兒強詞奪理﹐應該話﹐你咁講係乜野意思

難道因為呢個 service 係免費﹐所以你就可以大安旨意地做得馬虎?
難道因為呢個 service 係免費﹐所以你做錯左事都可以唔使認?
難道因為呢個 service 係免費﹐你就可以整爛我幅眼鏡之後仲愛理不理咁?
難道因為呢個 service 係免費﹐我就唔 entitled to 任何賠償?

喂﹐唔係咁架下嘛!

基本上我已經好火﹐但我覺得自己讀過下書﹐唔可以咁樣發晒癲咁發火。應該話﹐我可以﹐但我唔想﹐因為咁樣只係令我形象破產 (諗諗下我又好似無形象 value 架喎其實....)﹐同埋最緊要係﹐對住呢d 咁樣 H 口 H 面的人﹐我再發爛炸﹐對成件事都唔會有幫助﹐尤其係對住呢d 咁蠢的人。我一生人最怕的唔係又蠢又善良的人﹐而係又蠢又惡又死性不改但又係度阻左 (我)個地球轉的人!

咁我既然唔想發爛炸﹐又唔想浪費時間同埋心血係呢個咁難頂的人度﹐我就索性將自己個 mind tune 到「理性解決問題 irresponsive to the person」模式。

我捉一個小姐來問﹐你地呢度究竟邊個先至係 manager? 唔該幫我搵個識得 customer service or at the very very least PROBLEM SOLVING 的人來同我講野啦, PLEASEEEEEEEEEEEE!

佢的眼神望望那位人兄。原來我一直都已經 dealing with 成間舖最大的那個。阿 manager 呀話﹐真係幸你個會。

我主動問佢﹐咁你有無得痴番上去呀...?

無。

咁你有無第二幅一模一樣的﹐換過塊鏡片就攪掂呀....?

我 check check....(半個小時蚊都訓之後)....係鑽石山﹐但唔知係唔係真係有﹐定係 display﹐定係倉﹐定係....

咁你會唔會幫佢依家 transfer 過來呀?

唔..................得

咁有無同款或類似的款的第二隻色........總之係呢塊鏡片可以 fit 到的呀?

我 check check......(又係超勁耐的半個鐘之後)....有的

係邊度?

東涌

咁附近呢?

最近係....等我再 check check

唉你唔使 check 啦﹐你幫我係度揀啦﹐依家呢間舖頭有無現貨 fit 我對鏡的?

你呢隻我地一早賣晒啦

(妖你老....)

我再幫你問問 (又一段好很長的時間)

我問過上頭啦﹐佢話可以俾你退番呢幅鏡的全費﹐用來依家買一幅新的鏡。

咁要幾耐?

兩日。

(咁至係答案架嘛大佬呀)

之後攪左一大輪﹐終於我要去到另一間分店度做。果面的 manager, 好得多。



打完呢篇野﹐我都覺得好累。咁樣就俾個蠢過豬又寸爆到無輪的 manager 浪費左我好好的一個星期日﹐真係諗起都激心。

4 comments:

Esaltato said...

我早兩日係pizza hut都遇到單幾過癮,同你分享下。

咁話說, 同個朋友去食lunch, 一路都冇問題, until叫個apple pie做甜品。叫0個時已經1點半,咁朋友要返3點鐘, 諗住2點食完就趕得切返工。咁到大約搭九, 已經唔對路, 就叫位小姐黎跟跟單啦。咁小姐話:唔好意見,大約3分鐘就得架喇。咁ok啦。又過左1-2個字,想再催既時間佢就行埋黎話:唔好意思呀,要等多10分鐘。咁我問:係唔係你漏左單呀? 心諗如果漏左單就cancel啦,費事等。
咁佢就懶醒話:唔係,只不過廚房整漏左野落個apple pie度。咁我仲笑問佢係唔係落漏左d apple。0個時已經1點搭十搭十一, 我朋友已經火都黎埋, 就叫個manager黎啦。
又等左5分鐘, 阿ger黎到問咩事, 咁我朋友一黎就首先叉佢點解叫佢過黎都要等咁耐。之後就講返單野啦,其實開頭我地都唔知佢地係漏單定乜。點知阿ger自己自招, 話係漏左單, 仲慢慢地一五一十話其實個同事有入單, 但係唔知點解又冇左喎, 廚房又收唔到喎。仲話其實個同事咁做好嚴重。
咁事件就白熱化喇, 咁當然,我地唔想知究竟你地既processing係乜邊個錯,而家個point係我叫個dessert, 等左30分鐘, 冇得食, 個小姐一路講大話都話整緊落漏野。咁阿ger話一係送第二款唔知咩野雪糕比我, 一叫就有。咁其實已經好趕時間, 就好明顯咁爆左佢一句:我side左30分鐘係你個同事既大話上,而家唔係你比咩我就要食,你同我係張單度做"adjustment"啦。咁其實都obvious啦, 明顯叫佢比個discount啦。咁佢返轉頭,話:我幫你void左個apple pie架喇。我朋友火都黎埋話:梗係要void啦, 我都冇食,唔通你要我比錢呀? 阿ger真係傻傻地,最後見我地火哂滾先話比個8折。

其實都幾搞野。你話我地搞大件事又得, 話佢地唔識handle又得。幾過癮。

呀, 仲有一單laundry services。洗左8鎊幾返黎得3鎊, 唔見哂d毛巾。咁我地去理論, 佢話係唔見架喇,我係d批發幫你買返,你要唔要丫? (心諗批發毛巾用左會唔會生野,講真,我唔見0個d毛巾逐條計都幾金)咁我地話成件事都未搞清楚就就話買返比我。咁我唔接受啦。咁佢就懶死話咁冇辦法,唔係我唔負責,係你唔接受。你去告我啦。個樣仲招招積積。岩岩有阿sir經過, 咁即刻搵阿sir啦。阿sir又係推比消委會。咁我話,如果我去洗衫, 咁d店員鐘意左我件名牌衫, 唔知偷左定唔見左啦, 就話求其買返件菊花牌比我當賠償,咁係唔係都得。咁阿sir話,呢d係漏洞黎架喇。即刻O哂咀,個老世仲擺出招積樣。最後我都搵埋消委。唔知點解而家D SERVICE 可以咁。

Asa said...

既然你同你朋友都講開, 等我都講一單發洩下

話說早一排我要幫我屋企人錄nba, 咁我屋企用開cable tv, 有個function可能你都知, 係可以睇到未來兩三日有d咩節目, 仲可以預校定到時轉去某個特定的台。咁我錄到臨尾幾日無哂d節目表, 佢公司個電腦可能有technical problem或者d staff唔記得update個節目表, 我見過左一兩日都係咁就打去佢customer service問下, 因為平時d staff就算唔記得update都唔會搞一兩日咁耐。

我打左好多次之後終於都通, 再㩒一大堆制之後, 終於有個女仔聽, 我就同佢講個問題, 其實我只係想知個原因同等佢公司知道有問題拿拿淋整好佢, 即係如果係technical problem就唔該搞搞佢d電腦, 如果係未update就當然快d update返。真係...........頂佢, 我同佢講左幾次, 佢都係唔明我問咩, 仲好似以為係我錄影機有問題錄唔到野, 我同佢講左n次唔係咁, 佢都當我死, 仲成日叫我等等, 一等就幾分鐘, 之後就返黎教我"校"佢cable個解碼器, 我心諗, 如果我唔識"校"我又點會發現"校"唔到呀, 咁佢發現唔係lee個問題又叫我等等, 每次都叫我等幾分鐘, 然則返黎講d我一早就知但同解決我問題毫無關係gei野我聽, 我聽多幾次就發現佢係拎住本說明書同我講野, 佢始終都係認為我唔識"校"部機而唔係佢公司電腦有問題, 最後一次仲好笑, 佢叫我將個電視重新追過台, 根本就同我部電視一d關係都無, 我部電視睇到佢有線個台, 只係個畫面出左d錯gei information, 佢竟然叫我追台, 我同佢講唔關事佢又死唔信我, 仲串串咁, 意思即係我叫而家叫你做你就做la, 唔做梗係解決唔到, 我為左滿足佢都追左一次 (我都唔明點解我咁傻), 咁分明就解決唔到la。

由我打通電話都lee度都講成大半個鐘, 佢毫無意識佢唔會解決到我問題, 其實根本佢從來都get唔到我個問題所在, 最後就一野幫我約個師父上黎睇, 我明知唔關我部機事, 叫師父上黎都無野整, 但我為左唔想同個無知cs再講野我都約左, 佢連去check下幾點有師父上黎都check幾分鐘, 都唔知去左邊搞咁耐。結果個晚個師父上黎, 佢話原來係technical problem, 佢公司部電腦神左, 佢屋企都係咁樣。基本上一個幾分鐘就講完的問題, 個cs搞左我成粒鐘, 又要坐係屋企等個師父上黎, 就係為左個好簡單的問題, 我只係想搵個識野gei人同我講, 好心個cs自己咩都唔識就同我transfer去it dept, 就唔駛哂我 (or大家) 咁多時間仲火都黎。

梁巔巔 said...

A Look, 平靚正!

Levi HK said...

果間眼鏡 88 係邊?

我亦有同感,近年眼鏡 88 服務每況愈下
個人覺得亮視點服務有質素