泳季開鑼

泳季開鑼！

不嬲都幾鐘意維園個池﹐因為係"downtown"﹐夠晒方便﹐行過個維園就係銅鑼灣﹐行過維園對面就係中央圖書館。柴灣泳池都好﹐而且夠晒大﹐但係就真係比較「隔涉」。

星期五晚想游水﹐於是就不理氣溫驟降﹐走左去游水。一出地鐵站的時候其實都覺得有d 唔妥﹐點解咁涼的？頭先係屋企都唔係咁架﹐仲好暖下架喎…死火﹐d 水會唔會好凍呢？

入到更衣室﹐仲凍﹐直頭有d 想著番件風衣的感覺﹐寒氣好像悄悄的從四面八方偷襲過來。

有一個好好的 indicator 就是人數﹐加菲貓都有話「天氣一暖 d 傻佬就出動」﹐泳池都係同一個道理﹐天氣涼少少咋﹐人數已經激減﹐回暖番少少﹐就成個泳池都係人。

星期五晚﹐supposed to be 一個幾適合大家來游水的夜晚﹐平時呢個時候的摩利臣山室內池都仲有十幾廿人。

但今晚﹐似乎係五個人都無……我數均全場﹐真係得三四個人。一陣風吹過來﹐我更加驚一驚。「死火﹐係d 人未知維池已經開番？定係真係凍到飛起呢？」

換好泳褲﹐沖個身…拿﹐呢一 part 呢我就自問真係好有公德心的﹐我一定會沖完身先落水﹐唔會換完泳衣泳褲就飛奔落水。我最頂唔順其他人係﹐大佬呀﹐成身都係汗﹐有時仲可能成身都係香水古龍水汗水﹐然後個頭﹐又有髮泥髮gel, 跟住塊面﹐又可能有咩 cream 咁。跟住就跳落來喇。天呀﹐諗起都唔想游。

沖好身﹐行出去﹐一路上都無見到其他人﹐好似成個更衣室都係得我一個人咁。

行到出去﹐一轉角﹐就見到幾個「食蕉」坐埋一齊係度傾偈。個心已經涼一涼﹐跟住見到幾個救生員聚埋一齊傾偈﹐個心再涼一涼﹐跟住睇一睇池面﹐波平如鏡﹐一d 漣漪都無﹐再睇睇其他救生員的「高塔」﹐一個人都無……

睇睇個五十米大池﹐原來係一個人都無。Oh Shit…

眾位救生員見到明明可以大家吹吹水等放工﹐點知突然間走左條「磨碌」入來﹐破壞左佢地的美好時光﹐大家都死死地氣咁散場﹐然後各自回到自己的「高塔」之中。

呢一刻我的感覺﹐覺得好大壓力﹐好似攪到人地無得休息咁﹐但係諗深一層﹐其實佢都係無得吹水者﹐而且就算我唔游﹐佢都未有得放工住架喇。唔……要學識唔使自責。其實俾左區區十九蚊就有得包起成個泳池﹐係我好彩添。

跟住連慢動作拉筋都費時﹐人人都啤實晒咁﹐好醜怪架嘛。好彩之前係屋企拉左。落水。腳趾碰到池水的一刻﹐已經心知不妙﹐但係事到如今﹐無得番轉頭﹐死就死啦。收回腳趾﹐一野跳落去五米深的那邊﹐深水炸彈來啦！

好~~~~~~~~~~~~L~~~~~~~~~~~凍~~~~~~~~~~~~呀~~~~~~~~~~~~

天呀！好凍呀好凍呀好凍呀…… (下省一萬個「好凍」) 想像唔到竟然可以係凍成咁….簡直係…天呀好凍…簡直係都唔知自己想講乜野﹐個腦都諗唔到野﹐手腳再唔快快脆郁的話﹐就會凍到唔識郁！

時不宜遲﹐我急急地游﹐一游﹐水就開始從身邊流動﹐輕輕抹過身體﹐帶走更多熱量。就這樣挨過頭二百米。

後二百米﹐已經開始冷僵﹐動作越來越遲緩﹐而且開始進入熱身後的疲累階段﹐但因為身體已經熱過身﹐還可以。

再後二百﹐很疲累﹐很冷﹐棄蛙轉自由﹐以提升了的速度把神智帶回來。

再後二百﹐極疲累﹐開始進入 hang 機狀態﹐拉車情況嚴重﹐身體開始習慣水溫和運動量﹐但已經很累了。拉車…再拉車…還是拉車…之前看過電視節目﹐說如果進入低溫狀態﹐人的動作和思想都會變得很遲緩…此刻﹐完全了解。

幸好來了兩個小孩子﹐一邊嚷著「好凍」一邊玩耍﹐不再是自己一個人包場。

最後二百﹐以極「管 pea 」的方法但求達標地「游埋佢」﹐最後再加多個一d 都唔放鬆的 swim down 一百﹐補番之前每一池都偷左的幾米去﹐叫做有個交代﹐然後就拿拿聲閃人﹐好似廣播所講的「從速上水更衣」。

終於都可以係花灑下沖熱水的感覺﹐真係好幸福﹐好有 “I survived it!” 的感覺。

簡直想好似全智賢的可樂廣告一樣﹐用唔咸唔淡的廣東話講一聲「爽呀」。