Monday, May 14, 2007

香港人真該醒一醒

又話人地俾填鴨教育你﹐教得你幾唔醒目。OK, fine, 咁幾個大學生寫多少少野出來俾大家講下﹐就立即舉晒腳咁指控佢地「傷風敗德」﹐幾咁不容社會接受。

原來香港人話自己係國際大都會﹐有容乃大。統統都係假的﹐講就容易﹐一有人講錯少少野﹐就立刻喊打喊殺。咁同塔理班要d 女人都戴晒黑面紗有幾大分別呢請問。拿﹐唔好咁口快答我話「差好遠」呀﹐你諗真d。

之後又笑人地其他地方的性思想唔夠開放﹐又笑人地印度呀中東呀咁﹐係電視上面見到有親吻鏡頭都要入稟法院告佢地﹐咁樣的思想好落後。香港人﹐你地又有幾 open 呢請問?

咩叫做沖擊?沖擊就係講一d 平時無人講過的野﹐講一d 大家平時 took it for granted 的野﹐講一 d 大家都唔敢講的野﹐講一d 大家都遺忘了的野。若然講來講去都係 within 我地己知的範疇之內﹐咁講來做咩?仲有咩進步?有咩意思?

沖擊之所謂沖擊﹐就係要開啟大家的思想之嘛。但完全受唔起丁點沖擊的社會﹐同以前歐洲教廷燒死所有唔認同神的人一樣。尤其係果d 思想突破的科學家。

你睇下﹐呢個就係香港的教育喇。呢個就係香港的社會喇。你唔想再同呢幾百萬人一樣「倒模」出來的思想方法咩?你唔想再好似呢種咁膚淺的方法去探討社會咩?

無問題﹐如果你過得到出面咁多個日日睇「便利」睇「忽周」的人的話。


一方面﹐把口講到幾咁想有新思維﹐另一方面﹐有所謂少少的沖擊 to the 舊思維的框框﹐就立即響起 Red Alert。政府話要定罪﹐代表幾百萬思想比中東人更守舊的香港人抹殺你們﹐大學要警告要劃清界綫﹐最好你地自己話唔關我地大學事係你地班學生自己個腦亂諗野﹐校長要放棄學生自保﹐最好你地認埋錯等我平平穩穩咁份靚的政績﹐管理層要同學生斷絕關係﹐差在未講到出口「就當我地中大無收過你呢d 學生」。

呢個係乜野世界來架?!呢個仲係唔係我最愛的香港來架?!

5 comments:

Esaltato said...

大家討論下啦...其實可能只不過香港投訴風氣過盛。你睇之前欣宜係咁易出黎跳下舞唱下歌都即刻比人打電話投訴。香港人係咁架喇。假面具帶哂上面。好似你當面話人地個髮型樣衰時, 就會有其他人話你賤格口臭,但係0個d人又同意喎。唔知今次單野有幾多人睇完份報紙有埋性幻之後再投訴。
不過今次我亦都唔幫大學喎,學術地方其實係唔係有必要開一版情色版? 故且學生真係為左破封建社會,但係由學生自己答別人性問題的那一個環節又點解釋? 密實姑娘假正經仲衰過明目張膽喎。不過點都好,如果係有一個正正經經既topic黎討論都仲可以接受,不過咸故式的學園報似乎無必要。

Anonymous said...

我覺得而家事情己發展到離開o左道德,色情之類lee d意識型態上既問題.
要比較低級淫穢,報紙雜誌一d都唔會少
個個香港人都係日日睇lee d野o架啦
咁唔係雙重標準又係乜野?

點解大學生唔可以講色情?
不論佢地係咪真係有崇高既理想,定係只係愚蠢地譁眾取寵.我地總唔可以俾事情發展到要拉人封艇.
lee d事只可能係封閉既社會先會發生.

我都睇過o下出事既果編問卷,我既感覺係無聊多過色情.
如果唔係果兩個讀神學既人投訴,再俾d傳媒炒作, 根本就唔會有人留意.

Tommy said...

Esaltato:

其實你睇過就會覺得﹐佢地係寫得差的﹐呢樣﹐好難幫佢地。要怪就怪佢地d 手筆未夠黃霑等才子寫得既引人入「性」﹐又可以表面睇起來完全中立﹐學術。

唉。

佢地係抵鬧﹐但唔係因為放呢樣野係學生報﹐唔係因為拿呢様野出來講。而係因為﹐佢地 d 文筆太膚淺。寫唔出個「高級」而「正經」的感覺。

財務自由人 said...

我覺得係大學校園咪俾多D 空間佢地討論 lol ...其實佢地既讀者都成年啦 !

Blogger70th Floor said...

所見略同