SATCO 考試

話說去旅行之前就報左一個做 SATCO 的工作。全名係 Student Air Traffic Control Officer, 即係航空管制員的初哥。咁佢晨咁早就叫定大家讀書。但係因為我人在西班牙所以無時間去讀書﹐唯一可以做的就係搭係香港的親人幫手搵書。

番到香港先有機會睇睇封信。佢話要考四份 paper, 連埋d 執卷呀﹐講 announcement 呀﹐做無聊野咁樣的時間﹐都差唔多要成四個鐘頭﹐但其實「實肉」都係得兩個鐘左右。

第一份考 Basic Air Traffic Control Problem Solving。嘩﹐咁快就來？
第二份考 Mathematics and Logic
第三份考 Logic
第四份考 Numerical Logic

唔記得佢詳細的用詞係乜野﹐但大意都係咁。

到今朝早﹐又遲左起身。飛的士番寶馬山無問題﹐話晒都係自己的地頭嘛。點知都唔記得左自己的地頭其實只係限於山腳﹐上到上面其實係點樣都無來 idea。諗住去「桂華山」應該都好容易喇掛﹐同個的士司機講就係呢度喇﹐我記得就係李潤田同協同上面之嘛。

係架的士裡面望出來睇睇﹐咦唔係喎﹐點解唔係桂華山的？點解會係北角官小架？咁桂華山去左邊度呀？死火

拿拿聲再上山﹐原來更高﹐係閩僑對面。喂﹐原來差好遠路喎。簡直有愧於自己竟然係寶馬山叫做小混混左七年咁大把﹐真羞家。

去到﹐見到 Yolan 喎！我初初都見到佢架喇﹐但係真係好耐都無見過佢﹐真係唔敢肯定呢個真係 Yolan…如果我仲有佢的電話號碼的話﹐我一定會打個電話俾佢來 confirm. 但係我自從 Madrid 一役之後就無晒佢地的電話號碼﹐所以都無晒乎。佢後來打番俾我﹐咁先知。

考試﹐主要就係考四份paper。係 letter of invitation 上面﹐佢寫明頭兩份paper 係 simultaneously 咁考的。下？前後兩份 paper 點樣可以 simultaneously 咁考呢請問。但係佢無寫到係點﹐我就無理到。

原來﹐係咁的。

第一份 paper 係考 Basic Air Traffic Control Problem Solving. 第二份 paper 係考 basic maths concept. 第一份係 MC, 第二份係填簡單的答案。第一份係睇的﹐第二份係聽的。

就咁﹐當你做緊第一份 MC 的時候﹐你會戴住一個無線的 headphone. 咁耐唔耐呢﹐就會係個 headphone 個度有個小姐同你講﹐依家我會俾一條數學題你﹐我只會講一次﹐你要 jot down 個數學題﹐計好佢﹐然後填係 Paper 2 的答題卷上面。答完之後﹐就要繼續做 Paper 1.

就係咁﹐成個 section 的考法﹐就係當你係度做 Paper 1 做到火紅火綠的時候﹐佢就會突然間係耳筒度同你講「喂~~~又要計數啦喂~~~」然後你就死命咁抄﹐再死命咁計。然後擰番轉頭去做 Paper 1 的計數 and problem solving。然後你望番過來呢張一分鐘前先做緊的 Paper 1, 你就不禁會問

…我頭先做到邊…？

但咁都唔難﹐其實好多問題都好淺﹐其實俾多少少時間我一定做得晒。只係﹐我太耐無考過試﹐唔記得做 MC 的基本功就係﹐唔夠時間的時候應該要撞。枉我自命係香港數一數二的人肉考試機器﹐都竟然唔記得咁基本的野﹐簡直係基本到好似 “EXS 1001 - Introduction to MC Exam Strategies” 的第一課基礎理論課一樣。

唯有賴佢係最後五分鐘的時候唔俾 announcement….所以個考試好似完得好 abrupt 咁。

一個 break 之後番來 Paper 3 and 4. Paper 3 係考 Logic. 有幾種﹐but 全部都係考句子的 logic。全部都係俾一段 passage 你睇﹐然後選答案。第一種係選 assumption, 即係睇完 passage 之後﹐你要 identify 以下邊個係上段 passage 有包含的 assumptions. 第二種係推論﹐大概同 assumption 差唔多。仲有一個就係argument 的重要性。就係從 passage 中﹐identify 以下邊幾個 argument 係夠 strong enough to support the statement。最慘係佢講明就算你覺得個 statement 對整體社會都有益的﹐但對個 statement 唔夠 strong (係唔夠 strong, 唔係錯﹐錯唔晒架佢d 句子…)﹐都會當係 weak arguments…總之就係超難。

Paper 4, 唔使多解釋﹐就係 Maths Logic. 難到喊。佢個 example 都睇到我呆左﹐大意就係問題你一個 series 的數字有乜野特別。全部數字之間都有個 3 字﹐應該同 3 字有關吧？睇唔出喎﹐睇答案先。

全部的數字除 4 之後﹐個 remainder 都係 1。

嘩﹐你 example 都玩到咁盡﹐咁真係「打到來」個d 唔使問阿貴啦咁。

實情就係d maths logic難到…問埋阿貴都神仙難救。

基本上我有一半係自己做的﹐另一半就係連題目都未睇過就白撞的。係「我自己做的」一半之中﹐有三份一都係撞的。淨低的三份二﹐有三份一係好有信心咁題﹐有五份九係無乜信心咁答﹐有八十三份之一百六十七係勁無信心咁答﹐有 九百七十六份之一萬零三係腦袋完全空白的時候寫低答案的…..

個個都問我個考試幾時出 results。咁的情況唔使佢講我聽都知咩 results。