兩個大學站

西港島線拍版落實﹐大家都開心。政府消息話﹐有一個最近港大的站﹐會叫做「大學站」。

無問題呀。

唔係喎……..諗深一層﹐兩鐵會合拼架喇喎﹐咁「一鐵豈能藏二大學站」呢？

我係好愛中大的中大人﹐你話叫我放棄「大學站」呢個名咩﹐又唔捨得。話晒佢都係好多人﹐尤其係舊生﹐的集體回憶。

你叫港大人放棄「大學站」呢個名咩。政府都放左風﹐依家先話唔得的話﹐港大班人同你地死過都似。港大人對「名」呢件事幾著緊﹐你睇下佢地依家個醫學院叫咩名就知….

叫「中文大學站」同「香港大學站」啦﹐咁 City 同 BU 咪好慘？會唔會扭計要九龍塘變做「城浸站」或者「浸城站」？兩個名都好唔老利喎。嶺大都可能要求「兆康站」改埋一份….跟住紅磡又變埋「Poly 站」….最慘就係 UST, 無得玩。

咁一係一個叫「南大學站」一個「北大學站」。但係….好 L 娘喎咁叫法﹐十足十大陸d 火車站咁…聽見都覺得 UN 耳。

網上原來對呢件事討論甚切。人人都加幾句意見﹐但我覺得有一個好似幾岩。

就係鬥「搶」。

邊個搶到先﹐咪邊個的囉。香港從來就係一個咁樣鬥搶的地方。

即如百幾年前港島果間大學搶到「香港」呢兩個字﹐咪可以叫自己做「香港大學」囉。其他後來居上的﹐唔怨得人唔可以用「香港」的「大學」來做名稱。咁咪變成「中文」囉。再後來的﹐各有各原因。

咁中大搶先得到鐵路連接﹐然後叫做「大學站」。咁…..老實講﹐港大的同學們﹐你地唔怨得我地架喎…….

手快有手慢無嘛……