Thursday, March 27, 2008

謬誤與諷刺

謬誤與諷刺

- 謬誤 -

番工最鐘意豎高隻耳仔聽人地講野﹐唔知點解阿媽生得我咁鬼八卦的 (媽之聲:衰仔!自己八卦又懶阿媽!生舊叉燒好過生你!)﹐係公司人地講親乜野我都想聽完之後插咀。

今日聽到兩位同事的對答﹐大意係某秘書生左個女﹐今年兩歲﹐但已經講明要佢讀女校。大意係﹐費時佢男女校初中就拍拖俾人攪大個肚。

類似的說話﹐相信每一位都總會聽過身邊唔止一個人講過唔止一次。男仔要讀男校費事攪大人地個肚﹐女仔要讀女校費事俾人攪大個肚 / 亂攪男女關係。好多家長的無知型恐懼﹐以為讀親男女校就十之八九都會攪男女關係﹐咁d 家長就無形中令到自己有好多多餘的「性幻想」。諗到 / 講到 / 形容到 好似一讀男女校﹐就會變成一個雜體性交場咁﹐D 學生番學就淨係識做愛同拍拖。

喂﹐人地當初創立男女校的原意﹐我相信絕對唔係咁囉。 And by the way, 我讀左十三年中學+小學都係男女校﹐我的經驗可以話俾你(地)聽﹐唔-係-咁-囉----。

老實講﹐我覺得如果你係一個單性學校的環境底下長大的時候﹐可能會更加唔開心。原因太多﹐亦可能係我自己想像出來的。但始終﹐呢個世界係有男有女的﹐而學校既然應該係社會的縮影﹐咁何必要有男校女校呢。

讀男女校唔一定要拍拖﹐拍拖唔一定要攪野﹐攪野唔一定會大肚﹐大肚唔一定要生出來﹐架嘛。

差d 講句﹐你寧願佢十五歲攪大左 / 俾人攪大左個肚﹐而慌失失唔知點算好﹐定想佢三十五歲攪大左 / 俾人攪大左個肚﹐先至來第一次慌失失唔知點算好?

老實講﹐如果幾十歲人先至來第一次拍拖﹐第一次面對女仔﹐第一次發現原來自己鐘意攪大人地個肚 (!!!), 都幾悲哀。

- 諷刺 -

酒樓東主係同一個位不停開酒樓﹐拖久幾十萬薪金之後﹐就停業﹐宣佈清盤﹐仲勁過財務公司的「欠薪一筆清」。之後係同一個地方﹐改名換姓﹐再開酒樓﹐又使一招﹐又欠薪幾十萬﹐連累多個家庭之後﹐又無事甩身。多年來﹐最高刑罰都係罰錢了事﹐無人坐監。

那邊廂﹐補習老師雖為人師表但 EQ 仲低過我 (i.e. 咁真係好低)﹐忍受唔到蠢的學生而 mit 佢塊面﹐打佢個頭。唔使打幾多次﹐一次﹐就係打過一次咁多者﹐就被判入獄三個月。

我好細個小學果陣補習﹐係南豐新村一個住宅單位﹐家庭式運作﹐好多小朋友都去。個阿媽就係補習老師﹐有咩唔鐘意就打。我果陣時都覺得有乜理由呢個阿叔都可以打我?但既然佢係阿爸的朋友﹐阿爸仲要特登請佢食飯﹐我就唯有死忍。如果以打一下個頭就要坐監坐三個月﹐我諗淨係計佢打過我的﹐都夠佢坐到依家都未放番出來!莫講話所有其他的學生。

我所講的諷刺 mainly 唔係呢個﹐而係﹐我覺得欠薪同打學生﹐兩個都唔岩。但若果要二揀一去坐監的話﹐一定係欠薪果個﹐而唔係打學生果個。點可能呢個 practice 做左咁多次﹐害左咁多無辜白做無錢的基層﹐仲可以罰款了事?佢最多的就係錢﹐你罰佢錢﹐不如罰我通宵打機把啦。多舊魚!

3 comments:

Esaltato said...

"老實講﹐如果幾十歲人先至來第一次拍拖﹐第一次面對女仔﹐第一次發現原來自己鐘意攪大人地個肚 (!!!), 都幾悲哀。" 絕對唔同意啦。好謬論下喎。

而家香港人鐘意講人權嘛, 學哂外國d衰野, 就黎阿媽打仔都要坐監架喇。

Tommy said...

我唔覺得係謬論。

Monitor de LCD said...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Monitor de LCD, I hope you enjoy. The address is http://monitor-de-lcd.blogspot.com. A hug.