2 Aug 2006 一生任食料理

雖然八月過左兩日咁大把﹐但係我直覺話我知呢間野好有實力﹐可以競逐到今個月的 Tommy 重點推介。

「一生任食」

睇名係咪覺得好誇張呢？之但係呢個係佢餐廳的名。佢全名好似係「一生彩食健美日式放題料理」諸如此類。Anyway 我同 Kevin 都覺得「彩食健美」未免有點嚇人同埋「娘」。一生任食聽起上來好似係「成世任你食」咁過癮﹐所以都係咁叫算數。

睇見佢平日九點半後特價 128 加一﹐又見開飯網的人讚得咁緊要﹐咪「冒」名而來囉。之但係都未夠鐘﹐就去行下街先。點知就出事喇。

九點半﹐我地兩個番到去明珠城的「一生」﹐諗住佢平日都應該無乜人﹐搭 lift 上去﹐一開 lift 門…嘩﹐點解會企滿人架？點解會企到出 lift 口架？唔該俾我出 lift 呀…死火啦今次。估唔到佢已經出左名到咁的地步添。咁唯有拿張籌然後等啦…都只不過係七號枱者…

跟住經理開始叫枱號。咦點解佢叫枱號係幾個位的數字來的？我地都係七號之嘛。咦點解佢叫數字之前有個 B 字的？咦點解佢叫數字之前仲有個英文字﹐聽落咁似 booking 的？…

BOOKING?!

唔係嘛？！訂左位的都未入得架原來？！OMG!!!! 咁我地兩個「白撞」的幾時先有得入呀？天呀~~~十點鐘喇﹐我餓到暈喇

就係咁﹐由九點半一路聽佢斷斷續續咁叫 booking 的位叫到「白撞」的位﹐足足叫到十點二先有得「埋位」。真係學 Kevin 話齋﹐早之唔行開﹐係度 book左個位先﹐仲咁老定走開去行街﹐真係 「Loligin」….

好喇﹐真係坐低。我地坐係最中心的位置。細心睇呢個場都唔細﹐而且分開左幾個 section 每一個都有一種自己的裝修。例如近 sushi bar 的地方就係米色主題﹐用竹為主。另有一個矮牆圍開的地方﹐係要除鞋入去坐低的﹐坐低左就其他人都見唔到你。新門口又有半月型的大 table。入到去又有幾間 VIP 房。整個餐廳都係用深啡木做主題。燈光較得好好﹐比金滿庭光猛但唔見得搶眼﹐做得幾好。

坐低左係四人枱之後﹐好快就有個姐姐走來同我地 brief 一次係點叫野食。一張 A4 咁大的點菜紙上面佢話有一百三十五種食物 (多係多﹐但無咁多呀嘛….)﹐每次限叫六樣 (定八樣？唔記得)。但係阿溥強烈建議大家唔好當佢地係其他 cheap cheap 日式放題一樣﹐預左佢會漏單而報大數。因為食左成晚﹐佢d 野來得再慢﹐都一定唔會漏﹐成晚入左六次單佢一樣野都無漏過。我仲特登考下佢有一樣野寫得寧捨細個「1」字﹐都無睇漏﹐好野。所以若然大家當佢係其他「十上九漏」的日式放題咁報大數就必然食爆你自己。

餓到發慌﹐於是拿拿聲入一張單先。先來一個「一生式」的蟹腳鍋..咁我諗住即刻可以飲湯架嘛…點知又係要等佢滾。當時我留意到身邊放出一張大枱﹐上面放滿碟﹐兩個類似大廚的物體鎮守住。好似自助餐派燒牛排一樣。

唔使幾耐﹐就有個經理走到場中間﹐即係我地隔離﹐用咪宣佈﹐大意係多謝大家光臨﹐依家有咩優惠時段﹐會送埋個牛肉刺身俾大家﹐要的就舉手話佢聽要幾多份等等。跟住就開始叫「第十六號枱幾多份？第十六號枱五份！第十八號枱幾多份？第十八號枱三份！…」一路咁叫落去。成場人都舉晒手﹐情況好似好 high 咁﹐我仲諗﹐呀幾識攪氣氛喎佢地。

之但係﹐我地係八十五號枱囉。佢叫左唔使幾耐就叫到我地﹐我地要左兩份﹐仲係度笑緊佢地攪氣氛﹐之後兩分鐘…仲嗌緊….五分鐘….仲嗌緊…喂大佬呀﹐好街市呀你攪到。叫極都未完﹐唉。

第二輪食物到的時候佢就停左。之後﹐又來。今次係特價飲品 (即係要另加錢喇)。好明顯要錢的野就大家都醒爬好多﹐無中招又傻更更咁舉埋手。所以今次靜好多。

野食方面﹐當然係 good 啦。叫過的野食好多﹐好多都好食﹐我試下記番低食過乜野係好食。

炸蠔 – 交到功課
炸蝦 – 超爽滑！極罕見的炸完仲咁嫩滑咁大隻的蝦！
刺身 – 有俾個心機同佢地扮靚靚先拿出來的日式放題﹐買少見少﹐值得加分﹐再者﹐刺身都算幾好﹐呢個價錢直頭係抵到震。
沙律 – 和風汁沙律﹐幾新鮮
自燒系列 – 有幾樣野係生肉來的﹐佢會俾個燒碟你﹐似韓燒﹐自己燒﹐d 肉好食到痴晒線﹐我地叫左一個﹐之後再叫﹐足足叫晒六個。
三文魚子蘿蔔蓉 – Kevin 的至愛。一濃一淡﹐相輔相承﹐好正！
牛油菇 – 幾好呀

普遍來講﹐賣相同味道佢地都做得好好。服務算幾好架喇﹐起碼我覺得佢地有做過野。我地絕對會再 encore 多次！

唔知今個月會唔會遇到可以同佢對抗的對手呢？

星期一至四晚九點半後 $128, 星期六日的 lunch 都好似係呢個價。要加一。飲品另計﹐有免費清茶。

一生任食料理
Add: CWB百德新街24-32號名珠城1樓 (要係暗角轉灣位行入去搭 lift)
Phone: 2808-0384 (你睇完我講都知訂位好d 啦)