很久沒有來了

書店閒了

有人來了

有人走了

這半年﹐過得很特別

學懂了一些事﹐發現有更多的事未懂得......

好厲害的挑戰

以專賣英文書籍數十多年而引以自豪的書店

新店開張, 光鮮的落地大玻璃前﹐最大的「挑戰」莫過於此

「丟架」二字﹐從此有了一個新定義

Life @ 20/F

係二十樓番工的最大好處﹐除左係地點夠中心之外﹐就係多餅食。可能近排夏天﹐有靚女造餅也好﹐有老世買餅也好﹐幾乎日日都有餅食的。唔係西餅﹐就係蛋糕﹐或者冬甩﹐或者 quiche, 或者 pie, 或者 brownies, 或者 rolls....

但點食都補唔番個工作量 and therefore 緊張程度

By the way, 我覺得 20 Floor 果隻字真係超有型。黑白分明﹐好靚

腳痺於我如浮雲

公司贊助每日飯盒一個.....日日都係一樣
更期所限﹐要七點鐘食飯﹐但七月的香港的晚上七點﹐太陽依然燦爛......
不足中的美﹐係可以對住個大海景 (仲有填海景) 食飯
懶理其他人係身邊點睇
我腳痛﹐我要坐。我掛住職員証﹐我去邊度食飯都係大晒的

尾二果個﹐星期一晚。唔使番工﹐於是入會場掃貨。掃左半個鐘就夠鐘。完場的時候﹐全個會展的人都走﹐呢條好似洪水一樣的人流﹐非常壯觀﹐非常波瀾壯闊。通常有咁多人一齊行﹐速度通常都會非常之蟻欄﹐但今次人人趕搭車﹐人人趕食飯﹐咁多人一齊行的人流﹐流速竟然快到咁...企耐d 都會俾人流「沖走」

最後一日﹐最後一個下午。下午三時最後衝刺﹐人人都癲晒。入親來的唔係問 PS I love you 就係 Pride and Prejudice. Harry Potter 完全係過晒氣。Taschen 出的 Modern Architect, 成個 boxset 重過我個肚腩﹐不停俾人掃﹐我暗啞底拍爛晒手掌﹐心諗最好你地幫我買 Q 晒d 最 L 重的書﹐唔使我搬。

四時開始準備﹐五時吹雞趕客﹐六時仲有客人懶屎唔走盡最後一分鐘力掃平貨 - 好心啦﹐會平俾你的﹐一兩個鐘前就已經平左啦。

一路入箱﹐搬箱﹐入書﹐數書﹐搬書﹐堆書﹐Doot 機。用柏楊老先生的一句「亂﹐髒﹐吵！」

但好玩。

===============================

年年去書展都係做小市民﹐今年搖身一變﹐變成一個「參展商」。Well, 我張職員証係咁寫的﹐但放心﹐間公司唔係我開的。係我開的話我會做好多改革囉。

原來拿住張參展商職員証﹐真係可以行快少少架。但係只係少少咋喎﹐我以為會有條乜鬼野職員秘道﹐原來唔係囉。只係准你揀少人d 的通道 (通常都係離開會場果條路﹐即係反方向行﹐逆流而上) 行囉。係﹐你唔使排隊唔使逼﹐但完全無縮短過距離同時間。點解時間都無短左？我入場番工的時間都唔多人﹐行邊一邊都係暢通無阻。

我地書店﹐走「高檔」路線的﹐而且仲要係賣洋鬼子寫的書﹐一定唔會放係最大的 Hall 1 啦。唔放係 Hall 1, 又唔係師奶多過兒童的「兒童館」﹐咁就多人極都有限。

而且我地的 staff ratio 真係奇高。四個格仔 (四個舖位面積) 的小檔﹐竟然每分鐘都有八九十十一個人企係度﹐都咪話唔勁。尾場的「走難日」﹐更有將近廿位同事出動﹐而且男丁盡出﹐簡直係打杖一樣。人地檔口﹐四個舖位的通常都係八九人 only, 我地竟然成廿個人密密麻麻﹐都咪話唔壯觀。

今次書展最大的得著：原來我可以企到十個鐘都唔死！

當然當然﹐箇中的腳痛，腰痛，背痛﹐抽筋﹐全身肌肉酸痛﹐昂貴的飛的士錢﹐都盡在不言中啦。

但你知嘛﹐那一刻﹐我真係好想著一件 T-shirt, 上面寫住

I survived standing 10 hours in Book Fair!

It's time

聽日就輪到我去書展當值

亦都係去到半夜十二點幾一點的一更

仲要係一企就企十個鐘

真係好想知道自己點可能挨到落去

仲要之後三晚都係咁

星期六晚去到十二點的一場應該就係戲玉所在

希望死不掉...


我換左部 C702

無想像中咁好用...

眼鏡 88 的專業服務

拿﹐咁話說啦 bor

我個眼鏡戴左成年﹐個鼻托 sir 晒落來﹐幅眼鏡好易變成阿伯戴眼鏡咁跌晒落來﹐而且都黃 gum gum , 所以﹐就諗住去整整佢。

呢個星期日行街到半路﹐見到眼鏡 88, 就一於入去﹐反正我幅鏡都係係眼鏡 88 度做的﹐而且佢地不嬲 service 都好好﹐信得過。

問佢調較 and 換鼻托使唔使錢﹐佢話唔使的。我話哦﹐好。佢收左我幅鏡﹐我就呆坐。

我無留意佢做咩﹐淨係擔天望地。跟住佢拿住我幅鏡番來﹐佢話﹐個鼻托斷左。

我望望幅鏡﹐個鼻托果條電線咁幼的鐵﹐斷左。我唔知咁即係點﹐我話「哦」﹐so?

佢話﹐我幫你睇睇可以點。

當時我完全唔知個問題有幾嚴重。

攪左一大輪﹐我等到有d 悶﹐問佢其實依家做咩事 (真係囉命我依家先去攪清楚到底乜野事)。佢話個鼻托斷左。

俾著你﹐你會問咩？

我好自然咁問﹐點解會斷的？

佢無出聲。

係咪你幫我整的時候整斷的？我再問

佢先至話係

我當堂係 --> !!!!!!!!!!

唔係呀化, 換個鼻托仔咁大把咋喎....

我已經唔想理﹐叫佢：咁你整番好佢啦

佢話﹐呢d 整唔到架﹐無得整。

我開始覺得有唔妥。「咁即係點？」我問得明確d。

我幫你睇下可以點。

又等左好耐好耐

佢番到來﹐都係無實質答案俾到我。

我又問﹐咁依家點呀

佢就勁囉﹐佢話

依家我都係唔收你錢幫你做呢樣野架者。即係...我都係免費幫你做架咋...我係唔收你錢架...整爛左你幅鏡我都唔想架...我都唔想見到呢d 事發生架﹐咁但係唔發生都發生左啦咁點者...

嘩﹐老實講﹐佢講到大意上係「呢個 service 係免費」的果句﹐我已經火都來埋。之後的句子有幾「火上加油」﹐我諗你見到佢個 L 樣會更加明白我當時的感受。

事情就係﹐我拿個眼鏡去俾你整。你整一整就整爛左我幅眼鏡。你無道歉之餘﹐亦渾然唔當係一回事。你唔重視整爛我幅鏡係大件事﹐亦唔覺得整爛我個眼鏡係你自己的問題﹐仲來一句「我都係免費架者~」來推卸責任。你唔負責任已經夠衰﹐都要絲絲叔叔唔肯俾我知。你越掩飾呢件事就越令我唔滿意﹐仲要我三番四次追問你先講。我追問完﹐你都仲未肯俾 solution 我。我開到聲叫你俾個解決方法我﹐你竟然答我「免費」呢個 concept﹐唔負責任之後竟然係將成件事推番落來我身上!

難道係因為我無俾過錢﹐所以就整爛幅鏡！

ok 咁樣講的確係有點兒強詞奪理﹐應該話﹐你咁講係乜野意思

難道因為呢個 service 係免費﹐所以你就可以大安旨意地做得馬虎？
難道因為呢個 service 係免費﹐所以你做錯左事都可以唔使認？
難道因為呢個 service 係免費﹐你就可以整爛我幅眼鏡之後仲愛理不理咁？
難道因為呢個 service 係免費﹐我就唔 entitled to 任何賠償？

喂﹐唔係咁架下嘛！

基本上我已經好火﹐但我覺得自己讀過下書﹐唔可以咁樣發晒癲咁發火。應該話﹐我可以﹐但我唔想﹐因為咁樣只係令我形象破產 (諗諗下我又好似無形象 value 架喎其實....)﹐同埋最緊要係﹐對住呢d 咁樣 H 口 H 面的人﹐我再發爛炸﹐對成件事都唔會有幫助﹐尤其係對住呢d 咁蠢的人。我一生人最怕的唔係又蠢又善良的人﹐而係又蠢又惡又死性不改但又係度阻左 (我)個地球轉的人！

咁我既然唔想發爛炸﹐又唔想浪費時間同埋心血係呢個咁難頂的人度﹐我就索性將自己個 mind tune 到「理性解決問題 irresponsive to the person」模式。

我捉一個小姐來問﹐你地呢度究竟邊個先至係 manager? 唔該幫我搵個識得 customer service or at the very very least PROBLEM SOLVING 的人來同我講野啦, PLEASEEEEEEEEEEEE!

佢的眼神望望那位人兄。原來我一直都已經 dealing with 成間舖最大的那個。阿 manager 呀話﹐真係幸你個會。

我主動問佢﹐咁你有無得痴番上去呀...？

無。

咁你有無第二幅一模一樣的﹐換過塊鏡片就攪掂呀....？

我 check check....(半個小時蚊都訓之後)....係鑽石山﹐但唔知係唔係真係有﹐定係 display﹐定係倉﹐定係....

咁你會唔會幫佢依家 transfer 過來呀？

唔..................得

咁有無同款或類似的款的第二隻色........總之係呢塊鏡片可以 fit 到的呀？

我 check check......(又係超勁耐的半個鐘之後)....有的

係邊度？

東涌

咁附近呢？

最近係....等我再 check check

唉你唔使 check 啦﹐你幫我係度揀啦﹐依家呢間舖頭有無現貨 fit 我對鏡的？

你呢隻我地一早賣晒啦

(妖你老....)

我再幫你問問 (又一段好很長的時間)

我問過上頭啦﹐佢話可以俾你退番呢幅鏡的全費﹐用來依家買一幅新的鏡。

咁要幾耐？

兩日。

(咁至係答案架嘛大佬呀)

之後攪左一大輪﹐終於我要去到另一間分店度做。果面的 manager, 好得多。

唉

打完呢篇野﹐我都覺得好累。咁樣就俾個蠢過豬又寸爆到無輪的 manager 浪費左我好好的一個星期日﹐真係諗起都激心。

緊你個張

總店﹐比較舊。

每天都要喝咖啡

再喝

要打醒十九幾分精神﹐要全神貫注

甚麼都要學﹐甚麼都要知

很緊張

再喝一杯

還是記不了那麼多資料﹐不過幸好頭腦轉速極快

寫寫寫寫寫

抄抄抄抄抄

聽聽聽聽聽

下班了﹐又忘記做門市不同做 office, 出出入入都要打咭的

「打咭最型打唔停﹐打少一世會雙目失明」~

站在店外﹐呆了。我要做甚麼？

夜了﹐要睡。

咖啡因的效力未退﹐睡不著

要吃藥才能睡得安

為了睡八小時﹐晚上甚麼活動都犧牲

一覺醒來﹐又重覆

不夠醒神嗎？喝咖啡吧

手震了﹐控制不了

心跳得好急

再喝一杯

星期六也 5pm

好累好累

再吃一粒藥﹐該睡了。

For you, a thousand times over

好好睇的一本書﹐估唔到我會咁上癮﹐睇到唔捨得放手。

書中的一句 " For you, a thousand times over" 每一次出現的時候都拿掐得極好

因為每一次佢出呢句的時候﹐都估佢唔到咁感動。真係差d喊。

The Kite Runner, by Khaled Hosseini.

(又係)馬拉蟲式大富翁

上次同一班小學同學重聚﹐估唔到會玩大富翁﹐仲要係玩通宵。但由於係漫畫 cafe 玩的關係﹐加上估唔到玩極都玩唔完﹐於是埋單的時候﹐費用﹐係天價。

今次大家到 Eddy 的家中玩﹐場地免費﹐可以放心玩。我為大家介紹正確的玩法﹐但後果...

... 都係玩左勁耐...

玩到一半其實我已經想唔玩。尤其係當我特登仆倒去買副 Settlers of Catan 為左今晚可以玩的時候。十二點幾一點鐘開場﹐玩到天光﹐老實講﹐下次再係咁﹐我真係要慎重考慮。考慮唔係攪通宵﹐而係又係因為大富翁 (或酒店大亨, which I consider very similar) 而攪到咁樣死唔斷氣的話﹐好辛苦....

所以我決定下次叫大家陪我玩 Settlers. 如果大家的反應好的話﹐我會考慮買埋種豆﹐咁就可以一個四人 game, 一個八人 game, 可多人玩可少人玩。咁樣喇。

而且仲可以慳埋去 What is 的價錢添。

都幾好呀

Eddy 咁樣俾我地攪到間屋污糟臘蹋都好麻煩啦

Metroid Prime 3: Corruption on Wii

我真係估唔到﹐一直係影音功能上俾人睇唔起的 Wii, 竟然可以出到一個咁高質素畫面的遊戲。當大家都係度批評 Wii 的畫面「好極都係好過 PS2少少」的時候﹐Metroid Prime 3: Corruption, 作為任天堂旗下 studio 出產的遊戲﹐第一個以行動來証明其實 Wii 的畫面質素不止於此。雖然﹐要佢同 PS3 比係無可能架喇﹐但至少﹐我覺得今次比得上 Xbox360.

至於遊戲本身﹐就真係好玩到不得了。我本來都唔鐘意玩 first person shooter games 的 (自從 N 年前係 Doom 的手上輸到一棟都無﹐第一關都玩左好多次先過到)﹐但我都上左癮﹐依家次次開 Wii, 終於都唔係大亂鬥﹐超銀馬﹐馬車﹐電車Go, 超執刀﹐而係呢隻 “MP3”.

連遠呂智再臨都要讓開一邊。

在晴朗的一天趕客

今朝早起身﹐試下用手提電話的鬧鐘收音機功能。鬧鐘功能呢家野其實就朝朝早都有用﹐但開收音機就未試過﹐原來只要插住個免提就用得。

九點正﹐收音機響起。我明明係眼訓到趴街﹐但都聽得一清二楚。雙眼完全唔想打開﹐但收音機播乜野都聽得一清二楚﹐神智清醒得不成比例。

正在播放的係 903. 從來未聽過「在晴朗的一天出發」﹐諗住聽下個內容係點﹐點知…

由九點正播完新聞之後一路都係廣告﹐再唔係就係廣告﹐之後跟住的都係廣告﹐終於聽到鄒凱光出來報天氣﹐然後又係廣告﹐之後都係廣告…

由九點正到九點十八分﹐都無節目內容聽過﹐我忍唔住﹐叫左一句「又係廣告！」﹐起身(一早就應該起身)﹐一怒之下熄Q左個電話﹐刷牙洗面。

我知道朝早真係電台的 Prime Time, 我想聽下你地個節目有咩內容者….使唔使咁呀。唔怪得我阿媽通常都係聽「晨光第一線」算數。

心有雜念

---做人不能太 CNN---

CNN Cafferty 事件﹐其實係對中國人的一個考驗。我個人覺得﹐好多中國人睇見自己傳聖火的時候俾人咁樣「蝦」法﹐個心一早有條杉頂住唔開心。通常咁樣就會堆積左「火藥」於心中。今次 Cafferty 係呢個時候講d 咁侮辱性的說話﹐實在係不智﹐明顯地錯在佢。但中國(人)就好似等左呢個機會等左好耐咁﹐終可以有個 topic 可以借題發揮﹐調兵遺將高調反擊﹐似乎已經到左一個過火的地步。

又難怪﹐佢地從來都係「一呼百應」的。觀乎文化大革命是甚麼一回事﹐就可以想像中國人是一群如何不冷靜思考又容易煽動的一個民族。

我咁講唔代表我覺得 Cafferty 係對的。佢咁講野﹐老實講我都係中國人﹐我都無做到佢口中所講的中國人咁衰。但佢一竹篙打沉一船人的說法﹐太民族仇視之餘﹐亦太唔符合佢新聞工作者的身份。若然佢係一個市井之徒係度亂叫﹐相信大部份香港人應該都唔會理佢﹐又得佢繼續自己痴線 (但大陸人應該會激動一百倍)。

但佢講錯野﹐佢衰﹐我地又係唔係要陪埋佢一齊癲呢？佢喪家犬式的亂吠﹐我地覺得佢侮辱左我地喇﹐我地又係唔係要激情澎湃地煽動十幾億人民來一齊大叫﹐來所謂「抗衡」佢呢？

如果件事去到一個人對一個人的層面上﹐即係﹐有人出言侮辱﹐又講粗口又阿爸阿媽﹐你又會唔會咁做？你會唔會選擇同佢一樣亂吠？你覺唔覺得咁樣同佢一般見識係「做 cheap 左自己」？

若然你每次俾人話﹐都花盡吃奶的力去反擊﹐去維護自己。呢個世界咁多人﹐咁多張嘴﹐你可以反駁得幾多？嘴巴長在別人身上﹐佢地要講乜你可以控制得幾多？佢地要侮辱你的﹐你又可以嬲得幾多個？日日都攪行動去「抗爭」﹐不如冷靜想想﹐如何善用資源﹐善用時間﹐改變自己﹐叫人無從批評﹐以行動來攻破一切指証。講得白 D, 有咁多人動員能力去聯合人民﹐激起佢地的愛國之心﹐抵制法國美國﹐倒不如咀嚼一下別人的指責﹐將如此龐大的力量﹐用於工業改革﹐品質檢定﹐人權改善﹐文化質素提升之上﹐豈不是更積極﹐更有用的方法？浪費時間於漫無目的的謾罵﹐倒不如捲起衣袖﹐做好份內事。

俾人鬧兩句﹐就要全國一齊呢樣行動﹐個樣號召﹐呢樣怒罵﹐個樣抵制…

…成熟d 啦唔該。2008 年啦﹐學人攪奧運喇﹐全世界都睇住啦﹐要大個仔要生性架啦﹐要有冷靜的頭腦﹐要有定力架喇﹐唔好再咁唔成熟啦好嘛？

---世貿機舖搬屋啦！---

不嬲佢都係五樓﹐但新聞話佢會引入「戰場之絆」﹐所以會搬﹐不過我記得佢係搬上十一樓﹐但網上的人就話係六樓。一陣放 lunch 等我去睇下邊度至係真。

V 太案…咁都唔算強姦？唔係呀化

另外﹐願墮樓的建築師和他的好友都能安息。

手機記載生活系列 (2)

05/09/07 索子已經六個月了﹐進入少年期。還真的像個小妮子一樣﹐活活潑潑的﹐不過就是太過怕陌生人。


近年能在旺角找到能吃入口的東西(註：未必代表好味)比以前多了。起碼越開越多的香港仔魚蛋就是其中一門。

MegaBox 開幕﹐大鑼大鼓。山長水遠專程去走一趟﹐發覺除了很新很光鮮之外﹐沒有甚麼吸引之處。到 Food Court 找食的﹐只能到看起來比較「不化算」的 Te 吃意粉。我的估計正確：的確不化算﹐亦不飽。

日本吉列專門店﹐初見乃價錢「天比高」。但其炸物的確美味非常。但既為炸物﹐價錢又為天價﹐只能「多多益善」﹐望門輕嘆。

蘭桂坊始終都不是我的地方。

我寧可躲進山腳的 Starfucks﹐居高臨下地望著那些沒有錢去「蒲」卻想參與「在蘭桂坊飲酒作樂」的人﹐密密麻麻地擠滿了那一間「七仔」。

Alfredo @ SOHO Elgin Street. Reasonable and acceptable enough for their food quality and price in a luxury place like that.

好奇心驅使我壯起膽子來走進全港最富豪級的 Landmark. 竟然驚見 Giordano. 到底是對 Landmark 的幻想太過多﹐還是我對 Giordano 的成見太過深？

呆滯間走到 ThreeSixty 買了一個加菲貓最愛的 Lasagna. 標榜用料有機的肉醬千層麵﹐六十多元一塊﹐每一口都是有機的材料。最「有機」的應該是痴肥和膽固醇過高。

Kubrick Café 的三文魚沙律。油麻地真是越來越得我歡心。

攔路狗可能很兇﹐但攔路貓多數都是很懶。像這一隻維園的攔路貓﹐經常都喜歡在同一個位置在﹐在熙來攘往的人群之中﹐懶洋洋的趴在地上﹐眼睛左望右望﹐不停向途人施放「電功」﹐期望有傻人 – 例如我 – 會被牠的電功留住﹐蹲下來替牠搔搔耳背﹐刷刷毛。可能是因為牠已經做了絕育手術的關係吧﹐所以比較不怕陌生人。當其他在維園流浪的野貓都很怕陌生人的時候﹐這一隻貓卻像流鶯一樣﹐很「濫交」。

多謝深水埗地膽嘉威哥的介紹﹐讓我認識譚仔麻辣米線。除了他們的麻辣米線﹐他們的蒜泥白肉亦是一絕。當其他餐廳都用「廣東式」的少油少蒜式的「微蒜白肉」的時候﹐他們卻用傳統上海式的「激多蒜蓉紅油浸滿白肉都沉晒底」式的蒜泥白肉。

咁唔健康的食物﹐當然就係「賣飛佛」。

依然是 Kubrick. 今次試一試蛋糕﹐沒有期望﹐沒有驚喜﹐沒有印象。

麻布茶房的名字聽聞己久﹐但從來未曾真的嘗過。今日一試﹐發覺它很像心目中的日本餐室：

穿 Lolita 裝的女侍
乾淨的餐室
精緻得很的食物
賣相非常漂亮
味道非常普通
份量非常小

用餐完畢﹐感覺像造了一場夢﹐一點都不覺得飽肚之餘﹐還有點「欲求不滿」的感覺。帳單來的時候﹐才發現我還在現實世界中。

手機記載生活系列 (1)

旺角。這個位置﹐之前開過了很多間小食店﹐一直都做不下去。這個位置其實距離人流最旺的女人街不遠﹐而且對面就是好景。做小食店這種要求「旺丁不旺財」的業務﹐明明應該會很「好景」的。但不知為何從來都開了一些不受歡迎的小食店。

肥媽開店後﹐生意極好。我不太好鹵水內臟﹐但鹵水紅腸又未得其神韻﹐雖然只吃紅腸﹐但亦覺甚為美味。鹵水味道清香﹐不過鹹。

幾星期後﹐電視台有人推介此店﹐遂廣為人熟悉﹐就開始出現長長的人龍。看見了﹐不禁輕嘆。

因為要見工的關係﹐到尖沙咀的歷史博物館走一趟。相比起其他國家的博物館﹐香港的歷史博物館其實毫不遜色﹐甚至有過之而無不及。假日想不到好去處的﹐又或者不想再龜縮在家只懂打機的 (這情景好像見過…)﹐尖沙咀的歷史博物館是一個不錯的選擇。

西灣河太安樓東端﹐近二記餐廳﹐有一間生果店。店外有一隻懷了小貓的貓媽媽﹐快要分娩﹐胖得動也動不了﹐很可愛。

Delifrance 做推廣﹐一道煎魚一道炸蝦為主打。吃過之後﹐覺得不外如是。未夠飽﹐再跟友人叫一道「雪糕 + 心太軟」。竟然其味極佳﹐令人讚歎不已﹐至今仍回味無窮。

到超市「入貨」﹐貪便宜買了本地雞蛋﹐才發覺原來比家中原有的美國大雞蛋體形小很多。我還一時貪便宜﹐見它價錢便宜但雞蛋數目多了﹐不為意原來是小雞蛋。雪櫃的蛋格怎樣也安放不了那麼多雞蛋﹐還能怎樣？

雖然很麻煩﹐但還是燒紅了鑊﹐下了油﹐打了蛋漿﹐炒起蛋來。那邊廂取出小焗爐﹐放進家中僅有的牛油排包﹐慢慢的烘烤起來。

炒到一半﹐下一點牛油﹐頓時將一隻隻平凡的雞蛋變成炒蛋多士。雖然﹐跟天下無雙的「澳洲牛奶公司炒蛋多士」﹐仍相距極遠﹐但已吃得我滋味無窮。

油麻地廟街的美都餐室﹐裝潢非常懷舊﹐而且是真正年代久遠﹐而不是簇新扮懷舊。一直對裡面的飲食極感好奇﹐因為如此老字號的一間餐室﹐能屹立不倒﹐又能不換上時髦的裝潢﹐必定有其獨一無二的賣點。

照片中是美都的招牌菜焗排骨飯。的確甚特別﹐但除此之外﹐食物質素不見特色。

百思不解。

公司從來都不喜歡安排吃晚飯﹐因此從來都沒有 Annual Dinner, 只有 Annual Lunch。而剛巧兩位丹麥老闆都很喜歡日本菜﹐於是公司的傳統就是每一年的農曆年假後﹐找一天來全公司一起 Annual Lunch, 而基本上都一定會是日本菜。

我愛死這個傳統了。

今年我又有幸出現﹐能吃到這一餐盛宴。選址東角中心的「和三味」。大家每人都選擇了八百多元一位的和牛套餐﹐或接近二千元的二人套餐一起分享。另外還有鐵板燒(表演)﹐無限量的啤酒﹐和無限量的日本清酒 Sake。當中﹐以 Sake 最好喝﹐連我這個不太好酒的人﹐也覺得真的很好喝。原來真正的好酒﹐可以是如此易入喉﹐如此芳香﹐如此教人甘心為它醉。今日一嚐﹐令我對「 清酒」這兩個字﹐有了全新的評估。

在渣甸坊的「拖肥」

上海三六九的酸辣湯﹐醉雞。不覺得有何驚為天人之處。

一直見到網上有人讚賞 Puerto Rico 是近年少見好玩的策略性版圖遊戲﹐但鑑於缺乏耐性和理解能力低的問題﹐一直都看不懂它的說明書。在一知半解下與朋友嘗試玩一次﹐後果是不歡而散。後來到了 Jollythinkers 得到註場 tutor 指導﹐於一個小時之內速成了。

原來﹐San Juan 比較好玩。

相中是 What is Café 的「後備場」。原來於週末顧客人數眾多的時候﹐店主們會向旁邊的私人補習社租用他們的大課室﹐作為後援。檯上的一條條用電線膠紙貼出來的線﹐應該是用來分隔小朋友的 “User Area” 吧…真有趣

非常極度狐疑誰發明 / 發現這種東西的。

為甚麼是汽水不是茶？
為甚麼是可樂不是七喜？
為甚麼是薑不是蒜頭？
為甚麼是檸檬不是雪梨？
為甚麼是熱的不是冷的暖的？
怎麼可能想到煮汽水？
怎麼可能聯想到醫治傷風感冒？

一杯檸樂煲薑﹐跟餐加$9。老闆很體貼﹐一見到我這幅病貓樣子叫檸樂煲薑﹐就懂得問我﹕「要多薑的吧？」

果然﹐還未下班﹐感冒已經痊癒了八九成。強得沒話說。

比起其他香港地道飲食文化﹐除了很有代表性的蛋撻﹐街邊魚旦之外﹐怎能遺留了這一杯「檸樂煲薑」？蛋撻能治感冒嗎你說。

跟家人遠赴粉嶺雲泉仙館拜山﹐路遠迢迢得像行路上廣州一樣。午後共膳於齋堂﹐齋堂外有一隻外表醒目的白鸚鵡﹐原來在吃橙。鸚鵡會用一足支地一足吃橙尚不為奇﹐奇就奇在﹐你細看牠在吃一個部份？

猜對了﹐相中的牠尚未開始吃﹐牠在挑橙核。輕輕咬下去﹐用巨大的喙準確的咬著細小的橙籽﹐然後再吐出﹐面上再帶個不屑的表情﹐像是說「今天又是吃橙﹐天天都只是吃橙」。整個情景尤像「阿伯食橙」一樣﹐好不惹笑。

馬克王子不幸惹上窮兇極惡的牛蜱﹐一粒比米粒還小的牛蜱就一口吸掉三千元﹐好昂貴。

我還在讀小學的時候﹐鰂漁涌的幾條街還只是很寧靜的舊樓區﹐只有幾間車房﹐很地道的食品店﹐幾間廢紙回收﹐一兩間地產公司﹐僅此而已。

太古坊開幕以後﹐成功吸引很多大型跨國公司進駐﹐周邊的飲食﹐都慢慢地轉變起來。露天餐廳﹐高級餐廳﹐酒吧﹐漢堡包﹐咖啡店﹐拉麵﹐甚麼都有。從前只有碟頭飯的一條街﹐變了幾條街的小蘇豪。不只這一邊﹐近太古城的那一邊亦是。

經 Openrice 介紹﹐認識了這一間函館元祖拉麵。這一碗鹽味牛油拉麵﹐叫我上癮﹐吃完再吃。唯價錢要七十元一碗﹐亦似乎太貴。

Open Office

其實我覺得 Open Office 真係好好。

當 Director 同你都係一齊坐的時候﹐其實係會無形中令大家的士氣都好得多。以前我唔識得欣賞﹐成日都覺得老世就咁坐係我隔離的時候好大壓迫感﹐要蛇王的話又好唔方便(HAHA)。但依家諗番﹐其實如果佢獨霸一間大房然後窮凶極惡﹐我寧願佢坐出來窮凶極惡。

不過算啦﹐老世係好人的話﹐坐邊度都係好人﹐係衰人的話﹐你都唔想同佢有「大家坐埋同一條船」的感覺。

真‧頂上決戰之 San Juan

好友 Masa 生日﹐提議去 Board Game Café 食意粉兼玩 Board Game.

老實講﹐我實在有點兒怕。自從上次復活假期一連去三日之後﹐簡直有點兒反胃的感覺。就如牙擦蘇所講﹐「兩個月內絕不再去 Board Game Café！」, 皆因頻率太高﹐去到見 Board 生厭的地步。

Masa 知道我學會了 Puerto Rico, 而我上次亦教了他玩。兩人都得出一個結論：San Juan 比較好玩。

先講講最重要的一點：San Juan 這個字﹐是讀成(大約)「散玩」﹐因為此字是西班牙文﹐並非英文﹐所以用英文拼音讀成「散朱晏」﹐是錯的。J 這個字﹐在英文讀成「Jay」﹐在西班牙文則是「Jota」(HOT-ta)﹐而發音則是近似 H 的喉嚨音﹐有點兒似吐痰的聲音﹐雖然﹐我極奇討厭這種比喻(亦很討厭這個發音)。

離題了。

San Juan 其實是繼 Puerto Rico 之後﹐跟據 Puerto Rico 的玩法﹐將之簡化﹐並將其細節濃縮於一張張卡牌上﹐令每張卡牌都能同時成為代表貨物﹐金錢﹐建築物和分數。

而整個 San Juan 的玩法﹐亦比 Puerto Rico 多了一層很重的隨機感。而這一種隨機性﹐可以說是兩種遊戲之間最大的分野。Puerto Rico 非常著重規劃﹐而且大部份的資料都是公開﹐可見。因此﹐如何走一下步﹐基本上頗為清楚。亦因此﹐要是你開始落後﹐要回追的話就會比較難。但亦因為比較少的隨機性﹐比較多的技術要求﹐對高級玩家來說比較吸引。

但對於我這種人﹐不必那麼「高級」的了。

始終﹐我覺得一個遊戲﹐一定要有 Randomness 才會好玩的。畢竟﹐現實生活就是如此的 Random。做好本份的未必會飛黃騰達﹐貌似落後的可能突然走運﹐胸有成竹的可能一時大意﹐無心插柳的也會大樹成蔭。

這才是現實嘛。

另外﹐如有朋友懂得玩的應該記得﹐當第十二座建築物建成之時﹐就是遊戲結束﹐開始點算分數之時。但照片中 Masa 足足建了十八座﹐是我倆提議嘗試的改例。最後我輸了九條街。十二座原來有其原因﹐限制遊戲回合﹐不致於有人建了十八座﹐有人卻連十二座都建不了(我)。遊戲一完結的時候﹐無論如何計分﹐都追不回的了。

總括來說﹐我還是比較喜歡 San Juan。只可惜此遊戲最多只能四個人玩﹐真的是個問題。

另外﹐相中的煙肉芝士炸薯條﹐味道普通﹐但香味滿屋。純粹乃因我自己對此食品的情志結﹐平凡的味道吃起來都變極品。相比起人數多的時候必叫的「熱氣拼盤」﹐我會比較鍾情此品。