Hairspray!

係倫敦旅行的時候﹐無論行街﹐定搭地鐵﹐定睇電視﹐都要經常見到 Musical 的宣傳。倫敦的 Musical 的確係好熱﹐排隊的人多到無倫。我好想睇架﹐但係我到最後都係選擇 meeting friends instead of 去睇音樂劇。

當時有套戲係英國做緊宣傳﹐叫做 Hairspray. 我見到個宣傳﹐勁想睇﹐好似好 70's 咁 (事實原來係 60s)。佢地做的 Banner 好有型﹐黑色一大條﹐上得 HAIRSPRAY 幾隻字﹐但隻隻字都唔同的彩色﹐而且有晒徐小鳯式的「波波」圖案﹐好正。可惜時間短促﹐要番香港。當時仲係度諗﹐呢d 戲應該香港都唔會上架喇﹐會上的話頂龍都係 Broadway 電影中心先會上。

點知全港都上﹐於是走去睇睇張 poster. 嘩﹐頂﹐邊個揀架？又老土又唔好睇。Retro 呢家野係好興﹐但都要識得攪好佢先得。拿掐得唔好的話﹐就會 Retro 變 「老土」。我望住張 poster, 感覺簡直係王晶的爛片系列﹐或者係肥姐的富貴逼人系列一樣﹐放係一個 2007 年的地鐵燈箱廣告﹐只得一個後果 - 完全無看此片的意慾。反宣傳成果 100% 收效。

可能香港呢張 poster 的 version 實在太差﹐所以我係 Google 搵極都搵唔到﹐唯有搵到呢張係英國都見到的 version 俾大家睇住先。

但係﹐我好相信自己雪亮的眼光 (謎之聲：又有人自吹自擂)﹐於是我決定搵人陪我睇。友人將信將疑：「呢套野成套王晶片咁的死樣....得唔得架大佬？」「你信我喇」其實都唔知佢係咪真係「得」。

睇完﹐兩個字：「好得！」「勁得！」

一開場的 Good Morning Baltimore 已經勁好聽﹐個肥妹仔又好可愛﹐d 歌又動聽﹐跳舞嘛, 始終係 60s 為背景, 創新時代﹐乜野都有﹐幾好睇。睇完套戲﹐勁有想買佢隻 Soundtrack 的衝動。

頭半場簡直係 10 out of 10 滿分。到中段有後勁不繼之感﹐但仍然屬高水準。直到最後的結尾曲﹐將所有元素混在一起﹐幾十人一齊載歌載舞﹐光影之間醉迷觀眾﹐忍不住跳出坐位一起跳舞﹐將整套戲都帶到最高峰結束﹐是高質素的開心的 Musical (Musical Comedy?) 不可或缺的一環。

誠意推介此片給各位朋友﹐開心快活的朋友自然要睇﹐死氣沉沉的朋友更加要睇！

我俾 10 out of 10! 後半段無咁好都算數啦