Saturday, March 10, 2007

Tonkichi 日本吉列專門店@CWB



再講「終於都食到之乜乜物物」的話﹐可能會講到口臭(謎之聲:本來就臭架喇)﹐但係今次應該都算係「終於都食到」系列之一。

好﹐拿﹐我講喇﹐「我終於都食到 Tonkichi 啦!」~~~~YEAH!

----====----====----

大約係一兩年前啦﹐係我去開的世貿機舖樓下﹐就發現開左一間新的日本餐廳。無中文名的﹐日文我又唔識讀。食的全部都係炸野﹐唔係炸豬就係炸蝦﹐典型的日本吉列餐。睇一睇個價錢﹐貴到飛起。幾舊仔的吉列炸物﹐一碗飯一碗Miso 湯最多俾埋一小碟漬物過你﹐盛惠兩舊水。

嘩﹐兩舊水食一塊手掌咁大吉列豬扒﹐你無野呀。

當時諗﹐佢呢間野只可能係兩個局。一係就係騙局 – 即係唔值呢個價錢﹐一係就係富豪飯局。

點知﹐兩個局都唔係﹐原來係「唔食唔舒服」。

OpenRice 的食評一面倒傾向讚佢好食。我好奇怪﹐開業頭一年﹐我都見佢無乜人排隊﹐無人幫襯﹐同隔離的 Tony Roma’s 差唔多 – 一樣無乜生意。

口碑呢家野﹐一係就無乜﹐一有就通常都 exponentially 咁上。尤其係 OpenRice 普及化之後﹐好快呢間野就開始有人排隊。而我都係因為咁而知道呢間野叫做 「井吉日本吉列專門店」。

一直都躍躍欲試﹐但係$200@ 真係好~~多錢。

後來麗池第一富豪「落街見」發起「富豪吉列飯局」﹐咁我當然捨命陪君子﹐趁機會去試試啦。

呢一餐﹐食得超開心。埋單每人 175, 我唔知抵唔抵﹐我唔知值唔值。但我會盲目地再去食﹐係講到明會「盲目地」唔理佢幾錢都照番去食多次。

吉列系列﹐係超好食﹐好食到唔識講。我最鐘意的﹐係佢樣樣野的水準都很高﹐尤其是醬汁系列。

第二盤吉列一來到, 大家就喪搶!
(有人見我掛住影無得搶, 示烕式地造 V 手勢; 圖右側的「落街見」直頭懶得理你, 講多無謂, 極速鬼影夾埋你果舊...)

吉列食左豬扒﹐豬柳﹐蠔﹐大蝦。統統都好食﹐最好食係大蝦。用來點炸物的醬﹐分別有他他醬﹐芥末醬﹐同埋一個自己磨的芝麻混醬。方法是自己用木樁將芝麻磨成茸﹐再混入特製的醬。很好吃﹐如果不是那麼稠的話﹐會更好吃。

呢個就係芝麻 & 小木棒

像生菜絲的椰菜絲﹐是任食任添的。侍應會不時捧著一大盆椰菜來問你「要加點椰菜絲嗎?」﹐然後毫不吝嗇放一大堆在你面前。

配椰菜絲的有兩種汁﹐是柚子和紫菜汁。兩種汁都好好味﹐用來配椰菜絲或配同樣是任添任食的日本米飯都是一流的。

我們坐的是半隱蔽式的房間﹐沒有門的﹐感覺非常之 good.

總之我會再試啦。

----====----====----====----

Tonkichi 日本吉列專門店
地:CWB 世貿中心 4/F (可於 Esprit 處右轉搭電梯直上 P4 免卻多重escalator)
電:2577-6617 (好似無得 book 位﹐唔肯定)
價:$170 – 200@
格:中上價格日本菜﹐有大格可坐 6-8 人
推介:所有吉列﹐尤其是蠔
特色:日本飯 & 椰菜絲任食任添
備註:坐得甚舒服的闗係﹐似乎整個樓面的 turnover rate 一點都不大。Peak Hour 可能會等得更久(甚多人)。

1 comment:

yOLan said...

wow~i like the 椰菜絲 with 柚子汁 there sooo much wor!