雙魚星號兩日一夜海上假期之大海茫茫呼天不應叫地不聞悶到你抽筋

話說阿媽有張 coupon﹐係可以用「超值價」 $550 來換取「兩日一夜麗星郵輪雙魚星號海上假期」的上將套房兩位的。跟住去睇睇原來上將套房係好高級的房來架喎﹐只不過係低級過最高的房一個定兩個 grade﹐於是就義不容辭咁去訂房囉。咁岩 Kev 又唔使番工﹐就問佢去唔去。雖然佢只能夠 Mon to Thur 先訂得不過都無所謂啦好似好抵咁。$550 兩個人有一大間房仲要係郵輪喎。當其他人都仲係訓緊板間房的時候我地訓緊大床喎幾大都請一日假試下啦係咪？

原來佢的兩日一夜係星期一 5pm 開始上船﹐上到 7pm。到第二朝呢就可以8am開始落船﹐最遲十二點走。下？咁咪即係唔使請假都得？算啦﹐我唔想咁趕﹐背包有咁多野仲走來走去第二日仲要番工好似好頻能咁。索性請一日假。

好開心咁睇住張單由本來的接近 $3000 減到 $550。到星期一晚﹐一收工就即刻飛奔去地鐵站﹐搭逼到痴晒線 (真係逼到傻) 的過海地鐵去海港城上船。

又跑又急步又索氣咁走到去﹐去到佢話「先生你呢張係上將套房來架﹐請過去果邊的 VIP 專櫃行特別通道辦理登船手續呀」

嘩~~~~~好 high-class 呀~~~~~點算好呀~~~我呢d 一芥草民未試過咁高級架~~~特別通道呀~~~專用櫃台呀~~~~好有錢的「揀Jer」呀~~~~~~~~怕羞添！耶！

攪一大輪﹐入到去﹐又播音樂﹐又歡迎你﹐又有工作人員同你一齊影相咁﹐好似真係去左渡假咁呀！

搭完船上面的 lift 去到十樓﹐搵左一大輪先係茫茫「房海」搵到自己間房。都 OK 大間喎！幾好喎！其他人的房都似係火車的軟臥﹐而我地呢間就真係有房有大床有電視有 window 有櫃有梳妝台有椅有檯…好骨子喎！

之後睇睇房入面的「精彩節目表」﹐發現原來佢地的舞廳係差唔多每一個小時都會有節目…等我仲以為佢應該會係每晚就會只有一個 Grand Show 架添。俾佢昆左添。再睇番佢其他的節目﹐原來係五點鐘上船之後就已經有好多節目架喇喎﹐我地好似 miss 左好多野咁添。不過睇真d ﹐原來好多都係咩「汽球紮作」呀﹐「現場樂隊迎賓」呀咁….即時覺得有唔妥。咁大隻郵輪整d 咁雞的節目？唔係卦。

點知呢個先係惡夢的開始。

由於我放工放得好遲﹐所以上到船的時候其實已經係成八點幾﹐所以我地就要拿拿聲去食 dinner. 基本上船上面係有三間免費的餐廳﹐係可以俾你上到船之後任食的。咁既然中餐的同西餐都食得多﹐就一於選擇比較細小的「泰皇苑」來食泰國菜囉。

去到泰皇苑﹐發現個場都幾殘舊下。D 檯檯椅椅都係好似我地屋企十年前用的質料一樣﹐令人失望。出到佢拿野食的時候﹐發現佢原來得好少野食。咁都算啦﹐我心諗﹐好食咪得囉。於是我就試下最前排又最多的沙律囉。咁佢都幾好有幾種沙律﹐但係好老實講﹐真係隻隻都唔好食。係得個大蝦沙律係勉強可以﹐其他的例如牛肉沙律真係唔得。

「我記得好多年前去獅子星號的時候唔係咁~架喎…試多少少先」

於是就試左個冬蔭功湯﹐OK 啦﹐絕對唔可以算好。之後試佢的熱盤….唔多得。

咁就無野食架喇。係呢個情況之下﹐我地唯有離開﹐諗住食第二間算﹐點知原來再去第二間免費 buffet 食的時候係要再俾錢架？唔係卦？算數。最衰當時問﹐後來先知我地的「上將套房」係可以食夠三餐dinner架。不過…知道又點呀

好唔容易地食完個餐八個難頂的所謂泰式自助餐之後﹐就諗住拿拿聲去睇佢七點九的大 show 唔知咩咩嘉年華喇。咁諗住個餐咁難食﹐睇番個大 show 補番下數都好呀﹐起碼個人都會開心番d 呀嘛。

係隻船度行左一陣﹐終於係重重的樓梯之間搵到個表演廳…….係一個比起我以前讀書的 FYB LT4 仲細的地方。下？呢度有個大表演？佢張紙上面係 highlight 左呢個 event 架喎…坐低睇下先…開左場架喇喎…點解有幾個人係度跳下跳下的？跟住就係一輪異國男人女人跳舞表演….無乜特別…跟住就係四個極醜樣的男人表演用不同動作跳無火的火圈……跟住又係異國男女團左扭腰右扭腰……之後就完左

下？發生咩事？

正當我一頭問號的時候﹐就走左兩個磨碌出來﹐講唔咸唔淡的廣東話問我地「頭仙的折木係咪巧爭彩﹐巧巧睇呢？」下…好唔好睇？…呆晒….「請各位嘉賓留步呀﹐我地緊接住的節目就精彩囉﹐就係要頒發呢個剛才完結的麻雀王大賽的獎項呀…」…呢個時候就有幾個二打六拉起一塊已經皺晒的頹 Banner 上面寫住「麻雀王大賽頒獎典禮」…..說時遲那時快﹐就有幾個貌似大陸人的人爭住上台拿獎……

OH MY GOD….我頂唔順啦….我要走呀！

佢仲話會有一個要收費的 Topless Show﹐「想買飛就要趁早」…..佢咁的 quality, 不如我除俾你睇算吧啦….我唔介意 topless 喎….

慌忙逃離出呢個咁荒謬的地方之後﹐我地就繼續係呢一條充滿大陸風味 (係 “Mainland”﹐唔係 “Continental”﹐千祈千祈唔好攪錯) 的船上面游走。唔單止係佢的裝修擺設同埋乘客(!)令人覺得佢有「大陸風」﹐連小賣店賣的野﹐都又殘又舊咁樣﹐唔光鮮的物品自然係霉下霉下咁﹐光鮮的野就好似假的咁。隔離的免稅煙 section, 因為未出到公海所以唔賣得住….咁你都搵個好d 的辦法間開呢個賣煙的 section 呀。你搵個摔角比賽用的大鐵籠來罩住成個賣煙的 section 做乜野呀…d 煙坐監呀？定買果個坐呢？離遠望入去﹐都唔知邊個會有興趣去個大監倉入面買煙呢請問。好低能呀….

咁唯有去其他地方搵野玩啦。點知原來成隻船都無乜野玩。大部份都賭賭賭賭賭。我去過咩地方呢：有個泳池﹐冬天唔開。有個按摩中心﹐睇來幾污糟。有幾個「俱樂部」﹐全部都係賭檯。有個電影院﹐無電影放的。有個「活動中心」﹐無活動的﹐得幾本張小嫻的小說借。有個「遊戲機中心」﹐無野好玩的﹐玩一鋪「料理大師」要HK$ 7.5﹐街霸第一代都要 $5。有個「兒童活動室」﹐無兒童的﹐佢話唔歡迎廿幾歲小朋友喎。Deck上有一個觀景台﹐半夜三更無野睇的﹐中心風力達至十級﹐連眼鏡都要用手指夾實﹐四周漆黑一片﹐絕對係跌左落海都無人知﹐跌到落去呢個又大又黑又凍的南中國海﹐實死無生﹐簡直係殺人滅口毀屍滅跡乾手淨腳的好地方！

係咁多架咋﹐其餘的統統都係賭場。睇來呢隻船的主要目的 / 收入來源都係賭場….

有 N 咁多個唔同型式的賭場﹐輸晒你副身家都未夠鐘食宵夜。

係失望到震的情況之下﹐唯有番入房去睇有線新聞台…..

到底我做緊乜野….雖然話呢間房係慳左好多錢可以住到一間叫做大的房 (其實都係一間極細的房)﹐但係都無奶油悶到咁架！

睇左兩個幾鐘電視之後﹐又到左十一點幾﹐就係宵夜時段的開始喇。又係食。

今次係食一間叫做「名廚」的 Canteen 式自助餐。坐低之後去睇下有乜野食﹐希望佢呢間大咁多應該會有多好多野食啦。點知…原來宵夜時段可以食的野仲少…我幾乎數都數得晒

有個粉麵檔﹐只有一種粉麵就係榨菜肉絲河﹐米粉都無。兩種粥﹐白粥同有蕃薯的粥。我不左一碗白粥加雪菜﹐d 雪菜難食到不得了。下一碗加「豆豉鯪魚」﹐罐頭總有質素保證。然後其他熱盤都不堪入目。成個宵夜我都淨係食豆豉鯪魚撈粥同埋比較能入口的滷水雞翼。之後再無食過野。第二朝連早餐都唔想辛苦自己。總括來講兩晚的「美食」之旅我會俾 0.5 分﹐總分係十。果 0.5 分唔係因為佢有乜野好食﹐而係因為果d 野係船上唯一的食物。我可以選擇俾錢食其他野的﹐但係唔使錢的都攪成咁﹐要俾錢的又會好得去邊？同一個廚房出架喎。

之後的時間﹐都係係房度睇電視….係睇我屋企已經有的有線電視。天呀﹐我第二朝仲特登請左一日假來去玩架嘛﹐點解會咁樣架。我覺得好似騙案。唯有不停咁同自己講「好貴架呢間房….好貴架呢間房….」

結論：貼錢都唔會再去



p.s. 所謂的泰國餐食到我地兩個都肚痛﹐一食完就唔舒服﹐一直唔舒服到第二晚.....

p.p.s. 雖然係 $550 包晒兩個人好「超值」﹐但係我落船的時候仲邊有面目收番阿 Kev 的 $225 先得架﹐你話呀...昆埋其他人一齊陪我做羊牯......我真係唔好意思到震呀....