譚魚頭火鍋

是日小朋友小聚會。講唔夠幾句﹐我心癮又到﹐於是又係果句：

「唔該大家報一報各自的最新近況呀。」

阿詩話: 「又係呢句﹐個個 gathering 的頭十句裡面實係有呢句。」

Sorry...咁講好似好無誠意咁﹐但係我真係唔知嘛....

-----------

譚魚頭火鍋﹐名就聽得多﹐食就未食過﹐試下都唔錯。

當晚叫左兩種湯底﹐一個蕃茄一個麻辣。「麻辣?!?!」 我一聽見就即刻驚一驚。一邊蕃茄...唔多鐘意食﹐另一邊麻辣...唔多食得辣。

咁我今晚食咩？

「無野的...無野的...實食到的」

但係都叫左一個蒜泥白肉先。一來係想立即有d 野食下﹐二來係想試下佢的「熟料」做成點樣。反正大家都肚餓﹐等得煲來﹐等埋水滾﹐等埋生肉變熟肉﹐怕且大家都餓死左。於是大家都好開心咁食。

蒜泥白肉上檯﹐大家見佢一碟底都係紅油﹐估計佢好辣﹐怕怕﹐果陣我先知 - 原來成檯人無幾多個食得辣。

咁點解叫辣湯底的..........??

拍心口講左幾次「呢個蒜泥白肉真係唔太辣」之後﹐大家就試左。係咪？都話唔辣架喇。

所以呢﹐後來上的辣湯底﹐其實﹐都唔辣的。可能為左遷就香港人口味而減辣。

佢地唔似傳統邊爐店咁放一個大爐係你面前。為節省地方﹐電磁爐放左係特製的檯入面﹐檯布之下。就咁睇﹐好似係放一個煲係檯中間佢就會水滾咁。呢個 design 我幾鐘意﹐因為咁真係慳好多位﹐而且又唔使d staff 搬來搬去﹐甚至係換氣 (for those older styles stoves).

食物方面...都幾貴下。所有的生料都係意料中內﹐無特別好食難食。其他如「魚子墨魚滑」等等亦都有。

值得一提的﹐係佢俾每一個人的「滋味碗」。呢碗野其實主要都係香料同調味醬﹐主要俾大家烚完野食之後用來撈一撈的。最大的 feature 係佢裡面大部份都係芫茜碎﹐加d 花生碎呀﹐辣醬呀﹐雪菜粒呀之餘此類﹐非常香口﹐非常惹味的選擇。芫茜呢家野﹐鐘意的人如我或者係阿瑪﹐就會非常之 like, 連阿 Wing 果碗芫茜碎都「立」埋﹐唔鐘意的﹐就好似阿 Wing 咁成碗「奉獻」出來任我同阿瑪「宰割」。

一個唔太辣的辣湯底﹐撈起一片肥牛﹐肉身尚滴著辣汁﹐放入一碗青葱翠綠的芫茜碎﹐內加一點花生碎呀﹐辣醬呀咁﹐撈一撈﹐嘩....香到呢....

一放入口﹐牙齒咬開芫茜碎的一刻﹐登時感受到一股清新得來又帶著性感氣味的芫茜香﹐湧入喉中。肉香橫流﹐辣汁在旁「煽風點火」﹐唉喲...

登時將所有平平無奇的「邊爐料」都化腐朽為傳奇！

我俾食物&環境&服務7.5分﹐滋味碗深得我心﹐另加極矜貴的 0.5 分﹐但因價錢真係太貴 ($177@)﹐要減番。總分 7.5 算喇。

地：TST 金巴利道 26 號 2 樓 (近 Knutsford Terrace, Quiksilver 樓上)
電： 2311-4848

p.s. openrice 上面人人都勁彈呢間的服務差到貼地﹐就我當晚所見﹐唔係喎﹐幾 good 喎...

p.p.s. Gary.....你自己衰咩你自己知喇.....下次小心d 喇......(講到好似唔關我事咁的﹐超衰仔呀我)

四本之角！

有討論區的朋友話

作為一個 MHP 的 Hunter, 其中一個最重要的里程碑﹐首選就係呢個任務 - 四本之角。

係村長五星任務之後所出的緊急任務。沙漠岩地之中一次過打兩條(雙)角龍。好 X 難。

不過！一次過就成功的感覺﹐係 very good 的。下一個任務﹐就係傳說中的老山龍...我去 unsave 的 preview 過一次﹐真係好~~~大隻。我諗佢起碼有現實世界的三, 四卡火車咁長。

唔怕﹐我用生果刀來慢慢片死你！....係佢撞門十下之前啦當然。

差不多是時候了？還是從不是時候？

收到了 Double Pay. 正式地為我給了自己很久的辭職理由畫上等號。

拖拖拉拉了一年﹐我決定了些甚麼。

議而不決﹐決而不行﹐似乎我有做特首的條件。

誓神劈願地說會在農曆年後辭工不再浪費時間 - turn out to be 下一個農曆年來到了﹐我還是一舊飯地坐在這裡。

有人說﹐與其猶豫﹐不如狠決。背城借一﹐或可開出一片新天地。

有人說﹐未有計劃貿然辭工極危險。失了依靠反而得不到新的﹐所謂「兩頭唔到岸」﹐離開了 labour market 的人沒有價值﹐時鐘每一天都在倒數。

亦有人說﹐多試多看﹐才能掌握心中未發掘出的夢想。

又有人說﹐多試多看﹐到頭來一事無成。

更有人說﹐坐這山望那山﹐不如坐低食多餐。

人人都似乎知道自己想走的方向為如何﹐於是奔馳如雷。雙目空洞腦袋空白的迷途小羔羊﹐就更顯得徬徨。

「做咁辛苦都得個吉﹐點解唔舒舒服服打份政府工唔使愁？人生唔係就要來咁樣折苦自己﹐你又唔會係發大達的人」

「年輕力壯就做到咁頹做乜野？趁後生梗係搵得幾多錢得幾多。炒均全球股票廿四小時睇住個市賺到你 PK﹐呢d 野唔後生做邊個做？」

「使唔使搏到咁盡呀？你咁後生就放晒d 時間去搵錢﹐到你老左個陣都殘晒無晒力去 enjoy life 啦。如果你係為左以後日日環遊世界﹐何不趁後生時候環遊世界？」

「做就梗係要做大 firm 有名的先得啦﹐做埋d 無出息的豆腐潤公司把鬼咩」

「你做埋d 唔等洗又唔搵到錢的工都無用架﹐你話你老左點算呀下﹐我問你﹐你話你點算呀」

「我都唔旨意我老左你會養我喇﹐但我唔該你養得掂你自己之後個幾十年先喇下」

「好多人都係日日係度以為自己入到大 firm 有好前途 - 試問有幾多個真係好景」

「讀完大學點會做d 咁的工架﹐梗係做咩咩經紀﹐或咩咩會計師行﹐做大銀行或咩咩集團的阿 head﹐....下？你做緊 admin？喂你咪係男人來架？做d 咁的野？有大志少少都唔會似你咁啦下話」

「你廿零歲已經想唔辛苦﹐咁你點挨以後幾十年呀。後生唔學野﹐老左先來學呀？」

「其實人生可以有好多選擇架喎﹐唔一定係做辛苦的工﹐或者係膁好多錢的工﹐先係有出息...更何況﹐咩叫做「有出息」姐其實」

-------

埋頭苦幹讀左咁多年書﹐成績唔算好好但都算見得下人。以為咁就叫做有個交代。

埋頭苦讀﹐全世界的焦點都只在於一張書檯。一朝發現﹐當我要把頭和目光﹐都從桌上的書﹐抬起來望出前方一望無際的未來﹐才是茫然的開始。

從前我相信﹐當我有疑惑的時候﹐我可以問身邊的人的意見﹐可能得到意見﹐可能得到指示﹐可能得到答案。

今天我再有疑惑的時候﹐我都會問其他人的意見﹐可能得到意見﹐可能得到指示。卻從得不到答案。

得到最多的﹐反而是茫然的延續﹐擴大。

------

係 Blog 的世界走到中環﹐發現CK 的一篇文章。

算不上指示﹐更算不上答案。但起碼﹐算是個 hints

辭唔辭職係唔係因為經唔起考驗呢，有時好難有一個客觀標準既。一份工做得好長，亦唔代表你份人特別tough，你將呢幾樣野拉埋一齊去諗，你可能諗十年都搵唔到答案呀。只不過，或者你係時候檢討一下過去你辭職既理由係d咩，諗清楚你想搵一份點樣既工作。好多朋友不停轉工既其中一個理由係，佢地自己都冇諗清楚自己想要一份點既工作同職業。每份工都有好多唔好既地方，唔好既同事。當你做緊一份工既時候，你一定會感受到果份工果d負面既野。唯一可以令你支持到落去既，就係你「清楚知道」做緊果份工，係你想做既工作，係你想處身既行業，當然，最重要既，係繼續留響度做，有你想要既將來囉。如果你未搞清呢d野，咁工作上既任何一個負面Factor，都可以逼到你辭職架啦。

---------

A.A.O. Summit 將會三月底係「總壇」開幕。呢一個唔止係出國的差事﹐仲係大件事﹐仲要係去我夢想中的歐洲。

我應唔應該再拖？

Charlie Brown Cafe (Tsuen Wan Shop)

眼見 Charlie Brown 係香港開的分店越來越多﹐而且見到 openrice 上面對旺角店的評價似乎亦都唔差﹐於是就心郁郁想去試一下。

晚飯後的 Charlie Brown 唔多人﹐叫左一個有 Charlie Brown 的樣子的 Cheese Cake 試下。上面係結實的朱古力...近乎 brownies 咁硬。下面係 cheese cake 加梅子 / raspberry jam﹐最底係類似麥維他的餅底。

老實講﹐唔係非常之特別﹐但係因為新開的關係無乜人﹐所以環境都算 ok. 我諗呢個 quality 如果放係旺角的話都唔錯的...始終...係旺角的上樓 cafe﹐因為開得太多的關係﹐粗製濫造之流實在太多。

當你去過一間同你屋企一樣咁殘的地方﹐飲一杯無論顏色同味道﹐都難飲過李斯德林開水的所謂 "drinks"﹐玩一副得四十幾張咭的 playing cards, 得九十幾張的 UNO, 玩無波子的波子棋盒(only 個盒), 仲要以此為賣點標榜自己係 "在旺角找到home feel" 的時候.....

....你就會明白點解我寧願幫襯大財團 Starfucks, Specific Coffee 等等....

地：荃灣廣場 3/F

電： 2783-9991

Candi & Kenny's Wedding

我表姐佢結婚lu。

一朝早起身﹐起唔切啦當然。於是就要三扒兩撥咁著好一套所謂的西裝﹐但係因為人窮志短 (只係志短﹐其他的都很長*_^) ﹐所以得一套夏天西裝﹐都要頂硬上….雖然今日只係得十四定十三度。

唯一可以做的事﹐就係加強「餡料」﹐係薄薄的裇衫底下﹐係兩件厚內衣﹐一件厚棉﹐一條條厚厚的縫線﹐睇得出呢件都幾勁﹐再加一件菊花牌長袖﹐將保暖力 extend 到兩袖。就係咁多。再加兩件毫無保暖作用的 Shirt & Jacket.

對腳都係靠佢…因為我無厚褲亦無保暖用的打底褲。都係著for 夏天的薄褲﹐冬季季候風一走過來同我 say hi 就凍到縮晒。

剛剛起身無耐﹐其實都好凍下。但係因為阿爸話係十一點鐘﹐所以都唔理得咁多﹐求其叮杯暖水飲兩啖當自己個身好暖﹐就立即飛的出門。如果我再早d 出問口的話﹐就唔使自己一個挨貴的啦。

點知去到﹐原來十一點只係準備影相的時間﹐十一點九先係註冊﹐妖…早之係咁我梳靚個頭先來呀。

影左一輪﹐發現文老表原來都係同我同病相憐﹐都係著「盛夏裝」。不過唔同的係﹐佢有錢去義大利買一件大絨褸保暖﹐我只得件大陸製造的紙紮來做當褸著。說時遲那時快﹐又有一陣清風吹過…好凍。走去買盒維他奶諗住暖暖身﹐點知山頂纜車站周圍都係無七仔的﹐唯有幫襯車仔檔﹐點知凍的﹐飲完﹐仲凍。救命。

最偉大的太陽伯伯﹐總算今日有開工。唔理太陽底下的其實企緊另一家人﹐我唯有立即「鼠」去取一取暖。

一月尾都算隆冬﹐Overhead Sun的角度雖然已經大過 23.5 度﹐但係都唔慌高得去邊。將近正午的太陽係最直照最猛的﹐但係呢個冬季季候風肆虐的香港﹐陽光再猛都好似個打火機仔咁暖 only. 都係企番入去室內最暖。

等多一陣﹐就可以去影相﹐正當我以為係上香港公園的註冊處的時候﹐原來係去私人公司做註冊。係喎﹐都唔記得左原來依家係可以係私人公司度做結婚註冊的添。

間野叫做「伊甸園」﹐係纜車站大樓上面其中一層的 office. 我去到﹐發現佢由朝早九點到下什五點鐘都有人來註冊﹐係排到 full 晒個種！成張 list 我諗起碼有二十幾對 couples. 嘩﹐乜香港有咁多人結婚架咩？又話d 人依家唔鐘意結婚的？好多人咁喎。

呢個地方其實一個一層過的 office 仔。其實都好細﹐佢地改裝左佢做個註冊場﹐其中一個最重要的地方就係個 hall, 但因為係舊式 office, 其實樓底係超低﹐一d “Hall” 的感覺都無﹐而且個 hall 佔地都甚大﹐基本上都用左佢成個 area 的將近一半。外有兩間房仔﹐作為新娘執好自己個樣的新娘房。有一個偏廳﹐俾親友「進場」之前等候等候。就係咁多。

有幾多人呢？就係上一場的人剛剛行完婚禮﹐佢地的親友都未出得晒來﹐我地就拿拿聲入去﹐到我地完左之後﹐想坐係度多兩分鐘都唔得﹐因為前後門都開左﹐然後下一場的親友竟然已經湧緊入來！嘩﹐咩事呀﹐我地都仲好多人坐緊係度﹐其他人已經湧緊入來﹐一時間﹐呢個所謂的 hall 擠滿左十幾家人﹐幾十個朋友﹐近百名親友﹐亂作一團。救命。OK 我明白你好生意﹐又明白你要做生意﹐但係婚禮禮成咁大件事﹐俾我地留多兩分鐘 savour 一下呢個人生中咁重要的 moment, 都好卦？

大功告成﹐但阿媽已經覺得好病。無辦法﹐始終佢係韓國病完一大輪番來之後﹐就一路係咁病﹐病足四日都未好得番晒。今次的婚禮我都覺得佢係勉強撐落去。咁於是佢好快就話要番屋企喇﹐咁我又唔想過尖咀飲茶﹐就拿拿聲同佢飛的番屋企啦。

番到去無野做﹐又唔記得要番公司 upload 尋日應該要 upload 的 report, 一味掛住打機﹐跟住又到夜晚的擺酒。

雖然今次係係酒店擺酒﹐都真係幾豪華﹐不過弊就弊在﹐個樓底﹐實在係太矮…

基本上﹐佢矮到以我一米七的身高﹐出力跳起都會掂到天花板咁矮。咁你話幾矮。當呢個情況放係一個廿五圍的酒席裡面的時候﹐就更加覺得超矮。主家席的前面﹐連台都無。主辦單位雖然係安排左魔術表演﹐但係因為無台的關係﹐基本上都只係頭幾檯睇得到﹐其餘的人嘛…繼續食翅囉。

老豆食食下翅中途被安排中玩魔術﹐好明顯佢個樣就係不情不願咁。HAHAHA...

今晚的野食幾好食的﹐起碼我都食得幾開心﹐同埋好多。

其餘的都唔講喇﹐因為差唔多個個婚禮都有的環節。唯一一個比較特別的﹐是有一個送玫瑰花的環節。材料係新娘一個﹐新郎一個﹐助手一個﹐賓客幾十個﹐玫瑰花九十九枝﹐經典歌曲 “Dream a Little Dream” (金莎朱古力主題曲) 一首不停播。首先將新娘放埋一邊﹐備用。賓客數十名分佈於會場大道兩邊﹐不分大小長幼高矮肥瘦﹐人人一枝玫瑰花在手。新郎哥放係走廊盡處主家席前﹐手執幾枝玫瑰﹐又係備用。

音樂一起﹐新娘進場﹐親戚朋友同事之餘此類三唔識七九唔搭八﹐紛紛夾道相迎送上紅玫瑰一枝﹐新娘子笑不攏嘴﹐慢慢地向前走著﹐慢慢地跟每一位道謝﹐金莎朱古力的主題曲於背後縈繞著。有穿得一身全套西裝的小朋友送上玫瑰﹐新娘子更為和顏悅色。近日枝玫瑰當然非一雙手所能盡持﹐後隨的助手其實是人肉大花瓶。走廊盡處是新郎哥﹐拿著手上最後十幾枝玫瑰﹐連同助手運到的﹐合共九十九枝長長久久﹐於眾賓客前半跪於地﹐送于新娘子。新郎哥自己便是第一百枝玫瑰﹐連同自己一起送給新娘子﹐百年好合﹐浪漫滿屋。

禮成~

環球嘉年華

由於預計自己都唔會做得長﹐而且開始左 2007 年之後都未請過假(車！開始左幾耐姐？一個月都未夠！)﹐所以想搵個機會 spend 咁d AL。

於是「本日休業」。

本來諗住可以下午的時候就去到嘉年華﹐但係因為阿媽條腰有問題 + 大少奶發脾氣所以 delay 左好耐﹐再加上要趕住買過對新鞋﹐Happy shopping 完一輪之後﹐去到金鐘的時候太陽伯伯都放左工。

基本上今次因為變左一次過入場收費﹐入到去之後玩機動遊戲就唔使錢(tokens)﹐所以變相地比以前的逐樣計錢吸收好多。而且唔知係唔係今次生意無想像中咁好﹐定係一開始定價太高﹐佢地推出左一個 weekday special package. 無分日夜場全日都係 $120 送唔知 25 定 30 個 tokens.

其實感覺上就好似係抵左咁的﹐因為話晒以前係玩每一樣野都要計錢架嘛。又每一個 item 都係四五十蚊咁呢﹐好似好貴咁。於是其實都係去的人多玩的人少。大家都係睇下玩下就算數。我諗佢地都 realize 到呢個營運方式﹐似乎唔係好適合香港地呢個咁多咁「小家」的人的地方。於是佢地都轉左做一次性入場收費。

咁好明顯各位「小家的人」就覺得俾一舊錢有得入去玩到盡﹐好似抵好多。而且玩起上來的感覺又會好似放好多﹐因為反正都俾左錢﹐唔玩盡佢就 wasted. 於是就會玩得開心左。另一方面﹐其實好多人都唔會玩咁多機動遊戲。咁其實個嘉年華仲賺左添因為你唔係「玩番夠本」呀嘛。

另一方面其實機動遊戲唔來都來左﹐而且又開著晒 up and running, d crew 唔請都請左。擺左係度﹐無理由咁浪費架？又無理由得小貓三數隻俾左錢就特登開成部 Top Buzz 俾佢架嘛。所以一次性入場收費套用係香港﹐其實搵得錢仲多。醒目。

詳情可以查詢你的經濟師, haha.

至於機動遊戲...都差唔多係果d 野。G-force, 跳樓機﹐Top Buzz, 踫踫車﹐兩種過山車﹐鬼屋﹐兩種會濕身的激流旅程﹐唔幸福的摩天輪 (因為六七個人一 car)。比較特別的係 (我覺得) 大滑梯。行幾層樓上到去﹐坐住個麻包袋 "sir" 番落來﹐成條滑梯起起伏伏似以前水上樂園的名作「五彩天梯」咁﹐都幾好玩架。

我諗「五彩天梯」應該仲好玩呀﹐可惜係我從來都未去過水上樂園。依家都似係無希望...

你話如果水上樂園重開的話﹐將會係幾咁盛大的一件事呢...

你見每個夏天都有咁多人逼係各大沙灘同泳池﹐就知有得做啦！....但係冬天又點好呢？成個樂園都食穀種乎？

諗得掂冬天可以點﹐我諗呢盤生意都算得過....

一雙憂鬱的眼睛

佢叫「拖肥」﹐今年都六歲喇。佢主人話﹐佢係臘腸狗同北京狗混種。


唔怪得佢的眼神﹐特別殺食﹐特別憂鬱。

佢主人係渣甸坊開店﹐似乎係同附近的檔口一樣係賣女裝內衣褲的。有一次我經過的時候一「立」眼見到有隻狗﹐就走埋去睇下。

咁就認識左拖肥。

平時我每日番工放工放 lunch 的時候﹐都會經過佢的檔口。每次都忍唔住望下﹐睇下佢係唔係度。如果佢開緊檔﹐通常都會走過去同佢 say hi, 摸下佢的頸﹐讚下佢乖。

不過因為渣甸街真係好窄好窄。人流一多起上來﹐我想企係對面士多望下佢都好難。更莫講話上前摸下佢。


不過今日好好彩﹐老板娘早開工﹐其他人又未開檔﹐就有好多空位俾我埋去。於是我就乘機同來影番輯即興沙龍

"你睇佢d 眼神幾憂鬱"

佢平時都係咁架﹐望親你個樣都淚眼汪汪﹐想喊想喊咁﹐好淒涼。

而且佢又好乖喎﹐唔會亂走﹐唔亂吠﹐唔會周圍「聞」其他人。我見老板娘叫佢 stay, 跟住行過條馬路掉完垃圾番來﹐拖肥都仲好乖咁坐係度等佢 - 就算係經過的車輛將佢地兩個的視線切斷左。

其實呢一年幾以來﹐我好想同佢玩。但係無辦法﹐因為太多人行過﹐個位又太逼喇。同埋老實講﹐阿老板娘的檔口其實真係好細好細個......我一個大麻甩佬已經可以混晒佢成個檔口的桔.....咁我又點好意思係阻住晒人地-所有-的生意呢。

行次如果你行過﹐都可以探下佢﹐睇下佢係唔係度。(拖肥的檔係卓悅果邊)

又發狗瘟

你睇佢對眼幾精靈﹐幾可愛！

個表情又無知﹐又純情﹐又可愛！

簡直係呃到晒所有人呀 - 除左見識過佢幾頑皮的人........

p.s. 佢呢件衫的背脊係繡左一條金龍架！黑幫大佬來架！

HKAPA Dance Studio

終於都俾我有機會影到佢一幅相喇

好鐘意呢個地方﹐因為佢夠大﹐又有勁~大塊鏡﹐仲有好舒服的地板添。 唔著鞋咁係度 「先」來「先」去﹐好好玩

下次一定要記得買到對 Jazz shoes 先得。

太荒謬, 還是太虛偽?

都市日報 兵器譜 梁文道、邵家臻 2007-01-22

持 平

讓我們想像一下，有一家電視台拍了一部關於老人晚年生活的紀錄片，裏頭的長者過得真是淒苦，既無社會關懷，更沒有家人的陪伴照料。片子裏還有老人抱怨在人口日漸高齡化的年頭裏，公共醫療資源緊絀，竟然有人建議公立醫院可以減少「非必要的急救措施」，老人家覺得這是歧視長者，巴不得他們死快點。

這個節目播出之後，立刻引來爭議，其中聲音最響亮的是一個叫做「春天社」的青年組織。他們認為這個節目太過偏頗，只訪問了一堆老人，卻完全沒有青年人的聲音，尤其關於「非必要的急救措施」一事，社會仍有爭議，怎可能只讓主張老人生命權的一方發言，卻禁止關注年輕納稅人負擔的那一派說話呢？

後來主管廣播政策和節目內容的審議機構收到投訴，覺得有理，於是判定這家電視台不夠公允，在處理老人問題有失偏頗，單面地宣揚老人權利。記者拿 著 這一紙判決去訪問「春天社」，他們的發言人誠懇地表示：「其實我們不是不許傳媒機構探討老人生活，只不過社會對老人問題仍有爭議，年齡歧視法案也正在辯論之中，這個節目會使人誤會大家都接受了長者不該被歧視的意見。所以負責任的傳媒應該認真反省。」


假如你覺得這個故事太過荒謬，那麼你如何看待最近廣管局裁定港台的《鏗鏘集》「報道內容不公…… 鼓吹同性戀」一事呢？

根據廣管局的說法，《鏗鏘集》裏《同志．戀人》這一集節目應該 持平，不能只是播出同性戀者的說法。如今這套紀錄片專注描述同性戀者受到的社會壓力，卻不訪問持相反意見的市民，有宣傳同性戀之嫌。而「明光社」的總幹事蔡志森也認同廣管局的說法，覺得港台偏袒同性戀。他還強調「不是不可探討同性戀」，只不過覺得傳媒應該「認真反省」。

到底甚麼才叫「持平」呢？假如拍同性戀一定要注入非同志的聲音，那麼拍老人是否也該有青年的說法，拍新界原居民也必須有非原居民亮相，拍大國崛起不能不談小國衰亡，談虐待動物則不得不採訪幾個主張虐畜有理的人吧。其實這裏的關鍵根本不是「持平」，而是比起老人、原居民與新移民，同性戀更是一個問題。

為甚麼廣管局不老實承認自己就是覺得同性戀有問題，而要惺惺作態地拿一個聽來很專業很中性的「持平」出來當說辭呢？至於「明光社」，也大可不用講甚麼「不是不可探討同性戀」，何不乾脆表明自己就是反對同性戀，不喜歡人家把同志拍得好像備受壓逼似的。假如真要拍這個課題，起碼也要有一半時間聽聽他們的說法才算持平；正如處理老人課題不能少了「春天社」的聲音一樣

============================================

淨係想講粗口。或者咁講﹐我朋友以前教過我一個英文字 - ass﹐用於此就係「持平 my ass!」

呢個香港就係咁﹐或者話中國人咁多年來都係咁。講真話的人﹐都要死。

魯迅話過﹐從前有一家人生了一個男孩子﹐全村歡騰。大家都來見見孩子﹐說盡一切好說話。 「這個孩子將來會成達官貴人的」「這個孩子將來會是家財萬貫的」「這個孩子將來要是成龍成鳳的」最後一個人說「這個孩子將來是要死的」

結果此人當場被眾村民一怒之下活活打死。

今日情況似乎沒有甚麼分別﹐只是有更多的「村民」戴起面具﹐將作一副很包容﹐很有道理﹐很有智慧的樣子﹐笑瞇瞇的把說實話的人打死。

然後說：「我打死你~ 唔係因為我唔鐘意你~ 只係費事人地以為我鐘意你者~」

皇后餅店的椰絲奶油飽

點解我總係擺脫唔到椰絲奶油飽的誘惑的呢？

其實佢明明係一個幾普通的飽﹐無乜料﹐無乜特別餡﹐無乜味。

但係我就係一而再，再而三咁食。

而且明明我係明白到﹐奶油呢家野﹐其實即係脂肪....好高 percentage 的脂肪。

前幾個星期日日咁食﹐真係可以明顯地 feel 到自己係肥左架。

連自己都 feel 到的速度﹐就真係一個肥得好快的速度。

天呀。

而且只係老銅皇后餅店出的﹐先係最好味。其他餅店出的﹐唔得。

點解我總係擺脫唔到椰絲奶油飽的誘惑的呢？

終於都食到之 Burger King

話說香港有間 Burger King﹐但係機場的禁區之內。聽聞好出名架喎﹐但係我唔好彩未聽過。

後來言傳﹐話佢地會開第一間市區分店。正當大家好開心咁諗會係邊度的時候﹐原來佢開係 - 山頂。

無錯﹐The Peak。

好 L 遠咩？幾啦。睇下你係唔係好似我咁住港島。不過俾你住得港島﹐其實都唔會縮短左幾多車程。

是日駝住阿 Mark 哥無事可做。我提議不如上山頂公園﹐一來可以放狗 (而且仲有好多有錢人家放狗添)﹐二來又可以睇下「寒霧嵐頂」的風景﹐三來仲可以試到「傳說中的」 Burger King 添。

一於就山長水遠咁搭車入去。

話就話「山頂」﹐但對香港有少少認識的人都知佢其實唔係「頂」﹐而且一d 都唔高﹐極其量都只能算係個「丘」。

點知上到去﹐好~~凍~~

好彩我著多一件背心底同埋著埋件 501 出品大褸﹐但係都好似當年阿里山咁凍。Mark 爺雖然貴為德國名種的後裔﹐有兩層披毛一長一短﹐但係因為新剪毛的關係﹐個小肥腩無左層長披毛遮住﹐d 風一吹過 「呼~~~」咁﹐佢就當堂凍到「震震震~~~震震震~~~」咁﹐好鬼可愛！

唯有俾件衫仔佢著﹐再對摺一野「加厚」佢。再放入袋。

講番個 Burger King。我地食左個煙肉芝士華堡餐﹐另外一個咩咩磨姑芝士乜乜堡餐﹐都係叫最貴的兩個餐 - 一場來到嘛。都唔知有無下次。兩個餐都 > $50 @

兩個餐加個所謂炸雞柳﹐咁就 $121 ！

真係貴到你驚。

食完﹐係好好味﹐真係同麥記差幾皮﹐果個磨姑芝士漢堡直頭食到我想番兜......but the point is ﹐佢的價錢差好多皮喎。

And then, 佢無乜特別汽水供應。都係果幾味。本來 expect 住新的「沖擊」﹐都無埋。之所以我鐘意以前 Hardees, 就係因為佢起碼多元化過老麥好多﹐肯試﹐肯創新。當時 Fanta 出左一系列的「化學水」﹐例如青綠色的青蘋果汽水﹐藍色的 blueberry 汽水等等﹐個樣好「化學」的﹐但係佢都夠膽拿來做汽水唔使加錢跟 set 有得飲。我當年好鐘意 green apple flavour 架。

跟住﹐最失望的係：炸傻條！

食左咁多年麥記﹐真係好想食其他 variety 的炸傻條。因為真係好悶。唔係麥記的唔好食﹐平心而論﹐以味論味(?!)﹐麥記的炸傻條係好食的。

但悶呀嘛﹐大佬！

有幸地去過 New York﹐雖然印象唔深﹐但係記憶中佢地有個牌子叫做 New York Fries, 好食到癲。

山頂的 Burger King﹐$50 一個餐﹐一杯超大汽水一個漢堡一包炸傻條﹐個傻條﹐係同麥記的﹐無分別。

怎教人能不失望？

係咪我的期望過大呢？

下一站睇來真係要等我屋企樓下的 MOS Burger 開張....

地： 太平山頂凌宵閣 1/F (一入左邊門口﹐左邊有 spiral staircase 上)
電：31711984
必食： 磨姑芝士堡
避食： 炸傻條

HOCC Live in Unity 2007!

無錯！就係何韻詩演唱會 Vol. 2！

上次佢 Vol. 1 的時候錯過左﹐唔識得可惜住。今次有朋友班到飛番來﹐當然係要去睇啦。

Ivan 笑我買 $200 喎。攪錯呀﹐大佬﹐我呢d 窮下鄉農﹐買 $200 差唔多喇﹐無錢呀。

點知睇完之後先後悔無買 $400 。真係好好睇呀﹐成個演唱會基本上係一個 show﹐好多野睇。整下睇下個咁有 designer's feel 的舞台已經係值回票價﹐成個 stage set 都好有睇頭﹐而且睇得出好用心機去 design ﹐不甘於一般普普通通又係彈出來的舞台。

貫徹何韻詩性格 - 內有乾坤大不同。

老實講﹐歌我就唔識得晒。好多都係聽過下﹐識哼幾句﹐或者識個 melody ﹐就係咁。

全場至愛係懷舊 80's 金光燦爛的一段。全場都 high 晒﹐非常好睇﹐跳舞好睇﹐唱歌好聽﹐選曲好岩 feel ﹐真係無得頂﹐睇得好開心。早之買 $400 企埋起身。

不過係 d dancers 唔知係咪綵排時間短﹐好似無乜 mark 過﹐十幾個人都跳到鬆鬆散散﹐各自各的。

如果佢開 Vol. 3 的話﹐記得單聲我話我知﹐我實追！

發狗瘟

係我囉。係我發「狗瘟」囉。所以要勁貼佢的靚仔相。

你睇佢個「鬆」幾大個！仲勁過咩健美先生的大「鬆之」

所以攪到佢要著加大碼的衫仔....

更多的相 suppose 可以係最底下面個 flash slideshow 度睇到 (我用 "suppose" 因為唔知點解唔係好 stable)

淨係 post 呢張係度﹐因為呢張最型﹐我用來係公司的電腦做 desktop wallpaper!

yeah!

Bad Mood Day

今日心情超級的差。

唔知做乜野﹐又唔係話有乜野事發生左﹐公司裡面又無收到其他人的「說話」﹐屋企人都無﹐全日都過得好太平﹐但係就係非常之「I am nothing, nothing to me」。

唔知係咪呢排熱氣得滯﹐有朋友話佢熱氣得滯的話夜晚好難先訓得著。起初我笑佢作大﹐呢幾日就報應係自己的身上﹐晚晚明明累到 PK﹐但都訓係張床度眼光光成粒鐘。點幾兩點上床﹐三點都仲望住個鐘係度發呆。越不滿意﹐越多念頭。念頭越多﹐越難入睡。越係望住個鐘就越訓唔著。失眠第一大忌就係望住個鐘計下自己仲可以有幾多個鐘頭訓。

一星期五晚都係咁喎！好辛苦呀大佬。

累積到尋日﹐再加埋公司無野做…其實有野做架﹐但係因為個 database 淨番的 CONT 我唔想理…太煩啦﹐我做左一年﹐乜野煩野未見過？ (迷之聲：見得咁少都仲係度懶勁) 但係今次呢個 CONT 真係超勁激喪煩。我相信如果係我公司裡面個班身嬌肉貴的經紀大帝們去做的話﹐一定跳晒樓都未天光。

其他的事都因為太多人係附近乜野都做唔到。好灰。

好多個 moment 我都好想打人﹐又好想大叫。但係礙於環境所限﹐我去到廁所逃避﹐都唔覺得心境有所開朗﹐我想做個 slide 來「豪放」一下 - 都幾乎扭親腳。頂。

好累﹐好肚餓﹐好眼訓﹐好悶﹐好厭﹐好想走﹐成個 mood 都奇差無比。我會形容為一個「要跳幾十次 bungee jump 先能平服」的心情。

好辛苦先等到放工﹐乜都唔理﹐為求「解脫」﹐我第一時間諗到最能夠「解脫」我的方法﹐就係食！

食食食！

即刻過去 Queen’s 買個「薄餅」食下﹐足足 $7 ﹐你都估到有幾大個。食完之後行到寵物街﹐再食香港仔綠 van 站前面的燒賣。企多一陣又見到佢炸起一大堆桌球咁大粒的野﹐問佢咩來的﹐佢話係炸魚蛋。嘩﹐少理那星﹐係咪咁 L 大粒呀？整串來試下有乜 G 咁巴閉？！ (是日心情奇差粗口滿天飛好唔要得)。

基本上除左一口氣勁食完開心番﹐同埋飽番之外﹐就係因為最後一口氣食晒四粒剛炸起的魚蛋﹐滯到飛起。

再去世貿打機燒銀紙﹐終於都開心番d。

A campaign that has so many fishes

唔記得幾時﹐睇過討論區裡面有位人兄﹐話自己係機場做地勤。佢話其實有多人係搵航空公司著數﹐係度發晒爛咋咁﹐無非都係想玩謝d airlines 為搏可以得到例如免費升級呀﹐甚至係免費機票等等﹐無所不用其極。

But the point is, 其實航空公司又點會咁輕易就俾 Jackso 你？人人都可以發爛咋就 upgrade 到 business 甚至係 first class 的話﹐仲得了的？於是上頭當然就話唔得。咁做下面前線的員工就真係「啞子吃黃蓮﹐有苦自己知」。

係自己面前就有一個好似食錯藥﹐連我老豆老母都拉埋落水的癲佬 / 癲婆﹐後面就有個老世的陰影係度話「你試下俾佢呀喇！」﹐遲早攪到份工都無埋又係拉埋老豆老母落水咁樣。不必親歷其景﹐就咁一「聽」個畫面已經覺得好慘。

當事人大吐苦水﹐本來都係大陸人比較容易發癲﹐香港人都叫做有修養。依家唔知係咪回歸祖國溝雜左﹐再加上劉華的一個「今時今日咁的服務態度」﹐攪到連香港人都係喪家狗一樣亂吠。因為劉華的一個廣告﹐客人大多都變本加厲﹐越來越惡﹐覺得自己俾幾個錢就係大帝﹐所有服務佢的人員都只係佢的狗﹐可鬧可打可侮辱﹐永無還手﹐仲好玩過打沙包 – 沙包唔會有一個好委屈好憤怒又唔出得聲的樣俾你指住來笑架嘛, right?

苦主說﹐係外國﹐「攪事」的客人 airlines 係可以唔使俾面佢的。但呢度係有劉華荼毒過的香港。

或者苦主有一腔怨憤無處洩﹐爆發出來的時候﹐所有有關係的事情都被拖下水﹐包括劉華的 campaign 。 但其實我自己都認為﹐劉華這一個「今時今日」的 campaign 做左咁耐﹐成效已見﹐但所謂「成效」﹐整體來說﹐弊多於利。除了喚醒服務業對維持自身專業的重要性之外﹐其實係攪到一獲泡。

昨日食完 lunch 行街街﹐一路塞住對耳聽卓韻芝的節目 (唔知乜野名)﹐咁岩佢就係講緊服務業。

佢話自己搵樓搬﹐但個個經紀都係唔聽你講野﹐一味同你講幾個 point: 呢個景有幾咁好﹐望馬場; 呢度有十房九廳夠晒豪夠晒 ; 呢度附近有阿唔知邊個名人住 ; 呢度附近有邊個住過發左達 ; 呢度係咩咩豪庭夠晒 grand ; 呢度有煙花景 …..但統統都唔係佢想要的野。佢講左好多次佢唔需要靚景招呼朋友只係自己一個人住之後﹐個經紀都係無理佢﹐繼續介紹第十八間有海景的樓盤。

唔難明解的﹐一房一廳無景﹐同三房兩廳馬場景﹐事成的話﹐果舊 commission 差好遠。

節目中的兩個主持之後又話買衫的經歷﹐其實買衫的 sales 都係無聽過佢講野。劉華的節目出街之後﹐其實係仲差左。因為果種「假誠意」﹐仲難頂過佢唔理你。一味問「我有咩可以幫到你」之後就係一味唔理你﹐其實答案好明顯 – 我寧願你當初唔好問。

在商言商﹐所有野都係企業化﹐集團化﹐咁自然就會係「公式化」。公式化起上來﹐連本來唔可能公式化的「禮貌」都可以「一體化」。

有前 chain boutique員工爆料﹐連「舖頭無客人的時候摺衫都要笑住來摺」。有無病呀。

到頭來﹐求仁得仁﹐要求服務員「好照顧你需要」地不停咁你想點﹐於是佢就一味問﹐問完就算。服務員無計可施﹐因為佢根本就唔識 / 唔可以再做多一步﹐於是佢就重覆又重覆可以做的野 – 一係問你想點﹐一係話你聽佢唔可以點。

所謂「今時今日咁的服務態度」campaign﹐做唔到理想中的完美服務業之餘﹐只係反效果地做出今時今日這個顧客&服務員都不滿的 lose-lose 的局面。

直接些說句﹐就是「多9 餘」。

因陀羅

Copied from Wikipedia:

因陀羅（梵語：इन्द्र，Indra），佛教古籍翻譯為「帝釋天」，別名是zakra，意思為「最勝、最優秀、最優越、征服」，本是雅利安人共同尊奉的神明，對它的信仰隨雅麗安人進入印度，曾一度是諸神的領袖、雷電神和戰神，空界的主宰。

依家玩緊 Monster Hunter Portable, 手上拿住的片手劍係「電光」﹐下一個升級的目標就係呢把勁野 – 因陀羅。劍如其名﹐因陀羅係一把有雷屬性的劍﹐而且防禦 + 2, 不過就要 10 個電氣袋 & 橡膠質的皮。係我打左 N 咁多隻電龍和毒怪鳥之後﹐又要去 N 咁多次沼地採集 20 個雷光蟲。今個 lunch time 終於儲夠的時候﹐先發現我材料足﹐但銀兩不足 - 大拿拿成六萬銀。

又要不停咁搬火藥岩來搵錢。

陰公﹐原來打機同做人都一樣﹐想搵錢都係要去做「孤哩」(苦力)﹐係危險的火山搬石頭來搵錢。陰公﹐打機的情節攪到都好似宣明會的故事咁。

「Hunter Uranus, 23 歲, 雙手因搬火藥岩過度勞損導致手骨變型﹐雙腿因多次被大野豬撞至PK而發軟」

第二屆香港寵物節暨國際寵物用品博覽

個名好長。我都淨係叫佢「九展個 show」﹐但其實人地都唔係 show...老屈

案發地點係九龍灣展貿中心﹐去之前驚唔識去於是上 Centamap 查下﹐發現原來呢個都未係佢最長的全名…要咁長的名來做乜呢？

原來係九龍灣地鐵站上面行十分鐘就已經有 Shuttle Bus 一車車豬仔咁運我地過去﹐咁我上網查咁耐為乜？唉﹐有時蠢呢家野真係無得醫。

好開心咁帶埋我心愛的 Mark Mark 去﹐發現原來會場根本就唔 check 晶片﹐唔睇針咭﹐咁我千里迢迢帶晒來做乜野？又係佢地係 poster 度講明要呢樣要個樣的？我記得幾年前我去一次係九展攪的狗展的時候﹐都係要晶片架喎！攪錯...我想叫佢「唔該你 check 啦我特登帶出來架你做下好心check 下啦」....

$25 一個人的入場費﹐其實都唔算平。

好有 expectation 咁入到去﹐發現真係好似書展咁多人﹐好逼﹐而通常每 2 – 3 個人就會帶一隻狗﹐好多人仲係「一拖三」咁去添。我好少去呢d event, 於是突然間見到咁多人養狗﹐好似好新奇咁。真係乜野狗都有﹐細到好似芝娃娃﹐大到聖班納都有好幾隻。

入到去﹐發覺除左人多狗多外﹐就係狗的「印記」都好多。因為狗唔似人咁樣會有文化﹐知道邊度可以去大小二便邊度唔可以﹐出到街﹐邊度都係佢的遊樂場﹐又邊度都係佢的廁所。尤其對於狗來講﹐小便係宣示地盤的主要途徑﹐咁多其他 “competitors” 係同一個場內﹐當然就要更加「努力霸地盤」啦。淨係阿 Mark 一入到場就已經痾左幾篤。我第一次去﹐乜都唔識﹐都唔知抹唔抹好﹐好在同親佢出街都帶一大卷廚房用抹手紙……雖然係好唔環保﹐但係無辦法 – 難道要用地布去吸？

基於阿 Mark 好多時都會以為其他狗係佢的敵人﹐加上佢細個的時候俾主人打得多﹐本來已經好勝的性格﹐再加上被打後的不知所指﹐所以佢特別容易神經緊張﹐經常會以為其他人係佢的敵人。其他出得街少﹐係 Socialization Period 見得世面少的狗都有咁的問題﹐其他的狗會 either 出於害怕或基於自衛而吠﹐勁吠。通常咁樣好多人都會話「隻狗好惡係咁吠」﹐但實情係佢驚到痺。但阿 mark 的問題係佢唔會吠﹐佢主人就係因為唔俾佢吠而打佢﹐於是佢就將個 fear internalize﹐變成更深沉。 但唔係咬人果種﹐係做大佬果種。咁阿 Mark 又唔會咬人﹐亦唔會咬狗﹐因為佢自少就淨係同人相處多﹐同狗相處少﹐可能佢會以為自己係人仔來架添。

咦？講到咁遠的﹐我頭先講緊咩架？…呀係！佢想「擒」其他狗呀。好多人以為呢個擒的表現就係代表想性交的表現﹐well, 人就係的﹐狗就未必。因為呢種係表現出自己有幾大隻﹐有幾勁的方法﹐目的其實係要「侮辱」對手﹐來話俾對手聽「你唔掂呀你﹐做一隻比我低級的狗啦﹐我先係大佬」。人都有呢樣野﹐就係小便落對方身上 / 對方用品上作為侮辱。這一種宣示 dominance的方法似乎係動物間一種好深層的意識型態﹐而且頗有共通之處。

但好多狗主都唔識呢樣野架嘛。

於是﹐係一個咁多「對手」的場館入面﹐佢就「好忙」咁要周圍話俾人聽佢先係大佬。哎吔﹐Mark 哥﹐我就真係叫你一聲「大佬」喇。你咁攪法點得掂呀。

雖然大家都明白現場好多狗﹐在場人士大部份都有「小心腳步」﹐但多人成咁﹐佢又矮又黑﹐踩到佢變「史餅」都未行完。然後佢又要周圍「宣示主權」﹐因為九展個場「係我的」。然後仲有好多唔願意做佢「手下」的「刁民」﹐佢要逐一「挑戰」﹐然後逼到佢「認輸」。

天呀。我先無你咁好氣。一手抱起佢﹐打橫「擔」係肩膀上﹐抬豬仔咁抬。

一了百了。

行左一陣﹐無乜野睇﹐發現唔記得買水蓋俾佢飲水﹐拿拿聲出去油站買支細屈臣氏水﹐再番入場﹐不另收費。原來仲有 Hall B, 過左去﹐嘩﹐大好多﹐咁先似樣架嘛。

跟住見到有個 area 係好似迷宮咁的﹐見到有個肥佬係度搏命叫﹐但係迷宮門口的哥基就總係唔肯 (其實係唔敢) 行入去迷宮盡頭搵佢的主人。場面都幾攪笑。睇來呢度係一個玩遊戲的地方﹐主人企到入去迷宮的盡頭就叫狗狗入來搵去。迷宮的圍版差唔多去到人的腰咁高﹐所以狗狗都睇你唔到﹐unless 跳起。咁狗狗就要聽你的叫聲來搵你。

睇睇水牌﹐原來呢個係有獎遊戲﹐最快的「參賽者」可以得到狗糧一包。我地睇睇個牌﹐最快紀綠係十秒。十秒就行晒個迷宮﹐雖然唔係好大﹐但係都算係好快喎。對於阿 Mark 哥﹐我地都係半信半疑。

好似幾好玩咁喎。左右無事﹐條隊又唔多人﹐就排下隊玩下囉。

排緊隊的時候睇見前面有好多「參賽者」﹐唔係跑到不知方向﹐就係一落地就太驚企定定唔識郁﹐或者係跑出一陣見唔對路「肴底」跑出迷宮唔知去左邊﹐或者係唔願走回頭望望主人二號雙眼水汪汪的可憐到不得了﹐或者係行到半路見到「咦！有波玩喎！」跟住就連主人都拋諸腦後係迷宮中間掛住玩波叫極都唔應 (迷宮中有幾個波分散狗狗注意力)﹐或者係好興奮咁又跳又叫 – 就係唔去搵個主人係邊﹐或者係太驚但係唔搵主人唔得於是慢~慢~行~﹐或者係太驚行到一半坐係度話「我都係唔玩喇」……..總之就笑到你死。

排左一陣﹐就到阿 Mark。我地商量好之後﹐Kev 就拿腸仔引佢﹐引到佢不知幾興奮。我就係起點 hold 住佢﹐唔好俾佢出去住。等到阿 Kev 縮低左個人﹐工作人員話「開始！」﹐我就俾手勢﹐勁叫阿 Mark GO!GO!GO!...

好彩平時的訓練裡面﹐Kev & Mark 已經好熟﹐佢地的默契真係無懈可擊。Mark 等咁耐就係為左等我呢句 GO!~ ﹐所以一開跑就立即四足飛踏﹐恍如離地﹐頭向前﹐耳向後﹐背脊拉直﹐身體流線﹐如拉滿了的弓射出的飛箭！呢部「黑色法拉利」起步好快﹐發動二千匹「狗力」﹐由 0 至 100 只係須要兩秒﹐世上難尋第二部呀。我企係後面係感受到一道夾雜著灰塵的風撲面而來﹐好似同我講「食我塵啦你」！

Mark 一跑出﹐笑左咁耐的圍觀眾終於到意識到今次會有野睇﹐正當大家都開口大叫「嘩….」「好快呀跑得」「你睇下你睇下佢」「好勁呀」的時候﹐其實佢已經跑過左頭兩截的大直路﹐開始轉最後三個彎。

Kev 開始意會到 Mark 比預期中快到大彎位﹐於是加劇他那趕羊式的喪叫 「Mark! Come! Mark! Come!...」 場外圍觀者越趨嘩然﹐我越想佢更快﹐Kev 亦叫得佢越急﹐佢亦衝得越快。轉多一個 L 字彎﹐再加最後一個 S 字彎﹐我已經見不到他的身影。

最後﹐係一片讚嘆聲﹐歡呼聲﹐Mark 的勝利狗吠聲中﹐找到了他﹐吃到了腸仔。「七秒！」工作人員說。

YEAH~~~~~! 破紀錄!

最威都係今次啦你﹐衰仔！

為左獎勵佢﹐唔單止有野俾佢食﹐仲買左三件新衫俾佢著添。好型架。一件金龍褸﹐一件毛毛褸﹐一件線衫。型爆。

之後休息的時候見到隻狗好眼熟﹐問佢叫咩名﹐佢叫拖肥。咦？九成九係佢喎。再問「拖肥係唔係係渣甸坊開舖頭架？」「係呀。」唔怪之得啦﹐就係佢。憂鬱的眼神﹐拖肥的 patent。一認就認得出。

好累﹐行左半日 (其實係逼左半日) 已經好很累。下次要重新考慮帶埋隻狗去的「必要性」….真係太逼

又係我細佬

無錯呀﹐又係佢。

依家係星期日早上四點鐘﹐係我準備訓的時候﹐我見到佢間房仲開住燈﹐於是我去睇睇。

佢訓左。但係開住燈。

佢眼鏡都無除就訓左

我搖一搖佢﹐佢醒左。我見到佢仲著住今晚出街套衫﹐完全無換過。

佢望望我﹐我望望佢﹐我見到佢個頭油到不得了﹐我問佢「你沖左涼未？」

佢搖頭。

我話「咁即係你今晚個頭上面的髮泥呀﹐Gel 呀咁﹐成頭都係﹐你都可以唔理佢照訓？」

佢唔理我

我沒好氣﹐講多句「咁你要唔要衣家起身洗左佢呀？...」

佢唔理我

我話「你真係成頭都係髮泥咁訓？」

佢唔理我

我放棄﹐心平氣和地放棄

替他關燈﹐掩門

但心中總覺得有一道怒火攻心

氣結難平

上來以文字宣洩

順道讓各方好友

見識見識本家二少爺的 「管 peah」﹐到底﹐可以去到有幾盡﹐可以 peah 到有幾盡

Pizza Express

我呢間公司對我都算係唔話得。每年的聖誕都會俾 $1000 你食飯。只要拿番餐廳的收據來 claim 就得﹐仲要唔限你幾多張單。一個人食一餐阿翁鮑魚又得﹐食五十餐麥記亦得﹐得左。

但係過左大半個假期我都唔記得有呢回事﹐為左拿拿聲係 deadline 之前盡快食一餐勁的 (其實都係差五百蚊咁大把)﹐就一於同屋企人一齊去食 Pizza Express (太古城店)。

地點係位於太古城的西北角角角角……非常之少去的地方。阿爸阿媽都唔識得去。一路都要我引路…其實我都要前一日去走一走先識得搵。我諗佢呢個位主要都係做對面太古坊的生意多了。

食左 Baked Dough Balls, Chicken Caesar Salad, Cannelloni (my favourite!), Parma Ham Pizza, Hot Chocolate Fudge Cake and Blueberry Cheese Cake.

整體來講幾好食。但係唔知點解﹐我覺得最好食的 Baked Dough Balls 同埋 Cannelloni 都唔及得 Soho 店咁好食。

原來依家平日夜晚有 set dinner. 都係 $380 四位。基本上我地叫咁少野食都係因為個餐係得咁少 (再加四杯 Iced Lemon Tea)。食完都唔係好飽。算係帶過爸媽來試食。80 分啦。

地：太古城高安閣地下。太古城的最西邊。毗鄰greater-太古坊 的 area. 係以前的「Jade 拉麵小籠包再過d。 隔離有間 Starbucks。 (Official Add: 港島東太古城太裕路9 號高安閣 G517)
電：3150-8800
必食：都係SOHO 店的 Cannelloni 好食d

Cannelloni!!! (好溜架﹐唔係人人頂得順﹐愛芝士者如我就最 fit!)

Parma (Ham) Pizza

What Language Should You Learn?

反正做開呢d 所謂的心理測驗﹐唔掙在做多一個。今次呢個叫做 What language should you learn?" 做完的結果係....

You Should Learn Spanish

For you, learning a language is about career advancement and communication. Knowing Spanish will bring you tons of possiblities for jobs and travel. Bárbaro!

What Language Should You Learn?

係呢個 moment, 我淨係想尖叫：

好「應棍」呀！中晒！

雖然其實我覺得佢好無稽.....

上帝造人好平衡

Your Brain is 60% Female, 40% Male

Your brain is a healthy mix of male and female You are both sensitive and savvy Rational and reasonable, you tend to keep level headed But you also tend to wear your heart on your sleeve

What Gender Is Your Brain?

Well...You know...我估唔到自己會係咁

sensitive 就係﹐savvy 就唔敢包

Rational and reasonable, 食飽訓足的時候就係﹐飢寒交迫的時候就未必

"...tend to wear your heart on your sleeve" 就唔明點解。上網查﹐解作 "express your emotions very openly" or "make your feelings very clear and obvious to everyone around you"

呢樣係真。

我一直都覺得呢個係幾嚴重的問題﹐無論係開心定唔開心的感覺﹐「收歛」這一回事﹐控制和得體與否是很重要的。很多場合底下我都因為表現得不得體而丟臉﹐多數都係一兩個人﹐一兩句對白之間﹐也試過大場面中「表現不當」的 - 正所謂「面是人地俾的﹐架是自己丟的」

"Stop playing with your food!"

"Weee Haaa...."

"Stop playing with your food!"

勁攪笑...

轉左做新的版本喇

攪足一日﹐終於都轉左佢做 New Version

Yeah

大香港主義的後遺症

有朋友 forward 左呢篇文章過來, 我一睇, 覺得感觸很深, 亦覺得「好到 point」。

雖然已經係上年十月的文章, 但係依家聽起上來, 一 d 過時的感覺都無, 仲覺得好到 point

即係話﹐香港人根本無改善過。

唔怪得真係要「哀香港」。

---------------------

天 文 台 長 林 超 英 ： 只 懂 本 土 文 化 怎 與 人 競 爭 ？

蘋果日報「我問你答」　　日期：2006年10月18日

Q ： 你 批 評 香 港 新 一 代 缺 乏 國 際 視 野 ， 可 否 舉 例 ？

A ： 去 年 天 文 台 聘 請 科 學 主 任 ， 有 超 過 四 十 人 應 徵 ， 不 少 人 是 碩 士 畢 業 生 ， 我 選 了 約 二 十 人 面 試 。 面 試 第 一 個 問 題 ， 是 要 他 們 在 一 幅 只 有 海 岸 線 和 地 勢 高 度 ， 沒 有 國 界 的 地 圖 上 指 出 香 港 的 位 置 。 (雖然我都算係睇得地圖多﹐但係只俾 contour lines 我都幾難 point 得準香港係邊度...睇下佢個 error tolerance range 有幾大啦) 誰 知 竟 有 一 半 人 不 知 道 ， 最 離 譜 的 一 個 ， 把 香 港 指 到 俄 羅 斯 以 東 的 海 參 崴 去 ， 簡 直 是 匪 夷 所 思 ！ (咁呢個又真係該死得太過份...)

能 正 確 指 出 位 置 的 ， 只 有 一 半 人 ， 我 再 要 求 他 們 指 出 中 國 的 位 置 ， 結 果 大 部 份 應 徵 者 指 的 地 方 都 不 越 過 長 江 流 域 ， 只 有 一 位 能 有 紋 路 地 大 概 指 出 中 國 的 位 置 ， 也 知 道 新 疆 等 地 方 。 我 再 考 他 ， 問 他 新 疆 以 外 是 甚 麼 地 方 ？ 答 案 是 中 亞 。 誰 知 他 想 了 一 會 ， 竟 說 是 美 國 和 加 拿 大 ！ 我 嚇 了 一 跳 ！ (喂! 唔係嘛？能夠只憑 contour lines 可以 sketch 到中國國域出來的人﹐竟然咁樣答？你答印度呀﹐伊朗呀都忍你呀...) 唉 ， 我 很 失 望 ， 真 的 很 失 望 (Me too) ！你 來 投 考 天 文 台 科 學 主 任 ， 工 作 是 預 測 香 港 天 氣 ， 連 香 港 在 哪 裡 都 不 知 道 又 怎 預 測 ？

過 去 ， 這 些 問 題 只 在 聘 請 科 學 助 理 時 才 問 ， 已 經 是 二 十 年 前 的 事 了 ， 誰 知 二 十 年 後 ， 香 港 年 輕 人 的 常 識 會 差 到 這 個 地 步 ！ 香 港 人 的 世 界 觀 ， 由 傳 媒 對 國 際 新 聞 報 道 的 多 寡 已 可 看 到 ， 我 換 過 好 幾 份 中 文 報 章 ， 原 因 是 它 們 的 國 際 新 聞 篇 幅 太 少 ， 這 情 況 一 直 沒 有 改 善 。 國 際 新 聞 篇 幅 已 經 不 多 ， 一 半 以 上 是 軟 性 新 聞 (咩叫「軟性新聞」？「硬性」的新聞又係乜野？) ， 國 際 形 勢 分 析 的 文 章 完 全 欠 奉 ， 這 樣 我 們 又 怎 能 掌 握 國 際 形 勢 ？

Q ： 香 港 新 一 代 欠 缺 國 際 視 野 的 原 因 是 甚 麼 ？

A ： 跟 我 們 的 教 育 制 度 很 有 關 係 。 學 生 在 中 三 後 已 分 了 文 理 科 ， 大 部 份 理 科 學 生 在 中 三 後 ， 便 不 用 再 接 觸 地 理 和 歷 史 。 地 理 和 歷 史 是 一 個 人 擁 有 國 際 視 野 的 根 本 。 國 際 視 野 就 是 時 和 空 ， 時 是 歷 史 ， 空 是 地 理 ， 但 香 港 一 大 部 份 人 對 地 理 和 歷 史 的 認 識 ， 只 停 留 在 中 三 階 段 ， 我 們 又 可 以 有 甚 麼 要 求 ？ 我 期 望 通 識 教 育 可 以 扭 轉 這 情 況 。(老實講﹐雖然有好多時我都覺得自己適合讀理科﹐但諗番轉頭﹐如果唔係讀左歷史同地理﹐我都唔知原來呢兩科係可以好有趣的 [亦可以好無趣啦當然]﹐絕非其他人所講一樣「超悶」，「超廢」)

另 一 個 原 因 ， 或 許 是 過 去 我 們 的 「 大 香 港 」 主 義 。 七 十 年 代 香 港 經 濟 起 飛 ， 往 後 的 三 十 年 ， 香 港 經 濟 發 展 蓬 勃 ， 大 家 只 要 專 注 自 己 的 工 作 ， 生 活 已 經 不 錯 ， 因 此 缺 乏 了 解 世 界 的 動 力 ， 也 以 為 香 港 很 了 不 起 。 當 你 稱 呼 內 地 同 胞 為 「 阿 燦 」 時 ， 你 又 怎 會 去 了 解 中 國 ？ (同意)

Q ： 政 務 司 司 長 許 仕 仁 曾 警 告 香 港 會 被 邊 緣 化 ， 你 認 同 嗎 ？ 香 港 這 個 國 際 大 都 會 的 名 堂 還 可 以 維 持 多 久 ？

A ： 我 很 悲 觀 ， 我 估 計 以 香 港 人 這 種 閉 門 造 車 的 態 度 ， 香 港 國 際 大 都 會 這 個 地 位 不 能 維 持 多 久 ， 可 能 是 二 十 到 三 十 年 左 右 ， 很 快 會 被 人 家 取 代 。 過 去 我 們 有 競 爭 力 ， 是 因 為 我 們 有 國 際 經 驗 和 視 野 ， 但 現 在 每 下 愈 況 ， 即 使 北 上 發 展 ， 我 們 也 要 跟 其 他 國 家 的 人 才 競 爭 。 如 果 你 甚 麼 都 不 懂 ， 甚 麼 都 不 會 ， 只 會 香 港 最 本 土 的 文 化 ， 又 怎 跟 別 人 競 爭 ？ (都唔緊要啦已經 - 因為連「香港最本土的文化」都已經俾人拆晒 - 啦嘛)

張 寶 華 特 約 採 訪

--------------------

p.s. 補回 31/ 12/ 2006 & 3/ 1/ 2007

Er du Deiulemar?

超灰﹐今日真係忙到想打多幾個字都唔得閒﹐唔知咩事。

番工就係咁﹐一係就好日都無封 e-mail 收到﹐成個 inbox update 極都係好似 freeze 左咁。一係呢﹐就好似今日咁﹐雪片咁飛入來。

我老世好耐之前已經講過﹐話好多人都唔理個 CoDir 入名入成點樣﹐於是個 Full Name 果一個 field 都入到鬼五馬六咁﹐到最後出 invoices 的時候﹐個名就騎呢到唔恨。

例如間公司的 registered name 係 "ABC Shipping Co., Ltd." 。大細草唔對的有(abc shipping Co LTD)﹐串錯字的有 (abbc shipppin conpany limted) ﹐隔錯空隔的有 (abcshipping col td) ﹐無空隔一串字過的都有(abcshippingcoltd)﹐連人地間公司名都串錯的都夠膽死有 (efg ship ltd)。

離 Q 晒譜。

我初初番工果幾個月﹐日日打開個 Directory 都好似去錯左「愛麗斯夢遊仙境」咁....

果陣老世都已經話﹐有人會夠膽死唔理個 full name 會好以上面提過 d 咁無譜的名﹐就出 invoice. 後果係點都唔使我講到明。熟絡的﹐就側側膊當無事算。但人地唔側側膊的時候﹐唔該唔好當人地錯喇﹐好嘛？Invoice 係 Legal documents 來架﹐個名係乜野係好大關係架﹐你出錯 invoice 仲話人地唔肯找數﹐咁人地梗係發你脾氣啦。

天呀﹐係咪d 英國人的 general administration sense 都特別差架....點解可以咁「齊心」架佢地。

今次的主角係一間叫做 "Deiulemar" 的公司....呢個字係意大利文﹐根據我薄弱的西班牙文能力﹐呢名應該讀做...刁那媽 / 刁利媽....Oh well....

唔知邊條阿茂改左佢個名做 Deiulemar Shipping...咁人地意大利佬好 Q 有原則架嘛﹐梗係唔制啦。死蠢英國鬼又唔知﹐繼續 invoice, 然後話人地 "refuse to pay"﹐你點能怪人地火都來埋。阿水都知個名唔 match 唔過得數架喇。人地個全名叫做 Deiulemar Compagnia di Navigazione S.P.A. (死火打足成日打到識串) 架嘛…

仲有呀﹐我個名叫做 Tommy﹐雖然個名係有 d childish ﹐但唔該唔好再 “Hi Tony, …” 啦！你叫我 Thomas 的我 OK 無問題, but no “Tony”, please.

Deiulemar.....

p.s. 補充番 2006 年 12 月 19 日的「勝香園 與 蘭芳園」

戀愛夢遊中 @ BC x Kubrick

去左 BC 睇「戀愛夢遊中」(The Science of Sleep)。睇戲之前就先係最就腳的 Kubrick 食 dinner 喇。係就係貴左少少﹐但係真係幾好食喎﹐個 quality 完全係番晒度喇。

上次我無意中咁食到呢間野的 Spaghetti Carbonara﹐就愛上左佢 (呢種描繪手法好奇怪)。你睇下佢個樣幾靚就知。撈埋中間隻唔知乜野蛋 (咁細隻雞蛋？) ﹐個醬汁就更加係超級香濃﹐正呀！

跟住去睇戲﹐嘩…雖然我都係呢幾年先開始去 BC﹐但係我去 BC 的時候其實都好少人﹐估唔到佢今年十週年﹐一係唔做宣傳﹐一做宣傳就搵到咁多明星幫口。一多明星幫口﹐就即刻超多人﹐阿豬阿狗都走來呢度睇戲﹐你睇下幾多人。我咁耐以來係第一次見咁的「盛況」架囉。

套戲好好睇﹐原因有三。第一﹐好笑﹐仲要係將一個悲哀的故事拍得好好笑。第二﹐佢能夠將夢境的情況具體咁拍攝出來﹐勁。第三﹐佢能夠令你完場之後都唔捨得走﹐甚至之後都回想翻佢的畫面。我俾 8 分。

嘩！史納莎護主呀！

[新聞]史納莎護主勇鬥惡犬重創 救主人胞姊 不敵兩唐狗被啣走 (明報) 01月 02日 星期二 05:10AM

【明報專訊】元朗錦上路昨日上演一幕忠犬護主記。一隻7歲大史納莎犬，昨早由女主人胞姊帶出屋外散步時，鄰屋兩隻大唐狗突撲出伏擊，女子被惡犬圍攻，幸身上穿厚衣，未有受傷；史納莎犬護主心切奮力還擊，無奈雙方體型懸殊，史納莎犬頸部被噬，更被啣回唐狗家中，唐狗狗主最終棒打雙犬，將史納莎救出交還女子，史納莎負傷吐血，被送往獸醫診所搶救，幸無生命危險。

史納莎犬女主人對愛犬遇襲深感憤慨，指兩隻涉案「兇狗」已非首次襲擊其愛犬，兩狗的狗主曾允諾替牠們戴上口罩，但事隔不久又再發生同類事件，令她非常無奈。漁護署其後派員將兩隻逞兇唐狗帶走檢驗。

被噬頸吐血 需縫8針

忠心護主受傷的7歲大雄性史納莎犬「阿B」，身長約2呎，其頸部被咬至大量流血，被送到元朗一間獸醫診所搶救，幸無生命危險，但傷口需縫上7至8針，並要留醫一晚。阿B的女主人姓韓，與胞姊及各自的男友同住元朗錦上路600號金爵花園L座。據韓姊表示，阿B個性活潑好動，兩姊妹會輪流帶牠外出散步。

昨早11時許，韓姊趁新年假期，抱阿B外出，當時阿B一離開屋外即跳到地上奔跑，但此際鄰屋兩隻唐狗突然撲出，包圍襲擊韓姊，幸她當時穿厚衣，未被抓傷咬傷，僅雙手因拉狗帶被勒至紅腫。阿B護主心切，奮力還擊，咬住其中一隻唐狗的臀部，另一唐狗則撲出襲擊阿B，對方體形龐大，阿B寡不敵眾，慘被咬傷頸部，鮮血直迸，負傷癱臥地上，遭唐狗啣走(嘩...勇成咁)。

漁護署帶走檢驗兩逞兇唐狗

韓姊緊追兩犬至牠們家中，當時鍾姓屋主赫見兩犬又闖禍，馬上拿出木棒猛打牠們(嘩....)，令牠們終「放口」拋下阿B。韓姊稱，當時鍾只對她說﹕「妳帶牠（阿B）去看醫生吧，帳單拿回給我付錢。」韓姊立即帶愛犬到鳳悠南路一間獸醫診所治理。她稍後亦因受輕傷及受驚，要由救護車送院檢驗，幸無大礙。

雖然愛犬獲救，但韓氏姊妹仍對兩隻涉案「兇狗」餘怒未消，她們致電將事件通知警方，漁護署稍後派員將兩犬帶走檢驗。

韓氏姊妹說，不久前阿B才被該兩隻唐狗襲擊受輕傷，當時狗主曾允諾替兩犬戴上口罩，防止牠們再次「作惡」，但有人疑無守信，令阿B這次受重創入院，韓氏姊妹又是擔心，又是憤怒。

----------------

睇完﹐又覺得開心又覺得唔開心﹐不過係唔開心的多。

開心的﹐係有傷未有亡﹐兩隻唐狗 so far 都未有咩事住。

唔開心的﹐反而係驚果兩隻唐狗遲d 會有咩三長兩短。好多人一睇就會話「抵果兩隻狗死啦」咁﹐但係﹐抵死的真係隻狗嗎？我覺得係唐狗個主人。

大家通常有一個好錯的 concept, 就係覺得唐狗都係好惡的﹐好凶狠的﹐好容易咬人的。所以大家一見到唐狗通常都係退避三舍。

拿番呢個 case 來睇﹐如果唐狗主人係負責任的﹐點解唔幫佢地戴口罩先呢？其實戴口罩都好慘﹐因為佢地係用個口呼吸同散熱的﹐如果你俾人用幾個衣夾夾住個咀同鼻﹐你都仲勉強開到幾個洞仔呼吸﹐再用保鮮紙包均你個身 (狗的身體係無汗腺的﹐唔可以排汗散熱)﹐你唔會死得住的﹐但肯定辛苦死你。

唔戴口罩﹐好好地圍起一個地方俾佢地係裡面﹐唔會走來走去都好掛？都唔係﹐原來呢位大兄係用「放養」的形式來養佢地的。住城市入面的人可能唔清楚﹐「放養」係一d 「村落」或者係村屋為全的地方﹐係一件幾經常出現的事情。放養本身唔係問題﹐問題在於放養貓狗的人﹐十之八九都無咩 common sense and/or 責任感﹐唔覺得佢地要教好隻狗先放養﹐唔覺得佢地要為d 貓狗做絕育先好放養。所以通常放養得的﹐通常都係等於「話之你」。

當然無論幾時講都係教好隻狗就係最最最重要﹐但係真正有心咁做的人﹐真係少之又少。觀乎呢個唐狗主人到後來要「棒打雙狗」先可以令佢地放口﹐你就知呢個主人同隻狗的關係﹐有無 train 過隻狗﹐真係好極有限。

話說回來﹐最無辜的﹐除左係受傷的一人一狗之外﹐就係果兩隻唐狗。

你睇下﹐做一個唔負責任的狗主﹐唔單止會傷害到人地﹐仲會傷害到自己﹐絕對絕對唔單止係「隻狗唔係幾乖」咁簡單！！

[新聞] 少女情困 跳樓掛屍屋外

少女情困 跳樓掛屍屋外 (2007-01-02 05:35:00)

新年倒數竟變生命倒數！屯門一名妙齡女子，除夕夜與初戀情人慶祝後，至元旦凌晨由男友送返家時，有人突提出分手，女事主不堪刺激，突危坐在19樓住所門外欄河

在半小時後、她當男友和家人面前一躍而下慘死，還掛屍大廈對開的有蓋行人路頂部，死狀異常恐怖。女事主的母親和男友目睹其慘死，情緒激動，同需送院檢查。

墮樓妙齡女黃詠儀（21歲），與父母和一妹居於屯門田景其中一幢大廈的19樓。她中學畢業後，即投身社會工作，且頗顧家，父母都視她為孝順女。　

黃在數年前已認識同齡的姓梁男友，梁更是其初戀情人，她頗投入這段戀情，視梁為終身伴侶。據悉，黃事前刻意準備了一份禮物，卻換來男友另一份「死亡」新年禮物。

男友斷言緣盡 晴天霹靂　

據悉，二人在除夕夜結伴出外慶祝，但在歡樂背後已暗藏危機。在凌晨約3時半，黃女帶甜蜜的心情，在男友陪伴下返回田景樓的19樓住所門外時，梁突提出分手，斷言雙方緣盡於此，態度且十分決絕。　

黃女突情緒失控跑向欄河，然後背向大廈危坐在欄河的鐵枝上，準備隨時一躍而下。男友見狀大驚，但又怕趨前會令黃立即做出傻事，只好站在遠處不斷好言相勸，又通知黃女的父母和胞妹協助。未幾，黃的母親和胞妹跑至加入游說，可惜還是無法將情困的女事主勸回安全地方。　

另一方面，附近居民發現有人危坐欄河，便通知大廈保安員，而54歲的鄧姓男保安員隨即報警。警員趕到續向女事主勸說，而消防員到場後亦在大廈對開打開救生氣墊，以防萬一。

未跌中救生墊 當場慘死　

未料，在半小時後，黃女似乎感到此情不再，終於選擇在元旦日走上絕路，突然縱身躍下，卻未跌中救生氣墊，而是直摔氣墊旁行人路的頂蓋，發出隆然巨響，最後上半身懸空倒掛在頂蓋的邊緣，當場肝腦塗地，而且鮮血不斷往下滴，場面異常恐怖。　

父母及男友目睹這突如其來的一幕，不禁失聲慘叫，可惜已無法改變事實。與此同時，救護員和消防員馬上衝前救援，惟證實黃已明顯死亡，再無送院必要。隨後消防員把女事主遺體搬到地面，交由仵工移送殮房。　

警方經過調查，證實事件並無可疑；而女死者的母親和男友，因為情緒太過激動，要由救護車送院檢查；痛失愛女的黃母被送抵醫院時，不斷叫喚：「點算呀？點會咁？女呀，你返啦！」令人聞之心酸。直到昨天下午4時，黃的胞妹等親友，到墮樓現場路祭，逗留十多分鐘後離去。
------------------------------------

第一個感覺：呢件事個女仔好無辜。

點解我會咁樣諗呢？原因係因為呢個男仔要負好多的責任。我唔係話佢同個女仔講分手所以攪到佢自尋短見﹐而係佢明知呢件事係咁大件事的時候﹐點可能選一個咁樣的 timing 來提出分手的呢？

除夕晚﹐普天同慶﹐呢個時候講已經係非常之不合適﹐此其一錯。

扮到若無事咁帶佢去同d friends 玩足一晚先至講﹐盡興一晚咁開心之後講分手﹐極之唔 make sense, 此其二錯。

送到番屋企呢個最二人世界又最 lum 的一刻﹐先來俾一個最殘酷的事實佢知﹐等於包起五星級餐廳加埋樂隊伴奏再加鮮花﹐先同佢講「我地玩完啦傻妹！」一樣咁玩火﹐此其三錯。

「態度決絕」毫無轉彎餘地﹐係咁唔適合的環境之下仲要係佢自己屋企面前先來講到咁絕﹐蠢到死﹐此其四錯。

若然佢地的戀情係之前從來都無危機出過﹐今次係男方係毫無預警之下突然爆出來的話﹐心理準備都唔俾d 女方的話﹐就更錯。

講到底﹐應該跳樓死的係個男仔﹐唔係個女仔。我真係好「登」個女仔唔抵。

-------------------------

令我諗起一隻陳奕迅的新歌 「富士山下」 的歌詞。 林夕今次係呢首歌的詞裡面﹐沒有開宗明義咁大談情愛﹐反而係用左好多好多「意境」的手法同間接手法去寫﹐於是呢﹐當然囉﹐大家都唔明佢想講乜野。 Search 一下 Internet 就唔難發現﹐好多人都想問到底呢首歌的詞係講乜野的呢？

網民意見眾說紛紜﹐我比較接受有一位叫做 Jesse Mok 的說法﹐大意就係講一個男仔同女仔講分手。成首歌就係講佢點樣同個女仔講分手。但係可以睇得出幾點﹐就係呢個男仔特登選擇情人節先來同個女仔講分手﹐而且成個過程都係自說自話﹐完全唔明白 / 理解個女仔的諗法﹐仲要講埋d 廢到無論的說話例如「其實你覺得的呢d 悲傷都係虛假的...過一排你就會無事」等等。

簡直同案中的男仔無分別一樣。

原來一個人戇居﹐真係可以累人累物到咁的地步。

附： Jesse Mok 對「富士山下」歌詞的解讀 http://jessemok.mysinablog.com/index.php?op=ViewArticle&articleId=347659