金銀 ‧ 天與地の怒

無錯...就係繼四本之角同老山龍之後﹐村長的壓軸表演。

話說我第一次打就打贏到四本之角﹐開心到震﹐以為自己勁到飛起。就拿住把生果刀咁細的「絕一門」走去打長闊高都超越波音 747 咁的老山龍。

又拿唔夠大爆 G, 又以為係咁打肚就得﹐用擊龍槍的時機又拿掐得唔準確﹐當然就係守唔住個城﹐被俾撞左十次喇。後來發現佢怕火﹐就走去整把火大刀...貪大刀斬起上夠高﹐雖然我真係好耐都無用過大刀...

後來 十個大爆 G + 火大刀洗面 + 擊龍槍 + 投石炮 + 無限砥石 = 攪掂

之後竟然就係到村長任之極 - 金銀天與地之怒

我連單一隻金火龍 or 銀火龍都未打過﹐都唔知道佢地的攻擊模式係點樣﹐咁點打佢兩隻一齊呢？仲要係一個咁細的地方裡面打﹐又無得走﹐又無得屈﹐我抱住「見到佢個樣都死得眼閉」的心態﹐衝入大技鬥場﹐就係我見到銀火龍望住我的一下﹐我地四目交投﹐然後金火龍來一招動力火車........玩完。

尋晚再試﹐試過長槍企上高台死擋﹐傳說之雙刃狂屈 (被屈)﹐因陀羅單片手係 so far 可以支持得最耐的。基本上只要銀火龍再飛多d 天落少d 凡間﹐咁我就可以專心攪掂金火龍先。攪得掂金火龍﹐單銀一隻就唔再係威脅。

都唔得的話﹐唯有試下用盡十五粒閃光彈。同埋一套比紅速龍 G 強的裝。