潮吹花市

已經係年三十晚﹐但係我都係未行花市。係好少有的事﹐因為我本身係好鐘意行花市的……以前啦講緊。

因為今年好似無乜時間去行花市﹐農曆年前又無假期﹐於是得番今晚。仲有就係要買衫。受父母傳統思想影響﹐總覺得要買番件新衫過年先似樣的。於是變左下午趕買衫﹐夜晚趕團年﹐深夜趕花市﹐清晨趕番屋企訓覺。

最開心係買左件 Quiksilver 的減價貨。三件再八折﹐最不同的地方係只限減價貨三件先有得八折﹐正價貨反而係無論點玩都無得折﹐少見﹐清貨之決心路人皆知。套用 N 年前容少的語句：「型狠爽快死」地買足三件﹐不過五舊幾。全部原價？我諗過千都似。

趕團年﹐盆菜。老實講﹐無乜野食。唔飽。

趕花市﹐十二點正的時候入去﹐逼到想死。如果拉登撞架機落維園﹐相信死亡人數可媲美 911…….唔﹐咁講好似衰左少少。

咁換個講法﹐如果呢個時候維園裡面一人痾一篤屎﹐垂直疊起應該可以堆到回歸紀念塔咁高 (或者咁似)。

我都算一米七幾。但係入到去都完全呼吸唔到。整番首謝檸檬的「非走不可」俾自己先得。

搭下電車﹐食下海皇粥店﹐唔夠皮﹐再食下麥記的板燒衰女包餐﹐終於都飽。望望錶﹐三點三 (Oh, Tea time~!!!)﹐係時候試下再衝鋒。

入到去﹐都係呼吸唔到﹐但比較鬆動了。

今晚吹氣物件的風氣大盛﹐係因為舊年的吹氣「鐵頭功」同「摺凳」都居然大受歡迎。有道是「食髓知味」﹐今年人人都攪吹氣公仔﹐乜 Q 野實物都變成吹氣公仔。係每位消費者都希望用最少的錢買最「大」件的收成品的思想底下﹐基本上乜野吹氣公仔都好賣得。其中﹐我覺得「奪命鉸剪腳」係最似咸濕吹氣公仔的……

又一年。我的金豬終於都來到喇！