Nokia 6300

星期五﹐年廿九

近放工的時候老豆打電話來話要食銅記沙爹王。我好奇怪﹐聽日就係星期六兼年三十晚仲要係紅日﹐今晚條街當然係逼到痴肺﹐銅記更加係「奧賣桔」地逼﹐點解向來怕等位的老豆話要出來食呢？原來係因為細佬要買電話。

因為阿媽慣性遲到的關係﹐所以呢餐飯食左足足個半鐘﹐食到左右兩邊的檯都走左幾轉了。之後細佬買電話堅持﹐拿﹐係堅持呀下﹐要買Nokia 3250 的手機。原因係因為佢的朋友用開﹐而佢又玩慣左有感情咁話喎。In case 你唔知邊部係 3250, 就係有得扭腰果部….個底可以扭到180 度果部。

好唔容易搵到衛訊係銅記的店﹐入到去買。佢地話「無晒貨架喇」

我心諗「咁大部機都賣斷市？無理由卦…佢個樣好 clumsy 架喎…」問道：「仲會唔會翻貨？」

Sales: 「都唔知…應該都唔會架喇…因為隻機的銷情好差﹐都無乜人買的。Nokia 都因此早已停產 3250…」

下？原來係咁！我仲以為…原來係相反

但我細佬堅持要呢部。

後來問起原來佢要一部影到相的手機。但係唔會要來聽歌。又唔會常講電話喎。

咁直接買部 DC 咪一了百了囉。佢嫌麻煩喎。

俾錢的阿媽例牌的回應係「由得佢啦」。

細佬知道有邊度仲有得賣。我地去到﹐佢地話最新出左隻 Nokia 6300 喎。無論係顏色﹐聽歌﹐仲外型﹐統統都 so much better than 3250…連果度的老闆都差d 想話我細佬戇居…只係差在未講出口﹐取而代之的係「好奇怪」﹐「R 爆頭都諗唔明」等等的用詞。

果個老世講的野﹐我明﹐我好明白添。但俾錢的唔係我﹐用機的都唔係我﹐我盡力講過﹐佢地兩個唔聽我講都無法。

老世拿住部機出來 dem 左五分鐘俾我細佬睇﹐佢拿係手上面把玩一陣﹐臉上一幅「原來天外有天」的樣子﹐然後我問部機推出市場幾耐﹐老世話不到十天。

咁部機真係好薄﹐好靚﹐個 mon 的色真係靚爆﹐成個樣都好唔錯….最緊要﹐佢係比 3250 仲平仲新囉。撞鬼。

眼見二少爺已經蠢蠢欲動﹐阿太后又一幅想拿拿聲俾錢走人的樣子﹐本王當然要立刻叫大家都冷靜下先。我同二少講﹐決定係你做的﹐但係錢係太后俾的﹐你都要盡番個責任﹐做個格價﹐睇下其他地方會唔會有平d 的 offer, 會唔會行多兩步到過隔離鋪﹐原來就已經平左幾舊水﹐或者送多張 1GB memory card 咁。始終依家講緊買幾千蚊一部手機﹐仲要係部十分鐘前先「初次邂逅」的手機﹐仲要第一次係呢間鋪頭買。

要行多兩間格下價﹐係咪好正常先？唔好話手機﹐好多比較貴的耐用品﹐都應該要格下價﹐right?

Sorry, 阿二少唔係咁諗。佢話﹐唔使煩喇﹐唔諗喇﹐唔格價喇﹐就要佢啦。

我都仲係覺得咁貴的手機真係應該要睇多幾間先得所以正想開口講d 乜野的時候說時遲那時快太后就已經俾左錢前後不過十五分鐘盛惠二千六呀唔該格清一聲收銀機已經傳來收好錢的聲音

果真技驚四座。本王當場呆左。

…………..唔知係因為部手機實在太吸引﹐所以唔即刻買唔得; 定係因為d 錢唔係佢的﹐所以根本唔使諸多顧慮; 定係因為佢俾個老世 sale 得好行﹐把持不住; 定係因為佢真係覺得格價好煩﹐所以費事煩; 定係因為呢個阿哥實在太煩﹐係度阿之阿左嘈生晒﹐所以不如快刀斬亂麻求其要左佢算。

-----=======--------------========-------

有朋友講得好。

呢個唔係錢唔錢的問題﹐唔係手機定洗衣機的問題﹐而係教育的問題。

作為父母﹐應當身教﹐但自己都唔去做﹐點能夠教到下一代識得「知慳識儉」呢回事呢。

所謂「小富由儉﹐大富由天」﹐本王雖然都係國庫空虛﹐但起碼都有幾擔金元寶﹐未至於赤字﹐亦從不須要借國債。節約﹐不論是節約能源﹐節約物慾﹐還是節約金錢﹐都是從生活細微處入手﹐方成大業。