金豬初一 喜氣洋洋

年初一﹐恭喜發財。今年係金豬年﹐祝大家發似豬頭﹐祝自己豬運亨通﹐祝各位肥似豬嘜。

點解今年叫做「金」豬年的呢？唔明…但人人都係咁講﹐我又跟住講。

每一年的年初一﹐節目大致上都係咁…….又係 lunch 去祖母家拜年兼吃飯。之後馬拉松式拜年﹐touring around HK KLN NT。

以前過年﹐阿爸阿媽好著重。好多野﹐都執得好緊。我以為﹐人人的農曆新年都好似我咁。

之前﹐就一定要好好執乾淨屋企。

一定要有全盒﹐裡面放好多種新年的食品。例如極難食的糖蓮藕。

一定要有「樣樣有」的一紮菜﹐雖然我過左咁耐都攪唔清楚﹐到底一紮「樣樣有」﹐係「有乜野」係裡面﹐各自代表的兆頭又係乜野。

一定有新的佈置。床頭一定有阿媽準備好的一封利是﹐兩個桔﹐一件年糕仔﹐用來迮年。

年三十晚一定會有盞燈係開通宵﹐阿媽話係「長明燈」﹐類似的寓意係將來一年﹐呢頭家的人將會年年燈火長明。燈火呢家野﹐係中國人的傳統文化中通常都扮演人丁和年歲的角色。例如添男丁就會係祠堂多點一燈﹐年歲將盡就叫「油盡燈枯」等等。

年初一唔准洗頭﹐唔准掃地。打爛玻璃都要用手逐粒逐粒執番起。

唔准講個死字。四字都唔准。咁點叫「四姑媽」？「試」姑媽 (汗)

唔准垂頭喪氣。就算之前行年宵行到朝早六點﹐執平貨買平花﹐今朝八點先訓十點就起身食 lunch, 都要精神奕奕。

一定要著新衫﹐仲一定要勁 formal 咁裇衫西褲打 tie 黑皮鞋 gel 行晒個蛋撻頭 (但記住年初一係唔准洗頭架喎, even though 你成頭都係 gel)

到我讀高中的時候﹐先可以開始自己 keep 番自己的利是錢﹐更年幼的時候是全數「上繳中央」的。所以我細個的時候﹐除左會得到對我來說是天文數字的利是錢之外﹐我一d 都唔期待農曆新年。

但係…….唔知係咪因為阿爸阿媽年紀大左﹐睇開左﹐或者唔夠我大聲 (嘿嘿)﹐所以對我已經無咁堅持以前的種種習慣。

我覺得今年最大的突破﹐係我無著裇衫西褲﹐重要係著Quiksilver白裇衫 (very casual 有晒花有晒字果種) 加一條牛仔褲 (農曆年大忌) 的時候﹐阿爸竟然無黑口黑面。神蹟。

至於洗頭呢樣野……我一早就唔理。掃地都係。

但係呢…..我 feel 到我反而係 keep 住會叫佢地唔好講個死字果個囉。好似今日咁呢﹐我都叫過阿爸阿媽唔好講個死字呀﹐新正頭呀。出門口之前又同我阿媽講「個領飛晒出來咁點見得人架」。

果一下的感覺﹐好奇怪。十年前的今日﹐呢份「任務」係我父母對我呢隻奀皮仔做的﹐十年後的今日﹐竟然係角色對調﹐由我來 uphold 呢d 咁「娘」的 traditions. 同佢地講 「年初一呀﹐唔好提人地阿邊個邊個的邊個﹐同埋人地的咩咩咩呀」咁…媽說：「得喇﹐好長氣呀你」

Hehe…

歲月無聲消逝。