Wednesday, February 14, 2007

清湯牛肉



尤記得友人來電的時候說:「喂我搵到間野食﹐好似叫做清湯牛腩咁﹐不如去食囉。」

「OK 呀」我說﹐我想起天后的華姐清湯腩。

「不過呢, 」友人說「佢話今晚會有最低消費喎」

清湯腩咋喎…咁都學人整最低消費?遲d 容乜易食車仔麵都有最低消費…?「有幾低?」(係反諷的問法啦好明顯﹐所謂最低消費其實即係逼大家俾一個高過本來可以消費得更低的為高….)

「每人 150 蚊喎。」

雖然位處人海之中﹐手提電話接收情況良好不用大叫﹐但我還是忍不住大叫了出來:「百五蚊一碗清湯腩~~~~?!?!?!佢無野呀….. (下省五十字)」四周人群報以奇視和歧視的眼光。

「咁又好似係貴少少的…你考慮下」

「下?仲考慮?唔使諗啦百五蚊碗麵………..咪住」

「咩呀」
「間野叫咩名」
「清湯牛腩」
「係邊」
「佐敦」
「…有可疑喎…你帶我去睇睇先﹐點可能百五蚊碗清湯腩」

左兜右兜﹐到了。友人說:「就係呢度喇…咦﹐乜原來係叫清湯牛肉」

灰色仿石牆﹐仲有日式便當店掛在門前的吊布 (真係唔知果幾塊布正名叫乜)﹐店子小小﹐只有一張 bar 檯﹐每人都坐在高高的 bar 檯上﹐每人面前都有一道蒸氣騰騰向上。是鍋子﹐是滾著湯的鍋子。每人都有一兩碟生肉片﹐擺放得整齊﹐又各有一碟蔬菜菇菌﹐都是生的。

食客們﹐當然﹐全部都「烚下烚下」咁…

咁擺明﹐呢個就係「一人一邊爐」。邊樹有清湯腩。日式的﹐Shabu Shabu 是也。

「喂﹐老世」我無好氣地說「呢間野叫做清湯牛……..肉﹐係食 Shabu Shabu﹐high class 野來的….你講俾我聽的﹐是清湯牛……..腩﹐係食魚蛋粉之類的﹐差好久遠喎。嚇得我以為邊間咁惡﹐連食個麵都要百五蚊。」

嘗試轉移話題意圖分散大家對漫天「囉」味的而不禁竊笑的友人續說:「我係 Openrice 睇過呢間野﹐佢標榜開業十多年來從不用味精。所有食品都堅持新鮮﹐少鹽﹐少油﹐少添加劑。以清淡健康為主。」

聽畢﹐我不禁打個寒噤。「無鹽、無油、無味精﹐咁我食咩?!」眾大笑

「食少d 呢d 野啦你…你就係食得太多鹽太多油﹐先攪到個身體咁差咋…又水腫又無精神」

「又關事?算﹐忍你」其實是明知他一針見血。

-------=========------------=========--------

打開 Menu, 不難明白為何會有最底消費….因為基本上每個人都會叫一個套餐﹐而每個套餐都起碼 $160, 再加 $20 湯底和醬料費﹐再加一服務費﹐基本上沒有可能不過 $150.

店子﹐老實說﹐不能說是「很有風味」。反而有種殘殘舊舊的感覺。你可以解讀作有歷史﹐有經驗﹐有故事﹐有人情味。但可以改善的空間亦不少。

我點了New Zealand 牛肉拼駝鳥肉﹐湯底則點了麵鼓味湯底。友人點了木魚清湯底…..真係超級激喪清。除了很香的木魚味﹐你會以為它是清水。

可能老闆本身是打算用清水的﹐以能最大效率地帶出食物的鮮味﹐但有幾多個顧客願意付這個價錢吃「白灼菜肉」?唯有加點木魚味。

咁當你見到佢標榜自己少鹽少油清湯打底﹐你會 expect d 乜野呢?無錯﹐就係新鮮的配料同埋食材本身最原始的味道。即係肉好有肉味﹐菜好有菜香。

呀對唔住﹐係無囉。

個牛肉﹐係我最大期望。我期望可以係無味精少鹽的情況之下﹐食得出最鮮的牛肉味係點…係失敗的。基本上我食唔出佢的牛肉有咩味。可能點貴價的安格斯牛肉會好好多。但咁樣我俾成二百蚊來食﹐為乜野呢?係咪好有被騙的感覺呢?

駝鳥肉﹐比較好﹐有一點兒靭﹐比較有多一點點香味。

菜…Ok la

飯…佢話係日本米﹐唔知係我唔識食定點﹐唔多覺。

其餘的都唔太特別。可能我未食到蔡瀾的level, 唔明點解佢話咁好食。

彈完﹐要讚。海鮮﹐友人點的海鮮﹐好味到爆。隻蝦﹐用佢的木魚水滾熟﹐乜都唔使點就咁食﹐香到呢….真係無得頂。

醬料…佢有自家製的芝麻醬同醋。都係唔咸的…少咸。但好香﹐點肉都唔錯。

服務一流﹐唔算爽手﹐但好好禮貌。

老闆話開左好多年 lu。係香港呢個被味精淹沒的城市﹐可以堅持少鹽少油少味精咁多年……(都仲未執)………真係好難得。雖然我唔 buy 佢的食物﹐但其誠可敬﹐其志可嘉。我好欣賞呢份執著﹐呢份堅持。咁佢挨到今日終於都圍起左一班支持者﹐都係佢應得的。Tommy 仔肅然起敬。

但如果話試多次就…要審慎樂觀咁考慮下先啦。

-=-=-=-=-=-=-=-=-=-=-
清湯牛肉 Shabu Shabu
地:油麻地長樂街 28 號 (點去呢?拿﹐聽住﹐搭 MTR 到佐敦 B2 出口﹐直出﹐第一個街口轉左…只能轉左因為右邊是佐敦道大馬路…行兩個街口就到﹐係正你面前。行路的﹐沿彌敦道北行過「劉愷威」後兩個街口。)
電:2780-2125
大約 $180-200 @ ; 晚上 12:00 關門
心理準備:一字記之曰:淡~~~~~~~~

2 comments:

Anonymous said...

Happy New Year Tommy!

Tommy said...

恭喜發財呀 On dog!